აფასებთ ღვთის ძღვენს — ქორწინებას?

„გიბოძოთ ძღვენი იეჰოვამ, რომ თითოეულმა თავშესაფარი პოვოთ თქვენ-თქვენი ქმრების სახლში“ (რუთ. 1:9).

უპასუხეთ:

რატომ შეგვიძლია ვთქვათ, რომ ძველ დროს ღვთის მსახურები აფასებდნენ ქორწინების ძღვენს?

საიდან ვიცით, რომ იეჰოვასთვის სულერთი არ არის ჩვენი არჩევანი?

ქორწინებასთან დაკავშირებული რომელი ბიბლიური რჩევის გამოყენებას აპირებთ?

1. როგორი რეაქცია ჰქონდა ადამს ცოლის დანახვაზე?

„აი ძვალი ჩემი ძვალთაგანი და ხორცი ჩემი ხორცთაგანი. დედაკაცი ერქვას მას, რადგან კაცისგან არის აღებული“ (დაბ. 2:23). პირველი ადამიანი ბედნიერი იყო. მას ცოლი ჰყავდა და თავისი აღტაცება ადამმა ზემოხსენებული სიტყვებით გამოხატა. იეჰოვამ ადამს ღრმა ძილი მოჰგვარა და მისი ერთი ნეკნისგან მშვენიერი ქალი შექმნა. ადამმა მას ევა დაარქვა. ასე ჩაუყარა ღმერთმა საფუძველი პირველ ბედნიერ ოჯახს. ვინაიდან იეჰოვამ ევა ადამის ნეკნისგან შექმნა, პირველ წყვილს განსაკუთრებული სიახლოვე ჰქონდათ ერთმანეთთან, ვიდრე ნებისმიერ ცოლ-ქმარს დღეს.

2. რატომ აქვს მამაკაცსა და ქალს ერთმანეთისადმი ლტოლვა?

² თავისი შეუდარებელი სიბრძნით იეჰოვამ ადამიანებში ჩადო რომანტიკული სიყვარულის გრძნობა და ეს არის მამაკაცსა და ქალს შორის ლტოლვის მიზეზი. ენციკლოპედია „უორლდ ბუკი“ აღნიშნავს: „დაქორწინებისას მამაკაცი და ქალი იმედოვნებენ, რომ ექნებათ ინტიმური ურთიერთობა და რომანტიკული სიყვარული უსასრულოდ გაგრძელდება“. იეჰოვას ხალხი ყოველთვის აფასებდა ცოლ-ქმრულ ურთიერთობებს.

ისინი აფასებდნენ ქორწინების ძღვენს

3. როგორ მოიყვანა ისაკმა ცოლი?

³ ერთგული აბრაამი ძალიან აფასებდა ქორწინებას. მან თავისი ერთ-ერთი მსახური გაგზავნა შუამდინარეთში ისაკისთვის ცოლის მოსაყვანად. მსახურის ლოცვამ კარგი შედეგი გამოიღო. ღვთისმოშიში რებეკა ისაკის საყვარელი ცოლი გახდა და მნიშვნელოვანი როლი შეასრულა იეჰოვას შეთანხმებაში, რომელიც აბრაამის შთამომავალს ეხებოდა (დაბ. 22:18; 24:12—14, 67). აქედან არ უნდა დავასკვნათ, რომ ადამიანს, რაც არ უნდა კარგი განზრახვები ჰქონდეს, აქვს უფლება, იყოს არამკითხე შუამავალი. დღეს ბევრი თვითონ ირჩევს მომავალ მეუღლეს. მართალია, დღეს ქორწინების საკითხი ზეცაში არ წყდება, მაგრამ ღმერთი უხელმძღვანელებს ქრისტიანებს ამ და სხვა ცხოვრებისეულ საკითხებში, თუ ისინი იეჰოვას ლოცვაში რჩევას სთხოვენ და მის სულს მიჰყვებიან (გალ. 5:18, 25).

4, 5. რა გარწმუნებთ, რომ შულამელ გოგონასა და მწყემსს ძალიან უყვარდათ ერთმანეთი?

⁴ ძველ ისრაელში მცხოვრებ ლამაზ შულამელ გოგონას არ უნდოდა, სხვებს ზეგავლენა მოეხდინათ მასზე და მეფე სოლომონის მორიგი ცოლი გამხდარიყო. მან თქვა: „გაფიცებთ, იერუსალიმის ასულნო, ნუ გააღვიძებთ და ნუ აღძრავთ სიყვარულს ჩემში, სანამ თავისით არ მოვა“ (ქებ. 8:4). შულამელ გოგონასა და მწყემსს განსაკუთრებით თბილი გრძნობები ჰქონდათ ერთმანეთისადმი. შულამელმა თავმდაბლურად თქვა: „ზღვისპირა დაბლობზე ამოსული ზაფრანა ვარ, ველის შროშანი“. მწყემსმა კი უპასუხა: „როგორც შროშანი ეკლიან სარეველებს შორის, ასევეა ჩემი სატრფო ქალიშვილებს შორის“ (ქებ. 2:1, 2). მათ მართლა უყვარდათ ერთმანეთი.

