ĨVUKU YA MBEE YA SAMŨELI

1 Yu vaĩ mũndũũme wekalaa Lamathaimu-nzovimu* wa kĩsionĩ kĩ iĩma kya Evilaimu, weetawa Elikana, mwana wa Yeloamu, mwana wa Eliũ, mwana wa Tou, mwana wa Nzuve, ũla waĩ Mũevilaimu. 2 Aĩ na iveti ilĩ; kĩmwe kyeetawa Aana, na kĩla kĩngĩ kyeetawa Venina. Venina aĩ na syana, ĩndĩ Aana ndaĩ na syana. 3 Mũndũũme ũsu ambataa kuma ndũanĩ yake mwaka kũthi ũla ũngĩ nĩ kana akathaithe* Yeova wa nguthu na aimũthembea kũu Silo. Vau nĩ vo ala ana elĩ ma Eli, Ovini na Vineasi, mathũkũmaa Yeova me athembi.

4 Mũthenya ũmwe yĩla Elikana waumasya nthembo, nĩwanengie Venina o vamwe na ana make onthe na eĩtu make ilungu sya nthembo ĩsu, 5 ĩndĩ anengie Aana kĩlungu kya mwanya, nũndũ endete Aana mũno; ĩndĩ Yeova ndamũnengete syana.* 6 O na ĩngĩ, kĩveti kĩla matwaanĩwʼe kyatindĩaa* kũmũvũthĩĩsya nĩ kana kĩmũthatye nũndũ Yeova ndamũnengete syana. 7 Ũu nĩwʼo kyeekaa mwaka kũthi ũla ũngĩ; ĩvinda yonthe yĩla Aana wambata athi nyũmbanĩ ya Yeova, Venina nĩwamũvũthasya mũno nginya akaĩa na aiema kũya. 8 Ĩndĩ mũũme wake Elikana amũkũlilye atĩĩ: “Aana, nĩkĩ ũkũĩa, na nĩkĩ ũteũya, na nĩkĩ ũthatĩte mũno?* Nyie ndi kavaa kwaku kwĩ ana ĩkũmi?”

9 Nĩvo ĩndĩ Aana wookĩlile mamina kũya na kũnywʼa kũu Silo. Ĩvindanĩ yĩu, mũthembi Eli ekalĩte kĩvĩlanĩ ũtee wa mũtĩ wa mũomo wa ĩkalũ* ya Yeova. 10 Aana aĩ na woo mwingĩ,* na ambĩĩa kũmũvoya Yeova na kũĩa mũno. 11 Na eevĩtie wĩvĩto ũũ: “Ame Yeova wa nguthu, ethĩwa ũkasisya mathĩna ma mũthũkũmi waku na ũindilikana na ndũkolwa nĩ mũthũkũmi waku na ũinenga mũthũkũmi waku kavĩsĩ, ngakanenga Yeova mĩthenya yonthe ya thayũ wako, na vai wenzi ũkakiita mũtwe wako.”

12 Na aendeee kũvoya mbee wa Yeova kwa ĩvinda yĩasa, Eli nĩwasyaĩĩsye kanywʼa wake. 13 Aana aneenaa ngoonĩ yake, na no ilomo syake syathĩlĩangaa, ĩndĩ wasya wake ndweewʼĩkaa. Kwondũ wa ũu, Eli asũanĩa kana Aana nũnywʼĩte. 14 Eli amwĩie atĩĩ: “Wĩĩkala wĩ mũmile nginya ĩndĩĩ? Eka kũnywʼa mbinyu yaku.” 15 Nĩvo ĩndĩ Aana wamũsũngĩie: “Aiee, mwĩai wakwa! Nyie nĩ mũndũ mũka wĩ na mathĩna maingĩ mũno;* ndinywʼĩte mbinyu kana kĩndũ o na kĩva kĩtonya kũmila, ĩndĩ nĩendeee kũtulũla thayũ* wakwa mbee wa Yeova. 16 Ndũkone mũthũkũmi waku ta mũndũ mũka vathei, nĩkwĩthĩwa nginya oyu nĩthĩĩtwe ndineena nũndũ wa woo na thĩna mwingĩ ũla nĩ nawʼo.” 17 Nĩvo ĩndĩ Eli wamũsũngĩie: “Enda na mũuo, na Ngai wa Isilaeli naũnenge kĩla wamũvoya.” 18 Nake Aana amwĩa: “Mũthũkũmi waku nĩ one ũseo methonĩ maku.” Na mũndũ mũka ũsu athi na aya, na ũthyũ wake ndwaĩ mũtuku ĩngĩ.

19 Nĩvo ĩndĩ maamũkie kwakya tene na makumana mbee wa Yeova, ĩtina wa ũu, nĩmasyokie mũsyĩ kwoo Lama. Elikana nĩwamanyanie kĩ-mwĩĩ na mũka wake Aana, na Yeova ethukĩĩsya* Aana. 20 Ĩvindanĩ ya mwaka ũmwe,* Aana nĩwakuie ĩvu na asyaa kavĩsĩ na aketa Samũeli,* nĩkwĩthĩwa aisye, “nakavoyie Yeova.”

21 Ĩtina wa ĩvinda, Elikana nĩwambatie na mũsyĩ wake wʼonthe nĩ kana akaumĩsye Yeova nthembo ya kĩla mwaka na ayumya nthembo yake ya wĩvĩto. 22 Ĩndĩ Aana ndaaambata, nũndũ eeie mũũme wake atĩĩ: “Kamwana kaeka kwonga oou, ngakaete; na kakaumĩla mbee wa Yeova na kakaendeea kwĩkala vau kuma ĩvindanĩ yĩu na kũendeea.” 23 Nĩvo ĩndĩ mũũme wake Elikana wamwĩie atĩĩ: “Ĩka ũla ũkwona wĩ ũseo.* Ĩkala mũsyĩ nginya ũeke kũkongya. Eka Yeova eanĩsye kĩla waweta.” Kwoou mũndũ mũka ũsu ekala mũsyĩ na oongya kavĩsĩ kake nginya kaeka kwonga.

24 Aeka kwongya kamwana kau oou, nĩwakatwaie Silo vamwe na kasalũ ka myaka ĩtatũ, eva ĩmwe* ya mũtu, na mbisũ nene ya mbinyu, na nĩwookie nyũmbanĩ ya Yeova kũu Silo e na kamwana kau. 25 Na ĩndĩ mathĩnza kasalũ kau na maete kavĩsĩ kau vala ve Eli. 26 Nĩvo ĩndĩ wamwĩie: “Ndekea, mwĩai wakwa! Vate nzika, o tondũ wĩ thayũ,* mwĩai wakwa, ninyie ũla mũndũ mũka waũngamĩte vaa vamwe naku ndivoya Yeova. 27 Navoyie nĩnengwe kamwana kaa, na Yeova anenga kĩla namũvoyie. 28 Yu, nakwa, nĩngũkanengane kũla kwĩ Yeova. Mĩthenyanĩ yako yonthe, kakeethĩawa kanenganĩtwe kũla kwĩ Yeova.”

Nake* akumana vau mbee wa Yeova.

2 Nĩvo ĩndĩ Aana wavoyie asya atĩĩ:

11 Na ĩndĩ Elikana enũka mũsyĩ kwake Lama, ĩndĩ kamwana kau katwʼĩka mũthũkũmi wa* Yeova mbee wa mũthembi Eli.

12 Yu ana ma Eli maĩ aũme athũku; mayamũnengae Yeova ndaĩa. 13 Ũũ nĩwʼo meekanaa na kĩla andũ maumya kyaĩlĩte kũnengwa athembi: Kĩla ĩvinda mũndũ o na wĩva waumya nthembo, yĩla nyama ĩtheũkĩte, mũthũkũmi wa mũthembi ookaa akwete ũma wĩ na maeo atatũ, 14 na ayĩũlikya na vinya kalaĩnĩ, mbisũnĩ ya kũua yĩ na moko elĩ, ĩsilianĩ, kana mbisũnĩ ya kũua yĩ na kwʼoko kũmwe. Mũthembi eeyoseaa nyama o na yĩva ĩla yatonywa nĩ ũma ũsu. Ũu nĩwʼo meekanaa na Aisilaeli onthe ala mookaa kũu Silo. 15 O na ĩngĩ, o na mũndũ ũla ũkumasya nthembo atanamba kũtuma mathunya matoa, mũthũkũmi wa mũthembi ookaa na aimwĩa atĩĩ: “Nenga mũthembi nyama akavĩvye. Ndeosa nyama ĩla ntheũkye kuma kwaku, ĩndĩ eosa o ĩla ĩte mbue.” 16 Yĩla mũndũ ũsu wamwĩa atĩĩ: “Eka vambe kũĩkĩĩthwʼa kana mathunya nĩmatoa, na ĩndĩ ũyĩyosea kĩla ũkwenda,”* amwĩaa atĩĩ: “Aiee, nenge oyu; waema kwĩka ũu, nĩĩyosea na vinya!” 17 Kwoou naĩ ya athũkũmi asu nĩyeethĩiwe yĩ nene mũno mbee wa Yeova, nũndũ aũme asu mayanengae nthembo ya Yeova ndaĩa.

18 Yu Samũeli athũkũmaa mbee wa Yeova, ekĩĩte* evoti ya katane, o na kau aĩ o kamwana. 19 O na ĩngĩ, inyia wake amũtumĩaa kakoti kate moko, na aimũetee ko kĩla mwaka yĩla wookanyʼa na mũũme kumya nthembo ya kĩla mwaka. 20 Na Eli aathima Elikana na mũka wake, ayasya atĩĩ: “Yeova nakũnenge mwana kuma kĩvetinĩ kĩĩ ose mwanya wa ũla wanengiwe Yeova.” Na masyoka mũsyĩ. 21 Na Yeova amũlilikana Aana, nĩ kana atonye kũitava; na asyaa ana angĩ atatũ na eĩtu elĩ. Na kamwana Samũeli kaendeea kwĩana mbee wa Yeova.

22 Yu Eli aĩ mũkũũ mũno, ĩndĩ nĩweewʼĩte maũndũ onthe ala ana make meekaa Aisilaeli onthe na ũndũ makomaa na aka ala mathũkũmaa mũomonĩ wa ĩeema ya kũmbanĩa. 23 Akothaa kũmea: “Nĩkĩ mũendeee kwĩka maũndũ mailye ũu? Nũndũ maũndũ ala ngwĩwʼa ĩũlũ wenyu kuma andũnĩ onthe nĩ mathũku. 24 Aiee, ana makwa, ũvoo ũla ngwĩwʼa ũendeee kũnyaĩĩka katĩ wa andũ ma Yeova ti mũseo. 25 Ethĩwa mũndũ nĩwavĩtĩsya mũndũ ũngĩ, mũndũ no amwĩsũvanĩe vala ve Yeova;* ĩndĩ ethĩwa mũndũ nĩwavĩtĩsya Yeova, nũũ ũtonya kũmũvoyea?” Ĩndĩ nĩmaleile kwĩthukĩĩsya ĩthe woo, nũndũ Yeova nĩwatwʼĩte kũmoaa. 26 Ĩvindanĩ o yĩu, kamwana Samũeli nĩkaendeeie kwĩana na kwona ũseo methonĩ ma Yeova na ma andũ.

27 Mũndũ wa Ngai nĩwookie kũla kwĩ Eli na amwĩa atĩĩ: “Ũũ nĩwʼo Yeova ũkwasya: ‘Nyie ndyaaĩyonanyʼa ũtheinĩ kũla kwĩ nyũmba ya ĩthe waku yĩla maĩ ngombo Misili nyũmbanĩ ya Valao? 28 Na anyuviwe kuma mbaĩnĩ syonthe sya Isilaeli nĩ kana athũkũmae e mũthembi wakwa na nĩ kana ambatae kĩthembeonĩ kyakwa aumye nthembo, aumye ũvumba,* na ayĩkĩa evoti mbee wakwa; na nĩnanengie nyũmba ya ũmae waku nthembo syonthe ivĩvĩtwʼe na mwaki sya Aisilaeli.* 29 Nĩkĩ inywʼĩ aũme mũvũthasya* nthembo syakwa na mĩthĩnzĩo yakwa ĩla nĩyĩaĩte yumawʼe wĩkalonĩ wakwa? Nĩkĩ mũendeeaa kũnenga ana menyu ndaĩa kwĩ inyie kwa kwĩnosya na ilungu ila nzeo vyũ sya kĩla nthembo yaumwʼa nĩ andũ makwa Isilaeli?

30 “‘Nĩkyo kĩtumi ndeto ya Yeova Ngai wa Isilaeli yaĩtye atĩĩ: “Nĩwʼo naisye kana nyũmba yaku na nyũmba ya ũmae waku ĩkaendaa mavinda onthe mbee wakwa.” Ĩndĩ yu Yeova easya: “A vakwa, ũu ndwĩendeea kwĩthĩwa, nũndũ ala manengae ndaĩa ngamanenga ndaĩa, ĩndĩ ala mambũthasya makavũthwʼa.” 31 Sisya! Mĩthenya nĩyũkĩte yĩla ngatila vinya waku* na wa nyũmba ya ĩthe waku, wĩthĩe vai mũndũũme o na ũmwe nyũmbanĩ yaku ũkekala thayũ nginya atumĩe. 32 Na ũkasisya mũmaitha wĩkalonĩ wakwa katĩ wa maũndũ onthe maseo ala mekĩtwe Isilaeli, na vaikesa kwĩthĩwa ĩngĩ mũndũũme mũkũũ nyũmbanĩ yaku. 33 Mũndũũme waku ũla ndakatila aeke kũthũkũma kĩthembeonĩ kyakwa akatuma metho maku mathela vinya na akakũetee kyeva,* ĩndĩ andũ ala aingĩ nyũmbanĩ yaku makooawa na ũvyũ wa andũ. 34 Na kĩla kĩkakwata ana maku elĩ, Ovini na Vineasi, kĩkeethĩwa wonanyʼo kwaku: Elĩ makakwʼa mũthenya ũmwe. 35 Nĩvo ĩndĩ ngeyũkĩlĩlya mũthembi mũĩkĩĩku. Akeekaa kwosana na wendi wa ngoo yakwa;* na ngamwakĩa nyũmba ya ĩvinda yonthe, na akaendaa mbee wa mwĩtĩkĩwʼa mauta wakwa mavinda onthe. 36 Mũndũ o na wĩva ũla ũkatiala nyũmbanĩ yaku akooka na aimũkumanĩa nĩ kana aĩvwe mbesa na ainengwa mũkate, na akasya atĩĩ: “Mwa nĩngũkwĩsũva, ũnenge wĩa ũmwe wa ũthembi, nĩ kana nĩĩsae kalungu ka mũkate.”’”

3 Ĩvindanĩ yĩu, kamwana Samũeli kamũthũkũmaa Yeova mbee wa Eli, ĩndĩ ndeto ya Yeova nĩyeethĩĩtwe na mũo mĩthenyanĩ ĩsu; kũyaĩ na mawoni maingĩ.

2 Yu, mũthenya ũmwe Eli akomete o vala wakomaa, na metho make nĩmambĩĩte kwĩthĩwa na mbindu; ndaĩ atonya kwona. 3 Taa wa Ngai ndwaĩ ũnamba kũvowʼa, na Samũeli akomete ĩkalũnĩ* ya Yeova, vala Ĩsandũkũ ya Ngai yaĩ. 4 Nĩvo ĩndĩ Yeova wamwĩtie Samũeli. Nake amũsũngĩa: “Ninyioo vaa.” 5 Kwoou asemba vala ve Eli na amwĩa atĩĩ: “Ninyioo, nũndũ nĩwambĩta.” Ĩndĩ Eli amwĩa: “Ndinakwĩta. Syoka ũkome.” Kwoou athi na akoma. 6 Yeova nĩweetanie ĩngĩ: “Samũeli!” Nĩvo ĩndĩ Samũeli wookĩlile na athi vala ve Eli na amwĩa atĩĩ: “Ninyioo, nũndũ nĩwambĩta.” Ĩndĩ amwĩa: “Mwanawa, ndinakwĩta. Syoka ũkome.” 7 (Yu Samũeli ndaĩ anamba kũmũmanya Yeova nesa, na ndeto ya Yeova ndyaĩ ĩnamba kũvuanwʼa kwake.) 8 Kwoou Yeova nĩweetanie ĩngĩ, ĩvinda ya katatũ: “Samũeli!” Nũndũ wa ũu, nĩwookĩlile na athi vala ve Eli na amwĩa: “Ninyioo, nũndũ nĩwambĩta.”

Nĩvo ĩndĩ Eli wamanyie kana nĩ Yeova weetaa kamwana kau. 9 Kwoou Eli eea Samũeli atĩĩ: “Enda, ũkome, na akwĩta ĩngĩ, waĩle kũmwĩa, ‘Neena, Yeova, nũndũ mũthũkũmi waku nũkwĩthukĩĩsye.’” Na Samũeli athi na akoma o vala wakomaa.

10 Yeova nĩwookie na aũngama vau, na eetana o ta mavinda ala angĩ ayasya: “Samũeli, Samũeli!” Nake Samũeli asya: “Neena, nũndũ mũthũkũmi waku nĩwĩthukĩĩsye.” 11 Yeova eeie Samũeli atĩĩ: “Sisya! Nĩngwĩka ũndũ nthĩnĩ wa Isilaeli ũla ũkatuma matũ elĩ ma mũndũ o na wĩva ũla ũkawĩwʼa malalaka. 12 Mũthenya ũsu, ngeeka Eli maũndũ onthe ala nawetie ĩũlũ wa nyũmba yake, kuma mwambĩĩo nginya mũthya. 13 No nginya ũmũtavye kana nĩngũete ũsilĩlo ũtakesa kũvetwa nyũmbanĩ yake nũndũ wa ĩvĩtyo yĩla wĩsĩ, nĩkwĩthĩwa ana make nĩmaumaa Ngai, ĩndĩ we ndamakanasya. 14 Nĩkyo kĩtumi nĩvĩtĩe nyũmba ya Eli kana ĩvĩtyo ya nyũmba ya Eli yĩikesa kwĩwʼanĩthwʼa na nthembo kana na mĩthĩnzĩo.”

15 Samũeli nĩwakomie nginya kwakya; na ĩndĩ avingũa mĩomo ya nyũmba ya Yeova. Samũeli nĩwakĩaa kũtavya Eli woni ũla wooniwʼe. 16 Ĩndĩ Eli nĩweetie Samũeli na wasya na amwĩa: “Samũeli, mwanawa!” Nake Samũeli amwĩa: “Ninyioo vaa.” 17 Amũkũlilye atĩĩ: “Aũnengie ũtũmani mwaũ? Mwa nĩngũkwĩsũva, ndũkambithe. Ngai nakũetee ũkũno mũnene na ayĩka ũu o na mbeange ethĩwa nũũmbitha ũndũ o na ũmwe katĩ wa maũndũ onthe ala ũkũtavisye.” 18 Kwoou Samũeli amũtavya kĩla kĩndũ, na ndaamũvitha ũndũ o na ũmwe. Eli amwĩie: “Nĩ Yeova. Eka eke ũla ũseo methonĩ make.”

19 Samũeli nĩwaendeeie kwĩana, na Yeova mwene aĩ vamwe nake na ndaaeka ndeto o na ĩmwe katĩ wa ndeto syake syonthe ieme kwĩanĩwʼa.* 20 Aisilaeli onthe kuma Ndani nginya Mbeeli-sieva nĩmamanyie kana Samũeli nĩwanyuvĩtwe ethĩwe mwathani wa Yeova. 21 Na Yeova nĩwaendeeie kũmumĩlĩĩla kũu Silo, nĩkwĩthĩwa Yeova mwene nĩwaumĩlĩĩlaa Samũeli kũu Silo na ndeto ya Yeova.

4 Na ndeto ya Samũeli yavikĩa Aisilaeli onthe.

Na ĩndĩ Aisilaeli mathi kũkomana na Avilisiti kaũnĩ; mambie kambi ũtee wa Evenieseli, namo Avilisiti mambĩte kambi Aveki. 2 Avilisiti nĩmeevangie kwondũ wa kaũ nĩ kana makokite na Aisilaeli, ĩndĩ kaũ wathũka na Aisilaeli masindwa nĩ Avilisiti, ala mooaie aũme ta 4,000 kĩwanzanĩ kya kaũ. 3 Yĩla andũ masyokie kambinĩ, atumĩa ma Isilaeli maisye: “Nĩkĩ Yeova ũekie tũsindwe* nĩ Avilisiti ũmũnthĩ? Ekai twose ĩsandũkũ ya ũtianĩo wa Yeova kuma Silo tũthi nayo, nĩ kana yĩthĩwe vamwe naitũ na yĩitũtangĩĩa kuma kwʼokonĩ kwa amaitha maitũ.” 4 Kwoou andũ matũma aũme Silo, na makua kuma kũu ĩsandũkũ ya ũtianĩo wa Yeova wa nguthu, ũla wĩkalaa kĩvĩlanĩ kyake kya ũsumbĩ ĩũlũ* wa akelũvi. Ala ana elĩ ma Eli, Ovini na Vineasi, o namo maĩ kũu vamwe na ĩsandũkũ ya ũtianĩo wa Ngai ũla wa wʼo.

5 Ĩsandũkũ ya ũtianĩo wa Yeova yavikwʼa kambinĩ oou, Aisilaeli onthe nĩmambĩĩie kũlonzanyʼa na wasya mũnene, nginya nthĩ yathingitha. 6 Yĩla Avilisiti meewie kĩlonzo kĩu, maisye: “Nĩkĩ kwĩ kĩlonzo kya wasya ũnenevete ũu kambinĩ ya Aevelania? Mũthya, nĩmamanyie kana Ĩsandũkũ ya Yeova yaĩ yĩnaetwe kambinĩ. 7 Avilisiti nĩmakwatiwe nĩ wia, nũndũ maisye: “Ngai nĩwooka kambinĩ!” Kwoou masya: “Kyeva nĩ kwitũ, nũndũ ũndũ ta ũũ ndwaaĩsa kwĩthĩwa! 8 Kyeva nĩ kwitũ! Nũũ ũkũtũtangĩĩa kuma kwʼokonĩ kwa Ngai ũũ mũnene? Ngai ũũ nĩwe wakũnie Amisili na kĩla mũthemba wa ũaani weũnĩ. 9 Ĩthĩwai na ũkũmbaũ na mũyĩka ta aũme, inywʼĩ Avilisiti, nĩ kana mũikese kũthũkũma Aevelania o tondũ mo mamũthũkũmĩte. Ĩkai ta aũme na mũyũkita!” 10 Kwoou Avilisiti mokita na Aisilaeli masindwa, na kĩla ũmwe akĩĩa ĩeemanĩ yake. Ũaani ũsu waĩ mũnene mũno; ngalĩko ya Isilaeli, vooaiwe asikalĩ 30,000 maendete na maaũ. 11 O na ĩngĩ, Ĩsandũkũ ya Ngai nĩyoosiwe, na ala ana elĩ ma Eli, Ovini na Vineasi, makwʼa.

12 Mũthenyanĩ ũsu, ve mũndũũme Mũmbenyamini wasembie kuma kĩwanzanĩ kya kaũ na avika Silo ngũa syake syĩ ndembũange na e na kĩtoo mũtwe. 13 Yĩla mũndũũme ũsu wavikie, Eli ekalĩte kĩvĩlanĩ ũtee wa nzĩa asyaĩĩsye, nĩkwĩthĩwa ngoo yake nĩyathĩlĩaa nũndũ wa Ĩsandũkũ ya Ngai ũla wa w’o. Mũndũ ũsu nĩwalikile ndũanĩ nĩ kana atavanyʼe ũvoo ũsu, na ndũa yonthe yambĩĩa kũĩa na wasya mũnene. 14 Yĩla Eli weewie wasya ũsu wa kĩĩo, akũlilye atĩĩ: “Wasya ũũ wa kĩthokoanyʼo wĩonanyʼa ata?” Mũndũũme ũsu nĩweekalatile alika na atavya Eli ũvoo ũsu. 15 (Yu Eli aĩ na myaka 98, na metho make maketeee mbee wake, ĩndĩ vai kĩndũ weene.) 16 Na ĩndĩ mũndũũme ũsu eea Eli: “Ninyie nooka kuma kĩwanzanĩ kya kaũ! Nasemba kuma kĩwanzanĩ kya kaũ o ũmũnthĩ.” Nũndũ wa ũu, amũkũlya: “Nĩ kyaũ kĩthĩiwe, mwanawa?” 17 Kwoou mũndũ ũsu waetete ũvoo amũelesya atĩĩ: “Aisilaeli nĩmasemba makĩa Avilisiti, na andũ nĩmasindwa mũno; o na ĩngĩ, ana maku elĩ, Ovini na Vineasi, nĩmakwʼa, na Ĩsandũkũ ya Ngai ũla wa w’o nĩyooswa.”

18 Yĩla mũndũ ũsu wawetie Ĩsandũkũ ya Ngai ũla wa w’o oou, Eli nĩwavalũkile na mangala kuma kĩvĩlanĩ kyake ũtee wa mũvĩa, na atũlĩka ngingo na akwʼa, nũndũ aĩ mũkũũ na mũlĩtu. Asilanĩtye Isilaeli myaka 40. 19 Mũka-a-mwana, mũka wa Vineasi, aĩ mũito na aĩ vakuvĩ kũsyaa. Yĩla weewie ũvoo wa kana Ĩsandũkũ ya Ngai ũla wa w’o nĩyooswa na kana ĩthe wa mũũme na mũũme wake nĩmakwʼa, nĩwakumanie na ambĩĩa kwaũnya atataĩĩe na asyaa. 20 Aikwʼa, aka ala maũngye ũtee wake maisye: “Ndũkakĩe, nũndũ nĩwasyaa kavĩsĩ.” Ndaasũngĩa o na ndaaũngana na ũndũ ũsu.* 21 Ĩndĩ eetie kamwana kau Ikavotu,* ayasya: “Ũtheu mũtisu nĩwauma Isilaeli na wathi ũtavwanĩ,” awetie ũu aineenea kwoswa kwa Ĩsandũkũ ya Ngai ũla wa w’o na kĩla kyakwatie ĩthe wa mũũme na mũũme wake. 22 Aisye: “Ũtheu mũtisu nĩwauma Isilaeli na wathi ũtavwanĩ, nũndũ Ĩsandũkũ ya Ngai ũla wa w’o nĩyooswa.”

5 Yĩla Avilisiti moosie Ĩsandũkũ ya Ngai ũla wa w’o, mayumisye Evenieseli mayĩtwaa Asitoti. 2 Avilisiti nĩmoosie Ĩsandũkũ ya Ngai ũla wa w’o na mayĩlikya nyũmbanĩ* ya Ndakoni na mayia ũtee wa Ndakoni. 3 Yĩla Aasitoti maamũkie kwakya tene mũthenya ũla waatĩĩe, meethĩie Ndakoni avalũkĩte nthĩ na ũthyũ mbee wa Ĩsandũkũ ya Yeova. Kwoou moosa Ndakoni na mamũtũnga vala wekalaa. 4 Yĩla maamũkie kwakya tene mũthenya ũla waatĩĩe, Ndakoni aĩ vau avalũkĩte nthĩ na ũthyũ mbee wa Ĩsandũkũ ya Yeova. Kyongo kya Ndakoni na itaa sya moko make elĩ syaĩ ndile na syavalũkĩte mũomonĩ. No kĩlungu kĩla kĩilye ĩkũyũ kyatialĩte kĩte kĩtilĩku.* 5 Kĩu nĩkyo kĩtumi o na nginya ũmũnthĩ ũũ, athembi ma Ndakoni na onthe ala malikaa nyũmbanĩ ya Ndakoni matakinyaa mũomonĩ wa Ndakoni kũu Asitoti.

