YOSUA

1 Na ĩtina wa Mose mũthũkũmi wa Yeova kũkwʼa, Yeova aneena na Yosua* mwana wa Nuni, mũthũkũmi wa Mose, na amwĩa: 2 “Mose mũthũkũmi wakwa nĩ mũkwʼũ. Yu ũkĩla ũinge Yolotani, we na andũ aa onthe, na mũilika nthĩ ĩla ngũmanenga, o nthĩ ĩla ngũnenga andũ ma Isilaeli. 3 Nĩngũmũnenga kũndũ kwʼonthe kũla mũũkinyĩla, o tondũ namwathie Mose. 4 Kĩsio kyenyu kĩuma weũnĩ na kĩyambata Levanoni na kĩithi nginya ũla ũsĩnĩ mũnene, nawʼo nĩ Euvalati, o nthĩ yonthe ya Aititi, na kĩithi nginya ũla Ũkanganĩ Mũnene* ngalĩko ya ũthũĩlonĩ wa sua. 5 Vai mũndũ o na ũmwe ũkethĩwa atonya kũũsinda ĩvinda yonthe yĩla ũkwĩthĩwa thayũ. O tondũ naĩ vamwe na Mose, ngeethĩawa vamwe naku. Ndikaema kũũtetheesya, o na ndikaũtia. 6 Ĩthĩwa na ũkũmbaũ na vinya, nũndũ nue ũkatuma andũ aa mamesya nthĩ ĩno neevĩtĩie aa-ũmae moo kana ngamanenga.

7 “Ĩndĩ we ĩthĩwa na ũkũmbaũ na vinya mwingĩ, na ũiatĩĩa nesa Mĩao yonthe ĩla mũthũkũmi wakwa Mose wakwĩaĩe. Ndũkelelũke ũeke kũmĩatĩĩa, wĩthĩwe wĩthi kwʼoko kwa aũme kana kwʼoko kwa aka, nĩ kana wĩkae maũndũ na ũĩ wĩ kwʼonthe kũla wĩthi. 8 Ĩvuku yĩĩ ya Mĩao yĩyaĩlĩte kuma kanywʼanĩ waku, na no nginya ũyĩsome na wasya wĩ nthĩ* mũthenya na ũtukũ, nĩ kana ũatĩĩe nesa kyonthe kĩla kĩandĩkĩtwe nthĩnĩ wayo; weeka ũu, nzĩa yaku ĩkaaĩla na ũkeekaa maũndũ na ũĩ. 9 Nyie mwene ndikwĩaĩe ngakwĩa ĩthĩwa na ũkũmbaũ na vinya? Ndũkateleme kana ũlikwe nĩ wia, nũndũ Yeova Ngai waku akeethĩawa vamwe naku kwʼonthe kũla wĩthi.”

10 Na ĩndĩ Yosua eeaĩa anene ma andũ aimea atĩĩ: 11 “Likai kĩla vandũ kambinĩ na mũinenga andũ mwĩao ũũ: ‘Ũmbanyʼai lĩu, nũndũ ĩtina wa mĩthenya ĩtatũ nĩmũkũinga Yolotani nĩ kana mũlike na mũimesya nthĩ ĩla Yeova Ngai wenyu ũkũmũnenga mũmesye.’”

12 Na Yosua aneena na Aleũveni, Angati, na nusu ya mbaĩ ya Manase, ayasya: 13 “Lilikanai kĩla Mose mũthũkũmi wa Yeova wamwĩaĩe: ‘Yeova Ngai wenyu nũmũnengete nthĩ ĩno na nũendeee kũmũnenga ũthũmũo. 14 Iveti syenyu, syana syenyu, na indo syenyu syĩendeea kwĩkala nthĩ ĩno Mose ũmũnengete mũingo ũũ* wa Yolotani, ĩndĩ inywʼonthe katĩ wenyu ala mwĩ ngũmbaũ sya kaũ mwaĩlĩte kũinganĩsya mwĩvangĩte kwondũ wa kaũ mbee wa ana-a-asa menyu. No nginya mũtetheesye ana-a-asa menyu 15 nginya yĩla Yeova ũkamanenga ũthũmũo, o tondũ ũmũnengete inywʼĩ, nĩ kana o namo mamesye nthĩ ĩla Yeova Ngai wenyu ũkũmanenga. Ĩtina wa ũu, nĩw’o mwĩsyoka nthĩ ĩla mwanengiwe mũtũe na mũimĩmesya, nthĩ ĩla Mose mũthũkũmi wa Yeova wamũnengie ngalĩkonĩ ya wumĩlonĩ wa sua ya Yolotani.’”

16 Namo mamũsũngĩa Yosua mamwĩa: “Nĩtũkwĩka maũndũ onthe ala ũtwĩaĩe, na nĩtũũthi kwʼonthe kũla ũũtũtũma. 17 O ũndũ tweethukĩĩasya kyonthe kĩla Mose ũkũweta, nowʼo tũkakwĩthukĩĩasya. Ĩndĩ we Yeova Ngai waku nĩethĩwe vamwe naku o tondũ waĩ vamwe na Mose. 18 Mũndũ o na wĩva ũla ũkaleana na mwĩao waku na ailea kwĩanĩsya kyonthe kĩla ũũmwĩaĩa, akooawa. Ĩndĩ we ĩthĩwa na ũkũmbaũ na vinya.”

2 Na ĩndĩ Yosua mwana wa Nuni atũma athiani elĩ na kĩmbithĩ kuma Sitimu. Na amea: “Endai mũkathiane nthĩ ĩsu, na mũno mũno Yeliko.” Na kwoou mathi na mavika nyũmbanĩ ya mũndũ mũka waĩ ĩlwaya, ũla weetawa Laavi, na mekala vau. 2 Na mũsumbĩ wa Yeliko eewa atĩĩ: “Sisya! Ve aũme Aisilaeli mokie kũũ wĩoo nĩ kana mathiane nthĩ ĩno.” 3 Nĩvo ĩndĩ mũsumbĩ wa Yeliko watũmanie kũla kwĩ Laavi, ayasya: “Umaalya aũme ala mokie na mekwĩkala nyũmbanĩ yaku, nũndũ mokie kũthiana nthĩ ĩno yonthe.”

4 Ĩndĩ mũndũ mũka ũsu oosa aũme asu elĩ na amavitha. Na ĩndĩ asya: “Nĩ wʼo, aũme asu nĩmokie kũla nĩĩ, ĩndĩ ndinamanya meeumĩte va. 5 Na yĩla kũmeisye kĩvindu mũvĩa wa ndũa ũkilyĩ kũvingwa, aũme asu nĩmaumaalile. Ndyĩsĩ vala maendie, ĩndĩ mwamaatĩĩa mwĩkalaatĩte nĩmũũmakwata.” 6 (Ĩndĩ aĩ anamatwaa kĩalanĩ na akamavitha mĩtĩnĩ ya katane ĩla yaalanĩtwʼe vau kĩalanĩ.) 7 Na kwoou aũme asu mamaatĩĩa melekele vala veethĩawa vate valiku ũsĩnĩ wa Yolotani, na yĩla maumaalile oou mũvĩa wa ndũa wavingwa.

8 Aũme asu matanakoma, Laavi nĩwaambatie vala maĩ kĩalanĩ. 9 Na ĩndĩ amea atĩĩ: “Nĩnĩsĩ kana Yeova nũkũmũnenga nthĩ ĩno na nĩtũlikĩtwe nĩ wia nũndũ wenyu. Ekali onthe ma nthĩ ĩno nĩmatwʼĩkĩte nda nũndũ wenyu, 10 nĩkwĩthĩwa nĩtweewie ũndũ Yeova wangʼalĩthisye kĩwʼũ kya Ũkanga Mũtune mũsyaĩĩsye yĩla mwaumie Misili na nĩtweewie ũndũ mweekanie na ala asumbĩ elĩ ma Aamoli, Sioni na Oku, ala mwamaminie vyũ mwĩ mũingo ũya ũngĩ* wa Yolotani. 11 Na yĩla tweewie ĩũlũ wa maũndũ asu, nĩtwakwie ngoo,* na vai mũndũ o na ũmwe wĩ na ũkũmbaũ* nũndũ wenyu, nĩkwĩthĩwa Yeova Ngai wenyu nĩwe Ngai ĩtunĩ ĩũlũ na kũũ nthĩ. 12 Yu nĩngũmwĩsũva, nũndũ nĩnamwonyʼa wendo ũtathelaa, mbĩvĩtĩei mbee wa Yeova kana o nenyu nĩmũkwonyʼa nyũmba ya ĩthe wakwa wendo ũtathelaa; na no nginya mũnenge ũvano wa kwĩkwatwʼa ũũmbĩkĩĩthya kana nĩmũkwĩanĩsya ndeto syenyu. 13 No nginya mũtangĩĩe mathayũ ma ĩthe wakwa na inyia wakwa, ana-a-ia na eĩtu-a-ia, na andũ moo onthe, na no nginya mũtwovosye tũikoawe.”*

14 Nĩvo ĩndĩ aũme asu mamwĩie ũũ: “Eka twĩkwʼa* vandũ venyu! Ethĩwa mũiwetea mũndũ ũndũ ũla ũtũetie kũũ, tũkamwonyʼa wendo ũtathelaa na tũkeethĩwa twĩ aĩkĩĩku kũla mũĩ yĩla Yeova ũkethĩwa aitũnenga nthĩ ĩno.” 15 Ĩtina wa ũu, nĩwamaekie matheee na ĩkanda mesĩle ndĩlĩsyanĩ, nũndũ nyũmba yake yaĩ ngalĩko ĩmwe ya ũkũta wa ndũa. Na yaĩ ĩũlũ vyũ ũkũtanĩ ũsu. 16 Na ĩndĩ Laavi amea: “Endai kĩsionĩ kĩla kĩ iĩma na mũyĩvitha vau mĩthenya ĩtatũ, nĩ kana ala mamũsembanĩtye maikamwone. Na ĩndĩ masyoka, no mũkwate nzĩa mũthi.”

17 Namo mamwĩa: “Tũkeethĩwa twĩ ove nĩ wĩvĩto ũla watuma twĩvĩta, 18 o ethĩwa yĩla tũkalika nthĩ ĩno nĩtũkethĩa woveete ndĩlĩsyanĩ ĩno ĩkanda yĩĩ ĩtune mũno yĩla watũtheesya nayo. Waĩlĩte kũete nyũmbanĩ ĩno ĩthe waku, inyia waku, ana-a-ĩthe maku, na andũ onthe ma nyũmba ya ĩthe waku. 19 Na ethĩwa mũndũ o na wĩva akaumaala nza wa mĩomo ya nyũmba yaku, nthakame yake ĩkeethĩwa ĩũlũ wa mũtwe wake mwene, na ithyĩ tũikatalĩlwa ĩvĩtyo. Ĩndĩ ethĩwa ũndũ mũthũku ũkakwata* mũndũ o na wĩva e vamwe naku nyũmbanĩ ĩno, nthakame yake ĩkeethĩwa ĩũlũ wa mĩtwe yitũ. 20 Ĩndĩ wawetea mũndũ ũndũ ũla ũtũetie kũũ, tũikatalĩlwa ĩvĩtyo ũndũnĩ o na wĩva ũkonetye wĩvĩto ũla watuma twĩvĩta.” 21 Na Laavi asũngĩa asya: “Nĩkwĩthĩwe o ũndũ mwaweta.”

Na ĩndĩ amaeka mathi, namo makwata nzĩa mathi. Ĩtina wa ũu, nĩwooveeie ĩkanda yĩu ĩtune mũno ndĩlĩsyanĩ ĩsu. 22 Na kwoou mathi kĩsionĩ kĩla kĩ iĩma na mekala kũu mĩthenya ĩtatũ, mũvaka yĩla ala mamasembanĩtye masyokie ndũanĩ. Aũme asu mamasembanĩtye nĩmamamanthĩte nzĩanĩ syonthe ĩndĩ mayaamona. 23 Na ĩndĩ athiani asu elĩ matheea kuma kĩsionĩ kĩu kĩ iĩma na mainga ũla ũsĩ na mathi vala ve Yosua mwana wa Nuni. Nĩvo ĩndĩ mamũeleisye maũndũ onthe ala mamakwatĩte. 24 Na ĩndĩ matavya Yosua atĩĩ: “Yeova nũnenganĩte nthĩ ĩsu yonthe mokonĩ maitũ. O na ekali onthe ma nthĩ ĩsu nĩmatwʼĩkĩte nda nũndũ witũ.”

3 Na ĩndĩ Yosua ookĩla kwakya tene, na e vamwe na Aisilaeli* onthe makũsya kuma Sitimu na mathi nginya Yolotani. Na matanamba kũinganĩsya matwʼa kũkomela vau ũtukũ ũsu.

2 Ĩtina wa mĩthenya ĩtatũ, anene ma andũ nĩmalikile kĩla vandũ kambinĩ 3 na meeaĩa andũ, mayasya: “Yĩla mũkwona ĩsandũkũ ya ũtianĩo wa Yeova Ngai wenyu yĩkuĩtwe nĩ athembi Alivai, mwaĩlĩte kũkũsya na mũiyĩatĩĩa mũte kweteela. 4 Ĩndĩ yĩatĩĩei mũtiĩte mwanya wa mĩkono ta 2,000;* mũikayĩthengeee, nĩ kana mũmanye nzĩa ĩla mwaĩle kwĩsĩla, nũndũ mũyaaĩsĩla vaa ĩngĩ.”

5 Nĩvo ĩndĩ Yosua weeie andũ: “Ĩthesyei, nũndũ ũnĩ Yeova akeeka maũndũ ma kũsengyʼa katĩ wenyu.”

6 Na ĩndĩ Yosua eea athembi atĩĩ: “Osai ĩsandũkũ ya ũtianĩo na mũithi mbee wa andũ.” Na kwoou moosa ĩsandũkũ ya ũtianĩo na mathi mbee wa andũ.

7 Nĩvo ĩndĩ Yeova weeie Yosua atĩĩ: “Ũmũnthĩ nĩngwambĩĩa kũũnenevya Aisilaeli onthe mene, nĩ kana mamanye ngeethĩawa vamwe naku o tondũ neethĩawa vamwe na Mose. 8 Naku neena na athembi ala makuĩte ĩsandũkũ ya ũtianĩo na ũimeaĩa ũũ: ‘Yĩla mũũvika ũtee wa kĩw’ũ kya Yolotani, likai Yolotani na mũiũngama vau mũteũsonga.’”

9 Na Yosua aneena na Aisilaeli amea: “Thengeeai mwĩwʼe ndeto sya Yeova Ngai wenyu.” 10 Na ĩndĩ Yosua asya: “Ũndũ ũũ nĩwʼo ũũtuma mũmanya kana ve Ngai wĩ thayũ katĩ wenyu, na kana vate ndĩi nũkũlũngya kuma mbee wenyu Akanaanĩ, Aititi, Aivi, Avelisi, Angilikasi, Aamoli, na Ayevusi. 11 Sisyai! Ĩsandũkũ ya ũtianĩo wa Mwĩai wa nthĩ yonthe nĩyĩũthi mbee wenyu yĩlike Yolotani. 12 Yu ĩndĩ, osai aũme 12 kuma mbaĩnĩ sya Isilaeli, mũndũũme ũmwe kwondũ wa kĩla mbaĩ, 13 na yĩla nyaaĩ sya maaũ ma athembi ala makuĩte Ĩsandũkũ ya Yeova, Mwĩai wa nthĩ yonthe, siũkinya* kĩwʼũ kya Yolotani oou, kĩwʼũ kya Yolotani kĩla kyumĩte ĩũlũ kĩtheeete nĩkĩkũũngamwʼa na kĩyũmbana ta kĩsiĩĩwe nĩ ngome* kĩteũsonga.”

14 Na yĩla andũ maumie maeemanĩ moo na makũsya nĩ kana mainge Yolotani, athembi ala makuĩte ĩsandũkũ ya ũtianĩo nĩmaendie mbee woo. 15 Na ĩndĩ aũme ala makuĩte Ĩsandũkũ yĩu mavika Yolotani na athembi ala makuĩte Ĩsandũkũ yĩu malikya nyaaĩ syoo kĩwʼũnĩ ũtee (ũsĩ wa Yolotani nũvingaa na ũkakĩlya kĩwʼũ ngũtanĩ syawʼo ĩvindanĩ yonthe ya ngetha), na vau kwa vau 16 kĩwʼũ kĩla kyaumĩte ĩũlũ kĩtheeete kyaũngama kĩteũsonga. Na kyoombana ta kĩsiĩĩwe nĩ ngome;* kyaũngamĩile vaasa vyũ kũu ndũanĩ ya Atamu, ĩla yĩ vakuvĩ na Nzalethani, nakyo kĩwʼũ kĩla kyatheeete kyelekele Ũkanganĩ wa Alava, nawʼo nĩ Ũkanga wa Mũnyũ,* kyatheea nginya kyangʼala. Na kwoou kĩwʼũ kĩu kyaũngamwʼa na andũ mainga kuma vala maĩ masianĩtye na Yeliko. 17 Na athembi ala makuĩte ĩsandũkũ ya ũtianĩo wa Yeova maendeea kũũngama mateũsonga makinyĩte nthĩ nyũmũ katĩkatĩ wa Yolotani, namo Aisilaeli onthe mainga makinyĩle nthĩ nyũmũ nginya mbaĩ ĩsu yonthe yainga Yolotani.

4 Na yĩla mbaĩ yonthe yaminie kũinganĩsya Yolotani oou, Yeova amwĩa Yosua atĩĩ: 2 “Osa aũme 12 kuma andũnĩ, mũndũũme ũmwe kuma kĩla mbaĩ, 3 na ũimeaĩa ũũ: ‘Osai mavia 12 kuma katĩkatĩ wa Yolotani, kuma vala nyaaĩ sya athembi syĩĩkinyĩte iteũsonga, na mũimakua mũmaie vala mũũkomela ũtukũ wa ũmũnthĩ.’”

4 Nĩvo ĩndĩ Yosua weetie aũme asu 12 wanyuvĩte kuma katĩ wa Aisilaeli, mũndũũme ũmwe kuma kĩla mbaĩ, 5 na Yosua amea: “Endai mbee wa Ĩsandũkũ ya Yeova Ngai wenyu nginya katĩkatĩ wa Yolotani, na kĩla ũmwe wenyu ayilĩĩla ĩvia yĩmwe kĩtuonĩ kyake, kwosana na ũtalo wa mbaĩ sya Aisilaeli, 6 nĩ kana mavia asu methĩawe wonanyʼo katĩ wenyu. Na ethĩwa syana syenyu* ikesa kũmũkũlya, ‘Nĩkĩ mwaiie mavia aa vaa?’ 7 no nginya mũitavye atĩĩ: ‘Nũndũ kĩw’ũ kya Yolotani nĩkyaũngamiwʼe mbee wa ĩsandũkũ ya ũtianĩo wa Yeova. Yĩla ĩsandũkũ yĩu yakĩlile Yolotani, kĩwʼũ kya Yolotani nĩkyaũngamiwʼe. Mavia aa makeethĩawa me ũlilikanyʼo ĩvinda yonthe kwondũ wa andũ ma Isilaeli.’”

8 Na kwoou Aisilaeli meeka o tondũ Yosua wameaĩe. Nĩmoosie mavia 12 kuma katĩkatĩ wa Yolotani, o tondũ Yeova wamwĩaĩe Yosua, nĩ kana mosane na ũtalo wa mbaĩ sya Aisilaeli. Na ĩndĩ matwaa mavia asu vala mavangĩte kũkomela ũtukũ ũsu na mamaia vau.

9 O na ĩngĩ, Yosua nĩwaũngamisye mavia 12 katĩkatĩ wa Yolotani vala nyaaĩ sya athembi ala makuĩte ĩsandũkũ ya ũtianĩo syakinyĩte, na mavia asu me vau nginya ũmũnthĩ.

10 Athembi ala makuĩte Ĩsandũkũ yĩu nĩmaendeeie kũũngama katĩkatĩ wa Yolotani nginya yĩla maũndũ onthe ala Yeova wamwĩaĩe Yosua atavye andũ meekiwe, kwosana na kyonthe kĩla Mose wamwĩaĩe Yosua. Ĩvindanĩ o yĩu, andũ nĩmaingie mekalaatĩte. 11 Na yĩla andũ onthe maminie kũinga oou, athembi nĩmaingie vamwe na Ĩsandũkũ ya Yeova andũ masyaĩĩsye. 12 Na Aleũveni, Angati, na nusu ya mbaĩ ya Manase mainga mevangĩte kwondũ wa kaũ me mbee wa Aisilaeli ala angĩ, o tondũ Mose wameaĩe. 13 Asikalĩ ta 40,000 me na mĩio ya kaũ nĩmaingie mbee wa Yeova malika yalatanĩ ĩtindimalu ya Yeliko.

14 Mũthenyanĩ ũsu Yeova nĩwamũnenevisye Yosua Aisilaeli onthe mene, na nĩmamũnengie ndaĩa nene* ĩvinda yonthe yĩla waĩ thayũ, o tondũ mamũnengete Mose ndaĩa nene.

