KUMA

1 Yu aa nĩmo masyĩtwa ma ana ma Isilaeli ala malikile Misili me na Yakovo, aũme onthe ala mookanisye na mĩsyĩ yoo: 2 Leũveni, Simeoni, Livai, na Yuta; 3 Isakali, Nzevuluni, na Mbenyamini; 4 Ndani na Navitali; Ngati na Aseli. 5 Na andũ* onthe ala Yakovo wasyaĩwe* maĩ 70, ĩndĩ Yosevu aĩ aendie Misili. 6 Yosevu nĩwesie kũkwʼa, o vamwe na ana-a-ĩthe make onthe na nzyawa ĩsu yonthe. 7 Na Aisilaeli* nĩmasyaanie na mambĩĩa kwingĩva mũno, na maendeea kwongeleka na kwĩthĩwa na vinya na mĩtũkĩ vyũ, nginya mausũa nthĩ ĩsu.

8 Ĩtina wa ĩvinda, nĩkweethĩiwe na mũsumbĩ mweũ Misili, ũla ũteesĩ Yosevu. 9 Kwoou eea andũ make atĩĩ: “Sisyai! Aisilaeli nĩ aingĩ mũno kwĩ ithyĩ, na me na vinya mwingĩ kwĩ ithyĩ. 10 Ekai twĩkalanyʼe namo na ũĩ. Nũndũ twaema kwĩka ũu, meendeea na kwongeleka, na kaũ wesa kumĩla, makakwatana na amaitha maitũ na maitũkita na mayuma nthĩ ĩno.”

11 Kwoou Amisili nĩmanyuvie anene ma wĩa wa kũlasimĩthwʼa* mamaũngamĩe, nĩ kana mamavinyĩĩe kwa kũmathũkũmĩthya wĩa mũito, na mamalasimĩthya kwakĩa Valao ndũa sya kwia lĩu na mĩio, ila syeetawa Vithomu na Laamisesi. 12 Ĩndĩ o ũndũ maendeeie kũmavinyĩĩa, nowʼo maendeeie kwongeleka na maendeea kũnyaĩĩka mũno nthĩ ĩsu. Na kwoou Amisili nĩmambĩĩie kũkĩa Aisilaeli na kũmamena mũno. 13 Nũndũ wa ũu, Amisili nĩmatwʼĩkĩthisye Aisilaeli ngombo na mamathũkũmĩthasya wĩa mũmũ mũno. 14 Nĩmatumie thayũ woo wĩthĩwa mũmũ mũno kwa kũmathũkũmĩthya wĩa mũito, nũndũ mamalasimĩthasya kũseũvya yũmba ya kwaka, kũmba mavali, na kũmathũkũmĩthya mĩthemba yonthe ya wĩa wa ũkombo kĩthekanĩ. Ĩĩ, nĩmamakuaa naĩ na makamathũkũmĩthya mĩthemba yonthe ya wĩa wa ũkombo.

15 Ĩtina mũsumbĩ wa Misili nĩwaneenie na aisikya Aevelania, ala meetawa Sivila na Vua, 16 na amea: “Yĩla mũũtetheesya aka Aevelania kũsyaa, mailyĩ vala meũsyaĩa,* ethĩwa masyaa kavĩsĩ, no nginya mũkoae; ĩndĩ ethĩwa nĩ kelĩtu, no nginya mũkaeke kekale thayũ.” 17 Ĩndĩ o na vailye ũu, aisikya asu nĩmamũkĩaa Ngai ũla wa w’o, na mayaaĩka kĩla mũsumbĩ ũsu wa Misili wameie. Vandũ va ũu, nĩmaekaa tũvĩsĩ twĩkale thayũ. 18 Ĩtina wa ĩvinda, mũsumbĩ wa Misili nĩweetie aisikya asu na amakũlya: “Nĩkĩ mũekete tũvĩsĩ tũendeee kwĩkala thayũ?” 19 Aisikya asu masũngĩie Valao atĩĩ: “Aka Aevelania mayĩilye ta aka Amisili. Methĩawa na vinya, na masyaaa mwĩsikya atanamba kũvika vala maĩ.”

20 Kwoou, Ngai nĩwaathimie aisikya asu, na Aisilaeli maendeea kwongeleka na kwĩthĩwa na vinya mũno. 21 Na nũndũ aisikya asu nĩmakĩaa Ngai ũla wa w’o, nĩwesie kũmanenga mĩsyĩ yoo ene. 22 Mũthya, Valao eeaĩe andũ make onthe atĩĩ: “Ĩkyai tũvĩsĩ tũũkenge twʼonthe twa Aevelania Ũsĩnĩ wa Nile, ĩndĩ ekai twĩlĩtu twʼonthe twĩkale thayũ.”

2 Vakuvĩ na ĩvinda yĩu, mũndũũme ũmwe wa nyũmba ya Livai nĩwatwaie mwĩĩtu wa Livai. 2 Mũndũ mũka ũsu nĩwaitavie na asyaa kamwana. Na yĩla woonie ũndũ kaanakavĩte, nĩwakavithie myei ĩtatũ. 3 Yĩla weethĩie ndatonya kũendeea kũkavitha, nĩwoosie kĩkavũ kya* makangaa na akĩvaka lami mũkamu na lami ũngĩ mũtweku, na oosa kala kana akekĩa vo na akia mĩanginĩ ũtee wa Ũsĩ wa Nile. 4 Ĩndĩ mwĩĩtu-a-inyia wa kana kau aũngama vaasanga asyaĩĩsye kĩla kĩũkakwata.

5 Yĩla mwĩĩtu wa Valao watheeie akathambe Ũsĩnĩ wa Nile, athũkũmi make eĩtu mesĩle ũtee wa ũsĩ ũsu. Na ĩndĩ nĩwoonie kĩkavũ kĩ mĩanginĩ. Vau kwa vau, nĩwatũmie mwĩĩtu wake ngombo akakyose. 6 Yĩla wakĩvingũie, nĩwoonie kana, na kavĩsĩ kau kakwetye kũĩa. Nĩwakewʼĩie ĩnee, ĩndĩ asya: “Kana kaa nĩ kamwe ka syana sya Aevelania.” 7 Nĩvo ĩndĩ, mwĩĩtu-a-inyia wa kana kau wakũlilye mwĩĩtu wa Valao atĩĩ: “No wende nĩthi ngakwĩtĩe mũndũ mũka Mũevelania ũtonya kwongya kana kaa nĩ kana akũeee?” 8 Nake mwĩĩtu wa Valao akasũngĩa akea: “Enda!” Nako kathi kate kwananga ĩvinda keeta inyia wa kana kau. 9 Nĩvo ĩndĩ mwĩĩtu wa Valao weeie mũndũ mũka ũsu: “Osa kana kaa ũthi nako na ũindeea ko, na ngakũĩva.” Na kwoou mũndũ mũka ũsu oosa kana kau na akaea. 10 Yĩla kana kau keanangie, nĩwakaetie kũla kwĩ mwĩĩtu wa Valao, na katwʼĩka kake. Nake aketa Mose* na asya: “Nĩkwĩthĩwa nĩkaumĩtye kĩw’ũnĩ.”

11 Na mĩthenyanĩ ĩsu, yĩla Mose waĩ anatwʼĩka mũndũ mũima,* nĩwaendie kũla kwĩ ana-a-ĩthe nĩ kana akone wĩa mũmũ ũla mathũkũmĩthawʼa, na nĩwoonie Mũmisili aikũna Mũevelania, ũmwe wa ana-a-ĩthe make. 12 Kwoou nĩwasyaisye ngalĩko syonthe, na yĩla waemie kwona mũndũ, ooaa Mũmisili ũsu na amũvitha kĩthangathĩnĩ.

13 Ĩndĩ ũnĩ wake nĩwaumaalile na oona aũme elĩ Aevelania mayũkita. Kwoou akũlya ũla waĩ na mavĩtyo atĩĩ: “Nĩkĩ ũũkũna mwana-a-ĩthe waku?” 14 Nake amũsũngĩa: “Nũũ ũkũnyuvĩte wĩthĩwe mũnene na mũsili ĩũlũ witũ? Ũvangĩte kũmbũaa o tondũ ũnooaie ũla Mũmisili?” Yĩla Mose weewie ũu, nĩwakwatiwe nĩ wia na asya: “Vate nzika ũndũ ũsu nũmanyĩkĩte!”

15 Na ĩndĩ Valao nĩweewie ũndũ ũsu, na atata kũaa Mose; ĩndĩ Mose nĩwasembie amũkĩa na athi kũtũa nthĩ ya Mitiani, na ekala nthĩ ũtee wa kĩthima. 16 Yu mũthembi wa Mitiani aĩ na eĩtu mũonza, na nĩmookie kũtava kĩwʼũ na kusũsya syĩndũ ila matũmĩaa kũngʼithĩsya malondu ma ĩthe woo. 17 Ĩndĩ o tondũ aĩthi meekaa, nĩmookie na mamalũngya. Mose oona ũu, nĩwookĩlile atetheesya* eĩtu asu na angʼithya malondu moo. 18 Yĩla masyokie mũsyĩ kũla kwĩ ĩthe woo Leueli,* amakũlilye ũũ asengʼete: “Vatonyeka ata ũmũnthĩ mwasyoka mũsyĩ na mĩtũkĩ ũu?” 19 Namo mamũsũngĩa: “Ve Mũmisili ũtũvonokisye kuma kwa aĩthi, o na atũtavĩa kĩwʼũ na angʼithya malondu maitũ.” 20 Nake akũlya eĩtu make: “Na aĩva? Nĩkĩ mwamũtia? Endai mũkamwĩte, nĩ kana tũĩsanĩe nake.” 21 Ĩtina wa ũu, Mose nĩweetĩkĩlile kwĩkalanyʼa na mũndũũme ũsu, nake anenga Mose mwĩĩtu wake weetawa Nzivola atwʼĩke kĩveti kyake. 22 Nzivola nĩwesie kũsyaa kavĩsĩ, na Mose aketa Ngelisomu,* nũndũ aisye, “Nĩnĩtwʼĩkĩte mwĩkali wa ũeninĩ nthĩ ngeni.”

23 Ĩtina wa ĩvinda yĩasa,* mũsumbĩ wa Misili nĩwakwie, ĩndĩ Aisilaeli nĩmaendeeie kũluma na kũĩa nũndũ wa ũkombo, na kĩĩo kyoo kya kwĩtya ũtethyo nũndũ wa wĩa wa ũkombo ũla mathũkũmĩthawʼa kyaendeea kwambata kũla kwĩ Ngai ũla wa wʼo. 24 Na Ngai nĩweewie kũluma kwoo, na Ngai alilikana ũtianĩo wake vamwe na Avalaamu, Isaka, na Yakovo. 25 Na kwoou, Ngai oona mathĩna ala Aisilaeli maĩ namo na amewʼĩa tei.

3 Mose nĩwatwʼĩkie mũĩthi wa malondu ma mũthoni wake Yethilo, ũla waĩ mũthembi wa Mitiani. Ĩvinda yĩmwe yĩla Mose watongoesye malondu ngalĩko ya ũthũĩlonĩ wa sua ya weũ, nĩwesie kũvika kĩĩmanĩ kya Ngai ũla wa w’o, kĩla kyeetawa Olevu. 2 Na ĩndĩ mũlaĩka wa Yeova amumĩlĩĩla e ũlĩlĩnzĩnĩ wa mwaki katĩkatĩ wa kĩkuthu kĩ mĩwʼa. Yĩla Mose waendeeie kũsyaĩĩsya, nĩwoonie kana kĩkuthu kĩu kĩ mĩwʼa nĩkyakene, ĩndĩ kĩyavĩsaa. 3 Kwoou Mose asya: “Ũndũ ũũ nĩ wa kũsengyʼa! Nĩkĩ kĩkuthu kĩĩ kĩ mĩwʼa kĩteũvya? Nĩngũthengeea nĩsisye.” 4 Yĩla Yeova woonie kana nĩwathi kũsisya, amwĩtie kuma kĩkuthunĩ kĩu kĩ mĩwʼa na wasya mũnene: “Mose! Mose!” nake amũsũngĩa: “Ninyioo vaa.” 5 Na ĩndĩ Ngai amwĩa: “Ndũkathengeangĩe. Umya iatũ syaku, nũndũ vau ũũngamĩte nĩ vatheu.”

6 Aendeeie kũmwĩa: “Ninyie Ngai wa ĩthe waku, Ngai wa Avalaamu, Ngai wa Isaka, na Ngai wa Yakovo.” Na ĩndĩ Mose avitha ũthyũ wake, nũndũ nĩwakĩie kũsisya Ngai ũla wa w’o. 7 Yeova ongeleeile kwasya: “Vate nzika, nĩnonete mathĩna ma andũ makwa ala me Misili, na nĩnĩwʼĩte kĩĩo kyoo nũndũ wa ala mamalasimĩthasya kũtethya wĩa; nĩnĩsĩ nesa woo ũla me nawʼo. 8 Nĩngũtheea ngamovosye kuma kwʼokonĩ kwa Amisili na ndimaumya nthĩ ĩsu nĩmatwae nthĩ nzeo na nene, nthĩ yusũĩte ĩia na ũkĩ wa nzũkĩ, kĩsionĩ kya Akanaanĩ, Aititi, Aamoli, Avelisi, Aivi, na Ayevusi. 9 Yu sisya! Kĩĩo kya Aisilaeli nĩkĩmbikĩĩte, o na ĩngĩ, nĩnonete ũndũ Amisili mamavinyĩĩaa mũno wĩana mate kũmewʼĩa tei. 10 Yu ũka, nĩngũũtũma kũla kwĩ Valao, na ũkaumya andũ makwa Aisilaeli nthĩ ya Misili.”

11 Ĩndĩ Mose eeie Ngai ũla wa wʼo atĩĩ: “Nyie nĩ ũũ nĩthi kũla kwĩ Valao na ndyumya Aisilaeli nthĩ ya Misili?” 12 Nake Ngai amwĩa: “Ngeethĩwa vamwe naku, na ũũ nĩwʼo wonanyʼo wa kana ninyie ngũtũmĩte: Waumya Aisilaeli nthĩ ya Misili, mũkathũkũmĩa* Ngai ũla wa wʼo kĩĩmanĩ kĩĩ.”

13 Ĩndĩ Mose eea Ngai ũla wa wʼo atĩĩ: “Nao nata nathi kwa Aisilaeli na ndimea, ‘Ngai wa aa-ũmae menyu nũndũmĩte kũla mũĩ,’ namo maingũlya, ‘Etawa ata?’ Ngamea ata?” 14 Kwoou Ngai eea Mose: “Ngatwʼĩka Kĩla Nganyuva* Kũtwʼĩka.”* Na Ngai ongela kũmwĩa: “Ũũ nĩwʼo wĩtavya Aisilaeli, ‘Ngatwʼĩka nũndũmĩte kũla mũĩ.’” 15 Na Ngai eea Mose ĩngĩ atĩĩ:

“Ũũ nĩwʼo wĩtavya Aisilaeli, ‘Yeova Ngai wa aa-ũmae menyu, Ngai wa Avalaamu, Ngai wa Isaka, na Ngai wa Yakovo, nũndũmĩte kũla mũĩ.’ Yĩĩ nĩyo ĩsyĩtwa yakwa tene na tene, na ũu nĩwʼo naĩle kũlilikanawa kuma nzyawa kũthi ĩla ĩngĩ. 16 Yu enda, na ũyũmbanyʼa atumĩa ma Isilaeli, na ũimea, ‘Yeova Ngai wa aa-ũmae menyu nũnambumĩlĩile, Ngai wa Avalaamu, Isaka, na Yakovo, na ambĩa atĩĩ: “Vate nzika, nĩnĩmũsyaĩtye na ngona maũndũ ala mũendeee kwĩkwa mwĩ Misili. 17 Kwoou nĩasya, nĩngũmumya mathĩnanĩ ala mamũkwataa nũndũ wa Amisili nĩmũtwae nthĩ ya Akanaanĩ, Aititi, Aamoli, Avelisi, Aivi, na Ayevusi, nthĩ yusũĩte ĩia na ũkĩ wa nzũkĩ.’”

18 “Vate nzika, makeethukĩĩsya wasya waku, na ũkathi, we na atumĩa ma Isilaeli, vala ve mũsumbĩ wa Misili, na mwaĩle kũmwĩa atĩĩ: ‘Yeova Ngai wa Aevelania nũneenete naitũ. Kwoou, twĩtĩkĩlye tũthi kyalo kya mĩthenya ĩtatũ weũnĩ tũkaumĩsye Yeova Ngai witũ nthembo.’ 19 Ĩndĩ nyie nĩnĩsĩ nesa kana mũsumbĩ wa Misili ndakamũnenga mwanya wa kũthi atalasimĩthĩtwʼe nĩ kwʼoko kwĩ vinya. 20 Kwoou ngatambũũkya kwʼoko kwakwa na ndikũna Misili na meko makwa onthe ma ũsengyʼo ala ngeka nthĩ ĩsu, na ĩtina wa ũu akamũlekya mũthi. 21 Na ngatuma mwona ũseo methonĩ ma Amisili, na yĩla mwĩthi, mũikathi nongi moko mathei. 22 No nginya kĩla mũndũ mũka eĩtya mũtũi wake na mũndũ mũka ũla wĩkalaa nyũmba kwake syĩndũ sya vetha na sya thaavu o vamwe na ngũa, na mũkasyĩkĩa ana menyu na eĩtu menyu; na mũkoosa mũtavo kuma kwa Amisili.”

4 O na ũu wĩ o vo, Mose amũsũngĩa amwĩa: “Ĩndĩ nata makalea kũndĩkĩĩa, na makalea kwĩthukĩĩsya wasya wakwa, nũndũ makasya, ‘Yeova ndaakumĩlĩĩla.’” 2 Ĩndĩ Yeova amũkũlya: “Kĩu nĩ kyaũ ũkwete?” Nake amũsũngĩa: “Nĩ ndata.” 3 Nake amwĩa: “Mĩkye nthĩ.” Kwoou amĩkya nthĩ, na yatwʼĩka nzoka; na Mose asemba amĩkĩa. 4 Na Yeova eea Mose: “Tambũũkya kwʼoko kwaku ũmĩkwate kĩsithe.” Kwoou Mose atambũũkya kwʼoko kwake na amĩkwata, nayo yatwʼĩka ndata. 5 Nĩvo ĩndĩ Ngai wamwĩie: “Wĩĩka ũũ nĩ kana maĩkĩĩe Yeova Ngai wa aa-ũmae moo, Ngai wa Avalaamu, Ngai wa Isaka, na Ngai wa Yakovo, nũkumĩlĩĩle.”

6 Na Yeova eea Mose ĩngĩ atĩĩ: “Nĩũkũlya ũlikye kwʼoko kwaku ngũanĩ ĩla yĩ kĩthũinĩ kyaku.” Na kwoou, alikya kwʼoko kwake ngũanĩ ĩla yaĩ kĩthũinĩ kyake. Na yĩla wakumisye, sisya kwausũĩte mangũ na kwaĩ kweũ ta ĩa! 7 Na ĩndĩ amwĩa: “Tũnga kw’oko kwaku ngũanĩ ĩla yĩ kĩthũinĩ kyaku.” Na kwoou akũtũnga vo. Ĩndĩ yĩla wakumisye ngũanĩ ĩsu, kwaĩ kũvou na kwailye o ta mwĩĩ ũla ũngĩ! 8 Na Ngai amwĩa: “Maema kũkũĩkĩaa, kana malea kwĩtĩkĩla kyama kya mbee, vate nzika makeetĩkĩla kyama kĩĩ kya kelĩ. 9 Ĩndĩ o na maema kũĩkĩĩa syama ii ilĩ, na malea kwĩthukĩĩsya wasya waku, ũkatava kĩwʼũ Ũsĩnĩ wa Nile na ũikĩta nthĩ nyũmũ, na kĩwʼũ kĩla ũkatava Ũsĩnĩ wa Nile kĩkatwʼĩka nthakame wakĩta nthĩ nyũmũ.”

10 Nĩvo ĩndĩ Mose wamwĩie Yeova: “Ndekea mwa Yeova, nũndũ nyie ndyaaĩthĩwa nĩ mũneeni mũseo, kuma tene o na kuma yĩla wambĩĩie kũneena na mũthũkũmi waku, nũndũ nyie nĩneenaa o mbola,* na ũĩmĩ wakwa nĩ mũito.” 11 Na Yeova amwĩa: “Nũũ ũla woombĩie mũndũ mũnuka, kana nũũ ũla ũtumaa methĩwa matatonya kũneena, matatonya kwĩwʼa, matatonya kwona nthĩ nesa, kana methĩwa ilalinda? Tinyie, Yeova? 12 Kwoou thi, na ngeethĩwa vamwe naku ũineena,* na ngakũmanyĩsya kĩla waĩle kũweta.” 13 Ĩndĩ Mose amwĩa: “Ndekea mwa Yeova, ĩndĩ nĩũkũlya ũtũme mũndũ ũngĩ o na wĩva ũla ũkwenda kũtũma.” 14 Nĩvo ĩndĩ ũthatu wa Yeova wamwakanĩe Mose, na amwĩa: “Nata ĩũlũ wa mwana-a-inyia waku Alũni, ũla nĩ Mũlivai? Nĩnĩsĩ nũtonya kũneena nesa vyũ. Na yu tũĩ e nzĩanĩ okĩte vaa mũkomane. Yĩla ũkũkwona, ngoo yake nĩkũtana. 15 Kwoou, no nginya ũneene nake na ũyĩkĩa ndeto syakwa kanywʼanĩ wake, na ngeethĩwa vamwe nenyu mũineena, na nyie ngamũmanyĩsya kĩla mwaĩle kwĩka. 16 Akaneenaa na andũ vandũ vaku, na akeethĩwa mũneeni waku, naku ũkamũtavasya kĩla Ngai waweta.* 17 Na ũkoosa ndata ĩno ũkwete, na ũyĩka syama nayo.”

18 Kwoou Mose nĩwasyokie kũla kwĩ Yethilo, mũthoni wake, na amwĩa atĩĩ: “Mwa nĩngwenda kũthi, nĩsyoke kũla kwĩ ana-a-ĩthe makwa, ala me Misili ngasisye kana me o thayũ.” Na Yethilo amwĩa: “Enda na mũuo.” 19 Mose e o Mitiani, Yeova amwĩie atĩĩ: “Enda ũsyoke Misili, nũndũ andũ onthe ala mendaa ũkũaa* nĩ akwʼũ.”

20 Na ĩndĩ Mose oosa kĩveti kyake na imwana syake, na amatũlya ĩngʼoinĩ, na ambĩĩa kyalo kya kũsyoka nthĩ ya Misili. O na ĩngĩ, Mose nĩwakuie ndata ĩla Ngai ũla wa wʼo wamwĩaĩe akue. 21 Na Yeova eea Mose: “Wasyoka Misili, ĩkĩĩthya kana nĩweeka mbee wa Valao syama syonthe ila ngũnengete ũtonyi wa kwĩka. Ĩndĩ nyie ngeetĩkĩlya ngoo ya Valao yĩthĩwe yĩ mbũmũ, na ndakalekya andũ mathi. 22 No nginya wĩe Valao, ‘Ũũ nĩwʼo Yeova ũkwasya: “Isilaeli nĩ mwana wakwa, ĩkithathi yakwa.* 23 Na yu nĩkwĩa, Lekya mwana wakwa athi akanthũkũme. Nũndũ waema kũmũlekya nĩngũaa mwana waku, ĩkithathi yaku.”’”*

24 Yu me nzĩanĩ, me vala makomeile, Yeova nĩwakomanie nake na endaa kũmũaa. 25 Ĩtina, Nzivola nĩwoosie ĩvia yũĩ* na aĩka kamwana kake nayo na atuma kĩkonde kĩla watilile kĩtina nyaaĩ syake na asya: “Nĩkwĩthĩwa kwakwa wĩ mũtwaani wa nthakame.” 26 Na kwoou Ngai amũeka athi. Ĩvindanĩ yĩu aisye, “mũtwaani wa nthakame,” nũndũ wa nzaĩko.

27 Ĩtina wa ũu, Yeova eeie Alũni atĩĩ: “Enda weũnĩ ũkakomane na Mose.” Na kwoou athi na akomanĩa nake kĩĩmanĩ kya Ngai ũla wa w’o na amũkethya kwa kũmũmumunya. 28 Na Mose atavya Alũni ndeto syonthe sya Yeova, ũla wamũtũmĩte, na syama syonthe ila wamwĩaĩe eke. 29 Ĩtina wa ũu, Mose na Alũni nĩmaendie na moombanyʼa atumĩa onthe ma Isilaeli. 30 Alũni nĩwamatavisye ndeto syonthe ila Yeova watavĩtye Mose, na eeka ila syama mbee wa andũ. 31 Nũndũ wa ũu, andũ maĩkĩĩa. Na yĩla meewie kana Yeova nĩwasyaĩtye Aisilaeli na kana nĩwoonete mathĩna moo, makumana na mavalũka mbee wa Ngai.

5 Ĩtina wa ũu, Mose na Alũni nĩmaendie kũla kwĩ Valao na mamwĩa: “Ũũ nĩwʼo Yeova Ngai wa Isilaeli ũkwasya, ‘Lekya andũ makwa mathi nĩ kana makethĩwe na mboka weũnĩ kwondũ wakwa.’” 2 Ĩndĩ Valao asya: “Yeova nũũ, nĩ kana nĩwʼe wasya wake na ndilekya Aisilaeli mathi? Nyie ndimwĩsĩ Yeova o na vanini, na kwongela ũu, ndilekya Aisilaeli mathi.” 3 Ĩndĩ mamwĩa: “Ngai wa Aevelania nũneenete naitũ. Mwa, twĩenda kũthi kyalo kya mĩthenya ĩtatũ weũnĩ tũkamũthembee Yeova Ngai witũ; nũndũ twaema kwĩka ũu, akatũkũna na ũwau kana na ũvyũ.” 4 Nake mũsumbĩ wa Misili amasũngĩa: “Nĩkĩ Mose mwĩ na Alũni, mũkumya andũ wĩanĩ woo? Syokai wĩanĩ wenyu!”* 5 Na Valao aendeea kwasya: “Sisyai ũndũ andũ menyu maingĩvĩte nthĩ ĩno, na mwĩenda kũtuma mathũmũa maeke kũtethya wĩa woo.”

6 Na mũthenyanĩ o ũsu, Valao eeaĩa aũngamĩi ma wĩa na anene moo ũũ: 7 “Mũikaendeee kũnenga andũ aa nyeki* sya kũmba mavali. Ekai makemanthĩaa nomo ene. 8 Ĩndĩ no nginya mũendeee kũĩkĩĩthya kana ũtalo wa mavali ala mekũmba no ũla manombaa tene. Mũikamaolangĩle ũtalo ũsu, nũndũ nĩ atulu. Nĩkyo kĩtumi mekũĩa makyasya, ‘Twĩenda kũthi, twĩenda kũmũthembea Ngai witũ!’ 9 Mathũkũmĩthyei mũnango, na ekai mekale makwatene nĩ kana maikethukĩĩsye ũvũngũ.”

10 Kwoou aũngamĩi ma wĩa na anene moo, mathi na meea andũ atĩĩ: “Ũũ nĩwʼo Valao wasya, ‘Ndiendeea kũmũnenga nyeki. 11 Endai mũkemanthĩe yenyu o vala mũũmyona, ĩndĩ wĩa wenyu ndwĩolangwa o na vanini.ʼ” 12 Na ĩndĩ andũ manyaĩĩka kĩla vandũ nthĩ ya Misili makolanyʼe mavuthĩ.* 13 Na aũngamĩĩi ma wĩa mamathingʼĩĩasya maimea: “No nginya kĩla ũmwe aminae wĩa wake kĩla mũthenya, o ũndũ mũneekaa yĩla mũnanengawe nyeki.” 14 O na ĩngĩ anene ma Aisilaeli, ala manyuvĩtwe nĩ aũngamĩi ma wĩa ma Valao, nĩmavũiwe. Mamakũlilye: “Nĩkĩ mũtaneeĩanĩsya ũtalo wa mavali ala mwĩthĩĩtwe mũyũmba? Ũu nĩwʼo mũneekie ĩyoo na nowʼo mweeka ũmũnthĩ.”

15 Kwoou anene ma Aisilaeli mathi na manyungunyĩsya kũla kwĩ Valao maimwĩa: “Nĩkĩ ũũkua athũkũmi maku ũu? 16 Athũkũmi maku maiũnengwa nyeki, ĩndĩ metwĩa, ‘Ũmbai mavali!’ Athũkũmi maku nĩmeũvũwa, ĩndĩ andũ maku nĩmo me na mavĩtyo.” 17 Ĩndĩ Valao asya: “Mwĩ atulu, mwĩ atulu! Nĩkyo kĩtumi mũkwasya, ‘Twĩenda kũthi, twĩenda kũmũthembea Yeova.’ 18 Kwoou yu endai, syokai wĩanĩ! Vai nyeki mũkanengawe, ĩndĩ no nginya mũendeee kũmba ũtalo wa mavali o ala mũnoombaa.”

19 Nĩvo ĩndĩ anene ma Aisilaeli mamanyie kana maĩ thĩnanĩ mũnene nũndũ wa mwĩao ũũ manengetwe: “Mũikaolange o na vanini ũtalo wa mavali ala mũmbaa kĩla mũthenya.” 20 Ĩtina wa ũu, nĩmakomanie na Mose na Alũni, ala maũngamĩte vau mameteele maume kũla kwĩ Valao. 21 Na vau kwa vau, anene asu mamea: “Yeova namwone na aimũsilĩla, nũndũ nĩmũtumĩte Valao na athũkũmi make matũmena* na nĩmũmanengete ũvyũ matũae.” 22 Na ĩndĩ Mose amũvĩndũkĩa Yeova na amwĩa: “Yeova, nĩkĩ ũekete andũ aa mathĩne? Nĩkĩ ũndũmĩte? 23 Kuma yĩla naendie mbee wa Valao nganeene nake ĩsyĩtwanĩ yaku, ethĩĩtwe aithĩnyʼa andũ aa mũno, na vate nzika ndũvonoketye andũ maku.”

6 Kwoou Yeova eea Mose: “Yu nũkwona ũndũ ngwĩka Valao. Kwʼoko kwakwa kwĩ vinya nĩkũũmũlasimĩthya alekye andũ makwa mathi, na kwʼoko kwakwa kwĩ vinya nĩkũũmũlasimĩthya amalũngye maume nthĩ yake.”

2 Na Ngai eea Mose: “Ninyie Yeova. 3 Na naumĩlĩĩlaa Avalaamu, Isaka, na Yakovo nĩ Ngai Mwene Vinya Wʼonthe, ĩndĩ ndyaamamanyĩthya ĩsyĩtwa yakwa Yeova vyũ. 4 O na ĩngĩ, nĩnatianĩie ũtianĩo namo kana ngamanenga nthĩ ya Kanaanĩ, nthĩ ĩla matwĩe me ekali ma ũeninĩ. 5 Na yu nyie mwene nĩnĩwʼĩte kũluma kwa andũ ma Isilaeli, ala Amisili mamatwʼĩkĩthĩtye ngombo, na nĩnĩlilikene ũtianĩo wakwa.

6 “Kwoou tavya Aisilaeli ũũ: ‘Ninyie Yeova, na ngamumya wĩanĩ mũito ũla Amisili mamũthũkũmĩthasya na ngamũvonokya kuma ũkombonĩ woo na ndimwovosya na kwʼoko kũtambũũkye* na mosilĩlo manene. 7 Na ngamwosa mwĩthĩwe andũ makwa, nakwa ngeethĩwa Ngai wenyu, na vate nzika, mũkamanya kana ninyie Yeova Ngai wenyu, ũla ũkũmumya wĩanĩ mũito ũla mũthũkũmĩthawʼa Misili. 8 Na ngamũete nthĩ ĩla neevĩtie* nĩmũnenga Avalaamu, Isaka, na Yakovo; na ngamũnenga yĩthĩwe nthĩ yenyu. Ninyie Yeova.’”

9 Ĩtina Mose nĩwatavisye Aisilaeli ũndũ ũsu, ĩndĩ mayaamwĩthukĩĩsya nũndũ nĩmakwʼĩte ngoo na nĩmathũkũmĩthawʼa wĩa mũito mũno me ngombo.

10 Na ĩndĩ Yeova eea Mose atĩĩ: 11 “Enda na ũitavya Valao, mũsumbĩ wa Misili, kana nĩwaĩle kũlekya Aisilaeli maume nthĩ yake.” 12 Ĩndĩ Mose amũsũngĩa Yeova amwĩa: “Sisya! Aisilaeli mainambĩthukĩĩsya; we Valao akesa kũmbĩthukĩĩsya ata, na nĩ thĩna wa kũneena?”* 13 Ĩndĩ Yeova atavya Mose na Alũni ĩngĩ mĩao ĩla maaĩlĩte kũnenga Aisilaeli na Valao, mũsumbĩ wa Misili, nĩ kana maumye Aisilaeli nthĩ ya Misili.

14 Aa nĩmo aũngamĩi ma nyũmba ya aa-ĩthe moo: Ana ma Leũveni, mwana ũla mũkũũ wa Isilaeli, maĩ Anoki, Valu, Esiloni, na Kalimi. Ĩsu nĩyo mĩsyĩ ya Leũveni.

15 Ana ma Simeoni maĩ Yemueli, Yamini, Oati, Yakini, Nzoali, na Sauli, ũla waĩ mwana wa mũndũ mũka Mũkanaanĩ. Ĩsu nĩyo mĩsyĩ ya Simeoni.

16 Aa nĩmo masyĩtwa ma ana ma Livai, kwosana na mĩvĩa ya mũsyĩ woo: Ngelisoni, Koathi, na Melali. Livai ekalile thayũ myaka 137.

17 Ana ma Ngelisoni maĩ Livini na Simei, kwosana na mĩsyĩ yoo.

18 Ana ma Koathi maĩ Amilamu, Isali, Eviloni, na Usieli. Koathi ekalile thayũ myaka 133.

19 Ana ma Melali maĩ Mali na Musi.

Ĩsu nĩyo yaĩ mĩsyĩ ya Alivai, kwosana na mĩvĩa ya mũsyĩ woo.

20 Yu Amilamu nĩwoosie Yokeveti, mwĩĩtu-a-inyia wa ĩthe, ethĩwe kĩveti kyake. Amũsyaĩe Alũni na Mose. Amilamu ekalile thayũ myaka 137.

21 Ana ma Isali maĩ Kola, Neveki, na Nzikili.

22 Ana ma Usieli maĩ Misaeli, Elusavani, na Sithili.

23 Yu Alũni nĩwoosie Elisieva, mwĩĩtu wa Aminatavu, mwĩĩtu-a-inyia wa Nasoni, ethĩwe kĩveti kyake. Amũsyaĩe Natavu, Aviũ, Eleasali, na Ithamali.

24 Ana ma Kola maĩ Asili, Elikana, na Aviasavu. Ĩsu nĩyo yaĩ mĩsyĩ ya Akola.

25 Eleasali, mwana wa Alũni, nĩwoosie mwĩĩtu ũmwe wa Vutieli ethĩwe kĩveti kyake. Na amũsyaĩa Vineasi.

Asu nĩmo aũngamĩi ma nyũmba sya aa-ĩthe ma Livai, kwosana na mĩsyĩ yoo.

26 Asu nĩmo Alũni na Mose ala Yeova weeie atĩĩ: “Umyai andũ ma Isilaeli nthĩ ya Misili, nguthu kwa nguthu.”* 27 Na nomo Mose na Alũni ala maneenie na Valao, mũsumbĩ wa Misili, nĩ kana maumye andũ ma Isilaeli nthĩ ya Misili.

28 Mũthenya ũsu yĩla Yeova waneenie na Mose e nthĩ ya Misili, 29 Yeova eeie Mose atĩĩ: “Ninyie Yeova. Tavya Valao, mũsumbĩ wa Misili, kyonthe kĩla ngũũtavya.” 30 Na ĩndĩ Mose eea Yeova: “Sisya! Nĩ thĩna wa kũneena,* yu we Valao akesa kũmbĩthukĩĩsya ata?”