6 Kwʼoko kwa Yeova kwaĩ kũito ĩũlũ wa Aasitoti, na nĩwamanangie kwa kũkũna Asitoti vamwe na isio syayo na ũwau wa mwĩyovo.* 7 Yĩla aũme ma Asitoti moonie kĩla kyaendeee, maisye atĩĩ: “Mũikaeke Ĩsandũkũ ya Ngai wa Isilaeli yĩkale vamwe naitũ, nũndũ kwʼoko kwake nĩkũtũkũnĩte mũno na kũkakũna ngai witũ Ndakoni.” 8 Kwoou matũmana na moombanyʼa eai onthe ma Avilisiti na mamakũlya atĩĩ: “Twaĩle kwĩkana ata na Ĩsandũkũ ya Ngai wa Isilaeli?” Namo masũngĩa masya: “Ekai Ĩsandũkũ ya Ngai wa Isilaeli yĩthamĩĩwʼe Ngathi.” Kwoou mathamĩĩsya Ĩsandũkũ ya Ngai wa Isilaeli kũu.

9 Mayĩthamĩĩsya kũu, kwʼoko kwa Yeova nĩkwakũnie ndũa ĩsu, na kwatuma andũ matelema mũno. Nĩwakũnie aũme ma ndũa ĩsu, kuma ũla mũnini nginya ũla mũnene, na ũwau wa mwĩyovo wamakwata. 10 Kwoou nĩmatwaie Ĩsandũkũ ya Ngai ũla wa w’o Ekiloni, ĩndĩ yĩla Ĩsandũkũ ya Ngai ũla wa w’o yavikie Ekiloni oou, Aekiloni mambĩĩie kũĩa na wasya mũnene mayasya: “Matũetee Ĩsandũkũ ya Ngai wa Isilaeli nĩ kana matũae vamwe na andũ maitũ!” 11 Na ĩndĩ matũmana na moombanyʼa eai onthe ma Avilisiti na mamea atĩĩ: “Vetangai Ĩsandũkũ ya Ngai wa Isilaeli vaa; ekai yĩsyoke vala yaĩlĩte kwĩthĩwa nĩ kana ithyĩ na andũ maitũ tũikoawe.” Nũndũ wia wa kĩkwʼũ nĩwanyaĩĩkĩte ndũanĩ yonthe; kwʼoko kwa Ngai ũla wa w’o kwaĩ kũito kũu, 12 na aũme ala mataakwʼa nĩmakũnĩtwe na ũwau wa mwĩyovo. Na kĩĩo kya ndũa ĩsu kya kwĩtya ũtethyo kyambata ĩtunĩ.

6 Ĩsandũkũ ya Yeova yekalile kĩsionĩ kya Avilisiti myei mũonza. 2 Avilisiti nĩmeetie athembi na ala maũasya na mamakũlya: “Twaĩle kwĩkana ata na Ĩsandũkũ ya Yeova? Tũtavyei ũndũ tũtonya kũyĩtũnga vala yaĩlĩte kwĩthĩwa.” 3 Masũngĩie masya: “Ethĩwa nĩmũũtũnga ĩsandũkũ ya ũtianĩo wa Yeova Ngai wa Isilaeli, mũikayĩtũnge vate nthembo. Mwaĩlĩte kwĩka kyonthe kĩla mũtonya mũmũtũngĩe nthembo ya ĩvĩtyo. Mweeka ũu nowʼo mũkavowʼa, na mũkamanyĩthwʼa nĩkĩ kwʼoko kwake kũtaekete kũmũkũna.” 4 Kwoou mamakũlya atĩĩ: “Twaĩlĩte kũmũnenganĩa nthembo yĩva ya ĩvĩtyo?” Namo mamea: “Kwosana na ũtalo wa eai ma Avilisiti, mũnenganĩei mimbo ĩtano ya mwĩyovo ya thaavu na mbĩa itano sya thaavu, nũndũ kĩla ũmwe wenyu vamwe na eai menyu akwatĩtwe no ũthĩnyʼo ũvwʼanene. 5 Mwaĩlĩte kũseũvya mĩvwʼanano ya mimbo yenyu ya mwĩyovo na mĩvwʼanano ya mbĩa syenyu ila iendeee kwananga nthĩ yenyu, na mwaĩlĩte kũmũnenga ndaĩa Ngai wa Isilaeli. Nĩvatonyeka kwʼoko kwake kũkaeka kũmũkũna na kũkũna ngai yenyu na nthĩ yenyu. 6 Mwĩũmya ngoo syenyu nĩkĩ o tondũ Amisili na Valao moomisye ngoo syoo? Yĩla wamakũnie mũno, nĩmalasimĩkie kũlekya Aisilaeli mathi, namo mathi. 7 Yu seũvyai ĩkasya yeũ na mũyosa ngʼombe ilĩ syĩ na tũsaũ ĩndĩ itaaĩsa kwovwa ĩsokinĩ. Ĩtina wa ũu, kwatanyʼai ngʼombe isu ĩkasyanĩ yĩu, ĩndĩ tũngai tũsaũ twasyo mũsyĩ, vaasa nasyo. 8 Osai Ĩsandũkũ ya Yeova na mũiyilĩĩla ĩkasyanĩ yĩu, na mũyĩkĩa syĩndũ isu sya thaavu ila mũũmũnenga syĩthĩwe nthembo ya ĩvĩtyo ĩsandũkũnĩ yĩ ũtee wayo. Na ĩndĩ mũyĩeka yĩthi 9 na mũiyĩsyaĩĩsya: Yambata na nzĩa ĩla yĩendete Mbethi-semesi, yĩendete kĩsionĩ kyayo, nĩvo ĩndĩ mwaĩlĩte kũmanya kana nĩwe ũtũeteete ũthũku ũũ wingĩvĩte ũu. Ĩndĩ yaema kũthi ũu, tũkamanya kana kwʼoko kwake ti kwʼo kũtũkũnĩte; nĩ ũndũ wĩthĩĩtwe ũte mũvange.”

10 Aũme asu nĩmeekie ũu. Nĩmoosie ngʼombe ilĩ syaĩ na tũsaũ na maikwatanyʼa ĩkasyanĩ yĩu, na mavingĩa tũsaũ twasyo mũsyĩ. 11 Na ĩndĩ mailĩĩla Ĩsandũkũ ya Yeova ĩkasyanĩ yĩu, o vamwe na ĩsandũkũ yĩla yaĩ na mbĩa sya thaavu na mĩvwʼanano ya mimbo yoo ya mwĩyovo. 12 Na ngʼombe isu syathi na nzĩa ya Mbethi-semesi ite kwathũka. Syaendie na nzĩa ĩmwe ĩla nene, na syaendie syanĩtye; iyaaathũka kwʼokonĩ kwa aũme kana kwʼokonĩ kwa aka. Ĩvindanĩ yĩu yonthe, eai ma Avilisiti masyumĩte ĩtina nginya mũvakanĩ wa Mbethi-semesi. 13 Andũ ma Mbethi-semesi makethaa nganũ ũiĩnĩ wĩ mwandanĩ. Yĩla mookĩlilye metho moo na moona Ĩsandũkũ yĩu, nĩmatanie mũno. 14 Ĩkasya yĩu nĩyavikie mũũndanĩ wa Yosua, ũla waĩ Mũmbethi-semesi, na yaũngama vau vakuvĩ na ĩvia ĩnene. Kwoou nĩmatilangile mbwaũ sya ĩkasya yĩu na maumĩsya Yeova ngʼombe isu syĩthĩwe nthembo ya kũvĩvwʼa.

15 Alivai nĩmoosie Ĩsandũkũ ya Yeova na yĩla ĩsandũkũ yĩngĩ yakuanĩwʼe nayo, yĩla yaĩ na ila syĩndũ sya thaavu, na mamailĩĩla ĩvianĩ ĩnene. Mũthenya ũsu, aũme ma Mbethi-semesi nĩmaumĩisye Yeova nthembo sya kũvĩvwʼa na nthembo ingĩ.

16 Yĩla eai atano ma Avilisiti moonie ũu, nĩmasyokie Ekiloni mũthenya ũsu. 17 Yu ĩĩ nĩyo mimbo ya mwĩyovo ya thaavu ĩla Avilisiti manengie Yeova yĩthĩwe nthembo ya ĩvĩtyo: ũmwe kwondũ wa Asitoti, ũmwe kwondũ wa Ngasa, ũmwe kwondũ wa Asikeloni, ũmwe kwondũ wa Ngathi, ũmwe kwondũ wa Ekiloni. 18 Na ũtalo wa mbĩa sya thaavu woosanĩte na ũtalo wa ndũa syonthe sya Avilisiti ila syaĩ sya ala eai atano, ndũa mbiĩĩe na tũtũla twĩ kĩsionĩ kĩte kiĩĩe.

Na ĩvia ĩnene yĩla yailĩĩlwe Ĩsandũkũ ya Yeova yĩthĩawa yĩ ũkũsĩ nginya ũmũnthĩ mũũndanĩ wa Yosua, ũla waĩ Mũmbethi-semesi. 19 Ĩndĩ Ngai nĩwooaie aũme ma Mbethi-semesi, nũndũ nĩmaketeeie Ĩsandũkũ ya Yeova. Nĩwooaie andũ 50,070* katĩ woo, na andũ mambĩĩa kũmeta nũndũ Yeova nĩwooaie andũ aingĩ mũno katĩ woo. 20 Kwoou aũme ma Mbethi-semesi makũlya: “Nũũ ũla wĩtonya kũũngama mbee wa Yeova, Ngai ũũ mũtheu, na auma kwitũ ethi kwa aaũ?” 21 Kwoou matũma atũmwa kũla kwĩ ekali ma Kiliathi-yealimu, mayasya: “Avilisiti nĩmatũngie Ĩsandũkũ ya Yeova. Theeai mũyose na mũyambata nayo.”

7 Aũme ma Kiliathi-yealimu nĩmookie na moosa Ĩsandũkũ ya Yeova mayambatya nyũmbanĩ ya Avinatavu ĩla yaĩ kalĩmanĩ, na mathesya mwana wake Eleasali nĩ kana asũvĩe Ĩsandũkũ ya Yeova.

2 Ĩvinda yĩasa nĩyavĩtie, myaka 20 yonthe yongelanwʼa, kuma mũthenya ũla Ĩsandũkũ yĩu yaetiwe Kiliathi-yealimu, na nyũmba yonthe ya Isilaeli yambĩĩa kũmũmantha* Yeova. 3 Nĩvo ĩndĩ Samũeli weeie nyũmba yonthe ya Isilaeli: “Ethĩwa nĩmũũsyokea Yeova na ngoo yenyu yonthe, vetangai ngai ngeni na mĩvwʼanano ya Asitolethi kuma katĩ wenyu, na mũyelekelya ngoo yenyu vyũ kũla kwĩ Yeova na mũimũthũkũma e weka, nake akamwovosya kuma kwʼokonĩ kwa Avilisiti.” 4 Nũndũ wa ũu, Aisilaeli nĩmavetangie Mbaali na mĩvwʼanano ya Asitolethi na mamũthũkũma Yeova e weka.

5 Na ĩndĩ Samũeli asya: “Ũmbanĩsyai Aisilaeli onthe kũu Misiva, na nĩngũmũvoya Yeova kwondũ wenyu.” 6 Kwoou moombana vamwe kũu Misiva, na mauta kĩw’ũ na makĩta mbee wa Yeova na matĩĩa kũya mũthenya ũsu. Me kũu maisye: “Nĩtũmũvĩtĩsye Yeova.” Na Samũeli ambĩĩa kũthũkũma e mũsili wa Aisilaeli kũu Misiva.

7 Yĩla Avilisiti meewie kana Aisilaeli nĩmombanĩte vamwe kũu Misiva, eai ma Avilisiti nĩmambatie makavithũkĩe Aisilaeli. Yĩla Aisilaeli meewie ũu, nĩmakwatiwe nĩ wia nũndũ wa Avilisiti. 8 Kwoou Aisilaeli meea Samũeli atĩĩ: “Ndũkaeke kũmwĩkaĩla Yeova Ngai witũ atũtetheesye na aitũtangĩĩa kuma kwʼokonĩ kwa Avilisiti.” 9 Na ĩndĩ Samũeli oosa kalondu kekwonga na akaumĩsya Yeova kethĩwe nthembo nima ya kũvĩvwʼa; na Samũeli amwĩkaĩla Yeova nũndũ wa Aisilaeli nĩ kana amatetheesye, na Yeova amũsũngĩa. 10 Yĩla Samũeli waendeee kumya nthembo ĩsu ya kũvĩvwʼa, Avilisiti nĩmathengeeie nĩ kana mokite Aisilaeli. Nĩvo ĩndĩ Yeova waeteie Avilisiti kĩtundumo kĩnene mũthenya ũsu, na amavũavũanyʼa, na masindĩwa mbee wa Aisilaeli. 11 Nũndũ wa ũu, aũme ma Isilaeli nĩmaumie Misiva na masembanyʼa Avilisiti, mathi mamoaĩte nginya ngalĩko ya ĩtheo ya Mbethi-kali. 12 Nĩvo ĩndĩ Samũeli woosie ĩvia na ayia katĩkatĩ wa Misiva na Yesana na ayĩta Evenieseli,* nũndũ aisye: “Yeova nũtũtetheesye nginya yu tũĩ.” 13 Kwoou Avilisiti masindwa, na mayaaũka ĩngĩ kĩsionĩ kya Aisilaeli; na kwʼoko kwa Yeova kũyaaĩtĩkĩlya Avilisiti mavithũkĩe Aisilaeli mĩthenyanĩ yonthe ya Samũeli. 14 O na ĩngĩ, ndũa ila Avilisiti moosete kuma kwa Aisilaeli nĩsyatũngĩiwe Aisilaeli, kuma Ekiloni nginya Ngathi, na Aisilaeli moosa ĩngĩ kĩsio kyoo kuma kwʼokonĩ kwa Avilisiti.

O na vaĩ mũuo katĩ wa Aisilaeli na Aamoli.

15 Samũeli aendeeie kũsilanyʼa Isilaeli thayũnĩ wake wʼonthe. 16 Kĩla mwaka athyũlũlũkaa Mbetheli, Ngilikali, na Misiva, na nĩwasilanasya Aisilaeli kũndũnĩ kũu kwʼonthe. 17 Ĩndĩ nĩwasyokaa Lama, nũndũ nyũmba yake yaĩ kũu, o na ĩngĩ, e kũu nĩwasilanasya Aisilaeli. Nĩwaakĩie Yeova kĩthembeo kũu.

8 Yĩla Samũeli wakũie, nĩwanyuvie ana make methĩwe asili ma Isilaeli. 2 Mwana wake wa mbee eetawa Yoeli, na wa kelĩ eetawa Aviya; maĩ asili kũu Mbeeli-sieva. 3 Ĩndĩ ana make mayakinyĩlaa nzĩanĩ syake; maĩ na wendi wa kwĩyĩuna na nzĩa itaĩlĩte, nĩmeetĩkĩlaa ĩvaki, na nĩmeelelũkasya ũsili wa katĩ.

4 Ĩtina wa ĩvinda, atumĩa onthe ma Isilaeli nĩmoombanie vamwe na mooka Lama vala ve Samũeli. 5 Mamwĩie atĩĩ: “Sisya! Yu wĩ mũkũũ, ĩndĩ ana maku maiendelaa nzĩanĩ syaku. Yu tũnyuvĩe mũsumbĩ nĩ kana atũsilanasye o ta mbaĩ ila ingĩ syonthe.” 6 Ĩndĩ ũndũ ũsu ndwaamwendeesya* Samũeli yĩla maisye: “Tũnenge mũsumbĩ nĩ kana atũsilanasye.” Na ĩndĩ Samũeli amũvoya Yeova, 7 na Yeova eea Samũeli atĩĩ: “Ĩthukĩĩsye maũndũ onthe ala andũ meũkũtavya; nũndũ ti uwe maleete, ĩndĩ ninyie maleete ndikethĩwe mũsumbĩ woo. 8 Meĩka o tondũ methĩĩtwe mayĩka kuma mũthenya ũla namaumisye Misili nginya ũmũnthĩ; matindĩaa kũndia na kũthũkũma ngai ingĩ, na ũu nowʼo meũkwĩka. 9 Yu methukĩĩsye. O na ũu wĩ o vo, waĩlĩte kũmakanyʼa kwa ũito; matavye maũndũ ala mũsumbĩ ũla ũkamasumbĩka ũkethĩwa na ũthasyo wa kũmetya.”

10 Kwoou Samũeli atavya andũ ala mamwĩtasya mũsumbĩ ndeto syonthe sya Yeova. 11 Ameie atĩĩ: “Aa nĩmo maũndũ ala mũsumbĩ ũla ũkamũsumbĩka ũkethĩwa na ũthasyo wa kũmwĩtya: Akoosa ana menyu na makathũkũmaa makasyanĩ make na akamatwʼĩkĩthya atwai make ma mbalasi, na amwe makalasimĩthwʼa kũsembaa mbee wa makasya make. 12 Na akenyuvĩa anene ma makili na anene ma mĩongo ĩtano, na amwe makamũĩmĩaa, makethe ngetha yake, na maiseũvya mĩio yake ya kaũ na syĩndũ kwondũ wa makasya make. 13 Akoosa eĩtu menyu matwʼĩke avulanyʼa ma manukato,* aui ma lĩu, na aui ma mĩkate. 14 Akoosa mĩũnda yenyu ĩla mĩseo vyũ, mĩũnda yenyu ya mĩsavivũ ĩla mĩseo vyũ, na mĩũnda yenyu ya mĩthata ĩla mĩseo vyũ, na aimĩnenga athũkũmi make. 15 Akoosa kĩlungu kya ĩkũmi kya mĩũnda yenyu ya lĩu wa mbaa ngetha na kya mĩũnda yenyu ya mĩsavivũ, na aikĩnenga andũ ala me na ũkũmũ mũnene nyũmbanĩ yake na athũkũmi make. 16 Na akoosa athũkũmi menyu aũme na athũkũmi menyu aka, indo syenyu ila nzeo vyũ, na mangʼoi menyu, na akamatũmĩaa wĩanĩ wake. 17 Akoosa kĩlungu kya ĩkũmi kya malondu menyu na mbũi syenyu, na mũkatwʼĩka athũkũmi make. 18 Mũthenya ũkavika yĩla mũkaĩa na wasya mũnene nũndũ wa mũsumbĩ ũla mwĩnyuvĩe, ĩndĩ mũthenya ũsu Yeova ndakamũsũngĩa.”

19 O na ũu wĩ o vo, andũ nĩmaleile kwĩthukĩĩsya kĩla Samũeli wamatavisye, na masya: “Aiee, nĩtũtwʼĩte kwĩthĩwa na mũsumbĩ nĩ kana atũsumbĩke. 20 Nĩvo ĩndĩ tũkethĩwa tũilye ta mbaĩ ila ingĩ syonthe, na mũsumbĩ witũ akatũsilanasya na aitũtongoesya na akokitaa na amaitha maitũ.” 21 Samũeli amina kwĩwʼa ndeto syonthe sya andũ, nĩwaisyokeleeile vala ve Yeova. 22 Yeova eeie Samũeli atĩĩ: “Methukĩĩsye, na ũimanyuvĩa mũsumbĩ amasumbĩke.” Nĩvo ĩndĩ Samũeli weeie aũme ma Isilaeli atĩĩ: “Kĩla ũmwe wenyu asyoke ndũanĩ yake.”

9 Vaĩ mũndũũme wa Mbenyamini weetawa Kisi, mwana wa Avieli, mwana wa Nzeloli mwana wa Mbekolathi mwana wa Avia, Mũmbenyamini waĩ mũthwii mũno. 2 Aĩ na mwana weetawa Saũlo, ũla waĩ wa mũika na mũmbe nesa, vai mũndũũme ũngĩ katĩ wa Aisilaeli waĩ mũmbe nesa kwĩ we, na aĩ mũasa kwĩ andũ ala angĩ onthe; mamũvikaa o ituonĩ.

3 Yĩla mangʼoi* ma Kisi ĩthe wa Saũlo maaie, Kisi eeie mwana wake Saũlo atĩĩ: “Mwa osa mũthũkũmi ũmwe mũkamanthe mangʼoi.” 4 Nĩmesĩile kĩsionĩ kĩ iĩma kya Evilaimu na mesĩla nthĩ ya Salisa, ĩndĩ mayaamona. Nĩmaendie kũmamantha nthĩ ya Saalimu, ĩndĩ mangʼoi asu mayaĩ kũu. Nĩmesĩile nthĩ yonthe ya Ambenyamini, ĩndĩ mayaamona.

5 Mavika nthĩ ya Nzuve, Saũlo eeie mũthũkũmi ũla waĩ nake atĩĩ: “Ũka, eka tũsyoke, nĩ kana ĩthe wakwa ndakambĩĩe kũthĩnĩka nũndũ witũ vandũ va mangʼoi.” 6 Ĩndĩ mũthũkũmi ũsu amũsũngĩa: “Sisya, ve mũndũ wa Ngai ndũanĩ ĩno, mũndũ ũnengetwe ndaĩa. Kyonthe kĩla waweta kĩileaa kwĩanĩa. Tũthi vo yu. Noĩthwa atonya kũtũtavya nzĩa ĩla tũkũatĩĩa.” 7 Nũndũ wa ũu, Saũlo eea mũthũkũmi wake atĩĩ: “Ethĩwa nĩtũũthi, nĩ kyaũ tũtonya kũtwaĩa mũndũ ũsu? Vai mũkate mũvukonĩ witũ; tũi na mũthĩnzĩo o na ũmwe tũtonya kũtwaĩa mũndũ ũsu wa Ngai ũla wa w’o. Nĩ kyaũ twĩ nakyo?” 8 Kwoou mũthũkũmi ũsu asũngĩa Saũlo atĩĩ: “Sisya! Nĩ na kĩlungu kya kana kya sekeli* ya vetha kw’okonĩ kwakwa. Nĩngũkĩnenga mũndũ ũsu wa Ngai ũla wa w’o, nake nũkũtũtavya nzĩa ĩla tũũthi nayo.” 9 (Ĩvindanĩ ya tene nthĩnĩ wa Isilaeli, ũũ nĩwʼo mũndũ waasya yĩla ũkũthi kũkũlya Ngai ũtao: “Ũka, tũkone mwoni.” Nũndũ ũla ũmũnthĩ wĩtawa mwathani tene eetawa mwoni.) 10 Nĩvo ĩndĩ Saũlo weeie mũthũkũmi wake: “Kĩla waweta nĩ kĩseo. Tũthi.” Kwoou mathi ndũanĩ ĩla mũndũ ũsu wa Ngai ũla wa w’o waĩ.

11 Yĩla maĩ kyambatonĩ maendete ndũanĩ ĩsu, nĩmakomanie na eĩtu maendete kũtava kĩwʼũ. Na kwoou mamakũlya: “We mwoni e vaa?” 12 Namo mamasũngĩa atĩĩ: “Ĩĩ, e vo. Sisyai, e vaa mbee wenyu. Ĩkalaatei yu, nũndũ ũmũnthĩ nĩwooka ndũanĩ, nĩkwĩthĩwa ũmũnthĩ andũ meumĩsya nthembo vandũnĩ vatũlu. 13 Mwalika ndũanĩ oou, nĩmũũmwona atanamba kwambata vandũnĩ vatũlu akaye. Avika nowʼo andũ meũya, nũndũ nĩwe ũathimaa nthembo. Ĩtina wa ũu, ala mathoketwʼe no maye. Kwoou yu ambatai mũte kwananga ĩvinda, na nĩmũũmwona.” 14 Na ĩndĩ mambata ndũanĩ ĩsu. Me vakuvĩ kũvika katĩkatĩ wa ndũa, nĩmoonie Samũeli okĩte akomane namo nĩ kana mambate vandũnĩ vatũlu.

15 Mũthenya ũla wavĩtĩte Saũlo atanamba kũka, Yeova eeĩte* Samũeli atĩĩ: 16 “Ũnĩ saa ta ii, ngaũtũmĩa mũndũ kuma nthĩ ya Mbenyamini. No nginya ũmwĩtĩkĩsye mauta ethĩwe mũtongoi wa andũ makwa Aisilaeli, na akatangĩĩa andũ makwa kuma kwʼokonĩ kwa Avilisiti. Nũndũ nĩnonete mathĩna ma andũ makwa, na kĩĩo kyoo nĩkĩmbikĩĩte.” 17 Yĩla Samũeli woonie Saũlo, Yeova amwĩie atĩĩ: “Ũũ nĩwe mũndũ ũla nĩnaũtavisye, ‘Ũũ nĩwe ũkatongoesya andũ makwa.’”*

18 Na ĩndĩ Saũlo athengeea Samũeli katĩkatĩ wa mũvĩa, na amwĩa: “Mwa ndavye, nyũmba ya mwoni yĩĩva?” 19 Nake Samũeli asũngĩa Saũlo amwĩa atĩĩ: “Ninyie mwoni. Ambata mbee wakwa tũthi vandũ vatũlu, na nũkũĩsanĩa nakwa ũmũnthĩ. Ngaeka ũthi ũnĩ kwakya, na nĩngũũtavya maũndũ onthe ala ũkwenda kũmanya.* 20 Ndũkathĩnĩke ĩũlũ wa mangʼoi ala manaaĩte mĩthenya itatũ mĩvĩtu, nũndũ nĩmonekie. Na syĩndũ syonthe sya kwendeesya sya Isilaeli nĩ syaũ? Syo ti syaku na sya nyũmba yonthe ya ĩthe waku?” 21 Nĩvo ĩndĩ Saũlo wamũsũngĩie amwĩa: “Nyie ndi o Mũmbenyamini wa mbaĩ ĩla nini vyũ mbaĩnĩ sya Isilaeli, na mũsyĩ wakwa tiwʼo ũte wa vata vyũ katĩ wa mĩsyĩ yonthe ya mbaĩ ya Mbenyamini? Kwoou wandavya ũu nĩkĩ?”

22 Na ĩndĩ Samũeli oosa Saũlo na mũthũkũmi wake na amaete nyũmbanĩ ya kũĩĩa lĩu na amanenga vandũ vala vaseo vyũ va kwĩkala mbee wa andũ ala mathoketwʼe; vaĩ aũme ta 30. 23 Samũeli eeie mũui atĩĩ: “Ete kĩlungu kĩla ngũnengie na nakwĩa, ‘Kĩie ũtee.ʼ” 24 Nĩvo ĩndĩ mũui wookĩlilye kũla kũũ na nyama ĩla yaĩ ĩũlũ wakwʼo, na akwia mbee wa Saũlo. Na Samũeli amwĩa: “Kĩla kĩĩiĩtwe nĩkyaiwa mbee waku. Ya, nũndũ kĩĩiĩtwe kwondũ waku nũndũ wa mũthenya ũũ wa mwanya. Nĩkwĩthĩwa nĩmeie, ‘Nĩnthoketye aeni.ʼ” Kwoou Saũlo aĩsanĩa na Samũeli mũthenya ũsu. 25 Na ĩndĩ matheea kuma vandũ vau vatũlu mathi ndũanĩ, na aendeea kũneena na Saũlo me nyũmbanĩ ĩũlũ. 26 Mookĩlile tene, na kwatheathea Samũeli eeta Saũlo e nyũmbanĩ ĩũlũ, amwĩa: “Ĩyũmbanyʼe, nĩ kana ngũeke ũthi.” Nĩvo ĩndĩ Saũlo weeyũmbanisye na aumaalanyʼa na Samũeli. 27 Matheete melekele nza wa ndũa, Samũeli eeie Saũlo atĩĩ: “Tavya mũthũkũmi waku atongosye,” kwoou atongosya. “Ĩndĩ we, ũngama yu ũteũnyaunyia, nĩ kana ngũtavye ndeto ya Ngai.”

