ĨVUKU YA KELĨ YA MAVINDA

1 Ũsumbĩ wa Solomoni mwana wa Ndaviti nĩwaendeeie kwĩthĩwa na vinya mũno, na Yeova Ngai wake aĩ vamwe nake na amũnenevya mũno.

2 Solomoni nĩwatũmanie Aisilaeli onthe, anene ma makili na ma maana, asili, na anene onthe ma Isilaeli yonthe, aũngamĩi ma nyũmba sya aa-ĩthe. 3 Na ĩndĩ Solomoni na ũmbano wʼonthe mathi vala vandũnĩ vatũlu kũu Ngiveoni, nĩkwĩthĩwa nĩ vo ĩeema ya kũmbanĩa ya Ngai ũla wa w’o yaĩ, ĩeema yĩla Mose mũthũkũmi wa Yeova waseũvĩisye weũnĩ. 4 O na ũu wĩ o vo, Ndaviti aĩ ambatisye Ĩsandũkũ yĩu ya Ngai ũla wa w’o kuma Kiliathi-yealimu ayĩete vala wayĩseũvĩsye; aĩ ayambĩie ĩeema Yelusalemu. 5 Na kĩthembeo kya ũthuku kĩla Mbesaleli mwana wa Uli mwana wa Uulu waseũvisye kyaĩ kyaiiwe mbee wa ĩeema ya ũthaithi ya Yeova; na Solomoni na ũmbano wʼonthe mavoyeaa mbee wakyo.* 6 Yu Solomoni nĩwaumĩisye nthembo vau mbee wa Yeova, na aumĩsya nthembo sya kũvĩvwʼa 1,000 kĩthembeonĩ kya ũthuku kya ĩeema ya kũmbanĩa.

7 Ũtukũ ũsu Ngai nĩwaumĩlĩĩile Solomoni na amwĩa atĩĩ: “Ĩtya kĩla ũkwenda ngũnenge.” 8 Nĩvo ĩndĩ Solomoni weeie Ngai atĩĩ: “Nĩwonetye ĩthe wakwa Ndaviti wendo mwingĩ ũtathelaa, na nũndwʼĩkĩthĩtye mũsumbĩ vandũ vake. 9 Yu, ame Yeova Ngai, eka watho ũla wathie ĩthe wakwa Ndaviti wĩanĩe, nĩkwĩthĩwa nũndwʼĩkĩthĩtye mũsumbĩ ĩũlũ wa andũ aingĩ mũno ta kĩtoo kya nthĩ. 10 Yu mwa nenge ũĩ na ũmanyi wa kũtongoesya andũ aa,* nũndũ we nũũ ũtonya kũsilanyʼa andũ aa maku maingĩvĩte ũu?”

11 Nĩvo ĩndĩ Ngai weeie Solomoni atĩĩ: “Nĩkwĩthĩwa ũsu nĩwʼo wĩĩ wendi wa ngoo yaku na ndũnetya malĩ, ũthwii, na ndaĩa kana ũkavoyea ala maũmenete makwʼe, o na ndũneyĩtĩsya kwĩkala thayũ ĩvinda yĩasa,* ĩndĩ weetya ũĩ na ũmanyi wa kũsilanyʼa andũ makwa ala ngũtwʼĩkĩthĩtye mũsumbĩ woo, 12 nĩngũũnenga ũĩ na ũmanyi; ĩndĩ nĩngũsyoka ngũnenge malĩ na ũthwii na ndaĩa itaaĩthĩwa na mũsumbĩ ũngĩ mbee waku na itakethĩwa na mũsumbĩ ũngĩ ũla ũkoka ĩtina waku.”

13 Kwoou Solomoni auma vandũ vatũlu kũu Ngiveoni, mbee wa ĩeema ya kũmbanĩa, athi Yelusalemu; na asumbĩka Isilaeli. 14 Solomoni nĩwaendeeie kũmbanyʼa makasya na mbalasi;* aĩ na makasya 1,400 na mbalasi* 12,000, na amaiaa ndũanĩ sya kwia makasya vakuvĩ na mũsumbĩ kũu Yelusalemu. 15 Mũsumbĩ nĩwatumie kwĩthĩwa na vetha na thaavu mwingĩ Yelusalemu o ta mavia, na mbwaũ sya mũtalakwe* syaĩ mbingĩ o ta mĩkũyũ kĩsionĩ kya Sevela. 16 Mbalasi sya Solomoni syaumĩtwʼe Misili, na atandĩthya ala matũmwa nĩ mũsumbĩ mathooaa ndĩthya sya mbalasi* na thooa ũmwe. 17 Thooa wa kĩla ĩkasya yaumwʼa Misili waĩ ilungu sya vetha 600, na thooa wa mbalasi ĩmwe waĩ 150; namo nĩmasyokaa makathooesya asumbĩ onthe ma Aititi na asumbĩ ma Silia.

2 Nĩvo ĩndĩ Solomoni weeaie nyũmba yakwe kwondũ wa ĩsyĩtwa ya Yeova na kũyakwa nyũmba* kwondũ wa ũsumbĩ wake. 2 Solomoni nĩwaandĩkĩthisye aũme 70,000 methĩwe andũ ma moko,* aũme 80,000 methĩwe ma kwasa mavia iĩmanĩ, na asyaĩĩsya 3,600 mamaũngamĩe. 3 O na ĩngĩ, Solomoni nĩwatũmanĩie Ilamu mũsumbĩ wa Tile ũtũmani ũũ: “Mbĩke o ũndũ weekie Ndaviti ĩthe wakwa yĩla wamũtũmanĩie mbwaũ sya mĩtalakwe* ake nyũmba* ekalae vo. 4 Yu nĩngwaka nyũmba kwondũ wa ĩsyĩtwa ya Yeova Ngai wakwa, nĩmũtheesye yo, nĩvĩvasye ũvumba wĩ mũuke mũseo mbee wake, o na ĩngĩ, kwondũ wa mĩkate ĩla ĩvangawa tũkundi ĩilĩanĩlwʼe* yĩthĩawe vo kĩla ĩvinda na ndyumasya nthembo sya kũvĩvw’a, kwakya na ĩ ya wĩoo, ĩvindanĩ ya Savato, myei ĩitisa, na mavindanĩ ma mboka ila itwʼĩtwe mwakanĩ kwondũ wa Yeova Ngai witũ. Asu nĩ maũndũ Aisilaeli maĩlĩte kwĩanĩasya kĩla ĩvinda. 5 Nyũmba ĩla ngwaka ĩkeethĩwa yĩ nene, nĩkwĩthĩwa Ngai witũ nĩ mũnene kwĩ ngai ila ingĩ syonthe. 6 Na nũũ ũtonya kũmwakĩa nyũmba? Nĩkwĩthĩwa matu na ĩtu yĩla yĩ ĩũlũ wa matu yĩimwĩanĩa, kwoou ninyie ũũ nĩmwakĩe nyũmba? Kĩla ndonya kwĩka no kũmwakĩa vandũ va kũtumaa nthembo itoa mbee wake. 7 Yu ndũmĩe vundi wĩ na ũtũĩka wa kũseũvya syĩndũ atũmĩĩte thaavu, vetha, ũthuku, kyũma,* w’ĩa wa langi wa nzambalaũ, ndii ndune, na ũlii wa mbuluu na ũla wĩsĩ kũvanĩĩa syĩndũ. Akathũkũmĩa Yuta na Yelusalemu e na mavundi makwa me na ũtũĩka, ala Ndaviti ĩthe wakwa wanyuvie. 8 Na ũindũmanĩa mbwaũ sya mĩtalakwe,* mĩvelosi, na mĩsandali kuma Levanoni, nũndũ nĩnĩsĩ nesa athũkũmi maku nĩmethĩawa na ũmanyi wa kũtila mĩtĩ ya Levanoni. Athũkũmi makwa makathũkũma na athũkũmi maku 9 nĩ kana manzeũvĩsye mbwaũ mbingĩ mũno, nũndũ nyũmba ĩla ngwaka yĩĩthĩwa yĩ nene na mbanake mũno. 10 Yu sisya! Nganenga athũkũmi maku, atili ma mbwaũ ala matemaa mĩtĩ, lĩu ũũ: koli 20,000* sya nganũ, koli 20,000 sya mbaale, mbathi 20,000* sya mbinyu, na mbathi 20,000 sya mauta.”

11 Nĩvo ĩndĩ Ilamu mũsumbĩ wa Tile watũmanĩie Solomoni ũtũmani ũũ mũandĩke: “Nũndũ Yeova nĩwendete andũ make, nũkũtwʼĩkĩthĩtye mũsumbĩ woo.” 12 Na ĩndĩ Ilamu asya atĩĩ: “Yeova Ngai wa Isilaeli nataĩwe, ũla woombie ĩtu na nthĩ, nũndũ nũnengete Mũsumbĩ Ndaviti mwana mũĩ, ũnengetwe ũmanyi na ũtonyi wa kũelewa maũndũ, ũla ũkakĩa Yeova nyũmba na ũkaka nyũmba kwondũ wa ũsumbĩ wake. 13 Yu nĩngũmũtũmĩa vundi wĩ na ũtũĩka, na wĩ na ũtonyi wa kũelewa maũndũ, Ilamu-avi, 14 mwana wa mũndũ mũka Mũndani ĩndĩ ĩthe aĩ mũndũũme wa Tile; nĩwĩsĩ nesa kũseũvya syĩndũ atũmĩĩte thaavu, vetha, ũthuku, kyũma,* mavia, mbwaũ, w’ĩa wa langi wa nzambalaũ, ũlii wa mbuluu, kĩtambaa kĩseo, na ndii ndune. No avanĩĩe kĩndũ o na kya mũthemba wĩva na no aseũvye syĩndũ atũmĩĩte mũsolo o na wĩva ũla wanengwa. Akathũkũma na mavundi maku me ũtũĩka na mavundi me ũtũĩka ma mwĩai wakwa Ndaviti ĩthe waku. 15 Yu eka mwĩai wakwa atũmanĩe athũkũmi make nganũ, mbaale, mauta, na mbinyu ĩla ũnamathie. 16 Na tũkatila mĩtĩ mingĩ vyũ ũndũ ũkwenda, kuma Levanoni, na tũkamyovanyʼa na tũimĩete ĩlelete ũkanganĩ nginya Yova; naku ũkamyambatya Yelusalemu.”

17 Na ĩndĩ Solomoni atala aũme onthe ala maĩ ekali ma ũeninĩ nthĩ ya Isilaeli, o tondũ Ndaviti ĩthe wake weekĩte, na ũtalo woo waĩ aũme 153,600. 18 Kwoou nĩwatwʼĩkĩthisye aũme 70,000 katĩ woo andũ ma moko,* 80,000 andũ ma kwasa mavia iĩmanĩ, na 3,600 asyaĩĩsya ma kũtongoesya andũ na kũĩkĩĩthya wĩa nĩwathela.

3 Na ĩndĩ Solomoni ambĩĩa kwaka nyũmba ya Yeova kũu Yelusalemu Kĩĩmanĩ kya Molia, vala Yeova waumĩlĩĩile Ndaviti ĩthe wake, vandũnĩ vala Ndaviti waseũvisye kĩvũĩonĩ kya Olinani ũla waĩ Mũyevusi. 2 Ambĩĩie kwaka mũthenya wa kelĩ wa mwei wa kelĩ, mwakanĩ wa kana wa kũsumbĩka kwake. 3 Na mũsingi wa kwaka nyũmba ya Ngai ũla wa w’o ũla Solomoni weekĩie waĩ na ũasa wa mĩkono 60 na ũthanthau wa mĩkono 20, kwosana na kĩthimo kya mũkono kĩla kyatũmĩawa vau mbeenĩ.* 4 Valanda ũla waĩ mbee waĩ na ũasa wa mĩkono 20, ũthimene na ũthanthau wa ĩ nyũmba,* na ũtũlu wawʼo waĩ mĩkono 20;* na awũmbĩĩa thaavu mũtheu ngalĩko ya nthĩnĩ. 5 Nĩwavwʼĩkie nyũmba ĩsu nene na mbwaũ sya mĩvelosi, ĩtina wa ũu, nĩwamyũmbĩĩie thaavu mũseo, na ĩndĩ amyanakavya na mavisa ma mĩtĩ ya mĩtende na nyololo. 6 O na ĩngĩ, nĩwoombĩĩie nyũmba ĩsu mavia manake ma thooa mũnene; na thaavu ũla watũmĩie waumĩte Valivaimu. 7 Nĩwoombĩĩie thaavu nyũmbanĩ ĩsu, mĩambanĩ, mbwaũnĩ ila syaĩ ungu wa mĩomo, ngũtanĩ syayo, na mĩomonĩ yayo; na avanĩĩa mavisa ma akelũvi ngũtanĩ.