7 Na ĩndĩ Yeova eea Mose: “Sisya, nĩngũtwʼĩte wĩthĩwe ta Ngai* kũla kwĩ Valao, na Alũni mwana-a-inyia waku akeethĩwa mwathani waku. 2 Ũkasyokeleelaa maũndũ onthe ala ngũkwĩaĩa, na Alũni mwana-a-inyia waku akaneenaa na Valao, na Valao akalekya Aisilaeli maume nthĩ yake. 3 Nakwa ngeetĩkĩlya Valao omye ngoo yake, na ngaingĩvya mawonanyʼo na syama syakwa nthĩ ya Misili. 4 Ĩndĩ Valao ndakamwĩthukĩĩsya, na ngoonanyʼa vinya wa kwʼoko kwakwa Misili na ngaumya nguthu syakwa,* andũ makwa Aisilaeli, kuma nthĩ ya Misili na mosilĩlo manene. 5 Vate nzika, Amisili makamanya ninyie Yeova yĩla ngatambũũkya kwʼoko kwakwa ĩũlũ wa Misili na ndyumya Aisilaeli katĩ woo.” 6 Mose na Alũni nĩmeekie kĩla Yeova wameaĩe; ũu nowʼo meekie. 7 Mose aĩ na myaka 80, nake Alũni aĩ na myaka 83 yĩla maneenie na Valao.

8 Yeova eeie Mose na Alũni atĩĩ: 9 “Valao amwĩa, ‘Ĩkai kyama,’ wĩĩa Alũni, ‘Osa ndata yaku na ũimĩkya nthĩ mbee wa Valao.’ Na ĩkatwʼĩka nzoka nene.” 10 Kwoou Mose na Alũni mathi vala ve Valao na meeka o ũndũ Yeova wameaĩe. Alũni nĩwekisye ndata yake nthĩ mbee wa Valao na athũkũmi make, na yatwʼĩka nzoka nene. 11 Ĩndĩ, Valao nĩweetie aũme oĩ na aoi, na athembi ma Misili ala meekaa syama sya ũwe o namo meeka oou matũmĩĩte vinya woo wa kwĩka syama.* 12 Kĩla ũmwe nĩwekisye ndata yake nthĩ, na syatwʼĩka nzoka nene; ĩndĩ ndata ya Alũni yamelya ndata syoo. 13 O na ũu wĩ o vo, Valao nĩwoomisye ngoo yake, na ndaamethukĩĩsya, o tondũ Yeova wawetete.

14 Na ĩndĩ Yeova eea Mose: “Ngoo ya Valao nĩ mbũmũ. Nĩwalea kũlekya andũ makwa mathi. 15 Enda vala ve Valao kwakya. Sisya! Akeethĩwa aendete Ũsĩnĩ wa Nile! Na waĩlĩte kũũngama ũtee wa Ũsĩ wa Nile nĩ kana ũkomane nake; na ũikua ĩla ndata ĩnaalyũkile yatwʼĩka nzoka. 16 Na no nginya ũmwĩe atĩĩ: ‘Yeova Ngai wa Aevelania nũndũmĩte kũla ũĩ, na easya, “Lekya andũ makwa mathi nĩ kana makanthũkũmĩe weũnĩ,” ĩndĩ o na kũvikĩa yu tũĩ ndwaaĩsa kwĩwʼa. 17 Ũũ nĩwʼo Yeova ũkwasya: “Ũndũ ũũ nũũtuma ũmanya kana ninyie Yeova. Nĩngũkũna kĩwʼũ kya Ũsĩ wa Nile na ndata ĩno ngwete, nakyo nĩkĩũtwʼĩka nthakame. 18 Na makũyũ ala me Ũsĩnĩ wa Nile nĩmeũkwʼa, na Ũsĩ wa Nile nũũnyunga, na Amisili mayĩĩthĩwa matonya kũnywʼa kĩw’ũ kuma Ũsĩnĩ wa Nile.”’”

19 Na ĩndĩ Yeova eea Mose: “Tavya Alũni ũũ, ‘Osa ndata yaku na ũitambũũkya kwʼoko kwaku ĩũlũ wa kĩwʼũ kya Misili, ĩũlũ wa mbũsĩ syayo, mĩtaũ yayo,* maia mayo, na kwʼonthe kũla maiaa kĩwʼũ, nĩ kana kĩtwʼĩke nthakame.’ Na kũkeethĩwa nthakame nthĩ yonthe ya Misili, o na kĩwʼũ kĩla kĩ syĩndũnĩ sya mbwaũ na sya mavia, kĩkatwʼĩka nthakame.” 20 Mose na Alũni mateũtindĩa nĩmeekie o tondũ Yeova wameaĩe. Nĩwookĩlilye ndata yake na akũna kĩw’ũ kĩla kyaĩ Ũsĩnĩ wa Nile o Valao na athũkũmi make mene, na kĩw’ũ kyonthe kĩla kyaĩ ũsĩnĩ ũsu kyatwʼĩka nthakame. 21 Na makũyũ ala maĩ ũsĩnĩ ũsu makwʼa, na ũsĩ ũsu wambĩĩa kũnyunga, na Amisili mayaĩ matonya kũnywʼa kĩw’ũ kuma Ũsĩnĩ wa Nile, na kwaĩ nthakame kĩla vandũ nthĩ ya Misili.

22 Ĩndĩ, o namo athembi ma Misili ala meekaa syama sya ũwe nĩmeekie oou matũmĩĩte syĩmbithĩ syoo sya ũwe, na ngoo ya Valao yaendeea kũma, na ndaamethukĩĩsya, o tondũ Yeova wawetete. 23 Ĩtina wa ũu Valao nĩwasyokie nyũmba kwake, na ndaaĩkĩa ũndũ ũsu ngoonĩ o nawʼo. 24 Kwoou Amisili onthe menzaa kĩla vandũ ũtee wa Ũsĩ wa Nile maimantha kĩw’ũ kya kũnywʼa, nũndũ mayaĩ matonya kũnywʼa kĩw’ũ o na kĩmwe kya Ũsĩ wa Nile. 25 Na mĩthenya mũonza nĩyavĩtie kuma Yeova akũna Ũsĩ wa Nile.

8 Na ĩndĩ Yeova eea Mose atĩĩ: “Enda vala ve Valao na ũimwĩa, ‘Ũũ nĩwʼo Yeova ũkwasya: “Lekya andũ makwa mathi makanthũkũme. 2 Waendeea kũlea kũmalekya mathi, ngakũna kĩsio kyaku kyonthe na syoa. 3 Na Ũsĩ wa Nile ũkausũa syoa, na ikauma kĩw’ũnĩ na iilika nyũmba kwaku, ilike vala ũkomaa, ĩũlũ wa kĩtanda kyaku, ilike nyũmbanĩ sya athũkũmi maku na andũnĩ maku, ilike maikonĩ menyu, na syĩndũnĩ* ila mũkimĩaa* mũtu. 4 Syoa isu ikooka ĩũlũ waku, ĩũlũ wa andũ maku, na ĩũlũ wa athũkũmi maku onthe.”’”

5 Ĩtina Yeova eeie Mose atĩĩ: “Tavya Alũni, ‘Tambũũkya kwʼoko kwaku ũkwete ndata yaku ĩũlũ wa mbũsĩ, ĩũlũ wa mĩtaũ ya Ũsĩ wa Nile, na ĩũlũ wa maia, nĩ kana syoa syume kĩw’ũnĩ inyaĩĩke kĩla vandũ nthĩ ya Misili.ʼ” 6 Kwoou Alũni atambũũkya kwʼoko kwake ĩũlũ wa kĩw’ũ kya Misili, na syoa syambĩĩa kuma kĩw’ũnĩ na syausũa nthĩ ya Misili. 7 Ĩndĩ, athembi ala meekaa syama sya ũwe, o namo meeka oou matũmĩĩte syĩmbithĩ syoo sya ũwe, na matuma syoa syuma kĩw’ũnĩ syalika nthĩ ya Misili. 8 Nĩvo ĩndĩ Valao weetie Mose na Alũni na amea: “Mwĩsũvei Yeova nĩ kana avetange syoa kwakwa na andũnĩ makwa, nũndũ nĩngwenda kũlekya andũ menyu mathi makamũthembee Yeova.” 9 Na ĩndĩ Mose amwĩa Valao: “Kwa ndaĩa nĩenda ũndavye nĩ ĩndĩĩ naĩle kũmwĩsũva Ngai nĩ kana avetange syoa kwaku, athũkũminĩ maku, andũnĩ maku, na nyũmbanĩ syenyu. No Ũsĩnĩ wa Nile ve voka itevetangwa.” 10 Valao eewʼa ũu amwĩie: “Ũnĩ.” Nake Mose asya: “Kũkeethĩwa kwosana na kĩla waweta, nĩ kana ũmanye vai ũngĩ ũilye ta Yeova Ngai witũ. 11 Syoa ikavetangwa kwaku, nyũmbanĩ syaku, athũkũminĩ maku, na andũnĩ maku. Ikatiwa o Ũsĩnĩ wa Nile.”

12 Kwoou Mose na Alũni mauma vala ve Valao, na Mose amwĩsũva Yeova avetange syoa ila waeteete Valao. 13 Ĩtina wa ũu, Yeova eeka o ũndũ Mose wamũkũlilye, na syoa syambĩĩa kũkwʼĩĩa nyũmba, kũu nza wa nyũmba, na kĩthekanĩ. 14 Na masyũmbanyʼa ivumbu itatalĩka, na nthĩ ĩsu yambĩĩa kũnyunga. 15 Yĩla Valao woonie kana maũndũ nĩmaya kavaa, nĩwoomisye ngoo yake na ndaamethukĩĩsya, o tondũ Yeova wawetete.

16 Nĩvo ĩndĩ Yeova weeie Mose atĩĩ: “Tavya Alũni, ‘Tambũũkya ndata yaku ũkũne kĩtoo kya nthĩ, na wakĩkũna nĩkĩũtwʼĩka ũmuu nthĩ yonthe ya Misili.’” 17 Na meeka ũu. Alũni atambũũkya kwʼoko kwake akwete ndata na akũna kĩtoo kya nthĩ, na ũmuu wooka ĩũlũ wa andũ na nyamũ. Na kĩtoo kyonthe kya nthĩ kyatwʼĩka ũmuu nthĩ yonthe ya Misili. 18 Na athembi ala meekaa syama sya ũwe matata kwĩka oou matũmĩĩte syĩmbithĩ syoo sya ũwe, ĩndĩ maemwa. Na ũmuu wooka ĩũlũ wa andũ na nyamũ. 19 Kwoou athembi ala meekaa syama sya ũwe meea Valao atĩĩ: “Nĩ kyaa kya Ngai!” Ĩndĩ ngoo ya Valao yaendeea kwĩthĩwa yĩ mbũmũ, na ndaamethukĩĩsya, o tondũ Yeova wawetete.

20 Ĩtina wa ũu, Yeova eea Mose atĩĩ: “Amũka ũnĩ kwakya tene na ũithi ũkaũngame mbee wa Valao. Sisya! Akeethĩwa okĩte ũsĩnĩ! Na no nginya ũmwĩe, ‘Ũũ nĩwʼo Yeova ũkwasya: “Lekya andũ makwa mathi nĩ kana makanthũkũme. 21 Ĩndĩ waema kũlekya andũ makwa mathi, nĩngũkũetee ngi,* we vamwe na athũkũmi maku, na andũ maku na nyũmba syaku; na nyũmba sya Amisili ikeethĩwa syusũĩte ngi, o na ngi isu ikavwʼĩka nthĩ ĩla Amisili matwĩe. 22 Vate nzika, mũthenya ũsu ngavatha kĩsio kya Ngoseni, vala andũ makwa mekalaa. Vaikethĩwa na ngi o na ĩmwe kĩsionĩ kĩu, na kĩu kĩkatuma ũmanya kana nyie, Yeova, nĩ nthĩ ĩno. 23 Na ngavathũkanyʼa katĩ wa andũ makwa na andũ maku. Ũnĩ kyama kĩu kĩkeekĩka.”’”

24 Na Yeova eeka ũu, na ikundi mbingĩ sya ngi syambĩĩa kũlika nyũmbanĩ ya Valao, na nyũmbanĩ sya athũkũmi make, na syanyaĩĩka nthĩ yonthe ya Misili. Na nthĩ yaanangwa nĩ ngi isu. 25 Mũthya, Valao nĩweetie Mose na Alũni na amea: “Endai, mũkamũthembee Ngai wenyu, ĩndĩ mwĩ o nthĩ ĩno.” 26 Ĩndĩ Mose asya: “Ti ũseo kwĩka ũu, nũndũ kĩla tũũmũthembea Yeova Ngai witũ, nĩkĩũthatya Amisili. Yo twamũthembea Ngai witũ nthembo iũthatya Amisili, mo maitũkimanga na mavia? 27 Twĩthi kyalo kya mĩthenya ĩtatũ weũnĩ, na vau tũkamũthembea Yeova Ngai witũ, o tondũ ũtwĩaĩe.”

28 Nake Valao asya: “Nĩngũmũlekya mũthi mũkamũthembee Yeova Ngai wenyu weũnĩ. Ĩndĩ, mũyaĩlĩte kũthi vaasa mũno. Mwĩsũvei kwondũ wakwa.” 29 Nĩvo ĩndĩ Mose waisye: “Yu nĩnguma vaa, na nĩngũmwĩsũva Yeova kwondũ waku, na ũnĩ ngi ikauma kwa Valao, kwa athũkũmi make, na andũnĩ make. Ĩndĩ no nginya Valao aeke kũvũa ngũĩ naitũ* kwa kũlea kũlekya andũ mathi makamũthũkũme Yeova.” 30 Na Mose auma vala ve Valao na amwĩsũva Yeova. 31 Kwoou Yeova eeka kwosana na ndeto sya Mose, na ngi syavetangwa kwa Valao, athũkũminĩ make, na andũnĩ make. Vai ĩmwe yaatiwa. 32 O na ũu wĩ o vo, Valao nĩwoomisye ngoo yake ĩngĩ na ndaalekya Aisilaeli mathi.

9 Kwoou Yeova eea Mose: “Enda kwa Valao na ũimwĩa, ‘Ũũ nĩwʼo Yeova Ngai wa Aevelania ũkwasya: “Lekya andũ makwa mathi nĩ kana makanthũkũme. 2 Ĩndĩ walea kũmalekya mathi na waendeea kũmasiĩĩa, 3 sisya! kwʼoko kwa Yeova kũkooka ĩũlũ wa indo syenyu ila syĩ isesinĩ. Mbalasi, mangʼoi, ngamĩle, ngʼombe, na malondu, ikakwata ũkũno mũnene. 4 Na vate nzika, Yeova akavathũkanyʼa indo sya Aisilaeli na indo sya Amisili, na vai nyamũ o na ĩmwe katĩ wa indo sya Aisilaeli ĩkakwʼa.”’” 5 O vamwe na ũu, Yeova nĩwatwie ĩvinda ya kwĩka ũu, asya: “Ũnĩ Yeova akeeka ũndũ ũsu nthĩ ĩno.”

6 Na ũnĩ wake Yeova eeka ũu, na mĩthemba yonthe ya indo sya Amisili yambĩĩa kũkwʼa, ĩndĩ vai nyamũ o na ĩmwe katĩ wa indo sya Aisilaeli yaakwʼa. 7 Yĩla Valao wakũlĩĩilye, sisya! vayaĩ nyamũ o na ĩmwe katĩ wa indo sya Aisilaeli yakwʼĩte. O na vailye ũu, ngoo ya Valao yaendeea kwĩthĩwa yĩ mbũmũ, na ndaalekya andũ mathi.

8 Ĩtina wa ũu, Yeova eea Mose na Alũni: “Usũsyai moko menyu elĩ mũae kuma ikonĩ,* na Mose aĩlĩte kũwĩkya nzevenĩ Valao ene. 9 Na nũũtwʼĩka kĩtoo kĩvinyu ĩũlũ wa nthĩ yonthe ya Misili, na kĩitwʼĩka mĩimu mĩthũku mũno andũnĩ na nyamũnĩ nthĩ yonthe ya Misili.”

10 Kwoou nĩmoosie mũae kuma ikonĩ na maũngama mbee wa Valao. Na Mose awĩkya nzevenĩ na watwʼĩka mĩimũ mĩthũku mũno ĩkũvũlĩkanga andũnĩ na nyamũnĩ. 11 Athembi ala meekaa syama sya ũwe mayaĩ matonya kũũngama mbee wa Mose nũndũ wa mĩimũ ĩsu, nĩkwĩthĩwa athembi ala meekaa syama sya ũwe na Amisili onthe nĩmakwatĩtwe nĩyo. 12 Ĩndĩ Yeova eetĩkĩlya ngoo ya Valao yĩthĩwe mbũmũ, na ndaamethukĩĩsya, o tondũ Yeova watavĩtye Mose.

13 Na ĩndĩ Yeova eea Mose: “Ũnĩ wĩamũka kwakya tene, na ũithi ũkaũngame mbee wa Valao na ũimwĩa, ‘Ũũ nĩwʼo Yeova Ngai wa Aevelania ũkwasya: “Lekya andũ makwa mathi nĩ kana makanthũkũme. 14 Nũndũ yu nĩngũete mokũno makwa onthe nĩkũne ngoo yaku, athũkũmi maku, na andũ maku, nĩ kana ũmanye vai ũngĩ ũilye takwa nthĩ yonthe. 15 Kũvika yu nĩthĩwa nĩtambũũkĩtye kwʼoko kwakwa ngaũkũna we na andũ maku na ũkũno mũnene, na wĩthĩwa ũvetangĩtwe* ĩũlũ wa nthĩ. 16 Ĩndĩ nĩnĩkũekete thayũ nũndũ wa kĩtumi kĩĩ: nĩ kana nĩkwonyʼe vinya wakwa na nĩ kana ĩsyĩtwa yakwa yĩtavanwʼe nthĩ yonthe. 17 We no ũendeee kwĩthĩwa na mĩyimbyo kwa kũlea kũlekya andũ makwa mathi? 18 Yu ũnĩ masaa ta aa, ngausya mbua nene ya mavia ĩtaaoneka nthĩ ya Misili kuma ĩla yambĩlĩĩilwʼe kũvika yu. 19 Kwoou tũmana nĩ kana indo syaku syonthe, andũ maku onthe, na syĩndũ syaku syonthe ilikwʼe nyũmba. Kĩla mũndũ na kĩla nyamũ ĩla ĩkethĩwa kĩsesinĩ na mũũndanĩ ĩtalikĩtwʼe nyũmba ĩkakwʼa yauwĩĩwa nĩ mbua ĩsu ya mavia.”’”

20 Athũkũmi ma Valao ala makĩaa ndeto ya Yeova nĩmalikilye athũkũmi moo nyũmba na mĩtũkĩ o vamwe na indo syoo, 21 ĩndĩ ala mataaĩkĩa ndeto ya Yeova ngoonĩ, matiie athũkũmi moo na indo syoo isesinĩ na mĩũndanĩ.

22 Na ĩndĩ Yeova eea Mose: “Tambũũkya kwʼoko kwaku kwelekele ĩtunĩ, nĩ kana mbua ya mavia yue kĩla vandũ nthĩ ya Misili, ĩũlũ wa andũ na nyamũ na kyonthe kĩla kĩmeete nthĩ ya Misili.” 23 Kwoou Mose atambũũkya ndata yake elekelye ĩtunĩ, na Yeova aete kĩtundumo na mbua ya mavia, na mwaki* ĩũlũ wa nthĩ, na Yeova aendeea kusya mbua ya mavia nthĩ ya Misili. 24 Kwaĩ mbua ya mavia, na ĩendeee kua ve mwaki wakanaa. Yaĩ mbingĩ mũno; na kũyaĩ kwaaoneka ĩngĩ ta ĩsu Misili kuma yĩla nthĩ ĩsu yatũiwe. 25 Mbua ĩsu ya mavia nĩyaanangie kyonthe kĩla kyaĩ kĩthekanĩ nthĩ ya Misili, kuma andũ nginya nyamũ, na nĩyaanangie kyonthe kĩla kyameete na yatũlanga mĩtĩ yonthe. 26 No kĩsio kya Ngoseni kĩ kyoka, kĩla Aisilaeli matwĩe, kĩtaaua mbua ĩsu ya mavia.

27 Kwoou Valao atũmana Mose na Alũni na amea atĩĩ: “Yu nĩngwĩtĩkĩla nĩnĩvĩtĩtye. Yeova nĩ mũlũngalu, ĩndĩ nyie na andũ makwa twĩ mavĩtyo. 28 Mwĩsũvei Yeova nĩ kana kĩtundumo na mbua ya mavia ya Ngai ithele. Mweeka ũu, nĩnĩyũmbanĩtye kũmũlekya mũthi, na ndimwĩkalangya.” 29 Kwoou Mose amwĩa: “Naumaalũka ndũanĩ oou, nĩngũtambũũkya moko makwa mbee wa Yeova. Kĩtundumo nĩkĩũthela na mbua ya mavia ĩyĩeka kua, nĩ kana ũmanye nthĩ nĩ ya Yeova. 30 Ĩndĩ o na ũu weethĩwa, nĩnĩsĩ kana we na athũkũmi maku mũimũkĩa Yeova Ngai.”

31 Yu mĩtĩ ya katane* na mbaale nĩyaanangĩtwe, nũndũ mbaale yaĩ na iia na mĩtĩ ya katane nĩyalaũkĩte. 32 Ĩndĩ mĩthemba yĩ kĩvathũkanyʼo ya nganũ ndyaanangĩtwe, nũndũ yasyaaa ĩtina.* 33 Mose nĩwaumie ndũanĩ vala ve Valao na atambũũkya moko mbee wa Yeova, na kĩtundumo na mbua ya mavia syathela na mbua yaeka kua. 34 Yĩla Valao woonie kana nĩkwaeka kua, na mbua ya mavia nĩyathela, na kĩtundumo nĩkyathela, nĩwavĩtisye ĩngĩ na oomya ngoo yake, we vamwe na athũkũmi make. 35 Na ngoo ya Valao yaendeea kũma, na ndaalekya Aisilaeli mathi, o tondũ Yeova wawetete kwĩsĩla Mose.

10 Na ĩndĩ Yeova eea Mose: “Enda kwa Valao, nũndũ nĩnĩtĩkĩlĩtye ngoo yake na ngoo sya athũkũmi make syĩthĩwe syĩ mbũmũ, nĩ kana nonanyʼe mawonanyʼo aa makwa mbee wake, 2 na nĩ kana mwĩtavya syana syenyu na esũkũũu ũndũ nakũnie Misili mũno wĩana na syama ila neekie katĩ woo; na vate nzika, mũkamanya kana ninyie Yeova.”

3 Kwoou Mose na Alũni mathi kwa Valao na mamwĩa atĩĩ: “Ũũ nĩwʼo Yeova Ngai wa Aevelania ũkwasya, ‘Wĩlea kũmbĩnyivĩsya nginya ĩndĩĩ? Lekya andũ makwa mathi nĩ kana makanthũkũme. 4 Nũndũ waendeea kũlea kũlekya andũ makwa mathi, ũnĩ ngaete ngie kĩsionĩ kyaku. 5 Na ikavwʼĩka nthĩ yonthe, nginya wĩthĩe mũitonya kwona mũthanga. Ikaya kyonthe kĩla kĩtaneeanangwa nĩ mbua ya mavia na mũnatiiwe nakyo, na iiya mĩtĩ yenyu yonthe ĩla yĩ kĩthekanĩ. 6 Ikausũa nyũmbanĩ syaku syonthe, nyũmbanĩ sya athũkũmi maku onthe, na nyũmbanĩ sya Amisili onthe kwa nzĩa ĩtaaoneka nĩ aa-ĩthe menyu na aa-ũmae menyu kuma yĩla meethĩiwe nthĩ ĩno nginya ũmũnthĩ.’” Ĩtina wa ũu, nĩweethyũũie na auma vala ve Valao.

7 Na ĩndĩ athũkũmi ma Valao mamwĩa atĩĩ: “Mũndũ ũũ eendeea kũtũthĩnyʼa* nginya ĩndĩĩ? Lekya andũ aa mathi makathũkũme Yeova Ngai woo. We ndũkwona ũndũ Misili yanangĩtwe?” 8 Kwoou Mose na Alũni nĩmatũngiwe vala ve Valao, nake amea: “Endai, mũkathũkũme Yeova Ngai wenyu. Ĩndĩ mo naaũ meũthi?” 9 Na ĩndĩ Mose amwĩa: “Twĩthi na amũika maitũ, andũ maitũ ala akũũ, ana maitũ, eĩtu maitũ, malondu maitũ, na ngʼombe sitũ, nũndũ tũkeethĩwa na mboka kwondũ wa Yeova.” 10 Nake amea: “Ngesa kwĩthĩa nĩmũlekilye mũthi vamwe na syana syenyu, kwa wʼo Yeova ethĩwa vamwe nenyu! Nĩ ũndũ wĩ ũtheinĩ kana mũvangĩte kwĩka ũndũ mũthũku. 11 Ti kĩla mũndũ ũkũthi! No aũme menyu me oka meũthi makamũthũkũme Yeova, nũndũ ũu nĩwʼo mũnakũlĩtye.” Ĩtina wa ũu, malũngwʼa mauma mbee wa Valao.

12 Nĩvo ĩndĩ Yeova weeie Mose atĩĩ: “Tambũũkya kwʼoko kwaku ĩũlũ wa Misili, nĩ kana ngie syũke nthĩ ya Misili na iiya kyonthe kĩla kĩmeete ĩ nthĩ, kyonthe kĩla kĩnatialilwʼe nĩ mbua ya mavia.” 13 Vau kwa vau, Mose atambũũkya ndata yake ĩũlũ wa nthĩ ya Misili, na Yeova atuma kĩseve kyumĩte wumĩlonĩ wa sua kĩuutana nthĩ ĩsu mũthenya wʼonthe na ũtukũ wʼonthe nginya kwakya. Na kĩseve kĩu kyumĩte wumĩlonĩ wa sua kyaete ngie. 14 Na ngie syooka nthĩ yonthe ya Misili na syekala kĩsionĩ kyonthe kya Misili. Kwaĩ kũthũku mũno; kũyaĩ kwaaĩthĩwa ngie mbingĩ mũno ta isu, na kũyaĩ kwĩse kwĩthĩwa ingĩ mbingĩ ta isu. 15 Syavwʼĩkie nthĩ yonthe, na nthĩ yausũa kĩvindu nũndũ wasyo; syaanangie syĩndũ syonthe ila syameete nthĩ ĩsu na matunda onthe ma mĩtĩ ala matialĩtwʼe nĩ mbua ya mavia; vai kĩndũ o na kĩmwe kĩũ kyaatiala mĩtĩnĩ kana mĩmeanĩ nthĩ yonthe ya Misili.

16 Kwoou Valao ate kwananga ĩvinda eeta Mose na Alũni na amea: “Nĩnĩmũvĩtĩsye Yeova Ngai wenyu na nĩnĩmũvĩtĩsye inywʼĩ. 17 Yu, mwa ndekea ĩvinda yĩĩ yĩmwe na ũimwĩsũva Yeova Ngai wenyu nĩ kana ambetangĩe ũkũno ũũ mũthũku mũno.” 18 Kwoou auma* vala ve Valao na amwĩsũva Yeova. 19 Na ĩndĩ Yeova avĩndũa kĩseve, kyatwʼĩka kĩseve kĩ vinya mũno kyumĩte ũthũĩlonĩ wa sua, na kyakua ngie isu kyaitwaa Ũkanganĩ Mũtune. Vai ngie o na ĩmwe yaatiala kĩsionĩ kyonthe kya Misili. 20 O na ũu wĩ o vo, Yeova nĩweetĩkĩlilye ngoo ya Valao yĩthĩwe yĩ mbũmũ, na ndaalekya Aisilaeli mathi.

21 Na Yeova eea Mose atĩĩ: “Tambũũkya kwʼoko kwaku kwelekele ĩtunĩ nĩ kana kwĩthĩwe na kĩvindu nthĩ ya Misili, kĩvindu kya ngokomi.” 22 Mose ate kwananga ĩvinda nĩwatambũũkisye kwʼoko kwake elekelye ĩtunĩ, na kweethĩwa kĩvindu kya ngokomi kwa ĩvinda ya mĩthenya ĩtatũ nthĩ yonthe ya Misili. 23 Mũndũ ndaĩ atonya kwona ũla ũngĩ, na kwa mĩthenya ĩtatũ vai ũmwe woo waauma vala waĩ; ĩndĩ Aisilaeli onthe maĩ na kyeni kũla mekalaa. 24 Na ĩndĩ Valao eeta Mose na amwĩa: “Endai, mũkamũthũkũme Yeova. No malondu menyu na ngʼombe syenyu iũtiwa. O na no mũthi na syana syenyu.” 25 Ĩndĩ Mose asya: “O na ĩngĩ, we mwene nũũtũnenga* nthembo na nthembo ingĩ sya kũvĩvwʼa, na tũkasyumĩsya Yeova Ngai witũ. 26 Twĩthi na indo sitũ o nasyo. Vai nyamũ* o na ĩmwe twĩĩtĩkĩla ĩtiwe, nũndũ tũkatũmĩa imwe kũmũthaitha Yeova Ngai witũ, twavika kũu nĩwʼo tũkamanya nĩ nyamũ syĩva tũũmũthembea Yeova.” 27 Kwoou Yeova eetĩkĩlya ngoo ya Valao yĩthĩwe mbũmũ, na Valao ndaaĩtĩkĩla kũmalekya mathi. 28 Na Valao amwĩa: “Ĩvete mbee wakwa! Ndũkaatate kwona ũthyũ wakwa ĩngĩ, nũndũ mũthenya ũla ũkona ũthyũ wakwa, ũkakwʼa.” 29 Mose eewʼa ũu, amwĩie: “Nĩkwĩthĩwe o tondũ waweta, ndikaatata kwona ũthyũ waku ĩngĩ.”

11 Na ĩndĩ Yeova eea Mose: “Nĩngũetee Valao na Misili ũkũno ũngĩ ũmwe. Ĩtina wa ũu, akamũlekya mũthi. Yĩla ũkamũlekya mũthi, akamũlũngya mume kũũ. 2 Yu tavya andũ kana aũme onthe na aka onthe maĩlĩte kwĩtya atũi moo syĩndũ sya vetha na sya thaavu.” 3 Na Yeova nĩwatumie andũ mona ũseo methonĩ ma Amisili. O na ĩngĩ, Mose aĩ anatw’ĩka mũndũ ũnengetwe ndaĩa mũno nthĩ ya Misili nĩ athũkũmi ma Valao na andũ.

4 Nĩvo ĩndĩ Mose waisye: “Ũũ nĩw’o Yeova ũkwasya, ‘Ta ũtukũ katĩ nĩngwĩsĩla katĩkatĩ wa Misili, 5 na makithathi onthe* nthĩ ya Misili nĩmeũkw’a, kuma ĩkithathi ya Valao ũla wĩkalĩte kĩvĩlanĩ kyake kya ũsumbĩ nginya ĩkithathi ya mwĩĩtu ngombo ũla ũkũthiĩa lĩu wa mbaa ngetha ĩvianĩ ya kũthia, na makithathi onthe ma indo. 6 Kũkeethĩwa na kĩĩo kĩnene kĩtaaĩwʼĩka na kĩtakewʼĩka ĩngĩ nongi nthĩ yonthe ya Misili. 7 Ĩndĩ o na ngitĩ ndĩkakũmĩa Aisilaeli* kana indo syoo, nĩ kana mũmanye Yeova nũtonya kũvathũkany’a katĩ wa Amisili na Aisilaeli.’ 8 Na vate nzika, athũkũmi maku onthe makooka vala nĩĩ na maivalũka mbee wakwa maimbĩa, ‘Enda, we na andũ onthe ala makũatĩĩaa.’ Ĩtina wa ũu, ngathi.” Na ĩndĩ auma vala ve Valao e mũthatu mũno.

9 Nĩvo ĩndĩ Yeova weeie Mose: “Valao ndekwĩthukĩĩsya, nĩ kana syama syakwa singive nthĩ ya Misili.” 10 Mose na Alũni meekie syama isu syonthe mbee wa Valao, ĩndĩ Yeova eetĩkĩlya ngoo ya Valao yĩthĩwe mbũmũ, na ndaalekya Aisilaeli maume nthĩ yake.

12 Na Yeova aneena na Mose na Alũni me nthĩ ya Misili amea: 2 “Mwei ũũ ũkeethĩawa mwambĩlĩĩlyo wa myei kwenyu. Nĩwʼo ũkethĩawa mwei wa mbee wa mwaka wenyu. 3 Neenai na ũmbano wʼonthe wa Isilaeli na mũimea, ‘Mũthenyanĩ wa ĩkũmi wa mwei ũũ, kĩla ũmwe nĩwaĩle kwosa ĩlondu kwondũ wa nyũmba ya ĩthe wake, ĩlondu yĩmwe kĩla nyũmba. 4 Ĩndĩ ethĩwa mũsyĩ wĩ na andũ avũthũ ũkethĩa maimina ĩlondu, mo na mũtũi woo* ũla wĩ vakuvĩ nĩmaĩle kũaana ĩlondu yĩu kwosana na ũtalo wa andũ* ala me mĩsyĩnĩ yoo. Yĩla mũkwĩka ĩsavu ya kĩla kĩkwendeka, sũanĩai nyama ila kĩla ũmwe ũtonya kũya. 5 Ĩlondu yenyu yaĩlĩte kwĩthĩwa yĩte na thĩna o na ũmwe, yĩ yĩũme, na ya mwaka ũmwe. No mũnyuve tũtenanĩ twa malondu kana twa mbũi.* 6 No nginya mũyĩsũvĩe nginya mũthenyanĩ wa 14 wa mwei ũũ, na kĩla mũsyĩ ũmbanonĩ wa Isilaeli waĩle kũyĩthĩnza ĩ ya wĩoo.* 7 Na no nginya mose nthakame ĩmwe na maimĩminzangĩsya mĩtĩnĩ ĩlĩ ĩla yĩ ndeenĩ sya mũomo na mũtĩnĩ ũla wĩ ĩũlũ wa mũomo wa nyũmba ila mekũĩĩa.

8 “No nginya maye nyama ĩsu ũtukũ ũsu. Maĩle kũmĩvĩvya na mwaki na maimĩĩsanĩsya na mũkate ũte ĩlawa na nyũnyi syĩ ũũ. 9 Mũikamĩye yĩ mbĩthĩ* kana yĩ ntheũkye, ĩndĩ mĩvĩvyei na mwaki, mũtwe wayo, vamwe na maaũ na nyama syayo sya nda. 10 Mũikaie o na ĩmwe nginya kwakya, ĩndĩ ethĩwa ĩmwe nĩyatiala nginya kwakya, no nginya mũmĩvĩvye vyũ na mwaki. 11 Na ũũ nĩwʼo mwaĩle kũmĩya, mwĩyovete mĩsivi yenyu,* mwĩkĩĩte iatũ syenyu, na mũkwete ndata syenyu; na mwaĩle kũmĩya na mĩtũkĩ. Nĩ Vasaka ya Yeova. 12 Nũndũ ngavĩtĩla katĩkatĩ wa nthĩ ya Misili ũtukũ ũsu na ndikũna makithathi onthe* nthĩ ya Misili, kuma mũndũ nginya nyamũ; na ngasilĩla ngai syonthe sya Misili. Ninyie Yeova. 13 Nthakame ĩkeethĩwa ũvano wa kwonanyʼa nyũmba ila mũĩ; na ngoona nthakame ĩsu na ndivĩtĩla ĩũlũ wenyu, na yĩla ngakũna nthĩ ya Misili, ũkũno ũsu ndũkoka ĩũlũ wenyu ũmwanange.

