Ĩvuku ya Mbee ya Mavinda

10 Yu Avilisiti mokitaa na Aisilaeli. Na aũme ma Isilaeli masemba makĩa Avilisiti, na aingĩ mooaĩwa Kĩĩmanĩ kya Ngilivoa. 2 Avilisiti nĩmaendeeie kũthengeea Saũlo na ana make mũno, na Avilisiti mooaa Yonathani, Avinatavu, na Maliki-sua, ana ma Saũlo. 3 Kaũ nĩwavyũvĩie Saũlo mũno, na ndũĩka sya kũatha na maangi syamwona, na syamũatha syamũũmĩsya. 4 Nĩvo ĩndĩ Saũlo weeie ũla wamũkuĩaa mĩio yake ya kaũ atĩĩ: “Kũa ũvyũ waku na ũindonya nawʼo, nĩ kana aũme aa mate aĩke maikoke na maimbĩka maũndũ mathũku mũno.”* Ĩndĩ ũla wamũkuĩaa mĩio ya kaũ ndendaa kwĩka ũu, nĩkwĩthĩwa aĩ na wia mwingĩ mũno. Kwoou Saũlo oosa ũvyũ ũsu aũvalũkĩla. 5 Yĩla mũndũ ũsu wamũkuĩaa mĩio ya kaũ woonie kana Saũlo nĩwakw’a, o nake nĩwavalũkĩile ũvyũ wake na akwʼa. 6 Kwoou Saũlo na ana make atatũ makwʼa, na onthe ma nyũmba yake makwʼa vamwe. 7 Yĩla andũ onthe ma Isilaeli ala maĩ mwandanĩ* moonie kana kĩla mũndũ nĩwasemba akĩa na kana Saũlo na ana make nĩmakw’a, nĩmambĩĩie kuma ndũanĩ syoo na masemba makĩa; na ĩndĩ Avilisiti mooka mekala ndũanĩ isu.

8 Mũthenya ũla waatĩĩe, yĩla Avilisiti mookie kumya ala mooaĩtwe syĩndũ ila maĩ nasyo, meethĩie Saũlo na ana make mavalũkĩte Kĩĩmanĩ kya Ngilivoa. 9 Kwoou mamumya syĩndũ syake na mamũtila mũtwe na moosa mĩio yake ya kaũ, na matũmana kĩsionĩ kyonthe kya Avilisiti ũvoo ũsu ũnyaĩĩkĩwʼe ngai syoo sya mĩvwʼanano na andũ. 10 Na ĩndĩ maia mĩio yake ya kaũ nyũmbanĩ* ya ngai yoo na maathĩĩa kĩng’ala kyake nyũmbanĩ ya Ndakoni.

11 Yĩla andũ onthe ma Yavesi ya Ngileati meewie maũndũ onthe ala Avilisiti meekĩte Saũlo, 12 aũme onthe ngũmbaũ nĩmookĩlile na makua mwĩĩ wa Saũlo na mĩĩ ya ana make. Nĩmamĩetie Yavesi na mathika mavĩndĩ moo ungu wa mũtĩ mũnene kũu Yavesi, na matĩĩa kũya mĩthenya mũonza.

13 Kwoou Saũlo nĩwakwie nũndũ ndaĩ mũĩkĩĩku kwa Yeova nĩkwĩthĩwa ndaaĩwʼa ndeto ya Yeova, na nĩwakũlilye mũndũ ũneenanasya na maveva ũtao 14 vandũ va kũkũlya Yeova ũtao. Kwoou nĩwamũaie na anenga Ndaviti mwana wa Yese ũsumbĩ.