რწმენა და შენი მომავალი

„რწმენა არის მტკიცე დარწმუნება იმაში, რაზედაც ვიმედოვნებთ“ (ებრაელთა 11:1, „ახალი აღთქმა და ფსალმუნი“, 1990 წლის გამოცემა).

1. როგორი მომავალი სურს უმრავლესობას?

დაინტერესებული ხართ თუ არა მომავლით? უმრავლესობა დაინტერესებულია. ისინი იმედოვნებენ, რომ მომავალი მშვიდობიანი იქნება, სადაც აღარ იარსებებს შიში, სადაც ადამიანები ხანგრძლივად იცხოვრებენ დამაკმაყოფილებელ პირობებში, ჯანმრთელები იქნებიან და დატკბებიან ნაყოფიერი და სიხარულის მომგვრელი შრომით. რასაკვირველია, ადამიანებს ყოველთვის სურდათ ასეთი მომავალი. და დღეს უსიამოვნებებით სავსე ამ წუთისოფელში ასეთი პირობები კიდევ უფრო სასურველია, ვიდრე ოდესმე.

2. რა აზრი გამოთქვა ერთმა სახელმწიფო მოღვაწემ მომავლის შესახებ?

² ახლა, XXI საუკუნის მიჯნაზე, არსებობს თუ არა რაიმე საშუალება, რომლის მიხედვითაც შესაძლებელია კაცობრიობის მომავლის განსაზღვრა? პატრიკ ჰენრიმ, ამერიკელმა სახელმწიფო მოღვაწემ, 200-ზე მეტი წლის წინათ ამის განსაზღვრის ერთ-ერთი საშუალების შესახებ გვამცნო. მან თქვა: „მომავლის განსაზღვრის საუკეთესო საშუალება წარსულის გამოკვლევაა“. ამ თვალსაზრისის თანახმად, საკაცობრიო ოჯახის მომავალი შეიძლება მნიშვნელოვანწილად განისაზღვროს კაცობრიობის მიერ წარსულში ჩადენილი საქმეებით. ამ აზრს მრავალი იზიარებს.

როგორი იყო წარსული?

3. რას გვიჩვენებს ისტორიის მატიანე მომავლის იმედებთან დაკავშირებით?

³ გაიმედებთ იმის გაგება, რომ მომავალი წარსულის ანარეკლი იქნება? გაუმჯობესდა კი მომავალი წინა თაობებისთვის? ფაქტობრივად არა, რადგან ათასობით წლის განმავლობაში ადამიანთა იმედებისა და ზოგ ქვეყანაში მატერიალური წარმატებების მიუხედავად, ისტორია აღსავსეა სისასტიკით, დამნაშავეობით, ძალადობით, ომებითა და სიღარიბით. წუთისოფელში ერთ უბედურებას მეორე ცვლის და ეს, ძირითადად, ცუდი მმართველობის შედეგია. ბიბლია სწორად აღნიშნავს: „კაცი კაცზე მძლავრობდა თავისდა საზიანოდ“ (ეკლესიასტე 8:9).

4, 5. ა) რატომ უყურებდნენ ადამიანები მომავალს იმედით XX საუკუნის დასაწყისში? ბ) რა დაემართა მათს მომავლის იმედს?

⁴ ფაქტია, რომ კაცობრიობის ისტორიაში მომხდარი საშინელებები კვლავ მეორდება, მაგრამ ისინი უფრო ფართო მასშტაბით ხდება და მეტი ზიანი მოაქვს. ამის ნათელ მტკიცებას XX საუკუნე წარმოადგენს. ისწავლა რამე ამ საუკუნეში მცხოვრებმა ხალხმა წარსულიდან და აირიდა წარსულში დაშვებული შეცდომები? საუკუნის დასაწყისში მრავალს სწამდა, რომ მომავალი უკეთესი იქნებოდა, ვინაიდან სხვა დროსთან შედარებით კარგა ხნის განმავლობაში მშვიდობიანად ცხოვრობდნენ და მრეწველობაში, მეცნიერებასა და განათლებაში გარკვეულ წარმატებებს მიაღწიეს. უნივერსიტეტის ერთმა პროფესორმა თქვა, რომ XX საუკუნის დასაწყისში ომი წარმოუდგენლად მიაჩნდათ, ვინაიდან „ადამიანები მეტად ცივილიზებულები იყვნენ“. იმ დროს ხალხში გაბატონებული თვალსაზრისი გამოხატა ბრიტანეთის ყოფილმა პრემიერ-მინისტრმა: „ყველაფერი უფრო და უფრო უმჯობესდებოდა. ასეთი იყო მსოფლიო, როდესაც მე დავიბადე, — მაგრამ შემდეგ ის ამბობს — უცებ, მოულოდნელად, 1914 წლის ერთ დილას, ყველაფერი გაქრა“.

⁵ იმ დროს გაბატონებული უკეთესი მომავლის რწმენის მიუხედავად ახალი საუკუნის გარიჟრაჟზე მთელი მსოფლიო მოიცვა ადამიანის ხელით გამოწვეულმა ყველაზე საშინელმა კატასტროფამ — პირველმა მსოფლიო ომმა. ამ ომის ხასიათის შესახებ წარმოდგენას შეგვიქმნის ერთი შემთხვევის განხილვა, რომელიც 1916 წელს საფრანგეთში, მდინარე სომას მახლობლად, ინგლისელთა ჯარების გერმანელებთან შეტაკებისას მოხდა. სულ რამდენიმე საათში ბრიტანეთმა დაკარგა 20 000 ჯარისკაცი; მრავალი დაიღუპა გერმანელთა მხრიდანაც. ოთხწლიანმა ხოცვა-ჟლეტამ დაახლოებით 10 მილიონი ჯარისკაცისა და მრავალი მშვიდობიანი მოქალაქის სიცოცხლე შეიწირა. ვინაიდან ომში მრავალი დაიღუპა, გარკვეული დროის მონაკვეთში საფრანგეთის მოსახლეობის რაოდენობა შემცირდა. ეკონომიკა დაეცა, რასაც 30-იან წლებში მსოფლიო ეკონომიკური კრიზისი მოჰყვა. გასაკვირი არ არის, რომ ზოგმა პირველი მსოფლიო ომის დაწყების დღეს მსოფლიოს გაგიჟების დღე უწოდა.

6. გაუმჯობესდა ცხოვრება პირველი მსოფლიო ომის შემდეგ?

