NDETO SYA MBEE

MAANDĨKO MATHEU nĩmaveveeiwe nĩ Ngai yĩla maandĩkawa, na maandĩkiwe na kĩthyomo kya Kĩevelania, Kĩalamu, na Kĩkiliki. Nĩ kana andũ ma “mbaĩ syonthe” matetheke kumana na Ndeto ya Ngai, Maandĩko maĩle kũalyũlwa kwa ithyomo mbingĩ. (Mathayo 24:14) Mavuku mĩongo ĩlĩ na mũonza, ala nĩ kuma Mathayo nginya Ũvuany’o, metawa “Maandĩko ma Kĩkiliki ma Kĩklĩsto,” nũndũ mbeenĩ maandĩkiwe na kĩthyomo kya Kĩkiliki nĩ Aklĩsto ma ĩvinda ya atũmwa ala matongoew’e nĩ veva mũtheu.

Mbivilia ya Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto yaumiw’e ĩvinda ya mbee mwaka wa 1950 kwa Kĩsũngũ. Mbivilia ĩsu ĩalyũlĩtwe mũno mũno kumana na maandĩko ma Kĩkiliki ma Westcott na Hort ala mesĩkĩe mũno, na ala mosanĩte na mavuku ma Kĩkiliki ma tene vyũ. Mbivilia ya Ũalyũlo wa Nthĩ Nzaũ yĩalyũlĩtwe yĩatĩĩe nesa ũndũ vatonyeka maandĩko ma Kĩkiliki. Mbivilia ĩno ya Kĩkamba ĩalyũlĩtwe kuma Mbivilianĩ ya Kĩsũngũ ya mwaka wa 2013, na nĩtatĩte kũatĩĩa nesa Mbivilia ĩsu ya Kĩsũngũ.

Ĩsyĩtwa ya mwanya ya Ngai, nayo nĩ Yeova, yonekaa mavinda 237 nthĩnĩ wa maandĩko ma Mbivilia ya Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto. Na nũndũ kũthew’a kwa ĩsyĩtwa ya Ngai nĩ ũndũ wa vata na andũ onthe nĩmaĩle kwĩkaĩla ĩsyĩtwa yĩu nĩ kana matangĩĩwe, Mbivilia ĩno nĩtũngĩĩe ĩsyĩtwa Yeova vala yaĩle kwĩthĩwa nthĩnĩ wa Maandĩko Matheu.—Mathayo 6:9; Alomi 10:13.

Ĩsyĩtwa, Ũalyũlo wa Nthĩ Nzaũ, yosanĩte na watho wa Ngai wa kũete nthĩ nzaũ yĩ na ũlũngalu nĩ kana andũ onthe matetheke. (2 Vetelo 3:13) Aalyũli ma Mbivilia ĩno nĩmamwendete Ngai, ũla nĩwe Mũandĩkĩthya wa Maandĩko Matheu, namo monaa ne kĩanda kya mwanya kũalyũla mosũanĩo make na ndeto syake nesa ũndũ vatonyeka. Twĩĩkwatya kana Mbivilia ĩno nĩkũtetheesya asomi ala me na ngoo nzeo na matataa “kũkwata ũmanyi wa w’o ĩũlũ wa ũla w’o.”—1 Timotheo 2:4.