15 Na ĩndĩ Yeova amwĩa Yosua: 16 “Ĩaĩe athembi ala makuĩte ĩsandũkũ ya ũla Ũkũsĩ mambate maume Yolotani.” 17 Na kwoou Yosua eea athembi atĩĩ: “Ambatai mume Yolotani.” 18 Yĩla athembi ala makuĩte ĩsandũkũ ya ũtianĩo wa Yeova mambatie kuma katĩkatĩ wa Yolotani na nyaaĩ sya athembi asu syakinya nthĩ nyũmũ, kĩwʼũ kya Yolotani nĩkyambĩĩie ĩngĩ kũvĩta, na ũsĩ ũsu wavinga na wakĩla ngũta syawʼo ta tene.

19 Mũthenyanĩ wa ĩkũmi wa mwei wa mbee andũ nĩmambatie kuma Yolotani na mamba kambi Ngilikali mũvakanĩ wa ngalĩko ya wumĩlonĩ wa sua ya Yeliko.

20 Na ala mavia 12 moosiwe Yolotani nĩmaũngamiwʼe nĩ Yosua kũu Ngilikali. 21 Na Yosua aneena na Aisilaeli amea: “Ĩvinda yũkĩte syana syenyu syakũlya aa-ĩthe, ‘Mavia aa nĩ ma kĩ?’ 22 no nginya mwĩtavya syana syenyu atĩĩ: ‘Aisilaeli maingie Yolotani makinyĩle nthĩ nyũmũ 23 yĩla Yeova Ngai wenyu wangʼalĩthisye kĩw’ũ kya Yolotani masyaĩĩsye nginya mainga, o tondũ Yeova Ngai wenyu weekanie na Ũkanga Mũtune yĩla waũngʼalĩthisye tũsyaĩĩsye nginya twainga. 24 Eekie ũu nĩ kana andũ onthe ĩũlũ wa nthĩ mamanye ũndũ kwʼoko kwa Yeova kwĩanyʼa vinya na nĩ kana mũmũkĩae Yeova Ngai wenyu kĩla ĩvinda.’”

5 Na yĩla asumbĩ onthe ma Aamoli ala maĩ ngalĩko ya ũthũĩlonĩ wa sua* ya Yolotani na asumbĩ onthe ma Akanaanĩ ala maĩ vakuvĩ na ũkanga meewie kana Yeova nĩwangʼalĩthĩtye kĩwʼũ kya Yolotani mbee wa Aisilaeli nginya mainga, vau kwa vau nĩmakwie ngoo,* na mayaĩ na ũkũmbaũ o na vanini* nũndũ wa Aisilaeli.

2 Ĩvindanĩ yĩu, Yeova nĩwaneenie na Yosua amwĩa: “Ĩseũvĩsye tũvyũ twa ĩvia na ũyaĩka aũme ma Isilaeli ĩngĩ, ĩvinda ya kelĩ.” 3 Na kwoou Yosua aseũvya tũvyũ twa ĩvia na aaĩka aũme ma Isilaeli me Ngiveathi-aalalothi.* 4 Ũndũ ũũ nĩwʼo watumie Yosua amaĩka: Aũme onthe katĩ wa andũ ala maumie Misili, aũme onthe ma kaũ,* nĩmakwʼĩĩe weũnĩ yĩla andũ maĩ kyalonĩ ĩtina wa kuma Misili. 5 Andũ onthe ala maumie Misili nĩmaaĩkiwe, ĩndĩ andũ ala masyaĩwe weũnĩ andũ me kyalonĩ ĩtina wa kuma Misili mayaĩ aĩke. 6 Aisilaeli nĩmangangie weũnĩ myaka 40 nginya yĩla mbaĩ yonthe yakwie, o aũme ma kaũ ala maumie Misili na mataaĩthukĩĩsya wasya wa Yeova. Yeova nĩwamevĩtĩie kana ndakamaeka mone nthĩ ĩla Yeova weevĩtĩie aa-ũmae moo kana akatũnenga yo, nthĩ yusũĩte ĩia na ũkĩ wa nzũkĩ. 7 Na nũndũ wa ũu, nĩwookĩlilye ana moo vandũ voo. Na Yosua nĩwaaĩkie ana asu; maaĩkiwe nũndũ mayaaaĩkwa ĩvinda yĩla andũ maĩ kyalonĩ.

8 Yĩla maminie kwaĩka mbaĩ yonthe, nĩmaendeeie kwĩkala kambinĩ vala maĩ nginya mavoa.

9 Na ĩndĩ Yeova aneena na Yosua, amwĩa: “Ũmũnthĩ nĩnaũvetangĩa* kĩvũthya kya Misili.” Na kwoou vandũ vau vethĩĩtwe vayĩtwa Ngilikali* nginya ũmũnthĩ.

10 Aisilaeli nĩmaendeeie kwamba kambi Ngilikali, na nĩmatanĩie Vasaka mũthenyanĩ wa 14 wa mwei ũsu, ĩ ya wĩoo, me yalatanĩ ĩtindimalu ya Yeliko. 11 Na mambĩĩa kũya ũsyao wa nthĩ ĩsu mũthenya ũla waatĩĩe ĩtina wa Vasaka; mũthenyanĩ ũsu nĩmaĩe mũkate ũte ĩlawa na lĩu wa mbaa ngetha mũkaange. 12 Yĩla Aisilaeli maĩe ũsyao ũmwe wa ĩ nthĩ, mana ndyaaoneka ĩngĩ mũthenya ũla waatĩĩe; mana ndyaĩ vo ĩngĩ kwondũ woo, na kuma mwaka ũsu nĩmambĩĩie kũya ũsyao wa nthĩ ya Kanaanĩ.

13 Yĩla Yosua waĩ vakuvĩ na Yeliko, nĩwookĩlilye metho na oona mũndũũme aũngye mbee wake akũĩte ũvyũ na akaũkwata na kwʼoko kwake. Na Yosua athi vala waũngamĩte na amũkũlya: “We wĩ ngalĩ yitũ kana wĩ ngalĩ ya amaitha maitũ?” 14 Nake amũsũngĩa amwĩa: “Aiee, ĩndĩ nooka ta mũnene wa ita sya Yeova.” Na Yosua eewʼa ũu, avalũka nthĩ na ũthyũ wake na akumana na amwĩa: “Mwĩai wakwa eenda kwĩa mũthũkũmi wake ata?” 15 Na mũnene wa ita sya Yeova amũsũngĩa Yosua amwĩa: “Umya iatũ syaku, nũndũ vaa ũũngamĩte nĩ vandũ vatheu.” Na Yosua eeka ũu na mĩtũkĩ.

6 Yu ĩndĩ, mũomo wa ndũa ya Yeliko nĩwavingĩtwe vyũ nũndũ wa Aisilaeli; vai mũndũ o na ũmwe waumalaa kana akalika.

2 Na Yeova eea Yosua atĩĩ: “Sisya, nĩnĩnenganĩte mokonĩ maku ndũa ya Yeliko na mũsumbĩ wayo na ngũmbaũ syayo syĩ vinya. 3 Endai mũthyũlũlũke ndũa, we na aũme onthe ma kaũ, na mwĩmĩthyũlũlũka o ĩvinda yĩmwe. Ũu nĩwʼo mũkekaa kwa ĩvinda ya mĩthenya thanthatũ. 4 Ĩaĩe athembi mũonza makue mbya mũonza sya ndũũme na maithi me mbee wa yĩla Ĩsandũkũ. Ĩndĩ mũthenyanĩ wa mũonza, mũkathyũlũlũka ndũa mavinda mũonza na athembi makavuva mbya isu. 5 Yĩla mbya isu sya ndũũme ikavuvwa, mweewʼa wasya wasyo* oou, andũ onthe meũkĩlya wasya mũnene wa kaũ. Na ũkũta wa ndũa ũkavalũka nthĩ, na no nginya kĩla mũndũ elika ndũanĩ ĩsu ateũtindĩa.”

6 Na kwoou Yosua mwana wa Nuni eeta athembi vamwe, na amea atĩĩ: “Osai ĩsandũkũ ya ũtianĩo, na athembi mũonza nĩmakue mbya mũonza sya ndũũme me mbee wa Ĩsandũkũ ya Yeova.” 7 Na eea andũ: “Endai mũthyũlũlũke ndũa, na nguthu sya aũme ala me na mĩio ya kaũ syaĩlĩte kũthi syĩ mbee wa Ĩsandũkũ ya Yeova.” 8 Na o tondũ Yosua watavisye andũ, athembi mũonza makuĩte mbya mũonza sya ndũũme mbee wa Yeova nĩmavĩtie mbee na mavuva mbya isu, na ĩsandũkũ ya ũtianĩo wa Yeova yaĩ ĩtina woo. 9 Na nguthu sya aũme ala maĩ na mĩio ya kaũ syathi mbee wa athembi ala mavuvaa mbya, na nguthu ĩla yamaseseee ĩtina yaatĩĩa Ĩsandũkũ yĩu o athembi maendeee kũvuva mbya isu mate kũeka.

10 Yu ĩndĩ, Yosua aĩ anameaĩa andũ akamea atĩĩ: “Mũikalonzanyʼe, na mawasya menyu maikatate kwĩwʼĩka. Mũikaneene ndeto o na ĩmwe nginya mũthenya ũla ngamwĩa, ‘Lonzanyʼai!’ Nĩvo ĩndĩ mũkalonzanyʼa.” 11 Na eeĩaa Ĩsandũkũ ya Yeova yĩthyũlũlũkwʼe ndũa ĩsu, ĩthyũlũlũka o yĩmwe. Ĩtina wa ũu, nĩmasyokie kambinĩ na makomela vau ũtukũ ũsu.

12 Ũnĩ wake Yosua nĩwaamũkie kwakya tene, na athembi moosa Ĩsandũkũ ya Yeova, 13 na athembi mũonza makuĩte mbya mũonza sya ndũũme matambya me mbee wa Ĩsandũkũ ya Yeova, na nĩmavuvaa mbya isu mate kũeka. Na nguthu sya aũme me na mĩio ya kaũ syaĩ mbee woo, nayo nguthu ĩla yamasesee ĩtina yaatĩĩe Ĩsandũkũ ya Yeova, o athembi maendeee kũvuva mbya mate kũeka. 14 Mũthenyanĩ wa kelĩ nĩmathyũlũlũkile ndũa ĩsu o ĩthyũlũlũka yĩmwe, na ĩtina wa ũu, masyoka kambinĩ. Ũu nĩwʼo meekie kwa ĩvinda ya mĩthenya thanthatũ.

15 Na mũthenyanĩ wa mũonza kwakya oou, mookĩla tene na mathi mathyũlũlũkĩte ndũa mavinda mũonza o ũndũ mathyũlũlũkaa mĩthenya ĩla ĩngĩ. No mũthenya ũsu wĩ wʼoka mathyũlũlũkile ndũa mavinda mũonza. 16 Na ĩvindanĩ ya mũonza, athembi mavuva mbya, na Yosua eea andũ atĩĩ: “Lonzanyʼai, nũndũ Yeova nũmũnengete ndũa ĩno! 17 Ndũa ĩno na kyonthe kĩla kĩ nthĩnĩ wayo syaĩlĩte kwanangwa vyũ; syonthe nĩ sya Yeova. No Laavi, ũla mũndũ mũka ĩlwaya, waĩlĩte kwĩkala thayũ, we na onthe ala me nake nyũmba, nũndũ nĩwavithie ala aũme twatũmie. 18 Ĩndĩ mũikathengeee syĩndũ ila syaĩlĩte kwanangwa vyũ, nĩ kana mũikende kĩndũ kyaĩlĩte kwanangwa vyũ na mũikyosa, na nũndũ wa ũu, mũietee kambi ya Isilaeli mũisyo* na mũituma ĩtwʼĩka kĩndũ kyaĩlĩte kwanangwa vyũ. 19 Ĩndĩ vetha wʼonthe na thaavu wʼonthe na syĩndũ syonthe sya ũthuku na kyũma* nitheetwʼe kwondũ wa Yeova. Syaĩlĩte kũtwawa vala vaiawa ũthwii wa Yeova.”

20 Na yĩla mbya syavuviwe, andũ malonzanyʼa. Makililye meewʼa wasya wa mbya isu oou mookĩlya wasya mũnene wa kaũ, na ũkũta wavalũka nthĩ. Ĩtina wa ũu, kĩla ũmwe woo nĩwalikile ndũanĩ ateũtindĩa, na mamĩkwata. 21 Nĩmatemangie vyũ na ũvyũ kyonthe kĩla kyaĩ ndũanĩ, aũme na aka, anini na akũũ, nzaũ syonthe, malondu, na mangʼoi.

22 Na Yosua eea ala aũme elĩ mathianĩte nthĩ ĩsu atĩĩ: “Endai nyũmbanĩ ya ũla mũndũ mũka ĩlwaya na mũimumaalya vamwe na andũ make onthe, o tondũ mwamwĩvĩtĩie.” 23 Na anake asu athiani mathi na maumaalya Laavi, vamwe na ĩthe wake, na inyia wake, ana-a-ĩthe, na andũ make onthe; maumaalilye mũsyĩ wake wʼonthe, na mamavikya nza wa kambi ya Isilaeli me asũvĩĩku.

24 Na ĩndĩ mavĩvya ndũa ĩsu na mwaki na kyonthe kĩla kyaĩ nthĩnĩ wayo. Ĩndĩ vetha, thaavu, na syĩndũ sya ũthuku na kyũma,* mainengane iiwe vala vaiawa ũthwii wa nyũmba ya Yeova. 25 No Laavi, ũla waĩ ĩlwaya, na nyũmba ya ĩthe wake na andũ make onthe mavonokiwʼe nĩ Yosua; na kũvika ũmũnthĩ ekalaa Isilaeli, nũndũ nĩwavithie ala aũme Yosua watũmie mathiane Yeliko.

26 Ĩvindanĩ yĩu, Yosua nĩwaneenie na andũ na amatavya wĩvĩto ũũ:* “Naumanĩwe mbee wa Yeova mũndũ ũla ũkatwʼa kũtũngĩĩa ndũa ĩno ya Yeliko. Eekĩa mũsingi wayo akakwʼĩĩwa nĩ mwana wake ũla mũkũũ, na aũngamya mĩomo yayo akakwʼĩĩwa nĩ mwana wake ũla mũnini.”

27 Na Yeova aĩ vamwe na Yosua, na nguma yake nĩyanyaĩĩkie nthĩ yonthe.

7 Ĩndĩ Aisilaeli mayaaĩka ũndũ meeaĩwe ĩũlũ wa syĩndũ ila syaaĩlĩte kwanangwa vyũ, nũndũ Akani mwana wa Kalimi, mwana wa Nzaviti, mwana wa Nzela, kuma mbaĩnĩ ya Yuta, nĩwoosie syĩndũ imwe syaaĩle kwanangwa vyũ. Na nũndũ wa ũu, ũthatu wa Yeova wamakanĩa Aisilaeli.

2 Na Yosua atũma aũme kuma Yeliko mathi ndũanĩ ya Ai, ĩla yĩ vakuvĩ na Mbethi-aveni na yĩ ngalĩko ya wumĩlonĩ wa sua ya Mbetheli, na amea: “Ambatai mũkathiane nthĩ ĩsu.” Na kwoou aũme asu mambata Ai na mamĩthiana. 3 Na yĩla masyokie vala ve Yosua, mamwĩa atĩĩ: “Vai vata andũ onthe mambate kũu. Aũme ta 2,000 kana 3,000 nĩmeanĩtye kũsinda Ai. Ndũkeaĩe andũ onthe mathi kũu nũndũ wĩĩka o kũmanosya, nĩkwĩthĩwa no andũ anini me ndũanĩ ĩsu.”

4 Na kwoou aũme ta 3,000 mambata Ai, ĩndĩ aũme ma Ai matuma masemba mamakĩĩte. 5 Aũme ma Ai nĩmooaie aũme 36, na mamasembanyʼa kuma nza wa mũvĩa wa ndũa nginya Sevalimu,* na maendeea kũmoaĩa vau mũvaũũkonĩ. Nũndũ wa ũu, ngoo* sya andũ syatweka na syetĩka ta kĩwʼũ.

6 Yĩla Yosua weewie ũvoo ũsu, nĩwatembũie ngũa syake na avalũka nthĩ na ũthyũ wake mbee wa yĩla Ĩsandũkũ ya Yeova nginya ĩ ya wĩoo, we na atumĩa ma Isilaeli, na maendeea kwĩyũmba kĩtoo mĩtwenĩ yoo. 7 Na Yosua asya: “Ĩiaa! Mwĩai Ũla Mũnene Yeova, nĩkĩ watũetie nzĩa ĩsu yonthe na watũingya Yolotani nĩ kana wĩke o kũtũnengane mokonĩ ma Aamoli matũmine? O na ti kavaa keka tweekie o kwĩkala mũingo ũya ũngĩ* wa Yolotani! 8 Ndekea, ame Yeova, ĩndĩ yu nĩasya ata ethĩwa andũ ma Isilaeli nĩmasyoka makĩĩte amaitha moo?* 9 Yĩla Akanaanĩ na ekali onthe ma nthĩ ĩno mekwĩwʼa ĩũlũ wa ũndũ ũsu, nĩmeũtũthyũlũlũka na maituta vyũ ĩsyĩtwa yitũ kuma ĩũlũ wa nthĩ, ĩndĩ we ũkeekana ata na ĩsyĩtwa yaku ĩnene?”

10 Na Yeova amũsũngĩa Yosua, amwĩa: “Ũkĩla! Nĩkĩ ũvalũkĩte nthĩ na ũthyũ waku? 11 Aisilaeli nĩmekĩte naĩ. Nĩmaleete kwĩanĩsya ũtianĩo wakwa ũla nameaĩe meanĩsye. Nĩmosete syĩndũ imwe syaĩle kwanangwa vyũ; nĩmasyũyĩte na makaivitha katĩ wa syĩndũ syoo ene. 12 Na nũndũ wa ũu, Aisilaeli mayĩĩthĩwa matonya kũsinda amaitha moo. Makavĩndũkaa na maisemba makĩĩte amaitha moo, nũndũ matwʼĩkĩte kĩndũ kyaĩlĩte kwanangwa vyũ. Ndiĩthĩwa vamwe nenyu ĩngĩ nginya mwanange syĩndũ ila mwĩ nasyo inaaĩlĩte kwanangwa vyũ. 13 Ũkĩla ũthesye andũ! Matavye atĩĩ: ‘Ĩthesyei kwondũ wa ũnĩ, nũndũ ũũ nĩwʼo Yeova Ngai wa Isilaeli ũkwasya: “Ve syĩndũ syaĩlĩte kwanangwa syĩ katĩ waku, we Isilaeli. Mũyĩĩthĩwa mũtonya kũsinda amaitha menyu nginya yĩla mũkaveta syĩndũ ila syĩ katĩ wenyu syaĩlĩte kwanangwa vyũ. 14 Ũnĩ kwakya mũkoombana, mbaĩ kwa mbaĩ, na mbaĩ ĩla Yeova ũkanyuva ĩkooka mbee, mũsyĩ kwa mũsyĩ, na mũsyĩ ũla Yeova ũkanyuva ũkooka mbee, nyũmba kwa nyũmba, na nyũmba ĩla Yeova ũkanyuva ĩkooka mbee, mũndũũme kwa mũndũũme. 15 Na mũndũũme ũla ũkethĩwa na kĩndũ kyaĩlĩte kwanangwa vyũ akavĩvwʼa na mwaki, we na syĩndũ syake syonthe, nũndũ nũleete kwĩanĩsya ũtianĩo wa Yeova na nũndũ nĩwĩkĩte ũndũ wĩ nthoni nthĩnĩ wa Isilaeli.”’”

16 Na Yosua aamũka ũnĩ wake kwakya tene na akũlya Aisilaeli mathengeee, mbaĩ kwa mbaĩ, na mbaĩ ya Yuta yanyuvwa. 17 Na eea mĩsyĩ ya Yuta ĩthengeee, na mũsyĩ wa Anzela wanyuvwa, na ĩtina wa ũu, eea mũsyĩ wa Anzela ũthengeee, mũndũũme kwa mũndũũme, na Nzaviti anyuvwa. 18 Mũthya, nĩweeie nyũmba ya Nzaviti ĩthengeee, mũndũũme kwa mũndũũme, na Akani mwana wa Kalimi, mwana wa Nzaviti, mwana wa Nzela, kuma mbaĩnĩ ya Yuta, anyuvwa. 19 Nĩvo ĩndĩ Yosua wamwĩie Akani: “Mwanawa, nĩngũkwĩsũva, nenga Yeova Ngai wa Isilaeli ndaĩa na ũimumbũlĩla naĩ yaku. Nĩngũkwĩsũva, ndavye kĩla wĩkĩte. Ndũkambithe.”

20 Na ĩndĩ Akani amũsũngĩa Yosua amwĩa: “Nĩ wʼo, ninyie nĩkĩte naĩ na ngamũvĩtĩsya Yeova Ngai wa Isilaeli, na ũndũ ũũ nĩwʼo nĩkie. 21 Yĩla nonie mũtavonĩ ngũa mbanake na ya ndaĩa kuma Sinali na sekeli 200* sya vetha na kĩlungu kĩmwe kya thaavu kĩ na ũito wa sekeli 50, nĩnĩsyendie, na kwoou nasyosa. Ivithĩtwe nthĩ ĩeemanĩ yakwa, na i mbesa syĩ ungu wasyo.”