⁶ ასეთ მომავალს მოელოდა ის თაობა? არა, სრულიად საპირისპიროს. მათი იმედები დაიმსხვრა; იმ ომს არაფერი უკეთესი არ მოჰყოლია. პირველი მსოფლიო ომის დამთავრებიდან მხოლოდ 21 წლის შემდეგ, ანუ 1939 წელს, ადამიანების ხელით უარესი კატასტროფა მოხდა; ეს კატასტროფა მეორე მსოფლიო ომი იყო. მან 50 მილიონი კაცის, ქალისა და ბავშვის სიცოცხლე შეიწირა. მასობრივმა დაბომბვებმა მიწასთან გაასწორა მრავალი ქალაქი. პირველი მსოფლიო ომის დროს ბრძოლაში სულ რამდენიმე საათში ათასობით ჯარისკაცი დაიღუპა, ხოლო მეორე მსოფლიო ომის დროს — სულ რამდენიმე წამში 100 000-ზე მეტი სიცოცხლე იმსხვერპლა მხოლოდ ორმა ატომურმა ბომბმა. მრავალი ბევრად უფრო დიდ საშინელებად მიიჩნევს ნაცისტურ საკონცენტრაციო ბანაკებში მილიონების უმოწყალოდ ხოცვას.

7. როგორია ამ საუკუნის რეალური სურათი?

⁷ რამდენიმე წყარო იტყობინება, რომ, თუ გავაერთიანებდით ერთა შორის ომებს, სამოქალაქო კონფლიქტებსა და მოქალაქეთა სიკვდილიანობის შემთხვევებს, რასაც თვითონ მთავრობები იწვევენ, ამ საუკუნეში დახოცილთა რიცხვი დაახლოებით 200 მილიონს მიაღწევდა. ერთ-ერთი წყარო 360 მილიონსაც კი მოიხსენიებს. წარმოიდგინეთ რა საშინელებაა ყოველივე ეს: ამდენი ტკივილი, ცრემლი, დარდი და შეწყვეტილი სიცოცხლე! გარდა ამისა, სიღარიბით გამოწვეული მიზეზებით ყოველდღიურად საშუალოდ 40 000 ადამიანი იღუპება, უმეტესწილად კი ბავშვები. აბორტების შედეგად დახოცილთა რაოდენობა ზემოთ მოხსენიებულ რიცხვს სამჯერ აღემატება. აგრეთვე დაახლოებით მილიარდი ადამიანი იმდენად ღარიბია, რომ ვერ ყიდულობს აუცილებელ საზრდოს, რათა დღის განმავლობაში ნორმალურად მუშაობისთვის საჭირო ენერგია ჰქონდეს. ყოველივე ეს ადასტურებს, რომ ბიბლიაში ნაწინასწარმეტყველებ ამ ბოროტი სისტემის „უკანასკნელ დღეებში“ ვცხოვრობთ (2 ტიმოთე 3:1–5, 13; მათე 24:3–12; ლუკა 21:10, 11; გამოცხადება 6:3–8).

ადამიანებს ხსნის ძალა არ შესწევთ

8. რატომ ვერ წყვეტენ ადამიანთა ხელმძღვანელები მსოფლიო პრობლემებს?

⁸ დღეს, მეოცე საუკუნის მიწურულს, გასულ საუკუნეებში მომხდარ შემთხვევებს შეგვიძლია ჩვენი საუკუნის მოვლენებიც მივუმატოთ. და რას გვეუბნება ეს ისტორია? ადამიანთა ხელმძღვანელები ვერც ადრე წყვეტდნენ მთავარ მსოფლიო პრობლემებს, ვერც ახლა წყვეტენ და ვერც მომავალში გადაწყვეტენ. მათ, რაც არ უნდა კეთილი განზრახვები ჰქონდეთ, უბრალოდ, ძალა არ შესწევთ ისეთი მომავლით უზრუნველგვყონ, როგორიც ჩვენ გვსურს. ზოგ ხელისუფალს არც აქვს კეთილი განზრახვები; ისინი მაღალი თანამდებობისა და ძალაუფლებისკენ სხვების საკეთილდღეოდ კი არ ისწრაფიან, არამედ საკუთარი ეგოისტური და მატერიალური მიზნების მისაღწევად.

9. რატომ არის საეჭვო, რომ მეცნიერება გადაჭრის ადამიანთა პრობლემებს?

⁹ იქნებ მეცნიერებამ გვიშველოს? თუ წარსულს გავითვალისწინებთ, მეცნიერებას ამის ძალა არ შესწევს. მთავრობის დავალებით მომუშავე მეცნიერებმა უზარმაზარი თანხები, დრო და ენერგია მოახმარეს შემზარავი, გამანადგურებელი ქიმიური, ბიოლოგიური და სხვა სახის იარაღის გაუმჯობესებას. ქვეყნები, მათ შორის განვითარებადებიც, შეირაღებაზე ყოველწლიურად 700 მილიარდზე მეტ დოლარს ხარჯავენ. აგრეთვე „მეცნიერული პროგრესს“ გარკვეული წვლილი მიუძღვის ისეთი ქიმიური ნივთიერებების წარმოებაში, რომლებიც ატმოსფეროს, ნიადაგს, წყალსა და საკვებს აბინძურებს.

10. რატომ ვერ უზრუნველგვყოფს განათლებაც კი უკეთესი მომავლით?

¹⁰ შეგვიძლია ვიმედოვნებდეთ, რომ მსოფლიოს სასწავლო დაწესებულებები მაღალი ზნეობრივი ნორმების, სხვებისადმი ყურადღებიანობისა და მოყვასისადმი სიყვარულის სწავლებით ხელს შეუწყობენ უკეთესი მომავლის შექმნას? არა. ნაცვლად ამისა, ისინი მთელ ყურადღებას კარიერასა და ფულის შოვნას აპყრობენ. ისინი თანამშრომლობის სულს კი არ ნერგავენ, არამედ მეტოქეობის. სკოლებში არც ზნეობრივ ნორმებს ასწავლიან. პირიქით, მრავალ სკოლაში თვალს ხუჭავენ სექსუალურ თავისუფლებაზე, რომლის შედეგადაც საგრძნობლად იმატა მოზარდებში ორსულობისა და ვენერული დაავადებების რიცხვმა.

11. რატომ ხდის საეჭვოს ჩვენს მომავალს სავაჭრო საწარმოების შესახებ ცნობები?