14 “‘Mũthenya ũsu ũkeethĩwa wa kũlilikana kwenyu, na mwaĩle kũũtanĩaa ta mboka kwondũ wa Yeova nzyawanĩ syenyu syonthe. No nginya mũũtanĩae, nũndũ nĩ ũtwʼĩo wa ĩvinda yonthe. 15 Mĩthenya mũonza mũkaĩsaa mũkate ũte ĩlawa. Ĩĩ, mũthenya wa mbee mũkavetanga mũtu mũkime* mũkaatu nyũmbanĩ syenyu, nũndũ mũndũ o na wĩva ũla ũkaya kĩndũ kĩkĩĩtwe ĩlawa kuma mũthenya wa mbee nginya mũthenya wa mũonza, mũndũ* ũsu no nginya avetangwe* andũnĩ ma Isilaeli. 16 Mũthenya wa mbee mũkeethĩwa na ũmbano mũtheu, na mũthenya wa mũonza, mũkeethĩwa na ũmbano ũngĩ mũtheu. Vai wĩa waĩle kũtethwʼa mĩthenyanĩ ĩsu. Ate o no mũue lĩu, ĩndĩ o ũla kĩla mũndũ* ũkũya.

17 “‘No nginya mũtanĩae Mboka ya Mũkate ũte Ĩlawa, nũndũ mũthenya ũsu, ngaumya nguthu* syenyu nthĩ ya Misili. Na no nginya mũendeee kũtanĩa mũthenya ũsu nzyawanĩ syenyu syonthe nũndũ nĩ ũtwʼĩo wa ĩvinda yonthe. 18 Mweinĩ wa mbee, kuma mũthenyanĩ wa 14 wa mwei, ĩ ya wĩoo, mwaĩle kũya mũkate ũte ĩlawa nginya mũthenya wa 21 wa mwei ũsu, ĩ ya wĩoo. 19 Vai mũtu mũkime* mũkaatu waĩle kwĩthĩwa nyũmbanĩ syenyu kwa mĩthenya mũonza, nũndũ mũndũ o na wĩva ũla ũkaya kĩndũ kĩkĩĩtwe ĩlawa, ethĩwe nĩ mũeni kana asyaĩwe nthĩ ĩsu, mũndũ* ũsu no nginya avetangwe* ũmbanonĩ wa Isilaeli. 20 Mũyaĩle kũya kĩndũ o na kĩmwe kĩkĩĩtwe ĩlawa. Mũkaĩsaa mũkate ũte ĩlawa mĩsyĩnĩ yenyu yonthe.’”

21 Mose nĩweetie atumĩa onthe ma Isilaeli ate kwananga ĩvinda na amea: “Endai mũkanyuve nyamũ nini* kwondũ wa kĩla mũsyĩ na mũithĩnza nthembo ya Vasaka. 22 Ĩtina wa ũu, osai matũ movanyʼe ma ĩsovo na mũimainda nthakamenĩ yĩ kalaĩnĩ na mũiminzangĩsya mũtĩnĩ ũla wĩ ĩũlũ wa mũomo wenyu na mĩtĩnĩ ĩlĩ ĩla yĩ ndeenĩ sya mĩomo yenyu; na vai ũmwe wenyu waĩlĩte kumaala nyũmba kwake nginya kwakya. 23 Na ĩndĩ yĩla Yeova ũkavĩtĩla nthĩ ĩno nĩ kana akũne Amisili na ayona nthakame ĩla yĩ mũtĩnĩ ũla wĩ ĩũlũ wa mũomo na ĩla yĩ mĩtĩnĩ ĩlĩ ĩla yĩ ndeenĩ sya mũomo, vate nzika, Yeova akavĩta ĩũlũ wa mĩomo yenyu, na ndaketĩkĩlya ũkũno wa kĩkwʼũ* ũlike nyũmbanĩ syenyu.

24 “No nginya mũtanĩae mboka ĩsu nũndũ nĩ mwolooto wa ĩvinda yonthe kwenyu na kwa ana menyu. 25 Na yĩla mũkalika nthĩ ĩla Yeova ũkamũnenga o tondũ ũwetete, no nginya mũendeee kũtanĩa mboka ĩsu. 26 Na yĩla ana menyu memũkũlya, ‘Yo mboka ĩno yonanasya kyaũ kwenyu?’ 27 no nginya mwĩmatavya, ‘Nĩ nthembo ya Vasaka kwondũ wa Yeova, ũla wakĩlile nyũmba sya Aisilaeli me Misili aikũna Amisili, ĩndĩ oovosya nyũmba sitũ.’”

Nĩvo ĩndĩ andũ makumanie nginya nthĩ na mavalũka mbee wa Ngai. 28 Na kwoou Aisilaeli mathi na meeka o tondũ Yeova weeaĩe Mose na Alũni. Ũu nowʼo meekie.

29 Na ũtukũ katĩ, Yeova akũna makithathi onthe ma* nthĩ ya Misili, kuma ĩkithathi ya Valao ũla wekalĩte kĩvĩlanĩ kyake kya ũsumbĩ nginya ĩkithathi ya ũla mũtave na waĩ yela,* na makithathi onthe ma nyamũ. 30 Valao nĩwaamũkie ũtukũ ũsu vamwe na athũkũmi make onthe na Amisili ala angĩ onthe, na Amisili maĩ na kĩĩo kĩnene mũno, nũndũ vai nyũmba ĩtakwʼĩte mũndũ. 31 Valao ate kwananga ĩvinda nĩweetie Mose na Alũni ũtukũ na amea: “Ũkĩlai mume katĩ wa andũ makwa, inywʼĩ na Aisilaeli ala angĩ. Endai mũkamũthũkũme Yeova, o tondũ mũnakũlĩtye. 32 O na ĩngĩ, osai malondu menyu, mbũi syenyu, na ngʼombe syenyu na mũithi, o tondũ mũnakũlĩtye. Ĩndĩ no nginya mũmbathime o nakwa.”

33 Na Amisili mambĩĩa kũthingʼĩĩsya Aisilaeli maume nthĩ yoo na mĩtũkĩ “nũndũ,” o tondũ maasya, “ithyonthe no ta twĩ akwʼũ!” 34 Na kwoou andũ moosa mũtu woo mũkime* ĩndĩ ũte na ĩlawa, vamwe na syĩndũ* syoo sya kũkimĩa mũtu syovetwe na ngũa na maikua na ituo. 35 Na Aisilaeli meeka o ũndũ Mose wamatavĩtye na meetya Amisili syĩndũ sya vetha na sya thaavu o vamwe na ngũa. 36 Na Yeova atuma andũ make mona ũseo methonĩ ma Amisili, kwoou mamanenga kĩla mametisye, namo moosa malĩ ya Amisili.

37 Na ĩndĩ Aisilaeli mauma Lamesesi maendete Sukothi, aũme ta 600,000 maendete na maaũ, syana ite ndale. 38 O na ĩngĩ, maendanisye na nguthu ya andũ aingĩ ma kĩla mũthemba,* o vamwe na malondu, mbũi, na ngʼombe, indo mbingĩ mũno. 39 Nĩmambĩĩie kũua mĩkate ya kĩlinge ĩte ĩlawa na mũtu mũkime ũla maumisye Misili. Ndyaĩ na ĩlawa, nũndũ malũngilwʼe Misili na mĩtũkĩ mũno weethĩa o na mai na ĩvinda ya kũmbanyʼa lĩu wa mũthemba ũngĩ.

40 Na kũtũa kwa Aisilaeli, ala matwĩe Misili, kwaĩ myaka 430. 41 Na myaka 430 yathela, mũthenyanĩ o ũsu, nguthu* syonthe sya andũ ma Yeova nĩsyaumie nthĩ ya Misili. 42 Nĩ ũtukũ ũla makatanĩaa ũndũ Yeova wamaumisye nthĩ ya Misili. Ũtukũ ũsu Aisilaeli onthe maĩle kũlilikanaa Yeova nzyawanĩ syoo syonthe.

43 Na ĩndĩ Yeova eea Mose na Alũni, “Ũũ nĩwʼo ũtwʼĩo wa Vasaka: Vai mũeni o na ũmwe waĩlĩte kũya Vasaka. 44 Ĩndĩ ethĩwa mũndũ e na mũndũũme ngombo ũmũthooete na mbesa, nĩwaĩle kũmwaĩka. Eeka ũu nowʼo ngombo ĩsu ĩtonya kũya Vasaka. 45 Mũndũ ũla ũthamĩĩte kũu na mũthũkũmi mũandĩke ndaĩle kũmĩya. 46 Yaĩle kũĩĩwa nyũmbanĩ ĩmwe. Mũyaĩle kumaalya nyama o na ĩmwe yayo nza wa nyũmba, na mũyaĩle kũtũla ĩvĩndĩ o na yĩmwe yayo. 47 Ũmbano wʼonthe wa Isilaeli nĩwaĩle kũmĩtanĩa. 48 Ethĩwa ve mũeni wĩkalaa nenyu na nũkwenda kũtanĩa Vasaka ya Yeova, no nginya kĩla mũndũũme wĩ nyũmba kwake aĩkwe. Na ĩndĩ akeethĩwa atonya kũmĩtanĩa, na akeethĩwa ailye ta mũndũ ũsyaĩwe nthĩ ĩsu. Ĩndĩ vai mũndũũme ũte mwaĩke waĩle kũmĩya. 49 Mũndũ ũla ũsyaĩwe nthĩ ĩsu na mũeni ũla wĩkalaa nenyu makaatĩĩaa mwĩao ũmwe.”

50 Kwoou Aisilaeli onthe meeka o tondũ Yeova weeaĩe Mose na Alũni. Ũu nowʼo meekie. 51 Mũthenya o ũsu Yeova nĩwaumisye Aisilaeli vamwe na nguthu* syoo nthĩ ya Misili.

13 Yeova aendeeie kwĩa Mose atĩĩ: 2 “Vatha* kwondũ wakwa aũme onthe Aisilaeli ala masyawa ma mbee.* Mũndũũme wa mbee kũsyawa na nyamũ nũme ya mbee kũsyawa, syonthe nĩ syakwa.”

3 Nĩvo ĩndĩ Mose weeie andũ: “Lilikanaai mũthenya ũũ ũla mwaumie Misili, nyũmbanĩ ya ũkombo, nũndũ Yeova nĩwamumisye kũũ na kw’oko kwĩ vinya. Kwoou vai kĩndũ kĩkĩĩtwe ĩlawa mwaĩlĩte kũya. 4 Mwĩuma Misili mũthenya ũũ, mweinĩ wa Avivu.* 5 Mwaĩlĩte kũlilikanaa mũthenya ũũ mwei ũũ, yĩla Yeova ũkamũete nthĩ ya Akanaanĩ, Aititi, Aamoli, Aivi, na Ayevusi, ĩla weevĩtĩe aa-ũmae menyu kũmũnenga, nthĩ yusũĩte ĩia na ũkĩ wa nzũkĩ. 6 Mũkaĩsaa mũkate ũte ĩlawa mĩthenya mũonza, na mũthenyanĩ wa mũonza, mũkeethĩawa na mboka kwondũ wa Yeova. 7 Mwaĩle kũya mũkate ũte ĩlawa mĩthenya mũonza; na mũyaĩle kwĩthĩwa na kĩndũ o na kĩmwe kĩkĩĩtwe ĩlawa, na mũyaĩle kwĩthĩwa na mũtu mũkime* mũkaatu kĩsionĩ kyenyu kyonthe.* 8 Mũthenya ũsu no nginya wĩtavya mwana waku, ‘Nĩĩka ũu nũndũ wa maũndũ ala Yeova weekie kwondũ wakwa yĩla naĩ Misili.’ 9 Na ũndũ ũsu ũkeethĩwa ta wonany’o kw’okonĩ kwaku na ta ũlilikanyʼo kĩtulyanĩ kyaku,* nĩ kana mwĩao wa Yeova wĩthĩawe kanyw’anĩ waku, nũndũ Yeova akumisye Misili na kwʼoko kwĩ vinya. 10 No nginya ũatĩĩae ũtw’ĩo ũũ ĩvinda yĩla yĩnyuvĩtwe yavika, mwaka kũthi ũla ũngĩ.

11 “Yĩla Yeova ũkakũete nthĩ ya Akanaanĩ, ĩla wakwĩvĩtĩe we na aa-ũmae maku kana akaũnenga, 12 no nginya wĩnenga Yeova aũme onthe ala masyawa ma mbee,* o vamwe na kĩla nyamũ nũme yasyawa ya mbee indonĩ syaku. Isu nĩ sya Yeova. 13 Na waĩle kwovosya na ĩlondu kĩla ĩngʼoi yasyawa ya mbee, na walea kũyovosya, no nginya ũyĩtũle ngingo. Na kĩla mũndũũme wasyawa wa mbee ananĩ maku nĩwaĩle kũmwovosya.

14 “Ĩtina mwana waku esa kũũkũlya, ‘Ũndũ ũũ wĩonanyʼa ata?’ nĩvo ĩndĩ wĩmwĩa, ‘Yeova nĩwatumisye na kwʼoko kwĩ vinya Misili, kuma nyũmbanĩ ya ũkombo. 15 Yĩla Valao waleile na ngũlũ kũtũlekya tũthi, Yeova nĩwooaie makithathi onthe ma* Misili, kwambĩĩa ĩkithathi ya mũndũ nginya ĩkithathi ya nyamũ. Nĩkyo kĩtumi ngũmũthembea Yeova aũme onthe ala masyawa ma mbee,* na ngwovosya kĩla ĩkithathi ananĩ makwa.’ 16 Ũndũ ũsu ũkeethĩwa ta wonany’o kw’okonĩ kwaku na ta kĩndũ kyoveewe kana kĩkĩĩtwe kĩtulyanĩ kyaku,* nũndũ Yeova atumisye Misili na kwʼoko kwĩ vinya.”

17 Yu yĩla Valao walekilye andũ mathi, Ngai ndaamatongoesya mesĩle nzĩanĩ ĩla yaĩ kĩsionĩ kya Avilisiti, o na kau yaĩ nguvĩ. Nũndũ Ngai aisye: “Andũ aa no mavĩndũe mesilya moo mokitwa na maisyoka Misili.” 18 Kwoou Ngai nĩwatumie andũ mathiũũka mesĩle nzĩanĩ ya weũnĩ wa Ũkanga Mũtune. Aisilaeli maumie nthĩ ya Misili mevangĩte ta ikundi sya asikalĩ. 19 O na ĩngĩ, Mose nĩwakuie mavĩndĩ ma Yosevu, nũndũ Yosevu nĩwatumie ana ma Isilaeli mevĩta ũũ: “Vate ndĩi Ngai akamũlilikana, na no nginya mwĩkua mavĩndĩ makwa mũyuma kũũ.” 20 Nĩmaumie Sukothi na mamba maeema Ethamu, ũtee wa weũ.

21 Yu Yeova aendaa mbee woo amatongoesye mũthenya na kĩtuĩ kya ĩtu, na ũtukũ na kĩtuĩ kya mwaki nĩ kana kĩmamulĩkĩle, wĩthĩe no mathi mũthenya na ũtukũ. 22 Kĩtuĩ kĩu kya ĩtu kĩyaumaa mbee wa andũ mũthenya, o na kĩtuĩ kya mwaki kĩyaumaa mbee woo ũtukũ.

14 Na Yeova eea Mose: 2 “Tavya Aisilaeli kana maĩlĩte kũsyoka na mayamba maeema mbee wa Viailothi, katĩkatĩ wa Mikitoli na ũkanga, masyaĩtye Mbaali-nzevoni. Maĩlĩte kwamba maeema ũtee wa ũkanga mavasyaĩtye. 3 Na ĩndĩ Valao akasya ĩũlũ wa Aisilaeli, ‘Maendeee kwanganga me avũavũanu. Vai ũndũ matonya kuma weũnĩ.’ 4 Nĩngwĩtĩkĩlya ngoo ya Valao yĩthĩwe mbũmũ, nake nũkũmasembanyʼa, na nĩngwĩkumya kwĩsĩla Valao na ita syake syonthe; na vate nzika, Amisili nĩmeũmanya kana ninyie Yeova.” Kwoou ũu nĩwʼo meekie.

5 Ĩtina mũsumbĩ wa Misili nĩwataviwʼe kana Aisilaeli maĩ manasemba makathi. Vau kwa vau, Valao na athũkũmi make nĩmavĩndũie mesilya moo ĩũlũ wa Aisilaeli, na masya: “Nĩkĩ twĩkie ũu? Nĩkĩ tũlekilye Aisilaeli mathi maeke kwĩthĩwa ngombo sitũ?” 6 Kwoou nĩwoombanisye makasya make ma kaũ, na oosa andũ make maendanyʼa nake. 7 Nĩwoosie makasya 600 ala maseo vyũ na makasya ala angĩ onthe ma Misili, na kĩla yĩmwe yaĩ na ngũmbaũ sya kaũ. 8 Kwoou Yeova nĩweetĩkĩlilye ngoo ya Valao mũsumbĩ wa Misili yĩthĩwe mbũmũ, na Valao asembanyʼa Aisilaeli ala maendeee kuma nthĩ ĩsu me na ũkũmbaũ.* 9 Amisili nĩmamasembanisye, na mbalasi syonthe sya kũkusya makasya sya Valao na atwai make ma mbalasi na ita syake, maendeee kũthengeea Aisilaeli ala mambĩte maeema ũtee wa ũkanga, vakuvĩ na Viailothi, masyaĩtye Mbaali-nzevoni.

10 Yĩla Valao wathengeeie, Aisilaeli nĩmookĩlilye metho moo na moona Amisili mamaatĩĩe. Aisilaeli nĩmakwatiwe nĩ wia na mambĩĩa kũmũĩĩa Yeova. 11 Meeie Mose atĩĩ: “Ũtũetie kũũ weũnĩ tũkwʼĩĩe kwʼo nĩkwĩthĩwa Misili kũi kũndũ andũ matonya kũthikwa? Nĩkĩ ũtwĩkĩte ũũ? Nĩkĩ ũnatumisye Misili?” 12 Kĩu tyo kyo twakũtavisye twĩ Misili, yĩla twakwĩie, ‘Ekana naitũ, nĩ kana tũthũkũme Amisili’? Nũndũ nĩ kavaa kwitũ kũthũkũma Amisili kwĩ kũkwʼĩĩa weũnĩ.” 13 Na ĩndĩ Mose eea andũ: “Mũikakĩe. Ũngamai mwĩ alũmu mwone ũndũ Yeova ũkũmũtangĩĩa ũmũnthĩ. Nũndũ Amisili ala mũmene ũmũnthĩ, mũikamona ĩngĩ nongi. 14 Yeova mwene nũkũmũkitĩa, nenyu mwĩĩkala mũvindĩtye.”

15 Nĩvo ĩndĩ Yeova weeie Mose: “Nĩkĩ ũendeee kũmbĩĩa? Tavya Aisilaeli maendeee na kyalo. 16 Naku, ũkĩlya ndata yaku na ũitambũũkya kwʼoko kwaku ĩũlũ wa ũkanga na ũiũaanyʼa, nĩ kana Aisilaeli mesĩle katĩkatĩ wa ũkanga makinyĩle nthĩ nyũmũ. 17 Nakwa nĩngwĩtĩkĩlya ngoo sya Amisili syĩthĩwe mbũmũ, nĩ kana malike mamaatĩĩe; kwoou nĩngwĩkumya kwĩsĩla Valao na ita syake syonthe, makasya make ma kaũ, na atwai make ma mbalasi. 18 Na vate nzika, Amisili nĩmeũmanya kana ninyie Yeova yĩla ngwĩkumya kwĩsĩla Valao, makasya make ma kaũ, na atwai make ma mbalasi.”

19 Na ĩndĩ mũlaĩka wa Ngai wa w’o ũla waendaa mbee wa kambi ya Isilaeli auma mbee woo na asyoka ĩtina woo, na kĩtuĩ kya ĩtu kĩla kyaĩ mbee woo kyasyoka ĩtina woo na kyaũngama vau. 20 Kwoou nĩkyookie katĩkatĩ wa kambi ya Amisili na kambi ya Aisilaeli. Ngalĩko ĩmwe, kyaĩ ĩtu ĩtuku. Na ngalĩko ĩla ĩngĩ, nĩkyamamulĩkĩle ũtukũ. Kwoou kambi ya Amisili ndyaathengeea kambi ya Aisilaeli ũtukũ wʼonthe.

21 Na Mose atambũũkya kwʼoko kwake ĩũlũ wa ũkanga; na Yeova atuma kĩseve kĩ vinya kya wumĩlonĩ wa sua kĩuutana ũtukũ wʼonthe, na kĩwʼũ kyaaanĩka na ũkanga watwʼĩka nthĩ nyũmũ. 22 Kwoou Aisilaeli mesĩla katĩkatĩ wa ũkanga makinyĩle nthĩ nyũmũ, nakyo kĩw’ũ kyaseũvĩtye ũkũta kwʼokonĩ kwoo kwa aũme na kwʼokonĩ kwoo kwa aka. 23 Amisili nĩmamaatĩĩie, na mbalasi syonthe sya Valao, makasya make ma kaũ, na atwai make ma mbalasi mambĩĩa kũmaatĩĩa katĩkatĩ wa ũkanga. 24 Kũkilye kũkya,* Yeova nĩwasyaisye kambi ya Amisili e kĩtuĩnĩ kya mwaki na ĩtu, na avũavũanyʼa kambi ya Amisili. 25 Nĩwaumasya makasya moo ndĩa nginya weethĩa mematwaa na vinya, na Amisili maasya: “Ekai tũsembe tũikathengeee Aisilaeli, nũndũ Yeova aendeee kũkita Amisili kwondũ woo.”

26 Na ĩndĩ Yeova eea Mose: “Tambũũkya kwʼoko kwaku ĩũlũ wa ũkanga nĩ kana kĩw’ũ kĩsyokeanĩe na kĩivwʼĩka Amisili, makasya moo ma kaũ, na atwai moo ma mbalasi.” 27 Mose ate kwananga ĩvinda nĩwatambũũkisye kwʼoko kwake ĩũlũ wa ũkanga, na kũendeee kũkya, ũkanga wasyokeanĩa. Na yĩla Amisili masembete maũkĩĩte, Yeova nĩwamavunzangĩie ũkanganĩ katĩ. 28 Kĩw’ũ kĩla kyaendeee kũsyokeanĩa nĩkyavwʼĩkie makasya ma kaũ na atwai ma mbalasi na ita syonthe sya Valao ila syaĩ inalika ũkanganĩ imaatĩĩe. Vai o na ũmwe katĩ woo waaĩtĩkĩlwʼa kũvonoka.

29 Ĩndĩ Aisilaeli mesĩile nthĩ nyũmũ katĩkatĩ wa ũkanga, na kĩw’ũ kyaseũvĩtye ũkũta kwʼokonĩ kwoo kwa aũme na kwʼokonĩ kwoo kwa aka. 30 Na ũu nĩwʼo Yeova watangĩĩie Aisilaeli mũthenya ũsu kuma kwʼokonĩ kwa Amisili, na Aisilaeli moona Amisili me akwʼũ ũtee wa ũkanga. 31 O na ĩngĩ, Aisilaeli nĩmoonie vinya mwingĩ ũla* Yeova watũmĩie kũkita Amisili, na andũ mambĩĩa kũmũkĩa Yeova na kũmũĩkĩĩa Yeova o vamwe na mũthũkũmi wake Mose.

15 Ĩvindanĩ yĩu Mose na Aisilaeli nĩmamwinĩie Yeova wathi ũũ:

“Eka nĩmwinĩe Yeova, nũndũ nĩwanenevwʼa mũno.

Mbalasi na mũtwai wayo nĩwekya ũkanganĩ.

 2 Vinya wakwa na ũtonyi wakwa nĩ Yeova, nũndũ nĩwatwʼĩka ũtangĩĩo wakwa.

Ũũ nĩ Ngai wakwa, na nĩngũmũtaĩa; Ngai wa ĩthe wakwa, na nĩngũmũnenevya.

 3 Yeova nĩ ngũmbaũ ya kaũ yĩ vinya. Yeova nĩyo ĩsyĩtwa yake.

 5 Kĩwʼũ kĩ vinya nĩkyamavwʼĩka; mathelekelya vyũ ũkanganĩ ta ĩvia.

 9 Mũmaitha aisye: ‘Nĩngũmaatĩĩa! Nĩngũmakwata!

Nĩaanyʼa mũtavo nginya nĩanĩwe!*

Nĩngũkũa ũvyũ wakwa! Kwʼoko kwakwa nĩkũũmakĩlya vinya!’

11 Nũũ katĩ wa i ngai ũilye taku, ame Yeova?

Nũũ ũilye taku, we wĩyonanasya wĩ mũtheu mũno vyũ?

Ũla waĩle kũkĩwa na mbathi sya kũtaĩa, ũla wĩkaa maũndũ ma ũsengyʼo.

12 Watambũũkisye kwʼoko kwaku kwa aũme, na nthĩ yamamelya.

Ekali onthe ma Kanaanĩ makakwʼa ngoo.

16 Makakwatwa nĩ wia na kũtelema.

18 Yeova akasumbĩka e mũsumbĩ tene na tene.

20 Na ĩndĩ Miliamu mwathani mũndũ mũka, mwĩĩtu-a-inyia wa Alũni, oosa ndambulĩnĩ, na aka onthe mamũatĩĩa me na ndambulĩnĩ masũngĩte. 21 Miliamu ainie ũũ etĩkĩĩsye aũme:

“Mwinĩei Yeova, nũndũ nĩwanenevwʼa mũno.

Mbalasi na mũtwai wayo nĩwekya ũkanganĩ.”

22 Ĩtina Mose nĩwatongoeisye Aisilaeli kuma Ũkanganĩ Mũtune, na mauma mathi weũnĩ wa Suli na mathi kyalo kya mĩthenya ĩtatũ weũnĩ, ĩndĩ mayaakwata kĩwʼũ. 23 Nĩmavikie Mala,* ĩndĩ mayaĩ matonya kũnywʼa kĩwʼũ kya Mala nũndũ kyaĩ ũũ. Nĩkyo kĩtumi wavetie Mala. 24 Kwoou andũ mambĩĩa kũmũnyungunyĩĩsya Mose maimwĩa: “Twĩnywʼa kĩ?” 25 Na Mose amũĩĩa Yeova, na Yeova amũtongoesya mũtĩnĩ mũna. Yĩla wawĩkisye kĩw’ũnĩ, kĩw’ũ kĩu nĩkyameisye mũyo.

Na vau Ngai amekĩĩa mwolooto na mwĩao wa kũatĩĩaa yĩla meũtwʼa sila, na vau amatata. 26 Aisye: “Ethĩwa mũkeethukĩĩasya nesa vyũ wasya wa Yeova Ngai wenyu na kwĩkaa kĩla kyaĩle methonĩ make na kwĩthukĩĩasya nesa mĩao yake na kũatĩĩa myolooto yake yonthe, ndikamũetee ũwau o na ũmwe katĩ wa mowau ala naetie ĩũlũ wa Amisili, nũndũ nyie, Yeova, nĩngũmũvosya.”

27 Ĩtina wa ũu, nĩmavikie Elimu, vala vaĩ na nthongo* 12 sya kĩwʼũ, na mĩtende 70. Na kwoou nĩmambie maeema vau ũtee wa kĩwʼũ.

16 Ũmbano wʼonthe wa Aisilaeli wauma Elimu, nĩwesie kũvika weũnĩ wa Sini, ũla wĩ katĩkatĩ wa Elimu na Sinaĩ, mũthenyanĩ wa 15 wa mwei wa kelĩ ĩtina wa kuma nthĩ ya Misili.

2 Na ĩndĩ ũmbano wʼonthe wa Aisilaeli waambĩĩa kũnyungunyĩĩsya Mose na Alũni weũnĩ. 3 Aisilaeli matindĩaa kũmea: “Ta kethĩwa kwʼoko kwa Yeova kwatũaie twĩ nthĩ ya Misili yĩla twekalaa ũtee wa mbisũ sya nyama, yĩla twaĩsaa mũkate nginya tũkeanĩwa. Yu mũtũetie weũnĩ ũũ nĩ kana mũae ũmbano ũũ wʼonthe na yũa.”

4 Nĩvo ĩndĩ Yeova weeie Mose: “Yu nĩngũmuĩsya mũkate kuma ĩtunĩ, na kĩla ũmwe woo akaendaa nza akakolanyʼe mũkate ũla ũmwĩanĩe mũthenya kũthi ũla ũngĩ, nĩ kana nĩmatate none ethĩwa makaendaa mĩaonĩ yakwa kana maikaendaa. 5 Ĩndĩ mũthenyanĩ wa thanthatũ yĩla meũseũvya kĩla makolanilye, kyaĩle kwĩthĩwa kũndũ kwĩlĩ kwa kĩla makolanasya kĩla mũthenya.”

6 Kwoou Mose na Alũni meea Aisilaeli onthe: “Vate nzika, ĩ ya wĩoo nĩmũũmanya kana Yeova nĩwe wamumisye nthĩ ya Misili. 7 Kwakya mũkoona ũtheu mũtisu wa Yeova, nũndũ Yeova nĩwĩwʼĩte mũimũnyungunyĩĩsya. Ithyĩ twĩ aaũ nĩ kana mũtũnyungunyĩĩsye?” 8 Na Mose aendeea kwasya: “Yĩla Yeova ũkũmũnenga nyama ĩ ya wĩoo na kwakya aimũnenga mũkate mũye mwĩanĩwe, nĩmũkwona kana Yeova nĩwĩwʼĩte kũnyungunyĩsya kwenyu kũla mũmũnyungunyĩasya. Ĩndĩ ithyĩ twĩ aaũ? Ti ithyĩ mũnyungunyĩasya, ĩndĩ nĩ Yeova.”

9 Nĩvo ĩndĩ Mose weeie Alũni: “Tavya ũmbano wʼonthe wa Aisilaeli, ‘Thengeeai mbee wa Yeova, nũndũ nĩwĩwʼĩte kũnyungunyĩsya kwenyu.’” 10 Alũni amina kũneena na ũmbano wʼonthe wa Aisilaeli oou, nĩmavĩndũkie masisya weũnĩ, na sisya! ũtheu mũtisu wa Yeova waumĩla yĩla ĩtunĩ.

11 Yeova aendeeie kũneena na Mose, akyasya: 12 “Nĩnĩwʼĩte kũnyungunyĩsya kwa Aisilaeli. Matavye, ‘Ĩ ya wĩoo* nĩmũũya nyama, na kwakya mũkaya mũkate nginya mwĩanĩwe, na vate nzika, mũkamanya kana ninyie Yeova Ngai wenyu.’”

13 Kwoou ĩ ya wĩoo ngwae nĩsyookie na syavwʼĩka kambi, na kwakya ĩmwe yathyũlũlũkĩte kambi yonthe. 14 Yĩla ĩmwe yanyaie, kwaĩ na kĩndũ kĩilye tũkili tũvalũkangĩte nthĩ, tũilye ta tũlungu tũtheke twa ĩa. 15 Yĩla Aisilaeli makyonie, mambĩĩie kũkũlanyʼa, “Kĩĩ nĩ kyaũ?” nũndũ mayeesĩ nĩ kyaũ. Mose ameie atĩĩ: “Nĩ mũkate ũla Yeova ũmũnengete wĩthĩwe lĩu wenyu. 16 Ũũ nĩwʼo Yeova wĩyĩaĩte, ‘Kĩla ũmwe aĩlĩte kũkolanyʼa kwosana na kĩla ũtonya kũya. Mwaĩlĩte kwosa kĩthimo kĩmwe kya omeli* kwondũ wa kĩla mũndũ kwosana na ũtalo wa andũ* ala kĩla ũmwe wenyu wĩ namo ĩeemanĩ yake.’” 17 Na Aisilaeli mambĩĩa kwĩka ũu; nĩmaũkolanilye; amwe makolanasya mwingĩ na angĩ makolanasya mũnini. 18 Yĩla mathima na omeli, weethĩaa ũla eĩkolanĩtye mwingĩ nde na kĩndũ kĩũtiala na ũla eĩkolanĩtye mũnini ndananyivĩwa. Kĩla ũmwe woo akolanasya kwosana na kĩla ũtonya kũya.

19 Na ĩndĩ Mose amea: “Vai mũndũ waĩlĩte kũtialya mũkate ũsu nginya kwakya.” 20 Ĩndĩ mayaaĩthukĩĩsya Mose. Yĩla andũ amwe matialilye mũkate ũmwe nginya kwakya, nĩwameisye iinyũ na wambĩĩa kũnyunga, na Mose amathatĩa mũno. 21 Maũkolanasya kĩla kwakya, kĩla ũmwe kwosana na kĩla ũtonya kũya. Yĩla sua yavyũva, nĩwatwekaa.

22 Mũthenya wa thanthatũ, makolanilye mũkate wa mĩthenya ĩlĩ, ithimo ilĩ sya omeli kwondũ wa kĩla mũndũ. Kwoou anene onthe ma ũmbano mooka na matavya Mose ũndũ ũsu. 23 Nake Mose eewʼa ũu amea: “Ũu nĩwʼo Yeova waĩtye. Ũnĩ ũkeethĩwa mũthenya wa kũthũmũa vyũ,* savato ntheu kwondũ wa Yeova. Uai kĩla mwaĩle kũua, na mũitheũkya kĩla mwaĩle kũtheũkya; na ĩndĩ mũyia kĩla kĩũtiala nginya kwakya.” 24 Kwoou makia nginya kwakya, o tondũ Mose wameaĩe, na kĩyaanyunga kana kĩkethĩwa na iinyũ. 25 Na ĩndĩ Mose amea: “Ũmũnthĩ yai kĩla mũnatialilye, nũndũ ũmũnthĩ nĩ savato kwondũ wa Yeova. Ũmũnthĩ mwathi kũkolanyʼa vai kĩndũ mwĩĩthĩa. 26 Mũkakolanasya mĩkate mĩthenya thanthatũ, ĩndĩ mũthenyanĩ wa mũonza, ũla nĩ Savato, vaikethĩawa kĩndũ.” 27 O na ũu wĩ o vo, andũ amwe nĩmaendie kũũkolanyʼa mũthenya wa mũonza ĩndĩ mayaaĩthĩa kĩndũ.

28 Kwoou Yeova eea Mose: “Mwĩendeea kũlea kwĩka kĩla ngũmũtavya na kũema kũatĩĩa mĩao yakwa nginya ĩndĩĩ? 29 Lilikanai kana Yeova nũmũnengete Savato. Na nĩkyo kĩtumi ũmũnengete mũkate wa mĩthenya ĩlĩ mũthenyanĩ wa thanthatũ. No nginya kĩla mũndũ ekale vala ũĩ; vai mũndũ waĩlĩte kuma kwake mũthenya wa mũonza.” 30 Kwoou andũ makwata Savato* mũthenyanĩ wa mũonza.

31 Andũ ma Isilaeli meetie mũkate ũsu “mana.”* Waĩ mweũ ta ngii sya ndania na wasamaa ta mũkate ũseũvĩtwʼe na ũkĩ wa nzũkĩ. 32 Na ĩndĩ Mose asya: “Ũũ nĩwʼo Yeova wĩyĩaĩte, ‘Usũsyai kĩthimo kĩmwe kya omeli na mũkate ũsu kĩthĩwe kĩndũ kya kwiwa nzyawanĩ syenyu syonthe, nĩ kana monae mũkate ũla namũnengie mũye mwĩ weũnĩ yĩla namumĩtye nthĩ ya Misili.’” 33 Kwoou Mose eea Alũni: “Osa kavisũ na ũikekĩa omeli ĩmwe ya mana na ũyia mbee wa Yeova yĩthĩwe kĩndũ kya kwiwa nzyawanĩ syenyu syonthe.” 34 O tondũ Yeova weeaĩe Mose, Alũni nĩwamiie mbee wa Ũkũsĩ nĩ kana ĩsũvĩwe. 35 Aisilaeli maĩe mana myaka 40, nginya mavika nthĩ ĩla yatwĩwe. Maĩe mana nginya mavika mũvakanĩ wa nthĩ ya Kanaanĩ. 36 Yu omeli ĩmwe nĩ kĩlungu kya ĩkũmi kya kĩthimo kya eva.*

17 Na ũmbano w’onthe wa Isilaeli wauma weũnĩ wa Sini, waumaa vandũ vamwe kũthi vala vangĩ ũatĩĩe mwĩao wa Yeova, na wamba maeema Levitimu. Ĩndĩ vayaĩ na kĩw’ũ andũ matonya kũnywʼa.