⁵ რადგან შულამელ გოგონასა და მწყემსს ღმერთი უყვარდათ, მათი ქორწინება მტკიცე იქნებოდა. შულამელმა თავის სატრფოს უთხრა: „ბეჭედივით დამსვი შენს გულზე, შენს მხარზეც ბეჭედივით დამსვი, რადგან სიკვდილივით ძლიერია სიყვარული, სამარესავით შეუდრეკელია ერთგულება. მისი ბრიალი ცეცხლის ბრიალია, იაჰის ალია. ბევრი წყალიც კი ვერ ჩააქრობს სიყვარულს, ვერც მდინარეები წალეკავენ მას. კაცმა თავისი სახლის მთელი ძვირფასეულობაც რომ გაიღოს სიყვარულისთვის, ამ ძვირფასეულობას არაფრად ჩააგდებს ხალხი“ (ქებ. 8:6, 7). ნუთუ მეუღლეების მიმართ იეჰოვას მსახურებსაც მსგავსი დამოკიდებულება არ უნდა ჰქონდეთ?!

ღვთისთვის სულერთი არ არის თქვენი არჩევანი

6, 7. საიდან ვიცით, რომ იეჰოვასთვის სულერთი არ არის, ვის ავირჩევთ ცხოვრების თანამგზავრად?

⁶ იეჰოვასთვის სულერთი არ არის, თუ ვინ იქნება ჩვენი ცხოვრების თანამგზავრი. ქანაანელებთან დაკავშირებით ღმერთმა გააფრთხილა ისრაელები: „არ დაუმოყვრდე, არ მიათხოვო შენი ასული მათ ვაჟს და შენს ვაჟს არ მოუყვანო მათი ასული, რადგან ჩამომაშორებს ის შენს ვაჟს და სხვა ღმერთებს დაუწყებენ მსახურებას. აენთება შენზე იეჰოვას რისხვა და მყისვე გაგანადგურებს“ (კან. 7:3, 4). საუკუნეების შემდეგ მღვდელმა ეზრამ თქვა: „ორგულობთ, რადგან უცხოელი ცოლები მოიყვანეთ ისრაელის დანაშაულის დასამძიმებლად“ (ეზრ. 10:10). მოციქულმა პავლემ კი თანაქრისტიანებს მისწერა: „ცოლი ქმართან არის შეკრული მთელი იმ დროის განმავლობაში, სანამ ქმარი ცოცხალი ჰყავს, მაგრამ თუ მისი ქმარი სიკვდილის ძილით დაიძინებს, ქალი თავისუფალია, გაჰყვეს ვისაც უნდა, ოღონდ უფალში“ (1 კორ. 7:39).

⁷ ღვთის მიძღვნილი მსახური, რომელიც იეჰოვას მოწმეზე არ ქორწინდება ღვთისადმი დაუმორჩილებლობას ავლენს. ეზრას დროინდელმა ისრაელებმა „უცხოელი ცოლების მოყვანით“ ორგულობა გამოავლინეს. ასეთი ნათელი ბიბლიური მითითებების უგულებელყოფა ნამდვილად არ იყო სწორი (ეზრ. 10:10; 2 კორ. 6:14, 15). ქრისტიანი, რომელიც იეჰოვას მოწმესთან არ ქმნის ოჯახს, არასამაგალითოა და არ აფასებს ღვთის ძღვენს — ქორწინებას. მონათლული და ან ძმა ასეთ შემთხვევაში კრებაში გარკვეულ პასუხისმგებლობებს დაკარგავს. არაგონივრულია, თუ ასეთი ქრისტიანი კურთხევებისთვის ლოცულობს და ღმერთს ეუბნება: „იეჰოვა, შეგნებულად გეურჩე, მაგრამ გთხოვ, მაინც მაკურთხო“.

ღმერთზე უკეთ არავინ იცის

8. რატომ უნდა გავითვალისწინოთ ღვთის მითითებები ქორწინებასთან დაკავშირებით?

⁸ ნებისმიერი მოწყობილობის შემქმნელმა ზუსტად იცის, როგორ მუშაობს ის. მოწყობილობა სწორად რომ გამოვიყენოთ, მწარმოებელი ინსტრუქციასაც გვაძლევს. რა მოხდება, თუ უგულებელვყოფთ ინსტრუქციას და ჩვენებურად გამოვიყენებთ მას? ეს მოწყობილობა შეიძლება საერთოდ გამოვიდეს მწყობრიდან. მსგავსადვე, თუ გვინდა, ბედნიერი ქორწინება გვქონდეს, ზუსტად უნდა მივყვეთ იეჰოვას, ქორწინების დამფუძნებლის, მითითებებს.

9. რატომ შეიძლება ითქვას, რომ იეჰოვას ესმის მათი, ვინც მარტოობას გრძნობს და მათიც, ვინც ბედნიერია ქორწინებაში?

⁹ იეჰოვამ ყველაფერი იცის ადამიანებისა და ქორწინების შესახებ. მან ადამიანებში ჩადო სექსუალური მოთხოვნილება, რათა მათ „ენაყოფიერათ და გამრავლებულიყვნენ“ (დაბ. 1:28). იეჰოვას ესმის მათი, ვინც მარტოობას გრძნობს და ეს კარგად ჩანს მისი სიტყვებიდან, რომლებიც პირველი ქალის შექმნამდე წარმოთქვა: „არ არის კარგი კაცის მარტო ყოფნა. შევუქმნი დამხმარეს, შემავსებელს“ (დაბ. 2:18). იეჰოვას მათიც ესმის, ვინც ბედნიერია ქორწინებაში (წაიკითხეთ იგავების 5:15—18).

10. რა ფაქტორები უნდა გაითვალისწინოს წყვილმა ინტიმურ ურთიერთობასთან დაკავშირებით?