¹¹ გაუჩნდება უცებ მსოფლიოს დიდ სავაჭრო საწარმოებს ჩვენს პლანეტაზე ზრუნვის სურვილი და გამოავლენენ ისინი სხვებისადმი სიყვარულს ნამდვილად სასარგებლო და არა მხოლოდ მომგებიანი ნაწარმის გამოშვებით? ეს ძნელად დასაჯერებელია. შეწყვეტენ ისინი ძალადობითა და უზნეობით აღსავსე სატელევიზიო პროგრამების ჩვენებას, რომლებიც ხელს უწყობს ადამიანთა, განსაკუთრებით კი ახალგაზრდების, გონების გახრწნას? თუ ახლო წარსულის მიხედვით ვიმსჯელებთ, სანუგეშოს ვერაფერს ვიტყვით, რადგან უმეტესწილად ტელეგადაცემები უზნეობითა და ძალადობითაა აღსავსე.

12. რა მდგომარეობაშია კაცობრიობა დაავადებებსა და სიკვდილთან დაკავშირებით?

¹² რაც შეეხება მედიცინას, ექიმები მთელი გულითაც რომ ეცადონ, ისინი უძლურნი არიან დაავადებებისა და სიკვდილის წინააღმდეგ ბრძოლაში. მაგალითად, პირველი მსოფლიო ომის დასასრულს მედიცინამ ვერ შეაკავა ესპანური გრიპი, რომელმაც მსოფლიო მასშტაბით დაახლოებით 20 მილიონი ადამიანის სიცოცხლე მოსპო. დღეს გულის დაავადება, კიბო და სხვა სასიკვდილო დაავადებები ფართოდ არის გავრცელებული. მსოფლიო მედიცინამ ვერც შიდს-ის პანდემიას სძლია. პირიქით, გაეროს 1997 წლის ნოემბრის ანგარიშის დასკვნაში ნათქვამია, რომ შიდს-ის ვირუსი ორჯერ უფრო მეტი სისწრაფით ვრცელდება, ვიდრე ვარაუდობდნენ. ამ დაავადებამ დღემდე მილიონობით სიცოცხლე მოსპო. ახლო წარსულში კი კიდევ სამი მილიონი დაინფიცირდა.

რას ფიქრობენ იეჰოვას მოწმეები მომავლის შესახებ

13, 14. ა) რას ფიქრობენ იეჰოვას მოწმეები მომავლის შესახებ? ბ) რატომ არ შეუძლიათ ადამიანებს უკეთესი მომავლით უზრუნველყოფა?

¹³ იეჰოვას მოწმეებს სჯერათ, რომ კაცობრიობას ბრწყინვალე — საუკეთესო — მომავალი ელის! მაგრამ ისინი ამ უკეთესი მომავლით უზრუნველყოფას ადამიანებისგან არ მოელიან. ისინი ამას შემოქმედისგან, იეჰოვა ღმერთისგან, მოელიან. მან იცის, თუ როგორი იქნება მომავალი; ის ნამდვილად საუცხოო იქნება! ღმერთმა აგრეთვე იცის, რომ ადამიანებს არ შეუძლიათ ასეთი მომავლით უზრუნველყოფა, რადგან მან შექმნა ისინი და ყველაზე უკეთესად ხედავს მათ შეზღუდულ შესაძლებლობებს. ბიბლიაში ღმერთი ნათლად გვეუბნება, რომ მას ადამიანები ისე არ შეუქმნია, რომ ღვთიური ხელმძღვანელობის გარეშე შესძლებოდათ წარმატებით მმართველობა. ღვთის მიერ მისგან დამოუკიდებელი ადამიანთა მმართველობების ხანგრძლივი პერიოდის განმავლობაში დაშვებამ გამოავლინა, რომ ეს მართლაც შეუძლებელია. ერთი მწერალი აღნიშნავს: „ადამიანის გონებამ მმართველობის ყველა შესაძლო კომბინაცია მოსინჯა, მაგრამ ამაოდ“.

¹⁴ იერემიას 10:23-ში ვკითხულობთ ინსპირირებული წინასწარმეტყველის სიტყვებს: „ვიცი, უფალო, რომ ადამიანის ნებაზე არ არის მისი გზა, რომ მიმავალი კაცი ვერ წარმართავს თავის ნაბიჯებს“. აგრეთვე ფსალმუნის 145:3 ამბობს: „იმედს ნუ დაამყარებთ მთავრებზე, ადამის ძეზე, რომელსაც არ შეუძლია შველა“. ფაქტობრივად, როგორც რომაელთა 5:12 გვიჩვენებს, ჩვენ ყველანი დაბადებიდანვე არასრულყოფილები ვართ და ამიტომ ღვთის სიტყვა გვაფრთხილებს, რომ საკუთარ თავსაც არ მივენდოთ. იერემიას 17:9 ამბობს: „უნდოა ყველას გული“. ამიტომ იგავნის 28:26 აცხადებს: „საკუთარი თავის მოიმედე ბრიყვია, ხოლო ვინც სიბრძნით დადის, გადარჩება“.

15. სად შეგვიძლია ისეთი სიბრძნის პოვნა, რომელიც სახელმძღვანელოდ გამოგვადგება?

¹⁵ სად შეგვიძლია ამ სიბრძნის პოვნა? „უფლის შიში სიბრძნის სათავეა, სიწმინდეთა ცოდნა კი გონიერება“ (იგავნი 9:10). დიახ, მხოლოდ იეჰოვას აქვს სიბრძნე, რომლითაც შეიძლება ვიხელმძღვანელოთ ამ საშინელ დროში. და ის ამ სიბრძნეს ხელმისაწვდომს ხდის საღვთო წერილის საშუალებით, რომელიც მისი შთაგონებით ჩვენს სახელმძღვანელოდ დაიწერა (იგავნი 2:1–9; 3:1–6; 2 ტიმოთე 3:16, 17).

ადამიანთა მმართველობის მომავალი

16. ვინ განსაზღვრავს მომავალს?

¹⁶ მაშ, რას გვეუბნება ღვთის სიტყვა მომავლის შესახებ? მომავალი სულაც არ იქნება კაცობრიობის წარსულის ანარეკლი. ასე რომ, პატრიკ ჰენრის მოსაზრება მცდარია. დედამიწისა და მასზე მცხოვრები ადამიანების მომავალი იეჰოვა ღმერთმა უნდა განსაზღვროს და არა ადამიანებმა. დედამიწაზე მისი ნება უნდა შესრულდეს და არა ამ წუთისოფლის რომელიმე ერის ან ადამიანის. „მრავალი განზრახვაა კაცის გულში, მაგრამ მხოლოდ უფლის ჩანაფიქრი აღსრულდება“ (იგავნი 19:21).

17, 18. რა არის დღეს ღვთის ნება?