22 Na vau kwa vau Yosua atũma andũ, na masemba ĩeemanĩ ya Akani, na meethĩa ĩla ngũa ĩvithĩtwe vo, na i mbesa syĩ ungu wayo. 23 Na kwoou maumaalya syĩndũ isu nza wa ĩeema na maitwaa vala ve Yosua na Aisilaeli onthe, na masiia mbee wa Yeova. 24 Na Yosua na Aisilaeli onthe mamwosa Akani mwana wa Nzela, vamwe na ũla vetha, ĩla ngũa ya ndaĩa, na kĩla kĩlungu kya thaavu, vamwe na ana make, eĩtu make, nzaũ yake, ĩngʼoi yake, malondu make, mbũi syake, ĩeema yake, na kyonthe kĩla kyaĩ kyake, na mamatwaa Mwandanĩ* wa Akoli. 25 Na Yosua asya: “Nĩkĩ ũetie mũisyo* ũũ ĩũlũ witũ? Yeova nũkũete mũisyo ĩũlũ waku ũmũnthĩ.” Na kwoou Aisilaeli onthe mamũkimanga vamwe na andũ make na mavia. Na ĩtina wa ũu, mamavĩvya na mwaki. Nĩmamakimangie onthe na mavia. 26 Na ĩndĩ mamwilĩĩla mbumbu nene ya mavia, na mbumbu ĩsu yĩ vo nginya ũmũnthĩ. Na ĩtina wa ũu, ũthilĩku wa Yeova waoleka. Nĩkyo kĩtumi vandũ vau vetawa Mwanda wa Akoli* nginya ũmũnthĩ.

8 Na ĩndĩ Yeova amwĩa Yosua: “Ndũkakĩe kana ũteleme. Endanyʼa na aũme onthe ma kaũ mũkite na Ai. Na sisya, nĩnĩnenganĩte mokonĩ maku mũsumbĩ wa Ai, andũ make, ndũa yake, na nthĩ yake. 2 O ũndũ weekanie na Yeliko na mũsumbĩ wayo nowʼo ũkwĩkana na Ai na mũsumbĩ wayo, ate o yu no mwĩyosee mũtavo ũla mũkumya Ai vamwe na indo syoo. Ia aũme mamoveesye ĩtina wa ndũa.”

3 Na kwoou Yosua na aũme onthe ma kaũ mathi kũkita na Ai. Yosua anyuvie ngũmbaũ syĩ vinya 30,000 na aitũma na ũtukũ. 4 Na ameaĩa ũũ: “Mwaĩlĩte kũmoveesya ĩtina wa ndũa. Mũikathi vaasa mũno na ndũa, na inywʼonthe ĩkalai mwĩyũmbanĩtye. 5 Nĩngũthengeea ndũa nĩ na andũ ala angĩ onthe ngwĩthĩwa namo, na yĩla mekumaala moke kũkita naitũ ta tene, twĩvĩndũka tũsembe tũmakĩĩte. 6 Na matũsembanyʼa, nĩtũũsemba nĩ kana tũtume mathi vaasa na ndũa, nũndũ meĩthĩwa mayasya, ‘Masyokete matũkĩĩte o ta ĩvinda yĩla yĩngĩ.’ Na nĩtũkũendeea kũsemba tũmakĩĩte. 7 Ĩtina wa ũu, nenyu mwĩũkĩla vala mũmoveesye na mũikwata ĩ ndũa; Yeova Ngai wenyu nũkũmĩnengane mokonĩ menyu. 8 Na mwakwata ndũa ĩsu oou, mĩvĩvyei. No nginya mwĩke o kĩla Yeova ũwetete. Ũu nĩwʼo namwĩaĩa.”

9 Na ĩndĩ Yosua amaeka mathi, na mathi me nguthu nginya vala maaĩlĩte kũmoveesya; na kĩla ũmwe aũngama vandũ vake katĩkatĩ wa Mbetheli na Ai, ngalĩko ya ũthũĩlonĩ wa sua ya Ai, nake Yosua akomela kambinĩ na andũ ala angĩ.

10 Na Yosua aamũka ũnĩ wake kwakya tene na oombanyʼa nguthu sya asikalĩ, na ĩndĩ e vamwe na atumĩa ma Isilaeli mamatongoesya nginya Ai. 11 Na aũme onthe ma kaũ ala maĩ vamwe nake mathi me nguthu nginya mbee wa ndũa ya Ai na mamba kambi masianĩtye nayo. Mambie kambi ngalĩko ya ĩũlũ ya ndũa ĩsu, na mwanda waĩ katĩkatĩ woo na Ai. 12 Kavindanĩ o kau, aĩ anoosa aũme ta 5,000 na akamea moveesye katĩkatĩ wa Mbetheli na Ai, ngalĩkonĩ ya ũthũĩlonĩ wa sua ya ndũa ĩsu. 13 Na andũ mamba kambi ĩla nene ngalĩko ya ĩũlũ ya ndũa ĩsu na maia nguthu ĩla yamasesee ĩtina ngalĩko ya ũthũĩlonĩ wa sua ya ndũa ĩsu, na ũtukũ ũsu Yosua athi katĩkatĩ wa ũla mwanda.*

14 Na yĩla mũsumbĩ wa Ai wamwonie oou, aumaala e vamwe na aũme ma ndũa kwakya tene mekalaatĩte makomanĩe na Isilaeli kĩsionĩ kyasianĩtye na yĩla yalata ĩtindimalu nĩ kana mokite namo. Ĩndĩ ndeesĩ kana ve nguthu yamwoveesye ngalĩko ya ĩtina ya ndũa ĩsu. 15 Na yĩla aũme ma Ai mamavithũkĩie, Yosua na Aisilaeli onthe masemba na lelũ melekele weũnĩ. 16 Nĩvo ĩndĩ andũ onthe ala maĩ ndũanĩ meeiwe mamasembanyʼe; na o ũndũ maendeeie kũsembanyʼa Yosua, nowʼo maendeeie kũthi vaasa na ndũa. 17 Vai mũndũũme o na ũmwe watiĩtwe Ai na Mbetheli ũtaaumaala asembanyʼe Aisilaeli. Matiie mũvĩa wa ndũa wĩ mũvingũe na masembanyʼa Aisilaeli.

18 Na ĩndĩ Yeova amwĩa Yosua: “Tambũũkya mũsenge ũla wĩ kwʼokonĩ kwaku welekele Ai, nũndũ nĩngũmĩnengane kwʼokonĩ kwaku.” Na Yosua atambũũkya mũsenge ũla waĩ kwʼokonĩ kwake kwelekela ndũa ĩsu. 19 Na yĩla watambũũkisye kwʼoko kwake oou, nguthu ĩla yooveesye yookĩla na mĩtũkĩ kuma vala yaĩ na yasemba ndũanĩ na yamĩkwata. Na vau kwa vau makwatya ndũa ĩsu mwaki.

20 Yĩla aũme ma Ai mavĩndũkie masisya ĩtina, nĩmoonie syũki ya ndũa yambatĩte nginya matunĩ, na mayaĩ na vinya wa kũsemba ngalĩko o na ĩmwe. Na ĩndĩ andũ ala masembete melekele weũnĩ mavĩndũkĩa ala mamasembanĩtye. 21 Na yĩla Yosua na Aisilaeli onthe moonie kana aũme ala mooveesye nĩmakwata ndũa na moona syũki ya ndũa yambatĩte, nĩmavĩndũkie na mambĩĩa kũkita aũme ma Ai. 22 Na ala maĩ ndũanĩ maumaala makomane namo, na nũndũ wa ũu, aũme ma Ai makitanĩwʼa vau katĩkatĩ, Aisilaeli amwe me ngalĩko ĩno na ala angĩ me ngalĩko ĩya ĩngĩ, na mamakũna nginya matia vate ũmwe wĩ thayũ kana ũnavonoka. 23 Ĩndĩ nĩmakwatie mũsumbĩ wa Ai e thayũ na mamũtwaa vala ve Yosua.

24 Aisilaeli nĩmooaĩe ekali onthe ma Ai weũnĩ kũla mamaatĩĩe; nĩmamoaie onthe na ũvyũ nginya ũla wa mũthya, na ĩndĩ Aisilaeli onthe masyoka Ai na mamĩkũna na ũvyũ. 25 Andũ onthe ma Ai ala mooaiwe mũthenya ũsu, aũme na aka, maĩ 12,000. 26 Yosua ndaatũnga kwʼoko kũla watambũũkĩtye mũsenge nakwʼo nginya yĩla waĩkĩĩthisye kana ekali onthe ma Ai nĩmaminwa vyũ. 27 Ĩndĩ Aisilaeli nĩmeeyoseie indo na mũtavo kuma ndũanĩ ĩsu, o tondũ Yeova wamwĩaĩe Yosua.

28 Na ĩndĩ Yosua avĩvya Ai na amĩtwʼĩkĩthya mbumbu na ĩanzo yĩtakatũwa ĩngĩ, na ũu nĩwʼo yĩilye nginya ũmũnthĩ. 29 Na Yosua asũsya mũsumbĩ wa Ai mũtĩnĩ nginya ĩ ya wĩoo, na sua yĩkilyĩ kũthũa, asya mwĩĩ wake umwʼe mũtĩnĩ ũsu. Na ĩndĩ mawĩkya mũvĩanĩ wa ndũa na mawũmbĩĩa mbumbu nene ya mavia, na mbumbu ĩsu yĩ vau nginya ũmũnthĩ.

30 Ĩvinda yĩu nĩwʼo Yosua wamwakĩie Yeova Ngai wa Isilaeli kĩthembeo Kĩĩmanĩ kya Evali, 31 o tondũ Mose mũthũkũmi wa Yeova wameaĩe Aisilaeli na o tondũ vaandĩkĩtwe ĩvukunĩ ya Mĩao ya Mose: “Seũvyai kĩthembeo kya mavia mate matile na matasĩtwe na mũio wa kyũma.”* Vau nĩ vo mamũthembeie Yeova nthembo sya kũvĩvwʼa vamwe na nthembo sya ngwatanĩo.

32 Na ĩndĩ aumĩĩsya mavianĩ asu Mĩao ĩla Mose waandĩkĩte mbee wa Aisilaeli. 33 Ĩvindanĩ yĩu, Aisilaeli onthe, atumĩa moo, anene moo, na asili moo maũngamĩte ngalĩko syelĩ sya yĩla Ĩsandũkũ me mbee wa athembi Alivai ala makuĩte ĩsandũkũ ya ũtianĩo wa Yeova. Ekali ma ũeninĩ maĩ vo, o vamwe na ala masyaĩtwe nĩ Aisilaeli. Nusu ĩmwe yaũngamĩte mbee wa Kĩĩma kya Ngelisimu, na nusu ĩla ĩngĩ ĩkaũngama mbee wa Kĩĩma kya Evali (o tondũ Mose mũthũkũmi wa Yeova weeĩaĩte), nĩ kana andũ ma Isilaeli maathimwe. 34 Ĩtina wa ũu, nĩwasomie na wasya ndeto syonthe sya ĩla Mĩao, moathimo na iumo ila syaandĩkĩtwe, kwosana na maũndũ onthe ala maandĩkĩtwe ĩvukunĩ ya Mĩao. 35 Vai ndeto o na ĩmwe katĩ wa ndeto syonthe ila Mose weeĩaĩe andũ Yosua ũtaasoma na wasya mbee wa ũmbano wʼonthe wa Isilaeli, o vamwe na aka na syana na ekali ma ũeninĩ ala mekalaa* katĩ wa Aisilaeli.

9 Na asumbĩ onthe ala maĩ kĩsionĩ kĩla kĩ ngalĩko ya ũthũĩlonĩ wa sua ya Yolotani meewʼa kĩla kyaĩ kĩneekĩka. Kĩu nĩ kĩsio kĩla kĩ iĩma, kĩsio kya Sevela, kĩsio kĩla kĩkuumanĩte na ũtee wʼonthe wa ũla Ũkanga Mũnene,* na kĩsio kĩla kĩ mbee wa Levanoni. Na asu maĩ asumbĩ ma Aititi, Aamoli, Akanaanĩ, Avelisi, Aivi, na Ayevusi. 2 Meewʼa ũu, nĩmakwatanie nĩ kana mokite na Yosua na Isilaeli.

3 O namo ekali ma Ngiveoni nĩmeewie ũndũ Yosua waĩ aneekana na Yeliko na Ai. 4 Na kwoou matũmĩa ũĩ na meekĩa syĩndũ syoo makunianĩ makũũ na mamatũlya mangʼoinĩ, na makua sũva sya mbinyu sya kĩthuma ila syaĩ ngũũ na syatembũkangĩte na ikatumwa; 5 o na ĩngĩ, nĩmeekĩie iatũ ndwʼĩku na syĩ na ilaka, na meekĩa ngũa ndwʼĩku. Na mĩkate ĩla makuĩte yaĩ myũmũ na nĩyatilĩkangaa. 6 Na ĩndĩ mathi kambinĩ vala Yosua waĩ kũu Ngilikali na maneena nake na aũme ma Isilaeli, mayasya: “Tumĩte nthĩ ya kũasa. Yu ĩndĩ, tianĩai ũtianĩo vamwe naitũ.” 7 Ĩndĩ aũme ma Isilaeli meea Aivi asu atĩĩ: “Nĩvatonyeka mũkethĩwa mwĩkalaa vakuvĩ naitũ. Kwoou tũtonya ata kũtianĩa ũtianĩo nenyu?” 8 Namo mamũsũngĩa Yosua mamwĩa: “Ithyĩ twĩ athũkũmi maku.”*

Na ĩndĩ Yosua amea: “Ninywʼĩ aaũ, na mumĩte va?” 9 Nĩvo ĩndĩ mamwĩie: “Ithyĩ athũkũmi maku tumĩte nthĩ ya vaasa mũno nũndũ nĩtwĩwʼĩte ĩũlũ wa ĩsyĩtwa ya Yeova Ngai waku, nĩkwĩthĩwa nĩtwĩwʼĩte ĩũlũ wa nguma yake na maũndũ onthe ala weekie Misili 10 na ĩũlũ wa maũndũ onthe ala weekie ala asumbĩ elĩ ma Aamoli ala maĩ mũingo ũya ũngĩ* wa Yolotani, Mũsumbĩ Sioni wa Esivoni na Mũsumbĩ Oku wa Mbasani, ũla waĩ Asitalothi. 11 Na kwoou atumĩa maitũ na ekali onthe ma nthĩ yitũ matwĩa atĩĩ: ‘Kuai syĩndũ kwondũ wa kyalo kyenyu na mũithi mũkomane namo. Na mwakomana namo, mũimea atĩĩ: “Nĩtũũtwʼĩka athũkũmi menyu; yu ĩndĩ, tianĩai ũtianĩo naitũ.”’ 12 Mĩkate ĩĩ yaĩ mĩvyũ mũthenya ũla twaumie mĩsyĩ kwitũ tũke kũkomana nenyu. Ĩndĩ yu, sisyai, nĩ myũmũ na nĩkũtilĩkanga. 13 Na sũva ii sya kĩthuma syaĩ nzaũ yĩla twasyusũisye mbinyu, ĩndĩ yu nĩ ndembũkangu. Na ngũa sitũ na iatũ sitũ nĩ ndwʼĩku nũndũ kyalo kitũ kĩĩ kĩasa mũno.”

14 Nĩvo ĩndĩ aũme asu moosie* syĩndũ imwe syaĩ na Angiveoni, ĩndĩ mayaakũlya Yeova ũtao ĩũlũ wa ũndũ ũsu. 15 Na kwoou Yosua eewʼana namo kwĩthĩwe na mũuo katĩ woo na atianĩa ũtianĩo vamwe namo mekale thayũ, na ũu nowʼo anene ma ũmbano mamevĩtĩie.

16 Mĩthenya ĩtatũ ĩtina wa Aisilaeli kũtianĩa ũtianĩo vamwe namo, nĩmeewie kana mekalaa o vau vakuvĩ, kĩsionĩ kĩte vaasa namo. 17 Nĩvo ĩndĩ Aisilaeli maumaalile na mathi ndũanĩ syoo mũthenyanĩ wa katatũ; ndũa syoo syaĩ Ngiveoni, Kevila, Mbeelothi, na Kiliathi-yealimu. 18 Ĩndĩ Aisilaeli mayaaũkita namo, nũndũ anene ma ũmbano maĩ maneevĩta mbee wa Yeova Ngai wa Isilaeli. Na kwoou ũmbano wʼonthe wambĩĩa kũmanyungunyĩĩsya anene asu. 19 Yĩla anene asu onthe meewie ũu meea ũmbano wʼonthe atĩĩ: “Nũndũ nĩtũnamevĩtĩie mbee wa Yeova Ngai wa Isilaeli, tũyaĩlĩte kũmaũmĩsya. 20 Kwoou twĩĩka atĩĩ: Nĩtũũmaeka maendeee kwĩkala thayũ, nĩ kana Ngai ndakatwĩwʼĩe woo nũndũ wa wĩvĩto ũla tũnamevĩtĩie.” 21 Na anene asu mongela kwasya: “Ekai mekale thayũ, ĩndĩ makaunaa ngũ na kũuta kĩwʼũ kwondũ wa ũmbano wʼonthe.” Ũu nĩwʼo anene asu mamathie.

22 Na ĩndĩ Yosua ameta na amea: “Nĩkĩ mũnatũkengie mũyasya, ‘Tumĩte kĩsionĩ kĩ vaasa vyũ nenyu,’ na ũwʼo nĩ kana mwĩkalaa o katĩ witũ? 23 Kuma yu mũkeethĩawa mwĩ aumanĩe, na mavinda onthe mũkeethĩawa mwĩ ngombo sya kuna ngũ na kũuta kĩwʼũ kwondũ wa nyũmba ya Ngai wakwa.” 24 Namo mamũsũngĩa Yosua mamwĩa: “Tũneekie ũu nũndũ ithyĩ athũkũmi maku twataviwʼe ũtheinĩ kana Yeova Ngai waku nĩwamwĩaĩe Mose mũthũkũmi wake amũnenge nthĩ ĩno yonthe na aimina ekali onthe ma ĩ nthĩ ala me mbee wenyu. Na kwoou twakĩa tũyona ta mũũtũaa,* na nĩkyo kĩtumi tũneekie ũu. 25 Yu ĩndĩ, twĩ mokonĩ maku. Twĩke kĩla ũkwona kĩ kĩseo na kyaĩlĩte.” 26 Na ũu nĩwʼo Yosua weekanie namo; nĩwamavonokisye kuma mokonĩ ma Aisilaeli, na mayaamoaa. 27 Ĩndĩ mũthenya ũsu Yosua nĩwamatwʼĩkĩthisye andũ ma kuna ngũ na kũuta kĩwʼũ kwondũ wa ũmbano wʼonthe na kwondũ wa kĩthembeo kya Yeova kĩ vala Ngai ũkanyuva kĩthĩwe, na ũu nĩwʼo vailye nginya ũmũnthĩ.

10 Na yĩla Mũsumbĩ Atoni-nzeteki wa Yelusalemu weewie kana Yosua nũkwatie Ai na amyananga vyũ, na kana o ũndũ weekanie na Yeliko na mũsumbĩ wayo nowʼo wĩkanie na Ai na mũsumbĩ wayo, na kana ekali ma Ngiveoni nĩmeewʼanie na Aisilaeli mekalanyʼe na mũuo na maiendeea kwĩkala katĩ woo, 2 nĩwatelemile mũno, nũndũ Ngiveoni yaĩ ndũa nene o ta ndũa ila syeethĩawa na mũsumbĩ. Yaĩ nene kwĩ Ai, na aũme mayo onthe maĩ ngũmbaũ sya kaũ. 3 Na kwoou Atoni-nzeteki mũsumbĩ wa Yelusalemu atũmana kũla kwĩ Oamu mũsumbĩ wa Eviloni, Vilamu mũsumbĩ wa Yalimuthi, Yavia mũsumbĩ wa Lakisi, na Ndevilu mũsumbĩ wa Ekiloni, ayasya: 4 “Ũkai mũndetheesye kũvithũkĩa Ngiveoni, nũndũ Angiveoni nĩmewʼanĩte na Yosua na Aisilaeli kwĩthĩwe na mũuo katĩ woo.” 5 Nĩvo ĩndĩ ala asumbĩ atano ma Aamoli, mũsumbĩ wa Yelusalemu, mũsumbĩ wa Eviloni, mũsumbĩ wa Yalimuthi, mũsumbĩ wa Lakisi, na mũsumbĩ wa Ekiloni, moombanie vamwe na ita syoo, na mathi me nguthu na mamba kambi vakuvĩ na Ngiveoni nĩ kana mamĩvithũkĩe.

