Ĩvuku ya Mbee ya Mavinda
12 Aa nĩmo aũme ala maendie kũla kwĩ Ndaviti kũu Nzikilaki yĩla ũtaĩ athi vala ũkwenda nũndũ wa Saũlo mwana wa Kisi, na maĩ katĩ wa ngũmbaũ sya kaũ ila syamũkwataa mbau kaũnĩ. 2 Maĩ na mbũta, na maĩ matonya kwĩkya mavia na kĩkũtha na moko moo elĩ, kwʼoko kwa aũme na kwʼoko kwa aka. O na maĩ matonya kwĩkya maangi na ũta na moko moo elĩ. Maĩ ana-a-ĩthe ma Saũlo, kuma Mbenyamini. 3 Mũũngamĩi woo aĩ Aieseli, vamwe na Yoasi, elĩ maĩ ana ma Semaa Mũngivea; Yesieli na Veleti ana ma Asimavethi, Mbelaka, Yeu Mũanathothi, 4 Isimaia Mũngiveoni, ngũmbaũ ya kaũ katĩ wa ala 30 na mũũngamĩi wa ala 30; o vamwe na Yelemia, Yaanzieli, Yoanani, Yosavatu Mũngetela, 5 Elusai, Yelimothi, Mbealia, Semalia, Sevatia Mũalivu, 6 Elikana, Isia, Asaleli, Yoeseli, na Yasoveamu, Akola; 7 na Yoela na Nzevatia ana ma Yeloamu kuma Ngetoli.
8 Angati amwe nĩmaendie weũnĩ ngomenĩ kũla kwĩ Ndaviti makamũkwate mbau; maĩ ngũmbaũ sya kaũ, asikalĩ mamanyĩĩtwʼe kaũ, meesĩ nesa kũtũmĩa ngao nene na matumo, na mothyũ moo mailye ta ma mũnyambũ na maĩ maaũ ta ilongʼa syĩ iĩmanĩ. 9 Eseli nĩwe waĩ mũũngamĩi woo, akaatĩĩwa nĩ Ovatia, wa katatũ Eliavu, 10 wa kana Misimana, wa katano Yelemia, 11 wa thanthatũ Atai, wa mũonza Elieli, 12 wa nyanya Yoanani, wa kenda Elisavati, 13 wa ĩkũmi Yelemia, wa 11 Makivanai. 14 Aa nĩmo maumĩte mbaĩnĩ ya Ngati, aũngamĩi ma ita. Ũla mũnini vyũ aĩ atonya kũkita na asikalĩ 100, na ũla mũnene vyũ aĩ atonya kũkita na asikalĩ 1,000. 15 Aa nĩmo aũme ala maingie Yolotani mwei wa mbee yĩla ũsĩ ũsu watũlĩte, na masembanyʼa andũ onthe ala mekalaa ndiĩnĩ syĩ myandanĩ, ngalĩko ya wumĩlonĩ wa sua na ngalĩko ya ũthũĩlonĩ wa sua.
16 O namo aũme amwe ma Mbenyamini na ma Yuta nĩmookie vala ve Ndaviti ngomenĩ yake. 17 Na ĩndĩ Ndaviti aumaala na amea atĩĩ: “Ethĩwa mwooka kũla nĩĩ na mũuo nĩ kana mũndetheesye, ngoo yakwa nĩkwĩthĩwa na ngwatanĩo nenyu. Ĩndĩ ethĩwa mwooka nĩ kana mũmbũnyanĩe kũla kwĩ amaitha makwa moko makwa matekĩte ũthũku, Ngai wa aa-ũmae maitũ nĩ one ũndũ ũsu na aitwʼa sila.” 18 Na ĩndĩ veva wooka ĩũlũ wa* Amasai mũũngamĩi wa ala 30, na asya:
“Twĩ maku, we Ndaviti, na twĩ vamwe naku, we mwana wa Yese.
Mũuo, mũuo nĩwĩthĩwe naku, na mũuo wĩthĩwe na ũla ũkũũtetheesya,
Nĩkwĩthĩwa Ngai waku nũkũũtetheesya.”
Kwoou Ndaviti amathokya na amanyuva methĩwe katĩ wa aũngamĩi ma ita.