8 Na ĩndĩ nĩwaseũvisye kasũmba ka* vala Vandũ Vatheu Vyũ; ũasa wako weanene na ũthanthau wa nyũmba ĩsu, mĩkono 20, na ũthanthau wako waĩ mĩkono 20. Nĩwakombĩĩie talendi 600* sya thaavu mũseo. 9 Ũito wa thaavu ũla wombĩĩiwe mĩsumaa waĩ sekeli 50;* na oombĩĩa tũsũmba twa ĩũlũ thaavu.

10 Na ĩndĩ aseũvĩsya mĩvwʼano ĩlĩ ya akelũvi kasũmbanĩ ka* vala Vandũ Vatheu Vyũ, na amyũmbĩĩa thaavu. 11 Ũasa wʼonthe wa nthwau sya akelũvi asu waĩ mĩkono 20; ũthwau ũmwe wa mũkelũvi wa mbee waĩ na ũasa wa mĩkono ĩtano na watinĩte ũkũta wa nyũmba ĩsu, nawʼo ũthwau ũla ũngĩ waĩ na ũasa wa mĩkono ĩtano na watinĩte ũthwau ũmwe wa mũkelũvi ũla ũngĩ. 12 Na ũthwau ũmwe wa mũkelũvi ũla ũngĩ waĩ na ũasa wa mĩkono ĩtano na watinĩte ũkũta ũla ũngĩ wa nyũmba ĩsu, na ũthwau ũla ũngĩ waĩ na ũasa wa mĩkono ĩtano na watinĩte ũthwau ũmwe wa mũkelũvi ũla wa mbee. 13 Nthwau sya akelũvi asu syatambũũkĩte ũasa wa mĩkono 20; na maũngye na nyaaĩ syoo, na makasisya ngalĩko ya nthĩnĩ.*

14 O na ĩngĩ, nĩwaseũvisye vasia wa ũlii wa mbuluu, w’ĩa wa langi wa nzambalaũ, ndii ndune, na kĩtambaa kĩseo, na aũtumĩĩa mavisa ma akelũvi.

15 Na ĩndĩ aseũvya ituĩ ilĩ mbee wa nyũmba ĩsu, syĩ na ũasa wa mĩkono 35, na kĩla kĩtuĩ kyaĩ na ngovia yĩ na ũasa wa mĩkono ĩtano. 16 Na aseũvya nyololo, iilye masoa, na asyĩkĩa ĩũlũ wa ituĩ isu, na aseũvya makũngũmanga 100 na amekĩa nyololonĩ isu. 17 Na aũngamya ituĩ isu mbee wa ĩkalũ, kĩtuĩ kĩmwe kwʼokonĩ kwa aũme* na kĩtuĩ kĩla kĩngĩ kwʼokonĩ kwa aka;* eetie kĩla kyaĩ kw’okonĩ kwa aũme Yakini* na kĩla kyaĩ kw’okonĩ kwa aka Mboasi.*

4 Na ĩndĩ aseũvya kĩthembeo kya ũthuku kĩ na ũasa wa mĩkono 20, ũthanthau wa mĩkono 20, na ũtũlu wa mĩkono 10.

2 Nĩwaseũvisye Ũkanga wa* kyũma kĩtwekethye. Ũkanga ũsu waĩ wa kĩlinge, na kuma ũtiivonĩ ũmwe kũkĩlanĩlya nginya ũtiivonĩ ũla ũngĩ waĩ wa mĩkono 10 na waĩ na ũtũlu wa mĩkono 5, na waĩ ũtonya kũthyũlũlũkwa nĩ ũlii wĩ na ũasa wa mĩkono 30. 3 Ĩtheo wawʼo vaanakavĩtwʼe na tũkulu tweekĩĩtwe kũũthyũlũlũka. Kĩla mũkono ũmwe waĩ na tũkulu ĩkũmi tũvangĩtwe kũthyũlũlũka Ũkanga ũsu wʼonthe. Tũkulu tũu twaĩ lainĩ ilĩ na twaĩ twa kyũma kĩtwekethye na twaseũvanĩwʼe na Ũkanga ũsu ũkethĩa nĩ kĩndũ kĩmwe. 4 Ũkanga ũsu wailĩĩlwe ĩũlũ wa nzaũ 12, nzaũ 3 isyaĩtye ngalĩko ya ĩũlũ, 3 isyaĩtye ngalĩko ya ũthũĩlonĩ wa sua, 3 isyaĩtye ngalĩko ya ĩtheo, na 3 isyaĩtye ngalĩko ya wumĩlonĩ wa sua; na Ũkanga ũsu wailĩĩlwe ĩũlũ wasyo, na ngalĩko ya ĩtina ya nzaũ isu syonthe yeelekele katĩkatĩ. 5 Na kĩthimo kya wimbu wa Ũkanga ũsu kyaĩ kĩtaa kya kwʼoko;* na ũtiivo wawʼo waseũvĩtwʼe ta ũtiivo wa kĩkombe, o ta ĩlaa ya lili ĩvalĩku. Ĩtangi yĩu yaĩ yĩtonya kwĩanĩa kĩwʼũ kya kĩthimo kya* mbathi 3,000.*

6 O na ĩngĩ, nĩwaseũvisye tũlaĩ ĩkũmi twa kũthambĩa na aia tũtano kw’okonĩ kwa aũme na tũtano kw’okonĩ kwa aka. Vau nĩ vo mathambĩasya syĩndũ ila syatũmĩawa kwondũ wa nthembo sya kũvĩvw’a. Ĩndĩ athembi nĩmo mathambĩaa ũla Ũkanganĩ.

7 Na ĩndĩ aseũvya syĩndũ ĩkũmi iseũvĩtwʼe na thaavu sya kwilĩĩla taa, o tondũ weeaĩwe, na asiia ĩkalũnĩ, itano kw’okonĩ kwa aũme na itano kw’okonĩ kwa aka.

8 O na ĩngĩ, nĩwaseũvisye mesa ĩkũmi na asiia ĩkalũnĩ, itano kw’okonĩ kwa aũme na itano kw’okonĩ kwa aka; na aseũvya mbakũli 100 sya thaavu.

9 Na ĩndĩ aseũvya kĩwanza kya athembi na kĩla kĩwanza kĩnene* na mĩomo ya kĩwanza kĩu, na oombĩĩa mĩomo yasyo ũthuku. 10 Na aia ũla Ũkanga kw’okonĩ kwa aũme, ngalĩko ya ĩtheo kwelekela wumĩlonĩ wa sua.

11 O na ĩngĩ, Ilamu nĩwaseũvisye ndoo sya kũvetanga mũu, mĩko, na mbakũli.

Na ũu nĩwʼo Ilamu waminie kũtethya wĩa ũkonetye nyũmba ya Ngai ũla wa w’o ũla watethisye kwondũ wa Mũsumbĩ Solomoni. 12 Nĩwaminie kũseũvya ila ituĩ ilĩ na ngovia syasyo iilye mbakũli ila syaĩ ĩũlũ wa ituĩ isu ilĩ; ila syĩndũ ilĩ sya wanake iilye ta neti syavwʼĩkĩte ila ngovia ilĩ iilye mbakũli syaĩ ĩũlũ wa ituĩ isu; 13 ala makũngũmanga 400 meekĩĩtwe lainĩnĩ ilĩ ĩũlũ wa kĩla kĩmwe kya ila syĩndũ ilĩ syailye ta neti, nĩ kana mavwʼĩke ngovia ilĩ iilye mbakũli ila syaĩ ĩũlũ wa ila ituĩ; 14 ala makasya ĩkũmi* na tũla tũlaĩ ĩkũmi twa makasya asu; 15 ũla Ũkanga na nzaũ 12 ila syaĩ ungu wawʼo; 16 o vamwe na ndoo sya kũvetanga mũu, mĩko, ũma, na mĩio yonthe ĩkonanĩtye na syĩndũ isu ĩla Ilamu-avivu waseũvĩsye Mũsumbĩ Solomoni atũmĩĩte ũthuku mũkũlũte nesa kwondũ wa nyũmba ya Yeova. 17 Mũsumbĩ nĩwaseũvĩisye syĩndũ isu ũiĩnĩ wa Yolotani,* katĩkatĩ wa Sukothi na Nzeleta; nĩwaiseũvisye na ũthuku mũtwekethye mũthanganĩ wa yũmba. 18 Mĩio ĩsu yonthe Solomoni waseũvisye yaĩ mingĩ mũno; ũito wa ũthuku ũsu ndwaamanyĩka.

19 Solomoni nĩwaseũvisye mĩio yonthe kwondũ wa nyũmba ya Ngai ũla wa w’o: kĩthembeo kya thaavu; mesa sya kwilĩĩla mĩkate ya wonanyʼo; 20 syĩndũ sya kwilĩĩla taa sya thaavu mũtheu na taa syasyo sya thaavu mũtheu, syakanae mbee wa kasũmba kala ka nthĩnĩ vyũ kwosana na kĩla kyawetetwe; 21 na malaa mavalĩku, taa, na mĩkasi ya kũkwatĩĩa ndambi, na syonthe syaĩ sya thaavu, thaavu mũtheu vyũ; 22 syĩndũ sya kũvosya mwaki, mbakũli, ikombe, na syĩndũ sya kwĩkĩa mwaki, na syonthe syaĩ sya thaavu mũtheu; na mũomo wa nyũmba ĩsu, mĩomo yayo ya nthĩnĩ ya vala Vandũ Vatheu Vyũ, na mĩomo ya nyũmba ya ĩkalũ, yaĩ ya thaavu.

5 Kwoou Solomoni amina wĩa wʼonthe ũla waĩ atethye kwondũ wa nyũmba ya Yeova. Na ĩndĩ Solomoni aete syĩndũ ila Ndaviti ĩthe wake watheetye, na aia vetha, thaavu, na syĩndũ syonthe kũla kwaiawa ũthwii wa nyũmba ya Ngai ũla wa w’o. 2 Ĩvindanĩ yĩu, Solomoni nĩwoombanisye atumĩa ma Isilaeli, onthe ala maĩ aũngamĩi ma mbaĩ sya Isilaeli na maĩ anene ma nyũmba sya aa-ĩthe ma Isilaeli. Nĩmaendie Yelusalemu nĩ kana mambatye ĩsandũkũ ya ũtianĩo wa Yeova kuma Ndũanĩ ya Ndaviti, nayo nĩ Saioni. 3 Aũme onthe ma Isilaeli nĩmoombanie mbee wa mũsumbĩ mbokanĩ* ĩla yĩkawa mweinĩ wa mũonza.

4 Na kwoou atumĩa onthe ma Isilaeli mooka, na Alivai mookĩlya yĩla Ĩsandũkũ. 5 Na ĩndĩ mambatya Ĩsandũkũ, ĩeema ya kũmbanĩa, na mĩio yonthe mĩtheu ĩla yaĩ ĩeemanĩ yĩu maitwaa nyũmbanĩ ya Ngai. Athembi na Alivai* nĩmo mambatisye syĩndũ isu. 6 Na Mũsumbĩ Solomoni na ũmbano wʼonthe wa Isilaeli, onthe ala moombanĩtwʼe makomane nake, maĩ mbee wa yĩla Ĩsandũkũ. Na malondu maingĩ na ngʼombe mbingĩ itaĩ italĩka na itaĩ imanyĩka iana ata nĩsyaendeee kũthembwa. 7 Na ĩndĩ athembi malikya ĩsandũkũ ya ũtianĩo wa Yeova vala yaaĩlĩte kwiwa nyũmbanĩ, o kasũmbanĩ kala ka nthĩnĩ vyũ, vala Vandũ Vatheu Vyũ, ungu wa nthwau sya akelũvi. 8 Nthwau sya akelũvi asu syatambũũkĩte ĩũlũ wa vala Ĩsandũkũ yĩu yaiĩtwe; na nũndũ wa ũu, akelũvi asu nĩmavwʼĩkĩte Ĩsandũkũ yĩu na mĩtĩ yayo ya kũyĩkua. 9 Mĩtĩ ĩsu yaĩ mĩasa mũno ũkethĩa mĩthya yayo nĩyenekee wĩ vala Vandũ Vatheu, vala vaĩ ngalĩko ya mbee ya kala kasũmba ka nthĩnĩ vyũ, ĩndĩ ndwaĩ ũmyona wĩ nza. Na yĩ o vau nginya ũmũnthĩ. 10 Vayaĩ kĩndũ kĩngĩ Ĩsandũkũnĩ yĩu ate o ala masengea elĩ Mose weekĩie vau ĩvindanĩ yĩla maĩ Olevu, yĩla Yeova watianĩie ũtianĩo na andũ ma Isilaeli me kyalonĩ maumĩte Misili.