¹⁷ რა არის დღეს ღვთის ნება? მას განზრახული აქვს, ბოლო მოუღოს თანამედროვე მოძალადე, უზნეო წუთისოფელს. საუკუნეების განმავლობაში არსებულ ადამიანთა ცუდ მმართველობას მალე ღვთის მიერ ორგანიზებული მმართველობა შეცვლის. დანიელის 2:44-ში მოცემულ წინასწარმეტყველებაში ნათქვამია: „იმ [დღევანდელ] მეფეთა დღეებში ზეციერი ღმერთი დაამყარებს სამეფოს [ზეცაში], რომელიც უკუნისამდე არ დაიქცევა და მისი ხელმწიფება სხვა ხალხში არ გადავა. იგი შემუსრავს, და დააქცევს ყველა სამეფოს, თავად კი უკუნისამდე იდგება“. სამეფო სატანა ეშმაკის ბოროტ გავლენასაც მოსპობს, რასაც ადამიანები ვერასოდეს შეძლებენ. დედამიწაზე მისი მმართველობა სამუდამოდ აღიკვეთება (რომაელთა 16:20; 2 კორინთელთა 4:4; 1 იოანე 5:19).

¹⁸ ყურადღება მიაქციეთ, რომ ზეციერი მთავრობა ამოძირკვავს ადამიანთა მმართველობის ყოველგვარ ფორმას. ადამიანებს არასოდეს მიეცემათ დედამიწაზე მმართველობის უფლება. ღვთის სამეფოს წევრები ზეციდან გაუწევენ ხელმძღვანელობას დედამიწაზე ნებისმიერ საქმიანობას, რაც ადამიანების კეთილდღეობას მოემსახურება (გამოცხადება 5:10; 20:4–6). დედამიწაზე კი ერთგული ადამიანები შეასრულებენ ღვთის სამეფოს მითითებებს. ეს ის მმართველობაა, რომლის შესახებაც იესო გვასწავლიდა, რომ გველოცა: «მოვიდეს სუფევა [„სამეფო“ აქ] შენი, და იყოს ნება შენი, ვითარცა ცათა შინა, ეგრეცა ქვეყანასა ზედა» (მათე 6:10).

19, 20. ა) როგორ აღწერს ბიბლია ღვთის სამეფოს? ბ) რას მოუტანს კაცობრიობას მისი მმართველობა?

¹⁹ იეჰოვას მოწმეები ღვთის სამეფოზე ამყარებენ იმედს. ის არის ‘ახალი ცა’, რომლის შესახებაც მოციქული პეტრე წერდა: „მოველით ახალ ცასა და ახალ მიწას, სადაც დამკვიდრებულია სიმართლე“ (2 პეტრე 3:13). ‘ახალი მიწა’ ადამიანთა ახალი საზოგადოებაა, რომელსაც ახალი ცა, ღვთის სამეფო, უხელმძღვანელებს. ყოველივე ეს ღმერთმა მოციქულ იოანეს აჩვენა ხილვაში, რაც იოანემ შემდეგი სიტყვებით გადმოგვცა: „და ვიხილე ახალი ცა და ახალი დედამიწა; ვინაიდან პირველმა ცამ და პირველმა დედამიწამ გადაიარეს. . . და მოსწმენდს [ღმერთი] ყოველგვარ ცრემლს მათი თვალებიდან და აღარ იქნება სიკვდილი; გლოვა, გოდება და ტკივილიც აღარ იქნება; ვინაიდან პირველებმა გადაიარეს“ (გამოცხადება 21:1, 4, აფ).

²⁰ დაუკვირდით, რომ ახალ მიწაზე სიმართლე დამკვიდრდება. არმაგედონში ღვთის ძალით ყოველგვარი უსამართლობა განადგურდება (გამოცხადება 16:14, 16). იგავნის 2:21, 22 ამას შემდეგნაირად წინასწარმეტყველებს: „ალალმართლები უნდა დამკვიდრდნენ ქვეყნად და უმწიკვლონი უნდა გადარჩნენ. ურჯულოები ქვეყნიდან მოიკვეთებიან“. აგრეთვე ფსალმუნის 36:9 აღგვითქვამს: „ბოროტმოქმედნი ამოწყდებიან და უფალზე მინდობილნი დაიმკვიდრებენ ქვეყნიერებას“. არ ისურვებდით ასეთ ახალ ქვეყნიერებაში ცხოვრებას?

გწამდეთ იეჰოვას აღთქმების

21. რატომ შეიძლება გვწამდეს იეჰოვას აღთქმების?

²¹ შეიძლება გვწამდეს იეჰოვას აღთქმების? უსმინე, რას გვეუბნება ის თავისი წინასწარმეტყველის, ესაიას, მეშვეობით: „გაიხსენეთ წინანდელნი, დასაბამიერნი, რადგან მე ღმერთი ვარ და არ არის სხვა ღმერთი, არავინაა ჩემი მსგავსი. დასაბამითვე ვაცხადებ მომავალს და ძველიდანვე, რაც ჯერ არ მომხდარა. ვამბობ: აღსრულდება ჩემი განზრახული და ყოველ სურვილს ავასრულებ“. მე-11 მუხლის ბოლოში ნათქვამია: „ვთქვი და დიაღაც მოვახდენ; დავსახე და დიაღაც გავაკეთებ“ (ესაია 46:9–11). დიახ, ჩვენ შეგვიძლია გვწამდეს იეჰოვასი და მისი აღთქმების ისე მყარად, თითქოს ისინი უკვე შესრულდა. ბიბლია ამას შემდეგნაირად გამოხატავს: „რწმენა არის მტკიცე დარწმუნება იმაში, რაზედაც ვიმედოვნებთ, დადასტურება იმისა, რასაც ვერ ვხედავთ“ (ებრაელთა 11:1, აფ).

22. რატომ შეიძლება დარწმუნებული ვიყოთ, რომ იეჰოვა შეასრულებს თავის აღთქმებს?

²² თავმდაბალი ადამიანები ავლენენ ასეთ რწმენას, რადგან იციან, რომ ღმერთი შეასრულებს თავის აღთქმებს. მაგალითად, ფსალმუნის 36:29-ში ვკითხულობთ: „მართალნი დაიმკვიდრებენ ქვეყანას და იარსებებენ მასზე უკუნისამდე“. სარწმუნოა ეს სიტყვები? დიახ, ვინაიდან ებრაელთა 6:18 ამბობს: „შეუძლებელია ღმერთმა იცრუოს“. არის დედამიწა ღვთის საკუთრება, რომ შეეძლოს მისი თავმდაბლებისთვის მიცემა? გამოცხადების 4:11 ამბობს: „შენ შექმენი ყოველივე და შენი ნებით იყვნენ და შეიქმნენ“. ამიტომ ფსალმუნის 23:1 აღნიშნავს: „უფლისა არის ქვეყნიერება და სავსება მისი“. დიახ, იეჰოვამ შექმნა დედამიწა, ის არის მისი მფლობელი და თავის ერთგულებს აძლევს მას. ამ აღთქმების მიმართ ჩვენი რწმენის განსამტკიცებლად მომდევნო სტატია დაგვანახვებს, როგორ ასრულებდა იეჰოვა თავისი ხალხისათვის მიცემულ აღთქმებს წარსულში, როგორ ასრულებს დღეს და რატომ შეგვიძლია დარწმუნებული ვიყოთ, რომ ის მომავალშიც ასევე მოიქცევა.