6 Nĩvo ĩndĩ aũme ma Ngiveoni matũmanie kambinĩ vala ve Yosua kũu Ngilikali, mayasya: “Ndũkaeme kũtetheesya* ngombo syaku. Ũka mĩtũkĩ! Tũvonokye na ũitũtetheesya! Asumbĩ onthe ma Aamoli kuma kĩsionĩ kĩla kĩ iĩma nĩmombanĩte matũkite.” 7 Na kwoou Yosua ambata kuma Ngilikali e vamwe na aũme onthe ma kaũ na ngũmbaũ syĩ vinya.

8 Na ĩndĩ Yeova eea Yosua: “Ndũkamakĩe, nũndũ nĩnĩmanenganĩte mokonĩ maku. Vai ũmwe woo ũkwĩthĩwa atonya kũũsinda.” 9 Na kwoou ĩtina wa Yosua na asikalĩ make kũthi me nguthu ũtukũ wʼonthe kuma Ngilikali nĩmavikie vala maĩ na mamakitya matataĩĩe. 10 Na Yeova amavũavũanyʼa mbee wa Isilaeli, na Aisilaeli mooaĩa aingĩ moo kũu Ngiveoni, na mamasembanyʼa mesĩle kyambatonĩ kya Mbethi-oloni na maendeea kũmoaa nginya mavika Aseka na Maketa. 11 Na yĩla mavikie mũvaũũkonĩ wa Mbethi-oloni masembete makĩĩte Isilaeli, Yeova amauĩsya mbua nene ya mavia kuma matunĩ, nayo yamauĩĩa nginya Aseka, na makwʼa. Ala mooaiwe nĩ mbua ĩsu ya mavia maĩ aingĩ kwĩ ala mooaiwe na ũvyũ nĩ Aisilaeli.

12 Mũthenya ũsu Yeova wasindie Aamoli mbee wa metho ma Aisilaeli, nĩwʼo Yosua weeie Yeova ũũ Aisilaeli mayĩwʼa:

13 Na kwoou sua yaũngama ki na mwei ndwaasonga nginya yĩla mbaĩ ĩsu yeeyĩvanĩisye kũla kwĩ amaitha mayo. Wʼo ũndũ ũsu ndũandĩkĩtwe ĩvukunĩ ya Yasali? Sua nĩyaũngamie ki katĩkatĩ wa matu na yĩyaaĩkalaata kũthũa vakuvĩ mũthenya mũima. 14 Vai mũthenya ũngĩ ta ũsu Yeova waaĩthukĩĩsya wasya wa mũndũ, mbee wawʼo kana ĩtina wawʼo, nĩkwĩthĩwa Yeova akwetye kũkitĩa Isilaeli.

15 Ĩtina wa maũndũ asu, Yosua vamwe na aũme onthe ma Isilaeli nĩmasyokie kambinĩ kũu Ngilikali.

16 Ĩndĩ ala asumbĩ atano nĩmasembete makathi kwĩvitha ngunganĩ yĩ Maketa. 17 Na ĩndĩ Yosua eewa atĩĩ: “Ala asumbĩ atano meethĩwa mevithĩte ngunganĩ yĩ Maketa.” 18 Na kwoou Yosua asya: “Vingilityai mavia manene makunĩke ngunga ĩsu na mũinyuva aũme mamasunge. 19 Ĩndĩ ala angĩ mũikaũngame. Sembanyʼai amaitha menyu na mũimaatĩĩa ĩtina mũmoaĩte. Mũikametĩkĩlye malike ndũanĩ syoo, nũndũ Yeova Ngai wenyu nũmanenganĩte mokonĩ menyu.”

20 Ĩtina wa Yosua na Aisilaeli kũaa aingĩ mũno katĩ woo nginya weethĩa makilyĩ kũmamina, eka o ala avũthũ mavonokie na malika ndũanĩ mbiĩĩe, 21 andũ onthe nĩmasyokie kambinĩ vala ve Yosua kũu Maketa me asũvĩĩku. Vai mũndũ o na ũmwe waatata kũneena naĩ* ĩũlũ wa Aisilaeli. 22 Na ĩndĩ Yosua asya: “Vetangai mavia ala makunĩkĩte ngunga na mũyumaalya asumbĩ asu atano mũmaete vaa nĩĩ.” 23 Na kwoou maumaalya ala asumbĩ atano ngunganĩ na mamũtwaĩa Yosua. Asumbĩ asu maĩ mũsumbĩ wa Yelusalemu, mũsumbĩ wa Eviloni, mũsumbĩ wa Yalimuthi, mũsumbĩ wa Lakisi, na mũsumbĩ wa Ekiloni. 24 Yĩla matwaie asumbĩ asu vala ve Yosua, nĩweetie aũme onthe ma Isilaeli na eea ala maũngamĩe aũme ma kaũ ala maendanĩtye nake atĩĩ: “Thengeeai. Kinyai asumbĩ aa ngingonĩ ĩtina.” Na kwoou mathengeea na makinya asumbĩ asu ngingonĩ ĩtina. 25 Nĩvo ĩndĩ Yosua wameie: “Mũikakĩe kana kũtelema. Ĩthĩwai na ũkũmbaũ na vinya, nũndũ ũũ nĩwʼo Yeova ũkwĩkana na amaitha menyu onthe ala mũkũkita namo.”

26 Na ĩndĩ Yosua amakũna na amoaa na amasũsya mĩtĩnĩ ĩtano, na mekala masũĩtwʼe mĩtĩnĩ ĩsu nginya ĩ ya wĩoo. 27 Na sua yĩithũa Yosua aumya mwĩao maumwʼe mĩtĩnĩ ĩsu na mayĩkwʼa ĩla ngunganĩ meevithĩte. Na ĩndĩ moosa mavia manene makunĩka ngunga ĩsu, na me vau nginya ũmũnthĩ.

28 Na mũthenyanĩ o ũsu Yosua akwata Maketa na amĩkũna na ũvyũ. Nĩwaminie vyũ mũsumbĩ wayo na andũ onthe* ala maĩ nthĩnĩ wayo, na vai mũndũ waavonoka. O ũndũ weekanie na mũsumbĩ wa Yeliko nowʼo weekanie na mũsumbĩ wa Maketa.

29 Na ĩndĩ Yosua e vamwe na aũme onthe ma Isilaeli mauma Maketa na mathi Livina na mokita na Livina. 30 Na ndũa ĩsu o nayo Yeova nĩwamĩnenganie kwʼokonĩ kwa Isilaeli vamwe na mũsumbĩ wayo, na mamĩkũna na ũvyũ vamwe na andũ onthe* ala maĩ nthĩnĩ wayo; vai mũndũ o na ũmwe waavonoka. O ũndũ meekanie na mũsumbĩ wa Yeliko nowʼo meekanie na mũsumbĩ wa Livina.

31 Ĩtina wa ũu, Yosua e vamwe na aũme onthe ma Isilaeli nĩmaumie Livina na mathi Lakisi na mamba kambi vau na mokita nayo. 32 Na Yeova anengane Lakisi mokonĩ ma aũme ma Isilaeli, na mamĩkwata mũthenyanĩ wa kelĩ. Na makũna ndũa ĩsu na andũ onthe* ala maĩ nthĩnĩ wayo na ũvyũ, o tondũ meekanĩte na Livina.

33 Na ĩndĩ Olamu mũsumbĩ wa Ngeseli ambata atetheesye Lakisi, ĩndĩ Yosua amũkũna vamwe na andũ make nginya amamina vyũ.

34 Na ĩndĩ Yosua e vamwe na aũme onthe ma Isilaeli mauma Lakisi na mathi Ekiloni na mamba kambi vau na mokita nayo. 35 Nĩmamĩkwatie mũthenya ũsu na mamĩkũna na ũvyũ. Na mũthenyanĩ o ũsu mamina vyũ andũ onthe* ala maĩ ndũanĩ ĩsu, o tondũ meekanĩte na Lakisi.

36 Na ĩndĩ Yosua e vamwe na aũme onthe ma Isilaeli mambata kuma Ekiloni na mathi Eviloni na mokita nayo. 37 Nĩmakwatie ndũa ĩsu na mamĩkũna na ũvyũ, vamwe na mũsumbĩ wayo, tũtũla twayo, na andũ onthe* ala maĩ nthĩnĩ wayo; vai mũndũ o na ũmwe waavonoka. Nĩwamyanangie vyũ na amina vyũ andũ onthe* ala maĩ nthĩnĩ wayo, o tondũ weekanie na Ekiloni.

38 Mũthya, Yosua e vamwe na aũme onthe ma Isilaeli nĩmavĩndũkie mathi Ndevilu na mokita nayo. 39 Nĩwakwatie ndũa ĩsu, mũsumbĩ wayo, na tũtũla twayo twʼonthe, na makũna andũ onthe* ala maĩ vo na ũvyũ mamamina vyũ; vai mũndũ o na ũmwe waavonoka. O ũndũ weekanie na Eviloni na Livina na mũsumbĩ wayo, nowʼo weekanie na Ndevilu na mũsumbĩ wayo.

40 Na Yosua akĩlya vinya nthĩ yonthe ĩla yĩ kĩsionĩ kĩla kĩ iĩma, kĩsionĩ kya Nekevu, kĩsionĩ kya Sevela, na ivaũũkonĩ, na asumbĩ ma kũu onthe, ate kũeka mũndũ o na ũmwe avonoke; nĩwaminie vyũ kyonthe kĩla kĩũveva o tondũ Yeova Ngai wa Isilaeli wamwĩaĩe. 41 Yosua nĩwamakĩlilye vinya kuma Katesi-mbalinea nginya Ngasa na akĩlya vinya nthĩ yonthe ya Ngoseni nginya Ngiveoni. 42 Yosua nĩwakwatie asumbĩ asu onthe na nthĩ yoo; amakwatie onthe ĩvindanĩ o yĩmwe, nũndũ Yeova Ngai wa Isilaeli nĩwe wokitĩaa Isilaeli. 43 Ĩtina wa ũu, Yosua e vamwe na aũme onthe ma Isilaeli nĩmasyokie kambinĩ kũu Ngilikali.

11 Yĩla Yavini mũsumbĩ wa Asoli weewie ĩũlũ wa ũndũ ũsu oou, nĩwatũmanie kũla kwĩ Yovavu mũsumbĩ wa Matoni, na kũla kwĩ mũsumbĩ wa Similoni, mũsumbĩ wa Akisavu, 2 asumbĩ ala maĩ kĩsionĩ kĩla kĩ iĩma kĩ ngalĩko ya ĩũlũ, ala maĩ ndiĩnĩ* ngalĩko ya ĩtheo ya Kinelethi, ala maĩ kĩsionĩ kya Sevela na ivaũũkonĩ sya Ndoli ila syaĩ ngalĩko ya ũthũĩlonĩ wa sua, 3 Akanaanĩ ala maĩ ngalĩko ya wumĩlonĩ wa sua na ũthũĩlonĩ wa sua, Aamoli, Aititi, Avelisi, Ayevusi ala maĩ kĩsionĩ kĩla kĩ iĩma, na Aivi ala maĩ kĩsionĩ kĩla kĩkuumanĩte na Elimoni nthĩ ya Misiva. 4 Na ĩndĩ maumaala vamwe na ita syoo syonthe, na ala maĩ itanĩ isu maĩ aingĩ mũno ta kĩthangathĩ kĩla kĩthĩawa ũtee wa ũkanga, na maĩ na mbalasi mbingĩ mũno na makasya maingĩ mũno ma kaũ. 5 Asumbĩ asu onthe nĩmeetĩkĩlile kũkomana, na kwoou mathi na mamba kambi vamwe vakuvĩ na kĩwʼũ kya Melomu nĩ kana mokite na Isilaeli.

6 Nĩvo ĩndĩ Yeova weeie Yosua atĩĩ: “Ndũkakĩe nũndũ woo, nĩkwĩthĩwa ũnĩ saa ta ii ngamanengane mokonĩ ma Aisilaeli na makamoaa. No nginya mũtile malangũ ma mbalasi syoo na no nginya mũvĩvye makasya moo na mwaki.” 7 Na kwoou Yosua e vamwe na aũme onthe ma kaũ mavanga kũmavithũkĩa matataĩĩe me vau vakuvĩ na kĩwʼũ kya Melomu. 8 Na Yeova amanengane mokonĩ ma Aisilaeli na mamasinda, na mamasembanyʼa nginya Sitoni Nene na Misilevothi-maimu na Mwanda wa Misive ngalĩko ya wumĩlonĩ wa sua, na mamoaa onthe weethĩa vai ũmwe ũnavonoka. 9 Na ĩndĩ Yosua eekana namo o ũndũ Yeova wamwĩĩte; nĩwatilile mbalasi syoo malangũ na avĩvya makasya moo na mwaki.

10 O na ĩngĩ, Yosua nĩwasyokie na akwata Asoli na oaa mũsumbĩ wayo na ũvyũ, nũndũ navu mbeenĩ Asoli nĩyo yaĩ na ũkũmũ ĩũlũ wa mosumbĩ asu onthe. 11 Nĩmooaie andũ onthe* ala maĩ vo na ũvyũ mamamina vyũ. Vai kĩndũ o na kĩmwe kĩũveva kyaatialwʼa. Na ĩndĩ mavĩvya Asoli na mwaki. 12 Yosua nĩwakwatie ndũa syonthe sya asumbĩ asu na akĩlya vinya asumbĩ moo onthe na ũvyũ. Nĩwamaminie vyũ, o tondũ Mose mũthũkũmi wa Yeova wamwĩaĩe. 13 Ĩndĩ Aisilaeli mayaavĩvya ndũa o na ĩmwe katĩ wa ila syaakĩtwe ivumbunĩ, ate o Asoli; ĩsu yĩ yoka nĩyo Yosua wavĩvisye. 14 Aisilaeli nĩmeeyoseie mũtavo wʼonthe wa ndũa isu na indo. Ĩndĩ nĩmooaie andũ onthe na ũvyũ nginya mamamina. Mayaatialya mũndũ o na ũmwe ũkũveva. 15 O ũndũ Yeova wamwĩaĩe Mose mũthũkũmi wake, nowʼo Mose wamwĩaĩe Yosua, na kĩla Yosua weeaĩwe nokyo weekie. Vai ũndũ o na ũmwe Yeova wamwĩaĩe Mose, Yosua ũtaaĩka.

16 Yosua nĩwakĩlilye vinya nthĩ ĩno yonthe: kĩsio kĩla kĩ iĩma, kĩsio kyonthe kya Nekevu, nthĩ yonthe ya Ngoseni, kĩsio kya Sevela, kĩsio kya Alava, na kĩsio kĩla kĩ iĩma kya Isilaeli na kĩsio kyayo kya Sevela,* 17 kuma Kĩĩma kya Alaki, kĩla kyambatĩte kĩsianĩtye na Seili, nginya Mbaali-ngati Mwandanĩ wa Levanoni kũkuumana na Kĩĩma kya Elimoni, na asinda asumbĩ moo onthe, na amakwata, na amoaa. 18 Yosua nĩwokitie na asumbĩ asu onthe kwa ĩvinda yĩasa. 19 Vai ndũa yaaĩtĩkĩlana na Aisilaeli kwĩthĩwe na mũuo katĩ woo eka Aivi ala mekalaa Ngiveoni. Ĩndĩ Aisilaeli nĩmokitie na ndũa ila ingĩ syonthe na maisinda. 20 Yeova nĩwe weetĩkĩlĩtye ngoo syoo syĩthĩwe syĩ mbũmũ nĩ kana mokite na Aisilaeli, nĩ kana amamine vyũ ateũmewʼĩa tei. Nĩmaaĩlĩte kũminwa, o tondũ Yeova wamwĩaĩe Mose.

21 Ĩvindanĩ yĩu, Yosua nĩwatutie vyũ Aanaki ala matwĩe kĩsionĩ kĩla kĩ iĩma, kuma Eviloni, Ndevilu, Anavu, na kuma kĩsionĩ kyonthe kĩ iĩma kya Yuta na kĩsionĩ kyonthe kĩ iĩma kya Isilaeli. Yosua nĩwamaminie vyũ na aananga vyũ ndũa syoo. 22 Vai Aanaki maatiwa matũe nthĩ ya Aisilaeli; matiiwe o Ngasa, Ngathi, na Asitoti. 23 Na Yosua eethĩwa na ũkũmũ ĩũlũ wa nthĩ ĩsu yonthe, o tondũ Yeova wamwathĩte Mose, na ĩndĩ Yosua anenga Aisilaeli nthĩ ĩsu yĩthĩwe ũtiĩwa woo kwosana na ũndũ kĩla mbaĩ yaaĩwe. Na nthĩ yathũmũĩa kaũ.

12 Yu ĩndĩ, aa nĩmo asumbĩ ma nthĩ ĩla Aisilaeli makĩlilye vinya, nthĩ ĩla mameisye ngalĩko ya wumĩlonĩ wa sua ya Yolotani, kuma Mwandanĩ wa* Alinoni nginya Kĩĩmanĩ kya Elimoni na kĩsio kyonthe kya Alava kwelekela wumĩlonĩ wa sua: 2 Mũsumbĩ Sioni wa Aamoli, ũla watwĩe Esivoni na wasumbĩkĩte kuma ndũanĩ ya Aloeli, ĩla yaĩ ũtumonĩ wa Mwanda wa* Alinoni, na kuma katĩkatĩ wa mwanda ũsu nginya Mwandanĩ wa* Yavoki, ũla waĩ mũvaka wa Aamimoni. Asumbĩkĩte nusu ya Ngileati. 3 O na ĩngĩ, nĩwasumbĩkĩte kĩsio kya Alava ngalĩko ya wumĩlonĩ wa sua nginya Ũkanganĩ wa Kinelethi,* na kũthi nginya Ũkanganĩ wa Alava, nawʼo nĩ Ũkanga wa Mũnyũ,* ngalĩko ya wumĩlonĩ wa sua kwelekela Mbethi-yesimothi, na kwelekela ngalĩko ya ĩtheo kũkuumana na ivaũũko sya Visika.

4 O na ĩngĩ, Aisilaeli nĩmoosie kĩsio kya Mũsumbĩ Oku wa Mbasani, ũla waĩ ũmwe katĩ wa Alevai ma mũthya ala matialĩte. Ekalaa Asitalothi na Etilei 5 na asumbĩkĩte Kĩĩmanĩ kya Elimoni, Saleka, na kĩsio kyonthe kya Mbasani, nginya mũvakanĩ wa Angesuli na Amaaka, na nĩwasumbĩkĩte nusu ya Ngileati, kũvika mũvakanĩ wa kĩsio kya Mũsumbĩ Sioni wa Esivoni.

6 Mose mũthũkũmi wa Yeova vamwe na Aisilaeli nĩmamakĩlilye vinya, na ĩtina wa ũu, Mose mũthũkũmi wa Yeova nĩwanengie Aleũveni, Angati, na nũsu ya mbaĩ ya Manase nthi yoo mamĩmesye.

7 Aa nĩmo asumbĩ ma nthĩ ĩla Yosua na Aisilaeli makĩlilye vinya ngalĩko ya ũthũĩlonĩ wa sua ya Yolotani, kuma Mbaali-ngati Mwandanĩ wa Levanoni nginya Kĩĩmanĩ kya Alaki, kĩla kyambatĩte kĩsianĩtye na Seili, na ĩtina wa kũmasinda, Yosua nĩwanengie mbaĩ sya Isilaeli nthĩ yoo imĩmesye kwosana na ũndũ syaaĩwe, 8 nayo yaĩ kĩsio kĩla kĩ iĩma, kĩsio kya Sevela, kĩsio kya Alava, ivaũũkonĩ, weũnĩ, na kĩsio kya Nekevu; nthĩ ĩsu yaĩ ya Aititi, Aamoli, Akanaanĩ, Avelisi, Aivi, na Ayevusi. Kwoou asumbĩ asu maĩ aa:

13 Yu ĩndĩ, Yosua aĩ mũkũũ na aangĩe kũkwʼa. Na kwoou Yeova amwĩa: “Nũkũie na ũkilyĩ kũkwʼa; ĩndĩ ve kĩsio kĩnene kya nthĩ kĩtialĩte mwaĩlĩte kwosa mũkĩmesye.* 2 Ĩĩ nĩyo nthĩ ĩla ĩtialĩte: isio syonthe sya Avilisiti na isio syonthe sya Angesuli 3 (kĩsio kĩla kyumĩte kalũsĩnĩ kala katilĩkĩte Nile* ngalĩko ya wumĩlonĩ wa sua ya* Misili nginya mũvakanĩ wa Ekiloni ngalĩko ya ĩũlũ, kĩla kyatalawa ta kya Akanaanĩ), o vamwe na isio sya ala eai atano ma Avilisiti, namo nĩ Angasa, Aasitoti, Aasikeloni, Angathi, na Aekiloni; kĩsio kya Aavi 4 kĩla kĩ ngalĩko ya ĩtheo; nthĩ yonthe ya Akanaanĩ; kĩsio kya Meala, kĩla kĩthĩawa kĩ kya Asitoni, na nthĩ ĩla ĩendete nginya Aveki, kũvika mũvakanĩ wa Aamoli; 5 nthĩ ya Angevali na kĩsio kyonthe kya Levanoni kwelekela wumĩlonĩ wa sua, kuma Mbaali-ngati kũkuumana na Kĩĩma kya Elimoni nginya Levo-amathi;* 6 ekali onthe ala me kĩsionĩ kĩla kĩ iĩma kuma Levanoni nginya Misilevothi-maimu; na Asitoni onthe. Nĩngũmalũngya* maume mbee wa Aisilaeli. Kĩla we waĩle kwĩka nĩ kũnenga Aisilaeli nthĩ ĩsu yĩthĩwe ũtiĩwa woo, o tondũ nakwĩaĩe. 7 Yu ĩndĩ, no nginya ũaĩe ila mbaĩ kenda vamwe na nusu ya mbaĩ ya Manase nthĩ ĩno yĩthĩwe ũtiĩwa woo.”