11 Yĩla athembi maumie vala vandũ vatheu (nĩkwĩthĩwa athembi onthe ala maĩ vau nĩmetheetye, o na methĩwe maĩ ma ikundi syĩva), 12 aini onthe Alivai ala matongoewʼe nĩ Asavu, Emani, Yetuthuni, na ana moo na ana-a-ĩthe meekĩĩte ngũa sya kĩtambaa kĩseo, makwete masaya, mĩio ya kũinga yĩ na ndii, na mĩio ya wathi yĩ na ndii 12;* maũngye ngalĩko ya wumĩlonĩ wa sua ya kĩthembeo, na maĩ vamwe na athembi 120 ala mavuvaa masoo. 13 Avuvi ma masoo na aini maendeee kũtaĩa Yeova na kũmũtũngĩa mũvea me ngwatanĩo, na wasya ũsu nĩwambatie kuma masoonĩ, masayanĩ, na mĩionĩ ĩngĩ ya wathi ĩla matũmĩaa kũtaĩa Yeova, “nũndũ nĩ mũseo; wendo wake ũtathelaa wĩkalaa tene na tene.” Ndatĩkanĩ ĩsu, ĩtu nĩyausũie nyũmbanĩ ĩsu, nyũmbanĩ ya Yeova. 14 Na athembi mayaĩ matonya kũũngama mathũkũme nũndũ wa ĩtu yĩu, nĩkwĩthĩwa ũtheu mũtisu wa Yeova nĩwausũie nyũmbanĩ ya Ngai ũla wa w’o.

6 Na ĩvindanĩ yĩu, Solomoni asya: “Yeova aisye kana akekalaa nthĩnĩ wa ũtuku mwingĩ. 2 Yu nĩnakwakĩa nyũmba yũkĩlĩtwʼe, vandũ valũlũmĩĩlye ũkatũaa vo tene na tene.”

3 Na ĩndĩ mũsumbĩ avĩndũka asisya ũmbano wʼonthe wa Isilaeli na ambĩĩa kũũathima, onthe ala maĩ ũmbanonĩ ũsu maũngye. 4 Na asya: “Yeova Ngai wa Isilaeli nataĩwe, ũla wanengie ĩthe wakwa Ndaviti watho na kanywʼa wake na ũwĩanĩĩtye na moko make mwene, ayasya, 5 ‘Kuma mũthenya ũla naumisye andũ makwa nthĩ ya Misili, ndyaanyuva ndũa mbaĩnĩ syonthe sya Isilaeli nakĩwe nyũmba vo kwondũ wa ĩsyĩtwa yakwa nĩ kana yĩkalae vo, na ndyaanyuva mũndũũme ethĩwe mũtongoi ĩũlũ wa andũ makwa Aisilaeli. 6 Ĩndĩ nĩnĩnyuvĩte Yelusalemu nĩ kana ĩsyĩtwa yakwa yĩkalae vo, na nĩnĩnyuvĩte Ndaviti ethĩwe ĩũlũ wa andũ makwa Aisilaeli.’ 7 Na waĩ wendi wa ngoo ya ĩthe wakwa Ndaviti kwaka nyũmba kwondũ wa ĩsyĩtwa ya Yeova Ngai wa Isilaeli. 8 Ĩndĩ Yeova amwĩa ĩthe wakwa Ndaviti atĩĩ: ‘Nĩ wendi wa ngoo yaku kwaka nyũmba kwondũ wa ĩsyĩtwa yakwa, na nĩwĩkĩte nesa kwĩthĩwa na wendi ũsu ngoonĩ. 9 O na vailye ũu, ndwĩmbakĩa nyũmba ĩsu, ĩndĩ mwana waku ũla ũkasyaĩwa* nĩwe ũkaka nyũmba kwondũ wa ĩsyĩtwa yakwa.’ 10 Yeova nĩwĩanĩĩtye watho ũla wathanie, nũndũ yu nĩnosete mwanya wa ĩthe wakwa Ndaviti na ninyie nĩkalĩle kĩvĩla kya ũsumbĩ kya Isilaeli, o tondũ Yeova wathanie. O na ĩngĩ, nĩnakĩte nyũmba kwondũ wa ĩsyĩtwa ya Yeova Ngai wa Isilaeli, 11 na vau nĩniĩte yĩla Ĩsandũkũ yĩ na ũtianĩo ũla Yeova watianĩe na andũ ma Isilaeli.”

12 Na ĩndĩ aũngama mbee wa kĩthembeo kya Yeova mbee wa ũmbano wʼonthe wa Isilaeli, na atambũũkya moko make. 13 (Nĩkwĩthĩwa Solomoni nĩwaseũvĩtye kĩtaa kya kũkinya* kya ũthuku na akakia katĩkatĩ wa kĩwanza.* Kyaĩ na ũasa wa mĩkono ĩtano,* ũthanthau wa mĩkono ĩtano, na ũtũlu wa mĩkono ĩtatũ; na aũngama ĩũlũ wakyo.) Na ĩndĩ atulya ndu mbee wa ũmbano wʼonthe wa Isilaeli na atambũũkya moko make melekele ĩtunĩ, 14 na asya: “Ame Yeova Ngai wa Isilaeli, kũi Ngai taku ĩtunĩ kana nthĩ, we ũla wĩanĩasya ũtianĩo na wonasya athũkũmi maku ala makinyĩlaa nzĩanĩ yaku na ngoo yoo yonthe wendo ũtathelaa. 15 Nĩwĩanĩĩtye watho ũla wathie mũthũkũmi waku Ndaviti ĩthe wakwa. Nĩwathanie watho ũsu na kanywʼa waku mwene, na ũmũnthĩ nĩwawĩanĩsya na kw’oko kwaku mwene. 16 Na yu, ame Yeova Ngai wa Isilaeli, ĩanĩsya watho ũla wathie mũthũkũmi waku Ndaviti ĩthe wakwa yĩla wamwĩie atĩĩ: ‘Vaikaatĩa kwĩthĩwa mũndũũme wa nyũmba yaku wĩkalĩle kĩvĩla kya ũsumbĩ kya Isilaeli mbee wakwa; ĩndĩ ũu ũkeethĩawa o ethĩwa ana maku makasũvĩaa mĩendele yoo na maikinyĩlaa mĩaonĩ yakwa, o tondũ we wĩthĩĩtwe ũikinyĩla nzĩanĩ yakwa.’ 17 Yu ĩndĩ, ame Yeova Ngai wa Isilaeli, eka watho ũla wamwathie mũthũkũmi waku Ndaviti wĩthĩwe wĩ wa kũĩkĩĩka.

18 “Ĩndĩ kwa wʼo Ngai akatũa vamwe na andũ ĩũlũ wa nthĩ? Sisya! Matu, ĩĩ, o na ĩtu yĩla yĩ ĩũlũ wa matu, yĩikwĩanĩa; nata ĩndĩ ĩũlũ wa nyũmba ĩĩ nakĩte! 19 Yu ĩndĩ ĩthukĩĩsye mboya yakwa nyie mũthũkũmi waku na ũyĩthukĩĩsya wĩsũvano wakwa wa kwonwʼa ũseo, ame Yeova Ngai wakwa, na mbĩthukĩĩsye yĩla ngũkwĩkaĩla na ũyĩthukĩĩsya mboya yakwa nyie mũthũkũmi waku ĩla ngũvoya nĩ mbee waku. 20 Metho maku nĩmasyaĩĩasye nyũmba ĩno mũthenya na ũtukũ, nĩmasyaĩĩasye vandũ vaa waisye ũkaia ĩsyĩtwa yaku, nĩ kana wĩthukĩĩsye mboya yakwa nyie mũthũkũmi waku ĩla ngũvoya kwelekela vandũ vaa. 21 Na ĩthukĩĩsye wĩsũvano wakwa nyie mũthũkũmi waku wa kwĩtya ũtethyo na wĩsũvano wa andũ maku Isilaeli yĩla meũvoya kwelekela vandũ vaa, na mwa ĩthukĩĩsye wĩ wĩkalonĩ waku, wĩ ĩtunĩ; ĩĩ, mwa ĩthukĩĩsye na ũiekea.

22 “Ethĩwa mũndũ akavĩtĩsya ũngĩ na ũsu wamũvĩtĩsya aituma evĩta wĩvĩto* na wĩvĩto ũsu ũyĩthĩwa ũmwovete,* na yĩla ũkethĩwa ovetwe nĩ wĩvĩto ũsu* ayũka mbee wa kĩthembeo kyaku kĩla kĩ nyũmbanĩ ĩno, 23 mwa wĩĩthukĩĩsya wĩ kũu ĩtunĩ na ũyosa ĩtambya na ũisilanyʼa athũkũmi maku kwa kũĩvanĩsya ũla mũthũku na kũete ĩũlũ wa mũtwe wake mwene kĩla wĩkĩte na kwa kũmũtwʼĩĩa ũla mũlũngalu kwĩthĩwa ate na ĩvĩtyo* na ũimũtuva kwosana na ũlũngalu wake mwene.

24 “Na ethĩwa andũ maku Isilaeli makasindwa nĩ mũmaitha nũndũ wa kũũvĩtĩsya ĩngĩ na ĩngĩ, na maisyoka na maikumya ĩsyĩtwa yaku na maiũvoya na maikwĩsũva ũmonyʼe ũseo me mbee waku nyũmbanĩ ĩno, 25 wĩĩthukĩĩsya wĩ ĩtunĩ na ũiekea andũ maku Isilaeli naĩ yoo na ũimatũnga nthĩ ĩla wamanengie vamwe na aa-ũmae moo.

26 “Yĩla matu makavingwa na kũyĩthĩwa kũte mbua nũndũ nĩmethĩĩtwe maiũvĩtĩsya, na maivoya kwelekela vandũ vaa na maikumya ĩsyĩtwa yaku na mayĩthyũũa matie naĩ yoo nũndũ nĩwatuma menyivya,* 27 wĩĩthukĩĩsya athũkũmi maku wĩ kũu ĩtunĩ na ũimaekea naĩ yoo, naĩ ya andũ maku Isilaeli, nĩkwĩthĩwa ũkamamanyĩsya nzĩa nzeo ĩla maĩlĩte kũkinyĩlaa; na wĩete mbua ĩũlũ wa nthĩ yaku ĩla wanengie andũ maku yĩthĩwe ũtiĩwa woo.

28 “Ethĩwa nthĩ ĩkakwatwa nĩ yũa, kana ũwau wa kũkwatanw’a, kana mbaa, kana mbuka, kana ikundi sya ngie, kana ngie* mbanangi kana ethĩwa amaitha moo makamathyũlũlũka ndũanĩ o na yĩva ya ĩ nthĩ* kana ethĩwa makakwata ũkũno kana ũwau ũngĩ o na wĩva, 29 mboya o na yĩva, ndeto o na yĩva ya wĩsũvano wa kwonwʼa ũseo ĩla ĩkaneenwa nĩ mũndũ o na wĩva kana nĩ andũ maku onthe Isilaeli (nũndũ kĩla ũmwe nĩwe wĩsĩ thĩna wake mwene na woo wake mwene) yĩla makatambũũkya moko moo melekele nyũmba ĩno, 30 wĩmethukĩĩsya wĩ kũu ĩtunĩ, wĩkalonĩ waku, na ũimaekea; na wĩtuva kĩla ũmwe kwosana na nzĩa syake syonthe, nũndũ we nĩwĩsĩ ngoo yake (we wĩ weka nue wĩsĩ nesa ngoo ya mũndũ), 31 nĩ kana maũkĩae kwa kũendelaa nzĩanĩ syaku mĩthenyanĩ yonthe ĩla makekala nthĩ ĩla wanengie aa-ũmae maitũ.

32 “O na ĩngĩ, kwondũ wa mũeni ũla ũte ũmwe wa andũ maku Isilaeli na wũkĩte kuma nthĩ ya kũasa nũndũ wa ĩsyĩtwa yaku ĩnene* na kwʼoko kwaku kwĩ vinya na kwʼoko kwaku kũtambũũkye, ooka na aivoya kwelekela nyũmba ĩno, 33 wĩmwĩthukĩĩsya wĩ kũu ĩtunĩ, wĩkalonĩ waku, na ũyĩka kyonthe kĩla mũeni ũsu ũkaũkũlya, nĩ kana ngo syonthe sya andũ ĩũlũ wa nthĩ syĩmanya ĩsyĩtwa yaku na iiũkĩa, o tondũ andũ maku Isilaeli mekaa, na iimanya kana nyũmba ĩno nakĩte yĩtanĩawʼa na ĩsyĩtwa yaku.