იეჰოვა ასრულებს ერთგული ადამიანებისთვის მიცემულ აღთქმებს

„აღმთქმელი სარწმუნოა“ (ებრაელთა 10:23).

1, 2. რა გვაძლევს იმის საფუძველს, რომ ეჭვი არ შეგვეპაროს იეჰოვას აღთქმებში?

იეჰოვას სურვილია, რომ მისმა მსახურებმა როგორც თვითონ მისადმი, ასევე მისი აღთქმებისადმი მტკიცე რწმენა განივითარონ და შეინარჩუნონ. ასეთი რწმენის მქონე ადამიანებს ეჭვი არ ეპარებათ, რომ იეჰოვა შეასრულებს თავის აღთქმებს. მისი ინსპირირებული სიტყვა აცხადებს: „დაიფიცა ცაბაოთ უფალმა და თქვა: როგორც ჩავიფიქრე, ისე იქნება; როგორც გადავწყვიტე, ისე მოხდება“ (ესაია 14:24).

² სიტყვები „დაიფიცა ცაბაოთ უფალმა“, ცხადყოფს, რომ ის ფიცს დებს, რომ შეასრულებს თავის აღთქმებს. ამიტომ ამბობს მისი სიტყვა: „ესავდე უფალს მთელი გულით და ნუ დაენდობი საკუთარ ჭკუას. შეეცადე მის შეცნობას ყოველ შენს გზაზე და ის გაგისწორებს სავალს“ (იგავნი 3:5, 6). როდესაც იეჰოვაზე ვართ მინდობილი და მისი სიბრძნით ვხელმძღვანელობთ, ბილიკები, რომლებსაც ვადგავართ, აუცილებლად მარადიულ სიცოცხლემდე მიგვიყვანს, რადგან ღვთის სიბრძნე „უკვდავების ხეა მათთვის, ვინც მას მოეჭიდება“ (იგავნი 3:18; იოანე 17:3).

ჭეშმარიტი რწმენა ძველად

3. როგორ გამოავლინა ნოემ იეჰოვასადმი რწმენა?

³ ჭეშმარიტი რწმენის მქონე პიროვნებებისადმი იეჰოვას დამოკიდებულების შესახებ ჩანაწერები ღვთის საიმედოობის მტკიცებას წარმოადგენს. მაგალითად, 4 400-ზე მეტი წლის წინ ღმერთმა ნოეს უთხრა, რომ იმდროინდელი მსოფლიო გლობალური წარღვნით განადგურდებოდა. ამიტომ ნოე დაარიგა, აეშენებინა უზარმაზარი კიდობანი, რათა მისი საშუალებით ეხსნა ადამიანთა და ცხოველთა სიცოცხლე. როგორ მოიქცა ნოე? პასუხს ებრაელთა 11:7 გვაძლევს: „რწმენით იყო, რომ მიიღო ნოემ გამოცხადება იმაზე, რაც ჯერ არ იყო ხილული, ღვთისმოშიშობით გაამზადა კიდობანი თავისი სახლის გადასარჩენად“. რატომ სწამდა ნოეს, რომ მოხდებოდა ისეთი რამ, რაც ადრე არასოდეს მომხდარა, რაც „ჯერ არ იყო ხილული“? საკაცობრიო ოჯახის მიმართ ღვთის ადრინდელი მოქმედებებიდან მან საკმაოდ კარგად იცოდა, რომ ღვთის ყოველი სიტყვა სრულდებოდა. ამიტომ ნოე დარწმუნებული იყო, რომ წარღვნაც მოხდებოდა (დაბადება 6:9–22).

4, 5. რატომ იყო აბრაამი მთლიანად იეჰოვაზე მინდობილი?

⁴ ჭეშმარიტი რწმენის კიდევ ერთი მაგალითია აბრაამი. დაახლოებით 3 900 წლის წინ ღმერთმა მას უთხრა, რომ ერთადერთი ვაჟი, რომელიც სარასგან შეეძინა, მსხვერპლად შეეწირა მისთვის (დაბადება 22:1–10). როგორ მოიქცა აბრაამი? ებრაელთა 11:17 გვამცნობს: „რწმენით იყო, რომ მიიყვანა აბრაამმა მსხვერპლად ისაკი, როცა გამოიცადა“. მაგრამ ბოლო მომენტში იეჰოვას ანგელოზმა შეაჩერა ის (დაბადება 22:11, 12). რამ აფიქრებინა აბრაამს ასეთი რამის გაკეთება? ებრაელთა 11:19 ამბობს: „ვინაიდან მიიჩნია, რომ ღმერთს [ისაკის] მკვდრეთით აღდგენის ძალაც შესწევს“. მაგრამ როგორ სწამდა აბრაამს აღდგომის მაშინ, როდესაც მკვდრეთით აღდგენა არასოდეს ენახა და მის შესახებ არც კი სმენია?

⁵ გაიხსენეთ, სარა 89 წლის იყო, როდესაც ღმერთმა მათ ძე აღუთქვა. სარას საშვილოსნო უნაყოფო, ასე ვთქვათ, მკვდარი იყო (დაბადება 18:9–14). ღმერთმა „გააცოცხლა“ სარას საშვილოსნო და ქალმა შვა ისაკი (დაბადება 21:1–3). აბრაამმა იცოდა, რომ თუ ღმერთმა სარას „მკვდარი“ საშვილოსნო „გააცოცხლა“, მაშინ ის, საჭიროების შემთხვევაში, ისაკისთვისაც შეძლებდა სიცოცხლის დაბრუნებას. რომაელთა 4:20, 21 აბრაამის შესახებ ამბობს: „იგი არ დაეჭვებულა ღვთის აღთქმაში ურწმუნობით, არამედ განმტკიცდა რწმენით და დიდება უძღვნა ღმერთს. და გულდაჯერებული იყო, რომ ის, ვინც აღუთქვა, შესრულებასაც შეძლებდა“.

6. როგორ გამოხატა იესო ნავეს ძემ იეჰოვასადმი ნდობა?  

