Ĩvuku ya Mbee ya Mavinda

27 Ũũ nĩwʼo ũtalo wa Aisilaeli, aũngamĩi ma nyũmba sya aa-ĩthe, anene ma makili na ma maana, na anene moo ala mathũkũmaa mũsumbĩ maũndũnĩ onthe makonetye ikundi ila syookaa na iithi mwei ĩtina wa ũngĩ, myeinĩ yonthe ya mwaka; kĩla kĩkundi kyeethĩawa na andũ 24,000.

2 Yasoveamu mwana wa Nzavitieli nĩwe waũngamĩe kĩkundi kya mbee kya mwei wa mbee, na kĩkundi kyake kyaĩ na andũ 24,000. 3 Kuma ananĩ ma Velesi, Yasoveamu nĩwe waũngamĩe anene onthe ma ikundi ila syaaĩwe kũthũkũma mweinĩ wa mbee. 4 Ndotai Mũaoi nĩwe waũngamĩe kĩkundi kya mwei wa kelĩ, na Mikilothi nĩwe waĩ mũtongoi, na kĩkundi kyake kyaĩ na andũ 24,000. 5 Mũnene wa kĩkundi kya katatũ kĩla kyaaĩwe kũthũkũma mweinĩ wa katatũ aĩ Mbenaia mwana wa Yeoiata mũthembi mũnene, na kĩkundi kyake kyaĩ na andũ 24,000. 6 Mbenaia ũũ aĩ ngũmbaũ ya kaũ katĩ wa ala 30 na nĩwe waũngamĩe asu 30, na kĩkundi kyake kyaũngamĩwe nĩ mwanae Amisavati. 7 Asaeli, mwana-a-inyia wa Yoavu, nĩwe waũngamĩe kĩkundi kya kana kya mwei wa kana, na mwanae Nzevatia nĩwe woosie kĩanda kyake ĩtina wake, na kĩkundi kyake kyaĩ na andũ 24,000. 8 Samuthi Mũisilaia nĩwe waĩ mũnene wa katano wa mwei wa katano, na kĩkundi kyake kyaĩ na andũ 24,000. 9 Kĩkundi kya thanthatũ kya mwei wa thanthatũ kyaũngamĩwe nĩ Ila mwana wa Ikesi Mũtekoa, na kĩkundi kyake kyaĩ na andũ 24,000. 10 Elesu Mũveloni kuma mbaĩnĩ ya Evilaimu nĩwe waũngamĩe kĩkundi kya mũonza kya mwei wa mũonza, na kĩkundi kyake kyaĩ na andũ 24,000. 11 Sivekai Mũuusa wa Anzela nĩwe waũngamĩe kĩkundi kya nyanya kya mwei wa nyanya, na kĩkundi kyake kyaĩ na andũ 24,000. 12 Avi-eseli Mũanathothi kuma mbaĩnĩ ya Mbenyamini nĩwe waũngamĩe kĩkundi kya kenda kya mwei wa kenda, na kĩkundi kyake kyaĩ na andũ 24,000. 13 Maalai Mũnetova wa Anzela nĩwe waũngamĩe kĩkundi kya ĩkũmi kya mwei wa ĩkũmi, na kĩkundi kyake kyaĩ na andũ 24,000. 14 Mbenaia Mũvilathoni wa ana ma Evilaimu nĩwe waũngamĩe kĩkundi kya 11 kya mwei wa 11, na kĩkundi kyake kyaĩ na andũ 24,000. 15 Elitai Mũnetova kuma ananĩ ma Othinieli nĩwe waũngamĩe kĩkundi kya 12 kya mwei wa 12, na kĩkundi kyake kyaĩ na andũ 24,000.