34 “Ethĩwa ũkatũma andũ maku makokite na amaitha moo o na ethĩwa me va na maikũvoya melekele ndũa ĩĩ ũnyuvĩte na kwelekela nyũmba ĩno nakĩte kwondũ wa ĩsyĩtwa yaku, 35 wĩĩthukĩĩsya mboya yoo wĩ kũu ĩtunĩ na ũyĩthukĩĩsya wĩsũvano woo wa kwonwʼa ũseo na ũyosa ĩtambya kwondũ woo.

36 “Ethĩwa makaũvĩtĩsya (nĩkwĩthĩwa vai mũndũ ũtekaa naĩ), na ũimathilĩkĩla na ũimalekelya mũmaitha, na ala mamatavĩte maimatwaa nthĩ ĩngĩ, yĩthĩwe yĩ kũasa kana yĩ vakuvĩ, 37 na maisyokewa nĩ kĩlĩko me nthĩ ĩla matwaiwe nĩ ala mamatavie, na maiũsyokea na maikwĩsũva ũmonyʼe ũseo me nthĩ ĩla mataviwe matwawa, mayasya, ‘Nĩtwĩkĩte naĩ na nĩtũvĩtĩtye; ũndũ ũla twĩkĩte nĩ mũthũku,’ 38 na maiũsyokea na ngoo yoo yonthe na thayũ* woo wʼonthe me nthĩ ĩla mataviwe matwawa, na maivoya melekele nthĩ yoo ĩla wanengie aa-ũmae moo na melekele ndũa ĩla ũnyuvĩte na nyũmba ĩno nakĩte kwondũ wa ĩsyĩtwa yaku, 39 wĩmethukĩĩsya wĩ kũu ĩtunĩ, wĩkalonĩ waku, wĩĩthukĩĩsya mboya yoo na wĩsũvano woo wa kwonwʼa ũseo, na ũyosa ĩtambya kwondũ woo na ũiekea andũ maku ala maũvĩtĩsye.

40 “Yu, ame Ngai wakwa, nĩngũkwĩsũva, metho maku nĩmasalukye na matũ maku mayĩthukĩĩsya nesa mboya ĩla ĩkũvoyewa vandũnĩ* vaa. 41 Na yu, ame Yeova Ngai, ambata ũthi vandũnĩ vaku va kũthũmũa, we na Ĩsandũkũ ya vinya waku. Ame Yeova Ngai, eka athembi maku mavwʼĩkwe ũtangĩĩo, na eka aĩkĩĩku maku matanĩe ũseonĩ waku. 42 Ame Yeova Ngai, ndũkalee* mwĩtĩkĩw’a mauta waku. Mwa lilikana wendo waku ũtathelaa kwelekela mũthũkũmi waku Ndaviti.”

7 Yu yĩla Solomoni waminie kũvoya oou, mwaki nĩwatheeie wumĩte ĩtunĩ na wavĩvya ĩla nthembo ya kũvĩvw’a na nthembo ingĩ, na ũtheu mũtisu wa Yeova wausũa nyũmba ĩsu. 2 Athembi mayaĩ matonya kũlika nyũmbanĩ ya Yeova nĩkwĩthĩwa ũtheu mũtisu wa Yeova nĩwausũĩte nyũmbanĩ ya Yeova. 3 Na andũ onthe ma Isilaeli nĩmoonie mwaki ũitheea kuma ĩtunĩ na ũtheu mũtisu wa Yeova ũyusũa nyũmba ĩsu, na kwoou makumana na mothyũ moo nginya nthĩ na mavalũka na mamũtũngĩa Yeova mũvea, “nũndũ nĩ mũseo; wendo wake ũtathelaa wĩkalaa tene na tene.”

4 Yu ĩndĩ, mũsumbĩ na andũ onthe nĩmamũthembeie Yeova nthembo mbingĩ. 5 Mũsumbĩ Solomoni athembie ngʼombe 22,000 na malondu 120,000. Na ũu nĩwʼo mũsumbĩ na andũ onthe mavathie nyũmba ya Ngai ũla wa w’o kwondũ wa kũtũmĩwa. 6 Athembi maũngamĩte kũla maaĩle kũũngama me iandanĩ syoo, o ta Alivai ala maĩ na mĩio ĩla yatũmĩawa kũmwinĩa Yeova. (Mũsumbĩ Ndaviti aseũvĩtye mĩio ĩsu kwondũ wa kũmũtũngĩaa Yeova mũvea, “nũndũ wendo wake ũtathelaa wĩkalaa tene na tene,” yĩla Ndaviti ũkũmũtaĩa Ngai namo.*) Na athembi mavuvĩte masoo na wasya mũnene me mbee woo, namo Aisilaeli onthe nĩmaũngye.

7 Na ĩndĩ Solomoni nĩwatheisye kĩsio kĩla kyaĩ katĩkatĩ wa kĩwanza kĩla kyaĩ mbee wa nyũmba ya Yeova, nĩkwĩthĩwa vau nĩ vo waaĩle kũthembea nthembo sya kũvĩvw’a na ilungu sya mathunya ma nthembo ya ngwatanĩo, nũndũ kĩthembeo kya ũthuku kĩla Solomoni waseũvĩtye kĩyaĩ kĩanĩa nthembo isu sya kũvĩvw’a, nthembo sya lĩu, na ilungu sya mathunya. 8 Ĩvindanĩ yĩu, Solomoni nĩwatanĩie mboka ĩsu mĩthenya mũonza e vamwe na Aisilaeli onthe, na waĩ ũmbano mũnene mũno wa andũ kuma Levo-amathi* kũtheea nginya Kyandanĩ kya* Misili. 9 Ĩndĩ mũthenyanĩ wa nyanya* nĩmeethĩiwe na ũmbano wa mwanya, nĩkwĩthĩwa mĩthenya mũonza nĩmeethĩĩtwe maivatha kĩthembeo kwondũ wa kũtũmĩwa na nĩmatanĩĩte mboka ĩsu mĩthenya mũonza. 10 Na ĩndĩ mũthenyanĩ wa 23, mweinĩ wa mũonza, nĩwoombũũkisye andũ masyoke mĩsyĩ kwoo me atanu na me na mũyo mwingĩ ngoonĩ nũndũ wa ũseo ũla Yeova woonetye Ndaviti na Solomoni na andũ make Isilaeli.

11 Kwoou Solomoni nĩwaminie kwaka nyũmba ya Yeova na nyũmba ya mũsumbĩ; na Solomoni nĩweanĩisye nesa kyonthe kĩla kyookie ngoonĩ yake kĩkonetye nyũmba ya Yeova na nyũmba yake mwene. 12 Nĩvo ĩndĩ Yeova wamumĩlĩĩile Solomoni ũtukũ na amwĩa atĩĩ: “Nĩneewʼa mboya yaku, na nĩneenyuvĩa vandũ vaa vethĩawe nyũmba ya kumĩawʼa nthembo. 13 Yĩla ngavinga matu wĩthĩe kũi mbua na yĩla ngeaĩa itooli* syanange nthĩ na ethĩwa ngaetee andũ makwa ũwau wa kũkwatanw’a, 14 ethĩwa andũ makwa ala metanĩawʼa na ĩsyĩtwa yakwa makeenyivya na maimboya na maimantha ũthyũ wakwa na mayĩthyũũa matie nzĩa syoo nthũku, nĩvo ĩndĩ ngewʼa nĩ ĩtunĩ na ndiekea naĩ yoo na ndivosya nthĩ yoo. 15 Yu metho makwa makeethĩawa masalukĩtwʼe na matũ makwa makeethukĩĩasya nesa mboya ila syĩũvoyewa vandũ vaa. 16 Na yu nĩnanyuva nyũmba ĩno na namĩthesya nĩ kana ĩsyĩtwa yakwa yĩthĩawe vo ĩvinda yonthe, na metho makwa na ngoo yakwa ĩkeethĩawa vo kĩla ĩvinda.

17 “Naku a vaku, ethĩwa ũkakinyĩlaa nzĩanĩ yakwa o ta Ndaviti ĩthe waku kwa kwĩkaa kyonthe kĩla ngwĩaĩe, na ũiatĩĩa myolooto yakwa na motwʼĩo makwa, 18 nĩvo ĩndĩ ngalũlũmĩĩlya kĩvĩla kya ũsumbĩ waku, o tondũ natianĩie na ĩthe waku Ndaviti, ndimwĩa, ‘Vaikaatĩa kwĩthĩwa mũndũũme wa nyũmba yaku ũsumbĩkĩte Isilaeli.’ 19 Ĩndĩ ethĩwa ũkethyũũa na ũitia motwʼĩo makwa na mĩao yakwa ĩla ngũnengete na ũithi ũkathũkũme ngai ingĩ na ũiikumanĩa, 20 ngakũa Isilaeli vyũ kuma nthĩ ĩla nĩmanengete, na nyũmba ĩĩ ĩla nĩtheetye kwondũ wa ĩsyĩtwa yakwa ngamĩveta vyũ ũthyũnĩ wakwa, na ngamĩtwʼĩkĩthya kĩndũ kya kũvũthwʼa* na kĩndũ kya kũthekeewa ngonĩ syonthe sya andũ. 21 Na nyũmba ĩno ĩkatwʼĩka kĩvumbu kya nyũmba mbomboku. Na mũndũ o na wĩva esĩla vakuvĩ nayo akamĩketeea asengʼete na ayasya, ‘Nĩkĩ Yeova wĩkanĩte ũu na nthĩ ĩno na nyũmba ĩno?’ 22 Namo makasũngĩa ũũ, ‘Nũndũ nĩmamũtiie Yeova Ngai wa aa-ũmae moo, ũla wamaumisye nthĩ ya Misili, na nĩmalũmanilye na ngai ingĩ na kũikumanĩa na kũithũkũma. Nĩkyo kĩtumi ũetete mũisyo ũũ wʼonthe ĩũlũ woo.’”

8 Solomoni aakie nyũmba ya Yeova na nyũmba yake mwene* kwa ĩvinda ya myaka 20. 2 Na ĩndĩ ĩtina wa ũu, Solomoni nĩwatũngĩĩie ndũa ila Ilamu wamũnengete na anenga Aisilaeli* matũe vo. 3 O na ĩngĩ, Solomoni nĩwaendie Amathi-nzova na amĩkwata. 4 Na ĩndĩ nĩwalũlũmĩĩilye* Tatimoli kũu weũnĩ na ndũa syonthe ila waakĩte Amathi sya kwia syĩndũ. 5 O na ĩngĩ, nĩwaakie Mbethi-oloni ya Ĩũlũ na Mbethi-oloni ya Ĩtheo, na ndũa isu syaĩ mbiĩĩe na ngũta, mĩvĩa, na mĩamba, 6 na Mbaalathi o vamwe na ndũa syonthe sya Solomoni sya kwia syĩndũ, ndũa syonthe sya kwia makasya, ndũa sya atwai ma mbalasi, na kyonthe kĩla Solomoni waĩ na wendi wa kwaka kũu Yelusalemu, Levanoni, na kw’onthe kũla wasumbĩkĩte.

7 Na andũ onthe ala matialĩte katĩ wa Aititi, Aamoli, Avelisi, Aivi, na Ayevusi, ala mataĩ ma mbaĩ ya Isilaeli, 8 nzyawa syoo ila syatialĩte nthĩ ĩsu, ila Aisilaeli mataamina vyũ, nĩsyoombaniw’e nĩ Solomoni ithũkũmae wĩa wa kũlasimĩthw’a nginya ũmũnthĩ. 9 Ĩndĩ Solomoni ndaatw’ĩkĩthya Mũisilaeli o na ũmwe ngombo wĩanĩ wake, nĩkwĩthĩwa maĩ ngũmbaũ syake sya kaũ, anene ma makavuteni make, na anene ma atwai ma makasya make na ma atwai ma mbalasi syake. 10 Vaĩ anene 250 ma asyaĩĩsya ma Mũsumbĩ Solomoni, ala maũngamĩe andũ.

11 O na ĩngĩ, Solomoni nĩwaumisye mwĩĩtu wa Valao Ndũanĩ ya Ndaviti amũete nyũmbanĩ ĩla wamwakĩe, nĩkwĩthĩwa aisye: “O na kau we nĩ kĩveti kyakwa, ndaĩle kwĩkala nyũmbanĩ ya Mũsumbĩ Ndaviti wa Isilaeli, nũndũ kũndũ kũla Ĩsandũkũ ya Yeova yaetwe nĩ kũtheu.”