¹⁰ ვინაიდან ადამის გამო ცოდვა და არასრულყოფილება ყველაზე გავრცელდა, არც ერთი ოჯახი დღეს სრულყოფილი არ არის. მიუხედავად ამისა, თუ იეჰოვას მსახურები ღვთის სიტყვაში მოცემულ მითითებებს მიჰყვებიან, მათ ბედნიერი ოჯახები ექნებათ. მაგალითად, განვიხილოთ პავლეს რჩევა ქორწინებაში ინტიმურ ურთიერთობებთან დაკავშირებით (წაიკითხეთ 1 კორინთელების 7:1—5 ). ბიბლიაში არ წერია, რომ წყვილს მხოლოდ ბავშვის ყოლის მიზნით უნდა ჰქონდეს სექსუალური ურთიერთობა. ასეთი კავშირი როგორც ემოციური, ისე ფიზიკური მოთხოვნილებების დაკმაყოფილებას ემსახურება. მაგრამ ღმერთი არ იწონებს გაუკუღმართებულ სექსუალურ ურთიერთობას. ქრისტიანმა ქმრებმა და ცოლებმა ცხოვრების ამ მნიშვნელოვან მხარეში ერთმანეთისადმი სინაზე და გულწრფელი სიყვარული უნდა გამოავლინონ. და რასაკვირველია, ისინი უნდა ერიდონ ისეთ საქციელს, რომელიც იეჰოვას არ მოსწონს.

11. როგორ აკურთხა იეჰოვამ რუთი იმის გამო, რომ სწორად მოიქცა?

¹¹ ქორწინებას ადამიანებისთვის სიხარული უნდა მოჰქონდეს და არა უბედურება ან მწუხარება. ქრისტიანებისთვის ოჯახი უნდა იყოს ადგილი, სადაც სიმშვიდე სუფევს და სადაც მისვლა ყოველთვის სასიამოვნოა. გავიხსენოთ, რა მოხდა დაახლოებით 3 000 წლის წინ. ხანში შესული ქვრივი ნაომი და მისი დაქვრივებული რძლები, ორფა და რუთი, მოაბიდან იუდაში მიდიან. ნაომი მათ თავიანთ ოჯახებში დაბრუნებას სთავაზობს. მოაბელი რუთი ჭეშმარიტი ღვთის ერთგულია და ნაომს არ ტოვებს. ის დარწმუნებულია, რომ სრულ საზღაურს მიიღებს იეჰოვასგან, რომლის ფრთებქვეშ ეძებს თავშესაფარს (რუთ. 1:9; 2:12). რუთი ძალიან აფასებს ღვთის ძღვენს, ქორწინებას. ის ცოლად მიჰყვება იეჰოვას ჭეშმარიტ თაყვანისმცემელ ბოაზს. ღვთის ახალ ქვეყნიერებაში მკვდრეთით აღმდგარ რუთს ძალიან გაუხარდება, როცა გაიგებს, რომ ის თურმე იესო ქრისტეს წინაპარი გამხდარა (მათ. 1:1, 5, 6; ლუკ. 3:23, 32). მართლაც რამდენი კურთხევა მიიღო რუთმა იეჰოვასგან!

ბრძნული რჩევები ბედნიერი ქორწინებისთვის

12. სად შეიძლება ქორწინებასთან დაკავშირებული ბრძნული რჩევების პოვნა?

¹² ქორწინების დამფუძნებელი გვეუბნება, თუ რა არის საჭირო ბედნიერი ქორწინებისთვის. მასზე უკეთ ეს არავინ იცის. ბიბლია უტყუარი წიგნია, და თუ ვინმეს სურს, რჩევა მისცეს სხვას ქორწინებასთან დაკავშირებით, მხოლოდ ბიბლიური პრინციპებით უნდა იხელმძღვანელოს. მაგალითად, პავლემ ღვთის შთაგონებით დაწერა: „თითოეულ თქვენგანს ისე უყვარდეს თავისი ცოლი, როგორც საკუთარი თავი, ცოლი კი დიდ პატივს უნდა სცემდეს ქმარს“ (ეფეს. 5:33). მოწიფული ქრისტიანისთვის ეს ბიბლიური რჩევა სრულიად გასაგებია. მთავარი ის არის, გამოიყენებს თუ არა ის იეჰოვას ამ სიტყვებს ცხოვრებაში. ქრისტიანი, რომელიც აფასებს ქორწინების ძღვენს, აუცილებლად გამოიყენებს ასეთ რჩევებს.a

13. რა სავალალო შედეგამდე მიიყვანს ქრისტიანს 1 პეტრეს 3:7-ში მოცემული რჩევის უგულებელყოფა?

¹³ ქრისტიანი ქმარი ცოლს სიყვარულით უნდა ეპყრობოდეს. მოციქული პეტრე წერდა: „ასევე თქვენც, ქმრებო, შეძენილი ცოდნის თანახმად განაგრძეთ ცოლებთან ცხოვრება და პატივი მიაგეთ მათ, ქალებს, როგორც შედარებით სუსტ ჭურჭელს, რათა ლოცვა არ დაგიბრკოლდეთ, რადგან თქვენც მათთან ერთად ხართ სიცოცხლის დაუმსახურებელი საჩუქრის თანამემკვიდრეები“ (1 პეტ. 3:7). თუ ქმარი იეჰოვას ამ რჩევას უგულებელყოფს, მისი ლოცვები შეიძლება ღმერთმა არ მოისმინოს. ეს ცოლ-ქმრის სულიერობაზე დამღუპველად იმოქმედებს და შეიძლება დიდი სტრესის, უთანხმოებისა და უხეშად მოპყრობის მიზეზიც კი გახდეს.