2 Kwoou andũ mambĩĩa kũtetanyʼa na Mose maimwĩa: “Tũnenge kĩw’ũ tũnywʼe.” Ĩndĩ Mose amea atĩĩ: “Nĩkĩ mũũtetanyʼa nakwa? Nĩkĩ mũendeee kũmũtata Yeova?” 3 Ĩndĩ andũ maĩ na waũni mwingĩ mũno me kũu, na maendeea kũmũnyungunyĩĩsya Mose maimwĩa: “Nĩkĩ watumisye Misili nĩ kana ũtũae vamwe na ana maitũ na indo sitũ na waũni?” 4 Mũthya Mose amũĩĩie Yeova aimwĩa: “Nĩĩkana ata na andũ aa? Vatiele o vanini mangimange na mavia!”

5 Nĩvo ĩndĩ Yeova weeie Mose: “Enda mbee wa andũ, na ũiendanyʼa na atumĩa amwe ma Isilaeli na ũyosa ndata yaku ĩla wakũnie Ũsĩ wa Nile nayo. Myose na ũithi. 6 Sisya! Ngeethĩwa nĩũngamĩte mbee waku ĩvianĩ yĩla yĩ Olevu. No nginya wĩkũna ĩvia yĩu, na kĩw’ũ kĩkauma, na andũ maikĩnywʼa.” Na Mose eeka oou mbee wa atumĩa ma Isilaeli. 7 Kwoou meeta vandũ vau Masa* na Meliva* nũndũ wa ĩteta ya Aisilaeli na nũndũ nĩmamũtatie Yeova mayasya: “We Yeova e katĩ witũ kana nde vo?”

8 Na Aamaleki mooka na mavithũkĩa Aisilaeli kũu Levitimu. 9 Nĩvo ĩndĩ Mose weeie Yosua atĩĩ: “Nyuva aũme kwondũ witũ na mũithi mũkokite na Aamaleki. Ũnĩ ngaũngama kĩĩmanĩ ĩũlũ, ngwete ndata ya Ngai ũla wa w’o.” 10 Nĩvo ĩndĩ Yosua weekie o tondũ Mose wamwĩie, na okita Aamaleki. Na Mose, Alũni, na Uulu maũngama kĩĩmanĩ.

11 Ĩndĩ ĩvinda yonthe yĩla Mose weethĩawa okĩlĩtye moko make, Aisilaeli nĩmasindaa, ĩndĩ amatheesya oou, Aamaleki nĩmo masindaa. 12 Na yĩla moko ma Mose maitavie, nĩmoosie ĩvia maia ungu wake, na ayĩkalĩla. Na ĩndĩ Alũni na Uulu, maũngama kĩla ũmwe ũtee wake, na matwʼĩĩka moko make, na kĩu kyatuma moko make mekala me malũmu nginya sua yathũa. 13 Kwoou Yosua nĩwasindie Amaleki vamwe na andũ make na ũvyũ.

14 Nĩvo ĩndĩ Yeova weeie Mose: “Andĩka ũndũ ũũ ĩvukunĩ wĩthĩwe ũlilikanyʼo na ũiũsyokeleela vala ve Yosua ũimwĩa, ‘Ngatuta vyũ ũlilikano wa Aamaleki kuma ungu wa matu.’” 15 Na Mose aaka kĩthembeo na akĩta Yeova-nisi,* 16 na asya: “Yeova akeethĩawa na kaũ na Amaleki kuma nzyawa kũthi ĩla ĩngĩ, nũndũ kwʼoko kwake nĩkũkitaa kĩvĩla kya ũsumbĩ kya Yeova.”

18 Yu Yethilo, mũthembi wa Mitiani, mũthoni wa Mose, nĩweewie maũndũ onthe ala Ngai weekĩte kwondũ wa Mose na kwondũ wa andũ make Aisilaeli, ũndũ Yeova waumĩtye Aisilaeli Misili. 2 Yethilo, mũthoni wa Mose, ekalaa na Nzivola, mũka wa Mose, ĩtina wa Mose kũmwĩa asyoke mũsyĩ, 3 vamwe na ana make elĩ. Mwana wake ũmwe eetawa Ngelisomu,* nũndũ Mose aisye, “Nĩnĩtwʼĩkĩte mwĩkali wa ũeninĩ nthĩ ngeni,” 4 na ũla ũngĩ eetawa Elieseli,* nũndũ aisye, “Ngai wa ĩthe wakwa nĩ mũtetheesya wakwa, ũla wambovoisye kuma ũvyũnĩ wa Valao.”

5 Kwoou Yethilo, mũthoni wa Mose, vamwe na ana ma Mose, na mũka wake mooka kũla kwĩ Mose weũnĩ vala wambĩte maeema vakuvĩ na kĩĩma kya Ngai ũla wa wʼo. 6 Na ĩndĩ atũmana Mose atavw’e atĩĩ: “Nyie, mũthoni waku Yethilo, nĩnũkĩte kũla ũĩ vamwe na kĩveti kyaku na ana maku elĩ.” 7 Vau kwa vau Mose nĩwaendie kũthaũa mũthoni wake, na akumana na amũmumunya. Kĩla ũmwe nĩwakũlilye ũla ũngĩ ũndũ waendeee, na ĩndĩ malika ĩeemanĩ.

8 Mose nĩwaeleisye mũthoni wake maũndũ onthe ala Yeova weekie Valao na Misili nĩ kana atetheesye Aisilaeli, mawetu onthe ala mamakwatĩte me nzĩanĩ, na ũndũ Yeova wamovoetye. 9 Yethilo nĩwatanie nũndũ wa ũseo wʼonthe ũla Yeova weekĩte kwondũ wa Aisilaeli kwa kũmavonokya kuma Misili.* 10 Na ĩndĩ Yethilo asya: “Nataĩwe Yeova, ũla wamwovoisye kuma Misili na kuma kwa Valao, na ũla woovoisye andũ kuma mokonĩ ma Amisili. 11 Yu nĩnĩsĩ kana Yeova nĩ mũnene kwĩ ngai ila ingĩ syonthe, nũndũ nĩwasũvĩanie andũ make na Amisili ala maĩ na mĩyimbyo na maĩ angʼendu.” 12 Na ĩndĩ Yethilo, mũthoni wa Mose, aetee Ngai nthembo sya kũvĩvwʼa na nthembo ingĩ, na Alũni na atumĩa onthe ma Isilaeli mooka kũĩsanĩa na mũthoni wa Mose mbee wa Ngai ũla wa wʼo.

13 Mũthenya ũla waatĩĩe, Mose nĩwekalile nthĩ o tondũ weekaa nĩ kana asilanyʼe andũ, na andũ maendeea kũũngama mbee wake kuma kwakya nginya ĩ ya wĩoo. 14 Yĩla mũthoni wa Mose woonie kyonthe kĩla weekaa kwondũ wa andũ, amũkũlilye: “Ũũ nĩ ũndũ mwaũ ũkwĩka kwondũ wa andũ? Nĩkĩ wĩkalaa vaa na andũ aa onthe wĩ weka, maũngye mbee waku kuma kwakya nginya ĩ ya wĩoo?” 15 Mose eeie mũthoni wake atĩĩ: “Nũndũ andũ aa matindaa kũka vala nĩĩ nĩ kana mangũlye ũtao wa Ngai. 16 Yĩla ĩkoani yaumĩla, yĩetawe vala nĩĩ na no nginya nĩsilanyʼe mũndũ na ũla ũngĩ, na nĩnĩmamanyĩthasya motwi ma Ngai ũla wa wʼo na mĩao yake.”

17 Nĩvo ĩndĩ mũthoni wa Mose wamwĩie: “Ũndũ ũũ ũkwĩka ti mũseo. 18 Vate nzika, nũũnoa, we na andũ aa me vamwe naku, nũndũ ũũ nĩ mũio mũito mũno kwaku na ndũtonya kũũkua wĩ weka. 19 Yu mbĩthukĩĩsye. Nĩngũũnenga ũtao, na Ngai nũkwĩthĩwa vamwe naku. Ũkaneenaa na Ngai ũla wa wʼo kwondũ wa andũ, na no nginya ũeteae Ngai ũla wa wʼo makoani. 20 Nĩwaĩle kũmamanyĩsya ĩũlũ wa myolooto na mĩao na ũimamanyĩthya nzĩa ĩla maĩlĩte kũthi nayo na wĩa ũla maĩle kũtethya. 21 Ĩndĩ waĩlĩte kũnyuva kuma andũnĩ, aũme mamũkĩaa Ngai ma kũĩkĩĩka, mamenete kwĩyĩuna na nzĩa itaĩlĩte, na ũimatwʼĩkĩthya anene ĩũlũ wa makili, anene ĩũlũ wa maana, anene ĩũlũ wa mĩongo ĩtano, na anene ĩũlũ wa makũmi. 22 Maĩle kũsilanasya andũ yĩla kweethĩwa na makoani,* na makakũeteae makoani onthe ala me vinya, ĩndĩ makoani onthe ala manini makatusaa. Mwa eka maũtetheesye nĩ kana mũio ũũ ũikakũitavĩe mũno. 23 Weeka ũu, ethĩwa nĩwʼo Ngai ũkwĩaĩe, ũkeethĩwa ũtonya kũmĩanĩsya na mũio ũsu, na kĩla mũndũ akenũkaa e mwĩanĩe.”

24 Vau kwa vau Mose nĩwamwĩthukĩĩsye mũthoni wake na eeka kyonthe kĩla wamũtavisye. 25 Mose nĩwanyuvie kuma Isilaeli yonthe aũme me na ũtonyi wa kũsila na amatwʼĩkĩthya anene ĩũlũ wa andũ, methĩwe anene ma makili, anene ma maana, anene ma mĩongo ĩtano, na anene ma makũmi. 26 Kwoou nĩmasilanasya andũ yĩla makoani maumĩla. Ĩkoani yĩla yĩ vinya maeteae Mose, ĩndĩ makoani onthe ala manini nĩmo masilaa. 27 Ĩtina wa ũu, Mose nĩwaumaaisye mũthoni wake, nake asyoka nthĩ yake.

19 Mweinĩ wa katatũ Aisilaeli mauma nthĩ ya Misili, nĩmavikie weũnĩ wa Sinaĩ. 2 Ĩĩ, o mũthenyanĩ ũsu maumie Levitimu, nĩmavikie weũnĩ wa Sinaĩ na mamba maeema weũnĩ ũsu. Aisilaeli nĩmambie maeema vau mbee wa kĩĩma.

3 Na ĩndĩ Mose ambata vala ve Ngai ũla wa w’o, na Yeova amwĩta kuma kĩĩmanĩ, aimwĩa: “Ũũ nĩwʼo ũũtavya nyũmba ya Yakovo na ũitavya Aisilaeli, 4 ‘Nĩmwĩyoneete kĩla neekie Amisili, nĩ kana nĩmũkue nthwaunĩ sya ndiũ na ndimũete kũla nĩĩ. 5 Yu ethĩwa mũkeethukĩĩasya wasya wakwa vyũ na kũlũmanasya na ũtianĩo wakwa, vate nzika mũkatwʼĩka malĩ yakwa ya mwanya* kuma ngonĩ syonthe sya andũ, nũndũ nthĩ yonthe nĩ yakwa. 6 Mũkatwʼĩka kwakwa ũsumbĩ wa athembi na mbaĩ ntheu.’ Ndeto ii nĩsyo wĩtavya Aisilaeli.”

7 Kwoou Mose nĩwaendie na eeta atumĩa ma Isilaeli na amatavya ndeto ii syonthe ila Yeova wamwĩaĩe. 8 Ĩtina wa ũu, andũ onthe masũngĩa vamwe masya: “Kyonthe kĩla Yeova waneena, nĩtwĩyũmbanĩtye kũkĩka.” Vau kwa vau Mose nĩwatwaĩe Yeova ũsũngĩo wa andũ. 9 Na Yeova eea Mose atĩĩ: “Sisya! Nĩngũka kũla ũĩ nĩ ĩtunĩ ĩtuku nĩ kana andũ mewʼe ndineena naku na nĩ kana kĩla ĩvinda makũĩkĩĩae o naku.” Na ĩndĩ Mose atavya Yeova ndeto sya andũ.

10 Nĩvo ĩndĩ Yeova weeie Mose: “Enda kũla kwĩ andũ na ũimathesya ũmũnthĩ na ũnĩ, na no nginya mavũe ngũa syoo. 11 Na no nginya methĩwe meyũmbanĩsye mũthenya wa katatũ, nũndũ mũthenya wa katatũ Yeova akatheea Kĩĩmanĩ kya Sinaĩ andũ onthe mene. 12 No nginya wĩkĩĩe andũ mĩvaka ĩkĩthyũlũlũkĩte na ũimatavya, ‘Ĩsũvĩei mũikambate kĩĩmanĩ kana kũkwata mĩvaka yakyo. Mũndũ o na wĩva ũla ũkakwata kĩĩma vate ndĩi akooawa. 13 Vai kwʼoko kwaĩle kũmũkiita ĩndĩ akakimangwa na mavia kana aathwe.* Yĩthĩwe nĩ nyamũ kana mũndũ, ndakekala thayũ.’ Ĩndĩ mweewʼa wasya wa ũvya wa ndũũme no mwambate kĩĩmanĩ.”

14 Na ĩndĩ Mose atheea kuma kĩĩmanĩ athi vala ve andũ, na ambĩĩa kũmathesya, namo mavũa ngũa syoo. 15 Na eea andũ atĩĩ: “Ĩyũmbanĩsyei mũthenya wa katatũ. Mũikamanyane kĩ-mwĩĩ.”*

16 Na mũthenya wa katatũ kwakya, kwaĩ na kĩtundumo na ũtisi, na kwaĩ na ĩtu ĩkamu kĩĩmanĩ na wasya mũnene mũno wa ũvya, na andũ onthe kambinĩ mambĩĩa kũtetema. 17 Nĩvo ĩndĩ Mose waumaalũkilye andũ kambinĩ nĩ kana makomane na Ngai ũla wa wʼo, na maũngama vala maaĩle kũũngama nthĩ wa kĩĩma. 18 Kĩĩma kya Sinaĩ kyatoete kĩla vandũ, nũndũ Yeova nĩwatheeie ĩũlũ wakyo e mwakinĩ; na syũki yakyo yambatĩte ta syũki ya iko, na kĩĩma kyonthe kyatetemete mũno. 19 Na yĩla wasya wa ũvya waendeeie kwongeleka mũno, Mose nĩwaneenie, na wasya wa Ngai ũla wa wʼo wamũsũngĩa.

20 Kwoou Yeova atheea ĩũlũ wa Kĩĩma kya Sinaĩ. Na ĩndĩ Yeova eeta Mose athi kĩĩmanĩ ĩũlũ, nake Mose ambata. 21 Nĩvo ĩndĩ Yeova weeie Mose: “Theea ũkakanyʼe andũ maikatate kũkĩla mĩvaka moke kũsisya Yeova, nũndũ meeka ũu aingĩ moo nĩmeũkwʼa. 22 Na eka athembi ala mamũthengeeaa Yeova kĩla ĩvinda methesye, nĩ kana Yeova ndakese kũmakũna.” 23 Nake Mose eea Yeova atĩĩ: “Andũ maitonya kwambata Kĩĩmanĩ kya Sinaĩ nũndũ we nũnatũkanĩtye, ũkasya, ‘Ĩkĩa mĩvaka kũthyũlũlũka kĩĩma, na ũikĩthesya.’” 24 Ĩndĩ o na ũu wĩ o vo, Yeova amwĩa atĩĩ: “Enda, theea, na ũyambata ĩngĩ, we na Alũni, ĩndĩ ndũketĩkĩlye athembi na andũ makĩle mĩvaka mambate kũla kwĩ Yeova, nĩ kana ndakese kũmakũna.” 25 Kwoou Mose nĩwatheeie kũla kwĩ andũ na amatavya ũu.

20 Nĩvo ĩndĩ Ngai waneenie ndeto ii syonthe:

2 “Ninyie Yeova Ngai waku, ũla wakumisye nthĩ ya Misili, kuma nyũmbanĩ ya ũkombo. 3 Ndũkethĩwe na ngai ingĩ ate o nyie.*

4 “Ndũkeseũvĩsye mũvwʼanano mwasũvye kana mũvwʼano wa* kĩndũ o na kĩva kĩ ĩtunĩ kana ĩũlũ wa nthĩ kana kĩ kĩw’ũnĩ ungu wa nthĩ. 5 Ndũkamĩkumanĩe kana ũtatĩke ũmĩthũkũme, nũndũ nyie, Yeova Ngai waku, nĩ Ngai wendaa kũthaithwa e weka, woseaa ĩtambya syana nũndũ wa mavĩtyo ma aa-ĩthe masyo, kũvika nzyawa ya katatũ na kũvika nzyawa ya kana ya ala mamenaa, 6 ĩndĩ nĩnonasya wendo ũtathelaa nzyawa ngili sya ala mambendete na makwataa mĩao yakwa.

7 “Ndũkatũmĩe ĩsyĩtwa ya Yeova Ngai waku kwa nzĩa ĩtaĩle, nũndũ Yeova ndakaema kũmwosea ĩtambya ũla ũtũmĩaa ĩsyĩtwa yake kwa nzĩa ĩtaĩle.

8 “Lilikanaa mũthenya wa Savato nĩ kana ũwĩkalye wĩ mũtheu. 9 Ũkathũkũmaa na ũitethya wĩa waku w’onthe mĩthenya thanthatũ, 10 ĩndĩ mũthenya wa mũonza nĩ savato kwondũ wa Yeova Ngai waku. Ndũkatethye wĩa o na ũmwe, we kana mwana waku kana mwĩĩtu waku kana mũndũũme waku ngombo kana mwĩĩtu waku ngombo kana indo syaku kana mwĩkali wa ũeninĩ ũla wĩkalaa kwaku.* 11 Nũndũ mĩthenya thanthatũ Yeova nĩwoombie ĩtu na nthĩ, ũkanga, na kyonthe kĩla kĩ nthĩnĩ wasyo, na ambĩĩa kũthũmũa mũthenyanĩ wa mũonza. Nĩkyo kĩtumi Yeova waathimie mũthenya wa Savato na atuma wĩthĩwa wĩ mũtheu.

12 “Nenga ĩthe waku na inyia waku ndaĩa, nĩ kana wĩkale thayũ ĩvinda yĩasa nthĩ ĩla Yeova Ngai waku ũkũũnenga.

13 “Ndũkoae.

14 “Ndũkeke ũlaalai.

15 “Ndũkoye.

16 “Ndũkaumye ũkũsĩ wa ũvũngũ ĩũlũ wa mũndũ ũngĩ.

17 “Ndũkewʼĩe nyũmba ya mũndũ ũngĩ ĩtomo. Ndũkewʼĩe kĩveti kya mũndũ ũngĩ ĩtomo kana mũndũũme wake ngombo kana mwĩĩtu wake ngombo kana nzaũ yake kana ĩng’oi yake kana kĩndũ o na kĩva kya mũndũ ũngĩ.”

18 Yu andũ onthe nĩmeew’aa itundumo na wasya wa ũvya, na nĩmoonaa ũtisi na kĩĩma kĩtoete. Yĩla andũ moonie na meew’a maũndũ asu nĩmatetemie na maũngama vaasa. 19 Kwoou meea Mose atĩĩ: “Neena naitũ ne uwe, naitũ nĩtũkwĩthukĩĩsya, ĩndĩ ndũkaeke Ngai aneene naitũ, nũndũ nĩtũũkĩa kũkw’a.” 20 Kwoou Mose eea andũ atĩĩ: “Mũikakĩe, nũndũ Ngai ũla wa w’o nĩwooka kũmũtata, mũendeee kũmũkĩa nĩ kana mũikeke naĩ.” 21 Kwoou andũ maendeea kũũngama vaasa, ĩndĩ Mose aendeea kũthengeea yĩla ĩtu ĩtuku vala Ngai ũla wa wʼo waĩ.

22 Na ĩndĩ Yeova eea Mose: “Ũũ nĩwʼo ũũtavya Aisilaeli, ‘Nĩmweeyonea inywʼĩ ene kana naneena nenyu kuma ĩtunĩ. 23 Mũikeseũvĩsye ngai sya vetha mũithaithae vamwe nakwa, na mũikeseũvĩsye ngai sya thaavu. 24 Mũkambakĩa kĩthembeo kya mũthanga, na mũinthembea vo nthembo syenyu sya kũvĩvw’a, nthembo syenyu sya ngwatanĩo,* malondu, mbũi, na ng’ombe syenyu. Vandũ o na va vala ngatuma ĩsyĩtwa yakwa yĩlilikanwa ngooka vala mũĩ na ngĩmũathima. 25 Ethĩwa nĩmwambakĩa kĩthembeo kya mavia, mũikakyake mũtũmĩĩte mavia matile na mĩio ya wĩa.* Nũndũ mwakĩseũvya na ngesa, mũkakĩvukya. 26 Mũikatũmĩe ngasi kwambata kĩthembeonĩ kyakwa, nĩ kana mamutha menyu ma kĩmbithĩ maikoneke* ĩũlũ wakyo.ʼ

21 “Aa nĩmo motw’ĩo ala ũũmatavya:

2 “Wathooa Mũevelania ethĩwe ngombo yaku, akaũthũkũma myaka thanthatũ e ngombo, ĩndĩ mwaka wa mũonza, akathawʼa ate kũĩva kĩndũ. 3 Ethĩwa ookie e weka, akathi e weka. Ethĩwa nũtwaanĩte, no nginya athi na kĩveti kyake. 4 Ethĩwa vwana wake nĩwamũnenga kĩveti na kyamũsyaĩa ana kana eĩtu, kĩveti kĩu na syana syakyo ikeethĩwa sya vwana wakyo, na ngombo ĩsu ĩkathi yĩ yoka. 5 Ĩndĩ ethĩwa ngombo ĩsu ĩkaendeea kwasya, ‘Nĩnendete vwana wakwa, kĩveti kyakwa, na ana makwa; ndienda kũthawʼa,’ 6 no nginya vwana wayo amĩete mbee wa Ngai ũla wa w’o. Na ĩndĩ akamyaĩĩsya mũomonĩ kana mũtĩnĩ ũla wĩ ũtee wa mũomo, na vwana wayo aitonya kũtũ kwayo na mũkuva, na ĩkeethĩwa ngombo yake thayũ wayo wʼonthe.

7 “Ethĩwa mũndũũme akathoosya mwĩĩtu wake ta ngombo, ndakathawʼa ũndũ ũmwe na mũndũũme ngombo. 8 Ethĩwa vwana wake ndanendeewʼa nĩwe na ndanamũtwʼĩkĩthya kĩveti kyake kya ndũsyo* ĩndĩ atuma athoowa nĩ mũndũ ũngĩ,* ndakethĩwa atonya kũmũthooesya aeni, nũndũ ndanaatĩĩa ũsili wa katĩ. 9 Ethĩwa akamũnengane kũla kwĩ mwanae atwʼĩke kĩveti kyake, aĩlĩte kũmũkua ta mwĩĩtu wake. 10 Ethĩwa nĩweeyosea kĩveti kĩngĩ, ndaĩlĩte kũolanga ũndũ ũnanengae kĩveti kĩla kya mbee lĩu, ngũa, na kĩla kĩkyaĩle.* 11 Ethĩwa ndakamwĩanĩĩsya maũndũ asu atatũ, mũndũ mũka ũsu ngombo akathawʼa ate kũĩva mbesa o na imwe.

12 “Mũndũ o na wĩva ũla wakũna mũndũ amũaa no nginya oawe. 13 Ĩndĩ ethĩwa eeka ũu ate kwenda na Ngai ũla wa w’o eetĩkĩlya ũndũ ũsu wĩkĩke, ngamũnyuvĩa vandũ ũtonya kũkĩĩa. 14 Ethĩwa mũndũ akathatĩa ũngĩ vyũ na aimũaa na ngenda, no nginya mũndũ ũsu oawe o na ethĩwa mwĩmwosa kĩthembeonĩ kyakwa. 15 Ũla wakũna ĩthe wake kana inyia wake no nginya oawe.

16 “Ethĩwa mũndũ o na wĩva nĩwooya mũndũ ũngĩ na amũthoosya kana eethĩwa amũsiĩĩe, no nginya oawe.

17 “Mũndũ o na wĩva ũla waumanĩa* ĩthe wake kana inyia wake no nginya oawe.

18 “Ũũ nĩwʼo kwaĩle kwĩthĩwa ethĩwa aũme nĩmatetanyʼa na ũmwe akũna ũla ũngĩ na ĩvia kana ngundi* na aema kũkwʼa ĩndĩ weethĩa ndatonya kuma kĩtandanĩ: 19 Ethĩwa nũtonya kũkĩla na aitembeanga kũu nza atũmĩĩte ndata, ũla ũnamũkũnie ndaĩlĩte kwosewa ĩtambya. Aĩlĩte o kũĩva ĩvinda yĩla ũsu mũũmĩu ũnaaisye wĩanĩ wake nginya yĩla ũkavoa vyũ.

20 “Ethĩwa mũndũ nĩwakũna mũndũũme wake ngombo kana mwĩĩtu wake ngombo na mũtĩ akwʼa, no nginya ngombo ĩsu yĩĩvanĩwʼe. 21 Ĩndĩ o na ũu wĩ o vo, ethĩwa ngombo ĩsu nĩyaendeea kwĩkala thayũ mũthenya ũmwe kana mĩthenya ĩlĩ na ĩndĩ ĩikwʼa, ndyaĩlĩte kũĩvanĩwʼa, nũndũ ĩnathooetwe na mbesa sya vwana wayo.

22 “Ethĩwa aũme nĩmokita na maũmĩsya kĩveti kĩito na kyasyaa ĩvinda yakyo yĩte ĩviku* ĩndĩ kyo na kana kakyo mainakwʼa,* no nginya ũla wakĩũmĩsya aĩve kĩla ũkwĩtwʼa nĩ mũũme wa kĩveti kĩu; na no nginya akĩĩve kwĩsĩla asili. 23 Ĩndĩ ethĩwa ũmwe woo nĩwakwʼa, no nginya mũĩve thayũ kwa thayũ, 24 itho kwa itho, ĩeo kwa ĩeo, kwʼoko kwa kwʼoko, kũũ kwa kũũ, 25 ĩvya kwa ĩvya, kĩtau kwa kĩtau, ĩkũna kwa ĩkũna.

26 “Ethĩwa mũndũ nĩwakũna itho ya mũndũũme wake ngombo kana itho ya mwĩĩtu wake ngombo ayananga, aĩlĩte kũthasya ngombo ĩsu ĩthi ĩte kũĩva kĩndũ nĩ kana aĩvĩe itho yayo. 27 Na ethĩwa nĩwakũna ĩeo ya mũndũũme wake ngombo kana ya mwĩĩtu wake ngombo yakũka, aĩlĩte kũthasya ngombo ĩsu ĩthi ĩte kũĩva kĩndũ nĩ kana aĩvĩe ĩeo yayo.

28 “Ethĩwa nzaũ nĩyakima mũndũũme kana mũndũ mũka na akwʼa, no nginya nzaũ ĩsu ĩkimangwe na mavia nginya ĩkwʼe na nyama yayo ĩyaĩlĩte kũĩwa; ĩndĩ mwene nzaũ ĩsu ndaĩlĩte kwosewa ĩtambya. 29 Ĩndĩ ethĩwa nzaũ yĩthĩĩtwe ĩikima andũ na mwene nĩwakaniwʼe ĩndĩ aema kũmĩsiĩĩa na yooaa mũndũũme kana mũndũ mũka, nzaũ ĩsu yaĩlĩte kũkimangwa na mavia na mwene ayũawa o nake. 30 Ethĩwa nĩwatwʼĩĩwa kũĩva wovosyo,* no nginya anengane kyonthe kĩla watwʼĩĩwa ta ndĩvi ya kwovosya thayũ wake. 31 Yĩthĩwe ĩnakimie mwanake kana mwĩĩtu, mwene wa nzaũ ĩsu aĩle kwĩkwa kwosana na ũtwʼĩo ũũ. 32 Ethĩwa nzaũ ĩsu ĩnakimie mũndũũme ngombo kana mwĩĩtu ngombo, mwene aĩlĩte kũnenga vwana wa ngombo ĩsu ndĩvi ya sekeli 30* na nzaũ ĩsu ĩikimangwa na mavia nginya ĩkwʼe.

33 “Ethĩwa mũndũ nĩwakunũa kana nĩwenza ĩima na aema kũyĩkunĩka na nzaũ kana ĩngʼoi yĩivalũka vo, 34 mwene ĩima yĩu akaĩva. Akaĩva mwene nyamũ ĩsu, na nyamũ ĩla ngwʼũ ĩitwʼĩka yake. 35 Ethĩwa nzaũ ya mũndũ nĩyaũmĩsya nzaũ ya mũndũ ũngĩ na yakwʼa, ene no nginya mathoosye nzaũ ĩla yĩ thayũ na maiaana kĩla makwata mamĩthoosya; o na ĩngĩ, maĩlĩte kũaana nyamũ ĩla ngwʼũ. 36 Kana ethĩwa nĩvaneesĩkĩe nzaũ ĩsu nĩnakimanaa ĩndĩ mwene ndanamĩsiĩĩaa, no nginya aĩve nzaũ vandũ va nzaũ, na ĩla ngwʼũ ĩitwʼĩka yake.

22 “Ethĩwa mũndũ nĩwooya nzaũ kana ĩlondu na aithĩnza kana aithoosya, aĩlĩte kũĩva nzaũ itano kwondũ wa nzaũ ĩsu na malondu ana kwondũ wa ĩlondu yĩu.

2 (“Ethĩwa kĩng’ei nĩkyeethĩwa kĩitũla nyũmba na kyakũnwa kyakw’a, ũla wakyũaa nde na ĩvĩtyo ya kwĩtĩkya nthakame. 3 Ĩndĩ ethĩwa ũndũ ũsu weekĩka sua yumie, e na ĩvĩtyo ya kwĩtĩkya nthakame.)

“No nginya aĩve. Ethĩwa nde na kĩndũ, no nginya athoow’e nĩ kana aĩvĩe syĩndũ ila ũnooyie. 4 Ethĩwa eethĩwa na kĩla ũnooyie kĩ thayũ, yĩthĩwe nĩ nzaũ kana ĩngʼoi kana ĩlondu, aĩlĩte kũkĩĩvĩa kũndũ kwĩlĩ.

5 “Ethĩwa mũndũ eĩthya indo syake kĩsesinĩ kana mũũndanĩ wa mĩsavivũ na ayĩeka ithi ikaye mũũndanĩ wa mũndũ ũngĩ, aĩlĩte kũĩva na kĩla kĩseo kuma mũũndanĩ wake mwene kana kuma mũũndanĩ wake mwene wa mĩsavivũ.

6 “Ethĩwa mwaki nĩwakwata na wanyaĩĩka ikuthunĩ syĩ mĩw’a na watuma syove kana lĩu wa mbaa ngetha ũte mũkethe kana mũũnda ũvya, ũla wakwatya mwaki ũsu no nginya aĩve kĩla kyavya.

7 “Ethĩwa mũndũ nĩwanenga mũndũ ũngĩ mbesa kana syĩndũ amwiĩe nasyo iyũywa syĩ nyũmba kwa mũndũ ũsu ũngĩ, ethĩwa kĩng’ei nĩkyakwatwa, no nginya kĩĩve kũndũ kwĩlĩ. 8 Ethĩwa kĩng’ei kĩinakwatwa, mwene nyũmba ĩsu no nginya atwawe mbee wa Ngai ũla wa w’o nĩ kana vamanyĩke ethĩwa noĩthwa anoosie syĩndũ sya mũndũ ũsu ũngĩ. 9 Makoaninĩ onthe ala mũndũ weethĩwa na syĩndũ ite syake, yĩthĩwe nĩ nzaũ, ĩng’oi, ĩlondu, ngũa, kana kĩndũ o na kĩva kyaĩte kĩla ũtonya kwasya, ‘Kĩĩ nĩ kyakwa!’ andũ asu elĩ maĩle kũtwaa ĩkoani yoo mbee wa Ngai ũla wa w’o. Mũndũ ũla Ngai ũkwasya e na ĩvĩtyo aĩle kũĩva mũndũ ũsu ũngĩ kũndũ kwĩlĩ.

10 “Ethĩwa mũndũ nĩwanenga mũndũ ũngĩ ĩng’oi kana nzaũ kana ĩlondu kana nyamũ ĩngĩ ya mũsyĩ ekale nayo na ĩikw’a kana ĩyasya ĩmutha kana ĩyĩingwa vate mũndũ wene, 11 mũndũ ũla ũnanengetwe syĩndũ isu aĩle kwĩvĩta mbee wa Yeova, kana ndanaaosa syĩndũ sya mũndũ ũsu ũngĩ; na mwene no nginya etĩkĩle kĩla ũkũweta. Mũndũ ũsu ũngĩ ndaĩlĩte kũĩva. 12 Ĩndĩ ethĩwa nyamũ ĩsu yooywa yĩ ũsũvĩonĩ wake, aĩlĩte kũĩva mwene. 13 Ethĩwa ĩnatembũangiwe nĩ nyamũ ya kĩthekanĩ, aĩlĩte kũmĩete yĩthĩwe ũkũsĩ. Ndaĩlĩte kũĩva kĩndũ kĩnatembũangiwe nĩ nyamũ ya kĩthekanĩ.

14 “Ĩndĩ ethĩwa mũndũ o na wĩva nĩwavoya nyamũ kuma kwa mũndũ ũngĩ na ĩyasya ĩmutha kana ĩikw’a mwene ate nayo, mũndũ ũla ũnamĩvoyete no nginya aĩve. 15 Ethĩwa mwene e nayo, ndaĩlĩte kũĩva. Ethĩwa ĩnekĩte kũkombowa, mbesa ila inaĩviwe kũmĩkomboa nĩsyo ndĩvi.

16 “Yu ethĩwa mũndũ nĩwasesenga mwĩĩtu ũtesĩ mũndũũme na ũte mwĩvaasye na aikoma nake, no nginya aĩve ngasya nĩ kana atw’ĩke kĩveti kyake. 17 Ethĩwa ĩthe nĩwalea vyũ kũmũnenga mwĩĩtu wake, mũndũũme ũsu aĩlĩte kũĩva mbesa sianene na ngasya.

18 “Ndũketĩkĩlye mũndũ mũka mũoi ekale thayũ.

19 “Mũndũ o na wĩva ũla ũkomaa na nyamũ no nginya oawe.

20 “Mũndũ o na wĩva ũla ũkathembea ngai ingĩ eka Yeova e weka no nginya oawe.

21 “Mũikakue mwĩkali wa ũeninĩ naĩ kana mũmũthĩny’e, nũndũ inyw’ĩ mwaĩ ekali ma ũeninĩ nthĩ ya Misili.

22 “Mũikathĩnyʼe mũndũ mũka ndiwa kana mwana ũte ĩthe.* 23 Mwamũthĩnyʼa o na vanini, na ambĩĩa, vate nzika ngeew’a kĩĩo kyake; 24 na ũthatu wakwa ũkakana, na ngamũaa na ũvyũ, na iveti syenyu ikatw’ĩka ndiwa, na syana syenyu ikatiwa ite na aa-ĩthe.

25 “Ethĩwa nĩwakovethya mũndũ ngya* katĩ wa andũ makwa mbesa, mũndũ wĩkalaa naku, ndũkekale ta mũkovethya wa mbesa.* Ndũkamwĩtye ũsyao.

26 “Woosa ngũa ya mũndũ ũngĩ ĩũngamĩe* kĩla wamũkovethya, waĩlĩte kũmĩtũnga sua yĩtanathũa. 27 Nũndũ noyo ngũa ĩla wĩ nayo ya kwĩvw’ĩka, ya kũvw’ĩka mwĩĩ wake;* akoma akeevwʼĩka kyaũ? Ambĩĩa vate nzika ngamwĩthukĩĩsya nũndũ nyie nĩ ĩnee.*

28 “Ndũkaume* Ngai kana ũume mũnene* katĩ wa andũ maku.

29 “Ndũkethĩwe na kavola ka kumya nthembo kuma wingĩnĩ wa ũsyao waku na kuma wingĩnĩ wa iangĩo* syaku. Ũkanenga ĩkithathi ya* ana maku. 30 Ũũ nĩw’o waĩle kwĩkana na nzaũ yaku na ĩlondu yaku: Yaĩle kwĩkala na inyia mĩthenya mũonza. Mũthenyanĩ wa nyanya, waĩle kũnenga yo.

