პირობითი მორჩილება

14. როგორ გაძლიერდა სინათლის შუქი რომაელთა 13:1, 2-სა და მასთან დაკავშირებულ მუხლებთან დაკავშირებით 1962 წელს?

¹⁴ „საღვთო წერილის ახალი ქვეყნიერების თარგმანი“ (ინგლ.) დასრულდა 1961 წელს. მისი თარგმნისთვის საჭირო იყო წერილების ორიგინალის ენის ღრმა გამოკვლევა. სიტყვების ზუსტმა თარგმნამ ნათელი გახადა, რომ რომაელთა მე-13 თავში, ტიტეს 3:1, 2-სა და 1 პეტრეს 2:13, 17-ში გამოყენებული ტერმინი „უმაღლესი ხელმწიფება“ იეჰოვასა და მისი ძის, იესოს უზენაეს ხელისუფლებას კი არ ეხება, არამედ მიწიერ სამთავრობო ხელისუფლებებს. მოგვიანებით, 1962 წელს, „საგუშაგო კოშკში“ გამოქვეყნდა სტატია, სადაც ზუსტად აიხსნა რომაელთა მე-13 თავი და უფრო ნათლად იქნა გაშუქებული ის თვალსაზრისი, რომელიც ჯერ კიდევ ჩ. ტ. რასელის დროს არსებობდა. ეს სტატიები მიუთითებს, რომ ხელისუფლებებისადმი ქრისტიანული მორჩილება არ არის აბსოლუტური. ეს უნდა იყოს პირობითი, მისადმი მორჩილება არ უნდა ეწინააღმდეგებოდეს ღვთის კანონებს. ამ მნიშვნელოვან საკითხებზე ყურადღება გაამახვილა „საგუშაგო კოშკში“ მოცემულმა შემდეგმა სტატიებმაc.

15, 16. ა) რა უკეთესი, გაწონასწორებული თვალსაზრისი მოიტანა ახალმა გაგებამ რომაელთა მე-13 თავთან დაკავშირებით? ბ) რომელ კითხვებს უნდა გაეცეს პასუხი?

¹⁵ ეს არის რომაელთა მე-13 თავის ზუსტი გაგების საფუძველი, რაც შესაძლებლობას აძლევს იეჰოვას ხალხს, რომ იყვნენ გაწონასწორებული, პატივი მიაგონ პოლიტიკურ ხელისუფლებებს და კომპრომისზე არ წავიდნენ წერილებიდან გამომდინარე მნიშვნელოვანი პრინციპების წინააღმდეგ (ფსალმუნი 96:11; იერემია 3:15). ეს საშუალებას აძლევს მათ, ჰქონდეთ სწორი თვალსაზრისი ღმერთთან ურთიერთობასა და ხელისუფლებასთან დამოკიდებულებაზე. ეს არწმუნებს მათ, რომ თუ კეისარს კეისრისას აძლევენ, მათ არ ავიწყდებათ, ღვთისა მისცენ ღმერთს.

საინტერესოა, რომ რომაელთა მე-13 თავის კომენტარში, პროფესორი ფ. ფ. ბრიუსი წერს: „ისევე, როგორც მოციქულთა ყველა წერილის კონტექსტიდან, ამ კონტექსტიდანაც ნათელია, რომ სახელმწიფოს სამართლიანად შეუძლია მოითხოვოს მხოლოდ განსაზღვრულ ფარგლებში მოქცეული მორჩილება იმ განზრახვით, რისთვისაც ის ღვთის ნებით დადგინდა — ჩვენ ის აზრი კი არ უნდა გვქონდეს, რომ შეიძლება შევეწინააღმდეგოთ სახელმწიფოს, არამედ აუცილებლად უნდა შევეწინააღმდეგოთ, როდესაც ის მოითხოვს ისეთ ერთგულებას, რომელიც მხოლოდ ღმერთს ეკუთვნის“.