10 Nĩvo ĩndĩ Samũeli woosie sũva wa mauta na ametĩkĩĩsya mũtwenĩ wa Saũlo. Na ĩndĩ amũmumunya na amwĩa: “We Yeova ndakwĩtĩkĩsye mauta wĩthĩwe mũtongoi ĩũlũ wa ũtiĩwa wake? 2 Yĩla tũũtaanĩsya ũmũnthĩ, nũkwĩthĩa aũme elĩ vakuvĩ na mbũa ya Laeli kĩsionĩ kya Mbenyamini kũu Nzelisa, na methi ũkwĩa, ‘Mangʼoi ala ũnaendie kũmantha nĩmanoonekie, ĩndĩ yu ĩthe waku nĩwũlĩtwe nĩ mangʼoi asu na akwetye kũthĩnĩka nũndũ waku. Easya: “Ndonya kwĩka ata nĩ kana none mwana wakwa?”’ 3 Wauma vau thi nginya mũtĩnĩ mũnene wa Tavoli, vala ũũkomana na aũme atatũ mambatĩte Mbetheli makathaithe Ngai ũla wa w’o, ũmwe akuĩte tũtena tũtatũ twa mbũi, ũngĩ akuĩte mĩkate ĩtatũ, na ũngĩ akuĩte mbisũ nene ya mbinyu. 4 Nĩmeũkũkũlya ũndũ ũendeee na maikũnenga mĩkate ĩlĩ, na no nginya wĩtĩkĩle mĩkate ĩsu meũkũnenga. 5 Ĩtina wa ũu, wĩthi ũvike kalĩmanĩ ka Ngai ũla wa w’o, vala ve kambi ya asikalĩ ma Avilisiti. Walika ndũanĩ, nũũkomana na kĩkundi kya athani kĩtheeete kuma vala vandũ vatũlu, na mũio wa kũinga wĩ na ndii na ndambulĩnĩ na mũtũlilũ na mũio wa wathi wĩ na ndii 12* syĩĩthĩwa iikũnwa mbee woo o maendeee kwathana. 6 Veva wa Yeova nũũkwĩkĩa vinya, na nũkwathana vamwe namo na nũkũalyũlwa ũtwʼĩke mũndũ ũngĩ. 7 Mawonany’o asu meekĩka, ĩka kyonthe kĩla kwʼoko kwaku kũtonya kwĩka, nũndũ Ngai ũla wa w’o e vamwe naku. 8 Na ĩndĩ theea mbee wakwa ũthi Ngilikali, na ngatheea kũu kũla ũĩ nĩ kana numye nthembo sya kũvĩvwʼa na nthembo sya ngwatanĩo. Waĩlĩte kweteela mĩthenya mũonza nginya nũke kũla ũĩ. Na ĩndĩ ngaũtavya ũndũ waĩlĩte kwĩka.”

9 Yĩla Saũlo wavĩndũkie atie Samũeli oou, Ngai nĩwambĩĩie kũvĩndũa ngoo yake yĩthĩwe ĩilye ta ya mũndũ ũngĩ, na mawonanyʼo asu onthe meanĩa mũthenya ũsu. 10 Kwoou mauma vau mathi kalĩmanĩ, na kĩkundi kya athani kyakomana nake. Saanĩ o ũsu veva wa Ngai nĩwamwĩkĩie vinya, na ambĩĩa kwathana e katĩ woo. 11 Yĩla onthe ala mamwĩsĩ vau mbeenĩ moonie ayathana vamwe na athani, meeanie atĩĩ: “Nĩ kyaũ kĩkwatie mwana wa Kisi? Saũlo o nake ko ũmwe wa athani?” 12 Nĩvo ĩndĩ mũndũ kuma kũu waisye: “Ĩndĩ we ĩthe woo nũũ?” Na nũndũ wa ũu, kweethĩwa na ũneeni ũũ:* “Saũlo o nake ko ũmwe wa athani?”

13 Yĩla waminie kwathana, nĩwaendie vala vandũnĩ vatũlu. 14 Ĩtina, mwendwʼa-ĩthe wa Saũlo akũlilye Saũlo na mũthũkũmi wake atĩĩ: “Mũnaendie va?” Nake Saũlo amwĩa: “Tũnaendie kũmantha mangʼoi, ĩndĩ twaema kũmona, na kwoou twathi kũla kwĩ Samũeli.” 15 Mwendwʼa-ĩthe wa Saũlo amũkũlilye: “Mwa ndavye, Samũeli anakwĩie ata?” 16 Saũlo asũngĩie mwendwʼa-ĩthe atĩĩ: “Anatwĩie mangʼoi manaĩ manooneka.” Ĩndĩ Saũlo ndaamũtavya kĩla Samũeli wamũtavĩtye ĩũlũ wa ũsumbĩ.

17 Nĩvo ĩndĩ Samũeli weetie andũ moombana vamwe mbee wa Yeova kũu Misiva 18 na eea Aisilaeli atĩĩ: “Ũũ nĩwʼo Yeova Ngai wa Isilaeli ũkwasya: ‘Ninyie naumisye Aisilaeli nthĩ ya Misili na namavonokya kuma kwʼokonĩ kwa Amisili na kuma kw’okonĩ kwa mosumbĩ onthe ala mamũthĩnasya. 19 Ĩndĩ ũmũnthĩ nĩmũleete Ngai wenyu ũla waĩ Mũtangĩĩi wenyu na amumya mothũkunĩ menyu onthe na mathĩnanĩ menyu, na mwaisye: “Aiee, waĩlĩte kũtũnyuvĩa mũsumbĩ atũsumbĩke.” Yu ũngamai mbee wa Yeova kwosana na mbaĩ syenyu na kwosana na makili menyu.’”*

20 Kwoou Samũeli athengeesya mbaĩ syonthe sya Isilaeli, na mbaĩ ya Mbenyamini yanyuvwa. 21 Na ĩndĩ athengeesya mbaĩ ya Mbenyamini kwosana na mĩsyĩ yayo, na mũsyĩ wa Amatali wanyuvwa. Mũthya, Saũlo mwana wa Kisi nĩwanyuviwe. Ĩndĩ yĩla maendie kũmũmantha, mayaamwona. 22 Kwoou makũlya Yeova atĩĩ: “We mũndũũme ũsu nĩwũkie vaa?” Yeova amasũngĩie amea: “Nũũya vaya evithĩte mĩionĩ.” 23 Na ĩndĩ masemba mamumya vau na mamũete. Yĩla waũngamie katĩkatĩ wa andũ, aĩ mũasa kwĩ andũ ala angĩ onthe, mamũvikaa ituonĩ. 24 Samũeli eeie andũ onthe atĩĩ: “Nĩmwene mũndũ ũla Yeova ũnyuvĩte, kana vai ũngĩ ũilye take katĩ wa andũ onthe?” Na andũ onthe mambĩĩa kũneena na wasya mũnene mayasya: “Mũsumbĩ nĩekale ĩvinda yĩasa!”

25 Samũeli nĩwatavisye andũ kĩla asumbĩ makendaa kwĩkwa na akĩandĩka ĩvukunĩ na ayia mbee wa Yeova. Nĩvo ĩndĩ Samũeli waekie andũ onthe mathi, kĩla mũndũ mũsyĩ kwake. 26 Saũlo o nake nĩwaendie mũsyĩ kwake Ngivea, e vamwe na ngũmbaũ ila Yeova wakiitĩte ngoo syasyo. 27 Ĩndĩ aũme amwe athũku maisye: “Yu ũũ akatũtangĩĩa ata?” Kwoou mamũvũthya, na mayaamũetee mũthĩnzĩo o na ũmwe. Ĩndĩ we ndaaweta ũndũ o na ũmwe ĩũlũ wa ũndũ ũsu.*

11 Nĩvo ĩndĩ Naasu, ũla waĩ Mũamimoni, wambatie na amba kambi nĩ kana okite Yavesi ya Ngileati. Aũme onthe ma Yavesi meeie Naasu atĩĩ: “Tianĩa ũtianĩo* naitũ, na nĩtũũkũthũkũma.” 2 Naasu, ũla waĩ Mũamimoni, ameie atĩĩ: “Nĩtianĩa ũtianĩo nenyu mweanĩsya ũndũ ũũ: metho menyu onthe ma ngalĩko ya aũme makũwe. Nĩĩka ũu nĩ kana nĩkĩĩthye nthoni Aisilaeli onthe.” 3 Atumĩa ma Yavesi mamũsũngĩie atĩĩ: “Tũnenge ĩvinda ya mĩthenya mũonza nĩ kana tũtũme atũmwa kĩsionĩ kyonthe kya Isilaeli. Ĩtina wa ũu, ethĩwa vaikethĩwa ũmwe wa kũtũvonokya, tũkeenengane kwaku.” 4 Ĩtina wa ĩvinda, atũmwa nĩmavikie Ngivea ya Saũlo na maneena ndeto isu andũ mayĩwʼa, na andũ onthe maĩa na wasya mũnene mũno.

5 Ĩndĩ Saũlo aumĩte kĩsesinĩ e ĩtina wa indo, na Saũlo asya: “Andũ me na thĩna mwaũ? Nĩkĩ mekũĩa?” Kwoou mamũelesya ndeto sya aũme ma Yavesi. 6 Yĩla Saũlo weewie ndeto isu, veva wa Ngai nĩwamwĩkĩie vinya na athata mũno. 7 Kwoou oosa nzaũ ilĩ na aitilanga ilungu, na anenga atũmwa maitwaa kĩsionĩ kyonthe kya Isilaeli mayasya: “Mũndũ o na wĩva ũla ũte kũatĩĩa Saũlo na Samũeli amanye ngʼombe syake ikeekwa ũu!” Na andũ makwatwa nĩ wia wa Yeova, kwoou maumaala me na kĩeleelo kĩmwe.* 8 Na ĩndĩ amatalĩla kũu Mbeseki, na vaĩ Aisilaeli 300,000 na aũme 30,000 ma Yuta. 9 Nĩvo ĩndĩ meeie ala atũmwa mookĩte atĩĩ: “Ũũ nĩwʼo mwaĩle kũtavya aũme ma Yavesi ya Ngileati, ‘Ũnĩ sua yavyũva, mũkatangĩĩwa.’” Na ĩndĩ atũmwa asu mooka na matavya aũme ma Yavesi, namo matana mũno. 10 Kwoou aũme ma Yavesi masya: “Ũnĩ tũkeenengane kwenyu, na no mũtwĩke kĩla mũkwona kĩ kĩseo kwenyu.”

11 Mũthenya ũla waatĩĩe, Saũlo nĩwaanisye andũ ikosi itatũ, na mesĩla katĩkatĩ wa kambi kũkilye kũkya* na mooaa Aamimoni nginya ta mũthenya katĩ. Ala mavonokie nĩmavalaanilwʼe weethĩa vai andũ elĩ manatiwa me vamwe. 12 Nĩvo ĩndĩ andũ meeie Samũeli atĩĩ: “Naaũ ala manaasya, ‘We Saũlo nũkũtwʼĩka mũsumbĩ witũ?ʼ Tũnenge aũme asu, nĩ kana tũmoae.” 13 Ĩndĩ o na ũu wĩ o vo, Saũlo asya: “Vai mũndũ waĩlĩte kũawa ũmũnthĩ, nũndũ ũmũnthĩ Yeova nĩwavonokya Aisilaeli.”

14 Ĩtina, Samũeli eeie andũ atĩĩ: “Ũkai tũthi Ngilikali nĩ kana tũkatangaase ĩngĩ kana Saũlo nĩ mũsumbĩ.” 15 Kwoou andũ onthe mathi Ngilikali, na me kũu Ngilikali matwʼĩkĩthya Saũlo mũsumbĩ mbee wa Yeova. Na ĩndĩ maumĩsya nthembo sya ngwatanĩo kũu mbee wa Yeova, na Saũlo na aũme onthe ma Isilaeli matanĩa ũndũ ũsu na ũtanu mũnene.

12 Mũthya, Samũeli eeie Aisilaeli onthe atĩĩ: “Sisyai, nĩnĩkĩte* maũndũ onthe ala mũngũlĩtye nĩke, na nĩnĩnyuvĩte mũsumbĩ amũsumbĩke. 2 Yu ũũ nĩwe mũsumbĩ ũla ũmũtongoesye!* A vakwa, nĩ mũkũũ na nĩ na mbuĩ, na ana makwa me vaa vamwe nenyu, na nĩnĩmũtongoesye kuma nĩ wa mũika nginya ũmũnthĩ ũũ. 3 Ninyioo vaa. Umyai ũkũsĩ ĩũlũ wakwa mbee wa Yeova na mbee wa mwĩtĩkĩwʼa mauta wake: Nosete nzaũ yaũ kana ĩngʼoi yaũ? Kana nũũ nĩvenete kwa nzĩa ya ũkengani kana ngavinyĩĩa? Nosete ĩvaki* kuma kwʼokonĩ kwaũ nĩ kana nelelũkye sila wa katĩ? Ethĩwa nĩnĩkĩte ũu, nĩngũmũtũngĩa.” 4 Namo masya: “Ndũtũvenete kwa nzĩa ya ũkengani kana ũkatũvinyĩĩa kana ũketĩkĩla kĩndũ o na kĩva kuma kwʼokonĩ kwa mũndũ o na wĩva.” 5 Kwoou amea atĩĩ: “Yeova nĩ ngũsĩ kwenyu, na mwĩtĩkĩwʼa mauta wake nĩ ngũsĩ ũmũnthĩ kana mũinona ũndũ o na wĩva mũtonya kũnzikata ĩũlũ wawʼo.”* Namo masya: “We nĩ ngũsĩ.”

6 Kwoou Samũeli eea andũ atĩĩ: “Yeova, ũla watũmĩie Mose na Alũni na ũla waumisye aa-ũmae menyu kuma nthĩ ya Misili, nĩ ngũsĩ. 7 Na yu ũkai na mũyĩũngama vaa, na nĩngũmũtwʼĩĩa sila mbee wa Yeova nũndũ wa meko onthe malũngalu ala Yeova ũmwĩkĩte na weekie aa-ũmae menyu.

8 “Yĩla Yakovo wookie Misili oou na aa-ũmae menyu mambĩĩa kũmwĩkaĩla Yeova amatetheesye, Yeova nĩwatũmie Mose na Alũni matongoesye aa-ũmae menyu kuma Misili na maituma mũtũa vandũ vaa. 9 Ĩndĩ nĩmoolilwe nĩ Yeova Ngai woo, na amathoosya kw’okonĩ kwa Sisela mũnene wa ita sya Asoli na kw’okonĩ kwa Avilisiti na kw’okonĩ kwa mũsumbĩ wa Moavi, na mamokita. 10 Na mamwĩkaĩla Yeova amatetheesye na masya, ‘Nĩtũvĩtĩtye, nũndũ nĩtũmũtiĩte Yeova nĩ kana tũthũkũme Mbaali na mĩvwʼanano ya Asitolethi; yu tũvonokye kuma kwʼokonĩ kwa amaitha maitũ nĩ kana tũũthũkũme.’ 11 Nĩvo ĩndĩ Yeova watũmie Yelumbaali na Mbetani na Yevitha na Samũeli na amavonokya kuma kwʼokonĩ kwa amaitha ala mamũthyũlũlũkĩte kĩla vandũ, nĩ kana mwĩkale mwĩ asũvĩĩku. 12 Yĩla mwoonie kana Naasu mũsumbĩ wa Aamimoni aĩ anooka kũkita nenyu, mwatindĩie kũmbĩa, ‘Aiee, nĩtũtwʼĩte kwĩthĩwa na mũsumbĩ nĩ kana atũsumbĩke!’ o na kau Yeova Ngai wenyu nĩwe Mũsumbĩ wenyu. 13 Yu mũsumbĩ ũla mũnyuvĩte nĩwe ũũ, ũla mweetisye. Sisyai! Yeova nũnyuvĩte mũsumbĩ amũsumbĩke. 14 Mwamũkĩa Yeova na mwamũthũkũma na mweewʼa wasya wake na mwaema kũleana na mwĩao wa Yeova, na ethĩwa inywʼĩ na mũsumbĩ ũla ũmũsumbĩkĩte mũkaatĩĩaa Yeova Ngai wenyu, nĩ ũseo. 15 Ĩndĩ mwaema kwĩwʼa wasya wa Yeova na mwaleana na mwĩao wa Yeova, kwʼoko kwa Yeova kũkeethĩwa ĩũlũ wenyu na aa-ĩthe menyu. 16 Yu ũkai na mũũngame vaa mwone ũndũ ũũ mũnene Yeova ũkwĩka mbee wa metho menyu. 17 Yo ũmũnthĩ ti ĩvinda ya ngetha ya nganũ? Nĩngũmwĩkaĩla Yeova aete kĩtundumo na mbua; nĩvo ĩndĩ mũũmanya na mũielewa ũndũ mũthũku ũla mwĩkĩte methonĩ ma Yeova kwa kwĩyĩtĩsya mũsumbĩ.”

18 Nũndũ wa ũu, Samũeli nĩwamwĩkaĩlile Yeova, na Yeova atuma kũtunduma na kua mbua mũthenya ũsu, kwoou andũ onthe mamũkĩa Yeova mũno na Samũeli. 19 Na andũ onthe meea Samũeli atĩĩ: “Mũvoye Yeova Ngai waku kwondũ wa athũkũmi maku, nũndũ tũikwenda kũkwʼa, nĩkwĩthĩwa nĩtwongelete ũthũku ũngĩ naĩnĩ sitũ syonthe kwa kwĩtya mũsumbĩ.”

20 Kwoou Samũeli eea andũ atĩĩ: “Mũikakĩe. Vate nzika, nĩmwĩkĩte ũthũku ũũ wʼonthe. Ĩndĩ mũikelelũke mũeke kũmũatĩĩa Yeova, na mũthũkũmei Yeova na ngoo yenyu yonthe. 21 Mũikelelũke mũatĩĩe maũndũ ma mana,* ala matatethya na matatonya kũtũvonokya, nũndũ nĩ ma mana.* 22 Kwondũ wa ĩsyĩtwa yake ĩnene, Yeova ndakatia andũ make, nĩkwĩthĩwa Yeova nũtwʼĩte we mwene kũmũtwʼĩkĩthya andũ make. 23 A vakwa, ndyamba kũsũanĩa kũmũvĩtĩsya Yeova kwa kũeka kũvoya kwondũ wenyu, na nĩendeea kũmũmanyĩsya nzĩanĩ ĩla nzeo na yaĩlĩte. 24 Ĩndĩ kĩai Yeova, na mũthũkũmei mwĩ aĩkĩĩku* na ngoo yenyu yonthe, nũndũ sisyai maũndũ manene ala wĩkĩte kwondũ wenyu. 25 Ĩndĩ mwaendeea kwĩka kĩla kĩthũku mũte kwĩwʼa nthoni, mũkatutwa vyũ, inywʼĩ na mũsumbĩ wenyu.”

13 Saũlo aĩ na myaka . . .* yĩla wambĩĩie kũsumbĩka, na asumbĩkie Isilaeli myaka ĩlĩ. 2 Saũlo nĩwanyuvie aũme 3,000 ma Isilaeli; aũme 2,000 katĩ wa asu maĩ na Saũlo kũu Mikimasi na kĩsionĩ kĩ iĩma kya Mbetheli na aũme 1,000 maĩ na Yonathani kũu Ngivea ya Mbenyamini. Nĩwaekie andũ ala angĩ mathi, kĩla ũmwe ĩeemanĩ yake. 3 Nĩvo ĩndĩ Yonathani wakũnie kambi ya asikalĩ ya Avilisiti ĩla yaĩ Ngeva, na Avilisiti meewʼa ũndũ ũsu. Na Saũlo eeĩaa ũvya ũvuvwe nthĩ ĩsu yonthe, ayasya: “Aevelania nĩmewʼe!” 4 Aisilaeli onthe nĩmeewie ũvoo ũũ: “Saũlo nĩwakũna kambi ya asikalĩ ya Avilisiti, na yu Aisilaeli nĩmatwʼĩkĩte mũuke mũthũku katĩ wa Avilisiti.” Kwoou andũ nĩmeetiwe maatĩĩe Saũlo kũu Ngilikali.

5 O namo Avilisiti nĩmoombanie vamwe mokite na Aisilaeli, maĩ na makasya ma kaũ 30,000 na atwai ma mbalasi 6,000 na ita sya asikalĩ mbingĩ mũno ta kĩthangathĩ kĩla kĩthĩawa ũtee wa ũkanga; na nĩmambatie na mamba kambi kũu Mikimasi ngalĩko ya wumĩlonĩ wa sua ya Mbethi-aveni. 6 Na aũme ma Isilaeli moona kana maĩ thĩnanĩ, nũndũ nĩmavinyĩĩtwe mũno; kwoou andũ meevitha ngunganĩ, maimanĩ, mavianĩ me ngũka, tũsũmbanĩ twĩ ungu wa nthĩ, na ithimanĩ. 7 O na Aevelania amwe nĩmaingie Yolotani malika nthĩ ya Ngati na Ngileati. Ĩndĩ Saũlo aĩ o Ngilikali, na andũ onthe ala mamũatĩĩe nĩmatetemaa. 8 Nĩwaendeeie kweteela mĩthenya mũonza nginya ĩvinda yĩla Samũeli watwʼĩte,* ĩndĩ Samũeli ndaaũka Ngilikali, na andũ nĩmaendeeie kũnyaĩĩka maumĩte vala ve Saũlo. 9 Mũthya, Saũlo aisye atĩĩ: “Etei vaa nthembo ya kũvĩvwʼa na nthembo sya ngwatanĩo.” Na aumya nthembo ya kũvĩvwʼa.

10 Ĩndĩ amina kumya nthembo ĩsu ya kũvĩvwʼa oou, Samũeli avika. Kwoou Saũlo athi akomane nake na aimũathima. 11 Nĩvo ĩndĩ Samũeli wamwĩie: “Weeka ata yu?” Nake Saũlo amũsũngĩa: “Nonie andũ mambĩĩa kũndia, na ndũnoka ĩvindanĩ yĩla yĩtwʼĩtwe, na Avilisiti meĩendeee kũmbana vamwe kũu Mikimasi. 12 Kwoou neetavya, ‘Yu Avilisiti nĩmeũtheea moke kũmbũkita kũũ Ngilikali, na ndinesa kũmantha ũtethyo* wa Yeova.’ Kwoou neewʼa naĩlĩte kumya nthembo ya kũvĩvwʼa.”

13 Nĩvo ĩndĩ Samũeli weeie Saũlo atĩĩ: “Weeka ta mũndũ mũtumanu. Ndũnewʼa mwĩao ũla Yeova Ngai waku ũnakũnengie. Keka nĩweeka ũu, Yeova ethĩwa alũlũmĩĩlya ũsumbĩ waku ĩũlũ wa Isilaeli tene na tene. 14 Ĩndĩ yu ũsumbĩ waku ndũkekala. Yeova akamantha mũndũ wĩtĩkĩlĩkĩte ngoonĩ yake, na Yeova akamũtwʼĩkĩthya mũtongoi ĩũlũ wa andũ make, nũndũ ndũnewʼa mwĩao wa Yeova.”

15 Nĩvo ĩndĩ Samũeli wookĩlile na ambata auma Ngilikali athi Ngivea ya Mbenyamini, na Saũlo atala andũ; ala mataamũtia maĩ ta aũme 600. 16 Saũlo, mwana wake Yonathani, na andũ ala mataamatia mekalaa Ngeva ya Mbenyamini, namo Avilisiti mambĩte kambi Mikimasi. 17 Na ikundi sya kũvithũkĩa nĩsyaumaa kambinĩ ya Avilisiti syĩ ikosi itatũ. Kĩkosi kĩmwe kyaendaa na nzĩa ĩla ĩendete Ovala na nthĩ ya Suali; 18 kĩkosi kĩngĩ kyaendaa na nzĩa ĩla ĩendete Mbethi-oloni; na kĩkosi kya katatũ kyaendaa na nzĩa ĩla ĩendete mũvakanĩ ũla ũsianĩtye na mwanda wa Nzevoimu, kyelekele weũnĩ.

19 Yu nthĩ yonthe ya Isilaeli kũyaĩ na mũtui wa syũma, nĩkwĩthĩwa Avilisiti maĩtye: “Nĩ kana Aevelania maikaseũvye ũvyũ kana ĩtumo.” 20 Na Aisilaeli onthe malasimĩkaa kũtheea kũla kwĩ Avilisiti nĩ kana manoewe mĩlaũ yoo, maembe moo, mathoka moo, kana tũvyũ twoo twĩ ngoto. 21 Mũndũ aĩvaa vimu ĩmwe* nĩ kana anoewe mĩlaũ, maembe, syĩndũ syĩ na maeo atatũ, mathoka, na aiseũvĩwʼa mũsenge. 22 Na mũthenyanĩ wa kaũ, vayaĩ ũvyũ kana ĩtumo yaakwatĩkana kwʼokonĩ kwa mũndũ o na wĩva katĩ wa andũ ala maĩ na Saũlo na Yonathani; no Saũlo na mwana wake Yonathani maĩ na mĩio ya kaũ.

23 Yu kambi ya asikalĩ ma* Avilisiti yaĩ ĩnathi vandũ va kũkĩlĩla kũu Mikimasi.

14 Mũthenya ũmwe, Yonathani mwana wa Saũlo eeie mũthũkũmi ũla wamũkuĩaa mĩio yake ya kaũ atĩĩ: “Ũka tũinge tũthi kĩsesenĩ kya Avilisiti kĩla kĩ ngalĩko ĩla ĩngĩ.” Ĩndĩ ndaatavya ĩthe wake. 2 Saũlo ekalaa vakuvĩ na mũvaka wa Ngivea ungu wa mũtĩ wa makũngũmanga kũu Mikiloni, na aĩ vamwe na aũme ta 600. 3 (Na Aiya mwana wa Aituvu, mwana-a-ĩthe wa Ikavotu, mwana wa Vineasi, mwana wa Eli, mũthembi wa Yeova kũu Silo, nĩwe wakuaa evoti.) Na andũ mayeesĩ kana Yonathani aĩ aendie. 4 Yu katĩkatĩ wa kũndũ kũla Yonathani watataa kũingĩla nĩ kana avike kĩsesenĩ kya Avilisiti vaĩ na ĩvia yĩmwe yĩ ngũka yailye ĩeo ngalĩko ĩmwe na ĩvia yĩ ngũka yailye ĩeo ngalĩko ĩla ĩngĩ; yĩmwe yeetawa Mbosesi, na yĩla yĩngĩ yeetawa Sene. 5 Ĩvia yĩmwe yĩ ngũka yaĩ kĩtuĩ ngalĩkonĩ ya ĩũlũ yĩsyaĩtye Mikimasi, na yĩla yĩngĩ ngalĩkonĩ ya ĩtheo yĩsyaĩtye Ngeva.

6 Kwoou Yonathani eea ũla wamũkuĩaa mĩio yake ya kaũ atĩĩ: “Ũka tũinge tũthi kĩsesenĩ kya aũme aa mate aĩke. Noĩthwa Yeova atũtetheesya, nũndũ vai kĩndũ kĩtonya kũmũsiĩĩa Yeova kũtangĩĩa atũmĩĩte andũ aingĩ kana atũmĩĩte andũ anini.” 7 Nĩvo ĩndĩ ũla wamũkuĩaa mĩio yake ya kaũ wamwĩie: “Ĩka ũndũ o na wĩva ũla ngoo yaku ĩkũkwĩkĩa vinya wĩke. Thi vala ũkwenda, na nĩngũkũatĩĩa vandũ o na va vala ngoo yaku ĩkũkwĩkĩa vinya ũthi.” 8 Na ĩndĩ Yonathani asya: “Twĩinga tũthi kũla kwĩ aũme asu na tũyĩyonanyʼa kũla maĩ. 9 Matwĩa, ‘Ũngamai vau nginya tũke kũla mũĩ!’ twĩũngama vala tũĩ na tũiambata kũla maĩ. 10 Ĩndĩ matwĩa, ‘Ambatai mũke!’ nĩtũkwambata, nũndũ Yeova nũkũmanengane kwʼokonĩ kwitũ. Ũsu nĩwʼo ũkwĩthĩwa wonanyʼo kwitũ.”

