ᲘᲤᲮᲘᲖᲚᲔᲗ!
რატომ იწვევს პოლიტიკა საზოგადოების პოლარიზაციას? რას ამბობს ბიბლია?
ფაქტია, დღეს მსოფლიოში ერებს არ გააჩნიათ პოლიტიკური ერთობა. 2022 წელს „პიუს კვლევითმა ცენტრმა“ გამოაქვეყნა 19 ქვეყანაში ჩატარებული კვლევის ანგარიში, რომელშიც აღნიშნული იყო: „გამოკითხულთა დაახლოებით 65% მიიჩნევს, რომ მათ ქვეყანაში სხვადასხვა პოლიტიკური პარტიის მხარდამჭერებს შორის საკმაოდ დიდი და მწვავე უთანხმოებაა“.
შეგიმჩნევიათ, რომ პოლიტიკა დღითი დღე უფრო ხლეჩს საზოგადოებას? რა არის ამის მიზეზი? არსებობს გამოსავალი? რას ამბობს ბიბლია ამ საკითხზე?
საზოგადოების პოლარიზაციის მიზეზი
ბიბლიაში ნაწინასწარმეტყველები იყო, რომ ჩვენს დროში, რომელსაც „ბოლო დღეები“ ეწოდება, ხალხი თავიანთი დამოკიდებულებების გამო ვერ შეძლებდა ერთობის შენარჩუნებას.
„ბოლო დღეებში მძიმე და ძნელად ასატანი დრო დადგება. ადამიანები იქნებიან საკუთარი თავის მოყვარულები,.. ჯიუტები“ (2 ტიმოთე 3:1—3, იხ. სქოლიო).
მიუხედავად ბევრი ადამიანის გულწრფელი მცდელობისა, ხელისუფლებები მაინც ვერ ახერხებენ, ეფექტიანად მართონ პროცესები. აზრთა სხვადასხვაობის გამო ხალხს უჭირს გუნდურად მუშაობა და ვეღარ აგვარებენ პრობლემებს. აშკარაა, ბიბლიაში დიდი ხნის წინათ ჩაწერილი დღეს ზედმიწევნით სრულდება.
„კაცი კაცზე ყოველთვის მძლავრობდა მისდა საზიანოდ“ (ეკლესიასტე 8:9).
ბიბლია იმაზეც საუბრობს, თუ რა მოაგვარებს საზოგადოებაში არსებულ პრობლემებს. მასში ნათქვამია, რომ არსებობს მთავრობა, რომლის მმართველიც წერტილს დაუსვამს სოციალურ თუ სხვა პრობლემებს.
ყოველმხრივ მზრუნველი ხელისუფალი
ბიბლია გვიმხელს, ვინ არის უნაკლო მმართველი. ეს იესო ქრისტეა, რომელსაც აქვს ძალა, უფლებამოსილება და სურვილი, საზოგადოება ნამდვილი ერთობითა და მშვიდობით უზრუნველყოს.
„მის დროს გაიხარებს მართალი და იმეფებს მშვიდობა“ (ფსალმუნი 72:7).
„მას დაემორჩილება ყველა ხალხი“ (ფსალმუნი 72:11).
იესო იდეალური, სრულყოფილი და მზრუნველი მმართველია, რომელსაც სურს, დაეხმაროს ხალხს, განსაკუთრებით კი მათ, ვისაც უსამართლოდ ექცევიან.
„ის დაიხსნის ღარიბს, შველას რომ ითხოვს, საწყალსა და მას, ვისაც შემწე არა ჰყავს. ის შეიბრალებს საწყალსა და ღარიბს, გადაარჩენს ღარიბებს. ჩაგვრისა და ძალადობისგან იხსნის მათ“ (ფსალმუნი 72:12—14).
შეიტყვეთ მეტი ღვთის სამეფოს შესახებ, რომლის მმართველიც იესო ქრისტეა. გაიგეთ ისიც, თქვენ რა სიკეთეს მოგიტანთ მისი მმართველობა და როგორ შეგიძლიათ მხარი დაუჭიროთ მას.
უყურეთ ვიდეოს „რა არის ღვთის სამეფო?“.
გაეცანით სტატიას „ღვთის სამეფო — ხელისუფლება კორუფციის გარეშე“.