12 Na ĩndĩ Solomoni aumĩsya Yeova nthembo sya kũvĩvwʼa kĩthembeonĩ kya Yeova kĩla waakĩte mbee wa valanda. 13 Nĩwaatĩĩie mũvango wa kĩla mũthenya na aumya nthembo kwosana na mwĩao wa Mose kwondũ wa Savato, kũtisa kwa myei, na mboka ila syatwʼĩtwe syeekawa mavinda atatũ kwa mwaka, ila nĩ Mboka ya Mũkate ũte Ĩlawa, Mboka ya Syumwa, na Mboka ya Ivanda.* 14 O na ĩngĩ, nĩwanyuvie ikundi sya athembi nĩ kana ithũkũmae kwosana na mwĩao wa Ndaviti ĩthe wake, na Alivai methĩawe iandanĩ syoo kũla maĩle kwĩthĩwa, mataĩae Ngai na maithũkũmaa mbee wa athembi kwosana na mũvango wa kĩla mũthenya, na avanga asũvĩi ma mĩvĩa ikundinĩ syoo masũvĩae mĩvĩa yĩ kĩvathũkanyʼo, nĩkwĩthĩwa ũsu nĩwʼo waĩ mwĩao wa Ndaviti, mũndũ wa Ngai ũla wa w’o. 15 Na mayaaelelũka makatia mwĩao ũla mũsumbĩ wanengie athembi na Alivai ũkonetye ũndũ o na wĩva kana ũkonetye makũmbĩ. 16 Kwoou wĩa wʼonthe wa Solomoni wavangĩtwe nesa,* kuma mũthenya ũla mũsingi wa nyũmba ya Yeova weekĩiwe nginya yĩla nyũmba yathelile. Na nũndũ wa ũu, nyũmba ya Yeova yathela.

17 Ĩvindanĩ yĩu nĩwʼo Solomoni waendie Esioni-ngeveli na Elothi, ũteenĩ wa ũkanga nthĩ ya Etomu. 18 Ilamu nĩwatũmie athũkũmi make mwene mamũtwaĩe meli na andũ maĩ na ũtũĩka wa kũthi na meli. Maendanisye na athũkũmi ma Solomoni kũu Ovilu na moosa kũu talendi 450* sya thaavu na mamũetea Mũsumbĩ Solomoni.

9 Yu ĩndĩ, mũsumbĩ mũndũ mũka wa Sieva nĩweewie ũvoo ĩũlũ wa Solomoni, na kwoou athi Yelusalemu nĩ kana atate Solomoni na makũlyo me* vinya. Aendanisye na athũkũmi aingĩ mũno,* na ngamĩle syakuĩte mauta ma seli na thaavu mwingĩ mũno na mavia ma thooa mũnene. Nĩwalikile vala ve Solomoni na amũtavya maũndũ onthe ala maĩ ngoonĩ yake. 2 Nĩvo ĩndĩ Solomoni wamũsũngĩie makũlyo make onthe. Vayaĩ ũndũ o na ũmwe wĩ vinya mũno* ũndũ Solomoni ũtamũelesya.

3 Yĩla mũsumbĩ ũsu mũndũ mũka wa Sieva woonie ũĩ wa Solomoni, nyũmba ĩla waakĩte, 4 lĩu ũla waetawe mesanĩ yake, ũndũ athũkũmi make mekalaa mevangĩte mesanĩ, ũndũ athũkũmi make maetae lĩu mesanĩ na ngũa syoo, anengani make ma mbinyu na ngũa syoo, na nthembo syake sya kũvĩvwʼa ila waumasya kĩla ĩvinda nyũmbanĩ ya Yeova, atiiwe asengʼete mũno vyũ.* 5 Na kwoou eea mũsumbĩ atĩĩ: “Ũvoo ũla neewie nĩ nthĩ yakwa ĩũlũ wa maũndũ ala wĩanĩĩtye* na ĩũlũ wa ũĩ waku nĩ wa w’o. 6 Ĩndĩ ndyaaĩkĩĩa ũvoo ũsu nginya nooka na neeyonea na metho makwa mwene. Na sisya! o na ndyaatavwʼa nusu ya ũĩ waku mwingĩ. Nũvĩtũkĩte mũno ũvoo ũla neewie. 7 Aũme maku nĩ atanu, na athũkũmi maku ala maũngamaa mbee waku kĩla ĩvinda nĩ atanu, ala methukĩĩasya ũĩ waku! 8 Yeova Ngai waku nataĩwe, ũla woonanisye nũkũtanĩthwʼa nue yĩla wakwĩkalilye kĩvĩlanĩ kyake kya ũsumbĩ wĩthĩwe mũsumbĩ kwondũ wa Yeova Ngai waku. Nũndũ Ngai waku nĩwendete Isilaeli, nĩ kana atume ĩendeea kwĩthĩwa vo tene na tene, nũkũnyuvĩte wĩthĩwe mũsumbĩ ĩũlũ wayo nĩ kana ũsilanasye katĩ na ũiatĩĩa ũlũngalu.”

9 Na ĩndĩ anenga mũsumbĩ talendi 120* sya thaavu na mauta maingĩ mũno ma seli na mavia ma thooa mũnene. Vai ĩvinda yĩngĩ o na yĩva mauta ma seli maaetwe maingĩvĩte ta ala mũsumbĩ mũndũ mũka wa Sieva waeteie Mũsumbĩ Solomoni.

10 O na ĩngĩ, athũkũmi ma Ilamu na athũkũmi ma Solomoni ala maetie thaavu kuma Ovilu nĩmasyokie maete mbwaũ sya mĩsandali na mavia ma thooa mũnene. 11 Mũsumbĩ nĩwatũmĩie mbwaũ isu sya mĩsandali kũseũvya ngasi sya nyũmba ya Yeova na nyũmba ya mũsumbĩ, o vamwe na mĩio ya wathi yĩ na ndii 12* na mĩio ĩngĩ ya kũinga yĩ na ndii kwondũ wa aini. Vai ingĩ ta isu syaĩ syaaoneka ĩngĩ nthĩ ya Yuta.

12 O na ĩngĩ, Mũsumbĩ Solomoni nĩwanengie mũsumbĩ mũndũ mũka wa Sieva kyonthe kĩla wendeeiwʼe nĩkyo na kĩla wamwĩtisye, syĩndũ mbingĩ mũno kwĩ* ila waeteie mũsumbĩ. Na ĩtina wa ũu, mũsumbĩ ũsu mũndũ mũka nĩwaumie vau na asyoka nthĩ yake, e vamwe na athũkũmi make.

13 Na ũito wa thaavu ũla Solomoni waeteawe mwakanĩ ũmwe weethĩawa wa talendi 666 sya thaavu, 14 tũteũtala ũla waetawe nĩ atandĩthya na akũni ma viasala na asumbĩ onthe ma Aalavu na makavana ma ĩ nthĩ ala maeteae Solomoni thaavu na vetha.

15 Mũsumbĩ Solomoni nĩwaseũvisye ngao nene 200 sya thaavu mũvulanyʼe (kĩla ngao yaseũviwʼe na thaavu mũvulanyʼe wa sekeli 600)* 16 na ngao nini* 300 sya thaavu mũvulanyʼe (kĩla ĩmwe ya ngao isu nini yaseũviw’e na mina itatũ* sya thaavu). Ĩtina wa ũu, mũsumbĩ nĩwaiie ngao isu Nyũmbanĩ ya Kĩtheka kya Levanoni.

17 Na ĩndĩ mũsumbĩ aseũvya kĩvĩla kĩnene kya ũsumbĩ kya maeo ma nzou na akyũmbĩĩa thaavu mũtheu. 18 Vaĩ ngasi thanthatũ syambatĩte nginya kĩvĩlanĩ kĩu kya ũsumbĩ, na vaĩ kavĩla ka nyaaĩ ka thaavu kakwatanĩtwʼe na kĩvĩla kĩu, na ngalĩko syelĩ sya kĩvĩla kĩu syaĩ na vandũ va kwilĩĩla moko, na ũtee wa syĩndũ isu ilĩ sya kwilĩĩla moko vaĩ mĩnyambũ ĩlĩ ĩseũvĩtwʼe ĩũngeme. 19 Na vaĩ mĩnyambũ 12 yaseũvĩtwʼe yĩũngye ngasinĩ isu thanthatũ, mũnyambũ ũmwe mũthyanĩ ũmwe wa ngasi na mũnyambũ ũngĩ mũthyanĩ ũla ũngĩ wa ngasi. Vai ũsumbĩ ũngĩ waĩ waaseũvya kĩndũ ta kĩu. 20 Mĩio yonthe ĩla Mũsumbĩ Solomoni watũmĩaa kũnywʼĩĩa syĩndũ yaĩ ya thaavu, na mĩio yonthe ya Nyũmba ya Kĩtheka kya Levanoni yaĩ ya thaavu mũtheu. Vayaĩ kĩndũ o na kĩmwe kyaseũvĩtwʼe na vetha, nĩkwĩthĩwa vetha watalawa ta vathei mĩthenyanĩ ya Solomoni. 21 Nĩkwĩthĩwa meli sya mũsumbĩ syaendaa Talisisi na athũkũmi ma Ilamu. O ĩmwe kĩla myaka ĩtatũ, meli sya Talisisi nĩsyookaa syusĩe thaavu na vetha, maeo ma nzou, ngũlĩ,* na taũsi.

22 Kwoou Mũsumbĩ Solomoni aĩ mũnene kwĩ asumbĩ ala angĩ onthe ĩũlũ wa nthĩ nĩkwĩthĩwa aĩ na ũthwii mwingĩ na ũĩ mwingĩ. 23 Na asumbĩ ĩũlũ wa nthĩ yonthe nĩmamanthaa ũndũ matonya ũkomana na* Solomoni nĩ kana mewʼe ũĩ ũla Ngai ũla wa wʼo weekĩĩte ngoonĩ yake. 24 Kĩla ũmwe nĩwookaa akuĩte mũthĩnzĩo; nĩmaetae mĩthĩnzĩo ya syĩndũ sya vetha, syĩndũ sya thaavu, ngũa, mĩio ya kaũ, mauta ma seli, mbalasi, na nyũmbũ. Ũu nĩwʼo meekaa mwaka ĩtina wa mwaka. 25 Na Solomoni aĩ na itũũ 4,000 kwondũ wa mbalasi syake na makasya make na aĩ na mbalasi* 12,000, na amaiaa ndũanĩ sya kwia makasya vakuvĩ na mũsumbĩ kũu Yelusalemu. 26 Na nĩwasumbĩkie asumbĩ onthe ala maĩ kĩsionĩ kĩla kyaumĩte ũla Ũsĩnĩ* kũvika nthĩ ya Avilisiti na kũthi nginya mũvakanĩ wa Misili. 27 Mũsumbĩ nĩwatumie kwĩthĩwa na vetha mwingĩ Yelusalemu o ta mavia, na mbwaũ sya mũtalakwe* syaĩ mbingĩ o ta mĩkũyũ kĩsionĩ kya Sevela. 28 Na nĩmaeteae Solomoni mbalasi kuma Misili na nthĩ ila ingĩ syonthe.

29 Na ngewa ĩla ĩngĩ ya Solomoni, kuma mwambĩĩo nginya mũthya, yo ti mbandĩke ndetonĩ sya mwathani Nathani, wathaninĩ wa Aiya, ũla waĩ Mũsilo, na lekotinĩ sya Ito, ũla waĩ mwoni, na ũla wooniwʼe mawoni ĩũlũ wa Yelovoamu mwana wa Nevati? 30 Solomoni asumbĩkie Isilaeli yonthe e Yelusalemu myaka 40. 31 Na ĩndĩ Solomoni akwʼa na athikwa vamwe na aa-ũmae make. Kwoou mamũthika Ndũanĩ ya Ndaviti ĩthe wake; na mwana wake Leovoamu atwʼĩka mũsumbĩ vandũ vake.

10 Na Leovoamu athi Sekemu, nĩkwĩthĩwa Aisilaeli onthe maĩ manathi Sekemu nĩ kana mamũtwʼĩkĩthye mũsumbĩ. 2 Na yĩla Yelovoamu mwana wa Nevati weewie ũndũ ũsu oou (ĩvindanĩ yĩu aĩ o Misili nĩkwĩthĩwa nĩwasembete akakĩa Mũsumbĩ Solomoni), Yelovoamu nĩwasyokie aumĩte Misili. 3 Na ĩndĩ mamũtũmana oke, na Yelovoamu na Aisilaeli onthe mathi vala ve Leovoamu na masya: 4 “Ĩthe waku nũnatwaĩkĩtye ĩsoki yĩito. Ĩndĩ ethĩwa nũũtũolangĩla wĩa mũmũ ũla ĩthe waku ũnatũthũkũmĩthasya na ũitũolangĩla ũito* wa ĩsoki yĩla ũnatwaĩkĩtye, tũkaũthũkũmaa.”