14. რა გავლენას ახდენს მოსიყვარულე ცოლი ოჯახზე?

¹⁴ ცოლი, რომელიც იეჰოვას სიტყვისა და წმინდა სულის ხელმძღვანელობას მიჰყვება, ოჯახში მშვიდ და სასიამოვნო ატმოსფეროს უწყობს ხელს. ღვთისმოშიშ ქმარს უყვარს თავისი ცოლი და იცავს მას ფიზიკური თუ სულიერი ზიანისგან. ცოლი კი ისეთ თვისებებს ავლენს, რომლებიც ეხმარება ქმარს, უფრო მეტად უყვარდეს ის. იგავების 14:1-ში ნათქვამია: „ბრძენი ქალი თავის სახლს აშენებს, უგუნური კი საკუთარი ხელით ანგრევს“. ბრძენი და მოსიყვარულე ცოლი დიდად უწყობს ხელს მთელი ოჯახის ბედნიერებას. ის ასევე ცხადყოფს, რომ აფასებს ღვთის ძღვენს — ქორწინებას.

15. რა რჩევაა მოცემული ეფესოელების 5:22—25-ში?

¹⁵ ქმრები და ცოლები ისე უნდა ეპყრობოდნენ ერთმანეთს, როგორც იესო კრებას. ამით ისინი გამოავლენენ მადლიერებას ღვთის ძღვნისთვის, ქორწინებისთვის (წაიკითხეთ ეფესოელების 5:22—25 ). ნამდვილი კურთხევაა, როდესაც ცოლ-ქმარს მართლა უყვარს ერთმანეთი და არ რთავს ნებას სიამაყეს, ბავშვურ გაბუტვასა თუ სხვა არაქრისტიანულ საქციელს, ზიანი მიაყენოს მათ ქორწინებას!

„კაცი ნუ დააშორებს მათ“

16. რატომ არ ქორწინდება ზოგი ქრისტიანი?

¹⁶ თუმცა ადამიანთა უმეტესობა ფიქრობს დაქორწინებაზე, იეჰოვას ზოგიერთი მსახური დაუქორწინებელი რჩება, ვინაიდან ვერ პოულობს მისთვის და ღვთისთვის მოსაწონ ცხოვრების თანამგზავრს. სხვები დაუქორწინებლობას ღვთის ძღვნად მიიჩნევენ და თავს მთლიანად იეჰოვას მსახურებას უძღვნიან. რა თქმა უნდა, დაუქორწინებლობა სიხარულის მომტანია, თუ ქრისტიანი იეჰოვას ნორმებს ემორჩილება (მათ. 19:10—12; 1 კორ. 7:1, 6, 7, 17).

17. ა) ქორწინებასთან დაკავშირებით იესოს მიერ წარმოთქმული რომელი სიტყვები უნდა გვახსოვდეს? ბ) რა უნდა გააკეთოს ქრისტიანმა დაუყოვნებლივ, თუ სხვისი მეუღლის მიმართ გრძნობები გაუჩნდა?

¹⁷ დაქორწინებული ვართ თუ არა, ყველას უნდა გვახსოვდეს იესოს სიტყვები: «ნუთუ არ წაგიკითხავთ, რომ შემოქმედმა დასაწყისში კაცად და ქალად შექმნა ისინი და თქვა: „ამიტომ მიატოვებს კაცი მამას და დედას, მიეკვრება ცოლს და ორნი ერთი ხორცი იქნებიან“? ასე რომ, ისინი ორნი კი აღარ არიან, არამედ ერთი ხორცი. ამიტომ, ვინც ღმერთმა შეაუღლა, კაცი ნუ დააშორებს მათ» (მათ. 19:4—6). სხვისი მეუღლისადმი გრძნობების განვითარება ცოდვაა (კან. 5:21). ნებისმიერმა ქრისტიანმა, რომელსაც ასეთი სურვილი უჩნდება, და იქნება თუ ძმა, დაუყოვნებლივ უნდა მოიშოროს უწმინდური ფიქრები, თუნდაც ეს ემოციური ტკივილის ფასად დაუჯდეს. ემოციური ტკივილის მიზეზი კი ის არის, რომ ადამიანი თავიდანვე არ შეეწინააღმდეგა ეგოისტურ სურვილებს (მათ. 5:27— 30). უაღრესად მნიშვნელოვანია აზროვნების შეცვლა და ვერაგი გულის ცოდვილი მიდრეკილებების ჩახშობა (იერ. 17:9).

18. როგორ უნდა უყურებდეთ ღვთის ძღვენს — ქორწინებას?

¹⁸ ისინიც კი, რომლებმაც ცოტა რამ იციან, ან საერთოდ არაფერი იციან იეჰოვა ღმერთისა და მისი არაჩვეულებრივი ძღვნის, ქორწინების შესახებ, გარკვეულწილად, აფასებენ ოჯახურ კავშირს. ჩვენ, „ბედნიერი ღვთის“, იეჰოვას, მიძღვნილმა მსახურებმა უფრო მეტად უნდა დავაფასოთ ყველაფერი, რითაც ის უზრუნველგვყოფს და ყველასთვის ცხადი გავხადოთ, რომ ვაფასებთ ღვთის ძღვენს — ქორწინებას (1 ტიმ. 1:11).