19 O namo andũ amwe ma mbaĩ ya Manase nĩmatiie ita sya Saũlo na mathi kũla kwĩ Ndaviti yĩla wookanisye na Avilisiti mokite Saũlo; ĩndĩ ndaatetheesya Avilisiti nĩkwĩthĩwa ĩtina wa eai ma Avilisiti kũkũlya ũtao, nĩmamũlũngilye, mayasya: “Akatũtia athi kũla kwĩ mwĩai wake Saũlo, na ũndũ ũsu ũkalikya mathayũ maitũ mũisyonĩ.” 20 Yĩla waendie Nzikilaki, aa nĩmo maendie kũla ũĩ kuma mbaĩnĩ ya Manase: Atinaa, Yosavatu, Yetiaeli, Mikaeli, Yosavatu, Eliũ, na Nzilethai, aũngamĩi ma makili ma Manase. 21 Nĩmatetheeisye Ndaviti kũkita na nguthu ya avenani, nũndũ onthe maĩ aũme me vinya na ngũmbaũ, na nĩmatwʼĩkie anene ma ita. 22 Andũ nĩmaendeeie kũthi kũla kwĩ Ndaviti mũthenya kũthi ũla ũngĩ nĩ kana mamũtetheesye nginya kambi yake yeethĩwa yĩ nene ta kambi ya Ngai.
23 Ũũ nĩwʼo ũtalo wa aũngamĩi ma ala maĩ na mĩio ya kaũ ala maendie kũla kwĩ Ndaviti kũu Eviloni nĩ kana mamũnenge ũsumbĩ wa Saũlo kwosana na mwĩao wa Yeova. 24 Aũme ma Yuta ala makuĩte ngao nene na matumo maĩ 6,800, meyũmbanĩtye kwondũ wa kaũ. 25 Kuma mbaĩnĩ ya Simeoni, vaĩ aũme 7,100 me vinya na ngũmbaũ.
26 Kuma kwa Alivai, vaĩ aũme 4,600. 27 Yeoiata nĩwe waĩ mũtongoi wa ana ma Alũni, na aĩ na aũme 3,700, 28 o vamwe na Nzatoki, mwanake waĩ vinya na ngũmbaũ, na anene 22 ma nyũmba ya aa-ĩthe make.
29 Kuma kwa Ambenyamini, ana-a-ĩthe ma Saũlo, vaĩ aũme 3,000, ala aingĩ moo vau mbeenĩ makwataa mbau nyũmba ya Saũlo me aĩkĩĩku. 30 Kuma kwa Aevilaimu, vaĩ aũme me vinya 20,800, aũme ngũmbaũ na me nguma katĩ wa nyũmba sya aa-ĩthe moo.
31 Kuma nusunĩ ya mbaĩ ya Manase, vaĩ aũme 18,000 ala manyuvĩtwe na masyĩtwa nĩ kana moke kũtwʼĩkĩthya Ndaviti mũsumbĩ. 32 Kuma mbaĩnĩ ya Isakali, ala maeleetwe mavinda na meesĩ kĩla Aisilaeli maĩle kwĩka, vaĩ aũngamĩi 200, na ana-a-ĩthe onthe maĩ ungu woo. 33 Kuma kwa Nzevuluni, vaĩ aũme 50,000 ala maĩ matonya kũthũkũma itanĩ, mevangĩte kwondũ wa kaũ makuĩte mĩio yonthe ya kaũ, onthe nĩmakwatie Ndaviti mbau me aĩkĩĩku vyũ.* 34 Kuma mbaĩnĩ ya Navitali, vaĩ anene 1,000, na maĩ vamwe na aũme 37,000 maĩ na ngao nene na matumo. 35 Kuma mbaĩnĩ ya Ndani, vaĩ aũme 28,600 ala meeyũmbanĩtye kwondũ wa kaũ. 36 Na kuma mbaĩnĩ ya Aseli, ala maĩ matonya kũthũkũma itanĩ na mayĩvanga kwondũ wa kaũ, maĩ 40,000.
37 Kuma mũingo wa Yolotani, kuma mbaĩnĩ ya Leũveni, ya Ngati, na nusu ya mbaĩ ya Manase, vaĩ asikalĩ 120,000 maĩ na mĩthemba yonthe ya mĩio ya kaũ. 38 Asu onthe maĩ aũme ma kaũ, nĩmakwatanie nĩ kana maseũvye ikosi sya kaũ; nĩmookie na ngoo yonthe kũu Eviloni nĩ kana matwʼĩkĩthye Ndaviti mũsumbĩ wa Isilaeli yonthe, na o namo Aisilaeli ala angĩ onthe nĩmakwatanie mayenda* kũtwʼĩkĩthya Ndaviti mũsumbĩ. 39 Na mekalile kũu na Ndaviti mĩthenya ĩtatũ, maiya na kũnywʼa, nĩkwĩthĩwa ana-a-ĩthe nĩmeeyũmbanĩtye kwondũ woo. 40 O na ĩngĩ, ala maĩ vakuvĩ namo, o na ala maĩ vaasa ta Isakali, Nzevuluni, na Navitali, maetae lĩu ũkuĩtwe nĩ mang’oi, ngamĩle, nyũmbũ, na ngʼombe. Maetae mũtu, tũmĩkate twa makũyũ momĩthye na nzavivũ mbũmĩthye, mbinyu, mauta, na ngʼombe na malondu maingĩ mũno, nĩkwĩthĩwa Isilaeli kwaĩ na ũtanu mwingĩ mũno.