5 Nĩvo ĩndĩ wameie: “Syokai vala nĩĩ ĩtina wa mĩthenya ĩtatũ.” Na kwoou andũ mathi. 6 Na ĩndĩ Mũsumbĩ Leovoamu aneena na aũme akũũ* ala mathũkũmaa Solomoni ĩthe wake yĩla waĩ thayũ nĩ kana amakũlye ũtao, na asya: “Mwĩnenga ũtao wĩva nĩ kana nĩmanye ũndũ ndonya kũsũngĩa andũ aa?” 7 Na mamũsũngĩa mamwĩa: “Weethĩwa wĩ mũseo kwa andũ aa na ũimendeesya na ũimasũngĩa nesa, makeethĩawa athũkũmi maku ĩvinda yonthe.”

8 Ĩndĩ alea ũtao ũla wanengiwe nĩ aũme akũũ,* na akũlya ũtao kuma kwa aũme ma mũika ala weanĩte namo na maĩ athũkũmi make ĩvindanĩ yĩu. 9 Amakũlilye: “Mwĩnenga ũtao wĩva tũmanye ũndũ tũtonya kũsũngĩa andũ aa meũmbĩa, ‘Tũolangĩle ũito wa ĩsoki yĩla ĩthe waku ũnatwaĩkĩtye’?” 10 Na ĩndĩ aũme ma mũika ala meanĩte nake mamwĩa: “Ũũ nĩwʼo ũũtavya ala meũkwĩa, ‘Ĩthe waku anatwaĩkĩtye ĩsoki yĩito, ĩndĩ waĩle kũtũolangĩla ũito wayo’; ũũ nĩwʼo ũũmatavya, ‘Kyaa kyakwa kya mwela kĩĩthĩwa kĩ kimbu kwĩ kĩnyunyu kya ĩthe wakwa. 11 Ĩthe wakwa anamwaĩkĩtye ĩsoki yĩito, ĩndĩ nyie nĩngwongeleela ũito wa ĩsoki yenyu. Ĩthe wakwa anamũkũnaa na mĩtalisa, ĩndĩ nyie ngeekaa ũu na mĩtalisa yĩ na mĩwʼa.’”

12 Na Yelovoamu na andũ onthe masyoka vala ve Leovoamu mũthenyanĩ wa katatũ, nũndũ mũsumbĩ aĩtye: “Syokai vaa nĩĩ mũthenyanĩ wa katatũ.” 13 Ĩndĩ mũsumbĩ asũngĩa andũ e mũkalĩ. Kwoou Mũsumbĩ Leovoamu alea ũtao wa ala aũme akũũ.* 14 Na kwoou aneena namo kwosana na ũtao ũla wanengiwe nĩ ala aũme ma mũika, ayasya: “Nĩngũitavĩĩsya ĩsoki yenyu, na ndyongeleela ũito wayo. Ĩthe wakwa anamũkũnaa na mĩtalisa, ĩndĩ nyie ngeekaa ũu na mĩtalisa yĩ na mĩwʼa.” 15 Kwoou mũsumbĩ aema kwĩthukĩĩsya andũ, nũndũ Ngai ũla wa wʼo nĩwe watumĩte maũndũ mathi ũu, nĩ kana ndeto ya Yeova ĩanĩe ĩla watũmie Aiya, ũla waĩ Mũsilo, atavye Yelovoamu mwana wa Nevati.

16 Namo Aisilaeli onthe, moona mũsumbĩ nĩwalea kũmethukĩĩsya, mamũsũngĩie atĩĩ: “Twĩ na kĩanda kyaũ vala ve Ndaviti? Tũi na ũtiĩwa vala ve mwana wa Yese. Kĩla mũndũ athi kwa ngai syake, inywʼĩ Aisilaeli!” Yu ĩsũvĩĩe nyũmba yaku ne uwe, we Ndaviti.” Ĩtina wa ũu, Aisilaeli onthe nĩmasyokie mĩsyĩ kwoo.*

17 Ĩndĩ Leovoamu aendeea kũsumbĩka Aisilaeli ala matwĩe ndũanĩ sya Yuta.

18 Na ĩndĩ Mũsumbĩ Leovoamu atũma Atolamu, ũla waũngamĩe andũ ala moombanĩtwʼe kwondũ wa ũthũkũmi wa kũlasimĩthwʼa, ĩndĩ Aisilaeli mamũkimanga na mavia akwʼa. Ĩndĩ Mũsumbĩ Leovoamu nĩwavonokie nũndũ nĩwalĩsile ĩkasyanĩ yake na asemba akĩĩa Yelusalemu. 19 Na Aisilaeli nĩmethĩĩtwe maingʼendea nyũmba ya Ndaviti nginya ũmũnthĩ.

11 Yĩla Leovoamu wavikie Yelusalemu, vau kwa vau nĩwoombanisye nyũmba ya Yuta na Mbenyamini, aũme 180,000 ala maĩ ngũmbaũ imanyĩĩtwʼe kaũ,* mokite na Isilaeli nĩ kana matũnge ũsumbĩ mokonĩ ma Leovoamu. 2 Na ĩndĩ ndeto ya Yeova yamũkĩa Semaia, ũla waĩ mũndũ wa Ngai ũla wa wʼo, na eewa atĩĩ: 3 “Neena na Leovoamu mwana wa Solomoni mũsumbĩ wa Yuta na Aisilaeli onthe ala me Yuta na Mbenyamini, na ũimea atĩĩ: 4 ‘Ũũ nĩwʼo Yeova ũkwasya: “Mũikatate kwambata mũkite na ana-a-asa menyu. Kĩla ũmwe nasyoke nyũmbanĩ ĩ yake, nũndũ ninyie ndumĩte ũndũ ũũ wĩkĩka.”’” Na kwoou meethukĩĩsya ndeto ya Yeova na masyoka na mayaaũkita na Yelovoamu.

5 Leovoamu atwĩe Yelusalemu na nĩwaakie ndũa mbiĩĩe kũu Yuta. 6 Kwoou aaka* Mbethileemu, Etamu, Tekoa, 7 Mbethi-suli, Soko, Atulamu, 8 Ngathi, Malesa, Nzivu, 9 Atolaimu, Lakisi, Aseka, 10 Nzola, Aiyaloni, na Eviloni, ndũa mbiĩĩe ila syaĩ Yuta na Mbenyamini. 11 O na ĩngĩ, nĩwalũlũmĩĩilye kũndũ kũla kwaĩ kwiĩĩe na aia aũngamĩi kwʼo na nĩwamanengae lĩu na mauta na mbinyu, 12 na nĩwatwaie ngao nene na matumo ndũanĩ syonthe syĩ kĩvathũkany’o; na nĩwailũlũmĩĩilye mũno vyũ. Na Yuta na Mbenyamini syaendeea kwĩthĩwa syĩ syake.

13 Na athembi na Alivai ala maĩ Isilaeli yonthe nĩmamũkwatie mbau; mookie maumĩte isionĩ syoo syonthe. 14 Alivai nĩmatiie isesi syoo na syĩndũ syoo na mooka Yuta na Yelusalemu, nĩkwĩthĩwa Yelovoamu na ana make mayaametĩkĩlya maendeee kũthũkũma Yeova me athembi. 15 Na ĩndĩ Yelovoamu nĩwanyuvie athembi make kwondũ wa kũndũ kũla kũtũlu na kwondũ wa ndaimoni ila syailye mbũi* na kwondũ wa tũsaũ tũla waseũvĩtye. 16 Na andũ kuma mbaĩnĩ syonthe sya Isilaeli ala matwʼĩte ngoonĩ syoo kũmũmantha Yeova Ngai wa Isilaeli mamaatĩĩa kũu Yelusalemu nĩ kana makamũthembee Yeova Ngai wa aa-ũmae moo. 17 Nĩkwĩthĩwa vandũ va myaka ĩtatũ nĩmalũlũmĩĩilye ũsumbĩ wa Yuta na makwata mbau Leovoamu mwana wa Solomoni, nũndũ nĩmakinyĩile nzĩanĩ ya Ndaviti na Solomoni myaka itatũ.

18 Na ĩndĩ Leovoamu nĩwatwaie Maalathi mwĩĩtu wa Yelimothi mwana wa Ndaviti na wa Aviaili mwĩĩtu wa Eliavu mwana wa Yese. 19 Ĩtina wa ĩvinda, nĩwamũsyaĩe ana aa: Yeusi, Semalia, na Nzaamu. 20 Ĩtina wake, nĩwatwaie Maaka mwĩsũkũũe wa Avisalomu. Na ĩndĩ ĩtina wa ĩvinda amũsyaĩa Aviya, Atai, Nzisa, na Selomithi. 21 Leovoamu nĩwendete Maaka mwĩsũkũũe wa Avisalomu mũno kwĩ iveti ila ingĩ syake syonthe na kwĩ iveti syake sya ndũsyo,* nũndũ aĩ na iveti 18 na iveti sya ndũsyo 60, na nĩweethĩiwe na ana 28 na eĩtu 60. 22 Kwoou Leovoamu anyuva Aviya mwana wa Maaka ethĩwe mũũngamĩi na mũtongoi wa ana-a-ĩthe, nĩkwĩthĩwa endaa kũmũtwʼĩkĩthya mũsumbĩ. 23 O na ũu wĩ o vo, nĩweekie maũndũ kwa ũĩ na eea ana amwe make mathi* isionĩ syonthe sya Yuta na Mbenyamini, ndũanĩ syonthe mbiĩĩe, na amanenga syĩndũ mbingĩ na amamanthĩa iveti mbingĩ.

12 Ĩvinda ĩkuvĩ ĩtina wa ũsumbĩ wa Leovoamu kũlũlũmĩĩlwʼa vyũ na amesya vinya, nĩwatiie Mĩao ya Yeova, o na Aisilaeli onthe vamwe nake. 2 Mwakanĩ wa katano wa Mũsumbĩ Leovoamu, Mũsumbĩ Sisaki wa Misili nĩwookie kũkita na Yelusalemu, nũndũ nĩmeethĩiwe mate aĩkĩĩku kwa Yeova. 3 Aĩ na makasya 1,200, atwai ma mbalasi 60,000, na ita sya asikalĩ itatalĩka ila syookanĩtye nake kuma Misili; ita isu syaĩ na Alivia, Sukiimu, na Aethiovia. 4 Nĩwakwatie ndũa mbiĩĩe sya Yuta na mũthya avika Yelusalemu.

5 Mwathani Semaia nĩwaendie vala ve Leovoamu na anene me mbee ũsumbĩnĩ wa Yuta ala moombanĩe Yelusalemu nũndũ wa Sisaki, na amea atĩĩ: “Ũũ nĩwʼo Yeova ũkwasya, ‘Nĩmũndiĩte, kwoou o nakwa nĩnamũtia kwʼokonĩ kwa Sisaki.’” 6 Nũndũ wa ũu, anene me mbee ũsumbĩnĩ wa Isilaeli na mũsumbĩ nĩmeenyivisye, na masya: “Yeova nĩ mũlũngalu.” 7 Yĩla Yeova woonie kana nĩmeenyivya, ndeto ya Yeova nĩyookĩie Semaia, na eewa atĩĩ: “Nĩmeenyivya. Kwoou ndimananga, na kavindanĩ o kanini nĩngũmavonokya. Nditũmĩa Sisaki kũtulũĩla Yelusalemu ũthatu wakwa. 8 Ĩndĩ metwʼĩka athũkũmi make, nĩ kana mamanye kĩvathũkanyʼo kya kũnthũkũma na kũthũkũma asumbĩ* ma nthĩ ingĩ.”

9 Kwoou Mũsumbĩ Sisaki wa Misili nĩwookie kũkita na Yelusalemu. Nĩwoosie ũthwii wa nyũmba ya Yeova na ũthwii wa nyũmba ya mũsumbĩ. Oosie kĩla kĩndũ, o vamwe na ngao sya thaavu ila Solomoni waseũvĩtye. 10 Na kwoou Mũsumbĩ Leovoamu aseũvya ngao sya ũthuku itũmĩawe vandũ va ila syoosiwe, na ainengane mokonĩ ma anene ma asungi ma mũsumbĩ,* ala masungaa mũomonĩ wa nyũmba ya mũsumbĩ. 11 Kĩla ĩvinda mũsumbĩ wooka nyũmbanĩ ya Yeova, asungi nĩmalikanasya nake na mayĩikua, na ĩtina mayĩitũnga kasũmbanĩ ka asungi. 12 Nũndũ mũsumbĩ nĩweenyivisye, ũthatu wa Yeova nĩweethyũũie wamũtia, na ndaamananga vyũ. O na ĩngĩ, ve maũndũ amwe maseo moonekie Yuta.