8 Nayo nusu ĩla ĩngĩ ya mbaĩ ya Manase vamwe na Aleũveni na Angati nĩmakwatie ũtiĩwa ũũ Mose wamanengie ngalĩko ya wumĩlonĩ wa sua ya Yolotani, o ũndũ Mose mũthũkũmi wa Yeova wamanengie: 9 kuma ndũanĩ ya Aloeli, ĩla yĩ ũtumonĩ wa Mwanda wa* Alinoni, na ndũa ĩla yĩ katĩkatĩ wa mwanda ũsu, na nthĩ yonthe ndũlu na ndindimalu ya Meteva nginya Ndivoni; 10 na ndũa syonthe sya Mũsumbĩ Sioni wa Aamoli, ũla wasumbĩkĩte e Esivoni, nginya mũvakanĩ wa Aamimoni; 11 o na Ngileati na kĩsio kya Angesuli na Amaaka na Kĩĩma kya Elimoni kyonthe na kĩsio kyonthe kya Mbasani nginya Saleka; 12 kĩsio kyonthe kya ũsumbĩ wa Oku kũu Mbasani, ũla wasumbĩkĩte e Asitalothi na Etilei. (Aĩ ũmwe katĩ wa Alevai ma mũthya ala matialĩte.) Mose nĩwamasindie na amalũngya.* 13 Ĩndĩ Aisilaeli mayaalũngya* Angesuli na Amaaka, nũndũ andũ ma Ngesuli na andũ ma Maaka matwĩe katĩ wa Aisilaeli nginya ũmũnthĩ.

14 No mbaĩ ya Alivai yĩ yoka ũtaamĩnenga ũtiĩwa. Nthembo ila ivĩvĩawʼa Yeova Ngai wa Isilaeli na mwaki nĩsyo ũtiĩwa woo, o tondũ wamathie.

15 Na ĩndĩ anenga mbaĩ ya Aleũveni ũtiĩwa kwosana na mĩsyĩ yoo, 16 na kĩsio kyoo kyakwete kuma ndũanĩ ya Aloeli, ĩla yĩ ũtumonĩ wa Mwanda wa* Alinoni, na ndũa ĩla yĩ katĩkatĩ wa mwanda ũsu, na nthĩ yonthe ndũlu na ndindimalu ĩla yĩ vakuvĩ na Meteva; 17 Esivoni na tũtũla twayo twʼonthe tũla twaĩ ĩla nthĩ ndũlu na ndindimalu, Ndivoni, Mbamothi-mbaali, Mbethi-mbaali-meoni, 18 Yaasi, Ketemothi, Mevaathi, 19 Kiliathaimu, Sivima, na Nzelethi-saali ĩla yĩ kĩĩmanĩ kĩla kĩ mwandanĩ,* 20 Mbethi-veoli, ivaũũko sya Visika, Mbethi-yesimothi, 21 ndũa syonthe ila syaĩ ĩla nthĩ ndũlu na ndindimalu, na kĩsio kyonthe kya Mũsumbĩ Sioni wa Aamoli, ũla wasumbĩkĩte e Esivoni. Mose nĩwamũsindie vamwe na anene ma Mitiani, ala nĩ Evi, Lekemu, Nzuli, Uulu, na Leva, namo matwĩe nthĩ ĩsu me asumbĩ me ungu wa Sioni. 22 Mbalaamu mwana wa Mbeoli, ũla waaũasya, aĩ ũmwe katĩ wa andũ ala Aisilaeli mooaie na ũvyũ. 23 Yolotani nĩyo yaĩ mũvaka wa Aleũveni; na kĩsio kĩu nĩkyo kyaĩ ũtiĩwa wa Aleũveni kwosana na mĩsyĩ yoo, vamwe na i ndũa na motũi masyo.

24 O na ĩngĩ, Mose nĩwanengie mbaĩ ya Angati ũtiĩwa kwosana na mĩsyĩ yoo, 25 na kĩsio kyoo kyaĩ vamwe na Yaseli na ndũa syonthe sya Ngileati na nusu ya nthĩ ya Aamimoni nginya Aloeli, ĩla ĩsianĩtye na Lava; 26 na kuma Esivoni nginya Lamathi-misive na Mbetonimu, na kuma Maanaimu nginya mũvakanĩ wa Ndevilu; 27 na ũla mwandanĩ,* Mbethi-alamu, Mbethi-nimila, Sukothi, na Nzavoni, kĩsio kyonthe kĩla kyatialĩte kya Mũsumbĩ Sioni wa Esivoni, na Yolotani nĩyo yaĩ mũvaka kuma mũthya ũla wĩ ĩtheo vyũ wa Ũkanga wa Kinelethi* ngalĩko ya wumĩlonĩ wa sua ya Yolotani. 28 Ũsu waĩ ũtiĩwa wa Angati kwosana na mĩsyĩ yoo, vamwe na i ndũa na motũi masyo.

29 O na ĩngĩ, Mose nĩwanengie nusu ya mbaĩ ya Manase ũtiĩwa; nĩwanengie nusu ya mbaĩ ĩsu ũtiĩwa kwosana na mĩsyĩ yoo. 30 Na kĩsio kyoo kyakwete kuma Maanaimu na kĩkosa kĩsio kyonthe kya Mbasani, kĩsio kyonthe kya Mũsumbĩ Oku wa Mbasani, na motũi onthe ma maeema ma Yaili ala maĩ kĩsionĩ kya Mbasani, tũtũla 60. 31 Na nusu ya Ngileati, na Asitalothi na Etilei, ila syaĩ ndũa sya kĩsio kya ũsumbĩ wa Oku kũu Mbasani, syanengiwe ana ma Makili mwana wa Manase; nĩsyanengiwe nusu ya ana ma Makili kwosana na mĩsyĩ yoo.

32 Isu nĩsyo isio ila Mose wamanengie syĩthĩwe ũtiĩwa woo yalatanĩ ĩtindimalu ya Moavi mũingo wa Yolotani, ngalĩko ya wumĩlonĩ wa sua ya Yeliko.

33 Ĩndĩ Mose ndaanenga mbaĩ ya Alivai ũtiĩwa. Yeova Ngai wa Isilaeli nĩwe ũtiĩwa woo, o tondũ wamathie.

14 Yu ĩndĩ, kĩĩ nĩkyo kĩsio kĩla Aisilaeli moosie ta ũtiĩwa nthĩ ya Kanaanĩ, kĩla mũthembi Eleasali na Yosua mwana wa Nuni na aũngamĩi ma nyũmba sya aa-ĩthe ma mbaĩ sya Isilaeli mamanengie kĩthĩwe ũtiĩwa woo. 2 Ila mbaĩ kenda na nusu nĩsyakwatie ũtiĩwa wasyo kwosana na kula o tondũ Yeova weeĩaĩte kwĩsĩla Mose. 3 Mose aĩ ananenga mbaĩ ila ingĩ ilĩ na nusu ũtiĩwa wasyo ngalĩko ĩla ĩngĩ* ya Yolotani, na ndaanenga Alivai ũtiĩwa katĩ wa Aisilaeli. 4 Nzyawa sya Yosevu syatalilwe ta mbaĩ ilĩ, mbaĩ ya Manase na mbaĩ ya Evilaimu; na mayaanenga Alivai ũtiĩwa nthĩ ĩsu, ate o ndũa ila mamanengie sya kũtũa na isesi kwondũ wa indo syoo na syĩndũ syoo. 5 Na kwoou Aisilaeli maaanyʼa nthĩ ĩsu o tondũ Yeova wamwĩaĩe Mose.

6 Nĩvo ĩndĩ aũme ma Yuta maendie vala ve Yosua kũu Ngilikali, na Kalevu mwana wa Yevune, ũla waĩ Mũkenisi, amwĩa: “We nĩwĩsĩ nesa ki ũndũ Yeova wamwĩie Mose mũndũ wa Ngai ũla wa wʼo ĩũlũ wakwa naku twĩ Katesi-mbalinea. 7 Naĩ na myaka 40 yĩla Mose mũthũkũmi wa Yeova wandũmie kuma Katesi-mbalinea ngathiane ĩ nthĩ na natũnga livoti ya wʼo.* 8 O na kau ana-a-asa ala twambatie ĩmwe nĩmatumie andũ makwʼa ngoo,* nyie nĩnaatĩĩie Yeova Ngai wakwa na ngoo yonthe.* 9 Na Mose nĩweevĩtie mũthenya ũsu asya: ‘Nthĩ ĩno ũkinyĩle na ũnyaaĩ waku ĩkeethĩwa ũtiĩwa waku ĩvinda yonthe vamwe na ana maku, nũndũ nũmũatĩĩte Yeova Ngai wakwa na ngoo yonthe.’ 10 Yu ĩndĩ, o tondũ Yeova wathanie, nũnzũvĩĩte ngekala thayũ myaka ĩno 45 kuma yĩla Yeova wathie Mose ũndũ ũsu ĩvindanĩ yĩla Aisilaeli mangangaa weũnĩ; na yu ninyioo ũmũnthĩ, nĩ na myaka 85. 11 Na ũmũnthĩ mwĩĩ wakwa nĩ mũlũmu o tondũ walũmĩte mũthenya ũla Mose wandũmie. Nĩ na vinya wa kũkita na kwĩka maũndũ angĩ, o ta ũla naĩ nawʼo ĩvinda yĩu. 12 Kwoou nenge kĩsio kĩĩ kĩ iĩma kĩla Yeova wambathie mũthenya ũsu. O na kau mũthenya ũsu nĩweewie kana Aanaki nĩmatwĩe kwʼo ndũanĩ nene na mbiĩĩe, vate ndĩi* Yeova nũkwĩthĩwa vamwe nakwa, na nĩngũmalũngya,* o tondũ Yeova wathanie.”

13 Na ĩndĩ Yosua amũathima Kalevu mwana wa Yevune na amũnenga Eviloni yĩthĩwe ũtiĩwa wake. 14 Nĩkyo kĩtumi kũvika ũmũnthĩ Eviloni yĩthĩawa yĩ ũtiĩwa wa Kalevu mwana wa Yevune, ũla waĩ Mũkenisi, nũndũ nĩwamũatĩĩie Yeova Ngai wa Isilaeli na ngoo yonthe. 15 Mbeenĩ Eviloni yeetawa Kiliathi-aliva (Aliva aĩ mũndũũme wĩ nguma katĩ wa Aanaki). Kuma vau nthĩ nĩyathũmũĩe kaũ.

15 Mbaĩ ya Yuta nĩyanengiwe* kĩsio kya nthĩ kwondũ wa mĩsyĩ yoo, na kĩsio kyoo kyakwete nginya mũvakanĩ wa Etomu, weũnĩ wa Nzini, na nginya ngalĩko ya ĩtheo vyũ ya kĩsio kya Nekevu. 2 Mũvaka woo wa ngalĩko ya ĩtheo waumĩte mũthyanĩ wa Ũkanga wa Mũnyũ,* kuma mũkononĩ ũla wĩ ngalĩko ya ĩtheo ya ũkanga. 3 Na ũkaendeea nginya ngalĩko ya ĩtheo kyambatonĩ kya Akilavimu, na ũkakĩlanĩlya nginya Nzini, na ĩndĩ ũkambata kuma ngalĩko ya ĩtheo ya Katesi-mbalinea, ũkathi nginya Esiloni, na nginya Atitali, na ũkelingĩla welekele Kalika. 4 Kuma vau mũvaka ũsu nĩwavĩtũkĩte nginya Asimoni na ũkaendeea nginya Kyandanĩ kya* Misili, na ũkathelela Ũkanganĩ.* Ũsu nĩwʼo waĩ mũvaka woo wa ngalĩko ya ĩtheo.

5 Nawʼo mũvaka wa ngalĩko ya wumĩlonĩ wa sua waĩ Ũkanga wa Mũnyũ* kũthi nginya mũthyanĩ wa Yolotani, na mũvaka wa ngalĩko ya ĩũlũ wambĩĩle mũkononĩ wa ũkanga, mũthyanĩ wa Yolotani. 6 Kuma vau mũvaka ũsu nĩwambatĩte nginya Mbethi-okila na ũkakĩlanĩlya wĩsĩle ngalĩko ya ĩũlũ ya Mbethi-alava, na ũkambata nginya ĩvianĩ ya Mboani mwana wa Leũveni. 7 Mũvaka ũsu nĩwasyokete ũkambata nginya Ndevilu Mwandanĩ* wa Akoli na ũkethyũũa na ngalĩko ya ĩũlũ nginya Ngilikali, ũtee wa kyambato kya Atumimu kĩla kĩ ngalĩko ya ĩtheo ya kyanda,* na ũkakĩlanĩlya nginya kĩwʼũnĩ kya Eni-semesi na ũkavika Eni-lokeli. 8 Kuma vau mũvaka ũsu nĩwavĩtĩte ũkathi nginya Mwandanĩ wa Mwana wa Inomu kĩvaũũkonĩ kya Mũyevusi ngalĩko ya ĩtheo, navo nĩ Yelusalemu, na ũkasyoka ũkambata nginya mũthyanĩ wa kĩĩma kĩla kĩ ngalĩko ya ũthũĩlonĩ wa sua ya Mwanda wa Inomu, mũthyanĩ ũla wĩ ngalĩko ya ĩũlũ ya Mwanda* wa Alevai. 9 O na ĩngĩ, mũvaka ũsu nĩwavanĩĩwe kuma mũthyanĩ wa kĩĩma kĩu nginya nthongonĩ ya* kĩwʼũ kya Nevitoa na ũkathi nginya ndũanĩ sya Kĩĩma kya Eveloni; na nĩwavanĩĩwe nginya Mbaala, navo nĩ Kiliathi-yealimu. 10 Mũvaka ũsu wasyokete ũkelingĩla kuma Mbaala kwelekela ngalĩko ya ũthũĩlonĩ wa sua nginya Kĩĩmanĩ kya Seili na ũkakĩlanĩlya nginya mũvaũũkonĩ wa Kĩĩma kya Yealimu ngalĩko ya ĩũlũ, navo nĩ Kesaloni, na ũkatheea nginya Mbethi-semesi na ũkakĩlanĩlya nginya Timina. 11 Kuma vau mũvaka ũsu nĩwaendete nginya mũvaũũkonĩ wa Ekiloni ngalĩko ya ĩũlũ, na ũkavanĩĩwa nginya Sikeloni na ũkakĩlanĩlya nginya Kĩĩmanĩ kya Mbaala na ũkathi nginya Yavineeli, na mũthya wawʼo waĩ ũkanganĩ.

12 Mũvaka wa ngalĩko ya ũthũĩlonĩ wa sua wavikĩte ũla Ũkanganĩ Mũnene* na ũtee wawʼo. Ũsu nĩwʼo waĩ mũvaka wa nzyawa sya Yuta kwosana na mĩsyĩ yasyo ngalĩko syonthe.

13 Na Yosua nĩwanengie Kalevu mwana wa Yevune kĩsio katĩ wa nzyawa sya Yuta kwosana na mwĩao ũla Yeova wamũnengete, nakyo kyaĩ Kiliathi-aliva (Aliva nĩwe waĩ ĩthe wa Anaki), na nokyo Eviloni. 14 Na kwoou Kalevu alũngya kuma vau nzyawa sya ana aa atatũ ma Anaki: Sesai, Aimani, na Talimai. 15 Na ĩndĩ ambata kuma vau akokite na ekali ma Ndevilu. (Mbeenĩ Ndevilu yeetawa Kiliathi-seveli.) 16 Na ĩndĩ Kalevu asya: “Mũndũũme ũla ũkũvithũkĩa Kiliathi-seveli na aimĩkwata, nĩngũmũnenga mwĩĩtu wakwa Akisa ethĩwe mũka.” 17 Nĩvo ĩndĩ Othinieli mwana wa Kenasi, mwana-a-inyia wa Kalevu, wamĩkwatie. Na kwoou Kalevu amũnenga mwĩĩtu wake Akisa ethĩwe mũka. 18 Na yĩla Akisa wenũkĩte, eesũva Othinieli etye Kalevu kĩsio. Na ĩndĩ Akisa auma ĩngʼoinĩ yake.* Na Kalevu ĩthe wake amũkũlya: “Wĩenda kyaũ?” 19 Nake Akisa amwĩa: “Mwa mbathima, nũndũ nũnengete kĩsio ngalĩko ya ĩtheo;* nenge Ngulothi-maimu* o nayo.” Na kwoou amũnenga Ngulothi ya Ĩũlũ na Ngulothi ya Ĩtheo.

20 Ũũ nĩwʼo waĩ ũtiĩwa wa mbaĩ ya Yuta kwosana na mĩsyĩ yoo.

21 Ii nĩsyo ndũa ila syaĩ mũthyanĩ vyũ ngalĩko ya ĩtheo ya kĩsio kya mbaĩ ya Yuta kwelekela mũvakanĩ wa Etomu: Kaviseeli, Eteli, Yakuli, 22 Kina, Ndimona, Atata, 23 Ketesi, Asoli, Ithinani, 24 Nzivu, Telemu, Mbealothi, 25 Asoli-atata, na Keliothi-esiloni, nayo nĩ Asoli, 26 Amamu, Sema, Molata, 27 Asali-ngata, Esimoni, Mbethi-veleti, 28 Asali-suali, Mbeeli-sieva, Mbisiothia, 29 Mbaala, Iimu, Esemu, 30 Elitolati, Kesili, Olima, 31 Nzikilaki, Matimana, Sanisana, 32 Levaothi, Siliimu, Aini, na Limoni; ndũa syonthe syaĩ 29 vamwe na motũi masyo.

33 Ii nĩsyo ndũa ila syaĩ kĩsionĩ kya Sevela: Esitaoli, Nzola, Asina, 34 Nzanoa, Eni-nganimu, Tavua, Enamu, 35 Yalimuthi, Atulamu, Soko, Aseka, 36 Saalaimu, Atithaimu, na Ngetela na Ngetelothaimu;* syaĩ ndũa 14 vamwe na motũi masyo.

37 Nzenani, Atasa, Mikitali-ngati, 38 Ndilani, Misive, Yokitheeli, 39 Lakisi, Mbosikathi, Ekiloni, 40 Kavoni, Lamamu, Kitilisi, 41 Ngetelothi, Mbethi-ndakoni, Naama, na Maketa; syaĩ ndũa 16 vamwe na motũi masyo.

42 Livina, Etheli, Asani, 43 Ivita, Asina, Nesivu, 44 Keila, Akisivu, na Malesa; syaĩ ndũa kenda vamwe na motũi masyo.

45 Ndũa ya Ekiloni vamwe na tũtũla twayo* vamwe na motũi mayo; 46 kuma Ekiloni kwelekela ũthũĩlonĩ wa sua, kĩsio kyonthe kĩla kĩ ũtee wa Asitoti na motũi masyo.

47 Asitoti na tũtũla twayo* na motũi mayo; Ngasa, na tũtũla twayo na motũi mayo, kũtheea nginya Kyandanĩ kya Misili, ũla Ũkanganĩ Mũnene,* na kĩsionĩ kĩla kĩkuumanĩte na ũkanga.

48 Na ii nĩsyo ndũa ila syaĩ kĩsionĩ kĩla kĩ iĩma: Samili, Yatili, Soko, 49 Ndana, Kiliathi-sana, no yo Ndevilu, 50 Anavu, Esitemo, Animu, 51 Ngoseni, Oloni, na Ngilo; syaĩ ndũa 11 na motũi masyo.

52 Alavu, Nduma, Esani, 53 Yanimu, Mbethi-tavua, Aveka, 54 Umuta, Kiliathi-aliva, nayo nĩ Eviloni, na Nzioli; syaĩ ndũa kenda na motũi masyo.

55 Maoni, Kalimeli, Nzivu, Yata, 56 Yesileeli, Yokiteamu, Nzanoa, 57 Kaini, Ngivea, na Timina; syaĩ ndũa ĩkũmi vamwe na motũi masyo.

58 Aliuli, Mbethi-suli, Ngetoli, 59 Maalathi, Mbethi-anothi, na Elitekoni; syaĩ ndũa thanthatũ na motũi masyo.

60 Kiliathi-mbaali, nayo nĩ Kiliathi-yealimu, na Lava; syaĩ ndũa ilĩ na motũi masyo.

61 Ii nĩsyo ndũa ila syaĩ weũnĩ: Mbethi-alava, Mitini, Sekaka, 62 Nivisani, Ndũa ya Mũnyũ, na Eni-ngeti; syaĩ ndũa thanthatũ na motũi masyo.

