მედიკოსები ახალგაზრდებში სოციალური მედიის გავლენაზე საუბრობენ — რას ამბობს ბიბლია?

2023 წლის 23 მაისს აშშ-ის ერთ-ერთმა ჯანდაცვის ორგანომ გამოსცა დასკვნა და საზოგადოებას გამაფრთხილებელი სიგნალები გაუგზავნა, თუ რა ნეგატიურ გავლენას ახდენს სოციალური მედია ახალგაზრდებზე.

• „მართალია, სოციალურ მედიას გარკვეული დადებითი მხარეები აქვს, მაგრამ ის რისკებსაც შეიცავს და შესაძლოა ბავშვებისა და მოზარდების მენტალურ და ფიზიკურ ჯანმრთელობას ზიანი მიაყენოს“ („სოციალური მედია და ახალგაზრდების მენტალური ჯანმრთელობა“, აშშ-ის მთავარი ქირურგის დასკვნა, 2023).

ამავე დასკვნაში მოცემულია ზოგიერთი კვლევის შედეგი, რომელიც შეშფოთების საფუძველს იძლევა:

• 12—15 წლის მოზარდებში, „რომლებიც დღეში სამ საათზე მეტ დროს უთმობენ სოციალურ მედიას, ორჯერ მეტია იმის ალბათობა, რომ მენტალური ჯანმრთელობის პრობლემები შეექმნათ, მაგალითად, შფოთვამ და დეპრესიამ იჩინოს თავი“.

• 14 წლის თინეიჯერებში, „განსაკუთრებით კი გოგონებში, სოციალური მედიის ხშირმა გამოყენებამ შეიძლება გამოიწვიოს ძილის დარღვევები, დაბალი თვითშეფასების გრძნობა და ფსიქოლოგიური პრობლემები. ამასთანავე, დიდია კიბერბულინგის რისკი“.

როგორ შეუძლიათ მშობლებს შვილების დაცვა? ბიბლია პრაქტიკულ რჩევებს გვთავაზობს.

რისი გაკეთება შეუძლიათ მშობლებს?

შეაფასეთ რისკები. მშობლებო, დაფიქრდით, რა საფრთხეს შეიძლება შეიცავდეს სოციალური მედია და გადაწყვიტეთ, მისცემთ თუ არა შვილს მისი გამოყენების უფლებას.

• ბიბლიური პრინციპი: „ისე აღზარდე შვილი, რომ სწორი გზით იაროს“ (იგავები 22:6).

• დამატებითი ინფორმაციისთვის წაიკითხეთ სტატია „უნდა გამოიყენოს ჩემმა შვილმა სოციალური მედია?“.

თუ შვილს სოციალური მედიით სარგებლობის უფლებას აძლევთ, ყურადღებით იყავით, რომ არ გამოგრჩეთ პოტენციური საფრთხე და დროდადრო თვალი ადევნეთ, რით არის დაკავებული თქვენი შვილი ონლაინში.

დაიცავით შვილები საზიანო ონლაინმასალისგან. ასწავლეთ შვილებს, როგორ ამოიცნონ, რა არის საზიანო ონლაინმასალა და როგორ დაიცვან თავი მისგან.

• ბიბლიური პრინციპი: „თქვენ შორის არც კი იხსენიებოდეს უზნეობა, არავითარი უწმინდურება და სიხარბე, . . არც სამარცხვინო საქციელი, სულელური ლაპარაკი და უხამსი ხუმრობა“ (ეფესოელები 5:3, 4).

• პრაქტიკული რჩევების სანახავად წაიკითხეთ სტატია „ასწავლეთ შვილებს სოციალური მედიით სარგებლობა“.

დაადგინეთ ზღვარი. უთხარით შვილს, როდის და რამდენ ხანს უნდა გამოიყენოს სოციალური მედია.

• ბიბლიური პრინციპი: „მაშ, კარგად დაუკვირდით, რომ ისე . . . იცხოვროთ, . . როგორც ბრძენებმა; გონივრულად გამოიყენეთ დრო“ (ეფესოელები 5:15, 16).

• უყურეთ გრაფიკულ ანიმაციას „ნუ გაებმები სოციალურ ქსელში!“ და დაანახვეთ შვილს, რატომ არის აუცილებელი სოციალური მედიის გამოყენებისას ზღვარის დადგენა.