13 Mũsumbĩ Leovoamu nĩwalũlũmĩĩilye ũnene wake kũu Yelusalemu na aendeea kũsumbĩka; Leovoamu aĩ na myaka 41 yĩla watwʼĩkie mũsumbĩ, na asumbĩkie myaka 17 kũu Yelusalemu, ndũanĩ ĩla Yeova wanyuvĩte katĩ wa mbaĩ syonthe sya Isilaeli yĩthĩwe vandũ va kwĩtanĩawʼa na ĩsyĩtwa yake. Inyia wa mũsumbĩ eetawa Naama na aĩ Mũamimoni. 14 Ĩndĩ nĩweekie kĩla kĩthũku, nĩkwĩthĩwa ndatwʼĩte ngoonĩ yake kũmũmantha Yeova.

15 Na ngewa ya Leovoamu, kuma mwambĩĩo nginya mũthya, yo ti mbandĩke ndetonĩ sya mwathani Semaia na sya Ito, ũla waĩ mwoni, lekotinĩ sya mĩsyĩ? Na kĩla ĩvinda veethĩawa kaũ katĩ wa Leovoamu na Yelovoamu. 16 Na ĩndĩ Leovoamu akwʼa na athikwa vamwe na aa-ũmae make Ndũanĩ ya Ndaviti; na mwana wake Aviya atwʼĩka mũsumbĩ vandũ vake.

13 Mwakanĩ wa 18 wa Mũsumbĩ Yelovoamu, Aviya nĩwambĩĩie kũsumbĩka Yuta. 2 Asumbĩkie myaka ĩtatũ e Yelusalemu. Inyia wake eetawa Mikaia mwĩĩtu wa Ulieli kuma Ngivea. Na kwaĩ kaũ katĩ wa Aviya na Yelovoamu.

3 Kwoou Aviya nĩwaendie kaũnĩ e na ita syaĩ na ngũmbaũ sya kaũ 400,000, imanyĩĩtwʼe kaũ.* Na Yelovoamu eevanga kwondũ wa kaũ okite nake e na ngũmbaũ sya kaũ 800,000, imanyĩĩtwʼe kaũ.* 4 Nĩvo ĩndĩ Aviya waũngamie Kĩĩmanĩ kya Nzemalaimu, kĩla kĩ kĩsionĩ kĩ iĩma kya Evilaimu, na asya atĩĩ: “Mbĩthukĩĩsye, we Yelovoamu vamwe na Isilaeli yonthe. 5 Inywʼĩ mũyĩsĩ kana Yeova Ngai wa Isilaeli nĩwanengie Ndaviti na ana make ũsumbĩ ĩũlũ wa Isilaeli tene na tene, na ũtianĩo wa mũnyũ?* 6 Ĩndĩ Yelovoamu mwana wa Nevati, mũthũkũmi wa Solomoni mwana wa Ndaviti, nĩwookĩlile aleana na mwĩai wake. 7 Na aũme mataĩ na wĩa na vathei, nĩmaendeeie kũkwatana nake. Na maleana na Leovoamu mwana wa Solomoni vyũ yĩla Leovoamu waĩ wa mũika na ũtaĩ na ũkũmbaũ, na ndaĩ atonya kũsindana namo.

8 Na yu mwĩsũanĩa no mũsindane na ũsumbĩ wa Yeova ũla wĩ kwʼokonĩ kwa ana ma Ndaviti nĩkwĩthĩwa mwĩ ĩkomano ĩnene na mwĩ na tũsaũ twa thaavu tũla Yelovoamu waseũvisye twĩthĩwe ngai syenyu. 9 Inywʼĩ mũyalũngilye athembi ma Yeova, nzyawa sya Alũni, na Alivai, na mweenyuvĩa athembi menyu o ta ngo sya andũ sya nthĩ ila ingĩ? Mũndũ o na wĩva ũla waete* kasalũ na ndũũme mũonza eethĩawa atonya kũtwʼĩka mũthembi wa ila ite ngai. 10 Ĩndĩ ithyĩ, Yeova nĩ Ngai witũ, na tũyaamũtia; athembi maitũ, nzyawa sya Alũni, nĩmo mathũkũmaa Yeova, matetheew’e nĩ Alivai. 11 Nĩmatumaa nthembo sya kũvĩvw’a itoa mbee wa Yeova kĩla kwakya na ĩ ya wĩoo vamwe na ũvumba wĩ mũuke mũseo, na nĩmaiaa mĩkate ĩla ĩvangawa tũkundi ĩilĩanĩlwʼe* mesanĩ ya thaavu mũtheu, na nĩmakwatasya kĩndũ kya kwilĩĩla taa kya thaavu na taa syakyo kĩla mũthenya ĩ ya wĩoo, nĩkwĩthĩwa nĩtwĩanĩasya kĩanda kitũ mbee wa Yeova Ngai witũ; ĩndĩ inywʼĩ nĩmũmũtiĩte. 12 Na yu sisya! Ngai ũla wa w’o e vamwe naitũ, atũtongoesye, vamwe na athembi make me na masoo ma kũvuvwa maumye wasya wa kaũ nĩ kana tũkite nenyu. Inywʼĩ aũme ma Isilaeli, mũikokite na Yeova Ngai wa aa-ũmae menyu, nũndũ mũisinda.”

13 Ĩndĩ Yelovoamu nĩwatũmie asikalĩ ma kũmoveesya mesĩle ĩtina woo, kwoou weethĩa me mbee wa Yuta na asikalĩ asu ma kũmoveesya me ĩtina woo. 14 Yĩla aume ma Yuta mavĩndũkie, meethĩie kana maaĩlĩte kũkita na andũ maĩ mbee woo na ĩtina woo. Kwoou mambĩĩa kũmũĩĩa Yeova na wasya mũnene; ĩvindanĩ o yĩu, athembi maendeee kũvuva masoo na wasya mũnene. 15 Aũme ma Yuta nĩmookĩlilye wasya mũnene wa kaũ, na yĩla aũme ma Yuta mookĩlilye wasya ũsu mũnene wa kaũ, Ngai ũla wa w’o nĩwasindĩie Yelovoamu na Isilaeli yonthe mbee wa Aviya na Yuta. 16 Aisilaeli nĩmasembie makĩa Yuta, na Ngai amanengane mokonĩ moo. 17 Aviya na andũ make nĩmooaie asikalĩ aingĩ mũno, na andũ ma Isilaeli maendeea kũawa; ala mooaiwe maĩ aũme 500,000 mamanyĩĩtwʼe kaũ.* 18 Kwoou aũme ma Isilaeli nĩmasindiwe ĩvindanĩ yĩu, ĩndĩ aũme ma Yuta masindie nĩkwĩthĩwa nĩmeekwatĩtye* Yeova Ngai wa aa-ũmae moo. 19 Aviya nĩwaendeeie kũsembany’a Yelovoamu na akwata ndũa syake. Akwatie Mbetheli na tũtũla twayo,* Yesana na tũtũla twayo, na Evilaini na tũtũla twayo. 20 Na ĩvindanĩ ya Aviya, Yelovoamu ndaaĩsa kwĩthĩwa ĩngĩ na vinya ta ũla waĩ nawʼo; na ĩndĩ Yeova amũkũna na akwʼa.

21 Ĩndĩ Aviya nĩwameisye vinya. Ĩtina wa ĩvinda, nĩwatwaie iveti 14, na eethĩwa ĩthe wa ana 22 na eĩtu 16. 22 Na ngewa ĩla ĩngĩ ya Aviya, maũndũ ala weekie na ndeto syake, malekotiĩtwe maũndũnĩ ala maandĩkiwe* nĩ mwathani Ito.

14 Na ĩndĩ Aviya akwʼa na athikwa vamwe na aa-ũmae make Ndũanĩ ya Ndaviti; na mwana wake Asa atwʼĩka mũsumbĩ vandũ vake. Mĩthenyanĩ yake nthĩ yeethĩiwe na ũthũmũo myaka ĩkũmi.

2 Asa nĩweekie kĩla kĩseo na kĩla kyaĩlĩte methonĩ ma Yeova Ngai wake. 3 Nĩwavetangie ithembeo sya ngai ngeni na kũndũ kũtũlu, atumbanga ituĩ sya ũthaithi, na atilanga mĩtĩ ya ũthaithi.* 4 O na ĩngĩ, nĩwatavisye andũ ma Yuta mamũmanthe Yeova Ngai wa aa-ũmae moo na maikwataa Mĩao na maũndũ onthe ala ũmeaĩe meke. 5 Kwoou nĩwavetangie kũndũ kũtũlu na syĩndũ sya kwilĩĩla ũvumba ndũanĩ syonthe sya Yuta, na asumbĩkĩte, ũsumbĩ ndwaĩ na ithokoo. 6 Nĩwaakie ndũa mbiĩĩe Yuta, nũndũ myakanĩ ĩsu nthĩ ndyaĩ na ithokoo na kũyaĩ mũndũ wamũkitaa, nĩkwĩthĩwa Yeova nĩwamũnengete ũthũmũo. 7 Eeie Yuta atĩĩ: “Ekai twake ndũa ii na tũyĩithyũlũlũkya ngũta na myako mĩtũlu, mĩvĩa* na mĩamba. Nũndũ nthĩ yĩ o mokonĩ maitũ, nĩkwĩthĩwa nĩtũmũmanthĩte Yeova Ngai witũ. Nĩtũmũmanthĩte, nake nũtũnengete ũthũmũo kĩla vandũ kũtũthyũlũlũka.” Kwoou wĩa woo wa kwaka nĩwaaĩlile.

8 Asa aĩ na ita sya kaũ syaĩ na aũme 300,000 ma Yuta, ala meethĩawa na ngao nene na matumo. Na kuma Mbenyamini vaĩ na ngũmbaũ sya kaũ 280,000 ila syakuaa ngao nini* na syaĩ na mbũta.*

9 Ĩtina, Nzela, ũla waĩ Mũethiovia, nĩwamavithũkĩie e na ita sya kaũ syaĩ na aũme 1,000,000 na makasya 300. Yĩla wavikie Malesa, 10 Asa nĩwaendie kũkita nake na meevangĩa kwondũ wa kaũ Mwandanĩ wa Nzevatha kũu Malesa. 11 Nĩvo ĩndĩ Asa wamwĩkaĩlile Yeova Ngai wake na asya: “Ame Yeova, ndũtindaa ũsyaĩtye ethĩwa ala ũũtetheesya nĩ aingĩ kana mai na vinya. Tũtetheesye, ame Yeova Ngai witũ, nũndũ nue twĩkwatĩtye,* na tũkĩte kũkita na ĩkomano yĩĩ ĩsyĩtwanĩ yaku. Ame Yeova, nue Ngai witũ. Ndũketĩkĩlye mũndũ ũtonya kũkwʼa aũsinde.

12 Kwoou Yeova nĩwasindĩie Aethiovia mbee wa Asa na mbee wa Yuta, na Aethiovia masemba makĩa. 13 Asa vamwe na andũ ala waĩ namo nĩmamasembanisye nginya Ngelali, na Aethiovia maendeea kũawa nginya weethĩa vai o na ũmwe woo ũnatiala thayũ, nĩkwĩthĩwa Yeova na ita syake nĩmamasindie vyũ. Ĩtina wa ũu, nĩmakuie mũtavo mwingĩ mũno. 14 O na ĩngĩ, nĩmooaie andũ ala maĩ ndũanĩ syonthe ila syathyũlũlũkĩte Ngelali, nĩkwĩthĩwa wia wa Yeova waĩ ũnamakwata; na moosa mũtavo ndũanĩ isu syonthe, nũndũ ndũa isu syaĩ na mũtavo mwingĩ mũno. 15 O na nĩmasyokie mavithũkĩa maeema ma ala maĩ na indo, na matava malondu na mbũi mbingĩ mũno o vamwe na ngamĩle, na ĩndĩ masyoka Yelusalemu.

15 Yu veva wa Ngai nĩwookie ĩũlũ wa Asalia mwana wa Oteti. 2 Kwoou athi akakomane na Asa na amwĩa atĩĩ: “Mbĩthukĩĩsye, we Asa na Yuta yonthe na Mbenyamini yonthe! Yeova akeethĩawa vamwe nenyu ethĩwa mũkaendeea kũlũmanyʼa nake; na mwamũmantha, akaeka mũmwone, ĩndĩ mwamũtia, akamũtia. 3 Kwa ĩvinda yĩasa* Aisilaeli meethĩĩtwe mate na Ngai ũla wa w’o, mate na mũthembi ũmamanyĩsya, na mate na mĩao. 4 Ĩndĩ yĩla mathĩnaa, nĩmasyokeie Yeova Ngai wa Isilaeli na mamũmantha, nake aeka mamwone. 5 Mavindanĩ asu, vai ũmwe woo waĩ atonya kũthi kyalo na mũuo,* nĩkwĩthĩwa kwaĩ ithokoo mbingĩ katĩ wa ekali onthe ma i nthĩ. 6 Mbaĩ nĩyaanangawa nĩ mbaĩ ĩngĩ na ndũa nĩ ndũa ĩngĩ, nũndũ Ngai nĩwamavũavũanasya na mathĩna ma kĩla mũthemba. 7 Ĩndĩ inywʼĩ, ĩthĩwai na vinya na mũikatũlĩke ngoo,* nũndũ wĩa wenyu ũkatuvwa.”