11 Nĩvo ĩndĩ me elĩ meeyonanisye kĩsesenĩ kya Avilisiti. Avilisiti maisye atĩĩ: “Sisyai! Aevelania makwetye kuma maimanĩ vala matwĩe mevithĩte.” 12 Kwoou aũme ma kĩsese kĩu meeie Yonathani na ũla wamũkuĩaa mĩio yake ya kaũ: “Ambatai kũũ tũĩ, na nĩtũũmwonyʼa!” Yonathani ate kwananga ĩvinda eeie ũla wamũkuĩaa mĩio yake ya kaũ atĩĩ: “Mbatĩĩe, nũndũ Yeova nũkũmanengane kwʼokonĩ kwa Isilaeli.” 13 Na Yonathani alĩsa na moko na maaũ, na ũla wamũkuĩaa mĩio yake ya kaũ amũatĩĩa; na Yonathani ambĩĩa kũvithũkĩa Avilisiti, nake ũla wamũkuĩaa mĩio yake ya kaũ amũatĩĩa amoaĩte. 14 Yĩla Yonathani na ũla wamũkuĩaa mĩio yake ya kaũ mamavithũkĩie ya mbee, makũnie mooaa aũme ta 20 mũũndanĩ wĩ na ũasa ta wa nusu eka ũtonya kũĩmwa na mũlaũ.*

15 Nĩvo ĩndĩ wia mwingĩ wanyaĩĩkie andũnĩ ala maĩ kambinĩ ĩla yaĩ mũũndanĩ na katĩ wa andũ onthe ala maĩ kĩsesenĩ kĩu, na o na ikundi ila sya kũvithũkĩa syakwatwa nĩ wia. Nthĩ nĩyambĩĩie kũthingitha, na kweethĩwa na wia mwingĩ kuma kwa Ngai. 16 Asungi ma Saũlo ala maĩ Ngivea ya Mbenyamini nĩmoonie kana kĩthokoanyʼo kĩu kyaendeee kũnyaĩĩka ngalĩko syonthe.

17 Saũlo eeie andũ ala maĩ vamwe nake atĩĩ: “Mwa talai andũ, mwone nũũ ũtũtiie.” Yĩla matalile andũ, nĩmamanyie kana Yonathani na ũla wamũkuĩaa mĩio yake ya kaũ mayaĩ vo. 18 Nĩvo ĩndĩ Saũlo weeie Aiya atĩĩ: “Thengeesya Ĩsandũkũ ya Ngai ũla wa w’o!” (Nĩkwĩthĩwa Ĩsandũkũ ya Ngai ũla wa w’o yaĩ na Aisilaeli ĩvindanĩ yĩu.*) 19 Na Saũlo aendeee kũneena na mũthembi, kĩthokoanyʼo kambinĩ ya Avilisiti kyaendeee kwongeleka mũno. Nĩvo ĩndĩ Saũlo weeie mũthembi atĩĩ: “Eka ũndũ ũkwĩka.”* 20 Kwoou Saũlo na andũ onthe ala maĩ nake nĩmoombanie na mathi kaũnĩ, vala meethĩie kana Avilisiti maĩ manambĩĩa kũaana mo ene na mbyũ, na kũvũavũana kwaĩ kwingĩ mũno. 21 O na ĩngĩ, Aevelania ala vau mbeenĩ makwataa mbau Avilisiti na ala mambatanĩtye namo kambinĩ maendeee kũkĩlanĩlya kũla kwĩ Aisilaeli ala matongoewʼe nĩ Saũlo na Yonathani. 22 Aũme onthe Aisilaeli ala meevithĩte kĩsionĩ kĩ iĩma kya Evilaimu nĩmeewie kana Avilisiti maĩ manasemba makakĩa, na nũndũ wa ũu, o namo nĩmalikile kaũnĩ na mamasembanyʼa. 23 Kwoou Yeova nĩwatangĩĩie Aisilaeli mũthenya ũsu, na kaũ wanyaĩĩka nginya Mbethi-aveni.

24 Ĩndĩ mũthenya ũsu aũme ma Isilaeli maĩ avinyĩĩe mũno, nũndũ Saũlo nĩwaavĩthĩtye andũ aimea atĩĩ: “Nĩ mũumanĩe mũndũ ũla ũkũya lĩu* o na ũmwe ĩtavikĩte ĩ ya wĩoo na ndambĩte kwĩyĩĩvanĩsya amaitha makwa!” Kwoou vai mũndũ waaya lĩu o na ũmwe mũthenya ũsu.

25 Na andũ onthe* malika kĩthekanĩ, na kũu kwaĩ ũkĩ wa nzũkĩ wetĩkangĩte nthĩ. 26 Yĩla andũ mavikie kĩthekanĩ, nĩmoonie ũkĩ ũyĩtĩka, ĩndĩ vai mũndũ waatata kwĩkĩa kwʼoko kwake kanywʼanĩ wake aũsame, nũndũ nĩmakĩaa ũla wĩvĩto. 27 Ĩndĩ Yonathani ndeewʼĩte ĩthe ayĩavĩthya andũ, kwoou nĩwatambũũkisye mũthya wa ndata ĩla wakwete na atina mawa ma ũkĩ. Yĩla waumisye kwʼoko kwake vau na aya ũkĩ ũsu, metho make nĩmakenie. 28 Nũndũ wa ũu, mũndũ ũmwe katĩ wa andũ aisye atĩĩ: “Ĩthe waku nĩwavĩthisye andũ kwa ũito, aimea, ‘Nĩ mũumanĩe mũndũ ũla ũkũya lĩu ũmũnthĩ!’ Nĩkyo kĩtumi andũ manoete mũno wĩana ũu.” 29 O na ũu wĩ o vo, Yonathani aisye atĩĩ: “Ĩthe wakwa nũetete thĩna mũnene nthĩ ĩno. Sisyai ũndũ metho makwa makenete nĩkwĩthĩwa nĩnasama kalũkĩ kaa kanini ka nzũkĩ. 30 Wĩthĩwa wĩ ũndũ ũseũvĩte ata keka ũmũnthĩ andũ nĩmaĩe mũtavo ũla mavenie amaitha moo mateũsiĩĩwa! Nĩvo ĩndĩ Avilisiti aingĩ mũno vyũ methĩwa moaiwe.”

31 Mũthenya ũsu nĩmaendeeie kũaa Avilisiti kuma Mikimasi nginya Aiyaloni, na andũ manoa mũno. 32 Kwoou andũ mambĩĩa kũsembea mũtavo me na ĩtomo, na moosa malondu na ngʼombe na tũsaũ na maithĩnzĩa vau nthĩ, na maĩsanĩsya nyama na nthakame. 33 Nĩvo ĩndĩ Saũlo wataviwʼe atĩĩ: “Sisya! Andũ maendeee kũmũvĩtĩsya Yeova nũndũ meĩsanĩsya nyama na nthakame.” Nake Saũlo asya atĩĩ: “Mweeka ta andũ mate na mũĩkĩĩo. Vingilityai ĩvia ĩnene mũyĩete vala nĩĩ mĩtũkĩ.” 34 Na ĩndĩ Saũlo asya atĩĩ: “Endai kwʼonthe kũla kwĩ andũ na mũimea, ‘Kĩla ũmwe wenyu no nginya aete nzaũ yake na ĩlondu yake na aithĩnzĩa vaa na ĩndĩ mũyĩiya. Mũikamũvĩtĩsye Yeova kwa kũĩsanĩsya nyama na nthakame.’” Kwoou ũtukũ ũsu kĩla ũmwe woo aete nzaũ yake na amĩthĩnzĩa vau. 35 Na Saũlo aakĩa Yeova kĩthembeo. Kĩĩ nĩkyo kĩthembeo kya mbee kĩla waakĩie Yeova.

36 Ĩtina, Saũlo aisye atĩĩ: “Ekai tũtheee tũatĩĩe Avilisiti ũtukũ na tũimavena syĩndũ syoo nginya kũkye. Tũieka o na ũmwe woo avonoke.” Namo mamwĩa atĩĩ: “Ĩka ũndũ o na wĩva ũkwona wĩ ũseo methonĩ maku.” Nĩvo ĩndĩ mũthembi waisye: “Ekai tũmũthengeee Ngai ũla wa w’o vandũnĩ vaa.” 37 Na Saũlo akũlya Ngai: “Nĩnaĩlĩte kũtheea nĩatĩĩe Avilisiti? Nũũmanengane kwʼokonĩ kwa Isilaeli?” Ĩndĩ Ngai ndaamũsũngĩa mũthenya ũsu. 38 Kwoou Saũlo asya: “Ũkai vaa, inywʼĩ anene onthe ma andũ, mũmanthe nĩ naĩ yĩva yĩkiwe ũmũnthĩ. 39 Nũndũ vate nzika, o tondũ Yeova wĩ thayũ, ũla ũvonoketye Aisilaeli, o na tweethĩa nĩ mwana wakwa Yonathani, no nginya akwʼe.” Ĩndĩ vai mũndũ o na ũmwe waamũsũngĩa. 40 Nĩvo ĩndĩ weeie Aisilaeli onthe atĩĩ: “Mwĩĩthĩwa ngalĩko ĩmwe, nakwa na mwana wakwa Yonathani tũyĩthĩwa ngalĩko ĩla ĩngĩ.” Na andũ meea Saũlo: “Ĩka kĩndũ o na kĩva ũkwona kĩ kĩseo methonĩ maku.”

41 Na ĩndĩ Saũlo eea Yeova atĩĩ: “Ame Ngai wa Isilaeli, sũngĩa na Thumimu!” Nĩvo ĩndĩ Yonathani na Saũlo manyuviwe, na andũ maekwa mathi. 42 Yu Saũlo aisye: “Kũnai kula mũtwʼe katĩkatĩ wakwa na mwana wakwa Yonathani.” Na Yonathani anyuvwa. 43 Na ĩndĩ Saũlo akũlya Yonathani atĩĩ: “Ndavye, wĩkie ata?” Kwoou Yonathani amwĩa: “Nzamie o kalũkĩ kanini ka nzũkĩ na mũthya wa ndata ĩno ngwete. Yu nĩ vaa! Nĩnĩyũmbanĩtye kũkwʼa!”

44 Nũndũ wa ũu, Saũlo asya: “Kwoou Ngai nandetee ũkũno mũnene na ayĩka ũu o na mbeange ethĩwa we Yonathani ndwĩkwʼa.” 45 Ĩndĩ andũ meea Saũlo atĩĩ: “Yonathani, ũla ũeteie Aisilaeli ũsindi* ũũ ũnenevete ũu, nĩwaĩle kũkwʼa? Nĩ ũndũ ũtasũanĩĩka! Vate nzika, o tondũ Yeova wĩ thayũ, vai ũswʼĩĩ o na ũmwe wa mũtwe wake waĩlĩte kũvalũka nthĩ, nũndũ Ngai nĩwe ũmũtetheeisye kwĩanĩsya ũndũ ũsu ũmũnthĩ.” Kwoou andũ mamũvonokya* Yonathani, na ndaakwʼa.

46 Nũndũ wa ũu, Saũlo aeka kũatĩĩa Avilisiti, namo Avilisiti mathi kĩsionĩ kyoo.

47 Saũlo nĩwalũlũmĩĩilye ũsumbĩ wake ĩũlũ wa Isilaeli na okita na amaitha make onthe ngalĩko syonthe, okita na Amoavi, Aamimoni, Aetomu, asumbĩ ma Nzova, na Avilisiti; na kĩla vandũ waendaa nĩwamasindaa. 48 Na okita na ũkũmbaũ na asinda Aamaleki na atangĩĩa Aisilaeli kuma kwʼokonĩ kwa ala matavaa syĩndũ syoo.

49 Ana ma Saũlo maĩ Yonathani, Isivi, na Maliki-sua. Na aĩ na eĩtu elĩ; ũla mũkũũ eetawa Melavu, na ũla mũnini eetawa Mikali. 50 Mũka wa Saũlo eetawa Ainoamu mwĩĩtu wa Aimaasi. Mũnene wa ita syake eetawa Avineli mwana wa Neli, mwendwʼa-ĩthe wa Saũlo. 51 Kisi nĩwe waĩ ĩthe wa Saũlo, na Neli ĩthe wa Avineli aĩ mwana wa Avieli.

52 Mĩthenyanĩ yonthe ya Saũlo, kweethĩawa kaũ mũvyũ katĩ wake na Avilisiti. Yĩla Saũlo woona mũndũ o na wĩva wĩ vinya na wĩ ũkũmbaũ, nĩwamũlikasya ũthũkũminĩ wake.

15 Na ĩndĩ Samũeli asya: “Yeova andũmie ngwĩtĩkĩsye mauta wĩthĩwe mũsumbĩ wa andũ make Aisilaeli; yu ĩthukĩĩsye ũndũ Yeova ũkwasya. 2 Ũũ nĩwʼo Yeova wa nguthu ũkwasya: ‘Nĩngũtuma Aamaleki masũngĩa nũndũ wa kĩla meekie Aisilaeli yĩla mamavĩngie me nzĩanĩ maumĩte Misili. 3 Yu thi, na ũikũna Aamaleki, na ũimananga vyũ vamwe na kyonthe kĩla me nakyo. Ndũkaeke o na ũmwe ekale thayũ;* waĩlĩte kũmoaa, mũndũũme o vamwe na mũndũ mũka, kana o vamwe na kaũkenge, nzaũ o vamwe na ĩlondu, ngamĩle o vamwe na ĩngʼoi.’” 4 Saũlo nĩweetie andũ na amatalĩla kũu Telaimu: Maĩ asikalĩ 200,000 maendete na maaũ na aũme 10,000 ma Yuta.

5 Saũlo nĩwaendie nginya ndũanĩ ya Amaleki na we na aũme make mooveesya vakuvĩ na mwanda.* 6 Nĩvo ĩndĩ Saũlo weeie Akeni atĩĩ: “Endai, mume katĩ wa Aamaleki, nĩ kana ndikamũtutanĩsye namo. Nũndũ nĩmwoonisye andũ onthe ma Isilaeli wendo ũtathelaa ĩvindanĩ yĩla maumĩte Misili.” Kwoou Akeni mauma katĩ wa Aamaleki. 7 Ĩtina wa ũu, Saũlo nĩwooaie Aamaleki kuma Aavila nginya Suli, ĩla yĩ vakuvĩ na Misili. 8 Nĩwakwatie Akaki mũsumbĩ wa Amaleki e thayũ, ĩndĩ andũ ala angĩ onthe amananga vyũ na ũvyũ. 9 O na ũu wĩ o vo, Saũlo na andũ ala waĩ namo mayaaũaa Akaki* na malondu ala maseo vyũ na mbũi, ngʼombe, nyamũ ila syaĩthĩtw’e ikanoa, ndũũme, na kyonthe kĩla kyaĩ kĩseo. Mayendaa kũsyananga vyũ. Ĩndĩ syĩndũ syonthe ila ite vala syĩĩ na ite na vata, nĩmasyanangie vyũ.

10 Nĩvo ĩndĩ ndeto ya Yeova yookĩie Samũeli, na eewa atĩĩ: 11 “Nĩngwĩlila* nĩkwĩthĩwa nĩnatwʼĩkĩthisye Saũlo mũsumbĩ, nũndũ nũekete kũmbatĩĩa na ndaneanĩsya ndeto syakwa.” Samũeli nĩwathatie mũno, na amũĩĩa Yeova ũtukũ wʼonthe. 12 Yĩla Samũeli waamũkie kwakya tene nĩ kana akomane na Saũlo, Samũeli eeiwe atĩĩ: “Saũlo nũendie Kalimeli, na eeyĩũngamĩsya kĩtuĩ kya ũlilikanyʼo kũu. Na ĩndĩ avĩndũka na atheea Ngilikali.” 13 Mũthya, yĩla Samũeli wavikie vala waĩ, Saũlo amwĩie atĩĩ: “Yeova nakũathime. Nĩnĩanĩisye ndeto ya Yeova.” 14 Ĩndĩ Samũeli amũkũlya: “Na yu nĩ wasya wĩva ũsu ngwĩwʼa wa malondu na mbũi na wa ngʼombe?” 15 Nake Saũlo asya: “Ietiwe kuma kwa Aamaleki, nũndũ andũ mainoaa* malondu ala maseo vyũ na mbũi na indo nĩ kana mamũthembee Yeova Ngai waku; ĩndĩ kĩla kĩtialile nĩtwanangie vyũ.” 16 Nĩvo ĩndĩ Samũeli weeie Saũlo: “Vindya! Eka ngũtavye kĩla Yeova ũndavisye ũtukũ wa ĩyoo.” Kwoou amwĩa: “Neena!”

17 Samũeli aendeeie kũmwĩa atĩĩ: “We ndweeyonaa ũte wa vata yĩla wanyuviwe wĩthĩwe mũtongoi wa mbaĩ sya Isilaeli na yĩla Yeova wakwĩtĩkĩisye mauta wĩthĩwe mũsumbĩ wa Isilaeli? 18 Ĩtina, Yeova nĩwakũtũmie na akwĩa, ‘Enda, ũkanange Aamaleki vyũ nũndũ wa naĩ ĩla mekĩte. Ũkita namo nginya ũmamine vyũ.’ 19 Kwoou nĩkĩ ũnaleile kwĩthukĩĩsya wasya wa Yeova? Vandũ va ũu, ũnasembeie mũtavo na ĩtomo na weeka kĩla kĩthũku methonĩ ma Yeova!”

20 O na ũu wĩ o vo, Saũlo eeie Samũeli atĩĩ: “Ĩndĩ nĩnĩnethukĩĩisye wasya wa Yeova! Nĩnĩnaendie kũla Yeova ũnandũmĩte, na naete Akaki mũsumbĩ wa Amaleki, na naananga Aamaleki vyũ. 21 Ĩndĩ andũ moosa malondu na ngʼombe kuma mũtavonĩ, syĩndũ ila nzeo vyũ katĩ wa ila inaĩlĩte kwanangwa vyũ, nĩ kana mamũthembee Yeova Ngai waku kũu Ngilikali.”

22 Nĩvo ĩndĩ Samũeli waisye: “We Yeova nũtanĩthawʼa mũno nĩ nthembo sya kũvĩvwʼa na nthembo ingĩ kwĩ kwĩthukĩĩsya wasya wa Yeova? Sisya! Kwĩwʼa nĩ kũseo kwĩ nthembo, na kwĩthukĩĩsya nesa kwĩ mathunya ma ndũũme; 23 nĩkwĩthĩwa ũlei no ũndũ ũmwe na naĩ ya kwaũsya, na kwĩka maũndũ na mĩtũlyo no ũndũ ũmwe na kũtũmĩa mavinya ma syama sya ũwe na kũthaitha mĩvwʼanano.* Nũndũ nũleete ndeto ya Yeova, nake nĩwakũlea ndũkethĩwe mũsumbĩ.”

24 Na ĩndĩ Saũlo eea Samũeli: “Nĩnĩvĩtĩtye, nũndũ nĩnĩnaleile kwĩanĩsya mwĩao wa Yeova na ndeto syaku, nĩkwĩthĩwa nĩnĩnakĩie andũ na neethukĩĩsya kĩla manawetie. 25 Na yu, mwa, ndekee naĩ yakwa, na ũisyokanyʼa nakwa nĩ kana ngakumanĩe Yeova.” 26 Ĩndĩ Samũeli atavya Saũlo atĩĩ: “Ndisyokanyʼa naku, nũndũ nũleete ndeto ya Yeova, na Yeova nĩwakũlea ndũkaendeee kwĩthĩwa wĩ mũsumbĩ ĩũlũ wa Isilaeli.” 27 Samũeli ayĩthyũaa athi, Saũlo nĩwakwatie mũtũlo wa ĩkoti yake yĩte moko, ĩndĩ yatembũka. 28 Nũndũ wa ũu, Samũeli amwĩie atĩĩ: “Yeova nĩwatembũa ũsumbĩ wa Isilaeli kuma kwaku* ũmũnthĩ, na akaũnenga mũndũ ũngĩ mũseo kwĩ uwe. 29 O na ĩngĩ, Mũtaĩwa wa Isilaeli ndakaneena ũvũngũ kana avĩndũe woni wake,* nũndũ we ti mũndũ ũndũ ũtonya kũvĩndũa woni wake.”*

30 Nĩvo ĩndĩ waisye: “Nĩmbĩtĩtye. Ĩndĩ mwa nenga ndaĩa, mbee wa atumĩa ma andũ makwa na mbee wa Aisilaeli. Syokanyʼa nakwa, na nĩngũkumanĩa Yeova Ngai waku.” 31 Kwoou Samũeli asyoka aumĩte Saũlo ĩtina, na Saũlo amũkumanĩa Yeova. 32 Na Samũeli asya: “Thengeesyai Akaki mũsumbĩ wa Amaleki vala nĩĩ.” Nĩvo ĩndĩ Akaki waendie vala ve Samũeli ate kwenda,* nĩkwĩthĩwa Akaki eetavasya: ‘Vate nzika, wia* wa kĩkwʼũ nĩ mũvĩtu.’ 33 O na vailye ũu, Samũeli aisye: “O tondũ ũvyũ waku ũtumĩte aka makwʼĩĩwa nĩ syana, nowʼo inyia waku ũkũkwʼĩĩwa vyũ katĩ wa aka.” Ĩtina wa ũu, Samũeli nĩwatilangile Akaki ilungu mbee wa Yeova kũu Ngilikali.

34 Na ĩndĩ Samũeli athi Lama, na Saũlo ambata nyũmbanĩ yake kũu Ngivea ya Saũlo. 35 Samũeli ndaasyoka kũmwona Saũlo ĩngĩ nginya mũthenya ũla wakwie, nũndũ Samũeli nĩwambĩĩie kũmũmetea Saũlo. Na Yeova nĩweelilile kwĩthĩwa amũtwʼĩkĩthisye Saũlo mũsumbĩ wa Isilaeli.

16 Mũthya, Yeova eeie Samũeli atĩĩ: “Wĩendeea kũmetea Saũlo nginya ĩndĩĩ nũndũ nĩnĩmũleete ndakethĩwe mũsumbĩ ĩũlũ wa Isilaeli? Usũsya ũvya waku mauta na ũithi. Nĩngũũtũma kwa Yese, ũla Mũmbethileemu, nĩkwĩthĩwa nĩnĩnyuvĩe ũmwe wa ana make ethĩwe mũsumbĩ.” 2 Ĩndĩ Samũeli amwĩa atĩĩ: “Ndonya kũthi ata? Yĩla Saũlo ũkwĩwʼa ĩũlũ wa ũndũ ũsu, nũkũmbũaa.” Nake Yeova amũsũngĩa amwĩa: “Osa moi* ũthi nayo na ũyasya, ‘Nooka kumĩsya Yeova nthembo.’ 3 Mũthokye Yese nthembonĩ ĩsu; na ĩndĩ nĩngũũmanyĩthya kĩla waĩlĩte kwĩka. No nginya wĩtĩkĩsye mauta kwondũ wakwa ũla ngũnyuva.”

4 Samũeli nĩweekie maũndũ ala Yeova wamũtavisye. Yĩla wavikie Mbethileemu, atumĩa ma ndũa ĩsu nĩmatetemaa makomana nake, na maasya: “Wooka na mũuo?” 5 Nũndũ wa ũu, ameie: “Nooka na mũuo. Nooka kũthembea Yeova. Ĩthesyei, na mũyũka tũthi nthembonĩ.” Nĩvo ĩndĩ watheisye Yese na ana make, na ĩtina wa ũu ameta mathi nthembonĩ ĩsu. 6 Mokĩte nĩwoonie Eliavu, na asya: “Vate nzika, mwĩtĩkĩwʼa mauta wa Yeova nũũ ũũngamĩte mbee wake.” 7 Ĩndĩ Yeova eeie Samũeli atĩĩ: “Ndũkasisye wũmbo wake na ũndũ ũasavĩte, nĩkwĩthĩwa nĩnĩmũleete. Nũndũ ũndũ mũndũ wonaa tiwʼo Ngai wonaa, nĩkwĩthĩwa mũndũ onaa wũmbo wa nza, ĩndĩ Yeova onaa kĩla kĩ ngoonĩ.” 8 Nĩvo ĩndĩ Yese weetie Avinatavu na amũvĩtĩlya mbee wa Samũeli, ĩndĩ Samũeli asya: “Yeova ndanyuvĩte ũũ o nake.” 9 Ĩtina wa ũu, Yese nĩwaetie Samuma, ĩndĩ Samũeli asya: “Yeova ndanyuvĩte ũũ o nake.” 10 Kwoou Yese nĩwavĩtĩilye ana make mũonza mbee wa Samũeli, ĩndĩ Samũeli eea Yese: “Yeova ndanyuvĩte o na ũmwe katĩ wa aa.”

11 Mũthya, Samũeli akũlilye Yese atĩĩ: “Ii nĩsyo imwana syaku syonthe?” Nake amũsũngĩa amwĩa: “Ve ũmwe ũtialĩte, ũla mũnini; eĩthya malondu.” Nĩvo ĩndĩ Samũeli weeie Yese atĩĩ: “Mũtũmane, nĩkwĩthĩwa tũyĩĩkala nthĩ tũye atavikĩte vaa.” 12 Kwoou nĩwamũtũmanie na aetwe. Yu aĩ mũtune, aĩ na metho manake, na aĩ mũmbe nesa. Nĩvo ĩndĩ Yeova waisye atĩĩ: “Ũkĩla, mwĩtĩkĩsye mauta, nũndũ ũũ nĩwe!” 13 Kwoou Samũeli nĩwoosie ũvya wa mauta na amwĩtĩkĩsya mbee wa ana-a-ĩthe. Na veva wa Yeova wambĩĩa kwĩkĩa Ndaviti vinya kuma mũthenya ũsu na kũendeea. Ĩtina, Samũeli nĩwookĩlile na athi Lama.

14 Yu veva wa Yeova nĩwatiĩte Saũlo, na veva mũthũku kuma kwa Yeova nĩwamũthĩnasya. 15 Athũkũmi ma Saũlo mamwĩie atĩĩ: “Nĩwene kana veva mũthũku kuma kwa Ngai ũendeee kũũthĩnyʼa. 16 Mwa mwĩai witũ, ĩaĩe athũkũmi maku aa me mbee waku maũmanthĩe mũndũũme wĩ na ũtũĩka wa kũkũna mũio wa wathi wĩ na ndii 12.* Ĩvinda o na yĩva yĩla veva mũthũku wa Ngai wooka ĩũlũ waku, akakũnaa mũio ũsu, na ũyĩwʼa kavaa.” 17 Kwoou Saũlo eea athũkũmi make atĩĩ: “Mwa manthĩei mũndũũme wĩsĩ kũũkũna nesa, na mũimũete vaa.”

18 Ũmwe wa athũkũmi make aisye atĩĩ: “Sisyai! Nĩnonete ũndũ mwana wa Yese ũla Mũmbethileemu ũkũnaa mũio ũsu na ũtũĩka, e ũkũmbaũ, na vinya. Nũneenaa nesa, nĩ mũmbe nesa, na Yeova e vamwe nake.” 19 Nĩvo ĩndĩ Saũlo watũmie atũmwa kwa Yese na mamwĩa atĩĩ: “Nenganĩe mwana waku Ndaviti, ũla ũkũĩthya malondu.” 20 Kwoou Yese nĩwoosie mĩkate, sũva wa kĩthuma wĩ na mbinyu, na katena ka mbũi, na ailĩĩla syĩndũ isu ĩngʼoinĩ na ĩndĩ ainenga mwana wake Ndaviti atwaĩe Saũlo. 21 Ndaviti nĩwookie kwa Saũlo na ambĩĩa kũmũthũkũma. Saũlo nĩwamwendie mũno, na atwʼĩka mũndũ wa kũmũkuĩa mĩio yake ya kaũ. 22 Nũndũ wa ũu, Saũlo nĩwatũmanie Yese akatavwʼe atĩĩ: “Mwa eka Ndaviti aendeee kũnthũkũma, nũndũ nĩwonete ũseo methonĩ makwa.” 23 Ĩvinda o na yĩva yĩla veva mũthũku kuma kwa Ngai wookĩa Saũlo, Ndaviti nĩwoosaa mũio wa wathi wĩ na ndii 12* na ayĩũkũna, na Saũlo nĩwauasya na ayĩwʼa kavaa, na veva ũsu mũthũku nĩwaumaa nthĩnĩ wake.

17 Na Avilisiti moombanyʼa ita* syoo kwondũ wa kaũ. Moombanĩie Soko, ĩla ya Yuta, na mamba kambi katĩkatĩ wa Soko na Aseka, kũu Evesi-ndamimu. 2 Saũlo na aũme ma Isilaeli nĩmoombanie na mamba kambi Mwandanĩ* wa Ela, na meevanga kwondũ wa kaũ nĩ kana makokite na Avilisiti. 3 Avilisiti maĩ ngalĩko ĩmwe ya kĩĩma, namo Aisilaeli maĩ ngalĩko ĩla ĩngĩ ya kĩĩma, mwanda wĩ katĩkatĩ woo.