[სქოლიო]

შეინარჩუნეთ დადებითი განწყობა ოჯახური პრობლემების მიუხედავად

„დაქორწინებულებს მივუთითებ — თუმცა მე კი არა, უფალი“ (1 კორ. 7:10).

შეგიძლიათ ახსნათ?

რა გაგებით აერთიანებს ღმერთი ერთ უღელქვეშ მამაკაცსა და ქალს?

როგორ ეხმარებიან უხუცესები იმ ქრისტიანებს, რომლებსაც ოჯახური პრობლემები აქვთ?

როგორ უნდა ვუყურებდეთ ქორწინებას?

1. როგორ უყურებენ ქრისტიანები ქორწინებას და რატომ?

ქორწინებისას ქრისტიანები ღვთის წინაშე დებენ აღთქმას და ამ პასუხისმგებლობას ზერელედ არ უნდა ეკიდებოდნენ (ეკლ. 5:4—6). ვინაიდან ოჯახის დამფუძნებელი იეჰოვაა, ის აერთიანებს, ანუ ერთ უღელქვეშ კრავს მამაკაცსა და ქალს (მარ. 10:9). ზოგიერთ ქვეყანაში ქორწინებასთან დაკავშირებული კანონები განსხვავდება ბიბლიური კანონებისგან, მაგრამ ღვთის მსახურები ქორწინებას უნდა უყურებდნენ ისე, როგორც იეჰოვა უყურებს მას. ეს იმ შემთხვევაშიც ასე უნდა იყოს, თუ წყვილი ქორწინებისას არ იყო ღვთის თაყვანისმცემელი.

2. რა კითხვებს გაეცემა პასუხი ამ სტატიაში?

² ბედნიერ ქორწინებას დიდი სიხარული მოაქვს. მაგრამ რის გაკეთება შეიძლება, თუ ცოლ-ქმარს შორის ურთიერთობა იძაბება? შეიძლება ამ დროს ქორწინების განმტკიცება? რა დაეხმარება მათ, ვის ოჯახსაც ბზარი გაუჩნდა?

სიხარული თუ იმედგაცრუება

3, 4. რა შეიძლება მოხდეს, თუ მეუღლის არჩევისას არასწორ გადაწყვეტილებას მივიღებთ?

³ როდესაც ქრისტიანულ ოჯახში მშვიდობა სუფევს, ოჯახი ბედნიერია და ეს განადიდებს იეჰოვას. მაგრამ, თუ ცოლ-ქმარს შორის ურთიერთობა იძაბება, ეს, სულ მცირე, იმედგაცრუებას იწვევს. ქრისტიანს, რომელიც დაქორწინებაზე ფიქრობს, ღვთის ხელმძღვანელობის მიყოლა ბედნიერი ოჯახის შექმნაში დაეხმარება. მეუღლის არჩევისას არაგონივრული გადაწყვეტილების მიღებას კი უკმაყოფილება და იმედგაცრუება მოაქვს. მაგალითად, ზოგი ახალგაზრდა პაემნებზე სიარულს იწყებს, თუმცა ჯერ არ არის მზად ოჯახური პასუხისმგებლობებისთვის. ზოგი მომავალ მეუღლეს ინტერნეტით პოულობს და ნაჩქარევად ქმნის ოჯახს, რომელიც თავიდანვე განწირულია. სხვები ტრფობის პერიოდში სერიოზულ ცოდვას სჩადიან; მაშინაც კი, თუ დაქორწინდებიან ოჯახური ცხოვრების დაწყებისთანავე მათ დაკარგული ექნებათ ერთმანეთისადმი პატივისცემა.

⁴ ზოგიერთი ქრისტიანი არ ქორწინდება „უფალში“, ქმნის რელიგიურად დაყოფილ ოჯახს და იმკის მტკივნეულ შედეგებს (1 კორ. 7:39). თუ ეს თქვენ შემთხვევაშიც ასეა, სთხოვეთ ღმერთს პატიება და დახმარება. იეჰოვა არ ათავისუფლებს ადამიანს წარსულში ჩადენილი შეცდომების შედეგებისგან, მაგრამ მათ, ვინც ინანიებს, დაეხმარება განსაცდელებთან გამკლავებაში (ფსალმ. 130:1—4). მოიქეცით ღვთის მოსაწონად ახლაც და მომავალშიც და „იეჰოვას სიხარული თქვენი სიმაგრე“ იქნება (ნეემ. 8:10).

როდესაც ოჯახს საფრთხე ემუქრება

5. როგორი აზროვნება არ იქნებოდა სწორი ოჯახური პრობლემების მიუხედავად?

⁵ ის, ვისაც მეუღლესთან უთანხმოებები აქვს, შეიძლება ფიქრობს: „ნუთუ მართლა ღირს ასეთი ოჯახის შენარჩუნება? ნეტავ შემეძლოს უკან დაბრუნება და სხვასთან ყველაფრის თავიდან დაწყება?!“. ისინი შესაძლოა ოცნებობენ, თავი დააღწიონ ოჯახის უღელს. „ო, ნეტავ ისევ თავისუფალი ვიყო! რატომაც არ გავეყარო? თუ გაყრის ბიბლიური საფუძველი არ მაქვს, რა მიშლის ხელს, ცალკე ვიცხოვრო და კვლავ გავიხარო ცხოვრებით?“. ქრისტიანმა არ უნდა დაუშვას ასეთი ფიქრები და არ უნდა იოცნებოს, თუ როგორი ცხოვრება შეეძლო ჰქონოდა; ნაცვლად ამისა, მან ძალ-ღონე არ უნდა დაიშუროს ოჯახის შესანარჩუნებლად. ამის საუკეთესო საშუალება კი ღვთის ხელმძღვანელობის ძებნა და მისი მიყოლაა.