63 Aũme ma Yuta mayaĩ matonya kũlũngya Ayevusi ala matwĩe Yelusalemu, na kwoou Ayevusi mekalaa Yelusalemu vamwe na andũ ma Yuta nginya ũmũnthĩ.

16 Na kĩsio kya nthĩ kĩla kyavalũkĩile nzyawa sya Yosevu kwosana na kula* kyakwete kuma Yolotani kũu Yeliko nginya nthongonĩ* ila syĩ ngalĩko ya wumĩlonĩ wa sua ya Yeliko, na kyavĩtĩlĩte weũnĩ kĩkambata kuma Yeliko nginya kĩsionĩ kĩ iĩma kya Mbetheli. 2 Kyakwete kuma Mbetheli ĩla yaĩ ya Lusi na kĩkaendeea nginya mũvakanĩ wa Aaliki kũu Atalothi, 3 na ĩndĩ kĩkatheea kyelekele ũthũĩlonĩ wa sua nginya mũvakanĩ wa Aiyavileti na kĩkathi nginya mũvakanĩ wa Mbethi-oloni ya Ĩtheo na Ngeseli, na ĩndĩ kĩkathelela ũkanganĩ.

4 Na kwoou nzyawa sya Yosevu, nasyo nĩ mbaĩ ya Manase na ya Evilaimu, nĩsyoosie nthĩ ĩ yasyo syamĩmesya. 5 Ũũ nĩwʼo waĩ mũvaka wa nzyawa sya Evilaimu kwosana na mĩsyĩ yasyo: Mũvaka wa ngalĩko ya wumĩlonĩ wa sua wa ũtiĩwa woo waĩ Atalothi-atali, na waendete nginya Mbethi-oloni ya Ĩũlũ, 6 na ũkathi nginya ũkanganĩ. Kuma Mikimethathi ĩla yaĩ ngalĩko ya ĩũlũ, mũvaka ũsu nĩweelingĩlĩte ngalĩko ya wumĩlonĩ wa sua nginya Taanathi-silo, na ũkavĩta nginya Yanoa. 7 Na wasyokete ũkatheea kuma Yanoa nginya Atalothi na Naala na ũkavĩta nginya Yeliko na ĩndĩ ũkakyama nginya Yolotani. 8 Kuma Tavua mũvaka ũsu nĩwaendete na ngalĩko ya ũthũĩlonĩ wa sua nginya Kyandanĩ kya Kana, na ũkathelela ũkanganĩ. Ũsu nĩwʼo waĩ ũtiĩwa wa mbaĩ ya Evilaimu kwosana na mĩsyĩ yoo; 9 o na ĩngĩ, nzyawa sya Evilaimu nĩsyanengiwe ndũa syonthe ila syavathĩtwe na motũi masyo kĩsionĩ kĩla kyaĩ ũtiĩwa wa Manase.

10 Ĩndĩ mayaalũngya Akanaanĩ ala matwĩe Ngeseli, na Akanaanĩ asu mekalaa katĩ wa Aevilaimu nginya ũmũnthĩ na mathũkũmaa wĩa wa kũlasimĩthwʼa.

17 Na ĩndĩ mbaĩ ya Manase yakwata kĩsio kwosana na kula, nũndũ Manase nĩwe waĩ mwana ũla mũkũũ wa Yosevu. Na nĩkwĩthĩwa Makili, mwana ũla mũkũũ wa Manase na ĩthe wa Ngileati, aĩ ngũmbaũ ya kaũ, nĩwanengiwe Ngileati na Mbasani. 2 Na nzyawa ila ingĩ sya Manase syakwata kĩsio vala kula yamavalũkĩile kwosana na mĩsyĩ yoo, kwondũ wa ana ma Avi-eseli, ana ma Eeleki, ana ma Asilieli, ana ma Sekemu, ana ma Eevieli, na ana ma Semita. Asu nĩmo aũme ala maĩ nzyawa sya Manase mwana wa Yosevu kwosana na mĩsyĩ yoo. 3 Ĩndĩ Nzeloveati mwana wa Eevieli, mwana wa Ngileati, mwana wa Makili, mwana wa Manase, ndaĩ na ana, ĩndĩ aĩ na eĩtu oka; na aa nĩmo masyĩtwa ma eĩtu make: Maala, Noa, Okila, Milika, na Tilisa. 4 Na kwoou mathi mbee wa mũthembi Eleasali, Yosua mwana wa Nuni, na anene ma Isilaeli, na masya: “Yeova nĩwe wamwĩaĩe Mose atũnenge ũtiĩwa katĩ wa ana-a-asa maitũ.” Na kwoou kwosana na mwĩao wa Yeova, amanenga ũtiĩwa katĩ wa ana-a-asa ma ĩthe woo.

5 O na ĩngĩ, vaĩ isio ĩkũmi syavalũkĩile Manase eka isio sya Ngileati na Mbasani, ila syaĩ mũingo ũla ũngĩ* wa Yolotani, 6 nũndũ eĩtu ma Manase nĩmakwatie ũtiĩwa vamwe na ana make, na nthĩ ya Ngileati yatwʼĩka ya nzyawa ila ingĩ sya Manase.

7 Mũvaka wa Manase waumĩte Aseli nginya Mikimethathi, kũsianyʼa na Sekemu, na ũkathi na ngalĩko ya ĩtheo* nginya nthĩ ya ekali ma Eni-Tavua. 8 Nthĩ ya Tavua yatwʼĩkie ya Manase, ĩndĩ Tavua ĩla yaĩ mũvakanĩ wa Manase yaĩ ya nzyawa sya Evilaimu. 9 Kuma vau mũvaka ũsu nĩwatheete nginya Kyandanĩ kya* Kana, ngalĩko ya ĩtheo ya kyanda kĩu. Na katĩ wa ndũa sya Manase vaĩ ndũa sya Evilaimu, na mũvaka wa Manase waĩ ngalĩko ya ĩũlũ ya kyanda kĩu, na wathelele ũkanganĩ. 10 Ngalĩko ya ĩtheo yaĩ ya Evilaimu, na ngalĩko ya ĩũlũ yaĩ ya Manase, na ũkanga nĩwʼo waĩ mũvaka wake; ngalĩkonĩ ya ĩũlũ kĩsio kya Manase kyavakene* na Aseli, na ngalĩko ya wumĩlonĩ wa sua kyavakene na Isakali.

11 Kĩsionĩ kya Isakali na kya Aseli, Manase nĩwanengiwe Mbethi-seani vamwe na tũtũla twayo,* Ivileamu vamwe na tũtũla twayo, ekali ma Ndoli na tũtũla twayo, ekali ma Eni-ndoli na tũtũla twayo, ekali ma Taanaki na tũtũla twayo, na ekali ma Mekito na tũtũla twayo, na kũndũ kũtatũ kũtũlu kwaĩ kwake.

12 O na vailye ũu, nzyawa sya Manase iyaatonya kwosa ndũa isu; Akanaanĩ nĩmaemeeie nthĩ ĩsu. 13 Na yĩla Aisilaeli mameisye vinya, nĩmambĩĩie kũthũkũmĩthya Akanaanĩ wĩa wa kũlasimĩthwʼa, ĩndĩ mayaamalũngya* vyũ.

14 Na ĩndĩ nzyawa sya Yosevu syaneena na Yosua syamwĩa: “Nĩkĩ ũtũaĩe* o kĩsio kĩmwe kwosana na kula na ũkatũnenga kyo kĩthĩwe ũtiĩwa? Twĩ aingĩ, nũndũ Yeova nũtũathimĩte kũvika ũmũnthĩ.” 15 Na Yosua amasũngĩa amea: “Ethĩwa mwĩ aingĩ mũno ũkethĩa kĩsio kĩĩ kĩ iĩma kya Evilaimu kĩimwĩanĩa, ambatai nthĩ ya Avelisi na Alevai na mũyenga kĩsio kwondũ wenyu vau kĩthekanĩ.” 16 Na ĩndĩ nzyawa sya Yosevu syasya: “Kĩsio kĩĩ kĩ iĩma kĩitwĩanĩtye, na Akanaanĩ onthe ala matwĩe nthĩ ĩla yĩ mwandanĩ* me na makasya me na mbyũ ndĩanĩ,* onthe ala matwĩe Mbethi-seani na tũtũlanĩ twayo* na ala matwĩe Mwandanĩ* wa Yesileeli.” 17 Kwoou Yosua aneena na nyũmba ya Yosevu, Evilaimu na Manase, amea atĩĩ: “Mwĩ aingĩ, na mwĩ na vinya mũno. Mũinengwa o kĩsio kĩmwe, 18 ĩndĩ o nakyo kĩtheka kĩla kĩ iĩmanĩ kĩĩthĩwa kĩ o kyenyu. O na kũtwʼĩka nĩ kĩtheka, nĩmũũkyenga, na nĩkyo kĩkwĩthĩwa mũthya wa kĩsio kyenyu. Nĩkwĩthĩwa nĩmũũlũngya Akanaanĩ, o na kau me vinya na me na makasya me na mbyũ ndĩanĩ.”*

18 Na ĩndĩ ũmbano wʼonthe wa Isilaeli woombanĩa Silo na mamba ĩeema ya kũmbanĩa vau, nũndũ yu nthĩ yaĩ mokonĩ moo. 2 Ĩndĩ o na vailye ũu, nĩvatialĩte mbaĩ mũonza sya Isilaeli itanengetwe ũtiĩwa wasyo. 3 Na kwoou Yosua amea Aisilaeli: “Mwĩendeea kwĩkala mũte kwosa nthĩ ĩla Yeova Ngai wa aa-ũmae menyu ũmũnengete nginya ĩndĩĩ? 4 Nengei aũme atatũ kuma kĩla mbaĩ nĩ kana nĩmatũme mathi makasisye nthĩ ĩsu na maivanĩĩa mĩvaka yayo kwosana na ũtiĩwa woo. Na ĩtina wa ũu, maisyoka vala nĩĩ. 5 No nginya mamĩaanyʼe katĩ woo kũndũ mũonza. Yuta eendeea kwĩkala kĩsionĩ kyake ngalĩko ya ĩtheo, na nyũmba ya Yosevu yĩendeea kwĩkala kĩsionĩ kyayo ngalĩko ya ĩũlũ. 6 Ĩndĩ a venyu, likai nthĩ ĩsu na mũimĩvanĩĩa isio mũonza, na mũisiete mbee wakwa, nakwa nĩngũmũkũnĩthya kula vaa mbee wa Yeova Ngai witũ. 7 Ĩndĩ Alivai maikwata kĩsio katĩ wenyu, nũndũ wĩa woo wa ũthembi ũla mamũthũkũmaa Yeova nĩwʼo ũtiĩwa woo; na Ngati, Leũveni, na nusu ya mbaĩ ya Manase nĩmaminĩte kwosa ũtiĩwa woo, o ũndũ Mose mũthũkũmi wa Yeova wamanengie ngalĩko ya wumĩlonĩ wa sua ya Yolotani.”

8 Nĩvo ĩndĩ aũme asu meeyũmbanisye kũthi, na Yosua aneena na ala maaĩle kũvanĩĩa mĩvaka ya nthĩ ĩsu amea: “Endai mũsisye nthĩ ĩsu na mũivanĩĩa mĩvaka yayo na mũisyoka vaa nĩĩ, nakwa nĩngũmũkũnĩthya kula vaa Silo mbee wa Yeova.” 9 Ĩtina wa ũu, aũme asu nĩmaendie na masisya nthĩ ĩsu na mamĩvanĩĩa isio mũonza kwosana na ndũa, na maandĩka maũndũ asu ĩvukunĩ. Na ĩndĩ masyoka kambinĩ vala ve Yosua kũu Silo. 10 Nĩvo ĩndĩ Yosua wamakũnĩthĩisye kula mbee wa Yeova kũu Silo. Na ĩndĩ me vau Yosua aaanĩsya Aisilaeli nthĩ kwosana na isio ila maaĩwe.

11 Na kula ya mbee yavalũkĩla mbaĩ ya Mbenyamini kwosana na mĩsyĩ yoo, na kĩsio kya kula yoo kyaĩ katĩkatĩ wa andũ ma Yuta na andũ ma Yosevu. 12 Ngalĩko ya ĩũlũ ya kĩsio kyoo, mũvaka woo wambĩĩe Yolotani na ũkambata nginya ngalĩko ya ĩũlũ ya mũvaũũko wa Yeliko na ũkambata nginya kĩĩmanĩ ngalĩko ya ũthũĩlonĩ wa sua, na ĩndĩ ũkaendeea nginya weũnĩ wa Mbethi-aveni. 13 Kuma vau, mũvaka ũsu nĩwaendeee nginya Lusi wĩsĩlĩte mũvaũũkonĩ wa ngalĩko ya ĩtheo ya Lusi, nayo nĩ Mbetheli; na ĩndĩ ũkatheea nginya Atalothi-atali kĩĩmanĩ kĩla kĩ ngalĩko ya ĩtheo ya Mbethi-oloni ya Ĩtheo. 14 Mũvaka ũsu nĩwavanĩĩwe ngalĩko ya ũthũĩlonĩ wa sua, na ũkelingĩla welekele ngalĩko ya ĩtheo kuma kĩĩmanĩ kĩla kĩsianĩtye na Mbethi-oloni ngalĩko ya ĩtheo; mũthya wawʼo waĩ Kiliathi-mbaali, nayo nĩ Kiliathi-yealimu, ĩla nĩ ndũa ya Yuta. Ũsu nĩwʼo mũvaka wa ngalĩko ya ũthũĩlonĩ wa sua.

15 Mũvaka wa ngalĩko ya ĩtheo waumĩte mũthyanĩ wa Kiliathi-yealimu, na ũkathi welekele ngalĩko ya ũthũĩlonĩ wa sua; waendete nginya nthongonĩ ya* kĩwʼũ kya Nevitoa. 16 Mũvaka ũsu nĩwatheete nginya mũniinĩonĩ wa kĩĩma kĩla kĩsianĩtye na Mwanda wa Mwana wa Inomu, ũla wĩ Mwandanĩ* wa Alevai ngalĩko ya ĩũlũ, na ũkatheea nginya Mwandanĩ wa Inomu, nginya mũvaũũkonĩ wa Mũyevusi ngalĩko ya ĩtheo, na ĩndĩ ũkatheea nginya Eni-lokeli. 17 Mũvaka ũsu nĩwavanĩĩwe welekele ngalĩko ya ĩũlũ ũkathi nginya Eni-semesi na ĩndĩ nginya Ngelilothi, ĩla yĩ ũtee wa kyambato kya Atumimu, na ĩndĩ ũkatheea nginya ĩvianĩ ya Mboani mwana wa Leũveni. 18 O na ĩngĩ, mũvaka ũsu nĩwaendete nginya ũkavika mũvaũũkonĩ wa ngalĩko ya ĩũlũ ũtee wa Alava na ũkatheea nginya Alava. 19 Kuma vau mũvaka ũsu nĩwaendeee nginya mũvaũũkonĩ wa Mbethi-okila ũla wĩ ngalĩko ya ĩũlũ, na mũthya wawʼo waĩ mũkononĩ wa ngalĩko ya ĩũlũ ya Ũkanga wa Mũnyũ* kũtinana na mũthya wa Yolotani ũla wĩ ngalĩko ya ĩtheo. Ũsu nĩwʼo waĩ mũvaka wa ngalĩko ya ĩtheo. 20 Kĩsio kyoo kyavakanĩtwʼe nĩ Yolotani ngalĩko ya wumĩlonĩ wa sua. Na ũsu nĩwʼo waĩ ũtiĩwa wa nzyawa sya Mbenyamini kwosana na mĩsyĩ yoo, na kwosana na mĩvaka yoo ngalĩko syonthe.

21 Na ii nĩsyo ndũa sya mbaĩ ya Mbenyamini kwosana na mĩsyĩ yoo: Yeliko, Mbethi-okila, Emeki-kesisi, 22 Mbethi-alava, Nzemalaimu, Mbetheli, 23 Aavi, Vala, Ovala, 24 Kevali-amimoni, Ovini, na Ngeva; syaĩ ndũa 12 na motũi masyo.

25 Ngiveoni, Lama, Mbeelothi, 26 Misive, Kevila, Mosa, 27 Lekemu, Iliveeli, Talala, 28 Nzela, Aa-elevu, Yevusi, nayo nĩ Yelusalemu, Ngivea, na Kiliathi; syaĩ ndũa 14 na motũi masyo.

Ũsu nĩwʼo waĩ ũtiĩwa wa nzyawa sya Mbenyamini kwosana na mĩsyĩ yoo.

19 Na kula ya kelĩ yavalũkĩla Simeoni, kwondũ wa mbaĩ ya Simeoni kwosana na mĩsyĩ yoo. Na ũtiĩwa woo waĩ katĩ wa ũtiĩwa wa Yuta. 2 Ũtiĩwa woo waĩ Mbeeli-sieva vamwe na Sieva, Molata, 3 Asali-suali, Mbala, Esemu, 4 Elitolati, Mbethuli, Olima, 5 Nzikilaki, Mbethi-malikavothi, Asali-susa, 6 Mbethi-levaothi, na Salueni; syaĩ ndũa 13 na motũi masyo; 7 Aini, Limoni, Etheli, na Asani; syaĩ ndũa inya na motũi masyo; 8 na motũi onthe ala mathyũlũlũkĩte ndũa isu nginya Mbaalathi-mbeeli, nayo nĩ Lama ĩla yĩ ngalĩko ya ĩtheo. Ũsu nĩwʼo waĩ ũtiĩwa wa mbaĩ ya Simeoni kwosana na mĩsyĩ yoo. 9 Nzyawa sya Simeoni syanengiwe ũtiĩwa kĩsionĩ kĩla kyanengetwe Yuta, nũndũ kĩsio kya Yuta kyaĩ kĩnene mũno kwoo. Na kwoou nzyawa sya Simeoni syakwatie kĩsio katĩ wa ũtiĩwa wa mbaĩ ya Yuta.

10 Kula ya katatũ yavalũkĩile nzyawa sya Nzevuluni kwosana na mĩsyĩ yoo, na mũvaka wa ũtiĩwa woo wavikĩte Saliti. 11 Mũvaka woo wambatĩte welekele ũthũĩlonĩ wa sua nginya Maleali na ũkavika Ndavasethi na ĩndĩ ũkathi nginya mwandanĩ ũla ũsianĩtye* na Yokineamu. 12 Kuma Saliti mũvaka ũsu waendete na ngalĩko ya wumĩlonĩ wa sua nginya mũvakanĩ wa Kisilothi-tavoli, na ũkavĩta nginya Ndavelathi na ĩndĩ ũkambata nginya Yavia. 13 Na kuma vau waendete na ngalĩko ya wumĩlonĩ wa sua nginya Ngathi-eveli, na nginya Ethi-kasini, na ũkavĩta nginya Limoni, na ĩndĩ ũkathi nginya Nea. 14 O na ĩngĩ, mũvaka ũsu nĩweelingĩlĩte kĩsio kĩu ngalĩko ya ĩũlũ nginya Anathoni, na mũthya wawʼo waĩ Mwandanĩ wa Ivita-eli. 15 Kĩsionĩ kyoo vaĩ Katathi, Naalali, Similoni, Itala, na Mbethileemu; syonthe syaĩ ndũa 12 na motũi masyo. 16 Ũsu nĩwʼo waĩ ũtiĩwa wa nzyawa sya Nzevuluni kwosana na mĩsyĩ yoo. Isu nĩsyo syaĩ ndũa syoo na motũi masyo.

17 Kula ya kana yavalũkĩile Isakali, kwondũ wa nzyawa sya Isakali kwosana na mĩsyĩ yoo. 18 Na mũvaka woo wesĩle Yesileeli, Kesulothi, Sunemu, 19 Avalaimu, Siioni, Anaalathi, 20 Lavithi, Kisioni, Evesu, 21 Lemethi, Eni-nganimu, Eni-ata, na Mbethi-vasesi. 22 Mũvaka ũsu nĩwavikĩte Tavoli na Saasuma na Mbethi-semesi, na mũthya wawʼo waĩ Yolotani; syaĩ ndũa 16 vamwe na motũi masyo. 23 Ũsu nĩwʼo waĩ ũtiĩwa wa mbaĩ ya Isakali kwosana na mĩsyĩ yoo, ndũa syoo na motũi masyo.

24 Na kula ya katano yavalũkĩla mbaĩ ya Aseli kwosana na mĩsyĩ yoo. 25 Na mũvaka woo wesĩle Elikathi, Ali, Mbeteni, Akisavu, 26 Alameleki, Amati, na Misali. Na mũvaka ũsu nĩwaendete na ngalĩko ya ũthũĩlonĩ wa sua nginya Kalimeli na nginya Sioli-livinathi, 27 na ũkavĩndũka ũkasyoka na ngalĩko ya wumĩlonĩ wa sua nginya Mbethi-ndakoni na ũkavĩta ũkavika Nzevuluni na Mwandanĩ wa Ivita-eli ngalĩko ya ĩũlũ, na ũkathi nginya Mbethi-emeki na Neieli, na ũkaendeea ũkavika Kavuli ngalĩko ya kwʼoko kwa aka, 28 na ũkavĩtĩla Eviloni, Leovu, Amumoni, na Kana nginya Sitoni Ĩla Nene. 29 Kuma vau mũvaka ũsu wasyokete na ĩtina ũkavika Lama na ũkavĩta nginya ndũanĩ mbiĩĩe ya Tile. Na ĩndĩ ũkasyoka nginya Osa, na mũthya wawʼo waĩ ũkanganĩ kĩsionĩ kya Akisivu, 30 Uma, Aveki, na Leovu; syaĩ ndũa 22 na motũi masyo. 31 Ũsu nĩwʼo waĩ ũtiĩwa wa mbaĩ ya Aseli kwosana na mĩsyĩ yoo. Isu nĩsyo syaĩ ndũa syoo na motũi masyo.