31 “Mwaĩlĩte kũĩkĩĩthya kana mwĩ andũ atheu kwakwa, na mũikaye nyama ya kĩndũ o na kĩva kĩ kĩthekanĩ kĩtembũangĩtwe nĩ nyamũ ya kĩthekanĩ. Mwaĩle kũmĩkĩsya ngitĩ.

23 “Ndũkanyaĩĩkye* ũvoo ũte wa wʼo. Ndũkakwatane na mũndũ mũthũku kwa kwĩthĩwa ngũsĩ ĩkwenda kũũmĩsya angĩ. 2 Ndũkaatĩanĩe na wingĩ wa andũ wĩke ũthũku, na ndũkelelũkye sila wa katĩ kwa kumya ũkũsĩ nĩ kana ũkwatĩanĩe na wingĩ wa andũ.* 3 Ndũkethĩwe na kyende ĩkoaninĩ ya mũndũ ngya.

4 “Ethĩwa nĩwakomana na nzaũ kana ĩngʼoi ya mũmaitha waku yaĩte, no nginya ũmũtũngĩe. 5 Ethĩwa nĩwoona ĩngʼoi ya mũndũ ũkũmenete yĩvalũkĩte nũndũ wa kũemeewa nĩ mĩio yayo mĩito, ndũketwʼe ndũnayona na ũithi. No nginya ũmũtetheesye kũvonokya nyamũ ĩsu.

6 “Ndũkelelũkye sila wa mũndũ ngya ũla wĩ katĩ wenyu ĩkoaninĩ yake.

7 “Ĩvathane vyũ na maũndũ ma ũvũngũ ma kũmũsikata mũndũ ũngĩ,* na ndũkoae mũndũ ũte na ĩvĩtyo na mũlũngalu, nũndũ ndikamũtala ũla mũthũku kwĩthĩwa e mũlũngalu.*

8 “Ndũketĩkĩle ĩvaki, nũndũ ĩvaki nĩyĩlindaa metho ma ala monaa nthĩ nesa na no yelelũkye ndeto sya ala alũngalu.

9 “Ndũkathĩnyʼe mwĩkali wa ũeninĩ. Nĩwĩsĩ ũndũ mũndũ wĩwʼaa e mũeni,* nũndũ mwaĩ ekali ma ũeninĩ nthĩ ya Misili.

10 “Waĩlĩte kũvanda mbeũ nthĩ yaku na ũyũmbanyʼa ũsyao wayo myaka thanthatũ. 11 Ĩndĩ mwaka wa mũonza waĩlĩte kũmĩtia ĩte nĩme na ũimĩeka ĩthũmũe, na ala ngya katĩ wa andũ maku makaya kĩla kĩ vo, na kĩla metialya, nyamũ sya kĩthekanĩ ikaya. Ũu nĩwʼo waĩle kwĩkana na mũũnda waku wa mĩsavivũ na mũũnda waku wa mĩthata.

12 “Ũkatethasya wĩa waku mĩthenya thanthatũ, ĩndĩ mũthenya wa mũonza waĩlĩte kũeka kũthũkũma, nĩ kana nzaũ yaku na ĩngʼoi yaku itonye kũthũmũa na mwana wa mwĩĩtu waku ngombo na mwĩkali wa ũeninĩ matonye kũthũmũa.

13 “No nginya wĩthĩawe wĩ metho wĩkae maũndũ onthe ala naũtavya, na ndũkawete masyĩtwa ma ngai ingĩ; mayaĩlĩte kwĩwʼĩka ilomonĩ syaku.*

14 “Mavinda atatũ kwa mwaka ũkeethĩawa na mboka kwondũ wakwa. 15 Ũkatanĩaa Mboka ya Mũkate ũte Ĩlawa. Ũkaĩsaa mũkate ũte ĩlawa mĩthenya mũonza, o tondũ nĩkwĩaĩe, ĩvindanĩ yĩla yĩnyuvĩtwe mweinĩ wa Avivu,* nũndũ ĩvinda yĩu nĩwaumie Misili. Vai mũndũ waĩlĩte kũka mbee wakwa moko mathei. 16 O na ĩngĩ, ũkatanĩaa Mboka ya Ngetha* ya ũsyao mwĩu wa mbee wa wĩa waku, wa kĩla ũũvanda mũũndanĩ; na Mboka ya Kũmbanyʼa* mũthyanĩ wa mwaka, yĩla ũkũmbanyʼa kuma mũũndanĩ ũsyao wa wĩa waku. 17 Mavinda atatũ kwa mwaka aũme maku onthe makookaa mbee wa Mwĩai ũla wa w’o, Yeova.

18 “Ndũkaumye nthakame ya nthembo yakwa vamwe na kĩndũ o na kĩva kĩkĩĩtwe ĩlawa. Na mathunya ma nthembo ala naumĩwʼa mbokanĩ syakwa mayaĩle kwĩkala ũtukũ wʼonthe nginya kwakya.

19 “Waĩlĩte kũete nyũmbanĩ ya Yeova Ngai waku ũsyao mwĩu wa mbee ũla mũseo vyũ wa nthĩ yaku.

“Ndũkatheũkĩsye katena ka mbũi ĩianĩ ya inyia wako.

20 “Nĩngũtũma mũlaĩka mbee wenyu amũsũvĩe nzĩanĩ na aimũete vandũ vala nzeũvĩtye. 21 Mwĩthukĩĩsyei nesa, na mũyĩwʼa wasya wake. Mũikaleane nake, nũndũ ndakamũekea mavĩtyo menyu, nĩkwĩthĩwa ĩsyĩtwa yakwa yĩ nthĩnĩ wake. 22 O na ũu wĩ o vo, mweethukĩĩsya wasya wake vyũ na mweeka kyonthe kĩla ngũmũtavya, ngeethĩwa mũmaitha wa amaitha menyu na ngavĩnga ala mamũvĩngaa. 23 Nũndũ mũlaĩka wakwa akathi mbee wenyu na akamũete nthĩ ya Aamoli, Aititi, Avelisi, Akanaanĩ, Aivi, na Ayevusi, na ngamamina. 24 Mũikakumanĩe ngai syoo kana mũsesengwe mũithaithe, na mũikaatĩĩe imanyĩo syoo. Vandũ va ũu, mwaĩlĩte kũsyananga vyũ na mũitumbanga ituĩ syoo sya ũthaithi. 25 No nginya mũthũkũme Yeova Ngai wenyu, na akaathima mũkate wenyu na kĩwʼũ kyenyu. Ngavetanga mowau katĩ wenyu. 26 Iveti sya nthĩ yenyu iikavuna kana kwĩthĩwa ngũngũ, na ngatuma mwĩkala ĩvinda yĩasa.*

27 “Ngatuma andũ mangĩa o na mũtavikĩte, na ngavũavũany’a andũ onthe o na mũtakomanĩte namo, na ngatuma amaitha menyu onthe masindwa na maisemba mamũkĩĩte.* 28 O na mũtambĩte kũvika, ngatuma andũ matũlĩka ngoo,* na kĩu kĩkatuma Aivi, Akanaanĩ, na Aititi masemba mamũkĩĩte. 29 Ndikamalũngya maume mbee wenyu mwakanĩ ũmwe, nĩ kana nthĩ ndĩkatiwe yĩ nthei na nyamũ sya kĩthekanĩ iyongeleka na iimũũmĩsya. 30 Ngamalũngya maume mbee wenyu o kavola kwa kavola, nginya yĩla mũkaingĩva na mũimesya nthĩ ĩsu.

31 “Ngeekĩa mũvaka wenyu kuma Ũkanganĩ Mũtune nginya ũkanganĩ wa Avilisiti na kuma weũnĩ nginya ũla Ũsĩnĩ;* nũndũ nganengane ekali ma nthĩ ĩsu mokonĩ menyu, nenyu mũkamalũngya maume mbee wenyu. 32 Mũikatianĩe ũtianĩo namo kana na ngai syoo. 33 Mayaĩle kũtũa nthĩ yenyu, nĩ kana maikatume mũmbĩtĩsya. Ethĩwa mũkathũkũma ngai syoo, vate nzika kĩu kĩkatwʼĩka kĩtei kwenyu.”

24 Na ĩndĩ eea Mose: “Ambata kũla kwĩ Yeova, we na Alũni, Natavu na Aviũ, na atumĩa 70 ma Isilaeli, na mũikumana mwĩ vaasa. 2 Mose aĩlĩte kũthengeea Yeova e weka; ĩndĩ ala angĩ mayaĩlĩte kũthengeea, na andũ mayaĩlĩte kwambatanyʼa nake.”

3 Nĩvo ĩndĩ Mose wookie na aelesya andũ ndeto syonthe sya Yeova na motw’ĩo onthe, na andũ onthe masũngĩa na wasya ũmwe masya: “Ndeto syonthe ila Yeova waneena, nĩtwĩyũmbanĩtye kũsyĩka.” 4 Kwoou Mose aandĩka ndeto syonthe sya Yeova. Na ĩndĩ aamũka kwakya tene na aaka kĩthembeo nthĩ wa kĩĩma vamwe na ituĩ 12 kwosana na mbaĩ 12 sya Isilaeli. 5 Ĩtina wa ũu, nĩwatũmie anake Aisilaeli, na maumya nthembo sya kũvĩvwʼa na mathemba nzaũ syĩthĩwe nthembo sya ngwatanĩo kwondũ wa Yeova. 6 Na ĩndĩ Mose oosa nusu ĩmwe ya nthakame na amĩkĩa mbakũlinĩ, na nusu ĩla ĩngĩ aminzangĩsya kĩthembeo. 7 Ĩtina wa ũu, nĩwoosie ĩvuku ya ũtianĩo na ayĩsomea andũ na wasya mũnene. Namo masya: “Kyonthe kĩla Yeova waneena nĩtwĩyũmbanĩtye kwĩka, na nĩtũkwĩthĩwa twĩ ewi.” 8 Kwoou Mose oosa nthakame na aminzangĩsya andũ na asya: “Ĩĩ nĩyo nthakame ya ũtianĩo ũla Yeova watianĩa nenyu kwosana na ndeto ii syonthe.”

9 Mose na Alũni, Natavu na Aviũ, na atumĩa 70 ma Isilaeli mambata, 10 na moona Ngai wa Isilaeli. Ungu wa nyaaĩ syake vaĩ na kĩndũ kyailye ta vandũ vaseũvĩtwʼe na tũvila twa savili, na kyaĩ kĩtheu vyũ ta matu. 11 Ndaaũmĩsya aũme asu ma Isilaeli manengetwe ndaĩa, na nĩmoonie woni wa Ngai ũla wa w’o na maya na manywʼa.

12 Nĩvo ĩndĩ Yeova weeie Mose: “Ambata vala nĩĩ kĩĩmanĩ na ũyĩkala vo. Nĩngũũnenga masengea ma ĩvia me na mĩao ĩla ngũandĩka nĩ kana andũ mamanyĩwʼe.” 13 Kwoou Mose ookĩla e na mũtetheesya wake Yosua, na Mose ambata kĩĩmanĩ kya Ngai ũla wa w’o. 14 Ĩndĩ aĩ aneea ala atumĩa atĩĩ: “Tweteelei vaa nginya tũsyoke. Alũni na Uulu me vamwe nenyu. Mũndũ o na wĩva ũla wĩ na ĩkoani no athi vala maĩ.” 15 Nĩvo ĩndĩ Mose wambatie kĩĩmanĩ o ĩtu yĩkĩvwʼĩkĩte ĩũlũ.

16 Ũtheu mũtisu wa Yeova nĩwaendeeie kwĩkala Kĩĩmanĩ kya Sinaĩ, na ĩtu yakĩvwʼĩka mĩthenya thanthatũ. Mũthenyanĩ wa mũonza nĩweetie Mose e katĩkatĩ wa ĩtu yĩu. 17 Aisilaeli ala masyaĩĩsye moonaa ũtheu mũtisu wa Yeova ũilye ta mwaki ũvĩvasya vyũ kĩĩmanĩ ĩũlũ. 18 Nĩvo ĩndĩ Mose walikile yĩla ĩtunĩ na ambata kĩĩmanĩ. Na Mose ekala kĩĩmanĩ mĩthenya 40, mũthenya na ũtukũ.

25 Nĩvo ĩndĩ Yeova weeie Mose atĩĩ: 2 “Tavya Aisilaeli mambumĩsye mũvothi; mwaĩlĩte kwosa mũvothi wakwa kuma kwa kĩla mũndũ ũla ngoo yake ĩkũmũthangaasya aumye. 3 Ũũ nĩwʼo mũvothi ũla mwaĩlĩte kwĩtĩkĩla kuma kwoo: thaavu, vetha, ũthuku, 4 ũlii wa mbuluu, wʼĩa wa langi wa nzambalaũ,* kĩtambaa kĩtune mũno,* katane nzeo, wʼĩa wa mbũi, 5 ithuma sya ndũũme ikundĩtwʼe langi mũtune, ithuma mbololo,* mbwaũ sya mũaa,* 6 mauta kwondũ wa taa, seli kwondũ wa mauta ma kwĩtĩkĩsya na kwondũ wa ũvumba wĩ mũuke mũseo, 7 na mavia ma soamu na mavia angĩ ma kũvangwa evotinĩ na kamũvukonĩ ka kĩthũi. 8 Maĩlĩte kũnzeũvĩsya vandũ vatheu, na ngatũa* katĩ woo. 9 Waĩlĩte kũseũvya vandũ vau vatheu, ĩeema ya ũthaithi na syĩndũ syayo syonthe, ũatĩĩe vyũ ngelekany’o ĩla* ngũkwonyʼa.

10 “Makaseũvya ĩsandũkũ ya mbwaũ sya mũaa,* ya ũasa wa mĩkono ĩlĩ na nusu* na ũthanthau wa mũkono ũmwe na nusu, na ũtũlu wa mũkono ũmwe na nusu. 11 Na ĩndĩ ũiyũmbĩĩa thaavu mũtheu. Waĩlĩte kũyũmbĩĩa nthĩnĩ na nza, na ũiyanakavya na thaavu ndeenĩ syayo* kĩla vandũ kũyĩthyũlũlũka. 12 Na ũkaseũvya ngome inya sya thaavu kwondũ wayo na ũyĩikwatanyʼa ĩũlũ wa maaũ mayo ana, ngome ilĩ ngalĩko ĩmwe na ngome ilĩ ngalĩko ĩla ĩngĩ. 13 Na ũkaseũvya mĩtĩ ya mũaa* na ũimyũmbĩĩa thaavu. 14 Ũkeekĩa mĩtĩ ĩsu katĩkatĩ wa ngome ila syĩ ngalĩko syelĩ sya Ĩsandũkũ yĩu nĩ kana Ĩsandũkũ yĩu yĩkuawe nayo. 15 Mĩtĩ ĩsu yaĩlĩte kwĩkalaa ngomenĩ sya Ĩsandũkũ yĩu; ĩyaĩlĩte kumwʼa vo. 16 Ũkeekĩa Ũkũsĩ ũla ngũũnenga Ĩsandũkũnĩ yĩu.

17 “Ũkaseũvya ngunĩko ya thaavu mũtheu, ya ũasa wa mĩkono ĩlĩ na nusu na ũthanthau wa mũkono ũmwe na nusu. 18 Waĩlĩte kũseũvya akelũvi elĩ ma thaavu; ũkamaseũvya* na nyũndo mĩthyanĩ ĩlĩ ya ngunĩko ĩsu. 19 Seũvya akelũvi asu mĩthyanĩ ĩsu ĩlĩ, mũkelũvi ũmwe e ngalĩko ĩmwe na mũkelũvi ũla ũngĩ e ngalĩko ĩla ĩngĩ. 20 Akelũvi asu maĩlĩte kwĩthĩwa matambũũkĩtye nthwau syoo ilĩ syelekele ĩũlũ, mavwʼĩkĩte ngunĩko na nthwau syoo, na masianĩtye. Mothyũ ma akelũvi asu maĩlĩte kwĩthĩwa masyaĩtye ngunĩko. 21 Ũkailĩĩla ngunĩko ĩsu ĩũlũ wa Ĩsandũkũ yĩu, na ũkeekĩa Ũkũsĩ ũla ngũũnenga Ĩsandũkũnĩ yĩu. 22 Ngakumĩlĩĩla vau na ndineena naku kuma ĩũlũ wa ngunĩko ĩsu. Ngaũmanyĩthya maũndũ onthe ala ngakwĩaĩa kwondũ wa Aisilaeli kuma katĩkatĩ wa akelũvi asu elĩ ala me ĩũlũ wa ĩsandũkũ ya Ũkũsĩ.

23 “O na ĩngĩ, ũkaseũvya mesa ya mbwaũ sya mũaa,* ya ũasa wa mĩkono ĩlĩ na ũthanthau wa mũkono ũmwe na ũtũlu wa mũkono ũmwe na nusu. 24 Ũkamyũmbĩĩa thaavu mũtheu na ũimyanakavya na thaavu ndeenĩ syayo* kũmĩthyũlũlũka. 25 Ũkaseũvya ũengo kũmĩthyũlũlũka wĩ na ũthanthau wa kĩtaa kya kwʼoko* na ũyanakavya ũengo ũsu na thaavu ndeenĩ syawʼo* kũũthyũlũlũka. 26 Ũkamĩseũvĩsya ngome inya sya thaavu na ũyĩkĩa ngome isu konanĩ inya syayo, vala maaũ ana makwatanĩlwʼe. 27 Ngome isu syaĩlĩte kwĩthĩwa vakuvĩ na ũengo nĩ kana ikwatĩĩae mĩtĩ ya kũkua mesa ĩsu. 28 Ũkaseũvya mĩtĩ ya mũaa* na ũimyũmbĩĩa thaavu na ũikuaa mesa ĩsu nayo.

29 O na ĩngĩ, ũkaseũvya masaani mayo, ikombe syayo, na ngyaki syayo na mbakũli ila ikatũmĩawa kwondũ wa nthembo sya kũnyuwa. Waĩlĩte kũiseũvya na thaavu mũtheu. 30 Na kĩla ĩvinda ũkaiaa mĩkate ya wonanyʼo mesanĩ ĩla yĩ mbee wakwa.

31 “Ũkaseũvya kĩndũ kya kwilĩĩla taa kya thaavu mũtheu. Kĩndũ kĩu kya kwilĩĩla taa kyaĩle kũseũvwʼa na nyũndo. Ĩtina yakyo, mũthamba wakyo, mbonge syakyo, ikombe syakyo, malaa makyo meyũmbĩte, na malaa makyo mavalĩku syonthe syaĩle kwĩthĩwa syĩ kĩlungu kĩmwe. 32 Na mbonge thanthatũ ikeethĩwa syumĩte kĩndũnĩ kĩu kya kwilĩĩla taa, mbonge itatũ kuma ngalĩko ĩmwe na mbonge itatũ kuma ngalĩko ĩla ĩngĩ. 33 Ikombe itatũ iilye ta malaa ma mũlosi ikeethĩwa ngalĩko ĩmwe ya mbonge, malaa meyũmbĩte maatĩĩwe nĩ malaa mavalĩku, na ikombe itatũ iilye ta malaa ma mũlosi iyĩthĩwa ngalĩko ĩla ĩngĩ ya mbonge, malaa meyũmbĩte maatĩĩwe nĩ malaa mavalĩku. Ũu nĩwʼo mbonge isu thanthatũ ikethĩwa syumĩte mũthambanĩ wa kĩndũ kĩu kya kwilĩĩla taa. 34 Mũthamba wa kĩndũ kĩu kya kwilĩĩla taa ũkeethĩwa na ikombe inya iilye ta malaa ma mũlosi, malaa makyo meyũmbĩte maatĩĩwe nĩ malaa makyo mavalĩku. 35 Ĩlaa yĩyũmbĩte yĩkeethĩwa ungu wa mbonge ilĩ sya mbee ila syumĩte mũthambanĩ wa kĩndũ kĩu kya kwilĩĩla taa na ĩlaa yĩyũmbĩte ungu wa mbonge ilĩ ila iatĩĩe na ĩlaa yĩyũmbĩte ungu wa mbonge ilĩ ila iatĩĩe, ũu nĩwʼo mbonge isu thanthatũ ikethĩwa syumĩte mũthambanĩ wa kĩndũ kĩu kya kwilĩĩla taa. 36 Malaa asu meyũmbĩte na mbonge isu na kĩndũ kĩu kyonthe kya kwilĩĩla taa syaĩlĩte kwĩthĩwa syĩ kĩlungu kĩmwe kya thaavu mũtheu, kĩseũvĩtwʼe na nyũndo. 37 Ũkakĩseũvĩsya taa mũonza, na yĩla taa isu syaakanwʼa, ikamulĩkaa kĩsio kĩla kĩ mbee wa kĩndũ kĩu kya kwilĩĩla taa. 38 Mĩkasi yakyo ya kũkwatĩĩa ndambi na syĩndũ syakyo sya kwĩkĩa mwaki syaĩle kwĩthĩwa syĩ sya thaavu mũtheu. 39 Kyaĩle kũseũvwʼa, vamwe na mĩio ĩsu, na talendi ĩmwe* ya thaavu mũtheu. 40 Ĩkĩĩthya kana waiseũvya ũatĩĩe ngelekanyʼo ĩla* wooniwʼe kĩĩmanĩ.

26 “Waĩle kũseũvya ĩeema ya ũthaithi na itambaa ĩkũmi sya ĩeema sya katane nzeo mbokothe, ũlii wa mbuluu, w’ĩa wa langi wa nzambalaũ, na kĩtambaa kĩtune mũno. Waĩle kũyĩseũvya na mavisa matumĩĩe ma akelũvi. 2 Kĩla kĩtambaa kya ĩeema kyaĩle kwĩthĩwa kĩ na ũasa wa mĩkono 28* na ũthanthau wa mĩkono 4. Itambaa syonthe sya ĩeema syaĩle kwĩthĩwa ianene. 3 Itambaa itano sya ĩeema syaĩle kũkwatanwʼa itwʼĩke kĩtambaa kĩmwe kĩnene, na itambaa ila ingĩ itano sya ĩeema iikwatanwʼa itwʼĩke kĩtambaa kĩmwe kĩnene. 4 Ũkaseũvya ikwatũ sya ũlii wa mbuluu ũteenĩ wa kĩtambaa kya ĩeema kĩla kĩ mũthyanĩ wa kĩtambaa kĩla kĩnene, na ũyĩka oou ũtee ũla wĩ vaasa vyũ wa kĩtambaa kĩla kĩngĩ kĩnene vala kĩũkwatanĩwʼa. 5 Ũkaseũvya ikwatũ 50 kĩtambaanĩ kya mbee kya ĩeema na ikwatũ 50 ũteenĩ wa kĩtambaa kĩla kĩngĩ kya ĩeema nĩ kana syĩthĩwe isianĩtye vala siũkwatanĩwʼa. 6 Ũkaseũvya ngolya 50 sya thaavu na ũikwatanyʼa itambaa sya ĩeema vamwe na ngolya isu, na ĩeema yĩu ya ũthaithi yĩkatwʼĩka kĩndũ kĩmwe.

7 “O na ĩngĩ, ũkaseũvya itambaa sya w’ĩa wa mbũi sya kũvwʼĩka ĩeema ya ũthaithi. Ũkaseũvya itambaa 11 sya ĩeema. 8 Kĩla kĩtambaa kya ĩeema kyaĩle kwĩthĩwa na ũasa wa mĩkono 30 na ũthanthau wa mĩkono 4. Itambaa syonthe 11 sya ĩeema syaĩle kwĩthĩwa ianene. 9 Waĩle kũkwatanyʼa itambaa itano katĩ wa itambaa isu sya ĩeema, na ũikwatanyʼa ila ingĩ thanthatũ, na ũitũla kĩtambaa kya thanthatũ ngalĩko ya mbee ya ĩeema. 10 Waĩle kũseũvya ikwatũ 50 ũteenĩ wa kĩtambaa kya mbee kya ĩeema, kĩla kĩ vaasa vyũ kĩtambaanĩ kĩla kĩnene, na ikwatũ 50 ũteenĩ wa kĩtambaa kĩla kĩngĩ kya ĩeema vala siũkwatanĩwʼa. 11 Ũkaseũvya ngolya 50 sya ũthuku na ũyĩkĩa ngolya isu ila ikwatũnĩ na ũikwatanyʼa ĩeema yĩu, na yĩkatwʼĩka kĩndũ kĩmwe. 12 Kĩlungu kya itambaa sya ĩeema kĩla kĩkatiala kĩkatiwa kĩniinĩte. Nusu ya kĩtambaa kya ĩeema kĩla kĩkatiala kĩkatiwa kĩniinĩte ngalĩko ya ĩtina ya ĩeema yĩu ya ũthaithi. 13 Kĩlungu kĩla kĩkatiala kya itambaa sya ĩeema kĩkatiwa kĩniinĩte ĩeemanĩ yĩu ya ũthaithi na ũasa wa mũkono ũmwe kĩla ngalĩko, nĩ kana kĩyĩvwʼĩke.

14 “O na ĩngĩ, ũkaseũvya kĩndũ kya kũvwʼĩka ĩeema yĩu kya ithuma sya ndũũme ikundĩtwʼe langi mũtune na ĩũlũ wakyo kĩndũ kĩngĩ kya kũvwʼĩka kya ithuma mbololo.*

15 “Ũkaseũvya vulemu sya mbwaũ sya mũaa* siũngamĩte kwondũ wa ĩeema yĩu ya ũthaithi. 16 Kĩla vulemu yaĩlĩte kwĩthĩwa na ũtũlu wa mĩkono ĩkũmi na ũthanthau wa mũkono ũmwe na nusu. 17 Kĩla vulemu yaĩlĩte kwĩthĩwa na mĩthya ĩlĩ myasũvye ĩkwatanĩtwʼe.* Ũu nĩwʼo waĩlĩte kũseũvya vulemu syonthe sya ĩeema yĩu ya ũthaithi. 18 Waĩlĩte kũseũvya vulemu 20 kwondũ wa ngalĩko ya ĩtheo ya ĩeema yĩu ya ũthaithi, isyaĩtye ngalĩko ya ĩtheo.

19 “Ũkaseũvya matina 40 ma vetha me na maima ungu wa vulemu isu 20: matina elĩ me na maima ungu wa vulemu ya mbee kwondũ wa mĩthya ĩlĩ myasũvye yayo na matina elĩ me na maima ungu wa kĩla vulemu ĩatĩĩe kwondũ wa mĩthya ĩlĩ myasũvye yayo. 20 Kwondũ wa ngalĩko ĩla ĩngĩ ya ĩeema ya ũthaithi, ngalĩko ya ĩũlũ, ũkaseũvya vulemu 20 21 na matina masyo 40 ma vetha me na maima, matina elĩ me na maima ungu wa vulemu ĩmwe na matina elĩ me na maima ungu wa kĩla vulemu ĩatĩĩe. 22 Ũkaseũvya vulemu thanthatũ kwondũ wa kĩlungu kya ĩtina kya ĩeema yĩu ya ũthaithi, welekele ũthũĩlonĩ wa sua. 23 Ũkaseũvya vulemu ilĩ syĩthĩwe ituĩ ilĩ sya konanĩ sya ngalĩko ya ĩtina ya ĩeema yĩu ya ũthaithi. 24 Waĩle kũkwatanyʼa ilĩ kuma nthĩ nginya ĩũlũ, kũvika ngomenĩ ya mbee. Ũu nĩwʼo waĩle kwĩka kwondũ wa vulemu isu ilĩ, na ikeethĩwa ituĩ ilĩ sya konanĩ. 25 Na vakeethĩwa vulemu nyanya na matina masyo 16 ma vetha me na maima, matina elĩ me na maima ungu wa vulemu ya mbee na matina elĩ me na maima ungu wa kĩla vulemu ĩatĩĩe.

26 “Ũkaseũvya mĩamba ya mbwaũ sya mũaa,* ĩtano kwondũ wa vulemu sya ngalĩko ĩmwe ya ĩeema ya ũthaithi, 27 na mĩamba ĩtano kwondũ wa vulemu sya ngalĩko ĩla ĩngĩ ya ĩeema ya ũthaithi, na mĩamba ĩtano kwondũ wa vulemu sya ngalĩko ya ũthũĩlonĩ wa sua ya ĩeema ya ũthaithi, ngalĩko ya ĩtina. 28 Mũamba wa katĩ ũla wĩsĩle katĩkatĩ wa vulemu isu waĩlĩte kuma mũthya ũmwe nginya mũthya ũla ũngĩ.

29 “Ũkombĩĩa vulemu isu thaavu, na ũkaseũvya ngome syasyo sya thaavu nĩ kana ikwatĩĩe mĩamba, na ũkombĩĩa mĩamba ĩsu thaavu. 30 No nginya ũseũvye ĩeema yĩu ya ũthaithi kwosana na mũsolo wayo ũla ũnooniwʼe kĩĩmanĩ.

31 “Waĩle kũseũvya vasia wa ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe. Na waĩle kũũseũvya wĩ na mavisa ma akelũvi mekĩte kũtumĩĩwa. 32 Ũkaũanĩka ituĩnĩ inya sya mũaa* syũmbĩĩwe thaavu. Ngolya syasyo syaĩlĩte kwĩthĩwa syĩ sya thaavu. Ituĩ isu syaĩlĩte kwĩthĩwa siũngamĩtwʼe matinanĩ ana ma vetha me na maima. 33 Ũkanĩka vasia ũsu ungu wa ila ngolya na ũiete ĩsandũkũ ya Ũkũsĩ ĩtina wa vasia ũsu. Vasia ũsu ũkavathũkanyʼa vala Vandũ Vatheu na vala Vandũ Vatheu Vyũ. 34 No nginya wilĩĩle ĩla ngunĩko ĩsandũkũnĩ ya Ũkũsĩ yĩla yĩ vala Vandũ Vatheu Vyũ.

35 “Ũkaia ĩla mesa nza wa vasia, na kĩndũ kya kwilĩĩla taa kĩyĩthĩwa kĩsianĩtye na mesa ĩsu kĩ ngalĩko ya ĩtheo ya ĩeema ya ũthaithi; na ũyia mesa ĩsu ngalĩko ya ĩũlũ. 36 Ũkaseũvya vasia kwondũ wa mũomo wa ĩeema ũtũmĩĩte ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe, syonthe itumanĩwʼe vamwe. 37 Ũkaseũvya ituĩ itano sya mũaa* kwondũ wa vasia ũsu na ũisyũmbĩĩa thaavu. Ngolya syasyo syaĩle kwĩthĩwa syĩ sya thaavu, na ũiseũvya matina atano ma ũthuku me na maima kwondũ wasyo.

27 “Ũkaseũvya kĩthembeo kya mbwaũ sya mũaa;* kĩkeethĩwa na ũasa wa mĩkono ĩtano* na ũthanthau wa mĩkono ĩtano. Kĩthembeo kĩu kyaĩle kwĩthĩwa kĩanene ngalĩ inya na kĩ na ũtũlu wa mĩkono ĩtatũ. 2 Ũkaseũvya mbya konanĩ syakyo inya; mbya isu ikeethĩwa kĩlungu kya kĩthembeo kĩu, na ũkombĩĩa kĩthembeo kĩu ũthuku. 3 Ũkaseũvya ndoo sya kũvetanga mũu wakyo,* o vamwe na mĩko, mbakũli, ũma, na syĩndũ sya kwĩkĩa mwaki, na ũkaseũvya mĩio yakyo yonthe na ũthuku. 4 Ũkaseũvya kĩndũ kya syũma sya ũthuku ikelanganĩtw’e ta neti kwondũ wa kĩthembeo kĩu, na kĩndũnĩ kĩu ũiseũvya ngome inya sya ũthuku konanĩ syakyo inya. 5 Ũkakia ĩtheo wa ũengo wa kĩthembeo, katĩkatĩ wa kĩthembeo. 6 Ũkaseũvya mĩtĩ ya mũaa* kwondũ wa kĩthembeo na ũimyũmbĩĩa ũthuku. 7 Mĩtĩ ĩsu ĩkalikwʼa ila ngomenĩ nĩ kana wĩthĩe mĩtĩ ĩsu yĩ ngalĩko syelĩ sya kĩthembeo yĩla kĩkuĩtwe. 8 Ũkaseũvya kĩthembeo kĩilye ta ĩsandũkũ ĩnene yĩte kĩndũ nthĩnĩ. Kyaĩle kũseũvw’a o tondũ nakwonisye kĩĩmanĩ.

9 “Ũkaseũvya kĩwanza kya ĩeema yĩu ya ũthaithi. Ngalĩko ya ĩtheo, kĩwanza kĩu kĩkeethĩwa na itambaa iniinĩte sya katane nzeo mbokothe, sya ũasa wa mĩkono 100 ngalĩko ĩmwe. 10 Kĩkeethĩwa na ituĩ 20 syĩ na matina 20 ma ũthuku me na maima. Ngolya sya ituĩ isu na syĩndũ syasyo sya kũkwatany’a* ikeethĩwa sya vetha. 11 Itambaa iniinĩte sya ngalĩko ya ĩũlũ o nasyo ikeethĩwa syĩ na ũasa wa mĩkono 100, vamwe na ituĩ syasyo 20 na matina masyo 20 ma ũthuku me na maima, vamwe na ngolya na syĩndũ sya kũkwatany’a* sya vetha. 12 Vakeethĩwa na itambaa iniinĩte ũthũĩlonĩ wa sua wa kĩwanza kĩu syĩ na ũasa wa mĩkono 50, na ituĩ ĩkũmi na matina ĩkũmi me na maima. 13 Ũthanthau wa kĩwanza kĩu ngalĩko ĩla ĩsyaĩtye wumĩlonĩ wa sua nĩ mĩkono 50. 14 Vakeethĩwa itambaa iniinĩte sya mĩkono 15 ngalĩko ĩmwe, vamwe na ituĩ itatũ na matina atatũ me na maima. 15 Na ngalĩko ĩla ĩngĩ, vakeethĩwa na itambaa iniinĩte sya mĩkono 15, vamwe na ituĩ itatũ na matina atatũ me na maima.

16 “Mũvĩa wa kĩwanza kĩu waĩlĩte kwĩthĩwa na vasia wa ũasa wa mĩkono 20 ũseũvĩtwʼe na ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe, syonthe itumanĩw’e vamwe, na ituĩ inya na matina masyo ana me na maima. 17 Ituĩ syonthe ila ithyũlũlũkĩte kĩwanza kĩu ikeethĩwa na syĩndũ sya kũkwatĩĩa sya vetha na ngolya sya vetha, ĩndĩ matina masyo me na maima makeethĩwa ma ũthuku. 18 Kĩwanza kĩu kyaĩlĩte kwĩthĩwa kĩ na ũasa wa mĩkono 100, ũthanthau wa mĩkono 50, na ũtũlu wa mĩkono 5, kĩseũvĩtwʼe na katane nzeo mbokothe, na kyaĩlĩte kwĩthĩwa na matina ma ũthuku me na maima. 19 Mĩio yonthe na syĩndũ syonthe ila ikatũmĩawa ũthũkũminĩ wa ĩeema ya ũthaithi, o vamwe na syambo sya ĩeema na syambo syonthe sya kĩwanza kĩu, syaĩlĩte kwĩthĩwa syĩ sya ũthuku.

20 “Waĩlĩte kwĩaĩa Aisilaeli makũetee mauta makime na matheu ma mĩthata kwondũ wa kwakany’a taa, nĩ kana taa syĩkalae syakanĩte mavinda onthe. 21 Ĩeemanĩ ya kũmbanĩa, nza wa vasia ũla wĩ vakuvĩ na Ũkũsĩ, Alũni na ana make makavanga nĩ kana taa syĩkalae syakanĩte mbee wa Yeova kuma ĩ ya wĩoo nginya kwakya. Nĩ ũtwʼĩo wa ĩvinda yonthe kwondũ wa ana ma Isilaeli ũla makaatĩĩaa nzyawanĩ syoo syonthe.

28 “Ĩta mwana-a-inyia waku Alũni vamwe na ana make Natavu na Aviũ, Eleasali na Ithamali na ũimavathanyʼa na Aisilaeli, nĩ kana methĩwe athembi makwa. 2 Ũkaseũvya ngũa ntheu kwondũ wa Alũni mwana-a-inyia waku, nĩ kana ethĩwe na ndaĩa na ayĩthĩwa e mwanake. 3 Ũkaneena na onthe ala me na ũtũĩka,* ala nusũĩtye veva wa ũĩ, namo makamũseũvĩsya Alũni ngũa sya kũmũthesya, nĩ kana anthũkũme e mũthembi.