⁶ დაახლოებით 3 400-ზე მეტი ხნის წინათ, როდესაც იესო ნავეს ძე 100 წელს იყო გადაცილებული და ცხოვრებაში უკვე გამოცდილი ჰქონდა, თუ რამდენად სანდოა ღმერთი, თავისი ნდობის საფუძვლად შემდეგი მიზეზი მოიყვანა: „მთელი თქვენი გულითა და სულით შეიგნეთ, რომ არცერთი სიტყვა არ გაცუდებულა იმ სასიკეთო სიტყვებიდან, რაც თქვენზე უთქვამს უფალს, თქვენს ღმერთს“ (იესო ნავეს ძე 23:14).

7, 8. როგორ უშველეს თავს პირველ საუკუნეში ერთგულმა ქრისტიანებმა და რატომ?

⁷ დაახლოებით 1 900 წლის წინ მრავალმა თავმდაბალმა ადამიანმა გამოავლინა ჭეშმარიტი რწმენა. ისინი ბიბლიური წინასწარმეტყველების შესრულებიდან ხედავდნენ, რომ იესო მესია იყო და ღებულობდნენ მის სწავლებებს. ფაქტებისა და ებრაული წერილების მტკიცე საფუძველზე მათ ირწმუნეს ყველაფერი, რასაც იესო ასწავლიდა. ამიტომ, როდესაც იესომ თქვა, რომ ორგულობის გამო იუდეასა და იერუსალიმს ღვთის სამსჯავრო დაატყდებოდა, ამ ხალხმა ირწმუნა მისი. ხოლო, როდესაც იესომ უთხრა, თუ რა უნდა გაეკეთებინათ სიცოცხლის გადასარჩენად, ისინი მიჰყვნენ მის მითითებებს.

⁸ იესომ მორწმუნეები გააფრთხილა, რომ, როდესაც იერუსალიმს ჯარებით გარშემორტყმულს ნახავდნენ, უნდა გაქცეულიყვნენ. ახ. წ. 66 წელს იერუსალიმს რომის ჯარები მიადგა. მაგრამ შემდეგ ამოუხსნელი მიზეზით უკან გაბრუნდა. ეს ქრისტიანებისთვის ქალაქის დატოვების ნიშანი იყო, ვინაიდან იესომ თქვა: „როცა იხილავთ იერუსალიმს ლაშქრით გარშემორტყმულს, მაშინ იცოდეთ, რომ მოახლოვდა მისი აოხრება. მაშინ იუდეაში მყოფნი მთებში გაიხიზნონ; ვინც იერუსალიმშია, გარეთ გავიდეს; ვინც სოფლად არის, ნუღარ შევა მასში“ (ლუკა 21:20, 21). ჭეშმარიტმა მორწმუნეებმა დატოვეს იერუსალიმი და მისი მიმდებარე ტერიტორია და თავი უსაფრთხო ადგილებს შეაფარეს.

ურწმუნოების შედეგები

9, 10. ა) როგორ გამოავლინეს რელიგიურმა წინამძღოლებმა იესოსადმი ურწმუნოება? ბ) რა იყო ურწმუნოების შედეგი?

⁹ რა გააკეთეს მათ, ვისაც არ ჰქონდა ჭეშმარიტი რწმენა? მათ არ გამოიყენეს გაქცევის შესაძლებლობა და ქალაქში დარჩნენ. ისინი ფიქრობდნენ, რომ თავიანთი წინამძღოლები იხსნიდნენ. მაგრამ იმ წინამძღოლებმა და მათმა მიმდევრებმაც ხომ იხილეს იესოს მესიანობის მტკიცებები. მაშ, რატომ არ მოუსმინეს იესოს ნათქვამს? თავიანთი ბოროტი გულების გამო. ეს ადრევე გამოაშკარავდა, როცა ნახეს, რომ ლაზარეს მკვდრეთით აღდგენის შემდეგ ბევრი უბრალო ადამიანი იესოსთან მიდიოდა. იოანეს 11:47, 48 გვეუბნება: «მღვდელმთავრებმა და ფარისევლებმა შეკრიბეს სინედრიონი [იუდეველთა უმაღლესი სასამართლო] და თქვეს: „რა ვქნათ, რადგან ეს კაცი [იესო] ბევრ სასწაულებს ახდენს? თუ მივუშვებთ თავის ნებაზე, ყველა ირწმუნებს მას. მოვლენ რომაელები და დაიპყრობენ ჩვენს ადგილსაც და ერსაც“». 53-ე მუხლი ამბობს: „იმ დღიდან გადაწყვიტეს, მოეკლათ იგი“.

¹⁰ იესომ დიდებული სასწაული მოახდინა — მკვდრეთით აღადგინა ლაზარე! მაგრამ რელიგიურ წინამძღოლებს ამის გამო იესოს მოკვლა სურდათ. მათი უდიდესი ბოროტება უფრო მეტად მაშინ გამოვლინდა, როდესაც „მღვდელმთავრებმა ლაზარეს მოკვლაც გადაწყვიტეს, რადგან მის გამო ბევრი იუდეველი მოდიოდა და რწმუნდებოდა იესოში“ (იოანე 12:10, 11). იესომ ეს-ესაა მკვდრეთით აღადგინა ლაზარე, ხოლო ამ მღვდლებს კი სურდათ, ისევ მკვდარი ეხილათ ის. მათ არ აინტერესებდათ ღვთის ნება ან უბრალო ხალხის კეთილდღეობა. ისინი ეგოისტურად მხოლოდ საკუთარ მდგომარეობასა და კეთილდღეობაზე ზრუნავდნენ. მათ „ადამიანთა დიდება უფრო უყვარდათ, ვიდრე ღვთის დიდება“ (იოანე 12:43). მაგრამ ასეთი ურწმუნოება ძვირად დაუჯდათ. ახ. წ. 70 წელს რომის ჯარები დაბრუნდა და გაანადგურა არა მარტო მრავალი მათგანი, არამედ ის ადგილიც და ერიც.

რწმენა ჩვენს დღეებში

11. როგორ გამოვლინდა ჭეშმარიტი რწმენა ჩვენი საუკუნის დასაწყისში?