32 Kula ya thanthatũ yavalũkĩile nzyawa sya Navitali, kwondũ wa nzyawa sya Navitali kwosana na mĩsyĩ yasyo. 33 Mũvaka woo waumĩte Elevi, ũla mũtĩnĩ mũnene wa Nzaananimu, na ũkathi nginya Atami-nekevu na Yavineeli na ũkavĩta nginya Lakumu; na mũthya wawʼo waĩ Yolotani. 34 Kuma vau mũvaka ũsu nĩwavĩndũkĩte ũkathi na ngalĩko ya ũthũĩlonĩ wa sua ũkavika Asinothi-tavoli na ũkavĩta nginya Ũkoka na ũkaendeea nginya Nzevuluni ngalĩko ya ĩtheo na ũkavĩta nginya Aseli ngalĩko ya ũthũĩlonĩ wa sua na ũkaendeea nginya Yuta kũu Yolotani kwelekela ngalĩko ya wumĩlonĩ wa sua. 35 Na ii nĩsyo ndũa ila syaĩ mbiĩĩe: Nzitimu, Nzeli, Amathi, Lakathi, Kinelethi, 36 Atama, Lama, Asoli, 37 Ketesi, Etilei, Eni-asoli, 38 Iloni, Mikitali-eli, Olemu, Mbethi-anathi, na Mbethi-semesi; syaĩ ndũa 19 na motũi masyo. 39 Ũsu nĩwʼo waĩ ũtiĩwa wa mbaĩ ya Navitali kwosana na mĩsyĩ yoo, ndũa syoo na motũi masyo.

40 Kula ya mũonza yavalũkĩile mbaĩ ya Ndani kwosana na mĩsyĩ yoo. 41 Mũvaka woo wesĩle Nzola, Esitaoli, Ili-semesi, 42 Saalavini, Aiyaloni, Ithila, 43 Eloni, Timina, Ekiloni, 44 Eliteke, Ngivethoni, Mbaalathi, 45 Yeuti, Mbene-mbelaki, Ngathi-limoni, 46 Me-yalikoni, na Lakoni, na mũvaka ũsu wavĩtĩte ũsianĩtye na Yova. 47 Ĩndĩ kĩsio kya Ndani kyaĩ kĩnini ũkethĩa kĩimeanĩa. Na kwoou mambata na mokita na Lesemu na mamĩkwata na mamĩkũna na ũvyũ. Na ĩndĩ mamĩmesya na matũa vo, na mavĩndũa ĩsyĩtwa yayo, yĩla yaĩ Lesemu, mamĩta Ndani, o ta ũmae woo. 48 Ũsu nĩwʼo waĩ ũtiĩwa wa mbaĩ ya Ndani kwosana na mĩsyĩ yoo. Isu nĩsyo syaĩ ndũa syoo na motũi masyo.

49 Na ũu nĩwʼo maminie kũaanyʼa nthĩ yĩthĩwe ũtiĩwa woo kwosana na isio syoo. Na ĩndĩ Aisilaeli manenga Yosua mwana wa Nuni ũtiĩwa katĩ woo. 50 Kwosana na mwĩao wa Yeova nĩmamũnengie ndũa ĩla weetisye, nayo nĩ Timinathi-sela, ĩla yĩ kĩsionĩ kĩ iĩma kya Evilaimu, na ĩndĩ amyaka na atũa vo.

51 Ũsu nĩwʼo ũtiĩwa ũla mũthembi Eleasali, Yosua mwana wa Nuni, na aũngamĩi ma nyũmba sya aa-ĩthe ma mbaĩ sya Isilaeli maaanĩisye kũu Silo mbee wa Yeova kwosana na kula me mũomonĩ wa ĩeema ya kũmbanĩa. Na kwoou mamina kũaanyʼa nthĩ.

20 Na ĩndĩ Yeova aneena na Yosua amwĩa atĩĩ: 2 “Ũũ nĩwʼo ũũtavya Aisilaeli: ‘Ĩnyuvĩei ndũa sya kwĩvitha ila natũmie Mose amũtavye ĩũlũ wasyo, 3 nĩ kana mũndũ ũla woaa ũngĩ* kũte kwenda kwake kana atesĩ akĩĩae kũu. Ndũa isu ikatũmĩawa kwĩvitha mũĩvanĩsya wa nthakame. 4 No nginya akĩĩe ndũanĩ ĩmwe katĩ wa isu na aiũngama mũvĩanĩ wa ndũa isu na aielesya atumĩa ma ĩ ndũa ũndũ ũla wĩkĩkĩte. Na ĩndĩ no nginya mamwĩtĩkĩlye alike ndũanĩ ĩsu na maimũnenga vandũ ekale vamwe namo. 5 Ethĩwa mũĩvanĩsya wa nthakame nĩwaatĩĩa ũla ũaanĩte, mayaĩlĩte kũmũnengane kwʼokonĩ kwake, nũndũ anooaie mũndũ ũla ũngĩ atesĩ na ndanamũmenete. 6 No nginya aendeee kwĩkala ndũanĩ ĩsu nginya yĩla ũkaũngama silanĩ mbee wa ũmbano, na no nginya ekale kũu nginya yĩla mũthembi mũnene ũla wĩvo ĩvindanĩ yĩu ũkakwʼa. Ĩtina wa ũu, mũndũ ũsu ũaanĩte no asyoke nyũmbanĩ yake, ndũanĩ yake ĩla waumie akĩĩte.’”

7 Kwoou nĩmavathie kwondũ wa Ngai Ketesi kũu Kalilii kĩsionĩ kĩ iĩma kya Navitali, Sekemu kĩsionĩ kĩ iĩma kya Evilaimu, na Kiliathi-aliva, nayo nĩ Eviloni, kĩsionĩ kĩ iĩma kya Yuta. 8 Kĩsionĩ kya Yolotani, ngalĩko ya wumĩlonĩ wa sua ya Yeliko, manyuvie Mbeseli ĩla yĩ weũnĩ ũla wĩ nthĩ ndũlu na ndindimalu kuma mbaĩnĩ ya Leũveni, Lamothi ĩla yĩ Ngileati kuma mbaĩnĩ ya Ngati, na Ngolani ĩla yĩ Mbasani kuma mbaĩnĩ ya Manase.

9 Isu nĩsyo ndũa ila syanyuviwe kwondũ wa Aisilaeli onthe na kwondũ wa ekali ma ũeninĩ ala matwĩe katĩ woo, nĩ kana mũndũ o na wĩva ũla woaa mũndũ* ũngĩ kũte kwenda kwake akĩĩe kũu nĩ kana ndakoawe nĩ mũĩvanĩsya wa nthakame atambĩte kũũngama silanĩ mbee wa ũmbano.

21 Nĩvo ĩndĩ aũngamĩi ma nyũmba sya aa-ĩthe ma Alivai maendie vala ve mũthembi Eleasali, Yosua mwana wa Nuni, na aũngamĩi ma nyũmba sya aa-ĩthe ma mbaĩ sya Isilaeli, 2 na maneena namo me kũu Silo nthĩ ya Kanaanĩ, mayasya: “Yeova nĩwamwĩaĩe Mose tũnengwe ndũa sya kũtũa vamwe na isesi syasyo kwondũ wa indo sitũ.” 3 Kwoou kwosana na mwĩao wa Yeova, Aisilaeli nĩmanengie Alivai ndũa ii vamwe na isesi syasyo kuma ũtiĩwanĩ woo.

4 Kula ya mbee yavalũkĩile mĩsyĩ ya Akoathi, na Alivai ala maĩ nzyawa sya mũthembi Alũni manengwa ndũa 13 kwosana na kula* kuma kĩsionĩ kya mbaĩ ya Yuta, mbaĩ ya Simeoni, na mbaĩ ya Mbenyamini.

5 Na Akoathi ala angĩ manengiwe* ndũa ĩkũmi kuma kĩsionĩ kya mĩsyĩ ya mbaĩ ya Evilaimu, mbaĩ ya Ndani, na nusu ya mbaĩ ya Manase.

6 Namo Angelisoni manengiwe ndũa 13 kuma kĩsionĩ kya mĩsyĩ ya mbaĩ ya Isakali, mbaĩ ya Aseli, mbaĩ ya Navitali, na nusu ya mbaĩ ya Manase kũu Mbasani.

7 Namo Amelali kwosana na mĩsyĩ yoo manengiwe ndũa 12 kuma kĩsionĩ kya mbaĩ ya Leũveni, mbaĩ ya Ngati, na mbaĩ ya Nzevuluni.

8 Na ũu nĩwʼo Aisilaeli manengie Alivai ndũa isu vamwe na isesi syasyo kwosana na kula, o tondũ Yeova wamwĩaĩe Mose.

9 Na kwoou aa nĩmo masyĩtwa ma ndũa ila manengiwe kuma kĩsionĩ kya mbaĩ ya Yuta na kya mbaĩ ya Simeoni, 10 ndũa isu syanengiwe ana ma Alũni ala maumĩte mĩsyĩnĩ ya Akoathi ĩla yaĩ ya mbaĩ ya Alivai, nũndũ nĩmo mavalũkĩilwe nĩ kula ya mbee. 11 Mamanengie Kiliathi-aliva (Aliva aĩ ĩthe wa Anaki), nayo nĩ Eviloni, kĩsionĩ kĩ iĩma kya Yuta, vamwe na isesi syayo ila syamĩthyũlũlũkĩte. 12 Ĩndĩ kĩsio kya ĩ ndũa vamwe na motũi mayo manengie Kalevu mwana wa Yevune kĩthĩwe kyake.

13 Na nĩmanengie ana ma mũthembi Alũni ndũa ya kwĩvitha kwondũ wa mũndũ ũla woaana, nayo nĩ Eviloni vamwe na isesi syayo; o na ĩngĩ, nĩmamanengie Livina vamwe na isesi syayo, 14 Yatili vamwe na isesi syayo, Esitemoa vamwe na isesi syayo, 15 Oloni vamwe na isesi syayo, Ndevilu vamwe na isesi syayo, 16 Aini vamwe na isesi syayo, Yata vamwe na isesi syayo, na Mbethi-semesi vamwe na isesi syayo; kuma kĩsionĩ kya mbaĩ isu ilĩ manengiwe ndũa kenda.

17 Na kuma kĩsionĩ kya mbaĩ ya Mbenyamini: Ngiveoni vamwe na isesi syayo, Ngeva vamwe na isesi syayo, 18 Anathothi vamwe na isesi syayo, na Alimoni vamwe na isesi syayo; syaĩ ndũa inya.

19 Ndũa syonthe ila manengie nzyawa sya Alũni, ala maĩ athembi, syaĩ 13 vamwe na isesi syasyo.

20 Na mĩsyĩ ĩla ĩngĩ ya Akoathi kuma mbaĩnĩ ya Alivai nĩyanengiwe ndũa kuma kĩsionĩ kya mbaĩ ya Evilaimu kwosana na kula. 21 Nĩmamanengie ndũa ya kwĩvitha kwondũ wa mũndũ ũla woaana, nayo nĩ Sekemu, ĩla yĩ kĩsionĩ kĩ iĩma kya Evilaimu, vamwe na isesi syayo, na mamanenga Ngeseli vamwe na isesi syayo, 22 Kivisaimu vamwe na isesi syayo, na Mbethi-oloni vamwe na isesi syayo; syaĩ ndũa inya.

23 Na kuma kĩsionĩ kya mbaĩ ya Ndani: Eliteke vamwe na isesi syayo, Ngivethoni vamwe na isesi syayo, 24 Aiyaloni vamwe na isesi syayo, Ngathi-limoni vamwe na isesi syayo; syaĩ ndũa inya.

25 Na kuma kĩsionĩ kya nusu ya mbaĩ ya Manase: Taanaki vamwe na isesi syayo na Ngathi-limoni vamwe na isesi syayo; syaĩ ndũa ilĩ.

26 Ndũa syonthe vamwe na isesi syasyo ila mĩsyĩ ĩla yatialĩte ya Akoathi yakwatie syaĩ ĩkũmi.

27 Namo Angelisoni kuma mĩsyĩnĩ ya Alivai nĩmanengiwe nĩ nusu ya mbaĩ ya Manase ndũa ya kwĩvitha kwondũ wa mũndũ ũla ũaanĩte, nayo nĩ Ngolani, ĩla yĩ Mbasani, vamwe na isesi syayo na Mbeesitela vamwe na isesi syayo; syaĩ ndũa ilĩ.

28 Na kuma kĩsionĩ kya mbaĩ ya Isakali: Kisioni vamwe na isesi syayo, Ndavelathi vamwe na isesi syayo, 29 Yalimuthi vamwe na isesi syayo, na Eni-nganimu vamwe na isesi syayo; syaĩ ndũa inya.

30 Na kuma kĩsionĩ kya mbaĩ ya Aseli: Misali vamwe na isesi syayo, Avitoni vamwe na isesi syayo, 31 Elikathi vamwe na isesi syayo, na Leovu vamwe na isesi syayo; syaĩ ndũa inya.

32 Na kuma kĩsionĩ kya mbaĩ ya Navitali: ndũa ya kwĩvitha kwondũ wa mũndũ ũla woaana, nayo nĩ Ketesi, ĩla yĩ Kalilii, vamwe na isesi syayo, Amothi-ndoli vamwe na isesi syayo, na Kalitani vamwe na isesi syayo; syaĩ ndũa itatũ.

33 Ndũa syonthe sya Angelisoni kwosana na mĩsyĩ yoo syaĩ 13 vamwe na isesi syasyo.

34 Na mĩsyĩ ya Amelali, ĩla yatialĩte kuma mbaĩnĩ ya Alivai, nĩyakwatie kuma kĩsionĩ kya mbaĩ ya Nzevuluni: Yokineamu vamwe na isesi syayo, Kalita vamwe na isesi syayo, 35 Ndimina vamwe na isesi syayo, na Naalali vamwe na isesi syayo; syaĩ ndũa inya.

36 Na kuma kĩsionĩ kya mbaĩ ya Leũveni: Mbeseli vamwe na isesi syayo, Yaasi vamwe na isesi syayo, 37 Ketemothi vamwe na isesi syayo, na Mevaathi vamwe na isesi syayo; syaĩ ndũa inya.

38 Na kuma kĩsionĩ kya mbaĩ ya Ngati: ndũa ya kwĩvitha kwondũ wa mũndũ ũla woaana, nayo nĩ Lamothi, ĩla yĩ Ngileati, vamwe na isesi syayo, Maanaimu vamwe na isesi syayo, 39 Esivoni vamwe na isesi syayo, na Yaseli vamwe na isesi syayo; syaĩ ndũa inya.

40 Ndũa syonthe ila syaaĩwe mĩsyĩ ya Melali, ĩla yatialĩte kuma mbaĩnĩ ya Alivai, syaĩ 12.

41 Ndũa syonthe sya Alivai ila syaĩ katĩ wa ũtiĩwa wa Aisilaeli syaĩ 48 vamwe na isesi syasyo. 42 Kĩla ĩmwe ya ndũa isu yaĩ na isesi syayo kũmĩthyũlũlũka; ũu nĩwʼo vailye kwondũ wa ndũa isu syonthe.

43 Ũu nĩwʼo Yeova wanengie Isilaeli nthĩ yonthe ĩla weevĩtĩe kũnenga aa-ũmae moo, na mamĩmesya na matũa vo. 44 O na ĩngĩ, Yeova nĩwatumie methĩwa na ũthũmũo kĩla ngalĩko, o tondũ weevĩtĩe aa-ũmae moo, na vai mũmaitha woo o na ũmwe waĩ atonya kũmasinda. Yeova nĩwanenganie amaitha moo onthe mokonĩ moo. 45 Vai watho* o na ũmwe ũtaaĩanĩa katĩ wa mawatho onthe maseo ala Yeova wathie nyũmba ya Isilaeli; onthe nĩmeanĩie.

22 Na ĩndĩ Yosua oombanyʼa Aleũveni, Angati, na nusu ya mbaĩ ya Manase 2 na amea: “Nĩmwĩkĩte maũndũ onthe ala Mose mũthũkũmi wa Yeova wamwĩaĩe, na nĩmwĩthĩĩtwe mũyĩthukĩĩsya wasya wakwa maũndũnĩ onthe ala namwĩaĩe. 3 Ĩvindanĩ yĩu yonthe kũvika ũmũnthĩ mũyaatia ana-a-asa menyu; na nĩmwĩthĩĩtwe mũikwata mwĩao wa Yeova Ngai wenyu. 4 Yu ĩndĩ, Yeova Ngai wenyu nũnengete ana-a-asa menyu ũthũmũo, o tondũ wamathie. Kwoou yu no mũsyoke maeemanĩ menyu kĩsionĩ kĩla Mose mũthũkũmi wa Yeova wamũnengie mũkĩmesye mũingo ũya ũngĩ* wa Yolotani. 5 Ĩndĩ ĩthĩwai mwĩ metho mũkwate Mĩao ĩla Mose mũthũkũmi wa Yeova wamũnengie, na nĩ kana mwĩanĩsye kĩu mwendei Yeova Ngai wenyu, kinyĩlaai nzĩanĩ syake syonthe, kwataai mĩao yake, lũmanyʼai nake, na mũimũthũkũmaa na ngoo yenyu yonthe na thayũ* wenyu wʼonthe.”

6 Na ĩndĩ Yosua amaathima na amaeka mathi, na masyoka maeemanĩ moo. 7 Mose nĩwanengete nusu ya mbaĩ ya Manase ũtiĩwa kĩsionĩ kya Mbasani, na nusu ĩla ĩngĩ ya mbaĩ ĩsu nĩyanengiwe nĩ Yosua ũtiĩwa ngalĩko ya ũthũĩlonĩ wa sua ya Yolotani, vamwe na ana-a-asa moo. Na o vamwe na ũu, Yosua nĩwamaathimie yĩla wamaekie masyoke maeemanĩ moo, 8 na amea: “Syokai maeemanĩ menyu na ũthwii mwingĩ, syokai na indo mbingĩ mũno, na vetha na thaavu, na ũthuku na kyũma,* na ngũa mbingĩ mũno. Osai kĩlungu kyenyu kya mũtavo kuma kwa amaitha menyu, vamwe na ana-a-asa menyu.”

9 Ĩtina wa ũu, Aleũveni, Angati, na nusu ya mbaĩ ya Manase nĩmataanĩisye na Aisilaeli ala angĩ kũu Silo nthĩ ya Kanaanĩ na masyoka nthĩ ya Ngileati, ĩla manengetwe mamĩmesye na makamĩtũa, o tondũ Yeova wamwĩaĩe Mose. 10 Yĩla Aleũveni, Angati, na nusu ya mbaĩ ya Manase mavikie isionĩ sya Yolotani nthĩ ya Kanaani, nĩmaakie vau ũtee wa Yolotani kĩthembeo kĩnene na kyanake. 11 Ĩtina, Aisilaeli ala angĩ nĩmeewie kũyĩwa atĩĩ: “Sisyai! Aleũveni, Angati, na nusu ya mbaĩ ya Manase nĩmakĩte kĩthembeo mũvakanĩ wa nthĩ ya Kanaanĩ isionĩ sya Yolotani ila syĩ ngalĩko ya Aisilaeli.” 12 Yĩla Aisilaeli meewie ndeto isu, ũmbano wʼonthe wa Aisilaeli nĩwoombanĩie Silo nĩ kana ũthi ũkokite namo.

