იყენებ ნასწავლს საოლქო კონგრესზე, სახელწოდებით „ღვთის სიტყვის მასწავლებლები“?

¹ ყველამ, ვინც ამ წლის საოლქო კონგრესს დაესწრო, დაინახა, რომ იეჰოვას ხალხი ადამიანებისთვის ღვთის სიტყვის სწავლების დავალებას ასრულებენ (მათ. 28:19, 20). სახლში დაბრუნებისას, რომელი განსაკუთრებული რჩევების გამოყენება გადაწყვიტე ცხოვრებასა და მსახურებაში?

² ღვთივსულიერი წერილები სასარგებლოა სასწავლებლად. პირველი დღის თემა მე-2 ტიმოთეს 3:16-ზე იყო დაფუძნებული. როგორც წამყვან მოხსენებაში იყო აღნიშნული, „ღვთის სიტყვის მასწავლებლებად ყოველმხრივ მომზადებულნი“ რომ ვიყოთ, პატივისცემით უნდა მოვეპყროთ ღვთის სიტყვას, ადამიანთა ნებისმიერ თვალსაზრისსა და ტრადიციაზე მეტად დავაფასოთ და ყოველთვის გამოვიყენოთ. აგრეთვე ყოველდღიურად უნდა ვითხოვოთ ლოცვაში სულიწმიდა, რომ დაგვეხმაროს მსახურებაში და მისი უმთავრესი ნაყოფის, სიყვარულის, განვითარება შევძლოთ. გარდა ამისა, იეჰოვას მიწიერ ორგანიზაციას საშუალება უნდა მივცეთ, რომ კრების შეხვედრების საშუალებით მსახურებად გამოგვწვრთნას.

³ ყველა ჩვენგანის საბედნიეროდ, დილის პროგრამის დასასრულს მივიღეთ ქრისტიანულ-ბერძნული წერილების „ახალი ქვეყნიერების თარგმანი“ რუსულ ენაზე, რომელსაც სიხარულით ვიყენებთ მსახურებაში, კრების შეხვედრებზე და პირადი შესწავლისას. უდავოდ, დიდ სტიმულს გვაძლევს ღვთის სიტყვის ამ თანამედროვე და ზუსტი თარგმანის ყოველდღიურად გამოყენება.

⁴ პარასკევს წაკითხულ მოხსენებათა სერიაში, „საკუთარ თავსაც ვასწავლოთ, როდესაც სხვებს ვასწავლით“, ახსნილი იყო, რომ სამაგალითონი უნდა ვიყოთ: 1) ღვთის კანონებისადმი ერთგულება ქრისტიანული მორალის თითოეულ საკითხში, 2) სწავლის კარგი ჩვევების შენარჩუნებაში, 3) ისეთი გონება-განწყობილების მოშორებაში, რომლის გამოყენებაც სატანას შეუძლია. შემდგომ გავიგეთ, თუ რომელი პრაქტიკული საშუალებებით შეგვიძლია დავიცვათ ჩვენი ოჯახი მსოფლიოში გავრცელებული სენისგან — პორნოგრაფიისგან. მშობლებს მოუწოდეს, რომ სამაგალითონი იყვნენ. წამიერადაც კი არ შეავლონ თვალი უზნეო სცენებს და გააკონტროლონ, თუ როგორ იყენებენ ბავშვები ინტერნეტსა და ტელევიზორს. პარასკევი დღის პროგრამიდან, რომელი რჩევების გამოყენება დაიწყე?

⁵ დღის ბოლო მოხსენებამ უფრო მტკიცედ გადაგვაწყვეტინა ის, რომ დავაფასოთ იეჰოვას სინათლე, დავრჩეთ ღვთის ცხებულების ერთგულ კლასთან და ხელი შევუწყოთ იეჰოვას ხალხის მშვიდობას. წაიკითხე ახალი წიგნი „ესაიას წინასწარმეტყველება — სინათლე მთელი კაცობრიობისთვის II“?

⁶ სათანადოდ მომზადებულნი სხვებისთვის სასწავლებლად. მეორე დღის თემა დაფუძნებული იყო მე-2 ტიმოთეს 2:2-ზე. როდესაც შაბათ დილას უსმენდი მოხსენებათა სერიას, ყურადღება მიაქციე რჩევებს, თუ როგორ 1) მოვძებნოთ ღირსეულები, 2) განვუვითაროთ ინტერესი და 3) ვასწავლოთ იმ ყოველივეს დაცვა, რაც ქრისტემ გვამცნო? იყენებ თუ არა ნასწავლს, რომ მობინადრეს წაუკითხო, სულ მცირე, ერთი ბიბლიური მუხლი მაინც, და საფუძველი ჩაუყარო განმეორებით მონახულებას?