4 Na ĩndĩ ngũmbaũ ĩmwe ya kaũ yauma kambinĩ sya Avilisiti; yeetawa Ngoliathi, kuma Ngathi, na ũasa wake waĩ mĩkono thanthatũ na ĩkwata yĩmwe.* 5 Eekĩĩte ngovia ya ũthuku, na akekĩa ĩkoti ya kyũma yĩ na makwaũ mailĩanĩlwʼe. Ũito wa ĩkoti yĩu ya ũthuku waĩ sekeli 5,000.* 6 Eekĩĩte syĩndũ sya ũthuku maaũnĩ make nĩ kana amasũvĩe na akakolelya mũsenge wa ũthuku katĩkatĩ wa ituo syake. 7 Mũtĩ wa ĩtumo yake wailye ta mũamba wa atumi, na mũthya wa kyũma wa ĩtumo yake waĩ na ũito wa sekeli 600;* na ũla wamũkuĩe ngao aendete mbee wake. 8 Na ĩndĩ aũngama na eeta ikosi sya kaũ sya Isilaeli na asyĩa atĩĩ: “Nĩkĩ mwooka nĩ kana mwĩvange kwondũ wa kaũ? Yo nyie ndi Mũvilisiti, nenyu mũi athũkũmi ma Saũlo? Ĩnyuvĩei mũndũũme, na natheee tũkite. 9 Ethĩwa nũkũvota kũkita nakwa na aimbũaa, nĩvo ĩndĩ tũũtwʼĩka athũkũmi menyu. Ĩndĩ ethĩwa nĩngũmũsinda na ndimũaa, mwĩtwʼĩka athũkũmi maitũ na mũitũthũkũmaa.” 10 Na ĩndĩ Mũvilisiti ũsu asya: “Nĩngũvũthĩĩsya* ikosi sya kaũ sya Aisilaeli ũmũnthĩ. Nengei mũndũũme, nũkite nake!”

11 Yĩla Saũlo na Aisilaeli onthe meewie ndeto sya Mũvilisiti ũsu, nĩmatelemile na malikwa nĩ wia mwingĩ.

12 Yu Ndaviti aĩ mwana wa Mũevilatha waumĩte Mbethileemu ya Yuta weetawa Yese, ũla waĩ na ana nyanya na ũla mĩthenyanĩ ya Saũlo waĩ mũtumĩa mũkũũ. 13 Ana ala atatũ akũũ ma Yese nĩmamũatĩĩĩte Saũlo kaũnĩ. Ana asu make atatũ ala maendete kaũnĩ maĩ Eliavu ũla mũkũũ, wa kelĩ Avinatavu, na wa katatũ Samuma. 14 Ndaviti nĩwe waĩ mwana ũla mũnini, na ana atatũ ala akũũ nĩmamũatĩĩĩte Saũlo.

15 Ndaviti aendaa kwa Saũlo na aisyoka mũsyĩ nĩ kana akasũvĩe malondu ma ĩthe wake kũu Mbethileemu. 16 Ĩvindanĩ o yĩu, kwa mĩthenya 40 Mũvilisiti ũsu nĩwamathengeeaa na ayĩũngama mbee woo kelĩ kwa mũthenya, kwakya tene na ĩ ya wĩoo, nĩ kana amavũthĩĩsye.

17 Nĩvo ĩndĩ Yese weeie mwanae Ndaviti atĩĩ: “Mwa osa eva ĩĩ ĩmwe* ya lĩu wa mbaa ngetha mũkaange na mĩkate ĩĩ ĩkũmi, na ũyĩkalaata ũitwaĩe ana-a-inyia maku kambinĩ. 18 Na osa ilungu ii ĩkũmi sya ĩia* ũtwaĩe mũnene wa ngili; o na ĩngĩ, waĩlĩte kũsisya ũndũ ana-a-inyia maku maendeee na ũimbetee wonanyʼo wa kana maendeee nesa.” 19 Maĩ vamwe na Saũlo na aũme ala angĩ onthe ma Isilaeli Mwandanĩ* wa Ela, mayũkita na Avilisiti.

20 Kwoou Ndaviti nĩwaamũkie kwakya tene na atia mũndũ ũngĩ asũvĩe malondu; na ĩndĩ nĩwoombanisye syĩndũ isu na athi o tondũ Yese wamwĩaĩe. Yĩla wavikie kambinĩ, ita sya kaũ syaumaalũkĩte iendete kĩwanzanĩ kya kaũ, syũkĩlĩtye wasya wa kaũ. 21 Aisilaeli na Avilisiti nĩmeevangie kwondũ wa kaũ weethĩa kĩkosi kĩmwe kya kaũ kĩsyaĩtye kĩkosi kĩla kĩngĩ kya kaũ. 22 Vau kwa vau, Ndaviti nĩwatiie mĩio yake vala ve mũsũvĩi wa mĩio na asemba kĩwanzanĩ kya kaũ. Yĩla wavikie, nĩwambĩĩie kũkũlĩĩlya ũndũ ana-a-inyia make maendeee.

23 Na aendeee kũneena namo, ĩla ngũmbaũ ya kaũ yeetawa Ngoliathi, ũla Mũvilisiti kuma Ngathi, nĩwookie. Aumie ikosinĩ sya kaũ sya Avilisiti na aneena ndeto o ila waneenete mbeenĩ, na Ndaviti amwĩwʼa. 24 Yĩla aũme onthe ma Isilaeli moonie mũndũ ũsu, nĩmasembie mamũkĩa, me atelemu mũno. 25 Aũme ma Isilaeli maasya atĩĩ: “Nĩmwene mũndũũme ũũ umaalũkĩte? Okĩte kũvũthĩĩsya* Isilaeli. Mũsumbĩ akanenga mũndũ ũla ũkamũaa ũthwii mwingĩ, akamũnenga mwĩĩtu wake, na akathasya nyũmba ya ĩthe wake ĩeke kũthũkũma wĩa o na wĩva andũ maĩle kũtethya kwondũ wa mũsumbĩ wa Isilaeli.”

26 Ndaviti ambĩĩie kũkũlya aũme ala maũngye vakuvĩ nake atĩĩ: “Mũndũũme ũla ũkũaa Mũvilisiti ũya na aivetangĩa Isilaeli kĩvũthya akanengwa kyaũ? Nũndũ Mũvilisiti ũũ ũte mwaĩke nũũ nĩ kana avũthĩĩsye* ikosi sya kaũ sya Ngai ũla wĩ thayũ?” 27 Na ĩndĩ andũ mamũtavya o kĩla mawetete mbeenĩ: “Kĩĩ nĩkyo mũndũ ũla ũkũmũaa ũkũnengwa.” 28 Yĩla mwana-a-inyia ũla mũkũũ Eliavu wamwĩthĩie aineena na aũme asu, nĩwathatĩie Ndaviti mũno na amwĩa: “Ũtheeie kũũ kĩ? Na ũtiie malondu mavũthũ ala me weũnĩ naũ? Nĩnĩsĩ nesa mĩtũlyo yaku na ieleelo nthũku sya ngoo yaku; ũtheeie wũke o kwona kaũ.” 29 Nũndũ wa ũu, Ndaviti aisye: “Yu neeka ata? No ĩkũlyo ngũkũlasya!” 30 Kwoou eethyũũa amũtia na athi vala ve mũndũ ũngĩ, na amũkũlya o ĩkũlyo yĩla wakũlĩtye mbeenĩ, na andũ mamũsũngĩa o ũndũ wasũngĩĩtwe vau mbeenĩ.

31 Ndeto ila Ndaviti waneenie nĩsyeewʼĩkie na syatavwʼa Saũlo. Kwoou amũtũmana. 32 Ndaviti eeie Saũlo atĩĩ: “Mũndũ o na wĩva ndakakwʼe ngoo* nũndũ wake. Mũthũkũmi waku nũkũthi na ayũkita na Mũvilisiti ũũ.” 33 Ĩndĩ Saũlo eea Ndaviti atĩĩ: “Ndũtonya kũthi kũkita na Mũvilisiti ũsu, nũndũ wĩ o kamwana, na ethĩĩtwe e mũsikalĩ* kuma e wa mũika.” 34 Nĩvo ĩndĩ Ndaviti weeie Saũlo: “Mũthũkũmi waku nĩwatwʼĩkie mũĩthi wa malondu ma ĩthe wake, na mũnyambũ wooka, o na nduva, na kĩla ĩmwe yakua ĩlondu kuma malondunĩ asu. 35 Nĩnamĩatĩĩie na namĩkũna na navonokya ĩlondu yĩu kuma kanywʼanĩ wayo. Yĩla yambũkĩlĩle, nĩnamĩkwatie kĩngʼee* na namĩkũna namyũaa. 36 Mũthũkũmi waku nĩwooaie mũnyambũ na nduva, na Mũvilisiti ũũ ũte mwaĩke eĩkala o ta ĩmwe ya nyamũ isu, nũndũ nĩwavũthĩĩsya* ikosi sya kaũ sya Ngai ũla wĩ thayũ.” 37 Na ĩndĩ Ndaviti ongela kwasya: “Yeova, ũla wambonokisye kuma mbwaanĩ sya mũnyambũ na nduva, nĩwe ũkũmbonokya kuma kwʼokonĩ kwa Mũvilisiti ũũ.” Nĩvo ĩndĩ Saũlo weeie Ndaviti: “Enda, na Yeova nĩethĩwe vamwe naku.”

38 Ĩtina wa ũu, Saũlo nĩweekĩie Ndaviti ngũa syake. Amwĩkĩie ngovia ya ũthuku, na asyoka amwĩkĩa ĩkoti ya kyũma. 39 Na ĩndĩ Ndaviti oveea ũvyũ wake ĩũlũ wa ngũa syake na atata kũthi, ĩndĩ ndaĩ atonya, nũndũ ndaimanyĩĩte. Ndaviti eeie Saũlo atĩĩ: “Nditonya kũthi nĩkĩĩte syĩndũ ii, nũndũ ndiimanyĩĩte.” Na kwoou Ndaviti asyumya. 40 Nĩvo ĩndĩ woosie ndata yake na anyuva mavia atano matendeu kuma kalũsĩnĩ* na amekĩa kakusunĩ ka mũvuko wake wa ndĩthya, na nĩwakwete kĩkũtha kyake. Na ĩndĩ ambĩĩa kũthengeea Mũvilisiti ũsu.

41 Mũvilisiti ũsu nĩwaendeeie kũthengeea Ndaviti, na ũla wamũkuĩaa ngao yake aĩ mbee wake. 42 Yĩla Mũvilisiti ũsu wasyaisye na oona Ndaviti, nĩwamũthekeeie na kĩvũthya nũndũ aĩ o kamwana katune na kombe nesa. 43 Kwoou Mũvilisiti ũsu eea Ndaviti atĩĩ: “Nyie nĩ ngitĩ, nĩ kana ũmbũkĩe na ndata?” Na ĩndĩ Mũvilisiti ũsu aumanĩa Ndaviti na ngai syake. 44 Mũvilisiti ũsu eeie Ndaviti atĩĩ: “Endeea o kũka vala nĩĩ, na nĩngũnenga nyũnyi sya matunĩ na nyamũ sya kĩthekanĩ nyama yaku.”

45 Ndaviti asũngĩie Mũvilisiti ũsu ũũ: “Ũmbũkĩe na ũvyũ na ĩtumo na mũsenge, ĩndĩ nyie nĩkũkĩe ĩsyĩtwanĩ ya Yeova wa nguthu, Ngai wa ikosi sya kaũ sya Isilaeli, ũla wavũthĩĩsya.* 46 Ũmũnthĩ ũũ Yeova nũkũũnengane kwʼokonĩ kwakwa, na nĩngũkũaa na nditila mũtwe waku; na ũmũnthĩ nĩngũnenga nyũnyi sya matunĩ na nyamũ sya kĩthekanĩ sya nthĩ simba sya kambi ya Avilisiti; na andũ onthe ma nthĩ nĩmeũmanya kana Isilaeli ve Ngai. 47 Na onthe ala mombanĩte vaa nĩmeũmanya* kana Yeova ndatangĩĩaa na ũvyũ kana na ĩtumo, nĩkwĩthĩwa kaũ nĩ wa Yeova, na nũkũmũnengane inywʼonthe kwʼokonĩ kwitũ.”

48 Nĩvo ĩndĩ Mũvilisiti ũsu wookĩlile na ambĩĩa kũtambya nĩ kana akomane na Ndaviti, ĩndĩ Ndaviti asemba na mĩtũkĩ elekele kĩwanzanĩ kya kaũ nĩ kana akomane na Mũvilisiti ũsu. 49 Na Ndaviti alikya kwʼoko kwake mũvukonĩ wake na oosa ĩvia kuma vau na ayĩkya na kĩkũtha. Nĩwakimie Mũvilisiti ũsu kĩtulyanĩ, na ĩvia yĩu yalika nthĩnĩ kĩtulyanĩ kyake na avalũka nthĩ na ũthyũ. 50 Kwoou Ndaviti nĩwasindie Mũvilisiti ũsu atũmĩĩte kĩkũtha na ĩvia; o na kau Ndaviti ndakwete ũvyũ, nĩwakũnie Mũvilisiti ũsu na amũaa. 51 Ndaviti nĩwaendeeie kũsemba na aũngama ĩũlũ wake. Na ĩndĩ oosa ũvyũ wa Mũvilisiti ũsu na awumya ndoonĩ yawʼo na aĩkĩĩthya kana nĩwakwʼa kwa kũtila mũtwe wake nawʼo. Yĩla Avilisiti moonie kana ngũmbaũ yoo nĩyakwʼa, nĩmasembie makĩa.

52 Nĩvo ĩndĩ aũme ma Isilaeli na ma Yuta mookĩlile na mambĩĩa kũkĩlya wasya na masembanyʼa Avilisiti kuma mwandanĩ nginya mĩvĩanĩ ya Ekiloni, na Avilisiti ala mooaiwe mavalũkangĩte kũu ũtee wa nzĩa kuma Saalaimu, nginya Ngathi na Ekiloni. 53 Yĩla Aisilaeli masyokie ĩtina wa kũsembanyʼa Avilisiti, nĩmatavie syĩndũ ila syaĩ kambinĩ syoo.

54 Na ĩndĩ Ndaviti oosa mũtwe wa Mũvilisiti ũsu na aũtwaa Yelusalemu, ĩndĩ nĩwaiie mĩio ya kaũ ya Mũvilisiti ũsu ĩeemanĩ yake.

55 Ĩvinda yĩla Saũlo woonie Ndaviti aendete kũkomana na Mũvilisiti ũsu, akũlilye Avineli, mũnene wa ita atĩĩ: “Avineli, ko kamwana kaa nĩ kaũ? Nake Avineli amũsũngĩa: “Vate nzika, o tondũ wĩ thayũ,* we mũsumbĩ, nyie ndyĩsĩ!” 56 Mũsumbĩ aisye atĩĩ: “Kũlĩĩlya ũmanye kamwana kau nĩ mwana waũ.” 57 Kwoou Ndaviti asyoka oou aumĩte kũaa Mũvilisiti ũsu, Avineli nĩwamwosie na amũtwaa mbee wa Saũlo akuĩte mũtwe wa Mũvilisiti ũsu na kwʼoko. 58 Na ĩndĩ Saũlo amũkũlya atĩĩ: “Kamwana, wĩ mwana waũ?” Nake Ndaviti amũsũngĩa: “Nĩ mwana wa mũthũkũmi waku Yese ũla Mũmbethileemu.”

18 Ndaviti na Saũlo mamina kũneena oou, Yonathani na Ndaviti nĩmatwʼĩkie anyanya ma vakuvĩ mũno,* na Yonathani ambĩĩa kũmwenda o ũndũ weeyendete mwene.* 2 Kuma mũthenya ũsu, Saũlo nĩwoosie Ndaviti atwʼĩke mũthũkũmi wake, na ndaamwĩtĩkĩlya asyoke mũsyĩ kwa ĩthe wake. 3 Na Yonathani na Ndaviti nĩmatianĩie ũtianĩo, nũndũ amwendete o ũndũ weeyendete.* 4 Yonathani nĩwaumisye ĩkoti yĩte moko yĩla weekĩĩte na ayĩnenga Ndaviti, vamwe na ngũa yake ya kaũ, ũvyũ wake, ũta wake, na mũsivi wake. 5 Ndaviti nĩwambĩĩie kumaalũka na nĩwaaĩlaa* kĩla vandũ Saũlo wamũtũma. Kwoou Saũlo nĩwamũnyuvie aũngamĩe aũme ala mokitaa, na kĩu nĩkyendeeisye andũ onthe na athũkũmi ma Saũlo.

6 Yĩla Ndaviti na ala angĩ masyoka maumĩte kũaa Avilisiti, aka nĩmaumaalũkaa kuma ndũanĩ syonthe sya Isilaeli mainĩte na masũngĩte makomane Mũsumbĩ Saũlo me na ndambulĩnĩ, me atanu, na me na mĩio ya kũinga yĩ na ndii itatũ. 7 Aka ala matanĩaa ũndũ ũsu mainaa:

8 Saũlo nĩwathatie mũno, na wathi ũsu ndwaamwendeesya, nũndũ aisye: “Manenga Ndaviti makũmi ma makili, ĩndĩ nyie manenga makili. No ũsumbĩ matialya kũmũnenga!” 9 Kuma mũthenya ũsu na kũendeea, Saũlo nĩwaekie kũĩkĩĩa Ndaviti.

10 Mũthenya ũla waatĩĩe, veva mũthũku kuma kwa Ngai nĩwamũkwatie Saũlo, na ambĩĩa kwĩka maũndũ masaanĩtye* e nyũmba nthĩnĩ, Ndaviti aendeee kũkũna wathi na mũio wa wathi wĩ na ndii 12* o ta mavindanĩ ala angĩ. Ĩvindanĩ yĩu, Saũlo akwete ĩtumo na kwʼoko kwake, 11 na ekya ĩtumo yĩu, etavĩtye atĩĩ: ‘Nĩtonyanĩsya Ndaviti na ũkũta!’ Ĩndĩ Ndaviti asemba mavinda elĩ amũkĩa. 12 Nĩvo ĩndĩ Saũlo wamũkĩie Ndaviti nĩkwĩthĩwa Yeova aĩ vamwe nake ĩndĩ nĩwamũtiĩte Saũlo. 13 Kwoou Saũlo nĩwamũvetangie mbee wake na amũtwʼĩkĩthya mũnene wa ngili, na Ndaviti nĩwe watongoeasya ita sya kaũ iendete kaũnĩ.* 14 Ndaviti nĩwaendeeie kwaĩla maũndũnĩ onthe ala weekaa,* na Yeova aĩ vamwe nake. 15 Na yĩla Saũlo woonie kana maũndũ make nĩmaaĩlaa mũno, nĩwambĩĩie kũmũkĩa. 16 Ĩndĩ Aisilaeli onthe na andũ ma Yuta nĩmamwendete Ndaviti, nũndũ nĩwamatongoeasya kaũnĩ.

17 Ĩtina, Saũlo eeie Ndaviti atĩĩ: “Vaa ve mwĩĩtu wakwa ũla mũkũũ, Melavu. Nĩngũũnenga we ethĩwe kĩveti kyaku. O na ũu wĩ o vo, waĩlĩte kũendeea kũnthũkũma na ũkũmbaũ na ũyũkita makaũ ma Yeova.” Nũndũ Saũlo eetavisye: ‘Kwʼoko kwakwa kũikamũae. Eka kwʼoko kwa Avilisiti kũmũae.’ 18 Nake Ndaviti eea Saũlo atĩĩ: “Nyie nĩ ũũ na andũ ma mũsyĩ wakwa nĩ aaũ, mũsyĩ wa ĩthe wakwa nthĩnĩ wa Isilaeli, nĩ kana nyie nĩtwʼĩke mũthoni wa mũsumbĩ?” 19 O na ũu wĩ o vo, yĩla ĩvinda yavikie nĩ kana Saũlo anenge Ndaviti mwĩĩtu wake, Melavu, aĩ anengiwe Atilieli , ũla waĩ Mũmeola, ethĩwe kĩveti kyake.

20 Yu mwĩĩtu wa Saũlo, Mikali, nĩwendete Ndaviti, na Saũlo nĩwataviwʼe ũndũ ũsu, na wamwendeesya. 21 Kwoou Saũlo asya: “Nĩngũmũnenga we ethĩwe kĩtei kwake, nĩ kana kwʼoko kwa Avilisiti kũmũae.” Na ĩndĩ Saũlo eea Ndaviti ĩvinda ya kelĩ atĩĩ: “Ũmũnthĩ nũkwĩwʼana nakwa nĩ kana ũtwae mwĩĩtu wakwa.”* 22 Kwongela ũu, Saũlo eeaĩe athũkũmi make atĩĩ: “Neenai na Ndaviti kĩmbithĩnĩ na mũyasya, ‘Sisya! Mũsumbĩ nũkwendete, na athũkũmi make onthe nĩmakwendete. Kwoou yu ĩwʼana na mũsumbĩ nĩ kana ũtwae mwĩĩtu wake.’” 23 Yĩla athũkũmi ma Saũlo matavisye Ndaviti maũndũ asu, Ndaviti aisye: “Inywʼĩ mwĩona wĩ ũndũ mũnini kwakwa kwĩwʼana na mũsumbĩ nĩ kana nĩtwae mwĩĩtu wake na nyie nĩ mũndũ ngya na ũtanengetwe ndaĩa mũno?” 24 Nĩvo ĩndĩ athũkũmi ma Saũlo masyokie mamwĩa atĩĩ: “Ii nĩsyo ndeto ila Ndaviti waneena.”

25 Nĩvo ĩndĩ Saũlo waisye: “Ũũ nĩwʼo mwaĩlĩte kũtavya Ndaviti, ‘Mũsumbĩ ndekwenda ngasya o na ĩmwe eka ikonde* 100 sya Avilisiti, nĩ kana aĩvanĩsye amaitha ma mũsumbĩ.’” Nĩkwĩthĩwa Saũlo asamaa nĩ kana Ndaviti oawe nĩ Avilisiti. 26 Kwoou athũkũmi make matavya Ndaviti ndeto isu, na Ndaviti endeewʼa nĩ kwĩwʼana na mũsumbĩ nĩ kana atwae mwĩĩtu wake. Ĩvinda yĩla yavangĩĩwe yĩtavikĩte, 27 Ndaviti nĩwaendie e na aũme make na mooaa aũme 200 ma Avilisiti, na Ndaviti aetee mũsumbĩ ikonde syoo syonthe, nĩ kana ewʼane na mũsumbĩ atwae mwĩĩtu wake. Kwoou, Saũlo amũnenga mwĩĩtu wake Mikali ethĩwe kĩveti kyake. 28 Saũlo nĩwamanyie kana Yeova aĩ vamwe na Ndaviti na kana mwĩĩtu wake Mikali nĩwamwendete. 29 Kĩu nĩkyatumie Saũlo akĩa Ndaviti ĩ ya mũno, na Saũlo atwʼĩka mũmaitha wa Ndaviti thayũnĩ wake wʼonthe.

30 Anene me mbee ũsumbĩnĩ wa Avilisiti nĩmaendaa kaũnĩ, ĩndĩ o ũndũ maumaalũkaa mũno wĩana, nowʼo Ndaviti waaĩlaa mũno* kũvĩtũka athũkũmi onthe ma Saũlo; na ĩsyĩtwa yake nĩyanengetwe ndaĩa mũno.

19 Ĩtina, Saũlo nĩwaneenie na Yonathani mwana wake na athũkũmi make onthe ĩũlũ wa kũaa Ndaviti. 2 Nũndũ Yonathani mwana wa Saũlo nĩwendete Ndaviti mũno, eeie Ndaviti atĩĩ: “Ĩthe wakwa Saũlo eenda ũkũaa. Mwa ĩkala wĩtũĩĩe kwakya, na ũithi vandũ va kĩmbithĩ na ũyĩvitha vau. 3 Ngaumaalũka na ndyũngama ũtee wa ĩthe wakwa kĩthekanĩ vala ũkethĩwa. Nganeena na ĩthe wakwa ĩũlũ waku, na namanya kĩndũ, ndikalea kũũtavya.”

4 Kwoou Yonathani atavya ĩthe wake Saũlo maũndũ maseo ĩũlũ wa Ndaviti. Amwĩie atĩĩ: “Mũsumbĩ ndaĩlĩte kũvĩtĩsya mũthũkũmi wake Ndaviti, nũndũ we ndaũvĩtĩsye na maũndũ ala ũkwĩkĩte nĩmakũtethetye. 5 Nĩwalikilye thayũ wake mũisyonĩ* nĩ kana oae ũla Mũvilisiti, na Yeova aetee Aisilaeli onthe ũsindi* mũnene. We nĩwoonie ũndũ ũsu, na watana mũno. Kwoou nĩkĩ ũkwenda kũaa Ndaviti na ũyĩtĩkya nthakame ya mũndũ ũte na ĩvĩtyo? Weeka ũu wĩĩthĩwa weeka naĩ. Ndekĩte ũndũ o na ũmwe mũthũku.” 6 Saũlo nĩweethukĩĩisye Yonathani, na Saũlo eevĩta ayasya: “Vate nzika, o tondũ Yeova wĩ thayũ, ndeũawa.” 7 Ĩtina wa ũu, Yonathani nĩweetie Ndaviti na amũtavya maũndũ asu onthe. Kwoou Yonathani aete Ndaviti vala ve Saũlo, na aendeea kũmũthũkũma o ta tene.

8 Ĩtina wa ĩvinda, kaũ nĩwaumĩlile ĩngĩ, na Ndaviti aumaala athi kũkita na Avilisiti na ooaa Avilisiti aingĩ mũno, namo masemba mamũkĩa.

9 Na veva mũthũku kuma kwa Yeova wooka ĩũlũ wa Saũlo ailye nthĩ nyũmbanĩ kwake akwete ĩtumo, o Ndaviti aendeee kũkũna wathi na mũio wa wathi wĩ na ndii 12.* 10 Saũlo nĩwekisye ĩtumo ayenda kũtonyanĩsya Ndaviti na ũkũta, ĩndĩ Ndaviti aathũkĩa Saũlo, na ĩtumo yĩu yatonya ũkũta. Ũtukũ ũsu Ndaviti nĩwakĩie na asemba athi. 11 O tũendeangĩe, Saũlo nĩwatũmie atũmwa nyũmbanĩ ya Ndaviti nĩ kana makamĩsunge na maimũaa kwakya, ĩndĩ Mikali mũka wa Ndaviti amwĩie atĩĩ: “Ũtukũ ũũ waema kũsemba ũthi,* ũnĩ ũkeethĩwa wĩ mũkwʼũ.” 12 Mikali ate kwananga ĩvinda nĩwatheeleilye Ndaviti ndĩlĩsyanĩ, nĩ kana atonye kũsemba athi. 13 Mikali nĩwoosie mũvwʼanano wa telavimu* na awia kĩtandanĩ, na aia neti ya wʼĩa wa mbũi vala Ndaviti wakomasya mũtwe, na avwʼĩka syĩndũ isu syonthe na ngũa.

14 Nĩvo ĩndĩ Saũlo watũmie atũmwa makamũete Ndaviti, ĩndĩ Mikali asya: “Nĩ mũwau.” 15 Kwoou Saũlo atũma atũmwa makamũsisye Ndaviti na amea atĩĩ: “Mũetei vala nĩĩ e o kĩtandanĩ kyake nĩ kana tũmũae.” 16 Yĩla atũmwa asu malikile, meethĩie ũla mũvwʼanano wa telavimu* kĩtandanĩ na neti ya wʼĩa wa mbũi vala Ndaviti wakomasya mũtwe wake. 17 Saũlo akũlilye Mikali atĩĩ: “Nĩkĩ ũngengie ũu na waeka mũmaitha wakwa athi nĩ kana evonokye?” Nake Mikali amũsũngĩa Saũlo: “We mwene ambĩie, ‘Eka nĩthi, na waema kwĩka ũu nĩngũkũaa!’”