6. ახსენით, რა თქვა იესომ მათეს 19:9-ში.

⁶ გაყრის შემთხვევაში ქრისტიანს ან აქვს ხელახლა დაქორწინების ბიბლიური საფუძველი, ან არა. იესომ თქვა: „თუ ცოლს სიძვა არ ჩაუდენია, ქმარი კი გაეყრება მას და სხვაზე დაქორწინდება, მრუშობს“ (მათ. 19:9). აქ გამოყენებულ სიტყვა „სიძვაში“ იგულისხმება მრუშობა და სხვა სექსუალური ხასიათის ცოდვები. მნიშვნელოვანია, ვილოცოთ, როცა განქორწინებაზე ვიწყებთ ფიქრს იმ შემთხვევაში, თუ მრუშობას არ ჰქონია ადგილი.

7. რა შეიძლება იფიქრონ სხვებმა, თუ ქრისტიანის ოჯახი დანგრევის პირასაა?

⁷ ოჯახში სერიოზული პრობლემა შეიძლება ერთი-ერთი მეუღლის სულიერ სისუსტეზე მეტყველებდეს. მოციქულმა პავლემ ყურადსაღები კითხვა წამოჭრა: „რადგან, თუ კაცმა ის არ იცის, ოჯახი როგორ განაგოს, ღვთის კრებაზე როგორ იზრუნებს?“ (1 ტიმ. 3:5). სინამდვილეში, როდესაც ორივე მეუღლე თავს ქრისტიანად აცხადებს, მაგრამ ოჯახში უთანხმოებები აქვთ, სხვებმა შეიძლება იფიქრონ, რომ ისინი თავად არ იყენებენ ცხოვრებაში იმას, რასაც ასწავლიან (რომ. 2:21—24).

8. რატომ არის არასწორი, თუ ქრისტიანი წყვილი გადაწყვეტს ცალ-ცალკე ცხოვრებას ან გაყრას?

⁸ როცა ქრისტიანი წყვილი ცალ-ცალკე ცხოვრებას ან გაყრას გეგმავს, მაგრამ ამის ბიბლიური საფუძველი არ არსებობს, ეს აშკარად ცხადყოფს, რომ მათ სერიოზული სულიერი პრობლემები აქვთ. აშკარაა, რომ ერთ-ერთი ან, შესაძლოა, ორივე მათგანი არ იყენებს ბიბლიურ პრინციპებს. თუ წყვილი „ენდობა იეჰოვას მთელი გულით“, მაშინ უეჭველად შეძლებენ ოჯახის გადარჩენას (წაიკითხეთ იგავების 3:5, 6).

9. რა კურთხევები მიიღეს იმ ქრისტიანებმა, რომლებმაც მოითმინეს და ოჯახი არ დაანგრიეს?

⁹ ბევრი ოჯახის მდგომარეობა, რომელიც განწირული ჩანდა, დროთა განმავლობაში რადიკალურად შეიცვალა. ქრისტიანები, რომლებიც ცხელ გულზე არ ანგრევენ ოჯახს, ხშირად კარგ შედეგებს იმკიან. ვნახოთ, რა შეიძლება მოხდეს რელიგიურად დაყოფილ ოჯახში. მოციქულმა პეტრემ დაწერა: „ასევე თქვენც, ცოლებო, დაემორჩილეთ თქვენს ქმრებს, რათა ისინი, ვინც სიტყვას არ ემორჩილებიან, უსიტყვოდ იქნენ მოპოვებულნი ცოლების საქციელით, როცა დაინახავენ, რომ სუფთად იქცევით და დიდ პატივისცემას ავლენთ“ (1 პეტ. 3:1, 2). ქრისტიანის კარგმა საქციელმა შეიძლება აღძრას მეუღლე, მისი რწმენა გაიზიაროს. ასეთი სახით გადარჩენილი ოჯახი განადიდებს ღმერთს და დიდი კურთხევები მოაქვს ქმრისთვის, ცოლისთვის და შვილებისთვის.

10, 11. რა მოულოდნელმა პრობლემებმა შეიძლება იჩინოს ქორწინებაში თავი, მაგრამ რაში შეუძლია ქრისტიანს იყოს დარწმუნებული?

¹⁰ დაუქორწინებელი ქრისტიანი, რომელსაც ღვთისმოსაწონად მოქცევა სურს, ცხოვრების თანამგზავრად მიძღვნილ თანაქრისტიანს ირჩევს. მაგრამ ამ შემთხვევაშიც კი მდგომარეობა შეიძლება მოულოდნელად შეიცვალოს. მაგალითად, ზოგჯერ მეუღლე შეიძლება სერიოზულ ემოციურ პრობლემებს შეხვდეს. ქორწილიდან გარკვეული დროის შემდეგ ცოლი ან ქმარი შეიძლება არააქტიური მაუწყებელიც კი გახდეს. განვიხილოთ ლინდასa შემთხვევა, რომელიც ერთგული ქრისტიანი და მზრუნველი დედაა. ის უიმედო მდგომარეობაში იყო, რადგან მისმა მონათლულმა ქმარმა ცოდვა ჩაიდინა და გაირიცხა. როგორ უნდა მოიქცნენ ქრისტიანები მსგავს სიტუაციაში?