13 Nĩvo ĩndĩ Aisilaeli matũmie mũthembi Vineasi mwana wa Eleasali vala ve Aleũveni, Angati, na nusu ya mbaĩ ya Manase kũu nthĩ ya Ngileati, 14 na aĩ vamwe na anene ĩkũmi, mũnene ũmwe kuma kĩla nyũmba ya aa-ĩthe ma mbaĩ syonthe sya Isilaeli, na kĩla ũmwe aĩ mũũngamĩi wa nyũmba ya aa-ĩthe make ĩla yaĩ katĩ wa makili ma* Isilaeli. 15 Yĩla mavikie vala ve Aleũveni, Angati, na nusu ya mbaĩ ya Manase kũu nthĩ ya Ngileati, mameie atĩĩ:

16 “Ũũ nĩwʼo ũmbano wʼonthe wa Yeova ũkwasya: ‘Ũndũ ũũ mwĩkie nĩ mwaũ ũla ũtumie mwĩthĩwa mũte aĩkĩĩku kwa Ngai wa Isilaeli? Ũmũnthĩ nĩmweethyũũa mwaeka kũmũatĩĩa Yeova kwa kwĩyakĩa kĩthembeo na kũmũlea Yeova. 17 Yo naĩ ĩla tweekie twĩ Veoli ndĩanĩtye? O na kũvika ũmũnthĩ tũyaaĩsa kwĩthesya naĩ ĩsu, o na kũtwʼĩka ũmbano wa Yeova nĩwakwatie ũkũno. 18 Aĩ na yu ũmũnthĩ mũyĩthyũũa mũeke kũmũatĩĩa Yeova! Mwaleana na Yeova ũmũnthĩ, ũnĩ akathatĩa ũmbano wʼonthe wa Isilaeli. 19 Ethĩwa mwĩĩka ũu nũndũ nthĩ ĩla mũnengetwe mũmĩmesye nĩ mbuku, ingai mũlike nthĩ ya Yeova vala ĩeema ya ũthaithi ya Yeova yĩĩ, na mũitũa katĩ witũ, ĩndĩ mũikatate kũmũlea Yeova, na mũikatume tũtwʼĩka alei nũndũ wa kwĩyongeleela kĩthembeo kĩngĩ eka kĩthembeo kĩla kya Yeova Ngai witũ. 20 Yĩla Akani mwana wa Nzela weethĩiwe ate mũĩkĩĩku ũndũnĩ ũla wakonetye syĩndũ ila syaaĩlĩte kwanangwa vyũ, we Ngai ndathatiwʼe nĩ ũmbano wʼonthe wa Isilaeli? Na ti we e weka wakwie nũndũ wa ĩvĩtyo yake.’”

21 Nĩvo ĩndĩ Aleũveni, Angati, na nusu ya mbaĩ ya Manase masũngĩie aũngamĩi ma makili ma* Isilaeli masya: 22 “Yeova, Ngai wa i ngai,* nĩwĩsĩ. Yeova, Ngai wa i ngai, nĩwĩsĩ, na Aisilaeli o namo nĩmeũmanya. Ethĩwa nĩtũtwʼĩkĩte alei na tũkethĩwa tũte aĩkĩĩku kwa Yeova, ndũkatũeke thayũ ũmũnthĩ. 23 Ethĩwa twakĩte kĩthembeo nĩ kana twĩthyũũe tũeke kũmũatĩĩa Yeova na tũithemba ĩũlũ wakyo nthembo sya kũvĩvwʼa, nthembo sya lĩu, na nthembo sya ngwatanĩo, Yeova natwosee ĩtambya. 24 Ithyĩ twakĩte kĩthembeo kĩu na kĩtumi kĩ kĩvathũkanyʼo, nũndũ twaisye, ‘Ĩvinda yũkĩte ana menyu makeea ana maitũ atĩĩ: “Inywʼĩ mwĩ na ngwatanĩo myaũ na Yeova Ngai wa Isilaeli? 25 Yeova nũekete Yolotani yĩthĩwe mũvaka katĩ witũ nenyu, inywʼĩ Aleũveni na Angati. Mũi na kĩanda ũndũnĩ o na wĩva ũkonetye Yeova.” Na ana menyu makasiĩĩa ana maitũ maikamũthaithe* Yeova.’

26 “Nĩkyo kĩtumi twaisye, ‘Ekai twĩke kyonthe kĩla tũtonya twake kĩthembeo, na ti kwondũ wa nthembo sya kũvĩvw’a kana nthembo ingĩ, 27 ĩndĩ twĩkyaka kĩthĩwe ũkũsĩ katĩ witũ nenyu na nzyawa ila ikoka ĩtina witũ, ũla ũkaĩkĩĩthasya kana nĩtweanĩsya ũthũkũmi wa Yeova mbee wake twĩ na nthembo sitũ sya kũvĩvwʼa na nthembo sitũ sya ngwatanĩo na nthembo ila ingĩ sitũ, nĩ kana ĩvinda yũkĩte ana menyu maikese kwĩa ana maitũ atĩĩ: “Mũi na kĩanda ũndũnĩ o na wĩva ũkonetye Yeova.”’ 28 Na kwoou twasya, ‘Makesa kũtũtavya ũu kana makesa kũtavya nzyawa sitũ sya ĩvinda yũkĩte ndeto isu, tũmea atĩĩ: “Sisyai, ũũ nĩ mũvwʼano wa kĩthembeo kya Yeova kĩla aa-ũmae maitũ maakie; ĩndĩ tũikyakĩte kwondũ wa nthembo sya kũvĩvw’a kana nthembo ingĩ, tũkyakĩte kĩthĩwe ũkũsĩ katĩ witũ nenyu.”’ 29 Ithyĩ tũyĩsa kũsũanĩa kũmũlea Yeova na tũyĩthyũũa ũmũnthĩ tũeke kũmũatĩĩa Yeova kwa kwĩthĩwa na kĩthembeo kĩngĩ kwondũ wa nthembo sya kũvĩvwʼa, nthembo sya lĩu, na nthembo ingĩ, eka kĩthembeo kya Yeova Ngai witũ kĩla kĩ mbee wa ĩeema yake ya ũthaithi!”

30 Yĩla mũthembi Vineasi, anene ma ũmbano, na aũngamĩi ma makili ma* Isilaeli ala maĩ vamwe nake meewie ndeto sya nzyawa sya Leũveni, Ngati, na Manase, nĩmeanĩiwe. 31 Na kwoou mũthembi Vineasi mwana wa Eleasali aneena na nzyawa sya Leũveni, Ngati, na Manase, asya: “Ũmũnthĩ nĩtwamanya kana Yeova e katĩ witũ, nũndũ mũinethĩwa mũte aĩkĩĩku kwa Yeova. Yu nĩmwavonokya Aisilaeli kuma kwʼokonĩ kwa Yeova.”

32 Ĩtina wa ũu, mũthembi Vineasi mwana wa Eleasali na anene asu nĩmaumie vala ve Aleũveni na Angati kũu nthĩ ya Ngileati na masyoka nthĩ ya Kanaanĩ, na matavya Aisilaeli ala angĩ ũndũ kwĩthĩiwe. 33 Na Aisilaeli nĩmeanĩiwe nĩ kĩla mataviwe. Na ĩndĩ Aisilaeli mamũtaĩa Ngai, na mayaasyoka kũneena ĩngĩ ĩũlũ wa kũkita Aleũveni na Angati nĩ kana manange nthĩ ĩla matwĩe.

34 Na kwoou Aleũveni na Angati matwʼĩĩa kĩthembeo* kĩu ĩsyĩtwa. Maisye: “Nĩ ũkũsĩ katĩ witũ kana Yeova nĩwe Ngai ũla wa wʼo.”

23 Mĩthenya mingĩ ĩtina wa Yeova kũvonokya Aisilaeli kuma mokonĩ ma amaitha onthe ala mamathyũlũlũkĩte na kũmanenga ũthũmũo, ĩvindanĩ yĩla Yosua waĩ mũkũũ aangĩe kũkwʼa, 2 Yosua nĩwoombanisye mbaĩ yonthe ya Isilaeli, atumĩa mayo, aũngamĩi mayo, asili mayo, na anene mayo, na amea: “Nĩngũie, na ngilyĩ kũkwʼa. 3 Nenyu nĩmwĩyoneete maũndũ onthe ala Yeova Ngai wenyu weekie mbaĩ ii syonthe kwondũ wenyu nũndũ Yeova Ngai wenyu nĩwe wamũkitĩaa. 4 Sisyai, nĩnĩmũaĩe kwosana na kula* nthĩ ya mbaĩ ila itialĩte nĩ kana yĩthĩwe ũtiĩwa wa mbaĩ syenyu, o vamwe na nthĩ ya mbaĩ syonthe ila naiminie, kuma Yolotani nginya ũla Ũkanganĩ Mũnene* ngalĩko ya ũthũĩlonĩ wa sua. 5 Na Yeova Ngai wenyu nĩwe wamakuthũaa maume mbee wenyu, na amalũngya* kwondũ wenyu, na mwamesya nthĩ yoo, o tondũ Yeova Ngai wenyu wamwathĩte.

6 “Yu ĩndĩ, no nginya mwĩthĩwe na ũkũmbaũ mwingĩ nĩ kana mũatĩĩae na kwĩkaa kyonthe kĩla kĩandĩkĩtwe ĩvukunĩ ya Mĩao ya Mose; mũikaatate o na vanini kwĩthyũũa mwathũke ũtee wa Mĩao ĩsu, mwĩthĩwe mwĩthi kwʼoko kwa aũme kana nĩ kwʼoko kwa aka, 7 na mũikaatate o na vanini kũlikana na mbaĩ ila itialĩte katĩ wenyu. O na mũyaĩlĩte o na vanini kũweta masyĩtwa ma ngai syoo kana kwĩvĩta nasyo, na no nginya mwĩsũvĩe mũikaithũkũme kana kũikumanĩa. 8 Ĩndĩ no nginya mũlũmanyʼe na Yeova Ngai wenyu, o tondũ mwĩthĩĩtwe mũyĩka nginya ũmũnthĩ. 9 Yeova akalũngya mbaĩ nene na syĩ vinya syume mbee wenyu, nũndũ vai mũndũ o na ũmwe waaĩthĩwa atonya kũũngama mbee wenyu nginya ũmũnthĩ. 10 Mũndũ o ũmwe katĩ wenyu akasembanasya andũ ngili, nũndũ Yeova Ngai wenyu nĩwe ũmũkitĩaa, o tondũ wamwathie. 11 Mwendei Yeova Ngai wenyu na mweeka ũu mũkekalaa mwĩsũvĩĩte kĩla ĩvinda.

12 “Ĩndĩ ethĩwa nĩmũkwĩthyũũa ũndũnĩ o na wĩva na mũilũmanyʼa na andũ ala matialĩte ma mbaĩ ila itiĩtwe katĩ wenyu na mũitwaana namo na mũyĩthĩwa na ngwatanĩo namo, namo mayĩthĩwa na ngwatanĩo nenyu, 13 manyai nesa ki kana Yeova Ngai wenyu nũkũeka kũmũlũngĩlya* mbaĩ ii. Nasyo ikeethĩawa ta kĩtei na ta mũtalisa mbaunĩ syenyu na mĩwʼa methonĩ menyu nginya yĩla mũkathela vyũ wĩthĩe mũyoneka ĩngĩ ĩũlũ wa nthĩ ĩno nzeo Yeova Ngai wenyu ũmũnengete.

14 “Yu sisyai! Ngilyĩ kũkwʼa,* nenyu nĩmwĩsĩ nesa ki na ngoo yenyu yonthe na thayũ* wenyu wʼonthe kana vai ndeto o na ĩmwe ĩkonetye mawatho onthe maseo ala Yeova Ngai wenyu ũmwathĩte ĩtaaĩanĩa. Onthe nĩmeanĩĩtwʼe kwondũ wenyu. Vai ndeto o na ĩmwe wamwathie ĩtaaĩanĩa. 15 Ĩndĩ o tondũ mawatho onthe maseo ala Yeova Ngai wenyu wamwathie meanĩĩte, o ta ũu, Yeova akamũetee mĩisyo yonthe ĩla wamwathie na akamũmina wĩthĩe mũyoneka ĩngĩ nthĩ ĩno nzeo ĩla Yeova Ngai wenyu ũmũnengete. 16 Ethĩwa mũkalea kwĩanĩsya ũtianĩo ũla Yeova Ngai wenyu wamwĩaĩe mwĩanĩasye na ethĩwa mũkathi na mũithũkũma ngai ingĩ na kũikumanĩa, nĩvo ĩndĩ ũthatu wa Yeova ũkamwakanĩa, nenyu mũkathela na mĩtũkĩ wĩthĩe mũyoneka ĩngĩ ĩũlũ wa nthĩ ĩno nzeo ũmũnengete.”

24 Na ĩndĩ Yosua oombanyʼa vamwe mbaĩ syonthe sya Isilaeli kũu Sekemu na eeta atumĩa ma Isilaeli, aũngamĩi moo, asili moo, na anene moo, na maũngama mbee wa Ngai ũla wa wʼo. 2 Na Yosua aneena na andũ onthe amea: “Ũũ nĩwʼo Yeova Ngai wa Isilaeli ũkwasya, ‘Aa-ũmae menyu ala maĩ thayũ ĩvindanĩ ya tene, ala nĩ vamwe na Tela ĩthe wa Avalaamu na ĩthe wa Naoli, nĩmatwĩe mũingo ũla ũngĩ wa ũla Ũsĩ,* na me kũu nĩmathaithaa ngai ingĩ.

3 “‘Ĩndĩ ĩtina wa ĩvinda, nĩnamumisye ũmae wenyu Avalaamu mũingo ũla ũngĩ wa ũla Ũsĩ* na namũtongoesya esĩle nthĩ yonthe ya Kanaanĩ na naingĩvya ũsyao wake.* Nĩnamũnengie Isaka; 4 nake Isaka nĩnamũnengie Yakovo na Esaũ. Na ĩtina nanenga Esaũ Kĩĩma kya Seili akĩmesye; na Yakovo atheea Misili vamwe na ana make. 5 Ĩtina wa ĩvinda, nĩnatũmie Mose na Alũni, na nathĩnyʼa Misili na mokũno ala namaeteie, na namumya nthĩ ĩsu. 6 Yĩla naumisye aa-ĩthe menyu Misili na mwavika ũkanganĩ, Amisili nĩmaatĩĩie aa-ĩthe menyu na makasya ma kaũ na asikalĩ matũlĩte mbalasi nginya Ũkanganĩ Mũtune. 7 Na ĩndĩ mambĩĩa kũmwĩkaĩla Yeova, na kwoou neekĩa kĩvindu katĩ woo na Amisili na natũngĩanĩa ũkanga ĩũlũ woo na wamavwʼĩka, na nĩmweeyoneie na metho menyu ũndũ neekie Misili. Na ĩndĩ mwekala weũnĩ myaka mingĩ.

8 “‘Kuma vau, nĩnamũtwaie nthĩ ya Aamoli ala matwĩe mũingo ũla ũngĩ* wa Yolotani, na mokita nenyu. Ĩndĩ namanengane mokonĩ menyu nĩ kana mũmesye nthĩ yoo, na namamina weethĩa mayoneka ĩngĩ mbee wenyu. 9 Na ĩndĩ Mbalaki mwana wa Nzivoli mũsumbĩ wa Moavi, ookĩla okite na Aisilaeli. Na eeta Mbalaamu mwana wa Mbeoli nĩ kana amũumanĩe inywʼĩ. 10 Ĩndĩ nalea kũmwĩthukĩĩsya Mbalaamu. Na kwoou amũathima ĩngĩ na ĩngĩ, na namũvonokya kuma kw’okonĩ kwake.

11 “‘Ĩtina wa ũu, nĩmwaingie Yolotani na mwavika Yeliko. Na atongoi* ma Yeliko, Aamoli, Avelisi, Akanaanĩ, Aititi, Angilikasi, Aivi, na Ayevusi mokita nenyu, ĩndĩ nĩnamanenganie mokonĩ menyu. 12 Na kwoou nĩnatumie matũlĩka ngoo,* na nũndũ wa ũu, masemba kuma mbee wenyu, asumbĩ elĩ ma Aamoli. Mũyaaĩanĩsya kĩu nũndũ wa ũvyũ wenyu na ũta wenyu. 13 Na kwoou nĩnamũnengie nthĩ mũtaaĩma na ndũa mũtaaaka, na mwatũa nthĩnĩ wasyo. Yu mwĩya ũsyao wumĩte mĩũndanĩ ya mĩsavivũ na mĩũndanĩ ya mĩthata mũtaavanda.’

14 “Kwondũ wa ũu, mũkĩei Yeova na mũimũthũkũma mũlũmanĩtye na wĩanĩu wenyu* na mwĩ aĩkĩĩku,* na vetangai ngai ila mathũkũmaa me mũingo ũla ũngĩ wa ũla Ũsĩ* na me Misili, na mũimũthũkũma Yeova. 15 Yu ĩndĩ, ethĩwa nĩmũkwona wĩ ũndũ mũthũku ngalĩko ĩ yenyu kũmũthũkũma Yeova, ĩnyuvĩei ũmũnthĩ ũla mũkathũkũmaa, mwĩthĩwe mũkathũkũmaa ngai ila aa-ũmae menyu mathũkũmaa me mũingo ũla ũngĩ wa ũla Ũsĩ* kana nĩ ngai sya Aamoli sya nthĩ ĩla mũtwĩe. Ĩndĩ a vakwa na mũsyĩ wakwa, tũkamũthũkũmaa Yeova.”

16 Nĩvo ĩndĩ andũ masũngĩie masya: “Ithyĩ o na tũyĩsa kũsũanĩa kũmũtia Yeova na tũithũkũma ngai ingĩ. 17 Yeova Ngai witũ nĩwe watumisye nthĩ ya Misili, kuma nyũmbanĩ ya ũkombo, na atũete kũũ, na nĩwe weekie mawonanyʼo aa manene mbee wa metho maitũ, na ndaaeka kũtũsũvĩa nzĩanĩ yonthe ĩla twakinyĩle, na ndaaeka kũtũsũvĩana na andũ onthe ala twesĩle isionĩ syoo. 18 Yeova nĩwalũngilye andũ onthe, o vamwe na Aamoli, ala matwĩe nthĩ ĩno twene. Nũndũ wa ũu, o naitũ tũkamũthũkũmaa Yeova, nĩkwĩthĩwa nĩwe Ngai witũ.”

19 Na ĩndĩ Yosua eea andũ atĩĩ: “Inywʼĩ mũitonya kũmũthũkũma Yeova, nũndũ we nĩ Ngai mũtheu; we nĩ Ngai wendaa kũthaithwa e weka. Ndakamũekea mavĩtyo menyu* na naĩ syenyu. 20 Mwamũtia Yeova na mũithũkũma ngai ngeni, o nake akamũlea na aimũmina vyũ ĩtina wa kwĩthĩwa amwĩkĩte ũseo.”

21 Ĩndĩ andũ mamwĩa Yosua: “Aiee, ithyĩ tũkamũthũkũmaa Yeova!” 22 Na kwoou Yosua asũngĩa andũ amea: “Inywʼĩ no inywʼĩ ngũsĩ syenyu ene kana nĩmweetwʼĩĩa na ngenda kũmũthũkũma Yeova.” Nĩvo ĩndĩ maisye: “Ĩĩ, twĩ ngũsĩ.”

23 “Kwoou ĩndĩ, vetangai ngai ngeni ila syĩ katĩ wenyu, na mũithyũũa ngoo syenyu imũthũkũme Yeova Ngai wa Isilaeli.” 24 Namo andũ meea Yosua atĩĩ: “Tũkamũthũkũmaa Yeova Ngai witũ, na tũkethukĩĩasya wasya wake!”

25 Nĩvo ĩndĩ Yosua watianĩie ũtianĩo na andũ mũthenya ũsu na me vau Sekemu amanenga mwolooto na ũtwʼĩo. 26 Na ĩndĩ Yosua aandĩka maũndũ aa ĩvukunĩ ya Mĩao ya Ngai, na oosa ĩvia ĩnene na ayĩũngamya ungu wa mũtĩ mũnene ũla wĩ vakuvĩ na vala vandũ vatheu va Yeova.

27 Na Yosua aendeea kwĩa andũ onthe ũũ: “Sisyai! Ĩvia yĩĩ yĩkatũkũsĩĩaa, nũndũ nĩyeewʼa kyonthe kĩla Yeova ũtũtavĩtye, na yĩkamũkũsĩĩaa inywʼĩ, nĩ kana mũikese kũkaĩa Ngai wenyu.” 28 Ĩtina wa ũu, Yosua nĩwaekie andũ mathi, kĩla ũmwe kĩsionĩ kĩla wanengetwe kĩthĩwe ũtiĩwa wake.

29 Ĩtina wa maũndũ asu, Yosua mwana wa Nuni, mũthũkũmi wa Yeova, nĩwakwie e na myaka 110. 30 Na kwoou mamũthika kĩsionĩ kĩla wanengetwe kĩthĩwe ũtiĩwa wake kũu Timinathi-sela, kĩla kĩ kĩsionĩ kĩ iĩma kya Evilaimu, ngalĩko ya ĩũlũ ya Kĩĩma kya Ngaasi. 31 Na mbaĩ ya Isilaeli nĩyaendeeie kũmũthũkũma Yeova mĩthenyanĩ yonthe ya Yosua na mĩthenyanĩ yonthe ya atumĩa ala mekalile thayũ ĩtina wa Yosua na ala meeyoneete maũndũ onthe ala Yeova weekĩte kwondũ wa Isilaeli.

32 Na mavĩndĩ ma Yosevu, ala Aisilaeli maumie namo Misili, nĩmathikiwe kũu Sekemu kĩthekanĩ kĩla Yakovo wathooie na ilungu 100 sya mbesa kuma kwa ana ma Amoli, ĩthe wa Sekemu; kĩtheka kĩu kyatwʼĩkie ũtiĩwa wa ana ma Yosevu.

33 O na ĩngĩ, Eleasali mwana wa Alũni nĩwakwie. Na kwoou mamũthika Kĩĩmanĩ kya Vineasi mwana wake, kĩla wanengetwe kĩsionĩ kĩ iĩma kya Evilaimu.