ომი ახლო აღმოსავლეთში – რას ამბობს ბიბლია?

მსოფლიო შეშფოთებული ადევნებს თვალყურს კონფლიქტს, რომელშიც შეერთებული შტატები, ისრაელი და ირანია ჩართული. გადაიზრდება ეს კონფლიქტი მასშტაბურ ომში? შეძლებენ ოდესმე მთავრობები, რომ თავიდან აირიდონ შეიარაღებული დაპირისპირებები და მშვიდობა დაამყარონ?

ზოგი შეიძლება ფიქრობს, რომ ახლო აღმოსავლეთში მიმდინარე კონფლიქტი ბიბლიის წიგნ „გამოცხადებაში“ მოხსენიებული არმაგედონის ომის დაწყებაზე მიანიშნებს.

რას ამბობს ბიბლია?

შეძლებენ მთავრობები ახლო აღმოსავლეთში მიმდინარე ომის დასრულებას?

ბიბლიაში ვკითხულობთ: „იმედს ნუ დაამყარებთ მმართველებზე, ნურც სხვა ადამიანებზე, რომელთაც არ შეუძლიათ ხსნა“ (ფსალმუნი 146:3).

დრო გვიჩვენებს, შეძლებენ თუ არა მთავრობები ამ სიტუაციის განმუხტვას. თუმცა ბიბლიიდან ვიგებთ, რომ არცერთ მთავრობას, პოლიტიკურ ლიდერს თუ ადამიანთა რომელიმე ჯგუფს არ შეუძლია დედამიწაზე ომების დასრულება და ნამდვილი მშვიდობის დამყარება. ამის ძალა მხოლოდ ღმერთს შესწევს. ბიბლიაში მასზე ნათქვამია: „ის წყვეტს ომებს მთელ დედამიწაზე“ (ფსალმუნი 46:9).

• მეტის გასაგებად შეგიძლიათ წაიკითხოთ ჟურნალი „საგუშაგო კოშკი“, სათაურით „ვინ დაასრულებს ომებს?“

სრულდება წინასწარმეტყველება ახლო აღმოსავლეთში მიმდინარე ომით?

ბიბლიაში ნათქვამია: „გაიგონებთ ომების ხმებს და მოისმენთ ცნობებს ომების შესახებ... ერი ერის წინააღმდეგ აღდგება და სამეფო სამეფოს წინააღმდეგ“ (მათე 24:6, 7).

სხვა ომების მსგავსად ახლო აღმოსავლეთში არსებული შეიარაღებული კონფლიქტი ქვეყნიერების აღსასრულის მოახლოებაზე მიანიშნებს და კიდევ უფრო გვარწმუნებს, რომ „ბოლო დღეებში“ ვცხოვრობთ (მათე 24:3; 2 ტიმოთე 3:1). დღეს მიმდინარე დაპირისპირებები იმის ერთგვარი ინდიკატორია, რომ მალე ღმერთი წერტილს დაუსვამს ომებს და ყველა იმ პრობლემას, რაც ადამიანთა ტანჯვას იწვევს.

• მეტის გასაგებად შეგიძლიათ წაიკითხოთ სტატია „რა არის „ბოლო დღეების“ ნიშანი?“

ახლო აღმოსავლეთში დაიწყება არმაგედონი?

ბიბლიაში ნათქვამია: „შეკრიბეს ისინი ადგილზე, რომელსაც ებრაულად „არმაგედონი“ ჰქვია“ (გამოცხადება 16:16).

არმაგედონის ომი არც ახლო აღმოსავლეთში დაიწყება და მასში არც მთავრობები დაუპირისპირდებიან ერთმანეთს. ეს ომი დედამიწაზე არსებულ ყველა მთავრობასა და ღმერთს შორის უნდა გაიმართოს.

• ამ საკითხზე მეტის გასაგებად შეგიძლიათ წაიკითხოთ სტატია „რა არის არმაგედონი?“

რა დაგვეხმარება, ასეთ რთულ დროსაც შევინარჩუნოთ სიმშვიდე?

ბიბლიაში ვკითხულობთ: „ნურაფრის გამო ნუ ჩაცვივდებით საგონებელში; ყველა თქვენი სათხოვარი ლოცვაში გაუმხილეთ ღმერთს, ევედრეთ და მადლიერებით მიმართეთ“ (ფილიპელები 4:6).

ყოვლისშემძლე ღმერთი იეჰოვაa მოგვიწოდებს, რომ ლოცვით მივმართოთ მას, რადგან აღელვებს ჩვენი მდგომარეობა. ის აუცილებლად შეისმენს ჩვენს ლოცვებს და დაგვეხმარება, რომ ასეთ დაძაბულ დროშიც კი შინაგანი სიმშვიდე შევინარჩუნოთ (1 პეტრე 5:7). ღმერთი ბიბლიის მეშვეობით გვაგებინებს, თუ რატომ ხდება ომები და ვინ დაასრულებს ამ ომებს. ის ერთხელ და სამუდამოდ აღმოფხვრის ყველაფერს, რაც ჩვენს ტკივილსა და საწუხარს იწვევს. სწორედ ამ ყველაფრის ცოდნა გვეხმარება, არ დავკარგოთ შინაგანი სიმშვიდე.

• მეტის გასაგებად, თუ როგორ ზრუნავს ღმერთი ჩვენზე შეგიძლია წაიკითხო სტატია „შესაძლებელია ბიბლიაში მანუგეშებელი აზრების პოვნა?“