¹¹ შეიძლება ფიქრობთ: „ნებისმიერ შემთხვევაში უნდა ვეცადო ოჯახის შენარჩუნებას?“ არავის შეუძლია და არც უფლება აქვს, თქვენ მაგივრად მიიღოს გადაწყვეტილება. მაგრამ არსებობს საფუძვლიანი მიზეზები, რის გამოც არ უნდა ვიფიქროთ ოჯახის დანგრევაზე, რაოდენ უიმედოდ არ უნდა ჩანდეს სიტუაცია. იეჰოვა ძალიან აფასებს ღვთისმოშიშ ქრისტიანებს, რომლებიც სინდისის გამო იტანენ რთულ ოჯახურ მდგომარეობას (წაიკითხეთ 1 პეტრეს 2:19, 20). თავისი სიტყვისა და წმინდა სულის მეშვეობით ღმერთი დაეხმარება იმ ქრისტიანებს, რომლებიც ყველაფერს აკეთებენ ოჯახური კვანძების განსამტკიცებლად.

ისინი მზად არიან დასახმარებლად

12. რას იფიქრებენ უხუცესები ჩვენზე, თუ მათ დახმარებისთვის მივმართავთ?

¹² თუ ოჯახში პრობლემები გაქვთ, არ მოგერიდოთ, დახმარებისთვის მოწიფულ ქრისტიანებს მიმართოთ. უხუცესები სულიერ მწყემსებად მსახურობენ და სიამოვნებით მოგცემენ ბიბლიაზე დაფუძნებულ რჩევებს (საქ. 20:28; იაკ. 5:14, 15). არ იფიქროთ, რომ თქვენ ან თქვენი მეუღლე უხუცესების მხრიდან პატივისცემას დაკარგავთ, თუ მათ სულიერ დახმარებას სთხოვთ ან თქვენს სერიოზულ ოჯახურ პრობლემებს გაანდობთ. პირიქით, თქვენდამი მათი სიყვარული და პატივისცემა უფრო მეტად გაიზრდება, როდესაც დაინახავენ, რომ გულწრფელად გსურთ ღვთისმოსაწონად მოქცევა.

13. რა რჩევაა მოცემული 1 კორინთელების 7:10—16- ში?

¹³ როდესაც ქრისტიანი რელიგიურად დაყოფილ ოჯახში ცხოვრობს და უხუცესებს დახმარებისთვის მიმართავს, მათ შეიძლება ყურადღება გაუმახვილონ პავლეს შემდეგ რჩევაზე: „დაქორწინებულებს მივუთითებ — თუმცა მე კი არა, უფალი — რომ ცოლი არ გაშორდეს ქმარს, მაგრამ თუ გაშორდება, აღარ გათხოვდეს, ან ქმარს შეურიგდეს. ნურც ქმარი მიატოვებს ცოლს . . . რა იცი შენ, ცოლო, იქნებ იხსნა ქმარი? ანდა რა იცი შენ, ქმარო, იქნებ იხსნა ცოლი?“ (1 კორ. 7:10—16). მართლაც რამხელა სიხარულია, როდესაც ქრისტიანის მეუღლე ჭეშმარიტებაში დგება!

14, 15. როდის შეუძლია ქრისტიანს იფიქროს ცალკე ცხოვრებაზე, მაგრამ რატომ უნდა ილოცოს და გულწრფელად შეაფასოს საკუთარი მოტივები?

¹⁴ რა შემთხვევებში შეუძლია ქრისტიან ცოლს ცალკე ცხოვრებაზე იფიქროს? ზოგიერთი ცალკე ცხოვრებას არჩევს, რადგან ქმარი შეგნებულად არ უზრუნველყოფს ოჯახს მატერიალურად. სხვები ამ გადაწყვეტილებას იმიტომ ღებულობენ, რომ მათ ფიზიკურ ან სულიერ ჯანმრთელობას საფრთხე ემუქრება.

¹⁵ ცალკე იცხოვრებთ თუ არა, ეს პირადი გადასაწყვეტია. თუმცა მონათლულმა ქრისტიანმა უნდა ილოცოს და გულწრფელად შეაფასოს საკუთარი მოტივები. მაგალითად, მეუღლის ბრალია, ოჯახის სულიერი მდგომარეობა რომ საფრთხეშია? თუ ქრისტიანი თვითონ უგულებელყოფს ბიბლიის პირად შესწავლას, ხშირად აცდენს კრების შეხვედრებს და იშვიათად მსახურობს?

16. რატომ არ უნდა იჩქაროს ქრისტიანმა, როცა საქმე გაყრას ეხება?

¹⁶ ჩვენ ვაფასებთ ღმერთთან ურთიერთობას და ქორწინების ძღვენს, რაც გვეხმარება, ნაჩქარევად არ გადავწყვიტოთ ცალკე ცხოვრება ან განქორწინება. ჩვენ, იეჰოვას მსახურები, დაინტერესებული ვართ ღვთის წმინდა სახელის განწმენდით. ამიტომ არასდროს დავგეგმოთ ოჯახის დანგრევა იმ მიზნით, რომ სხვაზე დავქორწინდეთ (იერ. 17:9; მალ. 2:13—16).

17. რა შემთხვევაში შეიძლება ითქვას, რომ ღმერთი ქრისტიანებს მშვიდობისკენ მოუწოდებს?