¹¹ ამ საუკუნეშიც იყვნენ მრავალი ჭეშმარიტი რწმენის მქონე კაცები და ქალები. მაგალითად, საუკუნის დასაწყისში მსოფლიო მშვიდობიან, შესანიშნავ მომავალს მოელოდა. ამ დროს ისინი, ვინც იეჰოვასადმი რწმენას ავლენდნენ, ადამიანებს ამცნობდნენ, რომ კაცობრიობა ყველაზე დიდი გასაჭირის ზღურბლზე იდგა. ამას წინასწარმეტყველებდა ღვთის სიტყვა მათეს 24-ე თავში, მე-2 ტიმოთეს მე-3 თავსა და სხვა ადგილებში. იმ მორწმუნე ადამიანების ნათქვამი ნამდვილად ახდა; 1914 წელს პირველი მსოფლიო ომი დაიწყო. წუთისოფელმა ნამდვილად შეაბიჯა ნაწინასწარმეტყველები ‘უკანასკნელი დღეების საზარელ ჟამში’ (2 ტიმოთე 3:1). საიდან იცოდნენ წინასწარ იეჰოვას მსახურებმა ჭეშმარიტება მსოფლიო მდგომარეობის შესახებ, მაშინ, როდესაც სხვებმა ამის შესახებ არაფერი იცოდნენ? იესო ნავეს ძის მსგავსად მათ სწამდათ, რომ იეჰოვას ყოველი სიტყვა შესრულდებოდა.

12. იეჰოვას რომელი აღთქმის შესრულებაში არ ეპარებათ ეჭვი მის მსახურებს?

¹² დღეს იეჰოვაზე დაიმედებული მსახურების რაოდენობა მთელ მსოფლიოში ექვს მილიონს უახლოვდება. ღვთის წინასწარმეტყველური სიტყვის შესრულების საფუძველზე მათ იციან, რომ ღმერთი მალე ბოლოს მოუღებს ამ ძალადობით აღსავსე, გახრწნილ სისტემას. ამიტომ ისინი დარწმუნებული არიან, რომ ახლოა ის დრო, როდესაც იხილავენ 1-ლი იოანეს 2:17-ის შესრულებას, სადაც ნათქვამია: „გადადის წუთისოფელი და მისი გულისთქმაც, ღვთის ნების აღმსრულებელი კი რჩება უკუნისამდე“. იეჰოვას მსახურებს ეჭვი არ ეპარებათ, რომ ღმერთი შეასრულებს ამ აღთქმას.

13. რა დონემდე შეგიძლიათ ენდოთ იეჰოვას?

¹³ რა დონემდე შეგიძლიათ ენდოთ იეჰოვას? ბოლომდე! მაშინაც კი, თუ ახლა მისადმი მსახურებისთვის სიცოცხლეს დაკარგავ, მკვდრეთით აღდგენის შემდეგ მისგან ბევრად უკეთეს ცხოვრებას მიიღებ. იესო გვარწმუნებს: „ნუ გიკვირთ ეს, ვინაიდან მოაწევს დრო, როცა ყველა, ვინც წევს საფლავში, [ღვთის მეხსიერებაში] მოისმენს მის ხმას; და ამოვლენ“ (იოანე 5:28, 29, სსგ). იცნობთ ისეთ ექიმს, პოლიტიკურ ლიდერს, მეცნიერს, ბიზნესმენსა თუ ნებისმიერ სხვა ადამიანს, რომელსაც ამის გაკეთება შეუძლია? წარსულის მონაცემები ცხადყოფს, რომ ადამიანებს ამის გაკეთება არ შეუძლიათ. იეჰოვას კი შეუძლია და გააკეთებს კიდეც!

შესანიშნავი მომავალი ერთგულებისთვის

14. რა შესანიშნავ მომავალს ჰპირდება ღვთის სიტყვა ერთგულებს?

¹⁴ იესომ შემდეგი სიტყვებით: „ნეტარ არიან თვინიერნი, ვინაიდან ისინი დაიმკვიდრებენ ქვეყანას“, აჩვენა, რომ ღვთის ზეციერი სამეფოს ხელმძღვანელობით ახალი ქვეყნიერება აუცილებლად დამყარდებოდა (მათე 5:5). ამ სიტყვებმა განამტკიცა ღვთის აღთქმა, რომელიც ფსალმუნის 36:29-შია მოცემული: „მართალნი დაიმკვიდრებენ ქვეყანას და იარსებებენ მასზე უკუნისამდე“. იესომ აგრეთვე სიკვდილის წინ ბოროტმოქმედს, რომელმაც მისადმი რწმენა გამოავლინა, უთხრა: „ჩემთან ერთად იქნები სამოთხეში“ (ლუკა 23:43, აქ). დიახ, ღვთის სამეფოს მეფე, იესო იზრუნებს, რომ ეს მამაკაცი აღდგეს დედამიწაზე სამოთხეში და მიეცეს მარადიული ცხოვრების შესაძლებლობა. დღეს, ვინც რწმენას ავლენს იეჰოვას სამეფოსადმი შეუძლია სამოთხეში ცხოვრების იმედი ჰქონდეს, სადაც „[ღმერთი] მოსწმედს ყველა ცრემლს მათი თვალებიდან და აღარ იქნება სიკვდილი. გლოვა, გოდება და ტკივილიც აღარ იქნება“ (გამოცხადება 21:4).

15, 16. რატომ იქნება ახალ ქვეყნიერებაში ცხოვრება მშვიდობიანი?

¹⁵ მოდი ფიქრებით გადავინაცვლოთ ახალ ქვეყნიერებაში. წარმოვიდგინოთ, რომ უკვე იქ ვცხოვრობთ. შეუძლებელია მაშინვე არ შევნიშნოთ სრულ მშვიდობაში ერთად მცხოვრები ბედნიერი ხალხი. ისინი ისეთ პირობებში ცხოვრობენ, რომელიც აღწერილია ესაიას 14:7-ში: „დაისვენა, დამყუდროვდა მთელი ქვეყანა, მხიარულად ყიჟინობს“. რატომ გრძნობენ ისინი თავს ასე? პირველ რიგში, დაუკვირდი, რომ კარებს საკეტები არა აქვს. ისინი არაა საჭირო, რადგან აქ არც დამნაშავეობაა და არც ძალადობა. ეს პირობები ზუსტად შეესაბამება ღვთის სიტყვის წინასწარმეტყველებას: „ყველა თავისი ვაზის და ლეღვის ქვეშ იჯდება და არავინ იქნება დამაფრთხობელი“ (მიქა 4:4).

¹⁶ აქ არც ომობენ, რადგან ახალ ქვეყნიერებაში ომი აკრძალულია. მთელი საბრძოლო იარაღები შრომის იარაღებადაა გადაკეთებული. აქ სრული მნიშვნელობით შესრულდა ესაიას 2:4: „მახვილებისგან სახნისებს გამოჭედავენ და შუბებისგან — ნამგლებს, ერი ერზე აღარ აღმართავს მახვილს და აღარავინ ისწავლის ომს“. მაგრამ ჩვენ ხომ მოველოდით ამას?! რატომ? ახალი ქვეყნიერების მცხოვრებლებმა ამის გაკეთება მაშინ ისწავლეს, როდესაც ღმერთს ემსახურებოდნენ ძველ ქვეყნიერებაში.