4 “Ii nĩsyo ngũa ila meseũvya: kamũvuko ka kĩthũinĩ, evoti, ĩkoti yĩte moko, kanzũ yĩ na tũsandũkũ, kĩlemba, na mũsivi wa kanzũ; makaseũvya ngũa ii ntheu kwondũ wa mwana-a-inyia waku Alũni na ana make, nĩ kana anthũkũme e mũthembi. 5 Athũkũmi asu me na ũtũĩka makatũmĩa thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo.

6 “Makaseũvya evoti ya thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe, na yaĩle kũtumĩĩwa syĩndũ sya kũmyanakavya. 7 Yaĩle kwĩthĩwa na ilungu ilĩ sya ituo ila imĩkwatanĩtye mĩthyanĩ yayo ĩlĩ. 8 Mũsivi mũtume,* ũla ũkwatanĩtwʼe na evoti nĩ kana ũmyovae ĩlũme, waĩle kũseũvwʼa na syĩndũ o isu: thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe.

9 “Waĩlĩte kwosa mavia elĩ ma soamu na ũivana ĩũlũ wamo masyĩtwa ma ana ma Isilaeli, 10 masyĩtwa thanthatũ ĩvianĩ yĩmwe na masyĩtwa thanthatũ ala meũtiala ĩvianĩ yĩla yĩngĩ, kwosana na ũndũ masyaiwe. 11 Mũndũ ũvanĩĩaa mavia akavanĩĩa masyĩtwa ma ana ma Isilaeli mavianĩ asu elĩ o tondũ ũtonya kũvanĩĩa ũsiĩlo. Ĩtina wa ũu, ũkamombĩĩa syĩndũnĩ sya kũkwatĩĩa sya thaavu. 12 Na waĩle kwĩkĩa mavia asu elĩ ilungunĩ sya ituo sya evoti nĩ kana methĩwe mavia ma ũlilikanyʼo kwondũ wa ana ma Isilaeli, na no nginya Alũni akue masyĩtwa moo mbee wa Yeova ilungunĩ syake ilĩ sya ituo ta ũlilikanyʼo. 13 Ũkaseũvya syĩndũ sya kũkwatĩĩa sya thaavu 14 na tũnyololo twĩlĩ twa thaavu mũtheu twokothe ta ĩkanda, na no nginya ũkwatanyʼe tũnyololo tũu syĩndũnĩ isu sya kũkwatĩĩa.

15 “Ũkeaĩa mũndũ wĩsĩ kwanakavya syĩndũ sya kũtuma aseũvye kamũvuko ka kĩthũinĩ ka kũtwʼa sila. Kaĩle kũseũvwʼa ta evoti, atũmĩĩte thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe. 16 Kaĩle kwĩthĩwa keanene ngalĩ syonthe katũlwa kelĩ, ke na ũasa wa ĩkwata yĩmwe* na ũthanthau wa ĩkwata yĩmwe. 17 Waĩle kũvanga ĩũlũ wako lainĩ inya sya mavia mombĩĩe. Lainĩ wa mbee wĩthĩwe na salitũ, tovasi, na sumalatai. 18 Lainĩ wa kelĩ wĩthĩwe na noveki, savili, na yasivi. 19 Lainĩ wa katatũ wĩthĩwe na ĩvia ya lesemu,* sevo, na amethusito. 20 Lainĩ wa kana wĩthĩwe na savaliyati, soamu, na yaseve. Maĩle kũmbĩĩwa syĩndũnĩ sya kũkwatĩĩa sya thaavu. 21 Mavia asu makoosana na masyĩtwa ma ana 12 ma Isilaeli. Kĩla yĩmwe yaĩle kũvanĩĩwa ta ũsiĩlo, kĩla ĩsyĩtwa yĩkaũngamĩa mbaĩ ĩmwe katĩ wa ila mbaĩ 12.

22 “Waĩle kũseũvya tũnyololo twokothe ĩũlũ wa kamũvuko ka kĩthũinĩ, tũilye tũkanda twa thaavu mũtheu. 23 Ũkaseũvya ngome ilĩ sya thaavu kwondũ wa kamũvuko ka kĩthũinĩ na ũikwatĩlya ngome isu syelĩ mĩthyanĩ ĩlĩ ya kamũvuko kau ka kĩthũinĩ. 24 Ũkeekĩa tũkanda tũu twĩlĩ twa thaavu twĩsĩle ngomenĩ ilĩ ila syĩ mũthyanĩ wa kamũvuko ka kĩthũinĩ. 25 Ũkeekĩa mĩthya ĩlĩ ya tũla tũkanda twĩlĩ yĩsĩle ila syĩndũnĩ ilĩ sya kũkwatĩĩa, na no nginya ũtũkwatĩlye ilungunĩ sya ituonĩ sya evoti, ngalĩko ya mbee. 26 Ũkaseũvya ngome ilĩ sya thaavu na ũisyĩkĩa mĩthyanĩ ĩlĩ ĩla yĩ ũteenĩ ũla wĩ ngalĩko ya nthĩnĩ ya kamũvuko ka kĩthũinĩ, ĩsyaĩtye evoti. 27 Waĩle kũseũvya ngome ingĩ ilĩ sya thaavu ngalĩko ya mbee ya evoti, ĩtheo wa ila ilungu ilĩ sya ituonĩ, vakuvĩ na vala ĩkwatanĩwʼe, ĩũlũ wa ũla mũsivi mũtume* wa evoti. 28 Kamũvuko ka kĩthũinĩ kaĩle kũkwatĩĩwa vala kaĩle kwĩthĩwa na kakanda ka mbuluu, kovanĩtye ngome sya kamũvuko kau na ngome sya evoti. Kĩu kĩkatuma kamũvuko ka kĩthũinĩ kekala vala kaĩle kwĩthĩwa evotinĩ, ĩũlũ wa ũla mũsivi mũtume.*

29 “No nginya Alũni akuae masyĩtwa ma ana ma Isilaeli kamũvukonĩ ka kĩthũinĩ ka kũtwʼa sila ĩũlũ wa ngoo yake yĩla ũkũka vala Vandũ Vatheu ta ũlilikanyʼo wa kĩla ĩvinda mbee wa Yeova. 30 Ũkeekĩa Ulimu na Thumimu* kamũvukonĩ ka kĩthũinĩ ka kũtwʼa sila, na no nginya syĩthĩwe ĩũlũ wa ngoo ya Alũni yĩla ũkũka mbee wa Yeova, na no nginya Alũni akuae syĩndũ isu sya kũtwʼa sila kwondũ wa Aisilaeli ĩũlũ wa ngoo yake mbee wa Yeova kĩla ĩvinda.

31 Ũkaseũvya ĩkoti yĩte moko ya evoti na yonthe yaĩle kũtumwa na ũlii wa mbuluu. 32 Vakeethĩwa na mwanya kwondũ wa mũtwe* katĩkatĩ wayo. Mwanya ũsu waĩle kũtumwa ndee syonthe nĩ mũtumi wa ngũa. Yaĩle kwĩthĩwa na mwanya ũilye ta mwanya wa ĩkoti ya kyũma, nĩ kana yĩikatembũke. 33 Ũkaseũvya makũngũmanga ma ũlii wa mbuluu, w’ĩa wa langi wa nzambalaũ, na kĩtambaa kĩtune mũno kũthyũlũlũka mũtũlo wayo, o vamwe na ngengele sya thaavu katĩkatĩ wa makũngũmanga. 34 Ũkeekĩaa ngengele ĩmwe ya thaavu na ũyĩatĩĩsya ĩkũngũmanga, ngengele ĩmwe ya thaavu na ũyĩatĩĩsya ĩkũngũmanga, kũthyũlũlũka mũtũlo w’onthe wa ĩkoti yĩu yĩte moko. 35 No nginya yĩkĩwe nĩ Alũni nĩ kana athũkũme, na wasya wayo no nginya wĩwʼĩke yĩla ũkũlika vala vandũ vatheu mbee wa Yeova na yĩla ũkumaala, nĩ kana ndakakwʼe.

36 “Ũkaseũvya kalungu keũtisatisa ka thaavu mũtheu na ũivanĩĩa ĩũlũ wako ndeto ii o ũndũ mũndũ ũtonya kũvanĩĩa ũsiĩlo: ‘Ũtheu nĩ wa Yeova.’ 37 No nginya ũkoveee kĩlembanĩ na kakanda ka mbuluu; kaĩle kwĩkalaa ngalĩko ya mbee ya kĩlemba. 38 Kakeethĩawa kĩtulyanĩ kya Alũni, na Alũni nĩwe ũkasũngĩaa yĩla mũndũ weeka naĩ ũndũnĩ ũkonetye syĩndũ ntheu, ila Aisilaeli matheasya yĩla masyumya syĩthĩwe mĩthĩnzĩo mĩtheu. No nginya kekalae kĩtulyanĩ kyake, nĩ kana metĩkĩlĩke mbee wa Yeova.

39 “Waĩle kũtuma kanzũ yĩ na tũsandũkũ ya katane nzeo, na ũiseũvya kĩlemba kya katane nzeo, o na ũkatuma mũsivi wa kanzũ ĩsu.

40 “O na ĩngĩ, ũkaseũvya kanzũ, mĩsivi ya kanzũ isu, na ngovia kwondũ wa ana ma Alũni, nĩ kana methĩwe na ndaĩa na mayĩthĩwa me anake. 41 Na ũkeekĩa mwana-a-inyia waku Alũni vamwe na ana make ngũa isu, na ũimetĩkĩsya mauta na ũimanenga ũkũmũ* na ũimathesya, na makanthũkũmaa me athembi. 42 O na ĩngĩ, seũvya inyasa* sya katane nĩ kana ivwʼĩke mamutha moo ma kĩmbithĩ. Syaĩlĩte kwĩthĩwa syumĩte kĩnyunyu nginya ndambĩ. 43 No nginya Alũni na ana make masyĩkĩae yĩla mooka ĩeemanĩ ya kũmbanĩa kana yĩla mathengeea kĩthembeo mathũkũme vala vandũ vatheu, nĩ kana maikethĩwe na ĩvĩtyo na maikwʼa. Nĩ ũtwʼĩo wa ĩvinda yonthe kwondũ wake na nzyawa syake* ila ikoka ĩtina wake.

29 “Ũũ nĩwʼo waĩle kwĩka ũmathesye nĩ kana manthũkũme me athembi: Osa kasalũ, na ndũũme ilĩ ite na thĩna o na ũmwe, 2 mĩkate ĩte ĩlawa, mĩkate ya kĩlinge ĩte ĩlawa yĩ ĩima katĩ ĩvulanĩtwʼe na mauta, na mĩkate mĩtheke ĩte ĩlawa ĩvakĩtwe mauta. Waĩle kũmĩua na mũtu mũvinyu wa nganũ 3 na ũimĩkĩa kĩkavũnĩ na ũimĩete mbee wakwa yĩ kĩkavũnĩ kĩu, vamwe na nzaũ ĩsu na ndũũme isu ilĩ.

4 “Na ũkaete Alũni na ana make mũomonĩ wa ĩeema ya kũmbanĩa na ũimathambya na kĩw’ũ. 5 Na ĩndĩ ũyosa ila ngũa na ũimwĩkĩa Alũni kanzũ, ĩkoti yĩte moko ya evoti, evoti, na kamũvuko ka kĩthũinĩ, na ũimwova ũla mũsivi mũtume* wa evoti ũlũme kĩnyunyunĩ kyake. 6 Ũkamwĩkĩa kĩla kĩlemba mũtwenĩ wake na ũyĩkĩa ũla wonanyʼo mũtheu wa kwĩyumya* kĩlembanĩ kĩu; 7 na ũyosa mauta ma kwĩtĩkĩsya ũmwĩtĩkĩsye mũtwe nĩ kana ũmũtwʼĩkĩthye mũthembi.

8 “Na ĩndĩ ũyĩete ana make mbee wakwa na ũimekĩa kanzũ 9 na ũimova mĩsivi ya kanzũ, Alũni vamwe na ana make, na ũimekĩa ngovia syoo; na ũthembi ũkatwʼĩka woo ta ũtwʼĩo wa ĩvinda yonthe. Ũu nĩwʼo waĩle kũnenga Alũni na ana make ũkũmũ wa kũthũkũma me athembi.*

10 “Na ĩndĩ ũkaete ĩla nzaũ mbee wa ĩeema ya kũmbanĩa, na Alũni na ana make makailĩĩla moko moo mũtwenĩ wa nzaũ ĩsu. 11 Thĩnza nzaũ ĩsu mbee wa Yeova, mũomonĩ wa ĩeema ya kũmbanĩa. 12 Tola na kyaa kyaku nthakame ĩmwe ya nzaũ ĩsu na ũimĩvaka mbyanĩ sya kĩthembeo, na ũyĩta nthakame ĩla ĩngĩ yonthe ĩtinanĩ ya kĩthembeo. 13 Ĩtina wa ũu, osa mathunya onthe ala mavwʼĩkĩte maa, mathunya ma ĩtema, na mbio syelĩ na mathunya ala me ĩũlũ wasyo, na ũyĩivĩvya nĩ kana syumye syũki syĩ kĩthembeonĩ. 14 Ĩndĩ nyama sya nzaũ ĩsu na kĩthuma kyayo na kyaa kyayo, ũkaivĩvĩsya nza wa kambi na mwaki. Nĩ nthembo ya naĩ.

15 “Na ĩndĩ ũyosa ndũũme ĩmwe, na Alũni na ana make mayilĩĩla moko moo mũtwenĩ wa ndũũme ĩsu. 16 Thĩnza ndũũme ĩsu na ũyosa nthakame yayo na ũimĩminzangya ngalĩko syonthe sya kĩthembeo. 17 Tilanga ndũũme ĩsu ilungu, na ũithambya maa mayo na maaũ mayo, na ũivanga ilungu isu vamwe na mũtwe wayo. 18 No nginya ũvĩvye ndũũme ĩsu yonthe, yumye syũki kĩthembeonĩ. Nĩ nthembo ya kũvĩvwʼa kwondũ wa Yeova, mũuke wa kwendeesya.* Nĩ nthembo ĩvĩvĩtwʼe na mwaki kwondũ wa Yeova.

19 “Na ĩndĩ ũyosa ndũũme ĩla ĩngĩ, na Alũni na ana make mayilĩĩla moko moo mũtwenĩ wa ndũũme ĩsu. 20 Thĩnza ndũũme ĩsu na ũyosa nthakame ĩmwe yayo na ũivaka mũthyanĩ wa kũtũ kwa Alũni kwa ngalĩko ya aũme na mũthyanĩ wa matũ ma ana make ma ngalĩko ya aũme na kyaanĩ kĩla kĩnene mokonĩ moo ma aũme na kyaanĩ kĩla kĩnene maaũnĩ moo ma aũme, na ũiminzangya nthakame ĩsu ngalĩko syonthe sya kĩthembeo. 21 Ĩtina wa ũu, osa nthakame ĩmwe ĩla yĩ kĩthembeonĩ na mauta amwe ma kwĩtĩkĩsya na ũitalĩkangĩlya Alũni na ngũa syake na ana make na ngũa sya ana make, nĩ kana we na ngũa syake na ana make na ngũa syoo syĩthĩwe syĩ ntheu.

22 “Na ĩndĩ ũyosa mathunya ma ndũũme ĩsu, kĩsithe kyayo kĩnou, mathunya ala mavwʼĩkĩte maa, mathunya ma ĩtema, mbio syayo ilĩ na mathunya ala me ĩũlũ wasyo, na kũũ kwa ngalĩko ya aũme, nũndũ nĩ ndũũme yumawʼa andũ mainengwa ũkũmũ wa kwĩthĩwa athembi. 23 O na ĩngĩ, osa mũkate wa kĩlinge na mũkate wa kĩlinge wĩ ĩima katĩ mũvake mauta na mũkate mũtheke kuma kĩla kĩkavũnĩ kya mĩkate ĩte ĩlawa kĩ mbee wa Yeova. 24 No nginya wilĩĩle syĩndũ isu syonthe mokonĩ ma Alũni na mokonĩ ma ana make, na ũyĩivyũlya mbee na ĩtina syĩthĩwe nthembo ya kũvyũlwʼa mbee wa Yeova. 25 Na ĩndĩ ũkasyosa kuma mokonĩ moo na ũyĩivĩvĩsya kĩthembeonĩ, ĩũlũ wa ĩla nthembo ya kũvĩvwʼa, syĩthĩwe mũuke wa kwendeesya* mbee wa Yeova. Nĩ nthembo ĩvĩvĩtwʼe na mwaki kwondũ wa Yeova.

26 “Ĩtina wa ũu, osa kĩthũi kya ndũũme ĩla yumawʼa andũ mainengwa ũkũmũ wa kwĩthĩwa athembi, ĩla yumĩtwʼe kwondũ wa Alũni, na ũimĩvyũlya mbee na ĩtina ta nthembo ya kũvyũlwʼa mbee wa Yeova, na ĩkeethĩwa kĩlungu kyaku. 27 Ũkathesya kĩthũi kya nthembo ya kũvyũlwʼa na kũũ kwa kĩlungu kĩtheu kũla kwavyũlilwʼe na kũla kwaumiwʼe ndũũmenĩ ĩla yumawʼa andũ mainengwa ũkũmũ wa kwĩthĩwa athembi, kuma ndũũmenĩ ĩla yaumiwʼe kwondũ wa Alũni na kwondũ wa ana make. 28 Ikatwʼĩka sya Alũni na ana make kwosana na mwolooto wa ĩvinda yonthe ũla ũkaatĩĩawa nĩ Aisilaeli, syĩndũ isu nĩ kĩlungu kĩtheu, na ikatwʼĩka kĩlungu kĩtheu kya kũnenganwe nĩ Aisilaeli. Nĩ kĩlungu kyoo kĩtheu kwondũ wa Yeova kuma nthembonĩ syoo sya ngwatanĩo.

29 “Ngũa ntheu sya Alũni ikatũmĩwa nĩ ana make ala makoka ĩtina wake metĩkĩwʼa mauta na manengwa ũkũmũ wa kwĩthĩwa athembi. 30 Mũthembi ũla ũkauma ananĩ make ũla ũkoka ĩtina wake na ũla ũkokaa ĩeemanĩ ya kũmbanĩa kũthũkũma vala vandũ vatheu akeekĩaa ngũa isu mĩthenya mũonza.

31 “Ũkoosa ndũũme ĩsu yumawʼa andũ mainengwa ũkũmũ wa kwĩthĩwa athembi na ũitheũkĩsya nyama syayo vandũ vatheu. 32 Alũni na ana make makaya nyama sya ndũũme ĩsu na mũkate ũla wĩ kĩkavũnĩ kĩla kĩ mũomonĩ wa ĩeema ya kũmbanĩa. 33 Maĩle kũya syĩndũ ila syaumiwʼe kwondũ wa wĩwʼanĩthyo nĩ kana manengwe ũkũmũ wa kwĩthĩwa athembi* na maithewʼa. Ĩndĩ mũndũ ũte mwĩtĩkĩlye* ndaĩlĩte kũiya, nũndũ nĩ syĩndũ ntheu. 34 Ethĩwa nyama o na yĩva ya nthembo ya kũnenga andũ ũkũmũ wa kwĩthĩwa athembi na mũkate o na wĩva nĩwatiala nginya kwakya, no nginya ũvĩvye vyũ na mwaki kĩla kyatiala. Kĩyaĩlĩte kũĩwa, nũndũ nĩ kĩndũ kĩtheu.

35 “Ũu nĩwʼo waĩle kwĩka Alũni na ana make, kwosana na kyonthe kĩla nakwĩaĩa. Ũkakua mĩthenya mũonza ũimanenga ũkũmũ wa kwĩthĩwa athembi.* 36 Ũkaumasya nzaũ ya nthembo ya naĩ kĩla mũthenya kwondũ wa wĩwʼanĩthyo, na ũkatheasya kĩthembeo kĩikethĩwe na naĩ kwa kumya wĩwʼanĩthyo kwondũ wakyo, na no nginya ũkĩtĩkĩsye mauta nĩ kana ũkĩthesye. 37 Ũkakua mĩthenya mũonza kumya wĩwʼanĩthyo kwondũ wa kĩthembeo, na no nginya ũkĩthesye nĩ kana kĩthĩwe kĩ kĩthembeo kĩtheu vyũ. Mũndũ o na wĩva ũla wĩkwataa kĩthembeo kĩu aĩle kwĩthĩwa e mũtheu.

38 “Ii nĩsyo syĩndũ ila wĩumasya kĩthembeonĩ: ndũũme ilĩ sya ũkũũ wa mwaka ũmwe kĩla mũthenya, kwa kũendeea. 39 Ũkaumasya katũlũme kamwe kwakya na katũlũme kala kangĩ ĩ ya wĩoo.* 40 Kĩlungu kya ĩkũmi kya kĩthimo kya eva ĩmwe* ya mũtu mũvinyu ũvulanĩtwʼe na kĩlungu kya kana kya ini* ya mauta makime, na nthembo ya kũnyuwa ya kĩlungu kya kana kya ini ya mbinyu, kĩkaendanyʼa vamwe na katũlũme ka mbee. 41 Ũkaumasya katũlũme ka kelĩ ĩ ya wĩoo,* vamwe na mũtu na nthembo sya kũnyuwa o tondũ umisye kwakya. Ũkamyumya yĩthĩwe mũuke wa kwendeesya,* nthembo ĩvĩvĩtwʼe na mwaki kwondũ wa Yeova. 42 Nĩ nthembo ya kũvĩvwʼa yaĩle kumawʼa kĩla ĩvinda nzyawanĩ syenyu syonthe mũomonĩ wa ĩeema ya kũmbanĩa mbee wa Yeova, vala ngakumĩlĩĩla nĩneenee naku vo.

43 “Ngaumĩlĩĩla Aisilaeli vau, na ũtheu wakwa mũtisu ũkavathesya. 44 Ngathesya ĩeema ya kũmbanĩa na kĩthembeo, na ngathesya Alũni na ana make nĩ kana manthũkũme me athembi. 45 Ngatũa* katĩ wa andũ ma Isilaeli, na ngeethĩwa Ngai woo. 46 Na vate nzika, makamanya kana ninyie Yeova Ngai woo, ũla wamaumisye nthĩ ya Misili nĩ kana nĩtũe katĩ woo. Ninyie Yeova Ngai woo.

30 “Waĩle kũseũvya kĩthembeo kĩthĩawe vandũ va kumĩsya ũvumba; ũkakĩseũvya na mbwaũ sya mũaa.* 2 Kyaĩle kwĩthĩwa kĩanene ngalĩ inya, kĩ na ũasa wa mũkono ũmwe,* ũthanthau wa mũkono ũmwe, na ũtũlu wa mĩkono ĩlĩ. Mbya syakyo syaĩle kwĩthĩwa syĩ kĩlungu kya kĩthembeo kĩu. 3 Waĩle kũkyũmbĩĩa thaavu mũtheu: ngalĩko ya ĩũlũ yakyo, ngalĩ syonthe syakyo kũkĩthyũlũlũka, na mbya syakyo; na waĩle kũkyanakavya na thaavu ndeenĩ syakyo* kũkĩthyũlũlũka. 4 O na ĩngĩ, ũkaseũvya ngome ilĩ sya thaavu kwondũ wakyo ĩtheo wa ndee syakyo* ngalĩkonĩ ilĩ ila isianĩtye, na ngome isu ikakwatĩĩaa mĩtĩ ĩla ĩkatũmĩawa kũkĩkua. 5 Seũvya mĩtĩ ya mũaa* na ũimyũmbĩĩa thaavu. 6 Waĩle kwia kĩthembeo kĩu mbee wa vasia ũla wĩ vakuvĩ na ĩsandũkũ ya Ũkũsĩ, mbee wa ngunĩko ĩla yĩ ĩũlũ wa Ũkũsĩ, vala ngakumĩlĩĩlaa.

7 “Alũni akavĩvĩasya ũvumba wĩ mũuke mũseo ĩũlũ wakyo, nĩ kana wumye syũki ĩũlũ wa kĩthembeo yĩla ũkũmbanyʼa taa kĩla kwakya. 8 O na ĩngĩ, yĩla Alũni ũkũkwatya taa ĩ ya wĩoo,* akavĩvasya ũvumba. Nĩ nthembo ya ũvumba ĩkaumawʼa kĩla ĩvinda mbee wa Yeova nzyawanĩ syenyu syonthe. 9 Ndwaĩlĩte kumya ĩũlũ wakyo ũvumba kana nthembo ya kũvĩvwʼa kana nthembo ya lĩu ĩtetĩkĩlĩtwʼe, na ndwaĩlĩte kwĩta nthembo ya kũnyuwa ĩũlũ wakyo. 10 No nginya Alũni aumasye nthembo kwondũ wa ũekeo wa naĩ ĩũlũ wa mbya syakyo ĩmwe kwa mwaka. Akaumasya nthembo ya ũekeo wa naĩ kwondũ wakyo ĩmwe kwa mwaka nzyawanĩ syenyu syonthe, atũmĩĩte nthakame ĩmwe ya nthembo ya naĩ ya wĩwʼanĩthyo. Nĩ kĩthembeo kĩtheu vyũ kwondũ wa Yeova.”

11 Na ĩndĩ Yeova amwĩa Mose: 12 “Ĩvinda o na yĩva yĩla ũkwosa ũtalo na ũũtala ana ma Isilaeli, no nginya kĩla ũmwe aumĩasye Yeova wovosyo kwondũ wa thayũ wake yĩla meũtalwa. Makeeka ũu nĩ kana ũkũno ndũkese kũetwe ĩũlũ woo yĩla mekũandĩkĩthwʼa. 13 Kĩĩ nĩkyo onthe ala mekũandĩkĩthwʼa makaumasya: nusu sekeli* kwosana na kĩthimo kya sekeli ya vala vandũ vatheu.* Ngela 20* nĩ ũndũ ũmwe na sekeli ĩmwe. Nusu sekeli nĩwʼo mũvothi kwondũ wa Yeova. 14 Kĩla mũndũ waandĩkĩthwʼa ũla wĩ na ũkũũ wa myaka 20 na kwambata akaumasya mũvothi wa Yeova. 15 Athwii mayaĩle kumya mbingĩ na ngya iyaĩle kumya nini kwĩ nusu sekeli* yĩthĩwe mũvothi kwondũ wa Yeova nĩ kana wĩthĩwe nthembo ya ũekeo wa naĩ kwondũ wa mathayũ menyu. 16 Waĩle kwosa mbesa sya vetha sya wĩwʼanĩthyo kuma kwa Aisilaeli na ũisyumya kwondũ wa ũthũkũmi wa ĩeema ya kũmbanĩa, nĩ kana syĩthĩwe ũlilikanyʼo mbee wa Yeova kwondũ wa Aisilaeli, syĩthĩwe wĩwʼanĩthyo kwondũ wa mathayũ menyu.”

17 Yeova aendeeie kwĩa Mose atĩĩ: 18 “Seũvya kalaĩ ka ũthuku ka kũthambĩa na kĩndũ kya kũkailĩĩla; na ĩndĩ ũikaia katĩkatĩ wa ĩeema ya kũmbanĩa na kĩthembeo na ũikekĩa kĩw’ũ. 19 Alũni na ana make makathambĩaa moko na maaũ vo. 20 Yĩla malika ĩeemanĩ ya kũmbanĩa kana yĩla mathengeea kĩthembeo mathũkũme na mayumya nthembo sya mwaki na syũki kwondũ wa Yeova, makathambaa na kĩw’ũ nĩ kana maikakwʼe. 21 No nginya mathambae moko na maaũ nĩ kana maikakwʼe, na no nginya ũndũ ũsu wĩthĩwe wĩ mwolooto wa ĩvinda yonthe kwondũ woo, kwondũ wake na ũsyao wake, nzyawanĩ syoo syonthe.”

22 Yeova aendeeie kwĩa Mose atĩĩ: 23 “Ĩtina wa ũu, osa syĩndũ ila nzeo syĩ mũuke mũseo vyũ: sekeli 500 sya manemane mbũmĩthye, na nusu ya kĩthimo kĩu, sekeli 250, sya mũtalasinĩ ũnyungaa nesa, sekeli 250 sya kane ĩnyungaa nesa, 24 na sekeli 500 sya kesia, ithimĩtwe kwosana na kĩthimo kya sekeli ya vala vandũ vatheu,* o vamwe na ini ĩmwe* ya mauta ma mĩthata. 25 Na ĩndĩ seũvya mauta matheu ma kwĩtĩkĩsya ũtũmĩĩte syĩndũ isu; syaĩlĩte kũvulanwʼa na ũtũĩka.* Makeethĩwa mauta matheu ma kwĩtĩkĩsya.

26 “Waĩle kwĩtĩkĩsya ĩeema ya kũmbanĩa na ĩsandũkũ ya Ũkũsĩ mauta asu, 27 o vamwe na mesa na mĩio yayo yonthe, kĩndũ kya kwilĩĩla taa na mĩio yakyo, kĩthembeo kya ũvumba, 28 kĩthembeo kya nthembo sya kũvĩvwʼa na mĩio yakyo yonthe, na kalaĩ na kĩndũ kya kũkailĩĩla. 29 No nginya ũithesye nĩ kana syĩthĩwe syĩ ntheu vyũ. Mũndũ o na wĩva ũla ũikwataa aĩle kwĩthĩwa e mũtheu. 30 Na ũketĩkĩsya Alũni na ana make mauta na ũimathesya nĩ kana manthũkũme me athembi.

31 “Ũkaneena na Aisilaeli, ũyasya, ‘Aa meendeea kwĩthĩwa me mauta matheu ma kwĩtĩkĩsya kwondũ wakwa nzyawanĩ syenyu. 32 Mayaĩlĩte kũvakwa mwĩĩnĩ wa mũndũ o na wĩva, na mũyaĩlĩte kũseũvya kĩndũ o na kĩva mũtũmĩĩte syĩndũ ta isu. Nĩ kĩndũ kĩtheu. Meendeea kwĩthĩwa me kĩndũ kĩtheu kwenyu. 33 Mũndũ o na wĩva ũla waseũvya mauta mailye ta asu na wavaka mũndũ ũte mwĩtĩkĩlye* amwe no nginya avetangwe* katĩ wa andũ make.’”

34 Na ĩndĩ Yeova eea Mose: “Osa ithimo sianene sya syĩndũ ii syĩ mũuke mũseo: malovoto ma sitakiti, onuka, ngalivani yĩ mũuke mũseo, na ũvani mũtheu. 35 Seũvya ũvumba ũtũmĩĩte syĩndũ isu; syĩndũ isu syĩ mũuke mũseo syaĩlĩte kũvulanwʼa na ũtũĩka,* syĩthĩwe syĩ na mũnyũ, ite na kĩko, na syĩ ntheu. 36 Waĩle kũkima ũmwe ũvinye vyũ na ũyia ũmwe mbee wa Ũkũsĩ ĩeemanĩ ya kũmbanĩa, vala ngakumĩlĩĩlaa. Waĩle kwĩthĩwa wĩ mũtheu vyũ kwaku. 37 Mũyaĩlĩte kwĩseũvĩsya ũvumba wenyu mũtũmĩĩte syĩndũ isu mbulanyʼe. Mwaĩlĩte kũwonaa wĩ kĩndũ kĩtheu kwa Yeova. 38 Mũndũ o na wĩva ũla wĩseũvya ũvumba ta ũsu nĩ kana atanĩe mũuke wawʼo no nginya avetangwe* katĩ wa andũ make.”

31 Yeova aendeeie kũneena na Mose, aimwĩa: 2 “Sisya, nĩnĩnyuvĩte* Mbesaleli mwana wa Uli mwana wa Uulu wa mbaĩ ya Yuta. 3 Ngamusũsya veva wa Ngai, na ngĩmũnenga ũĩ, ũtonyi wa kũelewa maũndũ, na ũmanyi wa kĩla mũthemba wa wĩa ũla ũtethawʼa nĩ mavundi, 4 nĩ kana aseũvye syĩndũ mbanake, athũkũme atũmĩĩte thaavu, vetha, na ũthuku, 5 atile na aivanga mavia, na aiseũvya syĩndũ sya mbwaũ sya kĩla mũthemba. 6 O na ĩngĩ, nĩnĩnyuvĩte Ooliavu mwana wa Aisamaki wa mbaĩ ya Ndani amũtetheesye, na nĩngwĩkĩa ũĩ ngoonĩ sya onthe ala me na ũtũĩka,* nĩ kana maseũvye syĩndũ ii syonthe ila ngwĩaĩe: 7 ĩeema ya kũmbanĩa, ĩsandũkũ ya Ũkũsĩ na ngunĩko yayo, syĩndũ syonthe sya ĩeema, 8 mesa na mĩio yayo, kĩndũ kya kwilĩĩla taa kya thaavu mũtheu na mĩio yakyo yonthe, kĩthembeo kya ũvumba, 9 kĩthembeo kya nthembo sya kũvĩvwʼa na mĩio yakyo yonthe, kalaĩ na kĩndũ kya kũkailĩĩla, 10 ngũa itumĩtwe nesa, ngũa ntheu sya mũthembi Alũni, ngũa sya ana make nĩ kana mathũkũme me athembi, 11 mauta ma kwĩtĩkĩsya, na ũvumba ũnyungaa nesa kwondũ wa vala vandũ vatheu. Makeeka kyonthe kĩla ngwĩaĩe.”

12 Yeova aendeeie kwĩa Mose atĩĩ: 13 “Neena na Aisilaeli na ũimatavya, ‘Mũno mũno, mwaĩle kũkwataa savato syakwa, nũndũ nĩ wonanyʼo katĩ wakwa nenyu, nzyawanĩ syenyu nĩ kana mũtonye kũmanya kana nyie, Yeova, nĩngũmũthesya. 14 No nginya mũkwatae Savato, nũndũ nĩ kĩndũ kĩtheu kwenyu. Ũla wamĩvukya no nginya oawe. Ethĩwa mũndũ o na wĩva nĩwatethya wĩa mũthenya ũsu, mũndũ* ũsu no nginya avetangwe* andũnĩ make. 15 Wĩa waĩle kũtethwʼa mĩthenya thanthatũ, ĩndĩ mũthenya wa mũonza nĩ savato ya kũthũmũa vyũ. Nĩ kĩndũ kĩtheu kwa Yeova. Mũndũ o na wĩva ũkũtethya wĩa mũthenya wa Savato no nginya oawe. 16 No nginya Aisilaeli makwatae Savato; no nginya makwatae Savato nzyawanĩ syoo syonthe. Nĩ ũtianĩo wa ĩvinda yonthe. 17 Nĩ wonanyʼo wa kũendeea katĩ wakwa na andũ ma Isilaeli, nũndũ mĩthenya thanthatũ Yeova nĩwoombie ĩtu na nthĩ na mũthenyanĩ wa mũonza nĩwathũmũie na atanĩa wĩa wake.’”

18 Na amina kũneena na Mose oou Kĩĩmanĩ kya Sinaĩ, nĩwamũnengie masengea elĩ ma Ũkũsĩ, masengea elĩ ma mavia maandĩkĩtwe na kyaa kya Ngai.

32 Ĩvindanĩ o yĩu, andũ nĩmoonie kana Mose nĩwakua ĩvinda yĩasa ayuma kĩĩmanĩ. Kwoou andũ moombana mamũthyũlũlũkĩte Alũni na mamwĩa: “Ũkĩla, tũseũvĩsye ngai ũla ũkatũtongoeasya, nũndũ tũyĩsĩ kĩla kĩkwatie Mose ũũ, mũndũ ũla watũtongoeisye kuma nthĩ ya Misili.” 2 Nĩvo ĩndĩ Alũni wameie atĩĩ: “Osai mĩnaĩ ya thaavu ĩla yĩ matũnĩ ma iveti syenyu, ana menyu, na eĩtu menyu na mũindetee.” 3 Kwoou andũ onthe mambĩĩa kumya mĩnaĩ ya thaavu ĩla yaĩ matũnĩ moo na maetee Alũni. 4 Na ĩndĩ oosa thaavu ũsu kuma kwoo, na aũseũvya na ngesa na watw’ĩka mũvw’anano* wa kasaũ. Na mambĩĩa kwasya: “Ũũ nĩwe Ngai waku, we Isilaeli, ũla wakumisye nthĩ ya Misili.”