16 Aa nĩmo maĩ atongoi ma mbaĩ sya Isilaeli: Mũtongoi wa Aleũveni, aĩ Elieseli mwana wa Nzikili; wa Asimeoni, aĩ Sevatia mwana wa Maaka; 17 wa mbaĩ ya Livai, aĩ Asavia mwana wa Kemũeli; wa nzyawa sya Alũni, aĩ Nzatoki; 18 wa mbaĩ ya Yuta, aĩ Eliũ, ũla waĩ mwana-a-inyia ũmwe wa Ndaviti; wa mbaĩ ya Isakali, aĩ Omili mwana wa Mikaeli; 19 wa mbaĩ ya Nzevuluni, aĩ Isimaia mwana wa Ovatia; wa mbaĩ ya Navitali, aĩ Yelimothi mwana wa Asilielu; 20 wa mbaĩ ya Evilaimu, aĩ Osiea mwana wa Asasia; wa nusu ya mbaĩ ya Manase, aĩ Yoeli mwana wa Vetaia; 21 wa nusu ya mbaĩ ya Manase kũu Ngileati, aĩ Ito mwana wa Nzekalia; wa mbaĩ ya Mbenyamini, aĩ Yaasieli mwana wa Avineli; 22 wa mbaĩ ya Ndani, aĩ Asaleli mwana wa Yeloamu. Asu nĩmo maĩ anene ma mbaĩ sya Isilaeli.

23 Ndaviti ndaatala ala maĩ na myaka 20 na kũtheea, nũndũ Yeova nĩwathanĩte kwingĩvya Aisilaeli ta ndata sya matunĩ. 24 Yoavu mwana wa Nzeluia nĩwambĩĩte kũtala andũ, ĩndĩ ndaamina; na ũthatu wa Ngai nĩwakanĩie Aisilaeli* nũndũ wa ũndũ ũsu, na ũtalo ũsu ndwaandĩkwa ĩvukunĩ ya ngewa ya mavinda ma Mũsumbĩ Ndaviti.

25 Asimavethi mwana wa Atieli nĩwe waũngamĩe vala vaiawa ũthwii wa mũsumbĩ. Yonathani mwana wa Usia nĩwe waũngamĩe makũmbĩ ala maĩ* mĩũndanĩ, ndũanĩ, motũinĩ, na myakonĩ mĩtũlu. 26 Esili mwana wa Keluvu nĩwe waũngamĩe athũkũmi ala maĩmaa mĩũnda. 27 Simei Mũlama nĩwe waũngamĩe mĩũnda ya mĩsavivũ; Nzaviti kuma Seviamu* nĩwe waũngamĩe makũmbĩ ala maiawa mbinyu ĩla yaseũvawʼa na ũsyao wa mĩsavivũ. 28 Mbaali-anani Mũngeteli nĩwe waũngamĩe mĩũnda ya mĩthata na mĩkũyũ kĩsionĩ kya Sevela; Yoasi nĩwe waũngamĩe vala vaiawa mauta. 29 Sitilai Mũsaloni nĩwe waũngamĩe ndĩthya sya ngʼombe ila syaĩthawʼa Saloni, na Savati mwana wa Atilai nĩwe waũngamĩe ndĩthya sya ngʼombe ila syaĩ ndiĩnĩ syĩ mwandanĩ. 30 Ovili Mũisimaeli nĩwe waũngamĩe ngamĩle; Yeteia Mũmelonothi nĩwe waũngamĩe mangʼoi.* 31 Yasisi Mũakali nĩwe waũngamĩe ndĩthya sya malondu na mbũi. Asu onthe nĩmo maĩ anene ma malĩ ya Mũsumbĩ Ndaviti.

32 Yonathani, mwana wa mwana-a-inyia wa Ndaviti, aĩ mũtai, mũndũũme waeleawa maũndũ na mũandĩki, na Yeielu mwana wa Akimoni asũvĩaa ana ma mũsumbĩ. 33 Aithoveli aĩ mũtai wa mũsumbĩ, na Usiai Mũaliki aĩ mũnyanyae wa mũsumbĩ. 34 Ĩtina wa Aithoveli, Yeoiata mwana wa Mbenaia na Aviathali nĩmo moosie kĩanda kyake; na Yoavu nĩwe waĩ mũnene wa ita sya mũsumbĩ.