⁷ შუადღის პროგრამაში ხაზი ესმებოდა იმას, რომ აუცილებელია, მივბაძოთ დიდებულ მასწავლებელს, იესოს. რას აკეთებ იმისათვის, რომ უფრო მეტად მიჰბაძო მას? იქიდან გამომდინარე, რაც გაიგე მეორე მოხსენებათა სერიის დროს, როგორ შეგიძლია „უფრო სრული სარგებლობა მიიღო თეოკრატიული განათლებიდან“? რომელი რჩევები გამოიყენე, რომ უფრო ყურადღებიანი იყო პირადი შესწავლისა და კრების შეხვედრების დროს?

⁸ უდავოა, ახალი სახელმძღვანელო „მიიღეთ განათლება თეოკრატიული სამსახურის სკოლაში“, რომელიც ახლო მომავალში გამოვა, დაგვეხმარება, უკეთესად საუბარსა და ღვთის სიტყვის სწავლებაში. დიდი ყურადღება მიექცევა იმას, თუ როგორ საუბრობდნენ ღვთის მსახურები, რომლებიც ბიბლიურ დროში ცხოვრობდნენ. ამ ახალ სახელმძღვანელოში ყოველ გაკვეთილს დართული ექნება ჩარჩო, რომელშიც მოკლედ იქნება აღწერილი, თუ სასურველი მიზნის მისაღწევად რა უნდა გავაკეთოთ, რატომ არის ეს მნიშვნელოვანი და როგორ უნდა გავაკეთოთ ეს. მასში აგრეთვე მოცემული იქნება პრაქტიკული სავარჯიშოები. დებს მიეცემათ 29 პუნქტი, რომელთაგან შესაბამის პუნქტებზე იმუშავებენ. დროდადრო, სკოლის გეგმაში შეტანილი იქნება ის ცვლილებები, რომლებზეც საუბარი იყო. რეგულარულად სწავლობ და ემზადები, რომ მაქსიმალური სარგებლობა მიიღო ყოველკვირეული თეოკრატიული სამსახურის სკოლიდან?

⁹ იყავით მასწავლებლები დროის მიხედვით. ებრაელთა 5:12-მა ჩინებულად განაწყო აუდიტორია მოსასმენად. დილით წაკითხულმა მოხსენებათა სერიამ „მალაქიას წინასწარმეტყველება იეჰოვას დღისათვის გვამზადებს“ დაგვანახვა, რომ ყოველივე საუკეთესო უნდა ვუძღვნათ ღმერთს და შევიძულოთ ვერაგობის ნებისმიერი ფორმა, რათა გადავრჩეთ იეჰოვას დიდ და შიშის მომგვრელ დღეს. დრამაში „პატივი მიაგეთ იეჰოვას ხელმძღვანელობას“ ნათლად იყო ნაჩვენები, თუ როგორ მიიყვანა სიამაყემ, პატივმოყვარეობამ, შურმა და მოჩვენებითმა ერთგულებამ კორახი და მისი დასი იეჰოვას წინააღმდეგ აშკარა აჯანყებამდე. მომდევნო მოხსენება ყურადღებას ამახვილებდა იმის აუცილებლობაზე, რომ ოჯახებსა და კრებაში ყველა დაემორჩილოს ღვთის ხელმძღვანელობას“. მოხსენებაში „ვინ ასწავლის ჭეშმარიტებას ყველა ხალხს?“ განხილული იყო იმის მტკიცებები, რომ ქრისტიანული სამყაროსგან განსხვავებით, რომელიც მხოლოდ აცხადებს, რომ ბიბლიურ ჭეშმარიტებას ასწავლის ხალხს, სწავლების საქმით იეჰოვას მოწმეები არიან დაკავებული.

¹⁰ ნათელია, იეჰოვა წვრთნის ყოველ ჩვენგანს, რათა მისი სიტყვის კარგი მასწავლებლები ვიყოთ. მოდი გამოვიყენოთ ნასწავლი, ‘გავუფრთხილდეთ თავს და სწავლებას, რადგან ასეთი მოქმედებით ჩვენს თავსაც ვიხსნით და მსმენელთაც’ (1 ტიმ. 4:16).