18 Yu Ndaviti aĩ anasemba akathi, na avika vala ve Samũeli kũu Lama. Nĩwamũtavisye maũndũ onthe ala Saũlo wamwĩkĩte. Na ĩndĩ we na Samũeli mathi, na mekala kũu Naiothi. 19 Ĩtina wa ĩvinda, Saũlo eeiwe atĩĩ: “Sisya! Ndaviti e Naiothi kũu Lama.” 20 Vau kwa vau, Saũlo nĩwatũmie atũmwa makamũkwate Ndaviti. Yĩla moonie athani akũũ mayathana na Samũeli aũngye amatongoesye, veva wa Ngai nĩwookie ĩũlũ wa atũmwa ma Saũlo, na o namo mambĩĩa kwĩka ta athani.

21 Yĩla matavisye Saũlo ũu, nĩwatũmie atũmwa angĩ ate kwananga ĩvinda, na o namo mambĩĩa kwĩka ta athani. Kwoou Saũlo asyoka atũma atũmwa angĩ, kĩkundi kya katatũ, na o namo mambĩĩa kwĩka ta athani. 22 Mũthya, o nake Saũlo nĩwaendie Lama. Yĩla wavikie kĩthimanĩ kĩnene kĩla kĩ Seku, akũlilye: “Samũeli na Ndaviti maĩ va?” Namo mamũsũngĩa: “Me Naiothi kũu Lama.” 23 Saulo e nzĩanĩ aumĩte vau athi Naiothi kũu Lama, veva wa Ngai nĩwamũkĩie o nake, na athi ekĩte o ta mwathani nginya avika Naiothi kũu Lama. 24 O nake nĩwaumisye ngũa syake, na ambĩĩa kwĩka o ta mwathani mbee wa Samũeli, na akoma vau e mũthei* mũthenya ũsu wʼonthe na ũtukũ ũsu wʼonthe. Nĩkyo kĩtumi maasya: “Saũlo o nake ko ũmwe wa athani?”

20 Na ĩndĩ Ndaviti asemba auma Naiothi kũu Lama. O na ũu wĩ o vo, nĩwookie vala ve Yonathani na amwĩa atĩĩ: “Nĩkĩte ata? Ĩvĩtyo yakwa nĩ yĩva, na nĩkĩte ĩthe waku ata nĩ kana amanthe kũmbũaa?”* 2 Nĩvo ĩndĩ Yonathani wamwĩie atĩĩ: “Ũsu nĩ ũndũ ũtasũanĩĩka! Ndwĩkwʼa. Sisya! Ĩthe wakwa ndakeka ũndũ o na ũmwe, mũnene kana mũnini, atandavĩtye. Ĩthe wakwa atonya kũmbitha ũndũ ũũ nĩkĩ? Ũu ndũkethĩwa.” 3 Ĩndĩ Ndaviti ongela kwĩyĩava ayasya: “Ĩthe waku nĩwĩsĩ nesa kana nĩnonete ũseo methonĩ maku na akasya, ‘Mũikaeke Yonathani amanye ũndũ ũũ nĩ kana ndakewʼe woo.’ Ĩndĩ vate nzika, o tondũ Yeova wĩ thayũ, na vate nzika, o tondũ we wĩ thayũ, no ĩtambya yĩmwe yĩ katĩ wakwa na kĩkwʼũ!”

4 Nĩvo ĩndĩ Yonathani weeie Ndaviti atĩĩ: “Nĩngũkwĩka ũndũ o na wĩva ũla ũũweta.”* 5 Ndaviti eeie Yonathani atĩĩ: “Ũnĩ nĩ mboka ya kũtisa kwa mwei, na vate nzika, nĩendeka twĩkale nthĩ na mũsumbĩ tũĩsanĩe; no nginya ũeke nĩthi, na nĩngwĩvitha kĩthekanĩ nginya mũthenya wa katatũ ĩ ya wĩoo. 6 Ĩthe waku aema kũmbona, mwĩe, ‘Ndaviti nũnamboyie mwanya athi na mĩtũkĩ ndũanĩ yake ya Mbethileemu, nĩkwĩthĩwa kwĩ na nthembo ya kĩla mwaka kũu kwondũ wa mũsyĩ woo wʼonthe.’ 7 Ethĩwa akasũngĩa, ‘Ũu nũseo,’ nĩvo mũthũkũmi waku ũkethĩwa na mũuo. Ĩndĩ ethĩwa akathata, vate nzika ũkamanya atwʼĩte kũmbũmĩsya. 8 Onyʼa mũthũkũmi waku wendo ũtathelaa, nĩkwĩthĩwa nĩwalikya mũthũkũmi waku ũtianĩonĩ ũla watianĩie na Yeova. Ĩndĩ ethĩwa nĩ na ĩvĩtyo, mbũae ne uwe. Ve vata mwaũ wa kũnengane kũla kwĩ ĩthe waku?”

9 Yonathani eewʼa ũu aisye: “Nĩ ũndũ ũtasũanĩĩka kũweta ũu ĩũlũ waku! Ngamanya ĩthe wakwa atwʼĩte kũkũũmĩsya, no nĩeme kũũtavya?” 10 Nĩvo ĩndĩ Ndaviti wakũlilye Yonathani atĩĩ: “Nũũ ũla ũkandavya ethĩwa ĩthe waku akaũsũngĩa e mũkalĩ?” 11 Yonathani eeie Ndaviti: “Ũka, tũthi nza wa ndũa.” Kwoou elĩ maumaala na mathi nza wa ndũa. 12 Na Yonathani eea Ndaviti atĩĩ: “Eka Yeova Ngai wa Isilaeli ethĩwe ngũsĩ kana nganeena na ĩthe wakwa ũnĩ saa o ta ii kana mũthenyanĩ wa katatũ nĩmanye kĩla ũkũsũanĩa. Ethĩwa akaneena maũndũ maseo ĩũlũ wa Ndaviti, yo ndikatũmana ũtavwʼe ũndũ ũsu? 13 Ĩndĩ ethĩwa ĩthe wakwa avangĩte kũkũũmĩsya, Yeova naetee Yonathani ũkũno mũnene na ayĩka ũu o na mbeange ethĩwa ndikaũtavya na ndieka ũthi na mũuo. Yeova nĩethĩwe vamwe naku, o tondũ waĩ vamwe na ĩthe wakwa. 14 Yo ndwĩmbonyʼa wendo ũtathelaa wa Yeova yĩla nĩ thayũ o na ũyĩka oou yĩla ngakwʼa? 15 Ndũkaaĩse kũeka kwonyʼa nyũmba yakwa wendo ũtathelaa, o na yĩla Yeova ũkatuta amaitha onthe ma Ndaviti kuma ĩũlũ wa nthĩ.” 16 Kwoou Yonathani atianĩa ũtianĩo na nyũmba ya Ndaviti, ayasya, “Yeova akatuma amaitha ma Ndaviti masũngĩa na aimasilĩla.” 17 Kwoou Yonathani nĩwatumie Ndaviti evĩta ĩngĩ na wendo ũla wamwendete nawʼo, nĩkwĩthĩwa amwendete o tondũ weeyendete mwene.*

18 Nĩvo ĩndĩ Yonathani wamwĩie atĩĩ: “Ũnĩ nĩ mboka ya kũtisa kwa mwei, na ĩthe wakwa akaũkosa, nĩkwĩthĩwa kĩvĩla kyaku kĩkeethĩwa kĩ kĩthei. 19 Tũivikĩĩa mũthenya wa katatũ, akaũkosa ĩ ya mũno, na no nginya ũthi vala ũneevithĩte mũthenya ũla ũngĩ* na ũyĩkala vakuvĩ na ĩvia yĩĩ. 20 Na ĩndĩ ngekya maangi atatũ ngalĩko ĩmwe yayo, ta ngũatha kĩndũ. 21 Yĩla ngatũma mũthũkũmi, ngasya, ‘Enda, ũmanthe maangi asu.’ Ethĩwa ngeea mũthũkũmi, ‘Sisya! Maangi me ngalĩko ĩĩ yaku, mose,’ nĩvo ĩndĩ wĩsyoka, nĩkwĩthĩwa vate nzika, o tondũ Yeova wĩ thayũ, ũu nĩkwonanyʼa ve mũuo maũndũnĩ maku onthe na vai mũisyo. 22 Ĩndĩ ethĩwa ngeea kamwana kau, ‘Sisya! Maangi me mbee waku,’ nĩvo ĩndĩ wĩthi, nĩkwĩthĩwa Yeova eenda ũthi. 23 Yeova nĩethĩwe katĩ witũ tene na tene, kwosana na ũtianĩo ũla nyie naku twatianĩa.”

24 Kwoou Ndaviti nĩweevithie nza wa ndũa. Yĩla mboka ya kũtisa kwa mwei yavikie, mũsumbĩ nĩwekalile nthĩ kĩvĩlanĩ kyake aye. 25 Mũsumbĩ ekalĩte kĩvĩlanĩ kyake o vala wekalaa ũtee wa ũkũta. Yonathani asianĩtye nake, nake Avineli ekalĩte ũtee wa Saũlo, ĩndĩ vala Ndaviti wekalaa vayaĩ mũndũ. 26 Mũthenya ũsu Saũlo ndaaweta ũndũ o na ũmwe, nũndũ eetavasya: ‘Ve ũndũ ũmũkwatie watuma ethĩwa e mũvuku. Ĩĩ, no nginya ethĩwe e mũvuku.’ 27 Na mũthenya ũla waatĩĩe mboka ya kũtisa kwa mwei, mũthenyanĩ wa kelĩ, vala Ndaviti wekalaa vaendeeie kwĩthĩwa vate na mũndũ. Nĩvo ĩndĩ Saũlo weeie mwanae Yonathani atĩĩ: “Nĩkĩ mwana wa Yese ũtaneeũka mbokanĩ ĩyoo na ũmũnthĩ?” 28 Yonathani asũngĩie Saũlo atĩĩ: “Ndaviti anambĩsũvie nĩmũnenge mwanya athi Mbethileemu. 29 Anambĩie, ‘Mwa nenge mwanya nĩthi, nũndũ twĩ na nthembo ya mũsyĩ ndũanĩ, na mwana-a-inyia wakwa nũnambĩtie. Kwoou ethĩwa nĩnonete ũseo methonĩ maku, mwa eka nĩthi nĩvithĩte ngone ana-a-inyia makwa.’ Kĩu nĩkyo kĩtumi ũtanoka mesanĩ ya mũsumbĩ.” 30 Nĩvo ĩndĩ Saũlo wamũthatĩie Yonathani mũno, na amwĩa atĩĩ: “We mwana wa mũndũ mũka mũlei, wĩona ta ndesĩ kana ũnyuvĩte kũkwata mbau mwana wa Yese, wĩyĩkĩĩthye nthoni na ũyĩkĩĩthya inyia waku nthoni?* 31 We na ũsumbĩ waku mũikesa kũlũlũmĩĩlwʼa ĩvinda yonthe mwana wa Yese ũkethĩwa e thayũ ĩũlũ wa nthĩ. Kwoou yu tũma mũndũ akamũete vaa nĩĩ, nĩkwĩthĩwa no nginya akwʼe.”*

32 O na ũu wĩ o vo, Yonathani akũlilye ĩthe wake Saũlo atĩĩ: “Eũawa nĩkĩ? Ekĩte ata?” 33 Nĩvo ĩndĩ Saũlo wamwĩkĩisye ĩtumo nĩ kana amũae, kwoou Yonathani amanya kana ĩthe nĩwatwʼĩte kũaa Ndaviti. 34 Vau kwa vau Yonathani nĩwookĩlile auma mesanĩ e mũthatu mũno, na ndaaya lĩu o na ũmwe mũthenyanĩ wa kelĩ ĩtina wa kũtisa kwa mwei, nĩkwĩthĩwa aĩ na kyeva nũndũ wa Ndaviti na nĩkwĩthĩwa ĩthe wake nĩwamwĩkĩĩthĩĩtye nthoni.

35 Kwakya, Yonathani nĩwaendie nza wa ndũa o tondũ matianĩĩte na Ndaviti, na aendanisye na mũthũkũmi wake wa mũika. 36 Na ĩndĩ eea mũthũkũmi wake atĩĩ: “Mwa semba ũkamanthe maangi ala ngwĩkya.” Nake asemba, na Yonathani ekya ĩangi mbee wake. 37 Yĩla mũthũkũmi ũsu wavikie vala Yonathani wekisye ĩangi, Yonathani amwĩtie na wasya mũnene amũkũlya: “Yo ĩangi yĩi mbee waku?” 38 Yonathani eetie mũthũkũmi ũsu wake na wasya amwĩa atĩĩ: “Ĩkalaate! Semba! Ndũkanange ĩvinda! Na mũthũkũmi wa Yonathani oosa maangi asu na asyoka vala ve vwana wake. 39 Mũthũkũmi ũsu ndaaelewa kĩndũ o na kĩva ĩũlũ wa ũndũ ũsu; no Yonathani na Ndaviti me oka meesĩ kĩla woonanasya. 40 Nĩvo ĩndĩ Yonathani wanengie mũthũkũmi wake mĩio yake ya kaũ na amwĩa atĩĩ: “Enda, twaa mĩio ĩsu ndũanĩ.

41 Yĩla mũthũkũmi wake waendie, Ndaviti nĩwookĩlile vala weevithĩte vau vakuvĩ ngalĩko ya ĩtheo. Nĩvo ĩndĩ wavalũkile nthĩ na ũthyũ wake na akumana mavinda atatũ, na mamumunyana na maĩanĩa, ĩndĩ Ndaviti nĩwe waĩie mũno. 42 Yonathani eeie Ndaviti atĩĩ: “Enda na mũuo, nũndũ twĩ elĩ nĩtwĩvĩtie ĩsyĩtwanĩ ya Yeova, tũyasya, ‘Yeova nĩethĩwe katĩkatĩ wakwa naku na katĩkatĩ wa ũsyao waku* na ũsyao wakwa* tene na tene.’”

Na ĩndĩ Ndaviti ookĩla na athi, nake Yonathani asyoka ndũanĩ.

21 Ĩtina, Ndaviti nĩwavikie Novu kwa mũthembi Aimeleki. Yĩla Aimeleki wakomanie na Ndaviti nĩwambĩĩie kũtetema, na ĩndĩ amũkũlya atĩĩ: “Nĩkĩ wĩ weka na ndũnokanyʼa na mũndũ?” 2 Ndaviti asũngĩie mũthembi Aimeleki amwĩa atĩĩ: “Mũsumbĩ ambĩaĩe nĩke ũndũ mũna, ĩndĩ ambĩa, ‘Ndũkaeke mũndũ o na ũmwe amanye ũndũ o na wĩva ĩũlũ wa ũndũ ũla naũtũma ũkeke na ĩũlũ wa maũndũ ala nakwĩaĩa wĩke.’ Kwoou navanga na anake makwa tũkomanĩe vandũ vana. 3 Yu ethĩwa wĩ na mĩkate ĩtano, nenge, kana kĩndũ kĩngĩ o na kĩva kĩla ũtonya kwĩthĩwa nakyo.” 4 Ĩndĩ mũthembi ũsu asũngĩie Ndaviti atĩĩ: “Ndi na mũkate ũngĩ eka o ũla mũtheu, ĩndĩ no nĩũnenge anake asu maye ethĩwa nĩmevathanĩte na aka.”* 5 Ndaviti asũngĩie mũthembi ũsu amwĩa: “Vate nzika, nĩtwĩvathanĩte na aka o tondũ twĩthĩĩtwe tũyĩka mavindanĩ mavĩtu yĩla nathi kaũnĩ. Ethĩwa mĩĩ ya anake aa yĩthĩawa yĩ mĩtheu yĩla tũendete maũndũnĩ ala twĩkaa kĩla ĩvinda, mayaĩlĩte kwĩthĩwa me atheu mũnango ũmũnthĩ!” 6 Kwoou mũthembi amũnenga mĩkate mĩtheu, nĩkwĩthĩwa vayaĩ mũkate ũngĩ eka o mĩkate ya wonanyʼo, ĩla yaĩ ĩnavetangwa mbee wa Yeova na vakaiwa mĩkate ĩngĩ myeũ mũthenya ũsu.

7 Yu mũthũkũmi ũmwe wa Saũlo aĩ vau mũthenya ũsu, ovetwe mbee wa Yeova. Aĩ Mũetomu na eetawa Ndoeki, mũnene wa aĩthi ma Saũlo.

8 Nĩvo ĩndĩ Ndaviti weeie Aimeleki: “Wĩ na ĩtumo kana ũvyũ vaa? Ndinakua ũvyũ wakwa kana mĩio yakwa ya kaũ, nũndũ mũsumbĩ eendaa nĩthi vala ũndũmie na mĩtũkĩ.” 9 Mũthembi ũsu eewʼa ũu aisye: “Ũvyũ wa Ngoliathi ũla Mũvilisiti, ũla wooaĩe Mwandanĩ* wa Ela, wĩ vaa, wovetwe na ngũa ĩtina wa evoti. Ethĩwa nũkwenda kũwosa, wose, nũndũ nowʼo wĩ vaa.” Nake Ndaviti asya: “Vai ũngĩ ũilye tawʼo. Nenge.”

12 Ndaviti nĩweekĩie ndeto isu ngoonĩ, na akĩa Mũsumbĩ Akisi wa Ngathi mũno. 13 Kwoou nĩweetwʼĩkĩthisye nde na kĩlĩko kĩseo mbee woo na ambĩĩa kwĩkanyʼa ta mũndũ wĩ na ndũũka e katĩ woo.* Nĩwasolaa mĩomonĩ ya mũvĩa na nĩwaekie ũta wake wĩtĩke kĩngʼeenĩ kyake. 14 Mũthya, Akisi eeie athũkũmi make atĩĩ: “Mũyene kana mũndũ ũũ e na ndũũka! Mwamũete vaa nĩkĩ? 15 Yo nĩ na vata wa andũ me na ndũũka nĩ kana mũndũ ũũ wĩ na ndũũka oke mbee wakwa? Mũndũ ũũ nĩwaĩlĩte kũlika nyũmbanĩ yakwa?”

22 Kwoou Ndaviti nĩwaumie vau akĩĩa ngunganĩ ya Atulamu. Yĩla ana-a-inyia na mũsyĩ wʼonthe wa ĩthe wake meewie ũu, nĩmatheeie kũla ũĩ. 2 Na onthe ala maĩ na mathĩna na mataĩtwe na mataĩ eanĩe* moombanĩa vala ũĩ, na atwʼĩka mũnene woo. Vaĩ na aũme ta 400 ala maĩ vamwe nake.

3 Ĩtina wa ĩvinda, Ndaviti nĩwaumie vau athi Misive kũu Moavi na eea mũsumbĩ wa Moavi atĩĩ: “Mwa eka ĩthe wakwa na inyia wakwa mekale naku nginya nĩmanye ũndũ Ngai ũkũmbĩka.” 4 Kwoou nĩwamatiie na mũsumbĩ wa Moavi, na mekala nake ĩvinda yonthe yĩla Ndaviti waĩ ngomenĩ.

5 Ĩtina wa ĩvinda, mwathani Ngati eeie Ndaviti atĩĩ: “Ndũkekale ngomenĩ. Uma vau ũthi nthĩ ya Yuta.” Kwoou Ndaviti auma kũu na athi kwĩkala kĩthekanĩ kya Elethi.

6 Saũlo nĩweewie kana Ndaviti na aũme ala maĩ vamwe nake nĩmonekie. Ĩvindanĩ yĩu, Saũlo ailyĩ Ngivea ungu wa mũtĩ wa mweseli ũla wĩ vandũ vatũlu akwete ĩtumo, na athũkũmi make onthe mamũthyũlũlũkĩte. 7 Nĩvo ĩndĩ Saũlo weeie athũkũmi make ala mamũthyũlũlũkĩte atĩĩ: “Mwa, ĩthukĩĩsyei, inywʼĩ Ambenyamini. We mwana wa Yese o nake akamũnenga inywʼonthe mĩũnda na mĩũnda ya mĩsavivũ? We akamũtwʼĩkĩthya inywʼonthe anene ma makili na anene ma maana? 8 Inywʼonthe nĩmũvangĩthĩtye mũvango wa kũmina! Vai ũmwe ũneendavya yĩla mwana wakwa mwene ũnatianĩie ũtianĩo na mwana wa Yese! Vai ũmwe katĩ wenyu ũmbĩwʼĩaa tei na aindavya kana mwana wakwa nĩwĩkĩĩte vinya mũthũkũmi wakwa amboveesye, o tondũ ũendeee kwĩka oyu.”

9 Nĩvo ĩndĩ Ndoeki ũla Mũetomu, ũla waĩ vau aũngamĩe athũkũmi ma Saũlo wasũngĩie, asya: “Nĩnĩnoonie mwana wa Yese ooka Novu kũla kwĩ Aimeleki mwana wa Aituvu. 10 Na amũkũlĩlya ũtao wa Yeova na amũnenga lĩu. O na nũnamũnengie ũvyũ wa Ngoliathi ũla Mũvilisiti.” 11 Vau kwa vau, mũsumbĩ nĩwatũmanie mũthembi Aimeleki mwana wa Aituvu na athembi onthe ma nyũmba ya ĩthe wake, ala maĩ Novu. Kwoou onthe mooka vala ve mũsumbĩ.

12 Nĩvo ĩndĩ Saũlo waisye: “Mwa, ĩthukĩĩsye, we mwana wa Aituvu!” Nake amũsũngĩa: “Ninyioo, mwĩai wakwa.” 13 Na Saũlo amwĩa: “Nĩkĩ mũvangĩthĩtye mũvango wa kũmina, we na mwana wa Yese, kwa kũmũnenga mũkate na ũvyũ na kwa kũmũkũlĩlya ũtao wa Ngai? Nũmbĩngaa na akamboveesya, o tondũ ũendeee kwĩka oyu.” 14 Nĩvo ĩndĩ Aimeleki wasũngĩie mũsumbĩ amwĩa: “Nũũ katĩ wa athũkũmi maku onthe wa kwĩkwatwʼa* ta Ndaviti? We nĩ mũthoni wa mũsumbĩ na mũnene wa asungi maku na nũnengetwe ndaĩa nyũmbanĩ yaku. 15 Yo ũmũnthĩ nĩwʼo mũthenya wa mbee ũla nĩmũkũlĩilye ũtao wa Ngai? Kĩla ũũweta nĩ kĩndũ ndamba kũkĩsũanĩa! Ndũkaeke mũsumbĩ atalĩle mũthũkũmi wake na nyũmba yonthe ya ĩthe wakwa ĩvĩtyo ya ũndũ o na wĩva mũthũku, nũndũ mũthũkũmi waku ndaneesĩ ũndũ o na ũmwe ĩũlũ wa maũndũ aa.”

16 Ĩndĩ mũsumbĩ asya: “Vate nzika, we Aimeleki nũũkwʼa, o vamwe na nyũmba yonthe ya ĩthe waku.” 17 Nĩvo ĩndĩ mũsumbĩ weeie asungi* ala mamũthyũlũlũkĩte atĩĩ: “Vĩndũkai mũae athembi ma Yeova, nũndũ nĩmakwatĩte Ndaviti mbau! Nĩmaneesĩ kana anasembete angĩĩte, na maineendavya!” Ĩndĩ athũkũmi asu ma mũsumbĩ mayendaa kũkĩlya moko moo moae athembi ma Yeova. 18 Na ĩndĩ mũsumbĩ eea Ndoeki: “Vĩndũka ne uwe ũae athembi!” Vau kwa vau, Ndoeki, ũla waĩ Mũetomu, nĩwavĩndũkie na ooaa athembi asu ne we. Mũthenya ũsu ooaie aũme 85 mekĩĩte evoti ya katane. 19 O na ĩngĩ, nĩwooaie andũ ma Novu, ndũa ya athembi, na ũvyũ; nĩwooaie na ũvyũ aũme o vamwe na aka, syana o vamwe na tũũkenge, nzaũ, mangʼoi, na malondu.

20 O na ũu wĩ o vo, mwana ũmwe wa Aimeleki mwana wa Aituvu, ũla weetawa Aviathali, nĩwavonokie na asemba aatĩĩa Ndaviti. 21 Aviathali eeie Ndaviti atĩĩ: “Saũlo nĩwooaa athembi ma Yeova.” 22 Nĩvo ĩndĩ Ndaviti weeie Aviathali: “Mũthenya ũsu, yĩla Ndoeki ũla Mũetomu waĩ vau, nĩnamanyie kana ndelea kũtavya Saũlo. Nyie mwene ninyie naĩle kũtũlwa mũtĩ nũndũ wa kĩkwʼũ kya kĩla mũndũ* nyũmbanĩ ya ĩthe waku. 23 Ĩkala nakwa. Ndũkakĩe, nũndũ mũndũ o na wĩva ũla ũkũmantha thayũ waku emantha thayũ wakwa; wĩ ungu wa ũsũvĩo wakwa.”

23 Ĩtina wa ĩvinda, Ndaviti ataviwʼe atĩĩ: “Avilisiti nĩmavithũkĩa Keila, na maendeee kũmavena lĩu wa mbaa ngetha ũla wĩ ivũĩonĩ syoo.” 2 Kwoou Ndaviti akũlya Yeova atĩĩ: “Yo nĩnaĩle kũthi ngoae Avilisiti asu?” Nake Yeova asũngĩa Ndaviti amwĩa: “Enda, ũkoae Avilisiti asu na ũivonokya Keila.” 3 Ĩndĩ aũme ma Ndaviti mamwĩie atĩĩ: “Sisya! Nĩtũũkĩa twĩ vaa Yuta; wĩona ta veũthi ata twathi Keila tũkokite na ikosi sya kaũ sya Avilisiti!” 4 Kwoou Ndaviti akũlya ũtao wa Yeova ĩngĩ. Yu Yeova amũsũngĩie atĩĩ: “Ũkĩla; theea Keila nũndũ nĩngũnengane Avilisiti kwʼokonĩ kwaku.” 5 Kwoou Ndaviti nĩwaendie na aũme make Keila na okita na Avilisiti; nĩwoosie indo syoo na ooaa Avilisiti aingĩ mũno, na Ndaviti avonokya ekali ma Keila.

6 Yu yĩla Aviathali mwana wa Aimeleki wasembie athi kũla kwĩ Ndaviti kũu Keila, asembie na evoti. 7 Saũlo ataviwʼe atĩĩ: “Ndaviti nĩwooka Keila.” Nĩvo ĩndĩ Saũlo waisye: “Ngai nĩwamũnengane mokonĩ makwa,* nĩkwĩthĩwa nĩweelikya kĩteinĩ kwa kũlika ndũanĩ yĩ na mĩvĩa na mĩamba.” 8 Kwoou Saũlo nĩweetie andũ onthe mathi kaũnĩ, matheee Keila makatwʼĩkanĩsye Ndaviti na aũme make. 9 Yĩla Ndaviti wamanyie kana Saũlo aendeee kũvanga mũvango wa kũmũaa, eeie mũthembi Aviathali atĩĩ: “Ete evoti vaa.” 10 Nĩvo ĩndĩ Ndaviti waisye atĩĩ: “Ame Yeova Ngai wa Isilaeli, vate nzika, mũthũkũmi waku nĩweewʼa kana Saũlo avangĩte kũka Keila nĩ kana anange ndũa ĩsu nũndũ wakwa. 11 Mo atongoi* ma Keila nĩmeũnengane kwʼokonĩ kwake? We Saũlo nũkũtheea oke o tondũ mũthũkũmi waku weewʼa? Ame Yeova Ngai wa Isilaeli, mwa tavya mũthũkũmi waku.” Nĩvo ĩndĩ Yeova wamwĩie atĩĩ: “Nũkũtheea oke.” 12 Ndaviti akũlilye: “Mo atongoi ma Keila nĩmeũnengane vamwe na aũme makwa kwʼokonĩ kwa Saũlo?” Nake Yeova amũsũngĩa: “Nĩmeũkũnengane.”