17. როგორი საცხოვრებელი პირობები იქნება ღვთის სამეფოს მმართველობისას?

¹⁷ თქვენ კიდევ რაღაცას ხედავთ. აქ არ არსებობს სიღარიბე. არავინ ცხოვრობს ბინძურ ქოხებში, არავინაა ძონძებით შემოსილი და უსახლკარო. ყველას მყუდრო სახლი და საუცხოო ხეებითა და ყვავილებით დამშვენებული კარ-მიდამო აქვს (ესაია 35:1, 2; 65:21, 22; ეზეკიელი 34:27). აქ არავინ შიმშილობს, რადგან ღმერთმა შეასრულა თავისი აღთქმა, რომ ყველასთვის უხვად იქნებოდა საზრდო: „იქნება სიუხვე პურისა დედამიწაზე, მთათა მწვერვალზე. მისი ნაყოფი იბიბინებს“ (ფსალმუნი 71:16). მართლაც, ღვთის სამეფოს ხელმძღვანელობით მთელი დედამიწა ისეთი საუცხოო სამოთხეა, როგორიც ღმერთს ედემის ბაღში ჰქონდა განზრახული (დაბადება 2:8).

18. რა არ დაემუქრება ადამიანებს ახალ ქვეყნიერებაში?

¹⁸ თქვენ ისიც გაოცებთ, რომ ყველა ენერგიულია. ეს სრულყოფილი სხეულისა და გონების გამოა. აღარ არსებობს ავადმყოფობა, ტკივილი და სიკვდილი. არავინაა მიჯაჭვული ინვალიდის სავარძელს ან ავადმყოფობის სარეცელს. ყოველივე ეს სამუდამოდ ჩაბარდა წარსულს (ესაია 33:24; 35:5, 6). ადამიანის სიცოცხლეს არც ცხოველები ემუქრებიან, რადგან ღმერთმა თავისი ძალის გამოყენებით ისინი მშვიდობიანნი გახადა (ესაია 11:6–8; 65:25; ეზეკიელი 34:25).

19. რატომ იქნება ახალ ქვეყნიერებაში ყოველი დღე ‘სიამის მომგვრელი’?

¹⁹ რა შესანიშნავ ცივილიზაციას აშენებს ახალი ქვეყნიერების ერთგული მოსახლეობა! ისინი მთელ თავიანთ ენერგიას, უნარსა და დედამიწის სიმდიდრეს სასარგებლო მიზნებს ახმარენ და არა საზიანოს; სხვებთან თანამშრომლობას და არა კონკურენციას. ყოველი შემხვედრი სანდოა, ვინაიდან ღვთის აღთქმის თანახმად, ‘ყველანი უფლის დამოძღვრილნი არიან’ (ესაია 54:13). რადგან ყველა ღვთის კანონებით ხელმძღვანელობს, დედამიწა ‘აივსო უფლის ცოდნით, როგორც ზღვა არის წყლებით დაფარული’ (ესაია 11:9). მართლაც, როგორც ფსალმუნის 36:11-შია ნათქვამი, ახალ ქვეყნიერებაში ყოველი დღე ‘სიამის მომგვრელია’.

ბედნიერი მომავალი გარანტირებულია

20. რა უნდა გავაკეთოთ იმისათვის, რომ მშვიდობიანი მომავალი დავიმკვიდროთ?

²⁰ რა უნდა გავაკეთოთ, ის ბედნიერი მომავალი რომ დავიმკვიდროთ? ესაიას 55:6 გვეუბნება: „ეძებეთ უფალი, როცა შეიძლება მისი პოვნა; მოუხმეთ მას, როცა ახლოს არის იგი“. უფლის ძიებისას კი ჩვენც ისეთივე განწყობილება უნდა გვქონდეს, როგორიც ფსალმუნის 142:10-შია აღწერილი: „მასწავლე შესრულება შენი ნებისა, რადგან შენ ჩემი ღმერთი ხარ“. ვინც ასე მოქმედებს შეუძლია ამ უკანასკნელ დღეებში უმწიკვლოდ იაროს იეჰოვას წინაშე და შესანიშნავ მომავალს მოელოდეს. „დაიცავი უმანკოება და ნახე სისწორე, რადგან მომავალი ეკუთვნის მშვიდობიან კაცს. ხოლო ბრალეულნი ერთიანად მოისპობიან, ბოროტთა მომავალი გადაშენდება“ (ფსალმუნი 36:37, 38).

21, 22. რას ქმნის დღეს ღმერთი და როგორ ასწავლის მათ?

²¹ სწორედ ახლა იეჰოვა ყოველი ერიდან უხმობს მათ, ვისაც მისი ნების შესრულება სურს. როგორც ბიბლიურ წინასწარმეტყველებაშია მოცემული, ის ამ ხალხისგან ახალი ქვეყნიერების საზოგადოების საძირკველს ქმნის: „უკანასკნელ დღეებში [დრო, რომელშიც ჩვენ ვცხოვრობთ]. . . დაიძრება უთვალავი ხალხი და იტყვის: მოდი, ავიდეთ უფლის მთაზე [მისი ამაღლებული ჭეშმარიტი თაყვანისმცემლობა]. . . გვასწავლოს თავისი გზები და მისი ბილიკებით ვიაროთ“ (ესაია 2:2, 3).

²² გამოცხადების 7:9 ამ ხალხს შემდეგნაირად აღწერს: „უამრავი ხალხი. . . ყოველი ერიდან და ტომიდან, ხალხებიდან და ენებიდან“. მე-14 მუხლი აღნიშნავს: „ესენი არიან დიდი გასაჭირიდან მოსულები“, ისინი, ვინც თანამედროვე სისტემის აღსასრული გადაიტანა. იმ ხალხის რაოდენობამ, რომლებიც ახალი ქვეყნიერების საძირკველს ქმნის უკვე ექვს მილიონს მიაღწია და მას ყოველწლიურად მრავალი ახალი პიროვნება ემატება. იეჰოვა ყველა ამ ერთგულ მსახურს ახლა ასწავლის, თუ როგორ იცხოვრონ ახალ ქვეყნიერებაში. ისინი იძენენ სულიერ თვისებებს და სწავლობენ სხვადასხვა საქმეების შესრულებას, რომლებიც აუცილებელია დედამიწის სამოთხედ გარდასაქმნელად. და მათ ყოველგვარი ეჭვის გარეშე სწამთ, რომ სამოთხე ნამდვილად იქნება, ვინაიდან „აღმთქმელი სარწმუნოა“ (ებრაელთა 10:23).