Ĩvuku ya Mbee ya Mavinda
26 Ii nĩsyo syaĩ ikundi sya asũvĩi ma mĩvĩa: kuma kwa Akola, Meselemia mwana wa Kole wa ana ma Asavu. 2 Na Meselemia aĩ na ana aa: Nzekalia, ũla waĩ mwana wake ũla mũkũũ, wa kelĩ Yetiaeli, wa katatũ Nzevatia, wa kana Yathinieli, 3 wa katano Elamu, wa thanthatũ Yeoanani, wa mũonza Elio-enai. 4 Na Oveti-etomu aĩ na ana aa: Semaia, ũla waĩ mwana wake ũla mũkũũ, wa kelĩ Yeosavatu, wa katatũ Yoa, wa kana Sakali, wa katano Nethaneli, 5 wa thanthatũ Amieli, wa mũonza Isakali, na wa nyanya Veulethai; nĩkwĩthĩwa Ngai nĩwamũathimĩte.
6 Na mwanae Semaia nĩwasyaie ana matwʼĩkie atongoi ma nyũmba sya aa-ĩthe, nũndũ maĩ aũme me vinya na me ũtonyi. 7 Aa nĩmo maĩ ana ma Semaia: Othini, Levaeli, Oveti, na Elisavati; o namo ana-a-ĩthe Eliũ na Semakia maĩ aũme me ũtonyi. 8 Asu onthe maĩ ma ana ma Oveti-etomu; mo na ana moo na ana-a-ĩthe maĩ aũme me ũtonyi na maĩlĩte kwondũ wa ũthũkũmi, andũ 62 ma mũsyĩ wa Oveti-etomu. 9 Na Meselemia aĩ na ana na ana-a-ĩthe, aũme 18 me na ũtonyi. 10 Na Osa wa ana ma Melali aĩ na ana. Simili nĩwe waĩ mũũngamĩi, o na kau ti we waĩ mwana ũla mũkũũ, ĩthe nĩwamũnyuvie ethĩwe mũũngamĩi, 11 wa kelĩ Ilikia, wa katatũ Tevalia, wa kana Nzekalia. Ana onthe ma Osa na ana-a-ĩthe maĩ 13.
12 Ikundinĩ ii sya asũvĩi ma mĩvĩa, aũngamĩi matethasya mawĩa o ta ala matethawʼa nĩ ana-a-ĩthe, ma kũthũkũma nyũmbanĩ ya Yeova. 13 Kwoou nĩmakũnie kula, ũla mũnini o ũndũ ũmwe na ũla mũnene kwosana na nyũmba sya aa-ĩthe, kwondũ wa mĩvĩa yĩ kĩvathũkanyʼo. 14 Nĩvo ĩndĩ kula ya ngalĩko ya wumĩlonĩ wa sua yavalũkĩile Selemia. Nĩmakũnie kula kwondũ wa mwanae Nzekalia, ũla waĩ mũtai mũĩ, na avalũkĩlwa nĩ kula ya ngalĩko ya ĩũlũ. 15 Oveti-etomu avalũkĩilwe nĩ kula ya ngalĩko ya ĩtheo, na anae manengwa wĩa wa makũmbĩ. 16 Ya Suvimu na Osa yavalũkile ngalĩko ya ũthũĩlonĩ wa sua, vakuvĩ na Mũvĩa wa Salekethi, ũtee wa nzĩa nene ĩla yambatĩte, kĩkundi kya ũsũvĩi kĩvasanĩte na kĩngĩ kya ũsũvĩi; 17 kĩla mũthenya veethĩawa na Alivai thanthatũ ngalĩko ya wumĩlonĩ wa sua, ana ngalĩko ya ĩũlũ, ana ngalĩko ya ĩtheo, na makũmbĩnĩ veethĩawa elĩ elĩ; 18 kwondũ wa valanda ũla waĩ ngalĩkonĩ ya ũthũĩlonĩ wa sua, vaĩ ana nzĩanĩ ĩla nene na elĩ ũ valandanĩ. 19 Isu nĩsyo syaĩ ikundi sya asũvĩi ma mĩvĩa kuma ananĩ ma Akola na ma Amelali.
20 Ĩũlũ wa Alivai, Aiya nĩwe waũngamĩe vala vaiawa ũthwii wa nyũmba ya Ngai ũla wa w’o na vala vaiawa ũthwii wa syĩndũ ila syatheetwʼe.* 21 Aa nĩmo ana ma Latani: ana ma Mũngelisoni wa Latani, aũngamĩi ma nyũmba sya ĩthe sya Latani ũla Mũngelisoni, Yeieli 22 na ana ma Yeieli, Nzethamu na mwana-a-ĩthe Yoeli. Nĩmo maũngamĩe vala vaiawa ũthwii wa nyũmba ya Yeova. 23 Kuma kwa Aamilamu, Aisali, Aeviloni, na Ausieli, 24 Sevueli mwana wa Ngelisomu mwana wa Mose nĩwe waũngamĩe makũmbĩ. 25 Na ĩũlũ wa ana-a-ĩthe ma Elieseli, vaĩ Leavia mwana wake, Yesaia mwana wake, Yolamu mwana wake, Nzikili mwana wake, na Selomothi mwana wake. 26 Selomothi ũsu na ana-a-ĩthe nĩmo maũngamĩe vala vaiawa ũthwii wa syĩndũ ila itheetwʼe, ila Mũsumbĩ Ndaviti, aũngamĩi ma nyũmba sya aa-ĩthe, anene ma makili na ma maana, na anene ma ita matheetye. 27 Nĩmatheetye syĩndũ imwe moosete kaũnĩ na imwe matavĩte nĩ kana masũvĩe nyũmba ya Yeova; 28 o vamwe na syĩndũ syonthe ila syatheetwʼe nĩ Samũeli ũla mwoni, Saũlo mwana wa Kisi, Avineli mwana wa Neli, na Yoavu mwana wa Nzeluia. Kĩndũ o na kĩva kĩla mũndũ wathesya kyaiawa ungu wa Selomithi na ana-a-ĩthe.
29 Kuma kwa Aisali, Kenania na ana make manengiwe mawĩa me kĩvathũkanyʼo nza wa nyũmba ya Ngai me atongoi na asili ma Isilaeli.
30 Kuma kwa Aeviloni, Asavia na ana-a-ĩthe, aũme me ũtonyi 1,700, maũngamĩe Isilaeli kĩsionĩ kya ngalĩko ya ũthũĩlonĩ wa sua ya Yolotani kwondũ wa wĩa wʼonthe wa Yeova na ũthũkũmi wa mũsumbĩ. 31 Kuma kwa Aeviloni, Yeliya nĩwe waĩ mũũngamĩi wa Aeviloni kwosana na ũndũ nzyawa sya nyũmba ya aa-ĩthe iatĩanĩe. Mwakanĩ wa 40 wa kũsumbĩka kwa Ndaviti, nĩmamanthiwe, na aũme me vinya na me ũtonyi mooneka katĩ woo kũu Yaseli ĩla yĩ Ngileati. 32 Na ũtalo wa ana-a-ĩthe waĩ aũme me ũtonyi 2,700, ala maĩ aũngamĩi ma nyũmba sya aa-ĩthe. Kwoou Mũsumbĩ Ndaviti nĩwamaiie ĩũlũ wa Aleũveni, Angati, na nusu ya mbaĩ ya Manase, kwondũ wa kĩla ũndũ ũkonetye Ngai ũla wa w’o na ũkonetye mũsumbĩ.