5 Yĩla Alũni woonie ũu, nĩwaakie kĩthembeo mbee wa mũvw’anano ũsu. Na ĩtina wa ũu, aneena na wasya mũnene, asya atĩĩ: “Kũkeethĩwa na mboka ũnĩ kwondũ wa Yeova.” 6 Kwoou mũthenya ũla waatĩĩe nĩmookĩlile tene na mambĩĩa kumya nthembo sya kũvĩvw’a na nthembo sya ngwatanĩo. Ĩtina wa ũu, andũ nĩmekalile nthĩ maye na mainyw’a. Na ĩndĩ mookĩla metanĩthye.

7 Nĩvo ĩndĩ Yeova weeie Mose atĩĩ: “Enda, theea, nũndũ andũ maku, ala watongoeisye kuma nthĩ ya Misili, nĩmekĩte ũthũku mũnene. 8 Nĩmelelũkĩte na mĩtũkĩ makatia nzĩa ĩla nameaĩe maendae nayo. Nĩmeseũvĩsye mũvwʼanano* wa kasaũ, na nĩmaendeee kũũkumanĩa na kũwumĩsya nthembo mayasya, ‘Ũũ nĩwe Ngai waku, we Isilaeli, ũla wakũtongoeisye kuma nthĩ ya Misili.’” 9 Na Yeova aendeea kwĩa Mose: “Nĩnonete kana aa nĩ andũ me syongo mbũmũ.* 10 Kwoou ndũkanziĩĩe, na nĩngũmamina vyũ ũthatunĩ wakwa wakanĩte, na eka ngũtwʼĩkĩthye mbaĩ nene vandũ voo.”

11 Nĩvo ĩndĩ Mose wamwĩsũvie* Yeova Ngai wake, amwĩa: “Nĩkĩ, ame Yeova, ũkwenda kwelekelya ũthatu waku wakanĩte andũnĩ maku ĩtina wa kũmaumya nthĩ ya Misili na ũtonyi mwingĩ na kw’oko kwĩ vinya? 12 Nĩkĩ ũkwenda Amisili masye, ‘Aĩ na kĩeleelo kĩthũku yĩla wamatongoeisye amaumye Misili. Endaa kũmoaĩa iĩmanĩ na aimamina vyũ maume ũthyũnĩ wa nthĩ’? Ĩthyũũe ũtie ũthatu waku wakanĩte na ũisũanĩa ĩngĩ* ũtwi waku wa kũetee andũ maku mũisyo ũũ. 13 Lilikana athũkũmi maku Avalaamu, Isaka, na Isilaeli, ala wamevĩtĩe na ĩsyĩtwa yaku mwene ũyasya: ‘Ngatuma ũsyao waku* wongeleka wĩthĩwe ta ndata sya matunĩ, na nganenga ũsyao waku* nthĩ ĩĩ yonthe ĩla nĩvathĩte, nĩ kana yĩthĩwe yoo ĩvinda yonthe.’”

14 Kwoou Yeova ambĩĩa kũsũanĩa ĩngĩ* ĩũlũ wa mũisyo ũla waĩ anasya nũkũetee andũ make.

15 Na ĩndĩ Mose avĩndũka na atheea kuma kĩĩmanĩ akuĩte masengea elĩ ma Ũkũsĩ na moko make. Masengea asu maandĩkĩtwe ngalĩko syonthe; maandĩkĩtwe mbee na ĩtina. 16 Masengea asu maĩ wĩa wa Ngai, na kĩla kyaandĩkĩtwe vo kyaandĩkĩtwe nĩ Ngai kĩvanĩĩwe masengeanĩ asu. 17 Yĩla Yosua wambĩĩie kwĩw’a kĩlonzo kya andũ nũndũ malonzanasya na wasya mũnene, eeie Mose atĩĩ: “Ve wasya wa kaũ kambinĩ.” 18 Ĩndĩ Mose asya:

19 Yĩla Mose wathengeeie kambinĩ oou na oona kala kasaũ na andũ maisũnga, ũthatu wake nĩwambĩĩie kwakana, na ekya ala masengea kuma mokonĩ make na amoaĩa nthĩ wa kĩĩma. 20 Nĩwoosie kasaũ kau maĩ manaseũvya na akavĩvya na mwaki na akatumbatumba katwʼĩka mũtutu; na ĩndĩ aũnyaĩĩkya kĩw’ũnĩ na eeaĩa Aisilaeli makĩnyw’e. 21 Na Mose eea Alũni: “Andũ aa makwĩkie ata nginya wamaetee naĩ ĩnenevete ũu?” 22 Nake Alũni amũsũngĩa amwĩa: “Ndũkathate, mwĩai wakwa. Nĩwĩsĩ nesa kana andũ aa nĩmendete kwĩka ũla ũthũku. 23 Kwoou mambĩie, ‘Tũseũvĩsye ngai ũla ũkatũtongoeasya, nĩkwĩthĩwa tũyĩsĩ kĩla kĩmũkwatie Mose ũũ, mũndũ ũla watũtongoeisye kuma nthĩ ya Misili.’ 24 Kwoou namea, ‘Mũndũ o na wĩva ũla wĩ na thaavu o na ũmwe no nginya awumye na ainenga.’ Na ĩndĩ nawĩkya mwakinĩ na kasaũ kaa kaumĩla.”

25 Mose nĩwoonie kana andũ mayaasiĩĩwa, nũndũ Alũni ndaamasiĩĩa, na kĩu kyatuma mavũthw’a nĩ ala mamavĩngaa. 26 Na ĩndĩ Mose aũngama mũvĩanĩ wa kambi na asya: “Nũũ wĩ ngalĩko ya Yeova? Oke vala nĩĩ!” Na Alivai onthe moombana mamũthyũlũlũkĩte. 27 Na ĩndĩ amea: “Ũũ nĩw’o Yeova Ngai wa Isilaeli wasya, ‘No nginya kĩla ũmwe wenyu eyove ũvyũ wake na aivĩtĩla kĩla vandũ kambinĩ kuma mũvĩa kũthi mũvĩa, oaĩte mwana-a-ĩthe wake, mũtũi wake, na mũndũ me ndũũ mũno.’” 28 Alivai nĩmeekie kĩla Mose wawetie. Kwoou aũme ta 3,000 nĩmooaiwe mũthenya ũsu. 29 Na ĩndĩ Mose asya: “Ĩvathei* kwondũ wa Yeova ũmũnthĩ, nũndũ kĩla ũmwe wenyu nĩwookĩlĩla mwana wake mwene na mwana-a-ĩthe wake mwene; ũmũnthĩ nũkũmũathima.”

30 Mũthenya ũla waatĩĩe, Mose eeie andũ atĩĩ: “Nĩmwĩkĩte naĩ nene mũno, na yu nĩngwambata kũla kwĩ Yeova ngone kana no nĩsũvane kwondũ wa naĩ yenyu.” 31 Kwoou Mose nĩwasyokie kũla kwĩ Yeova na asya: “Andũ aa mekĩte naĩ nene ta kĩ! Nĩmaneeseũvĩsye ngai ya thaavu! 32 Ĩndĩ yu ethĩwa nũkwenda, maekee naĩ yoo; ethĩwa ti ũu, mwa mbute kuma ĩvukunĩ yaku yĩla ũandĩkĩte.” 33 O na ũu wĩ o vo, Yeova eeie Mose atĩĩ: “Mũndũ o na wĩva ũla ũmbĩtĩsye, ngamũvuta kuma ĩvukunĩ yakwa. 34 Enda yu, tongoesya andũ nginya vandũ vala naũtavisye. Sisya! Mũlaĩka wakwa akaendaa mbee wenyu, na mũthenya ũla ngatwʼĩĩa andũ sila, ngamaetee ũsilĩlo nũndũ wa naĩ yoo.” 35 Na ĩndĩ Yeova ambĩĩa kũkũna andũ nũndũ nĩmaseũvisye kasaũ, kala Alũni waseũvisye.

33 Yeova aendeeie kwĩa Mose atĩĩ: “Uma vaa ũthi wĩ na andũ ala watongoeisye kuma nthĩ ya Misili. Endai kyalo nginya nthĩ ĩla neevĩtĩie Avalaamu, Isaka, na Yakovo, ndyasya, ‘Ngamĩnenga ũsyao waku.ʼ* 2 Ngatũma mũlaĩka mbee wenyu na ngalũngya Akanaanĩ, Aamoli, Aititi, Avelisi, Aivi, na Ayevusi. 3 Ambatai mũthi nthĩ yusũĩte ĩia na ũkĩ wa nzũkĩ. Ĩndĩ nyie ndithi katĩ wenyu, nũndũ mwĩ andũ me syongo mbũmũ,* na nĩndonya kũmwanangĩa vyũ nzĩanĩ.”

4 Yĩla andũ meewie ndeto isu sya kũtelemya, nĩmambĩĩie kũmeta, na vai ũmwe woo waaĩkĩa syĩndũ syake sya kwĩyanakavya. 5 Na Yeova eea Mose: “Tavya Aisilaeli, ‘Inywʼĩ mwĩ andũ me syongo mbũmũ.* O ĩvinda yĩmwe no nĩvĩtĩle katĩ wenyu na ndimũmina vyũ. Kwoou yu mũikekĩe syĩndũ syenyu sya kwĩyanakavya ndisũanĩa ũndũ ngwĩkana nenyu.ʼ” 6 Kwoou kuma Kĩĩmanĩ kya Olevu na kũendeea, Aisilaeli nĩmaekie kwĩkĩa* syĩndũ syoo sya kwĩyanakavya.

7 Yu Mose nĩwoosie ĩeema yake na ayamba nza wa kambi, vaasanga na kambi, na ayĩta ĩeema ya kũmbanĩa. Kĩla mũndũ wendaa kũkũlya Yeova ũtao aumaalaa akathi ĩeemanĩ yĩu ya kũmbanĩa, yĩla yaĩ nza wa kambi. 8 Yĩla Mose ũendete ĩeemanĩ yĩu oou, andũ onthe nĩmookĩlaa na maiũngama mũomonĩ wa maeema moo, na maisyaĩĩsya Mose nginya ailika ĩeemanĩ yĩu. 9 Mose alika ĩeemanĩ yĩu oou, kĩtuĩ kya ĩtu nĩkyatheeaa na kĩyĩũngama mũomonĩ wa ĩeema yĩu Ngai aendeee kũneena na Mose. 10 Andũ onthe moona kĩtuĩ kya ĩtu kĩũngamĩte mũomonĩ wa ĩeema yĩu, kĩla ũmwe woo nĩwaũngamaa na aikumana mũomonĩ wa ĩeema yake mwene. 11 Yeova aneenaa na Mose ũthyũ kwa ũthyũ o tondũ mũndũ ũtonya kũneena na mũndũ ũngĩ. Yĩla wasyoka kambinĩ, Yosua mwana wa Nuni, mũthũkũmi na mũtetheesya wake, ndaumaa ĩeemanĩ.

12 Na Mose eea Yeova: “Sisya, wĩmbĩa, ‘Tongoesya andũ aa mwambate,’ ĩndĩ ndũmanyĩthĩtye ũla ũũndũma nake. O na ĩngĩ, wasya, ‘Nĩngwĩsĩ na ĩsyĩtwa,* o na nĩwonete ũseo methonĩ makwa.’ 13 Mwa, ethĩwa nĩnonete ũseo methonĩ maku, manyĩthya nzĩa syaku nĩ kana nĩũmanye na ndiendeea kwona ũseo methonĩ maku. O na ĩngĩ, lilikana kana mbaĩ ĩĩ nĩ andũ maku.” 14 Kwoou asya: “Nyie mwene ngaendanyʼa* naku na ngaũnenga ũthũmũo.” 15 Na ĩndĩ Mose amwĩa: “Ethĩwa we mwene* ndwĩendanyʼa naitũ, ndũkatũtongoesye twambate tume vaa. 16 Vakamanyĩka ata kana nĩnonete ũseo methonĩ maku, nyie na andũ maku? Tyo yĩla wĩendanyʼa naitũ, nĩ kana nyie na andũ maku tũvathũkanwʼe na andũ ala angĩ onthe ĩũlũ wa nthĩ?”

17 Na Yeova aendeea kwĩa Mose: “O na ĩngĩ, nĩngwĩka ũndũ ũũ ũũkũlya, nũndũ nĩwonete ũseo methonĩ makwa na nĩngwĩsĩ na ĩsyĩtwa.” 18 Na ĩndĩ Mose asya: “Mwa nĩngũkwĩsũva ũmbonyʼe ũtheu waku mũtisu.” 19 Ĩndĩ asya: “Ngatuma ũseo wakwa wʼonthe ũvĩtĩla mbee wa ũthyũ waku, na ngatavanyʼa mbee waku ĩsyĩtwa ya Yeova; na ngoonyʼa ũseo ũla ngonyʼa ũseo, na ngeewʼĩa tei ũla ngewʼĩa tei.” 20 Ĩndĩ ongela kwasya: “Ndwĩsa kwona ũthyũ wakwa, nũndũ vai mũndũ ũtonya kũmbona na akekala thayũ.”

21 Yeova aendeeie kwasya atĩĩ: “Vaa ve vandũ ve vakuvĩ nakwa. Ũngama ĩvianĩ yĩla yĩ vau. 22 Yĩla ũtheu wakwa mũtisu ũkethĩwa ũvĩtĩte, ngakwia mwatũkanĩ wa ĩvia na ngaũvithanyʼa na kwʼoko kwakwa nginya nĩvĩte. 23 Ĩtina wa ũu, ngavetanga kwʼoko kwakwa, naku ũkoona mũongo wakwa. Ĩndĩ ũthyũ wakwa ndũkethĩwa ũtonya kwoneka.”

34 Na ĩndĩ Yeova eea Mose: “Ĩyasĩe masengea elĩ ma mavia mailye ta ala ma mbee, na ngaandĩka masengeanĩ asu ndeto ila inaĩ masengeanĩ ma mbee, ala ũnooaie. 2 Ĩyũmbanĩsye kwakya, nũndũ kwakya ũkambata Kĩĩmanĩ kya Sinaĩ na ũyĩũngama mbee wakwa vau kĩĩmanĩ ĩũlũ. 3 Ĩndĩ ndũkaambatanyʼe na mũndũ ũngĩ, na vai mũndũ ũngĩ o na wĩva waĩlĩte kwonekela vandũ o na va kĩĩmanĩ kĩu. O na ndĩthya sya malondu kana ngʼombe iyaĩlĩte kũĩthwʼa mbee wa kĩĩma kĩu.”

4 Kwoou Mose nĩwasie masengea elĩ ma mavia mailye ta ala ma mbee na aamũka kwakya tene na ambata Kĩĩmanĩ kya Sinaĩ, o tondũ Yeova wamwĩaĩe, na akua masengea asu elĩ ma mavia na moko. 5 Na ĩndĩ Yeova atheea e nthĩnĩ wa ĩtu na aũngama nake vau na atavanyʼa ĩsyĩtwa ya Yeova. 6 Na Yeova avĩtĩla mbee wake atavanĩtye atĩĩ: “Yeova, Yeova, Ngai wĩ tei na ĩnee,* ũtathataa na mĩtũkĩ na wĩ wendo mwingĩ ũtathelaa* na w’o,* 7 wonasya makili wendo ũtathelaa, ũekeaa mavĩtyo na kũlea kwĩwʼa o na naĩ, ĩndĩ ndakaema kwosea ĩtambya ala me na mavĩtyo, ayosea ĩtambya ana na syana syoo nũndũ wa mavĩtyo ma aa-ĩthe moo, kũvika nzyawa ya katatũ na kũvika nzyawa ya kana.”

8 Mose nĩwakumanie nginya nthĩ na mĩtũkĩ na avalũka. 9 Na ĩndĩ asya: “Yu, ethĩwa nĩnonete ũseo methonĩ maku, ame Yeova, mwa nĩngũkwĩsũva, Yeova, endanyʼa naitũ wĩ katĩ witũ, o na kau twĩ andũ me syongo mbũmũ,* na ũitũekea mavĩtyo maitũ na naĩ sitũ, na ũitwosa twĩthĩwe malĩ yaku mwene.” 10 Nake asya: “Yu nĩngũseũvya ũtianĩo: Ngeeka maũndũ ma kũsengyʼa mataaĩsa kwĩkwa* nthĩ yonthe kana katĩ wa mbaĩ syonthe mbee wa andũ maku onthe, na andũ onthe ala mũkatũa katĩ wamo makoona wĩa wa Yeova, nũndũ ngeeka ũndũ wa mwanya mũno kwondũ wenyu.

11 “Ĩthukĩĩsyei nesa kĩla ngũmwĩaĩa ũmũnthĩ. Yu nĩngũlũngya Aamoli, Akanaanĩ, Aititi, Avelisi, Aivi, na Ayevusi maume mbee wenyu. 12 Ĩsũvĩei mũikatianĩe ũtianĩo na ekali ma nthĩ ĩla mũendete, ũndũ ũsu ndũkethĩwe kĩtei kwenyu. 13 Ĩndĩ mwaĩlĩte kũvalũkya ithembeo syoo, mwananganyʼe ituĩ syoo sya ũthaithi, na mũitemanga mĩtĩ yoo ya ũthaithi.* 14 Mũikakumanĩe ngai ĩngĩ, nũndũ Yeova esĩkĩe ta Ngai wendaa* athaithwe e weka.* Ĩĩ, we nĩ Ngai wendaa kũthaithwa e weka. 15 Ĩsũvĩei mũikatianĩe ũtianĩo na ekali ma nthĩ ĩsu, nũndũ yĩla makeka ũmalwaya na ngai syoo na maithembea ngai syoo, ũmwe woo akamũthokya na mũkaya kuma nthembonĩ yake. 16 Na ĩndĩ, vate nzika, mũkoosa eĩtu amwe moo kwondũ wa ana menyu, na eĩtu moo makeeka ũmalwaya na ngai syoo na maituma ana menyu meka ũmalwaya na ngai syoo.

17 “Mũikaseũvye ngai sya kyũma kĩtwekethye.

18 “Mũkatanĩaa Mboka ya Mũkate ũte Ĩlawa. Mũkaĩsaa mũkate ũte ĩlawa, o tondũ nĩmwĩaĩe; mũkeekaa ũu mĩthenya mũonza ĩvindanĩ yĩla yĩnyuvĩtwe mweinĩ wa Avivu,* nũndũ mweinĩ wa Avivu nĩwʼo mwaumie Misili.

19 “Aũme onthe ala masyawa ma mbee* nĩ makwa, o vamwe na indo syenyu syonthe, yĩthĩwe nĩ nzaũ nũme ĩla yasyawa mbee kana ĩlondu ĩũme yĩla yasyawa mbee. 20 Mwaĩle kwovosya na ĩlondu ĩngʼoi yĩla yasyawa mbee. Ĩndĩ mwalea kũyovosya, no nginya mũyĩtũle ngingo. Mwaĩle kwovosya makithathi onthe* ma ana menyu. Vai mũndũ waĩlĩte kũka mbee wakwa moko mathei.

21 “Mũkatethasya wĩa mĩthenya thanthatũ, ĩndĩ mũthenya wa mũonza mũithũmũa.* Ĩvindanĩ ya kũĩma na mũlaũ na ya kũketha, mũkathũmũaa.

22 “Na mũkatanĩaa Mboka yenyu ya Syumwa na ũsyao mwĩu wa ngetha ya nganũ, na Mboka ya Kũmbanyʼa* mũthyanĩ wa mwaka.

23 “Mavinda atatũ kwa mwaka, aũme maku onthe makookaa mbee wa Mwĩai ũla wa w’o, Yeova, Ngai wa Isilaeli. 24 Nũndũ ngalũngya mbaĩ syume mbee wenyu, na nganenevya kĩsio kyenyu, na vai mũndũ ũkewʼĩa nthĩ yenyu ĩtomo yĩla mũkethĩawa mwambatĩte mũkone ũthyũ wa Yeova Ngai mavinda atatũ kwa mwaka.

25 “Mũikaumye nthakame ya nthembo yakwa vamwe na kĩndũ o na kĩva kĩkĩĩtwe ĩlawa. Nthembo ya mboka ya Vasaka ndyaĩlĩte kwiwa ũtukũ w’onthe nginya kwakya.

26 “Ũsyao mwĩu wa mbee ũla mũseo vyũ wa mũthanga waku waĩlĩte kũetwe nyũmbanĩ ya Yeova Ngai waku.

“Ndũkatheũkĩsye katena ka mbũi ĩianĩ ya inyia wako.”

27 Na Yeova aendeea kwĩa Mose atĩĩ: “Waĩle kũandĩka ndeto ii, nũndũ kwosana na ndeto ii, nĩngũtianĩa ũtianĩo naku na Isilaeli.” 28 Na ekala vau na Yeova mĩthenya 40, mũthenya na ũtukũ. Ndaaya mũkate na ndaanyw’a kĩw’ũ. Na aandĩka* ala masengeanĩ ndeto sya ũtianĩo, ĩla Mĩao Ĩkũmi.*

29 Na ĩndĩ Mose atheea kuma Kĩĩmanĩ kya Sinaĩ, na ala masengea elĩ ma Ũkũsĩ maĩ kwʼokonĩ kwake. Yĩla watheeie kuma kĩĩmanĩ kĩu, Mose ndeesĩ kana kĩkonde kya ũthyũ wake nĩkyakenaa nũndũ eethĩĩtwe aineena na Ngai. 30 Yĩla Alũni na Aisilaeli onthe masyaisye Mose, nĩmoonie kana kĩkonde kya ũthyũ wake nĩkyakenaa na makĩa kũmũthengeea.

31 Ĩndĩ Mose ameta vala ũĩ, kwoou Alũni na anene onthe ma ũmbano mooka vala ve Mose, nake aneena namo. 32 Ĩtina wa ũu, Aisilaeli nĩmookie vakuvĩ nake, na amanenga mĩao yonthe ĩla Yeova wamũnengie Kĩĩmanĩ kya Sinaĩ. 33 Yĩla Mose wamina kũneena namo, eevwʼĩkaa suka mũvũthũ ũthyũnĩ wake. 34 Ĩndĩ yĩla Mose wathi mbee wa Yeova akaneene nake, nĩwaumasya suka ũsu nginya aumaale. Na ĩndĩ nĩwaumaalaa na aivuanĩsya Aisilaeli mĩao ĩla wanengwa. 35 Na Aisilaeli nĩmoonaa kana kĩkonde kya ũthyũ wa Mose nĩkyakenaa; nĩvo ĩndĩ Mose weevwʼĩkaa ĩngĩ ũla suka mũvũthũ ũthyũnĩ nginya athi akaneene na Ngai.*

35 Ĩtina Mose nĩwoombanisye ũmbano w’onthe wa Aisilaeli vamwe na amea atĩĩ: “Aa nĩmo maũndũ ala Yeova wĩaĩte mekwe: 2 No mũtethye wĩa mĩthenya thanthatũ, ĩndĩ mũthenya wa mũonza waĩlĩte kwĩthĩwa kĩndũ kĩtheu kwenyu, savato ya kũthũmũa vyũ kwondũ wa Yeova. Mũndũ o na wĩva ũla ũkatethya wĩa mũthenya ũsu akooawa. 3 Mũikavuve mwaki mũthenya wa Savato vandũ o na va vala mwĩkalaa.”

4 Na ĩndĩ Mose eea ũmbano w’onthe wa Aisilaeli: “Ũũ nĩwʼo Yeova wĩaĩte, 5 ‘Osai mũvothi kwondũ wa Yeova kuma katĩ wenyu. Ekai kĩla mũndũ wĩ na ngoo ya kwenda aete mũvothi kwondũ wa Yeova: thaavu, vetha, ũthuku, 6 ũlii wa mbuluu, w’ĩa wa langi wa nzambalaũ, kĩtambaa kĩtune mũno, katane nzeo, wʼĩa wa mbũi, 7 ithuma sya ndũũme ikundĩtwʼe langi mũtune, ithuma mbololo,* mbwaũ sya mũaa,* 8 mauta kwondũ wa taa, seli kwondũ wa mauta ma kwĩtĩkĩsya na kwondũ wa ũvumba wĩ mũuke mũseo, 9 mavia ma soamu, na mavia angĩ ma kũvangwa evotinĩ na kamũvukonĩ ka kĩthũi.

10 “‘Ekai onthe ala me na ũtũĩka* katĩ wenyu moke na maiseũvya syĩndũ syonthe ila Yeova wĩaĩte, 11 nasyo nĩ, ĩeema ya ũthaithi vamwe na ilungu syayo syonthe na kĩndũ kyayo kya kũyĩvwʼĩka, ngolya syayo na vulemu syayo, mĩamba yayo, ituĩ syayo, na matina mayo me na maima; 12 Ĩsandũkũ na mĩtĩ yayo, ngunĩko, na vasia wa kũyĩsiĩĩa; 13 mesa na mĩtĩ yayo na mĩio yayo yonthe na mĩkate ya wonanyʼo; 14 kĩndũ kya kwilĩĩla taa kwondũ wa kyeni na mĩio yakyo na taa syakyo na mauta ma kũsyakanyʼa; 15 kĩthembeo kya ũvumba na mĩtĩ yakyo; mauta ma kwĩtĩkĩsya na ũvumba wĩ mũuke mũseo; vasia kwondũ wa mũomo wa ĩeema ya ũthaithi; 16 kĩthembeo kya nthembo sya kũvĩvwʼa na kĩndũ kyakyo kya syũma sya ũthuku ikelanganĩtwʼe, mĩtĩ yakyo na mĩio yakyo yonthe; kalaĩ na kĩndũ kya kũkailĩĩla; 17 itambaa iniinĩte sya kĩwanza kya ĩeema, ituĩ syayo na matina masyo me na maima; vasia wa mũvĩa wa kĩwanza kya ĩeema; 18 syambo sya ĩeema ya ũthaithi na syambo sya kĩwanza kya ĩeema yĩu na makanda mayo; 19 ngũa itumĩtwe nesa sya kũthũkũma vala vandũ vatheu, ngũa ntheu sya mũthembi Alũni, na ngũa sya ana make nĩ kana mathũkũme me athembi.’”

20 Kwoou ũmbano w’onthe wa Aisilaeli wauma mbee wa Mose. 21 Ĩtina wa ũu, kĩla mũndũ ngoo yake yamũthangaaisye na kĩla mũndũ veva wake wamwĩkĩie vinya ooka na aete mũvothi wake kwondũ wa Yeova ũtũmĩwe kwondũ wa ĩeema ya kũmbanĩa, kwondũ wa ũthũkũmi wayo w’onthe, na kwondũ wa ngũa ntheu. 22 Nĩmaendeeie kũka, aũme o vamwe na aka, kĩla mũndũ waĩ na ngoo ya kwenda, maete vĩnĩ mbanakavye, mĩnaĩ, mbete, na syĩndũ ingĩ sya wanake, o vamwe na syĩndũ sya kĩla mũthemba sya thaavu. Onthe nĩmamũeteie Yeova nthembo syoo* sya thaavu. 23 Na onthe ala maĩ na ũlii wa mbuluu, w’ĩa wa langi wa nzambalaũ, kĩtambaa kĩtune mũno, katane nzeo, wʼĩa wa mbũi, ithuma sya ndũũme ikundĩtwʼe langi mũtune, na ithuma mbololo maete. 24 Onthe ala maumasya vetha na ũthuku maete mũvothi wa Yeova, na onthe ala maĩ na mbwaũ sya mũaa* kwondũ wa wĩa o na wĩva masiete.

25 Aka onthe ala maĩ na ũtũĩka mookotha na moko moo, na maete kĩla mookothie: ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo. 26 Na aka onthe maĩ na ũtũĩka ala ngoo syoo syamathangaaisye mookotha w’ĩa wa mbũi.

27 Na anene maete mavia ma soamu na mavia angĩ mavangwe evotinĩ na kamũvukonĩ ka kĩthũi, 28 na seli na mauta kwondũ wa kwakanyʼa taa na kwondũ wa mauta ma kwĩtĩkĩsya na kwondũ wa ũvumba wĩ mũuke mũseo. 29 Aũme na aka onthe ala ngoo syoo syamathangaaisye nĩmaetie kĩndũ kwondũ wa wĩa ũla Yeova, kwĩsĩla Mose, weeaĩte ũtethwʼe; Aisilaeli nĩmamũeteie Yeova syĩndũ isu ta nthembo ya ngenda.

30 Nĩvo ĩndĩ Mose weeie Aisilaeli: “Sisyai, Yeova nũnyuvĩte Mbesaleli mwana wa Uli mwana wa Uulu wa mbaĩ ya Yuta. 31 Nũmusũĩtye veva wa Ngai, akamũnenga ũĩ, ũtonyi wa kũelewa maũndũ, na ũmanyi wa kĩla mũthemba wa wĩa ũla ũtethawʼa nĩ mavundi 32 nĩ kana aseũvye syĩndũ mbanake, athũkũme atũmĩĩte thaavu, vetha, na ũthuku, 33 atile na aivanga mavia, na aiseũvya syĩndũ mbanake sya mbwaũ sya mĩthemba yonthe. 34 Na nĩwĩkĩĩte ũtonyi ngoonĩ yake nĩ kana amanyĩsye, we na Ooliavu mwana wa Aisamaki wa mbaĩ ya Ndani. 35 Nũmausũĩtye ũtũĩka* matethye wĩa w’onthe ũla ũtethawʼa nĩ mavundi, mũndũ wĩsĩ kwanakavya syĩndũ sya kũtuma, na mũndũ ũla ũtumaa na ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo, na wa mũtumi wa ngũa. Aũme aa makatethya wĩa wa kĩla mũthemba na maiseũvya syĩndũ sya mĩthemba yonthe.

36 “Mbesaleli akathũkũma vamwe na Ooliavu na kĩla mũndũ wĩ na ũtũĩka* ũla Yeova ũnengete ũĩ na ũtonyi wa kũelewa maũndũ nĩ kana amanye ũndũ waĩle kũtethya wĩa wʼonthe wa ũthũkũmi mũtheu o tondũ Yeova wĩaĩte.”

2 Nĩvo ĩndĩ Mose weetie Mbesaleli na Ooliavu na kĩla mũndũ waĩ na ũtũĩka ũla Yeova weekĩĩte ngoonĩ yake ũĩ, kĩla mũndũ ngoo yake yamũthangaaisye eyumye atethye wĩa ũsu. 3 Na ĩndĩ moosa mĩvothi yonthe kuma kũla kwĩ Mose ĩla Aisilaeli maetete kwondũ wa wĩa wa ũthũkũmi mũtheu. Ĩndĩ o na ũu wĩ o vo, nĩmaendeeie kũmũetee nthembo sya ngenda, kwakya kũthi kũla kũngĩ.

4 Na ĩndĩ mambĩĩa kũtethya wĩa ũsu mũtheu, athũkũmi onthe me ũtũĩka nĩmookaa, ũmwe ĩtina wa ũla ũngĩ, 5 na matavasya Mose atĩĩ: “Andũ maendeee kũete syĩndũ mbingĩ mbee wa kĩla kĩkwendeka kwondũ wa wĩa ũla Yeova wĩaĩte ũtethwʼe.” 6 Kwoou Mose eeyĩaa kĩmanyĩthya kĩĩ kyumwʼe kambinĩ yonthe: “Aũme na aka, mũikaete syĩndũ ingĩ o na syĩva kwondũ wa mũvothi mũtheu.” Nũndũ wa ũu, andũ masiĩĩwa maikaete kĩndũ kĩngĩ o na kĩva. 7 Syĩndũ isu nĩsyeanĩte kwondũ wa wĩa wʼonthe ũla waaĩlĩte kũtethwʼa, o na syaĩ mbingĩ kũvĩtũka.

8 Kwoou athũkũmi onthe ala maĩ na ũtũĩka nĩmaseũvisye ĩeema ya ũthaithi na itambaa ĩkũmi sya ĩeema sya katane nzeo mbokothe, ũlii wa mbuluu, w’ĩa wa langi wa nzambalaũ, na kĩtambaa kĩtune mũno; aiseũvisye* syĩ na mavisa ma akelũvi mekĩte kũtumĩĩwa. 9 Kĩla kĩtambaa kya ĩeema kyaĩ na ũasa wa mĩkono 28* na ũthanthau wa mĩkono 4. Itambaa syonthe sya ĩeema nĩsyeanene. 10 Na ĩndĩ akwatanyʼa itambaa itano katĩ wa itambaa isu sya ĩeema, na akwatanyʼa itambaa ila ingĩ itano sya ĩeema. 11 Ĩtina wa ũu, nĩwaseũvisye ikwatũ sya ũlii wa mbuluu ũteenĩ wa kĩtambaa kya mbee kya ĩeema vala kĩũkwatanĩwʼa. Na eeka oou ũteenĩ wa kĩtambaa kya ĩeema kĩla kĩ vaasa vyũ vala kĩũkwatanĩwʼa. 12 Aseũvisye ikwatũ 50 kĩtambaanĩ kya mbee kya ĩeema na ikwatũ 50 ũteenĩ ũla ũngĩ wa kĩtambaa kya ĩeema vala iũkwatanĩwʼa nĩ kana wĩthĩe ikwatũ isu nisianĩtye. 13 Mũthya, aseũvisye ngolya 50 sya thaavu na akwatanyʼa itambaa sya ĩeema vamwe na ngolya isu, kwoou ĩeema yĩu ya ũthaithi yatwʼĩka kĩndũ kĩmwe.

14 Na ĩndĩ aseũvya itambaa sya ĩeema sya wʼĩa wa mbũi sya kũvwʼĩka ĩeema ya ũthaithi. Aseũvisye itambaa 11 sya ĩeema. 15 Kĩla kĩtambaa kya ĩeema kyaĩ na ũasa wa mĩkono 30 na ũthanthau wa mĩkono 4. Itambaa isu 11 sya ĩeema nĩsyeanene. 16 Na ĩndĩ akwatanyʼa itambaa itano katĩ wa itambaa isu sya ĩeema, na akwatanyʼa itambaa ila ingĩ thanthatũ sya ĩeema. 17 Ĩtina wa ũu, aseũvisye ikwatũ 50 iatĩanĩe ũteenĩ wa kĩtambaa kya ĩeema kĩla kĩ vaasa vyũ vala kĩũkwatanĩwʼa, na aseũvya ikwatũ 50 iatĩanĩe ũteenĩ wa kĩtambaa kĩla kĩngĩ kya ĩeema vala siũkwatanĩwʼa. 18 Na aseũvya ngolya 50 sya ũthuku sya kũkwatanyʼa ĩeema nĩ kana yĩtwʼĩke kĩndũ kĩmwe.

19 Na aseũvya kĩndũ kya kũvwʼĩka ĩeema kya ithuma sya ndũũme ikundĩtwʼe langi mũtune na kĩndũ kya kũvwʼĩka kya ithuma mbololo* kilĩĩlwe ĩũlũ wakyo.

20 Ĩtina wa ũu, nĩwaseũvisye vulemu siũngamĩte sya mbwaũ sya mũaa* kwondũ wa ĩeema ya ũthaithi. 21 Kĩla vulemu yaĩ na ũtũlu wa mĩkono ĩkũmi na ũthanthau wa mũkono ũmwe na nusu. 22 Kĩla vulemu yaĩ na mĩthya ĩlĩ myasũvye ĩkwatanĩtwʼe.* Ũu nĩwʼo waseũvisye vulemu syonthe sya ĩeema ya ũthaithi. 23 Kwoou aseũvya vulemu kwondũ wa ngalĩko ya ĩtheo ya ĩeema yĩu, vulemu 20, isyaĩtye ngalĩko ya ĩtheo. 24 Ĩtina wa ũu, aseũvya matina 40 ma vetha me na maima methĩwe ungu wa vulemu isu 20, matina elĩ me na maima ungu wa vulemu ĩmwe kwondũ wa mĩthya ĩlĩ myasũvye yayo na matina elĩ me na maima ungu wa kĩla vulemu ĩatĩĩe kwondũ wa mĩthya ĩlĩ myasũvye yayo. 25 Kwondũ wa ngalĩko ĩla ĩngĩ ya ĩeema ya ũthaithi, ngalĩko ya ĩũlũ, aseũvya vulemu 20 26 na matina masyo 40 ma vetha me na maima, matina elĩ me na maima ungu wa vulemu ya mbee na matina elĩ me na maima ungu wa kĩla ĩmwe ya vulemu ila ingĩ.