¹⁷ ქრისტიანი, რომლის მეუღლე იეჰოვას მოწმე არ არის, გულწრფელად უნდა ეცადოს ოჯახის შენარჩუნებას. მაგრამ ძმამ ან დამ თავი არ უნდა დაიდანაშაულოს, თუკი მისი მცდელობის მიუხედავად ოჯახი ინგრევა და მეუღლე ტოვებს მას. პავლემ დაწერა: „თუ ურწმუნოს გაშორება სურს, გაშორდეს, ასეთ შემთხვევაში ძმა ან და იძულებული არ არის, დარჩეს მასთან, რადგან ღმერთმა მშვიდობისკენ მოგიწოდათ“ (1 კორ. 7:15).b

იეჰოვაზე დაამყარეთ იმედი

18. რა კარგ შედეგებს მოიტანს ოჯახის შენარჩუნების მცდელობა მაშინაც კი, თუ მისი გადარჩენა შეუძლებელია?

¹⁸ თუ ოჯახში უთანხმოებები გაქვთ, სთხოვეთ იეჰოვას ლოცვაში გაბედულება და მასზე დაამყარეთ იმედი (წაიკითხეთ ფსალმუნის 27:14 ). გავიხსენოთ ლინდა, რომელიც ზემოთ მოვიხსენიეთ. მისი ოჯახი დაინგრა, მიუხედავად იმისა, რომ წლების მანძილზე ცდილობდა მის გადარჩენას. ფიქრობს ის, რომ ტყუილად დაკარგა დრო? „არავითარ შემთხვევაში — ამბობს ლინდა. — ჩემი ძალისხმევა სხვებისთვის კარგი დამოწმება იყო. მე სუფთა სინდისი მაქვს და რაც მთავარია, ეს წლები დაეხმარა ჩემს ქალიშვილს, მტკიცე რწმენა ჰქონოდა. მან თავი მიუძღვნა იეჰოვას და გულმოდგინე მქადაგებელი გახდა“.

19. რა დადებითი შედეგი შეიძლება მოჰყვეს, თუ ვეცდებით ოჯახური კვანძების განმტკიცებას?

¹⁹ ერთი ქრისტიანი ქალი, მერილინი, ბედნიერია, რომ ღმერთს მიენდო და თავისი ოჯახის გადასარჩენად ძალ-ღონე არ დაიშურა. ის გვიყვება: „ცალკე ცხოვრებაზე ვფიქრობდი, ვინაიდან ჩემი მეუღლე არც ფინანსურად და არც სულიერად არ ზრუნავდა ოჯახზე. უწინ ის უხუცესად მსახურობდა. მოგვიანებით ისეთ ბიზნესში ჩაება, რომ კრების შეხვედრების გაცდენა დაიწყო. ჩვენ, უბრალოდ, შევწყვიტეთ ურთიერთობა. ჩვენს ქალაქში მომხდარმა ერთმა ტერორისტულმა თავდასხმამ ისე შემაშინა, რომ საკუთარ ნაჭუჭში ჩავიკეტე. მოგვიანებით მივხვდი, რომ ოჯახურ პრობლემებში დამნაშავე მეც ვიყავი. ჩვენ ისევ დავიწყეთ ურთიერთობა, განვაახლეთ ოჯახური შესწავლა და კრებებსაც აღარ ვაცდენდით. უხუცესები ძალიან გულისხმიერნი იყვნენ და დიდად დაგვეხმარნენ. ჩვენს ოჯახში უწინდებურმა იდილიამ დაისადგურა. დროთა განმავლობაში ჩემმა ქმარმა კვლავ მიიღო გარკვეული პასუხისმგებლობები კრებაში. ეს ჩემი ცხოვრების ურთულესი პერიოდი იყო, მაგრამ, საბედნიეროდ, ყველაფერი კარგად დასრულდა“.

20, 21. რა უნდა გვქონდეს გადაწყვეტილი, თუ ვაფასებთ ქორწინების ძღვენს?

²⁰ დაოჯახებული ვართ თუ არა, მოდი, გაბედულად ვიმოქმედოთ და იმედი ყოველთვის იეჰოვაზე დავამყაროთ. თუ ოჯახურ პრობლემებს ვხვდებით, გულწრფელად უნდა ვეცადოთ მათ გადაჭრას და უნდა გვახსოვდეს, რომ ისინი, ვინც ერთად ეწევიან ოჯახურ ჭაპანს „ორნი კი აღარ არიან, არამედ ერთი ხორცი“ (მათ. 19:6). რელიგიურად დაყოფილ ოჯახში ცხოვრება ადვილი არ არის, მაგრამ თუ ღირსეულად უმკლავდებით სირთულეებს, თქვენც შეიძლება განიცადოთ მეუღლის ჭეშმარიტებაში მოსვლით გამოწვეული სიხარული.

²¹ ჩვენი მდგომარეობის მიუხედავად, წინდახედულად უნდა მოვიქცეთ, რომ კარგი მაგალითი ვიყოთ მათთვის, ვინც ჩვენს რწმენას არ იზიარებს. თუ ჩვენი ოჯახური კერა ცივდება, მხურვალედ ვილოცოთ, გულწრფელად შევამოწმოთ საკუთარი მოტივები, გულდასმით გამოვიკვლიოთ ბიბლიური მუხლები და სულიერი დახმარებისთვის უხუცესებს მივმართოთ. და რაც ყველაზე მთავარია, მოდი, ყველაფერში ვასიამოვნოთ ჩვენს ღმერთ იეჰოვას და მადლიერება გამოვავლინოთ ღვთის შესანიშნავი ძღვნისთვის — ქორწინებისთვის.

[სქოლიოები]