13 Vau kwa vau, Ndaviti nĩwookĩlile e na aũme make, aũme ta 600, na mauma Keila na mathi kũndũ o na kwĩva kũla maĩ matonya kũthi. Yĩla Saũlo wataviwʼe kana Ndaviti nĩwakĩa auma Keila, ndaamũatĩĩa. 14 Ndaviti nĩwekalile weũnĩ kũndũ kwĩ vinya kũvikĩka, kĩsionĩ kĩ iĩma weũnĩ wa Nzivu. Saũlo nĩwaendeeie kũmũmantha, ĩndĩ Yeova ndaamũnengane kwʼokonĩ kwake. 15 Ndaviti e weũnĩ wa Nzivu kũu Olesi nĩweesĩ kana* Saũlo nĩwamũmanthaa amũae.*

16 Yu Yonathani mwana wa Saũlo nĩwaendie kũla kwĩ Ndaviti kũu Olesi, na amũtetheesya akwate vinya nthĩnĩ wa Yeova.* 17 Amwĩie atĩĩ: “Ndũkakĩe, nĩkwĩthĩwa ĩthe wakwa Saũlo ndakaũkwata; we ũkeethĩwa mũsumbĩ wa Isilaeli, nakwa ngeethĩwa wa kelĩ kuma vala ũĩ; o na ĩthe wakwa Saũlo nĩwĩsĩ ũu.” 18 Nĩvo ĩndĩ me elĩ matianĩie ũtianĩo mbee wa Yeova, na Ndaviti ekala Olesi, na Yonathani asyoka mũsyĩ kwake.

19 Ĩtina wa ĩvinda, aũme ma Nzivu nĩmambatie kũla kwĩ Saũlo kũu Ngivea na mamwĩa atĩĩ: “We Ndaviti ndevithĩte vakuvĩ naitũ kũndũnĩ kwĩ vinya kũvikĩka kũu Olesi, kalĩmanĩ ka Akila, ngalĩkonĩ ya ĩtheo* ya Yesimoni?* 20 Ĩvinda o na yĩva yĩla ũkwenda* kũtheea, we mũsumbĩ, theea, na nĩtũũmũnengane kwʼokonĩ kwa mũsumbĩ.” 21 Nake Saũlo asya: “Yeova namũathime, nũndũ nĩmwambĩwʼĩa ĩnee. 22 Mwa endai na mũitata kũmanya kwa wʼo aĩva na mũndũ ũla ũnamwonie kũu, nũndũ nĩnĩtavĩtwʼe kana e ũseleke mũno. 23 Tatai mũmanye nesa kũndũ kwʼonthe kũla wĩvithaa na mũimbetee ũkũsĩ wa ũndũ ũsu. Nĩvo ĩndĩ ngaendanyʼa nenyu, na ethĩwa e nthĩ ĩno, ngamũmantha katĩ wa makili onthe ma* Yuta.”

24 Kwoou mauma vau na mathi Nzivu mbee wa Saũlo, na ĩvindanĩ yĩu Ndaviti na aũme make maĩ weũnĩ wa Maoni, ũla wĩ Alava ngalĩko ya ĩtheo ya Yesimoni. 25 Nĩvo ĩndĩ Saũlo wookie na aũme make amũmanthe. Yĩla Ndaviti wataviwʼe ũu, vau kwa vau nĩwatheeie ĩvianĩ yĩ ngũka na ekala weũnĩ wa Maoni. Nake Saũlo eewʼa ũu, nĩwasembanisye Ndaviti weũnĩ wa Maoni. 26 Yĩla Saũlo wavikie ngalĩkonĩ ĩmwe ya kĩĩma, Ndaviti na aũme make maĩ ngalĩkonĩ ĩla ĩngĩ ya kĩĩma. Ndaviti nĩweekalatĩte mũno asembe athi vaasa na Saũlo, ĩndĩ Saũlo na aũme make maendeee kũthengeea Ndaviti na aũme make nĩ kana mamakwate. 27 Ĩndĩ mũtũmwa ooka vala ve Saũlo, ayasya: “Ũka mĩtũkĩ, nũndũ Avilisiti nĩmavithũkĩa nthĩ yitũ!” 28 Saũlo eewʼa ũu, nĩwaekie kũsembanyʼa Ndaviti na athi kũkita Avilisiti. Nĩkyo kĩtumi vandũ vau veetiwe Ĩvia yĩ Ngũka ya Kũtaanĩsya.

29 Nĩvo ĩndĩ Ndaviti wambatie kuma vau na athi kwĩkala kũndũnĩ kwĩ vinya kũvikĩka kũu Eni-ngeti.

24 Saũlo asyoka oou aumĩte kũatĩĩa Avilisiti, mamwĩie atĩĩ: “Sisya! Ndaviti e weũnĩ wa Eni-ngeti.”

2 Kwoou Saũlo nĩwoosie aũme 3,000 ala manyuvĩtwe kuma Isilaeli yonthe na mathi kũmantha Ndaviti na aũme make movainĩ me mavia kũla kwĩkalaa mbũi sya kĩĩmanĩ. 3 Saũlo nĩwavikie itũũnĩ sya malondu syakĩtwe na mavia ũtee wa nzĩa, vala vaĩ na ngunga, na alika vo nĩ kana etethye,* Ndaviti na aũme make mailyĩ nthĩnĩ vyũ ngunganĩ ĩsu. 4 Aũme ma Ndaviti mamwĩie atĩĩ: “Ũũ nĩwʼo mũthenya ũla Yeova ũkũkwĩa, ‘Sisya! Nĩngũnengane mũmaitha waku kwʼokonĩ kwaku, na no ũmwĩke ũndũ o na wĩva ũla ũkwona wĩ mũseo kwaku.’” Kwoou Ndaviti ookĩla na ate kwĩwʼĩka atila mũthya wa ĩkoti yĩte moko ya Saũlo. 5 Ĩndĩ ĩtina ngoo ya* Ndaviti nĩyaendeeie kũmũthĩnyʼa nũndũ nĩwatilile mũthya wa ĩkoti yĩte moko ya Saũlo. 6 Eeie aũme make atĩĩ: “Kwosana na woni wa Yeova nĩ ũndũ ũtasũanĩĩka kwĩka mwĩai wakwa, mwĩtĩkĩwʼa mauta wa Yeova, ũndũ ta ũsu, nũkĩlye kwʼoko kwakwa ĩũlũ wake, nĩkwĩthĩwa nĩ mwĩtĩkĩwʼa mauta wa Yeova.” 7 Kwoou Ndaviti nĩwasiĩĩie* aũme make na ndeto isu, na ndaametĩkĩlya meke Saũlo ũndũ. Nake Saũlo ookĩla, auma ngunganĩ ĩsu na athi.

8 Nĩvo ĩndĩ Ndaviti wookĩlile auma ngunganĩ ĩsu na eeta Saũlo na wasya mũnene amwĩa: “Mwĩai wakwa mũsumbĩ!” Yĩla Saũlo wasyaisye ĩtina, Ndaviti nĩwakumanie na ũthyũ wake nginya nthĩ na avalũka. 9 Ndaviti eeie Saũlo atĩĩ: “Nĩkĩ wĩthukĩĩasya ndeto sya aũme ala meũkwĩa, ‘Sisya! Ndaviti eenda kũkũũmĩsya’? 10 Ũmũnthĩ ũũ nĩweeyonea na metho maku ũndũ wĩ ngunganĩ Yeova wakũnengane kwʼokonĩ kwakwa. Ĩndĩ yĩla mũndũ ũmwe ũmbĩie nĩkũae, nĩngwĩwʼĩie tei na nasya, ‘Ndiũkĩlya kwʼoko kwakwa ĩũlũ wa mwĩai wakwa, nĩkwĩthĩwa nĩ mwĩtĩkĩwʼa mauta wa Yeova.’ 11 Na sisya, ĩthe wakwa, ĩĩ, ngwete mũthya wa ĩkoti yaku yĩte moko; nũndũ yĩla natila mũthya wa ĩkoti yaku yĩte moko, ndinakũaa. Yu nĩwene na ũkaelewa kana ndikwenda kũkũũmĩsya kana kũleana naku, na ndiũvĩtĩsye, o na kau ũendeee kũnzyĩma nĩ kana ũmbũae.* 12 Yeova nasilanyʼe katĩ wakwa naku, na Yeova nambĩvanĩsye nũndũ wa kĩla ũmbĩkĩte, ĩndĩ kwʼoko kwakwa kũikũkĩlĩla. 13 O tondũ nthimo ya tene yaĩtye, ‘Ũthũku wumaa ũthũkunĩ,’ ĩndĩ kwʼoko kwakwa kũikũkĩlĩla. 14 Yo mũsumbĩ wa Isilaeli aumaalũkĩte akamanthe ũũ? We ũsembanĩtye ũũ? Ngitĩ ngwʼũ? Ngala o ĩmwe? 15 Yeova nĩethĩwe mũsili, na nũkũsilanyʼa katĩ wakwa naku, na nũkwona na aindetea na aindwʼĩĩa sila na aimbonokya kuma kwʼokonĩ kwaku.”

16 Yĩla Ndaviti waminie kũmũtavya ndeto isu oou, Saũlo amũkũlilye: “Ũsu nĩ wasya waku, Ndaviti mwana wakwa?” Na Saũlo ambĩĩa kũĩa na wasya mũnene. 17 Eeie Ndaviti atĩĩ: “We wĩ mũlũngalu mũno kwĩ inyie, nũndũ wangua nesa ĩndĩ nyie ngũĩvĩte ũthũku. 18 Ĩĩ, ũmũnthĩ nĩwandavya ũseo ũla weeka kwa kũema kũmbũaa yĩla Yeova wanengane kwʼokonĩ kwaku. 19 Nũndũ nĩ mũndũ wĩva wĩthĩaa mũmaitha wake na aimũeka athi atamũũmĩĩtye? Yeova nũkũũtuva kwa kũkwĩka ũseo nũndũ wa ũndũ ũla weeka ũmũnthĩ. 20 Na yu sisya! Nĩnĩsĩ kana vate nzika, ũkeethĩwa mũsumbĩ na kana ũsumbĩ wa Isilaeli ũkekala kwʼokonĩ kwaku ĩvinda yĩasa. 21 Yu mbĩyĩavĩe na Yeova kana ndũkatuta nzyawa syakwa* ila ikoka ĩtina wakwa na kana ndũkamina ĩsyĩtwa yakwa nyũmbanĩ ya ĩthe wakwa.” 22 Kwoou Ndaviti eeyĩavĩa Saũlo, na ĩtina wa ũu, Saũlo enũka. Ĩndĩ Ndaviti na aũme make mambata ngomenĩ.

25 Ĩtina wa ĩvinda, Samũeli nĩwakwie; na Aisilaeli onthe moombana vamwe nĩ kana mamũĩĩe na maimũthika mũsyĩ kwake kũu Lama. Na Ndaviti ookĩla na atheea weũnĩ wa Valani.

2 Yu kwaĩ na mũndũ kũu Maoni ũla waĩ na wĩa Kalimeli.* Mũndũ ũsu aĩ mũthwii mũno; aĩ na malondu 3,000 na mbũi 1,000, na ĩvindanĩ yĩu, atilaa malondu make wʼĩa kũu Kalimeli. 3 Mũndũ ũsu eetawa Navali, nake mũka eetawa Avikaili. Mũndũ mũka ũsu aĩ na ũmanyi na aĩ mwanake, ĩndĩ mũũme, ũla waĩ Mũkalevu, aĩ mũkalĩ na aĩ na mwĩkalĩle mũthũku. 4 Ndaviti e weũnĩ nĩweewie kana Navali nĩwatilaa malondu make wʼĩa. 5 Kwoou Ndaviti atũma anake ĩkũmi kũla ũĩ, na eea anake asu atĩĩ: “Ambatai Kalimeli, na mwavika kwa Navali, mũkũlyei ũndũ ũendeee ĩsyĩtwanĩ yakwa. 6 Na ĩndĩ mũimwĩa, ‘Ĩkala thayũ ĩvinda yĩasa na ũiendeea nesa* na eka mũsyĩ waku ũendeee nesa na kyonthe kĩla wĩ nakyo kĩyĩendeea nesa. 7 Yu nĩĩwʼa ũendeee kũtila malondu maku wʼĩa. Yĩla aĩthi maku maĩ vamwe naitũ, tũyaamaũmĩsya, o na vai kĩndũ o na kĩmwe kyaaa ĩvinda yonthe yĩla maĩ Kalimeli. 8 Kũlya anake maku, na nĩmeũkũtavya. Eka anake makwa mone ũseo methonĩ maku, nĩkwĩthĩwa twooka ĩvindanĩ ya kũtana.* Mwa nenga athũkũmi maku na mwana waku Ndaviti kĩndũ o na kĩva ũtonya kũmanenga.’”

9 Kwoou anake ma Ndaviti nĩmaendie na matavya Navali maũndũ asu onthe ĩsyĩtwanĩ ya Ndaviti. Yĩla maminie kũmũtavya ũu, 10 Navali asũngĩie athũkũmi ma Ndaviti atĩĩ: “Ndaviti nũũ, na mwana wa Yese nũũ? Matukũ aa athũkũmi aingĩ nĩmakwetye kũsemba makatia mavwana moo. 11 Yo nĩnaĩle kwosa mũkate wakwa na kĩw’ũ kyakwa na nyama ila nĩthĩnzĩe ala meũtila malondu makwa wʼĩa na ndinenga andũ ndesĩ kũla maumĩte?”

12 Anake ma Ndaviti meewʼa ũu nĩmasyokie na mamũtavya ndeto isu syonthe. 13 Vau kwa vau, Ndaviti eeie aũme make atĩĩ: “Kĩla ũmwe eyove ũvyũ wake!” Kwoou onthe meeyova mbyũ syoo, na o nake Ndaviti eeyova ũvyũ ũla wake, na aũme ta 400 mambatanyʼa na Ndaviti, namo aũme 200 matiwa na mĩio.

14 Ĩvindanĩ o yĩu, mũthũkũmi ũmwe wa Navali, eeie Avikaili, mũka wa Navali, atĩĩ: “Sisya! Ndaviti atũmie atũmwa kuma weũnĩ nĩ kana mendee vwana witũ ũseo, ĩndĩ amakũthũkĩa amaumangĩte. 15 Aũme asu maĩ aseo mũno kwitũ. Mayaaĩsa kũtũũmĩsya, na tũyaakosa kĩndũ o na kĩmwe ĩvindanĩ yonthe yĩla twaĩ vamwe namo weũnĩ. 16 Ĩvindanĩ yonthe yĩla twaĩ vamwe namo tũyĩĩthya malondu, maĩ ta ũkũta ũtũthyũlũlũkĩte wa kũtũsũvĩa, mũthenya na ũtukũ. 17 Yu twʼa kĩla ũkwĩka, nũndũ vate nzika, mũisyo nũũkwata vwana witũ na nyũmba yake yonthe, na we nĩ mũndũ vathei* ũkethĩa vai ũmwe ũtonya kũneena nake.”

18 Kwoou Avikaili nĩwoosie na mĩtũkĩ mĩkate 200, mbisũ ilĩ nene sya mbinyu, malondu atano mathĩnze, ithimo itano sya sea* sya lĩu wa mbaa ngetha mũkaange, tũmĩkate 100 twa nzavivũ mbũmĩthye, na tũmĩkate 200 twa makũyũ momĩthye na ĩndĩ ailĩĩla syĩndũ isu syonthe mangʼoinĩ. 19 Nĩvo ĩndĩ weeie athũkũmi make atĩĩ: “Endai mbee wakwa; nĩngũmũatĩĩa.” Ĩndĩ ndaatavya mũũme wake Navali ũndũ o na ũmwe.

20 Atheete akuĩtwe nĩ ĩng’oi, athwʼĩkĩtwe nĩ kĩĩma ũkethĩa Ndaviti na aũme make, ala matheeete makomane nake, maitonya kũmwona. Na ĩndĩ akomana namo. 21 Yu Ndaviti aasya: “Nĩnasũvĩie syĩndũ syonthe sya mũndũ ũũ weũnĩ mana. Vai kĩndũ o na kĩmwe kyake kyaaa, ĩndĩ o na ũu wĩ o vo, endĩva ũthũku nũndũ wa ũseo ũla nĩnamwĩkie. 22 Ngai naetee amaitha ma Ndaviti* ũkũno mũnene na ayĩka ũu o na mbeange ethĩwa nĩngwĩtĩkĩlya mũndũũme o na ũmwe* wake ekale thayũ nginya kwakya.

23 Yĩla Avikaili woonie Ndaviti, nĩwaumie ĩng’oinĩ na mĩtũkĩ na eevalũkya na ũthyũ mbee wa Ndaviti, akumanĩte nginya nthĩ. 24 Na ĩndĩ avalũka maaũnĩ make na amwĩa: “Mwĩai wakwa, eka nĩtalĩlwe mavĩtyo ne inyie; eka mũthũkũmi waku mwĩĩtu aneene naku, na ũyĩthukĩĩsya ndeto sya mũthũkũmi waku mwĩĩtu. 25 Mwa mwĩai wakwa, ndũkalũngane na Navali ũũ, nũndũ we nĩ mũndũ vathei, na ailye o ta ĩsyĩtwa yake. Etawa Navali,* na nĩ mũndũ mũtumanu. Ĩndĩ nyie, mũthũkũmi waku mwĩĩtu, ndinaaona anake ma mwĩai wakwa ala ũnatũmie. 26 Na yu mwĩai wakwa, vate nzika, o tondũ Yeova wĩ thayũ, na o tondũ we wĩ thayũ, nĩ Yeova wakũsiĩĩa ndũkethĩwe na ĩvĩtyo ya kwĩtĩkya nthakame na ndũkeyĩĩvanĩsye* na kwʼoko kwaku mwene. Amaitha make na ala meũmantha kũũmĩsya mwĩai wakwa nĩmethĩwe o ta Navali. 27 Yu eka mũthĩnzĩo* ũũ ũla mũthũkũmi waku mwĩĩtu waetee mwĩai wakwa ũnengwe anake ala maatĩĩaa mwĩai wakwa. 28 Mwa ekea mũthũkũmi waku mwĩĩtu ĩvĩtyo yake, nĩkwĩthĩwa vate ndĩi, Yeova akaseũvĩsya mwĩai wakwa nyũmba ndũmu, nũndũ mwĩai wakwa eũkita makaũ ma Yeova, na vai ũthũku o na ũmwe waaoneka nthĩnĩ waku mĩthenyanĩ yaku yonthe. 29 Yĩla mũndũ ũkokĩla nĩ kana akũatĩĩe na amanthe thayũ waku, thayũ wa mwĩai wakwa ũkalingwa wĩkale wĩ mũsũvĩĩku mũvukonĩ wa thayũ vamwe na Yeova Ngai waku, ĩndĩ akekya kũasa mathayũ ma amaitha maku ta mavia mekwʼa na kĩkũtha.* 30 Na yĩla Yeova ũkeka mwĩai wakwa maũndũ onthe maseo ala ũmwathĩte na aikũtwʼĩkĩthya mũtongoi wa Isilaeli, 31 ndũkewʼa woo kana wĩlile* ngoonĩ yaku nũndũ wa kwĩtĩkya nthakame vate kĩtumi na nũndũ wa kũeka kwʼoko kwa mwĩai wakwa kwĩyĩĩvanĩsye.* Yĩla Yeova ũkeka mwĩai wakwa maũndũ maseo, wĩlilikana mũthũkũmi waku mwĩĩtu.”

32 Nĩvo ĩndĩ Ndaviti weeie Avikaili atĩĩ: “Nataĩwe Yeova Ngai wa Isilaeli, ũla ũkũtũmie ũmũnthĩ ũkomane nakwa! 33 Na ũĩ waku nũathimwe! Athimwa nũndũ wa kũnziĩĩa ndikethĩwe na ĩvĩtyo ya kwĩtĩkya nthakame na ndikeyĩĩvanĩsye* na moko makwa mwene. 34 Kethĩwa ti ũu, vate nzika, o tondũ Yeova Ngai wa Isilaeli, ũla wanziĩĩa ndikakũũmĩsye, wĩ thayũ, keka ndũnoka na mĩtũkĩ kũkomana nakwa, kũvikĩĩa kwakya vayĩthĩwa vanatiala mũndũũme o na ũmwe* wa Navali.” 35 Na ĩndĩ Ndaviti oosa syĩndũ ila Avikaili wamũeteie na amwĩa atĩĩ: “Ambata ũthi na mũuo mũsyĩ kwaku. Sisya, nĩnakwĩthukĩĩsya, na nĩngwĩanĩsya kĩu wangũlya.”

36 Ĩtina wa kavinda, Avikaili nĩwasyokie kũla kwĩ Navali, ũla waĩ nyũmba kwake aendeee kũya na kũnywʼa ta mũsumbĩ, na Navali* aĩ mũtanu mũno na anyw’ĩte akamilwa vyũ. Avikaili ndaamũtavya ũndũ o na ũmwe nginya yĩla kwakyee. 37 Kwakya, yĩla Navali wamilũkilwe, mũka wake nĩwamũtavisye maũndũ asu. Na ngoo yake yeethĩwa ĩilye ta ya mũndũ mũkwʼũ, na akoma ateũnyaunyia ta ĩvia. 38 Ĩtina wa mĩthenya ta ĩkũmi, Yeova nĩwamũkũnie Navali, na akwʼa.

39 Yĩla Ndaviti weewie kana Navali nũkwie, aisye: “Yeova nataĩwe, ũla ũndeteie ĩtina wa kũvũthwʼa nĩ Navali na asiĩĩa mũthũkũmi wake ndakeke ũndũ o na ũmwe mũthũku, na Yeova nũtũngĩte ũthũku wa Navali mũtwenĩ wake mwene!” Na ĩndĩ Ndaviti atũmana nĩ kana Avikaili akakũlwʼe atwʼĩke kĩveti kyake. 40 Kwoou athũkũmi ma Ndaviti mooka kũla kwĩ Avikaili kũu Kalimeli na mamwĩa atĩĩ: “Ndaviti nĩwatũtũma nĩ kana tũkwose wĩthĩwe kĩveti kyake.” 41 Avikaili nĩwookĩlile vau kwa vau na akumana na ũthyũ wake nginya nthĩ na asya: “Ngombo yaku nĩĩ vaa nĩ kana yĩthĩwe mũthũkũmi wa kũthambasya maaũ ma athũkũmi ma mwĩai wakwa.” 42 Na ĩndĩ Avikaili ookĩla na mĩtũkĩ na athi akuĩtwe nĩ ĩngʼoi yake na athũkũmi make atano aka mamuma ĩtina maendete na maaũ; aendanisye na ala atũmwa ma Ndaviti na atwʼĩka kĩveti kyake.

43 O na ĩngĩ, Ndaviti nĩwatwaĩte Ainoamu kuma Yesileeli, na aka asu elĩ matwʼĩka iveti syake.

44 Ĩndĩ Saũlo aĩ anengie Valiti mwana wa Laisi, ũla waumĩte Ngalimu, mwĩĩtu wake Mikali, mũka wa Ndaviti.

26 Ĩtina wa ĩvinda, aũme ma Nzivu nĩmaendie kũla kwĩ Saũlo kũu Ngivea, mayasya: “We Ndaviti ndevithĩte kalĩmanĩ ka Akila kala kasianĩtye na Yesimoni?”* 2 Kwoou Saũlo nĩwookĩlile na atheea weũnĩ wa Nzivu e na aũme 3,000 manyuvĩtwe kuma Isilaeli nĩ kana akamanthe Ndaviti weũnĩ wa Nzivu. 3 Saũlo nĩwambie kambi kalĩmanĩ ka Akila, kala kasianĩtye na Yesimoni, ũtee wa nzĩa. Ĩvindanĩ yĩu, Ndaviti ekalaa weũnĩ, na nĩwamanyie kana Saũlo aĩ okie weũnĩ amũatĩĩe. 4 Kwoou Ndaviti nĩwatũmie athiani makaĩkĩĩthye kana kwa wʼo Saũlo aĩ okie. 5 Ĩtina, Ndaviti nĩwaendie vala Saũlo wambĩte kambi, na Ndaviti oona vala Saũlo na Avineli mwana wa Neli, mũnene wa ita syake, makomete; Saũlo akomete katĩkatĩ wa kambi athyũlũlũkĩtwe nĩ ita sya asikalĩ. 6 Nĩvo ĩndĩ Ndaviti wakũlilye Aimeleki, ũla waĩ Mũititi, na Avisai mwana wa Nzeluia, mwana-a-inyia wa Yoavu: “Nũũ ũkũtheeanyʼa nakwa kambinĩ kũla kwĩ Saũlo?” Nake Avisai amũsũngĩa: “Nĩngũtheeanyʼa naku.” 7 Kwoou Ndaviti na Avisai mathi ũtukũ nginya vala ita isu sya asikalĩ syaĩ, na meethĩa Saũlo akomete katĩkatĩ wa kambi na ĩtumo yake yĩtonyeewʼe nthĩ vakuvĩ na mũtwe wake; Avineli na ita sya asikalĩ makomete mamũthyũlũkĩte.

8 Nĩvo ĩndĩ Avisai weeie Ndaviti: “Ũmũnthĩ Ngai nĩwanengane mũmaitha waku kwʼokonĩ kwaku. Na yu, mwa eka nĩmũtonye na ĩtumo o ĩvinda yĩmwe nĩmũkwatanyʼe na nthĩ, na ndyĩĩthĩwa na vata wa kwĩka ũu ya kelĩ.” 9 Ĩndĩ Ndaviti eea Avisai: “Ndũkamũũmĩsye, nũndũ nũũ ũtonya kũkĩlĩlya mwĩtĩkĩwʼa mauta wa Yeova kwʼoko kwake na ayĩema kwĩthĩwa na ĩvĩtyo?” 10 Ndaviti aendeeie kwasya: “Vate nzika, o tondũ Yeova wĩ thayũ, Yeova mwene akamũaa, kana mũthenya wake ũkavika na aikwʼa, kana akathi kaũnĩ na aikwʼĩĩa kwʼo. 11 Kwosana na woni wa Yeova, nĩ ũndũ ũtasũanĩĩka nũkĩlĩlye mwĩtĩkĩwʼa mauta wa Yeova kwʼoko kwakwa! Kwoou, mwa yu osa ĩtumo yĩu yĩ vakuvĩ na mũtwe wake na sũva ũsu wa kĩw’ũ, na tũithi.” 12 Nĩvo ĩndĩ Ndaviti woosie ĩtumo yĩu na sũva ũsu wa kĩw’ũ, ila syaĩ vakuvĩ na mũtwe wa Saũlo, na mathi. Vai mũndũ waamona kana akamanya maĩ vau kana akaamũka, nũndũ onthe nĩmakomete, nĩkwĩthĩwa Yeova nĩwatumĩte makwatwa nĩ too mwingĩ. 13 Na ĩndĩ Ndaviti ainga athi ngalĩko ĩla ĩngĩ na aũngama kĩĩmanĩ ĩũlũ vandũ vaasanga, ve na ũasa wĩana ũna katĩkatĩ woo.

14 Ndaviti eetie ita isu vamwe na Avineli mwana wa Neli, na wasya mũnene, ayasya: “Avineli, ndwĩsũngĩa?” Nake Avineli amũsũngĩa: “We nue ũũ ũkwĩta mũsumbĩ?” 15 Ndaviti eeie Avineli: “We ndwĩ mũndũũme? Na nũũ ũilye taku Isilaeli? Kwoou nĩkĩ ũtanaendeea kũsunga mwĩai waku mũsumbĩ? Nĩkwĩthĩwa ve mũsikalĩ ũmwe wũkie kũaa mwĩai waku mũsumbĩ. 16 Kĩla weeka ti kĩseo. Vate nzika, o tondũ Yeova wĩ thayũ, waĩlĩte kũkwʼa, nũndũ ndũnaendeea kũsunga mwĩai waku, mwĩtĩkĩwʼa mauta wa Yeova. Yu sisya kĩla ngalĩko! Yĩĩva ĩtumo ya mũsumbĩ na sũva wa kĩw’ũ, ila syĩĩ vakuvĩ na mũtwe wake?”