27 Nĩwaseũvisye vulemu thanthatũ kwondũ wa kĩlungu kya ĩtina kya ĩeema yĩu ya ũthaithi welekele ũthũĩlonĩ wa sua. 28 Na konanĩ ilĩ sya ĩtina aseũvya vulemu ilĩ syĩthĩwe ituĩ sya konanĩ sya ĩeema ya ũthaithi. 29 Ituĩ isu syakwatanĩtwʼe ilĩ kuma nthĩ nginya ĩũlũ, kũvika ngomenĩ ya mbee. Ũu nĩwʼo weekanie na ituĩ isu ilĩ sya konanĩ. 30 Kwoou syonthe syaĩ vulemu 8 na matina masyo 16 ma vetha me na maima, matina 2 me na maima ungu wa kĩla vulemu.

31 Ĩtina wa ũu, aseũvya mĩamba ya mbwaũ sya mũaa,* mĩamba ĩtano kwondũ wa vulemu sya ngalĩko ĩmwe ya ĩeema ya ũthaithi 32 na mĩamba ĩtano kwondũ wa vulemu sya ngalĩko ĩla ĩngĩ ya ĩeema ya ũthaithi na ĩtano kwondũ wa vulemu sya ĩeema ya ũthaithi sya ngalĩko ya ĩtina welekele ũthũĩlonĩ wa sua. 33 Na aseũvya mũamba wa katĩ wĩsĩle katĩkatĩ wa vulemu isu kuma mũthya ũmwe nginya mũthya ũla ũngĩ. 34 Na oombĩĩa vulemu isu thaavu, na aseũvya ngome syasyo sya thaavu nĩ kana ikwatĩĩae mĩamba ĩsu, na oombĩĩa mĩamba ĩsu thaavu.

35 Na ĩndĩ aseũvya vasia wa ũlii wa mbuluu, wʼĩa wa langi wa nzambalaũ, kĩtambaa kĩtune mũno, na katane nzeo mbokothe. Aũseũvisye wĩ na mavisa ma akelũvi mekĩte kũtumĩĩwa. 36 Na ĩndĩ aũseũvĩsya ituĩ inya sya mũaa* na asyũmbĩĩa thaavu, o vamwe na ngolya sya thaavu, na aiseũvĩsya matina ana ma vetha me maima. 37 Ĩtina wa ũu, aseũvya vasia kwondũ wa mũomo wa ĩeema atũmĩĩte ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe, syonthe itumanĩwʼe vamwe, 38 o vamwe na ituĩ itano syawʼo na ngolya syasyo. Nĩwoombĩĩie thaavu ngalĩko ya ĩũlũ yasyo vamwe na syĩndũ syasyo sya kũkwatanyʼa,* ĩndĩ matina masyo atano me na maima maĩ ma ũthuku.

37 Na ĩndĩ Mbesaleli aseũvya Ĩsandũkũ ya mbwaũ sya mũaa.* Yaĩ na ũasa wa mĩkono ĩlĩ na nusu* na ũthanthau wa mũkono ũmwe na nusu na ũtũlu wa mũkono ũmwe na nusu. 2 Na ayũmbĩĩa thaavu mũtheu nthĩnĩ na nza na ayanakavya na thaavu ndeenĩ syayo* kũyĩthyũlũlũka. 3 Ĩtina aseũvya ngome inya sya thaavu kwondũ wayo, syĩthĩwe ĩũlũ wa maaũ mayo ana, ngome ilĩ ngalĩko ĩmwe na ngome ilĩ ngalĩko ĩla ĩngĩ. 4 Na asyoka aseũvya mĩtĩ ya mũaa* na amyũmbĩĩa thaavu. 5 Na ĩndĩ eekĩa mĩtĩ ĩsu katĩkatĩ wa ngome ila syaĩ ngalĩko syelĩ sya Ĩsandũkũ yĩu nĩ kana ĩtũmĩawe kũkua Ĩsandũkũ yĩu.

6 Nĩwaseũvisye ngunĩko ya thaavu mũtheu. Yaĩ na ũasa wa mĩkono ĩlĩ na nusu na ũthanthau wa mũkono ũmwe na nusu. 7 Na asyoka aseũvya na nyũndo* akelũvi elĩ ma thaavu mĩthyanĩ ĩlĩ ya ngunĩko ĩsu. 8 Mũkelũvi ũmwe aĩ mũthyanĩ ũmwe, na mũkelũvi ũla ũngĩ aĩ mũthyanĩ ũla ũngĩ. Aseũvisye akelũvi asu mĩthyanĩ yelĩ ya ngunĩko ĩsu. 9 Akelũvi asu elĩ matambũũkĩtye nthwau syoo syelekele ĩũlũ, mavw’ĩkĩte ngunĩko na nthwau syoo. Nĩmasianĩtye, na mothyũ moo masyaĩtye ngunĩko.

10 Na ĩndĩ aseũvya mesa ya mbwaũ sya mũaa.* Yaĩ na ũasa wa mĩkono ĩlĩ, ũthanthau wa mũkono ũmwe, na ũtũlu wa mũkono ũmwe na nusu. 11 Na amyũmbĩĩa thaavu mũtheu na amyanakavya na thaavu ndeenĩ syayo* kũmĩthyũlũlũka. 12 Na asyoka aseũvya ũengo wĩ na ũthanthau wa kĩtaa kya kwʼoko* kũmĩthyũlũlũka na aanakavya ũengo ũsu na thaavu ndeenĩ syawʼo* kũũthyũlũlũka. 13 O na ĩngĩ, nĩwamĩseũvĩisye ngome inya sya thaavu na eekĩa ngome isu konanĩ inya vala maaũ ana makwatanĩlwʼe. 14 Ngome isu syaĩ vakuvĩ na ũengo, ikwatĩĩae mĩtĩ ĩla yatũmĩawa kũkua mesa ĩsu. 15 Na ĩndĩ aseũvya mĩtĩ ya mũaa* na amyũmbĩĩa thaavu ĩkuae mesa ĩsu. 16 Ĩtina wa ũu, nĩwaseũvisye mĩio ya mesa ĩsu na thaavu mũtheu; aseũvisye masaani mayo, ikombe syayo, na mbakũli syayo na ngyaki nĩ kana itũmĩawe kwondũ wa nthembo sya kũnyuwa.

17 Na ĩndĩ nĩwaseũvisye kĩndũ kya kwilĩĩla taa kya thaavu mũtheu. Aseũvisye kĩndũ kĩu kya kwilĩĩla taa na nyũndo. Ĩtina yakyo, mũthamba wakyo, mbonge syakyo, ikombe syakyo, malaa makyo meyũmbĩte, na malaa makyo mavalĩku syaĩ kĩlungu kĩmwe. 18 Mbonge thanthatũ syaumĩte mũthambanĩ wakyo, mbonge itatũ sya kĩndũ kĩu kya kwilĩĩla taa syaumĩte ngalĩko ĩmwe yakyo na mbonge ila ingĩ itatũ syaumĩte ngalĩko ĩla ĩngĩ. 19 Ikombe itatũ iilye ta malaa ma mũlosi syaĩ ngalĩko ĩmwe ya mbonge, malaa meyũmbĩte maatĩĩwe nĩ malaa mavalĩku, na ikombe itatũ iilye ta malaa ma mũlosi syaĩ ngalĩko ĩla ĩngĩ ya mbonge, malaa meyũmbĩte maatĩĩwe nĩ malaa mavalĩku. Ũu nĩw’o mbonge isu thanthatũ ila syaumĩte mũthambanĩ wa kĩndũ kya kwilĩĩla taa syaseũviw’e. 20 Na mũthamba wa kĩndũ kya kwilĩĩla taa waĩ na ikombe inya iilye ta malaa ma mũlosi, malaa meyũmbĩte maatĩĩwe nĩ malaa mavalĩku. 21 Vaĩ na ĩlaa yĩyũmbĩte ungu wa mbonge ilĩ sya mbee ila syaumĩte mũthambanĩ wa kĩndũ kya kwilĩĩla taa na ĩlaa yĩyũmbĩte ungu wa mbonge ilĩ ila syaatĩĩe na ĩlaa yĩyũmbĩte ungu wa mbonge ilĩ ila syaatĩĩe, ũu nĩw’o mbonge isu thanthatũ syaumĩte mũthambanĩ wa kĩndũ kĩu kya kwilĩĩla taa. 22 Malaa asu meyũmbĩte na mbonge isu na kĩndũ kĩu kyonthe kya kwilĩĩla taa syaĩ kĩlungu kĩmwe kya thaavu mũtheu, kĩseũvĩtw’e na nyũndo. 23 Na ĩndĩ aseũvya na thaavu mũtheu taa syakyo mũonza na mĩkasi yakyo ya kũkwatĩĩa ndambi na syĩndũ syakyo sya kwĩkĩa mwaki. 24 Akĩseũvisye, vamwe na mĩio yakyo yonthe, na talendi ĩmwe* ya thaavu mũtheu.

25 Na ĩndĩ aseũvya kĩthembeo kya ũvumba na mbwaũ sya mũaa.* Kyeanene ngalĩ inya kĩ na ũasa wa mũkono ũmwe, ũthanthau wa mũkono ũmwe, na ũtũlu wa mĩkono ĩlĩ. Mbya syakyo syaĩ kĩlungu kĩmwe na kĩthembeo kĩu. 26 Akyũmbĩĩie thaavu mũtheu ngalĩko ya ĩũlũ na ngalĩko syonthe syakyo kũkĩthyũlũlũka vamwe na mbya syakyo, na akyanakavya na thaavu ndeenĩ syakyo* kũkĩthyũlũlũka. 27 Nĩwaseũvisye ngome ilĩ sya thaavu kwondũ wakyo ĩtheo wa ndee syakyo* ngalĩkonĩ ilĩ ila isianĩtye, nĩ kana ikwatĩĩae mĩtĩ ĩla yatũmĩawa kũkĩkua. 28 Ĩtina wa ũu, nĩwaseũvisye mĩtĩ ya mũaa* na amyũmbĩĩa thaavu. 29 O na ĩngĩ, nĩwaseũvisye mauta matheu ma kwĩtĩkĩsya na ũvumba mũtheu, wĩ mũuke mũseo, ũvulanĩtw’e na ũtũĩka.*

38 Nĩwaseũvisye kĩthembeo kya nthembo sya kũvĩvwʼa na mbwaũ sya mũaa.* Kyeanene ngalĩ inya, kĩ na ũasa wa mĩkono ĩtano,* ũthanthau wa mĩkono ĩtano, na ũtũlu wa mĩkono ĩtatũ. 2 Asyokie aseũvya mbya syakyo konanĩ syakyo inya. Mbya syakyo na kĩthembeo kĩu syaĩ kĩlungu kĩmwe. O na ĩngĩ, nĩwakyũmbĩĩie ũthuku. 3 Ĩtina wa ũu, nĩwaseũvisye mĩio yonthe ya kĩthembeo kĩu, ndoo sya kũvetanga mũu, mĩko, mbakũli, ũma, na syĩndũ sya kwĩkĩa mwaki. Aseũvisye mĩio yonthe yakyo na ũthuku. 4 O na ĩngĩ, nĩwaseũvisye kĩndũ kya syũma sya ũthuku ikelanganĩtwʼe ta neti kwondũ wa kĩthembeo kĩu, ungu wa ũengo wakyo, katĩkatĩ wakyo. 5 Nĩwaseũvisye ngome inya konanĩ syakyo inya, vakuvĩ na kĩndũ kya syũma sya ũthuku ikelanganĩtwʼe, ikwatĩĩae mĩtĩ ya kũkĩkua. 6 Ĩtina wa ũu, nĩwaseũvisye mĩtĩ ya mũaa* na amyũmbĩĩa ũthuku. 7 Nĩwalikilye mĩtĩ ĩsu ngomenĩ ila syaĩ ngalĩko syelĩ sya kĩthembeo ĩtũmĩawe kũkĩkua. Aseũvisye kĩthembeo kĩu kĩilye ta ĩsandũkũ ĩnene yĩte kĩndũ nthĩnĩ.

8 Na ĩndĩ aseũvya kalaĩ ka ũthuku na kĩndũ kya kũkailĩĩla kya ũthuku; atũmĩie ioo* sya aka ala mavangĩtwe mathũkũmae mũomonĩ wa ĩeema ya kũmbanĩa.

9 Na ĩndĩ aseũvya kĩwanza kya ĩeema. Kwondũ wa ngalĩko ya ĩtheo ya kĩwanza kĩu, nĩwaseũvisye itambaa iniinĩte sya katane nzeo mbokothe, sya ũasa wa mĩkono 100. 10 Vaĩ ituĩ 20 na matina 20 ma ũthuku me na maima, na ngolya sya ituĩ isu na syĩndũ syasyo sya kũkwatanyʼa* syaĩ sya vetha. 11 O na ĩngĩ, kwondũ wa ngalĩko ya ĩũlũ, vaĩ na itambaa iniinĩte sya mĩkono 100. Ituĩ syasyo 20 na matina masyo 20 me na maima maĩ ma ũthuku. Ngolya sya ituĩ isu na syĩndũ syasyo sya kũkwatanyʼa* syaĩ sya vetha. 12 Ĩndĩ kwondũ wa ngalĩko ya ũthũĩlonĩ wa sua, itambaa isu iniinĩte syaĩ sya mĩkono 50. Vaĩ na ituĩ ĩkũmi na matina ĩkũmi me na maima, na ngolya sya ituĩ isu na syĩndũ syasyo sya kũkwatanyʼa* syaĩ sya vetha. 13 Ũthanthau wa ngalĩko ĩla ĩsyaĩtye wumĩlonĩ wa sua, waĩ mĩkono 50. 14 Vaĩ na itambaa iniinĩte sya mĩkono 15 ngalĩko ĩmwe, vamwe na ituĩ itatũ na matina atatũ me na maima. 15 Na kwondũ wa ngalĩko ĩla ĩngĩ ya mũvĩa wa kĩwanza kĩu, vaĩ na itambaa iniinĩte sya mĩkono 15, vamwe na ituĩ itatũ na matina atatũ me na maima. 16 Itambaa syonthe iniinĩte ila syathyũlũlũkĩte kĩwanza kya ĩeema syaĩ sya katane nzeo mbokothe. 17 Matina me na maima kwondũ wa ituĩ isu maĩ ma ũthuku, ngolya sya ituĩ isu na syĩndũ syasyo sya kũkwatanyʼa* syaĩ sya vetha, ngalĩko ya ĩũlũ yasyo yoombĩĩwe vetha, na vaĩ na syĩndũ sya kũkwatĩĩa sya vetha kwondũ wa ituĩ syonthe sya kĩwanza kĩu.

18 Vasia wa mũvĩa wa kĩwanza kĩu watumĩtwe na ũlii wa mbuluu, wʼĩa wa langi wa nzambalaũ, kĩtambaa kĩtune mũno, na katane nzeo mbokothe. Waĩ na ũasa wa mĩkono 20 na ũtũlu wa mĩkono 5, ũtũlu wĩanene na wa ila itambaa iniinĩte sya kĩwanza kĩu. 19 Ituĩ syawʼo inya na matina masyo ana me na maima maĩ ma ũthuku. Ngolya syasyo na syĩndũ syasyo sya kũkwatanyʼa* syaĩ sya vetha, na ngalĩko ya ĩũlũ yasyo yoombĩĩwe vetha. 20 Syambo syonthe sya ĩeema ya ũthaithi na ila syathyũlũlũkĩte kĩwanza kya ĩeema yĩu syaĩ sya ũthuku.

21 Syĩndũ ii iatĩĩe nĩsyo syatũmĩiwe kũseũvya ĩeema ya ũthaithi, nayo nĩ ĩeema ya Ũkũsĩ, ila syatalaniwʼe kwosana na mwĩao wa Mose, wĩa ũsu waaĩlĩte kũtethwʼa nĩ Alivai maũngamĩwe nĩ Ithamali mwana wa mũthembi Alũni. 22 Mbesaleli mwana wa Uli mwana wa Uulu wa mbaĩ ya Yuta eekie kyonthe kĩla Yeova weeaĩe Mose. 23 Aĩ vamwe na Ooliavu mwana wa Aisamaki wa mbaĩ ya Ndani, mũndũ weesĩ kũtethya wĩa w’onthe ũla ũtethawʼa nĩ mavundi na weesĩ kwanakavya syĩndũ sya kũtuma na watumaa na ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo.

24 Thaavu w’onthe ũla watũmĩiwe kwondũ wa wĩa wa vala vandũ vatheu weanene na kĩthimo kya thaavu wa nthembo ya kũvyũlwʼa, talendi 29* na sekeli 730* kwosana na kĩthimo kya sekeli ya vala vandũ vatheu.* 25 Vetha wa andũ ala maandĩkĩthĩtwʼe ma ũmbano waĩ talendi 100 na sekeli 1,775 kwosana na kĩthimo kya sekeli ya vala vandũ vatheu.* 26 Nusu sekeli kwondũ wa kĩla mũndũ yaĩ nusu sekeli kwosana na kĩthimo kya sekeli ya vala vandũ vatheu* kwondũ wa kĩla mũndũũme waĩ katĩ wa ala maandĩkĩthĩtwʼe me na ũkũũ wa myaka 20 na kwambata, onthe maĩ 603,550.

27 Matina me na maima ma vala vandũ vatheu na matina me na maima ma vasia maseũviwʼe na talendi 100; matina 100 me na maima maseũviwʼe na talendi 100, talendi ĩmwe kwondũ wa kĩla ĩtina yĩ na ĩima. 28 Atũmĩie ila sekeli 1,775 kũseũvya ngolya kwondũ wa ituĩ isu na oombĩĩa ngalĩko ya ĩũlũ yasyo na aikwatanyʼa vamwe.

29 Ũthuku ũla waumiwʼe* waĩ talendi 70 na sekeli 2,400. 30 Aũtũmĩie kũseũvya matina me na maima ma mũomo wa ĩeema ya kũmbanĩa, kĩthembeo kya ũthuku na kĩndũ kyayo kya syũma sya ũthuku ikelanganĩtwʼe, mĩio yonthe ya kĩthembeo, 31 matina me na maima ala mathyũlũlũkĩte kĩwanza kya ĩeema, matina me na maima ma mũvĩa wa kĩwanza kĩu, na syambo syonthe sya ĩeema ya ũthaithi na syambo syonthe ila syathyũlũlũkĩte kĩwanza kĩu.

39 Nĩmaseũvisye ngũa itumĩtwe nesa sya kũthũkũma vala vandũ vatheu matũmĩĩte ũlii wa mbuluu, w’ĩa wa langi wa nzambalaũ, na kĩtambaa kĩtune mũno. Nĩmaseũvisye ngũa ntheu kwondũ wa Alũni, o tondũ Yeova weeaĩe Mose.

2 Nĩwaseũvisye evoti ya thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe. 3 Nĩmatuie ilungu sya thaavu syatwʼĩka tũlungu tũtheke, na aũtilanga watwʼĩka ndii nĩ kana ũtũmĩwe vamwe na ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo, na yaanakavwʼa. 4 Nĩmamĩseũvĩisye ilungu sya ituo ila syakwatanĩtwʼe mĩthyanĩ yayo ĩlĩ ya ĩũlũ. 5 Na mũsivi mũtume,* ũla wakwatanĩtwʼe na evoti nĩ kana ũmyovae ĩlũme, waseũvĩtwʼe o ta evoti, na syĩndũ o isu; waseũvĩtwʼe na thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe, o tondũ Yeova weeaĩe Mose.

6 Na ĩndĩ moombĩĩa mavia ma soamu syĩndũnĩ sya kũkwatĩĩa sya thaavu, na mavanĩĩa ĩũlũ wamo masyĩtwa ma ana ma Isilaeli, o ũndũ matonya kũvanĩĩa ũsiĩlo. 7 Na amekĩa ilungunĩ sya ituo sya evoti nĩ kana methĩwe mavia ma ũlilikanyʼo kwondũ wa ana ma Isilaeli, o tondũ Yeova weeaĩe Mose. 8 Na ĩndĩ nĩwaseũvisye kamũvuko ka kĩthũinĩ. Kaseũviwʼe o ta evoti nĩ mũndũ wĩsĩ kwanakavya syĩndũ sya kũtuma. Kaseũviwʼe na thaavu, ũlii wa mbuluu, w’ĩa wa langi wa nzambalaũ, kĩtambaa kĩtune mũno, na katane nzeo mbokothe. 9 Keanene ngalĩ syonthe katũlwa kelĩ. Nĩmaseũvisye kamũvuko ka kĩthũinĩ, kala, yĩla katũlwa kelĩ, kaĩ na ũasa na ũthanthau wa ĩkwata yĩmwe ya kwʼoko.* 10 Nĩmavangie lainĩ inya sya mavia ĩũlũ wako. Lainĩ wa mbee waĩ na salitũ, tovasi, na sumalatai. 11 Lainĩ wa kelĩ waĩ na noveki, savili, na yasivi. 12 Lainĩ wa katatũ waĩ na ĩvia ya lesemu,* sevo, na amethusito. 13 Na lainĩ wa kana waĩ na savaliyati, soamu, na yaseve. Moombĩĩiwe syĩndũnĩ sya kũkwatĩĩa sya thaavu. 14 Mavia asu moosanĩte na masyĩtwa ma ana 12 ma Isilaeli, na masyĩtwa asu mavanĩĩtwe ta ũsiĩlo, kĩla ĩsyĩtwa yĩũngamĩe mbaĩ ĩmwe katĩ wa ila mbaĩ 12.

15 Na ĩtina wa ũu, maseũvya tũnyololo twokothe ĩũlũ wa kamũvuko ka kĩthũinĩ, tũilye tũkanda twa thaavu mũtheu. 16 Na maseũvya syĩndũ ilĩ sya kũkwatĩĩa sya thaavu na ngome ilĩ sya thaavu na makwatĩlya ngome isu ilĩ konanĩ ilĩ sya kamũvuko kau ka kĩthũinĩ. 17 Ĩtina wa ũu, nĩmesĩilye tũkanda tũu twĩlĩ twa thaavu ila ngomenĩ ilĩ syaĩ konanĩ sya kamũvuko kau ka kĩthũinĩ. 18 Na ĩndĩ mesĩlya mĩthya ĩlĩ ya tũla tũkanda twĩlĩ ila syĩndũnĩ ilĩ sya kũkwatĩĩa na matũkwatĩlya ilungunĩ sya ituo ngalĩko ya mbee ya evoti. 19 Na masyoka maseũvya ngome ilĩ sya thaavu na masyĩkĩa mĩthyanĩ ĩlĩ ĩla yĩ ũteenĩ ũla wĩ ngalĩko ya nthĩnĩ ya kamũvuko ka kĩthũinĩ, ĩsyaĩtye evoti. 20 Ĩtina wa ũu, maseũvya ngome ingĩ ilĩ sya thaavu na masyĩkĩa ngalĩko ya mbee ya evoti, ĩtheo wa ila ilungu ilĩ sya ituonĩ, vakuvĩ na vala ĩkwatanĩlwʼe, ĩũlũ wa ũla mũsivi mũtume* wa evoti. 21 Mũthya, nĩmoovanisye kamũvuko ka kĩthũinĩ na kakanda ka mbuluu kuma ngomenĩ syako kũvika ngomenĩ sya evoti, nĩ kana kakwatĩĩae kamũvuko kau ka kĩthũi vala kaĩle kwĩthĩwa evotinĩ, ĩũlũ wa ũla mũsivi mũtume,* o tondũ Yeova weeaĩe Mose.

22 Na ĩndĩ nĩwaseũvisye ĩkoti yĩte moko ya evoti, yatumiwe nĩ mũtumi wa ngũa, yonthe ya ũlii wa mbuluu. 23 Ĩkoti yĩu yĩte moko yaĩ na mwanya katĩkatĩ wayo, ũilye ta mwanya wa ĩkoti ya kyũma. Mwanya ũsu nĩwatumĩtwe ũtee wawʼo kũũthyũlũlũka, nĩ kana yĩikatembũke. 24 Nĩmasyokie maseũvya mũtũlonĩ wa ĩkoti yĩu yĩte moko makũngũmanga ma ũlii wa mbuluu, w’ĩa wa langi wa nzambalaũ, na kĩtambaa kĩtune mũno, syokothetwe vamwe. 25 Na maseũvya ngengele sya thaavu mũtheu na meekĩa ngengele isu katĩkatĩ wa makũngũmanga kũthyũlũlũka mũtũlo wa ĩkoti yĩu yĩte moko, katĩkatĩ wa makũngũmanga; 26 meekĩaa ngengele na mayĩatĩĩsya ĩkũngũmanga, ngengele na ĩkũngũmanga, kũthyũlũlũka mũtũlo wa ĩkoti yĩu yĩte moko, yĩla yatũmĩawa kũthũkũma, o tondũ Yeova weeaĩe Mose.

27 Na nĩmaseũvisye kanzũ sya katane nzeo, itumĩtwe nĩ mũtumi wa ngũa, kwondũ wa Alũni na ana make, 28 na kĩla kĩlemba kya katane nzeo, ngovia mbanakavye sya katane nzeo, inyasa* sya katane nzeo mbokothe, 29 na mũsivi wa kanzũ wa katane nzeo mbokothe, ũlii wa mbuluu, w’ĩa wa langi wa nzambalaũ, na kĩtambaa kĩtune mũno syonthe itumanĩwʼe vamwe, o tondũ Yeova weeaĩe Mose.

30 Mũthya, nĩmaseũvisye kalungu keũtisatisa, ũla wonanyʼo mũtheu wa kwĩyumya,* na thaavu mũtheu na mavanĩĩa ĩũlũ wako ndeto ii o ũndũ mũndũ ũtonya kũvanĩĩa ũsiĩlo: “Ũtheu nĩ wa Yeova.” 31 Makakwatĩlilye kakandanĩ kaseũvĩtwʼe na ũlii wa mbuluu nĩ kana makekĩe kĩla kĩlembanĩ, o tondũ Yeova weeaĩe Mose.

32 Kwoou wĩa w’onthe wa ĩeema ya ũthaithi, kana, yĩla ĩeema ya kũmbanĩa, wathela, na Aisilaeli meekie kyonthe kĩla Yeova weeaĩe Mose. Ũu nowʼo meekie.

33 Na ĩndĩ maete ĩeema ya ũthaithi vala ve Mose, ĩeema na syĩndũ syayo syonthe: ngolya syayo, vulemu syayo, mĩamba yayo na ituĩ syayo na matina mayo me na maima; 34 kĩndũ kyayo kya kũyĩvwʼĩka kya ithuma sya ndũũme ikundĩtwʼe langi mũtune, kĩndũ kya kũyĩvwʼĩka kya ithuma mbololo,* vasia wa kũaanyʼa; 35 ĩsandũkũ ya Ũkũsĩ na mĩtĩ yayo na ĩla ngunĩko; 36 mesa, mĩio yayo yonthe na mĩkate ya wonanyʼo; 37 kĩndũ kya kwilĩĩla taa kya thaavu mũtheu, vamwe na taa syakyo ivangĩtwe lainĩ, na mĩio yakyo yonthe na mauta ma kwakanyʼa taa; 38 kĩthembeo kya thaavu, mauta ma kwĩtĩkĩsya, ũvumba wĩ mũuke mũseo, vasia kwondũ wa mũomo wa ĩeema; 39 kĩthembeo kya ũthuku na kĩndũ kyakyo kya syũma sya ũthuku ikelanganĩtwʼe, mĩtĩ yakyo, mĩio yakyo yonthe, kalaĩ na kĩndũ kya kũkailĩĩla; 40 itambaa iniinĩte sya kĩwanza kya ĩeema, ituĩ syayo na matina masyo me na maima, vasia wa mũvĩa wa kĩwanza kya ĩeema, makanda ma ĩeema na syambo sya ĩeema na mĩio yonthe kwondũ wa ũthũkũmi wa ĩeema ya ũthaithi, kwondũ wa ĩeema ya kũmbanĩa; 41 ngũa itumĩtwe nesa sya kũthũkũma vala vandũ vatheu, ngũa ntheu sya mũthembi Alũni, na ngũa sya ana make nĩ kana mathũkũme me athembi.

42 Aisilaeli matethisye wĩa w’onthe kwosana na maũndũ onthe ala Yeova weeaĩe Mose. 43 Yĩla Mose wasyaisye nesa wĩa woo w’onthe, nĩwoonie kana maũtethisye o tondũ Yeova weeaĩte; na Mose amaathima.

40 Na ĩndĩ Yeova eea Mose: 2 “Mũthenya wa mbee wa mwei wa mbee, ũkamba ĩeema ya ũthaithi, nayo nĩ yĩla ĩeema ya kũmbanĩa. 3 Ia ĩsandũkũ ya Ũkũsĩ nthĩnĩ, na ũivithanyʼa Ĩsandũkũ yĩu na vasia. 4 Ũkalikya mesa nthĩnĩ na ũivanga syĩndũ syayo ĩũlũ wayo na ũiete kĩndũ kya kwilĩĩla taa na ũikwatya taa syakyo. 5 Na ĩndĩ ũyia kĩla kĩthembeo kya thaavu kya ũvumba mbee wa ĩsandũkũ ya Ũkũsĩ na ũyĩkĩa vasia wa mũomo wa ĩeema ya ũthaithi.

6 “Ũkaia kĩthembeo kya nthembo sya kũvĩvwʼa mbee wa mũomo wa ĩeema ya ũthaithi, nayo nĩ yĩla ĩeema ya kũmbanĩa, 7 na ũyia kalaĩ katĩkatĩ wa ĩeema ya kũmbanĩa na kĩthembeo na ũikekĩa kĩw’ũ. 8 Na ĩndĩ ũiseũvya kĩwanza kũyĩthyũlũlũka na ũyĩkĩa vasia kwondũ wa mũvĩa wa kĩwanza kĩu. 9 Na ũisyoka wose mauta ma kwĩtĩkĩsya na ũyĩtĩkĩsya ĩeema yĩu ya ũthaithi na syĩndũ syonthe ila syĩ nthĩnĩ wayo, na ũiyĩthesya na mĩio yayo yonthe, nĩ kana yĩtwʼĩke kĩndũ kĩtheu. 10 Ũketĩkĩsya mauta kĩthembeo kya nthembo sya kũvĩvwʼa na mĩio yakyo yonthe na ũithesya kĩthembeo kĩu, nĩ kana kĩtwʼĩke kĩthembeo kĩtheu vyũ. 11 Na ũyĩtĩkĩsya kala kalaĩ na kĩndũ kya kũkailĩĩla mauta na ũikathesya.

12 “Na ĩndĩ ũiete Alũni na ana make vakuvĩ na mũomo wa ĩeema ya kũmbanĩa, na ũimathambya na kĩw’ũ. 13 Na ũkeekĩa Alũni ila ngũa ntheu na ũimwĩtĩkĩsya mauta na ũimũthesya, na akanthũkũmaa e mũthembi. 14 Ĩtina wa ũu, ũkaete ana make vakuvĩ na ũimekĩa kanzũ. 15 Ũkametĩkĩsya mauta o tondũ wetĩkĩisye ĩthe woo mauta, nĩ kana manthũkũmae me athembi, na nũndũ wa kwĩtĩkĩwʼa mauta kũu ũthembi ũkeethĩawa wĩ woo ĩvinda yonthe kuma nzyawa kũthi ĩla ĩngĩ.”

16 Mose eekie kwosana na maũndũ onthe ala Yeova wamwĩaĩe. Ũu nowʼo weekie.

17 Ĩeema yĩu ya ũthaithi yambiwe mwei wa mbee, mwaka wa kelĩ, mũthenya wa mbee wa mwei. 18 Yĩla Mose wambie ĩeema yĩu ya ũthaithi, nĩwaiie matina mayo me na maima nthĩ, eekĩa vulemu, eekĩa mĩamba yayo, na aũngamya ituĩ syayo. 19 Nĩwatambũũkisye ĩeema ĩũlũ wa ĩeema ya ũthaithi na ailĩĩla ĩũlũ wayo kĩndũ kya kũyĩvwʼĩka, o tondũ Yeova wamwĩaĩe Mose.

20 Ĩtina wa ũu, nĩwoosie ũla Ũkũsĩ na awĩkĩa yĩla Ĩsandũkũnĩ na eekĩa mĩtĩ Ĩsandũkũnĩ yĩu na ayĩkunĩka na ĩla ngunĩko. 21 Nĩwaetie Ĩsandũkũ yĩu ĩeemanĩ ya ũthaithi na eekĩa vasia wa kũaanyʼa na avithanyʼa ĩsandũkũ yĩu ya Ũkũsĩ, o tondũ Yeova weeaĩe Mose.

22 Nĩwasyokie aia mesa ngalĩko ya ĩũlũ ya ĩeema ya ũthaithi, nayo nĩ yĩla ĩeema ya kũmbanĩa, nza wa vasia, 23 na avanga mĩkate ĩilĩanĩlwʼe mbee wa Yeova, o tondũ Yeova weeaĩe Mose.

24 Nĩwaiie kĩndũ kya kwilĩĩla taa ĩeemanĩ ya kũmbanĩa mbee wa ĩla mesa, ngalĩko ya ĩtheo ya ĩeema ya ũthaithi. 25 Nĩwakwatisye taa mbee wa Yeova, o tondũ Yeova weeaĩe Mose.

26 Na asyoka aia kĩla kĩthembeo kya thaavu ĩeemanĩ ya kũmbanĩa mbee wa vasia, 27 nĩ kana atume ũvumba wĩ mũuke mũseo ũtoa ĩũlũ wakyo, o tondũ Yeova weeaĩe Mose.

28 Na ĩndĩ eekĩa vasia kwondũ wa mũomo wa ĩeema ya ũthaithi.

29 Nĩwaiie kĩthembeo kya nthembo sya kũvĩvwʼa mũomonĩ wa ĩeema ya ũthaithi, nayo nĩ yĩla ĩeema ya kũmbanĩa, nĩ kana aumĩasye nthembo sya kũvĩvwʼa na nthembo sya lĩu ĩũlũ wakyo, o tondũ Yeova weeaĩe Mose.

30 Na ĩndĩ aia kala kalaĩ katĩkatĩ wa ĩeema ya kũmbanĩa na kĩthembeo na akekĩa kĩw’ũ kya kũthamba. 31 Mose na Alũni na ana make mathambĩaa moko na maaũ vo. 32 Ĩvinda o na yĩva yĩla mathi ĩeemanĩ ya kũmbanĩa kana mathengeea kĩthembeo, nĩmathambaa, o tondũ Yeova weeaĩe Mose.

33 Mũthya nĩwaseũvisye kĩwanza kũthyũlũlũka ĩeema yĩu ya ũthaithi na kĩthembeo na eekĩa vasia wa mũvĩa wa kĩwanza kĩu.

Kwoou Mose amina wĩa ũsu. 34 Na ĩtu yambĩĩa kũvwʼĩka ĩeema ya kũmbanĩa, na ũtheu mũtisu wa Yeova wausũa ĩeema yĩu ya ũthaithi. 35 Mose ndaĩ atonya kũlika ĩeemanĩ ya kũmbanĩa nũndũ ĩtu yekalile ĩũlũ wayo, na ũtheu mũtisu wa Yeova nĩwausũĩte ĩeemanĩ yĩu ya ũthaithi.

36 Na yĩla ĩtu yauma ĩũlũ wa ĩeema yĩu ya ũthaithi, Aisilaeli nĩmambũaa maeema vala mekalaa kyalonĩ kyoo kyonthe weũnĩ. 37 O na ũu wĩ o vo, ethĩwa ĩtu yĩinauma ĩeemanĩ, mayaendaa nginya mũthenya ũla yĩkauma. 38 Nũndũ me kũla mekalaa kyalonĩ kyoo kyonthe weũnĩ, nyũmba yonthe ya Isilaeli nĩyoonaa ĩtu ya Yeova yĩla yeethĩawa ĩũlũ wa ĩeema ya ũthaithi mũthenya, na mwaki ũla wekalaa ĩũlũ wayo ũtukũ.