Ĩvuku ya Mbee ya Mavinda

7 Yu ana ma Isakali maĩ Tola, Vua, Yasuvu, na Similoni, maĩ ana. 2 Na ana ma Tola maĩ Usisi, Levaia, Yelieli, Yamai, Ivisamu, na Semueli, aũngamĩi ma nyũmba sya aa-ĩthe. Nzyawanĩ sya Tola vaĩ na ngũmbaũ sya kaũ, ila mĩthenyanĩ ya Ndaviti ũtalo wasyo waĩ 22,600. 3 Na nzyawa sya* Usisi syaĩ Isilaia na ana ma Isilaia: Mikaeli, Ovatia, Yoeli, na Isia, onthe me atano maĩ anene.* 4 Na nzyawa syoo, kwosana na nyũmba sya aa-ĩthe, syaĩ na asikalĩ 36,000 itanĩ syoo meyũmbanĩtye kwondũ wa kaũ, nĩkwĩthĩwa maĩ na iveti mbingĩ na ana aingĩ. 5 Na ana-a-ĩthe kuma mĩsyĩnĩ yonthe ya Isakali maĩ ngũmbaũ sya kaũ, 87,000 kwosana na ũndũ masyĩtwa moo matalanĩtwʼe lekotinĩ sya mĩsyĩ yoo.

6 Ana ma Mbenyamini maĩ Mbela, Mbekeli, na Yetiaeli, maĩ atatũ. 7 Na ana ma Mbela maĩ Esivoni, Usisi, Usieli, Yelimothi, na Ili, maĩ atano, aũngamĩi ma nyũmba sya aa-ĩthe moo, ngũmbaũ sya kaũ, na 22,034 nĩmatalanĩtwʼe lekotinĩ sya mĩsyĩ yoo. 8 Na ana ma Mbekeli maĩ Nzemila, Yoasi, Elieseli, Elioenai, Omili, Yelemothi, Aviya, Anathothi, na Alemethi, asu onthe maĩ ana ma Mbekeli. 9 Lekoti ila italanĩtye masyĩtwa ma mĩsyĩ yoo na syonanĩtye ũndũ nzyawa syoo iatĩanĩe kwosana na aũngamĩi ma nyũmba sya aa-ĩthe, syonanĩtye maĩ ngũmbaũ sya kaũ 20,200. 10 Na ana ma Yetiaeli maĩ Mbiliani na ana ma Mbiliani maĩ Yeusi, Mbenyamini, Euti, Kenaana, Nzethani, Talisisi, na Aisaali. 11 Asu onthe maĩ ana ma Yetiaeli, kwosana na aũngamĩi ma aa-ũmae, ngũmbaũ sya kaũ 17,200 syeeyũmbanĩtye kũlika itanĩ kwondũ wa kaũ.

12 Suvimu na Uvimu maĩ ana ma Ili; Usimu maĩ ana ma Aeli.

13 Ana ma Navitali maĩ Yasieli, Nguni, Yeseli, na Salumu, nzyawa sya* Mbila.

14 Ana ma Manase: Asilieli, ũla wasyaĩwe nĩ kĩveti kyake kya ndũsyo* kĩla kyaĩ Mũsilia. (Kyasyaie Makili ĩthe wa Ngileati. 15 Makili nĩwamanthĩie Uvimu na Suvimu iveti, na mwĩĩtu-a-inyia eetawa Maaka.) Wa kelĩ eetawa Nzeloveati, ĩndĩ Nzeloveati aĩ na eĩtu oka. 16 Maaka, kĩveti kya Makili, nĩkyasyaie mwana na kyamwĩta Velesu; na mwana-a-inyia eetawa Selesu; na ana make maĩ Ulami na Lekemu. 17 Na mwana* wa Ulami aĩ Mbetani. Asu nĩmo maĩ ana ma Ngileati mwana wa Makili mwana wa Manase. 18 Na mwĩĩtu-a-inyia aĩ Amolekethi. Nĩwasyaie Isiotu, Avi-eseli, na Maala. 19 Na ana ma Semita maĩ Aiani, Sekemu, Liki, na Aniamu.

20 Ana ma Evilaimu maĩ Suthela, Mbeleti mwana wake, Taathi mwana wake, Eleata mwana wake, Taathi mwana wake, 21 Nzavati mwana wake, Suthela mwana wake, Eseli, na Eleati. Aũme ma Ngathi ala masyaĩwe nthĩ ĩsu nĩmamoaie nũndũ nĩmatheeie makose indo syoo. 22 Evilaimu ĩthe woo nĩwaendeeie kũmeta mĩthenya mingĩ, na ana-a-ĩthe nĩmookaa kũmũkiakisya. 23 Ĩtina nĩwakomie na kĩveti kyake, na kyaitava na kyasyaa mwana. Ĩndĩ Evilaimu amwĩtie Mbelia* nĩkwĩthĩwa kyamũsyaie ĩvindanĩ mũsyĩ wake wakwatiwe nĩ mũisyo. 24 Na mwĩĩtu wake aĩ Seela, ũla waakie Mbethi-oloni ya Ĩtheo na ya Ĩũlũ na Useni-seela. 25 Na vaĩ Leva mwana wake, Lesevu, Telaa mwana wake, Taani mwana wake, 26 Latani mwana wake, Amiuti mwana wake, Elisama mwana wake, 27 Nuni mwana wake, na Yosua* mwana wake.

28 Isio syoo na motũi moo maĩ Mbetheli na tũtũla twayo,* na ngalĩko ya wumĩlonĩ wa sua Naalani, na ngalĩko ya ũthũĩlonĩ wa sua Ngeseli na tũtũla twayo, na Sekemu na tũtũla twayo, nginya Aya* na tũtũla twayo; 29 na ũtee wa nzyawa sya Manase, Mbethi-seani na tũtũla twayo, Taanaki na tũtũla twayo, Mekito na tũtũla twayo, na Ndoli na tũtũla twayo. Nzyawa sya Yosevu mwana wa Isilaeli syatwĩe kũu.

30 Ana ma Aseli maĩ Imina, Isiva, Isivi, na Mbelia, na mwĩĩtu-a-inyia woo aĩ Sela. 31 Ana ma Mbelia maĩ Eeveli na Malikieli, ũla waĩ ĩthe wa Mbilisaithi. 32 Eeveli aĩ ĩthe wa Yavileti, Someli, na Othamu, vamwe na mwĩĩtu-a-inyia woo Suua. 33 Ana ma Yavileti maĩ Vasaki, Mbimiali, na Asivathi. Asu nĩmo maĩ ana ma Yavileti. 34 Ana ma Semeli* maĩ Ai, Loka, Yeuva, na Alamu. 35 Ana ma mwana-a-ĩthe Elemu* maĩ Nzova, Imuna, Selesi, na Amali. 36 Ana ma Nzova maĩ Sua, Alineveli, Suali, Mbeli, Imula, 37 Mbeseli, Oti, Samima, Silisa, Ithilani, na Veela. 38 Ana ma Yetheli maĩ Yevune, Visiva, na Ala. 39 Ana ma Ula maĩ Alaa, Anieli, na Lisia. 40 Asu onthe maĩ ana ma Aseli, aũngamĩi ma nyũmba sya aa-ĩthe, ngũmbaũ sya kaũ inyuvĩtwe, anene ma ita; na ũtalo woo kwosana na masyĩtwa ala matalanĩtwʼe lekotinĩ sya mĩsyĩ yoo maĩ aũme 26,000 ala maĩ itanĩ meyũmbanĩtye kwondũ wa kaũ.