17 Nĩvo ĩndĩ Saũlo wamanyie wasya wa Ndaviti na amũkũlya: “Ũsu nĩ wasya waku, mwanawa Ndaviti?” Nake Ndaviti amũsũngĩa: “Nĩ wasya wakwa, mwĩai wakwa mũsumbĩ.” 18 Na Ndaviti ongela kwasya: “Nĩkĩ mwĩai wakwa mũsumbĩ ũsembanĩtye mũthũkũmi wake, nĩ ũndũ wĩva nĩkĩte, na nĩ ĩvĩtyo yĩva nĩ nayo? 19 Mwa mwĩai wakwa mũsumbĩ, ĩthukĩĩsye ndeto sya mũthũkũmi waku: Ethĩwa nĩ Yeova ũtumĩte ũmbũkĩlĩla, eka etĩkĩle* nthembo yakwa ya lĩu. Ĩndĩ ethĩwa nĩ andũ makwĩkĩĩte vinya wĩke ũu, nĩ aumanĩe mbee wa Yeova, nũndũ nĩmandũngĩtye ũmũnthĩ ndikekale ũtiĩwanĩ wa Yeova, mayasya, ‘Enda, ũkathũkũme ngai ingĩ!’ 20 Na yu ndũketĩkĩlye nthakame yakwa yĩtĩke nthĩ vaasa na Yeova, nũndũ mũsumbĩ wa Isilaeli aumaalũkĩte amanthe ngala o ĩmwe, ta ũsembanĩtye ngwae iĩmanĩ.”

21 Nake Saũlo asya: “Nĩnĩkĩte naĩ. Syoka, mwanawa Ndaviti, nũndũ ndikũũmĩsya ĩngĩ, nĩkwĩthĩwa nĩwonie thayũ wakwa wĩ wa vata ũmũnthĩ ũũ. Ĩĩ, nĩkĩte na ũtumanu na ngeka ĩvĩtyo ĩnene mũno.” 22 Ndaviti amũsũngĩie atĩĩ: “Ĩtumo ya mũsumbĩ nĩ yĩĩ. Mwanake ũmwe nĩoke ayose. 23 Yeova nĩwe ũkaĩva kĩla ũmwe nũndũ wa ũlũngalu wake mwene na ũĩkĩĩku wake mwene, nĩkwĩthĩwa ũmũnthĩ Yeova nĩwaũnengane kwʼokonĩ kwakwa, ĩndĩ ndikwendaa kũkĩlĩlya mwĩtĩkĩwʼa mauta wa Yeova kwʼoko kwakwa. 24 Sisya! O tondũ ũmũnthĩ thayũ waku weethĩwa wĩ wa vata kwakwa, o ta ũu thayũ wakwa nĩwĩthĩwe wĩ wa vata methonĩ ma Yeova, na nĩambonokye kuma mathĩnanĩ onthe.” 25 Saũlo asũngĩie Ndaviti amwĩa atĩĩ: “Athimwa, mwanawa Ndaviti. Vate nzika, ũkeeka maũndũ manene, na vate nzika ũkaendeea nesa.” Na ĩndĩ Ndaviti eeyĩendea, na Saũlo asyoka mũsyĩ.

27 O na ũu wĩ o vo, Ndaviti aisye ngoonĩ yake atĩĩ: “Mũthenya ũmwe, kwʼoko kwa Saũlo kũkambũaa. Ũndũ ũla mũseo naĩle kwĩka nĩ kũkĩĩa nthĩ ya Avilisiti; na ĩndĩ Saũlo akaeka kũmantha kĩsionĩ kyonthe kya Isilaeli, na ngavonoka kuma kwʼokonĩ kwake.” 2 Kwoou Ndaviti ookĩla e na aũme 600 ala maĩ nake na mainga kwa Akisi mwana wa Maoki, mũsumbĩ wa Ngathi. 3 Ndaviti nĩwekalile na Akisi kũu Ngathi, we na aũme make, kĩla mũndũũme e vamwe na mũsyĩ wake. Ndaviti aĩ na iveti syake ilĩ, Ainoamu wa Yesileeli na Avikaili, ũla waĩ Mũkalimeli, kĩveti ndiwa kya Navali. 4 Yĩla Saũlo wataviwʼe kana Ndaviti aĩ anasemba akakĩĩa Ngathi, nĩwaekie kũmũmantha.

5 Nĩvo ĩndĩ Ndaviti weeie Akisi atĩĩ: “Ethĩwa nĩnonete ũseo methonĩ maku, mwa nenge vandũ va kwĩkala ndũanĩ ĩmwe nini, nĩ kana nĩkale vo. Wĩthĩwa wĩ ũndũ mũseango mũthũkũmi waku kũlea kwĩkala ndũanĩ ya kĩ-ũsumbĩ vamwe naku.” 6 Kwoou mũthenya ũsu Akisi amũnenga Nzikilaki. Nĩkyo kĩtumi o na kũvika ũmũnthĩ Nzikilaki yĩthĩawa ya asumbĩ ma Yuta.

7 Ĩvinda yĩla* Ndaviti wekalile nthĩ ya Avilisiti yaĩ mwaka ũmwe na myei ĩna. 8 Ndaviti na aũme make nĩmakothaa kwambata makavithũkĩe Angesuli, Angilisi, na Aamaleki, nũndũ matũĩte kĩsionĩ kĩla kyaumĩte Telamu nginya Suli kũtheea nginya Misili. 9 Ndaviti avithũkĩa kĩsio kĩu, ndatialasya mũndũũme kana mũndũ mũka e thayũ, ĩndĩ nĩwoosaa malondu na mbũi, ngʼombe, mangʼoi, ngamĩle, na ngũa, na ĩtina wa ũu aisyoka kwa Akisi. 10 Nake Akisi amũkũlasya: “Ũmũnthĩ mũvithũkĩie va?” Nake Ndaviti amũsũngĩaa atĩĩ: “Ngalĩko ya ĩtheo* ya Yuta” kana “Ngalĩko ya ĩtheo ya Ayelameeli” kana “Ngalĩko ya ĩtheo ya Akeni.” 11 Ndaviti ndaekaa mũndũũme o na ũmwe kana mũndũ mũka o na ũmwe ekale thayũ nĩ kana ndakaetwe Ngathi, nĩkwĩthĩwa aasya: “Nĩ kana maikese kũmatavya ũndũ ĩũlũ witũ mayasya, ‘Ũũ nĩwʼo Ndaviti wĩkie.’” (Na ũu nĩwʼo weekaa ĩvinda yonthe yĩla wekalaa nthĩ ya Avilisiti.) 12 Kwoou Akisi nĩwaĩkĩĩie Ndaviti nĩkwĩthĩwa eetavasya: ‘Vate nzika, nũtwʼĩkĩte mũuke mũthũku katĩ wa andũ make ma Isilaeli, kwoou ĩvinda yonthe akeethĩawa mũthũkũmi wakwa.’

28 Mĩthenyanĩ ĩsu, Avilisiti nĩmoombanisye ita syoo nĩ kana ithi ikokite na Aisilaeli. Kwoou Akisi eea Ndaviti atĩĩ: “Vate ndĩi, nĩwĩsĩ kana we na aũme maku nĩmũũthi kaũnĩ vamwe nakwa.” 2 Nĩvo ĩndĩ Ndaviti weeie Akisi: “Vate nzika, nĩwĩsĩ ũndũ mũthũkũmi waku ũkwĩka.” Nake Akisi eea Ndaviti: “Kĩu nĩkyo kĩtumi ngũũnyuva wĩthĩwe mũsungi wakwa wa ĩvinda yonthe.”*

3 Yu Samũeli aĩ anakwʼa, na Aisilaeli onthe nĩmamũmeteete na makamũthika Lama, ndũanĩ yake. Na Saũlo nĩwavetangĩte kuma ĩ nthĩ ala maneenanasya na maveva na ala maĩ na mavinya ma kũvuanyʼa ĩvinda yũkĩte.

4 Avilisiti nĩmoombanie na mathi mamba kambi Sunemu. Kwoou Saũlo oombanyʼa Aisilaeli onthe, namo mamba kambi Ngilivoa. 5 Yĩla Saũlo woonie kambi ya Avilisiti, nĩwakwatiwe nĩ wia na ngoo yake yambĩĩa kũthĩlĩa mũno. 6 O na kau Saũlo nĩwakũlasya Yeova ũtao, Yeova ndaaĩsa kũmũsũngĩa, ethĩwe eĩka ũu atũmĩĩte ndoto kana Ulimu kana athani. 7 Mũthya, Saũlo eeie athũkũmi make atĩĩ: “Manthĩei mũndũ mũka ũneenanasya na maveva, na nĩngũthi ngamũkũlye ũtao.” Namo athũkũmi make mamũsũngĩa: “Sisya! Ve mũndũ mũka ũneenanasya na maveva Eni-ndoli.”

8 Kwoou Saũlo nĩweetwʼĩkĩthisye mũndũ ũngĩ na eekĩa ngũa ingĩ na athi kwa mũndũ mũka ũsu ũtukũ e na aũme make elĩ. Aisye atĩĩ: “Mwa aũsya, kwa kũneenanyʼa na maveva, na ũimbũkĩlĩlya ũla ngũũtavya.” 9 Ĩndĩ mũndũ mũka ũsu amwĩie atĩĩ: “No nginya wĩthĩwe wĩsĩ kĩla Saũlo weekie, ũndũ wavetangie ala maneenanasya na maveva na ala maĩ na mavinya ma kũvuanyʼa ĩvinda yũkĩte kuma nthĩ ĩno. Nĩkĩ ĩndĩ, ũkwenda kũngwatya* nĩ kana ũtume nũawa?” 10 Nĩvo ĩndĩ Saũlo wamwĩyĩavĩie na Yeova, ayasya: “Vate nzika, o tondũ Yeova wĩ thayũ, ndwĩĩthĩwa na ĩvĩtyo o na yĩmwe ũndũnĩ ũũ!” 11 Mũndũ mũka ũsu eewʼa ũũ aisye: “Wĩenda ngũkĩlĩlye ũũ?” Nake amũsũngĩa: “Mbũkĩlĩlye Samũeli.” 12 Yĩla mũndũ mũka ũsu woonie “Samũeli,”* akayie na wasya wake wʼonthe na eea Saũlo atĩĩ: “Nĩkĩ wangenga? Nue Saũlo!” 13 Mũsumbĩ amwĩie atĩĩ: “Ndũkakĩe, ĩndĩ wene kĩ?” Nake mũndũ mũka ũsu amũsũngĩa Saũlo: “Nene mũndũ ũilye ta ngai ambatĩte aumĩte nthĩ.” 14 Vau kwa vau, Saũlo amũkũlilye: “Aĩlye ata?” Nake mũndũ mũka ũsu amwĩa: “Nĩ mũtumĩa mũkũũ wambatĩte, na ekĩĩte ĩkoti yĩte moko.” Nĩvo ĩndĩ Saũlo wamanyie kana aĩ “Samũeli,” na ĩndĩ akumana na ũthyũ wake nginya nthĩ na avalũka.

15 Nĩvo ĩndĩ “Samũeli” weeie Saũlo: “Nĩkĩ wanthĩnyʼa kwa kũtuma nambatwʼa?” Nake Saũlo amũsũngĩa: “Nĩ na thĩna mwingĩ mũno. Avilisiti nĩmeũmbũkita, na Ngai nũndiĩte na ndanzũngĩaa, kwĩsĩla athani kana ndoto; nĩkyo kĩtumi ngũkwĩta nĩ kana ũmanyĩthye kĩla naĩlĩte kwĩka.”

16 Na “Samũeli” asya: “Nĩkĩ yu ũũngũlya ũtao na Yeova nũkũtiĩte na akatwʼĩka mũmaitha waku? 17 Yeova akeeyĩka kĩla wathanie kwĩsĩla kwakwa: Yeova akatembũa* ũsumbĩ kuma mokonĩ maku na ainenga mũndũ ũngĩ, nake nĩ Ndaviti. 18 Nũndũ ndwaaĩthukĩĩsya wasya wa Yeova na ndwaaonyʼa Aamaleki ũthatu wake wakanĩte, nĩkyo kĩtumi ũmũnthĩ Yeova ũkũkwĩka ũu. 19 O na ĩngĩ, Yeova akaũnengane we vamwe na Aisilaeli kwʼokonĩ kwa Avilisiti, na ũnĩ we na ana maku mũkeethĩwa vamwe nakwa. Na kwongela ũu, Yeova akanengane ita sya Aisilaeli mokonĩ ma Avilisiti.”

20 Vau kwa vau, Saũlo nĩwavalũkile nthĩ atambũũkĩte vyũ na akwatwa nĩ wia mwingĩ mũno nũndũ wa ndeto sya “Samũeli.” Na vai vinya o na ũmwe watialĩte nthĩnĩ wake, nĩkwĩthĩwa ndaĩte lĩu mũthenya wʼonthe na ũtukũ wʼonthe. 21 Yĩla mũndũ mũka ũsu wookie vala ve Saũlo na oona ũndũ ũthĩnĩkĩte mũno wĩana, amwĩie atĩĩ: “Sisya! Mũthũkũmi waku nĩweeka kĩla ũwetie, na nĩnalikya thayũ wakwa mũisyonĩ* na neeka kĩla ũndavisye nĩke. 22 Yu, mwa ĩthukĩĩsye kĩla mũthũkũmi waku ũkwenda kũweta. Eka ngũseũvĩsye kĩlungu kya mũkate; na ĩndĩ ũiya nĩ kana ũkwate kavinya ka kũthi.” 23 Ĩndĩ nĩwaleile na asya: “Ndiya.” O na ũu wĩ vo, athũkũmi make na mũndũ mũka ũsu nĩmaendeeie kũmũthingʼĩĩsya. Mũthya, nĩwamethukĩĩisye na ookĩla mũthanganĩ na ekala kĩtandanĩ. 24 Mũndũ mũka ũsu aĩ na kasaũ kaĩthĩtw’e kakanoa vau mũsyĩ kwake, kwoou nĩwakathĩnzie* na mĩtũkĩ na oosa mũtu na aũkima* na aua mĩkate ĩte ĩlawa. 25 Nĩwevũĩie Saũlo na athũkũmi make, na maya. Ĩtina wa ũu, nĩmookĩlile na mathi na ũtukũ.

29 Avilisiti nĩmoombanisye ita syoo syonthe kũu Aveki, namo Aisilaeli maendeee kwamba kambi vakuvĩ na mbuluti* kũu Yesileeli. 2 Na eai ma Avilisiti maendeee kũvĩta na ikosi syoo sya maana na sya makili, nake Ndaviti na aũme make mamaumĩte ĩtina me na Akisi. 3 Ĩndĩ anene me mbee ũsumbĩnĩ wa Avilisiti masya: “Aevelania aa meĩkata vaa?” Akisi asũngĩie anene asu me mbee ũsumbĩnĩ wa Avilisiti atĩĩ: “Ũũ nĩ Ndaviti mũthũkũmi wa mũsumbĩ Saũlo wa Isilaeli, ũla wĩthĩĩtwe vamwe nakwa kwa ĩvinda ya mwaka ũmwe kana mbeange. Ndyaamũkwata na ĩvĩtyo o na yĩmwe kuma mũthenya ũla wakĩĩie kwakwa nginya ũmũnthĩ.” 4 Ĩndĩ anene asu me mbee ũsumbĩnĩ wa Avilisiti nĩmamũthatĩie mũno, na kwoou mamwĩa atĩĩ: “Tũnga mũndũũme ũsu. Eka asyoke vala wamwĩie ekale. Ndũkaeke atheeanyʼe naitũ kaũnĩ, nĩ kana ndakese kũtũvĩndũka kaũ ũendeee. Nũndũ nĩ ũndũ wĩva mũseango ũtonya kwĩka endeesye mwĩai wake eka kũnengane mĩtwe ya aũme maitũ? 5 We ũũ ti Ndaviti ũla mainaa ĩũlũ wake yĩla masũngaa, mayasya:

6 Kwoou Akisi nĩweetie Ndaviti na amwĩa atĩĩ: “Vate nzika, o tondũ Yeova wĩ thayũ, wĩ mũlũngalu, na no nende ũthi kaũnĩ na ita syakwa, nĩkwĩthĩwa ndyaaũkwata na ĩvĩtyo o na yĩmwe kuma mũthenya ũla wookie kwakwa nginya ũmũnthĩ. Ĩndĩ eai ala angĩ mayĩũkũĩkĩĩa. 7 Kwoou syoka na mũuo, na ndũkeke ũndũ o na wĩva ũtonya kũthatya eai ma Avilisiti.” 8 Ĩndĩ Ndaviti eea Akisi: “Nĩkĩ, neeka ata? Nĩ ĩvĩtyo yĩva ũkwatĩte mũthũkũmi waku nayo kuma mũthenya ũla nookie vala ũĩ nginya ũmũnthĩ? Nĩkĩ ũte kwenda nĩendanyʼe naku nĩ kana tũkokite amaitha ma mwĩai wakwa mũsumbĩ?” 9 Akisi asũngĩie Ndaviti amwĩa: “Kwosana nakwa, wĩthĩĩtwe wĩ mũseo ta mũlaĩka wa Ngai. Ĩndĩ anene me mbee ũsumbĩnĩ wa Avilisiti masya, ‘Ndũkaeke ambatanyʼe naitũ kaũnĩ.’ 10 Yu amũka kwakya tene wĩ na athũkũmi ma mwĩai waku ala mookanisye naku; ũkĩlai na mũithi kwakya tene kwamesya kyeni oou.”

11 Kwoou Ndaviti na aũme make nĩmookĩlile kwakya tene masyoke nthĩ ya Avilisiti, namo Avilisiti mambata Yesileeli.

30 Yĩla Ndaviti na aũme make mavikie Nzikilaki mũthenyanĩ wa katatũ, Aamaleki nĩmavithũkĩĩte ngalĩko ya ĩtheo* o vamwe na Nzikilaki, na nĩmaanangĩte Nzikilaki na makamĩvĩvya na mwaki. 2 Matavĩte iveti na andũ onthe ala maĩ ndũanĩ ĩsu, kuma ũla mũnini vyũ nginya ũla mũnene vyũ. Mayaũaa mũndũ o na ũmwe, ĩndĩ mamakuie na mathi. 3 Yĩla Ndaviti na aũme make mavikie ndũanĩ ĩsu, meethĩie ĩvĩvĩtwʼe ĩkathela, na iveti syoo na ana moo na eĩtu moo maĩ mataviwe. 4 Kwoou Ndaviti na aũme ala maĩ vamwe nake mambĩĩa kũĩa na wasya mũnene nginya weethĩa mai na vinya wa kũendeea kũĩa. 5 O nasyo iveti ilĩ sya Ndaviti syaĩ itaviwe, Ainoamu wa Yesileeli na Avikaili kĩveti ndiwa kya Navali, ũla waĩ Mũkalimeli. 6 Ndaviti nĩwathĩnĩkie mũno, nũndũ aũme asu maasya nĩmeũmũkimanga na mavia, nĩkwĩthĩwa onthe* maĩ na woo mwingĩ mũno nũndũ wa kwasya ana moo na eĩtu moo. Ĩndĩ Ndaviti eeyĩkĩa vinya nthĩnĩ wa Yeova Ngai wake.

7 Nĩvo ĩndĩ Ndaviti weeie mũthembi Aviathali, mwana wa Aimeleki: “Mwa ete evoti vaa.” Kwoou Aviathali atwaĩa Ndaviti evoti. 8 Ndaviti akũlilye Yeova atĩĩ: “Yo nĩnaĩlĩte kũsembanyʼa nguthu ĩĩ ya avenani? Nĩngũmakwata?” Nake amwĩa: “Masembanyʼe, nũndũ vate nzika, nũũmakwata na ũivonokya kĩla manoosie.”

9 Ndaviti ate kwananga ĩvinda nĩwakũisye e na ala aũme 600 maĩ nake, na mathi nginya Kyandanĩ kya* Mbesoli, vala aũme amwe katĩ wa asu matiiwe. 10 Ndaviti nĩwaendeeie kũsembanyʼa nguthu ĩsu e na aũme 400, ĩndĩ aũme 200 ala maĩ anou mũno ũkethĩa mayĩinga Mbesoli nĩmatiiwe vau.

11 Nĩmeethĩie mũndũũme Mũmisili kĩthekanĩ na mamũtwaa vala ve Ndaviti. Nĩmamũnengie lĩu na kĩwʼũ kya kũnywʼa, 12 vamwe na kalungu ka kamũkate ka makũyũ momĩthye na tũmĩkate twĩlĩ twa nzavivũ mbũmĩthye. Aya, nĩwakwatie vinya ĩngĩ,* nĩkwĩthĩwa ndaĩte lĩu o na ũmwe kana kĩwʼũ kwa mĩthenya ĩtatũ, mũthenya na ũtukũ. 13 Yu Ndaviti amũkũlilye: “Wĩ mũthũkũmi waũ na umĩte va?” Nake amũsũngĩa: “Nĩ mũthũkũmi Mũmisili, ngombo ya mũndũũme Mũamaleki, ĩndĩ yĩla nĩnawaie mĩthenya ĩtatũ mĩvĩtu, vwana wakwa nũnandiie. 14 Tũnavithũkĩie ngalĩko ya ĩtheo* ya Akelethi na kĩsio kya Yuta na ngalĩko ya ĩtheo* ya Kalevu, na twavĩvya Nzikilaki na mwaki.” 15 Nĩvo ĩndĩ Ndaviti wamwĩie: “Nũũntheesya vala ve nguthu ĩsu ya avenani?” Nake amũsũngĩa: “Wambĩyĩavĩa na Ngai kana ndwĩmbũaa na kana ndwĩnengane kũla kwĩ vwana wakwa, nĩngũũtheesya kũla kwĩ nguthu ĩsu ya avenani.”

16 Kwoou nĩwamatheeisye vala manyaĩĩkĩte kĩla vandũ, maiya na mainywʼa na kũtanĩa nũndũ wa mũtavo mwingĩ mũno ũla moosete nthĩ ya Avilisiti na nthĩ ya Yuta. 17 Na ĩndĩ Ndaviti amoaa kuma kwakya kũtanamba kũthea nginya mũthenya ũla waatĩĩe ĩ ya wĩoo; vai mũndũũme waavonoka eka aũme 400 ala masembie makuĩtwe nĩ ngamĩle. 18 Ndaviti nĩwatangĩĩie kyonthe kĩla Aamaleki moosete, o na avonokya iveti syake syelĩ. 19 Vai kĩndũ o na kĩmwe kyoo kyaaa, kuma kĩla kĩnini vyũ nginya kĩla kĩnene vyũ. Nĩmatangĩĩie ana moo na eĩtu moo na moosa mũtavo; Ndaviti nĩwatangĩĩie kyonthe kĩla moosete. 20 Kwoou Ndaviti nĩwoosie malondu onthe na mbũi na ngʼombe, na masiinga syĩ mbee wa indo syoo ene. Maisye: “Ũũ nĩ mũtavo wa Ndaviti.”

21 Nĩvo ĩndĩ Ndaviti wavikie vala ve ala aũme 200 maĩ anou mũno ũkethĩa maitonya kũendanyʼa na Ndaviti na ala matiĩtwe Mwandanĩ wa* Mbesoli, na maumaalũka nĩ kana makomane na Ndaviti na andũ ala waĩ namo. Yĩla Ndaviti wathengeeie aũme asu, nĩwamakũlilye ũndũ maendeee. 22 O na ũu wĩ o vo, kĩla mũndũũme mũthũku na wa mana katĩ wa ala maendanĩtye na Ndaviti aisye: “Nũndũ maineethi vamwe naitũ, tũimanenge mũtavo o na ũmwe ũla tũnatangĩĩie ate o kĩla ũmwe no ose kĩveti kyake na ana make na aithi.” 23 Ĩndĩ Ndaviti asya: “Ana-a-ĩthe makwa, mũikekane ũu na syĩndũ ila Yeova watũnenga. Nũtũsũvĩie na anengane nguthu ya avenani ĩla ĩnatũvithũkĩie kwʼokonĩ kwitũ. 24 Nũũ wĩtĩkĩlana nenyu ũndũnĩ ũũ? Kĩlungu kĩla kĩũnengwa ũla ũnatheeie kaũnĩ nokyo kĩũnengwa ũla ũnekalile na mĩio. Onthe menengwa kĩlungu kĩanene.” 25 Na kuma mũthenya ũsu na kũendeea, nĩwaiie ũndũ ũsu wĩthĩwe mwolooto na mwĩao kwondũ wa Isilaeli nginya ũmũnthĩ.

26 Yĩla Ndaviti wasyokie Nzikilaki, nĩwatũmanĩie atumĩa ma Yuta, ala maĩ anyanya make, mũtavo ũmwe ayasya: “Ũũ nĩ mũthĩnzĩo* wenyu kuma mũtavonĩ wa amaitha ma Yeova.” 27 Atũmanĩie ala maĩ Mbetheli, ala maĩ Lamothi ya Nekevu,* ala maĩ Yatili, 28 ala maĩ Aloeli, ala maĩ Sivimothi, ala maĩ Esitemoa, 29 ala maĩ Lakali, ala maĩ ndũanĩ sya Ayelameeli, ala maĩ ndũanĩ sya Akeni, 30 ala maĩ Olima, ala maĩ Mbolasani, ala maĩ Athaki, 31 ala maĩ Eviloni, na kũndũ kwʼonthe kũla Ndaviti na aũme make makothaa kũthi.

31 Yu Avilisiti mokitaa na Aisilaeli. Na aũme ma Isilaeli masemba makĩa Avilisiti, na aingĩ mooaĩwa Kĩĩmanĩ kya Ngilivoa. 2 Avilisiti nĩmaendeeie kũthengeea Saũlo na ana make mũno, na Avilisiti mooaa Yonathani, Avinatavu, na Maliki-sua, ana ma Saũlo. 3 Kaũ nĩwavyũvĩie Saũlo mũno, na ndũĩka sya kũatha na maangi syamwona, na syamũatha syamũũmĩsya mũno. 4 Nĩvo ĩndĩ Saũlo weeie ũla wamũkuĩaa mĩio yake ya kaũ atĩĩ: “Kũa ũvyũ waku na ũindonya nawʼo, nĩ kana aũme aa mate aĩke maikoke na maindonya na maimbĩka maũndũ mathũku mũno.”* Ĩndĩ ũla wamũkuĩaa mĩio ya kaũ ndendaa kwĩka ũu, nĩkwĩthĩwa aĩ na wia mwingĩ mũno. Kwoou Saũlo oosa ũvyũ ũsu aũvalũkĩla. 5 Yĩla mũndũ ũsu wamũkuĩaa mĩio ya kaũ woonie kana Saũlo nĩwakwʼa, o nake nĩwavalũkĩile ũvyũ wake na akw’a vamwe nake. 6 Kwoou Saũlo, ana make atatũ, ũla wamũkuĩaa mĩio ya kaũ, na aũme make onthe makwʼa vamwe mũthenya ũsu. 7 Yĩla andũ ma Isilaeli ala mekalaa kĩsionĩ kĩ mwandanĩ* na kĩsionĩ kya Yolotani moonie kana aũme ma Isilaeli nĩmasemba makĩa na kana Saũlo na ana make nĩmakw’a, nĩmambĩĩie kuma ndũanĩ na masemba makĩa; na ĩndĩ Avilisiti mooka mekala ndũanĩ isu.

8 Mũthenya ũla waatĩĩe, yĩla Avilisiti mookie kumya ala mooaĩtwe syĩndũ ila maĩ nasyo, meethĩie Saũlo na ana make atatũ mavalũkĩte Kĩĩmanĩ kya Ngilivoa. 9 Kwoou nĩmatilile mũtwe wake na mamumya mĩio yake ya kaũ na matũmana kĩsionĩ kyonthe kya Avilisiti ũvoo ũsu ũnyaaĩkwʼe nyũmbanĩ sya* ngai syoo sya mĩvwʼanano na katĩ wa andũ. 10 Na ĩndĩ maia mĩio yake ya kaũ nyũmbanĩ ya mĩvwʼanano ya Asitolethi na maathĩĩa kimba kyake ũkũtanĩ wa Mbethi-sani. 11 Yĩla ekali ma Yavesi-ngileati meewie ũndũ Avilisiti meekĩte Saũlo, 12 aũme onthe ngũmbaũ nĩmookĩlile na mathi ũtukũ wʼonthe na maumya mwĩĩ wa Saũlo na mĩĩ ya ana make ũkũtanĩ wa Mbethi-sani. Na masyoka Yavesi na mamĩvĩvĩsya kũu. 13 Na ĩndĩ moosa mavĩndĩ moo na mamathika ungu wa mũtĩ wa mweseli kũu Yavesi, na matĩĩa kũya mĩthenya mũonza.