8 Yĩla Asa weewie ndeto isu o vamwe na wathani wa mwathani Oteti oou, nĩwoosie vinya na avetanga mĩvwʼanano ya kũthatya kuma nthĩ yonthe ya Yuta na Mbenyamini na kuma ndũanĩ ila wakwatĩte kĩsionĩ kĩ iĩma kya Evilaimu, na atũngĩĩa kĩthembeo kya Yeova kĩla kyaĩ mbee wa valanda wa Yeova. 9 Na nĩwoombanisye Yuta yonthe na Mbenyamini yonthe na ekali ma ũeninĩ kuma Evilaimu na Manase na Simeoni, nĩkwĩthĩwa yĩla moonie kana Yeova Ngai wake aĩ vamwe nake, nĩmookie kũla ũĩ kwa wingĩ maumĩte Isilaeli. 10 Kwoou nĩmoombanĩie Yelusalemu mweinĩ wa katatũ mwakanĩ wa 15 wa kũsumbĩka kwa Asa. 11 Mũthenya ũsu, mathembeie Yeova ngʼombe 700 na malondu 7,000 kuma mũtavonĩ ũla moosete. 12 O na ĩngĩ, nĩmatianĩie ũtianĩo mamanthae Yeova Ngai wa aa-ũmae moo na ngoo yoo yonthe na thayũ* woo wʼonthe. 13 Mũndũ o na wĩva ũla wesaa kũlea kũmũmantha Yeova Ngai wa Isilaeli aaĩle kũawa, ethĩwe nĩ mũnini kana nĩ mũnene, nĩ mũndũũme kana nĩ mũndũ mũka. 14 Kwoou nĩmamwĩvĩtĩie Yeova na wasya mũnene, mokĩlĩtye mawasya ma ũtanu, na mavuvĩte masoo na mbya. 15 Na andũ onthe ma Yuta nĩmatanĩie wĩvĩto ũsu, nĩkwĩthĩwa mawĩvĩtie na ngoo yoo yonthe na nĩmeekĩie kĩthito mamũmanthe nake aeka mamwone, na Yeova aendeea kũmanenga ũthũmũo kĩla ngalĩko.

16 O na Mũsumbĩ Asa nĩwavetangie ũsũe Maaka kĩandanĩ kyake kya kĩ-ũsumbĩ, nũndũ nĩwaseũvĩtye mũvwʼanano wa kũthatya ũla watũmĩawa ũthaithinĩ wa mũtĩ wa ũthaithi.* Asa nĩwatemie mũvwʼanano ũsu na aũtumbatumba na aũvĩvĩsya Mwandanĩ wa Kitiloni. 17 Ĩndĩ kũndũ kũtũlu kũyaavetwa Isilaeli. O na ũu wĩ o vo, ngoo ya Asa nĩyalũmanĩtye vyũ na* Ngai mĩthenyanĩ yonthe ĩla waĩ thayũ. 18 Na nĩwaetie nyũmbanĩ ya Ngai ũla wa wʼo syĩndũ ila we na ĩthe wake maitheetye; aetie vetha, thaavu, na mĩio yĩ kĩvathũkanyʼo. 19 Kũyaĩ kaũ Yuta nginya mwaka wa 35 wa kũsumbĩka kwa Asa.

16 Mwakanĩ wa 36 wa kũsumbĩka kwa Asa, Mbaasa mũsumbĩ wa Isilaeli nĩwookĩlile okite na Yuta na ambĩĩa kwaka* Lama nĩ kana wĩthĩe vai mũndũ o na ũmwe ũkĩlanĩlya aumĩte kĩsionĩ kya Mũsumbĩ Asa kana akakĩlanĩlya alike kĩsionĩ kya* Mũsumbĩ Asa. 2 Nũndũ wa ũu, Asa nĩwaumisye vetha na thaavu vala vaiawa ũthwii wa nyũmba ya Yeova na vala vaiawa ũthwii wa nyũmba ya mũsumbĩ na ainengane itwaĩwe Mũsumbĩ Mbeni-atati wa Silia, ũla wekalaa Ndamasikũ, ayasya: 3 “Nĩvethĩĩtwe na ngwatanĩo* katĩ wakwa naku na katĩ wa ĩthe wakwa na ĩthe waku. Yu nĩnaũtũmanĩa vetha na thaavu. Ũka wanange ngwatanĩo yaku* na Mũsumbĩ Mbaasa wa Isilaeli, nĩ kana evetange kĩsionĩ kyakwa.”

4 Na Mbeni-atati amwĩthukĩĩsya Mũsumbĩ Asa na atũma anene ma ita syake makavithũkĩe ndũa sya Isilaeli, na makũna Iyoni, Ndani, Aveli-maimu, na kũndũ kwʼonthe kwa kwia syĩndũ ndũanĩ sya Navitali. 5 Yĩla Mbaasa weewie ũndũ ũsu, vau kwa vau nĩwaekie kwaka* Lama na aũngamya wĩa ũsu. 6 Na ĩndĩ Mũsumbĩ Asa oosa andũ onthe ma Yuta, na makua mavia na mbwaũ sya Lama ila Mbaasa watũmĩaa kwaka, na atũmĩa syĩndũ isu kwaka* Ngeva na Misiva.

7 Ĩvindanĩ yĩu, Aanani, ũla waĩ mwoni, nĩwookie vala ve Mũsumbĩ Asa wa Yuta na amwĩa atĩĩ: “Nĩkwĩthĩwa ũneekwatisye* mũsumbĩ wa Silia na ndũneeĩkwatya* Yeova Ngai waku, ita sya mũsumbĩ wa Silia nĩsyavonoka kuma kw’okonĩ kwaku. 8 Mo Aethiovia na Alivia mayaĩ ita nene mũno syĩ na makasya maingĩ na atwai aingĩ ma mbalasi? Ĩndĩ nĩkwĩthĩwa nĩwamwĩkwatisye Yeova, nĩwamanenganie kw’okonĩ kwaku. 9 Nũndũ metho ma Yeova maendaa kũũ na kũũ nthĩ yonthe nĩ kana onanyʼe vinya wake kwondũ wa* ala ngoo yoo ĩlũmanĩtye vyũ nake.* Weeka ũndũ wa ũtumanu; kuma yu na kũendeea kũkeethĩawa makaũ ĩũlũ waku.”

10 Ĩndĩ Asa nĩweewʼĩthiwʼe woo nĩ mwoni ũsu na amwĩkya yela* nũndũ kĩla wamũtavisye nĩkyamũthatisye mũno. Na ĩvindanĩ o yĩu, Asa ambĩĩa kũthĩnyʼa andũ angĩ. 11 Yu ngewa ya Asa, kuma mwambĩĩo nginya mũthya, ĩandĩkĩtwe Ĩvukunĩ ya Asumbĩ ma Yuta na ma Isilaeli.

12 Mwakanĩ wa 39 wa kũsumbĩka kwake, Asa nĩwawaie maaũ nginya avinya vyũ; o na ĩvindanĩ yĩu wawaĩte ũu, ndaamantha ũtethyo wa Yeova, ĩndĩ amanthie wa aiiti. 13 Na ĩndĩ Asa akwʼa na athikwa vamwe na aa-ũmae make; akwie mwakanĩ wa 41 wa kũsumbĩka kwake. 14 Kwoou nĩmamũthikie mbũanĩ ya ndaĩa ĩla weeyĩnzĩe Ndũanĩ ya Ndaviti, na mamũkomya mũsekesekenĩ wausũĩtwʼe mauta ma seli na manukato ma mwanya maseũvĩtwʼe na syĩndũ syĩ kĩvathũkanyʼo ivulanĩtwʼe vamwe. O na ĩngĩ, mathikonĩ make, nĩmakanisye mwaki mũnene mũno kwondũ wake.*

17 Na mwana wake Yeosavati atwʼĩka mũsumbĩ vandũ vake, na alũlũmĩĩlya ũnene wake ĩũlũ wa Isilaeli. 2 Nĩwaiie ita ndũanĩ syonthe mbiĩĩe sya Yuta na aseũvya kambi sya asikalĩ nthĩ ya Yuta na ndũanĩ sya Evilaimu ila Asa ĩthe wake wakwatĩte. 3 Yeova nĩwaendeeie kwĩthĩwa na Yeosavati nũndũ akinyĩlaa nzĩanĩ sya tene sya ũmae wake Ndaviti na ndaamantha Mbaali. 4 Nĩkwĩthĩwa nĩwamanthie Ngai wa ĩthe wake na aatĩĩa mwĩao* wake ĩndĩ ti imanyĩo sya Isilaeli. 5 Yeova nĩwaendeeie kũlũlũmĩĩlya ũsumbĩ wake vyũ kw’okonĩ kwake; na Yuta yonthe yaendeea kũetee Yeosavati mĩthĩnzĩo, nake eethĩwa na ũthwii mwingĩ na akumwʼa mũno. 6 Ngoo yake nĩyeethĩiwe na ũkũmbaũ nzĩanĩ sya Yeova, na o na avetanga kũndũ kũtũlu na mĩtĩ ya ũthaithi* Yuta.

7 Mwakanĩ wa katatũ wa kũsumbĩka kwake, nĩwatũmanie anene me mbee ũsumbĩnĩ wake, ala maĩ Mbeni-aili, Ovatia, Nzekalia, Nethaneli, na Mikaia, nĩ kana makamanyĩsye ndũanĩ sya Yuta. 8 Maĩ vamwe na Alivai aa: Semaia, Nethania, Nzevatia, Asaeli, Semilamothi, Yeonathani, Atoniya, Toviya, na Tovu-atoniya, o vamwe na mũthembi Elisama na mũthembi Yeolamu. 9 Nĩmambĩĩie kũmanyĩsya kũu Yuta, me na ĩvuku ya Mĩao ya Yeova, na mathiũũka ndũanĩ syonthe sya Yuta mamanyĩĩtye andũ.

10 Na wia wa Yeova wakwata mosumbĩ onthe ma nthĩ ila syathyũlũlũkĩte Yuta, na mayaaũkita na Yeosavati. 11 Na Avilisiti maetee Yeosavati mĩthĩnzĩo na mbesa syĩthĩwe koti. Aalavu mamũeteie ndũũme 7,700 na nthenge 7,700 kuma ndĩthyanĩ syoo.

12 Yeosavati nĩwameisye vinya mũno, na aendeea kwaka kũndũ kwiĩĩe na ndũa sya kwia syĩndũ kũu Yuta. 13 Nĩweekie maũndũ manene ndũanĩ sya Yuta, na aĩ na asikalĩ, ala maĩ ngũmbaũ sya kaũ, kũu Yelusalemu. 14 Asu mavangĩtwe ũũ kwosana na nyũmba sya aa-ũmae moo: kuma Yuta vaĩ anene ma makili, na wa mbee aĩ mũnene Atinaa, na aĩ vamwe na ngũmbaũ sya kaũ 300,000. 15 Na mũnene Yeoanani aĩ ungu wake, na aĩ vamwe na ngũmbaũ sya kaũ 280,000. 16 O nake Amasia mwana wa Nzikili, ũla weeyumisye kwondũ wa ũthũkũmi wa Yeova, aĩ ungu wake, na aĩ vamwe na ngũmbaũ sya kaũ 200,000. 17 Na kuma Mbenyamini vaĩ Eliata, ũla waĩ ngũmbaũ ya kaũ, na aĩ vamwe na aũme 200,000 ala maĩ na mbũta na ngao. 18 Na Yeosavatu aĩ ungu wake, na aĩ vamwe na aũme 180,000 maĩ na mĩio ya kaũ. 19 Asu mathũkũmaa mũsumbĩ vamwe na ala mũsumbĩ waiĩte ndũanĩ mbiĩĩe kĩla vandũ Yuta yonthe.

18 Yeosavati aĩ na ũthwii mwingĩ na nĩwakumawʼa mũno, ĩndĩ nĩweewʼanie na Aavu atwae mwĩĩtu wake. 2 Kwoou ĩtina wa myaka yĩana ũna nĩwatheeie kũla kwĩ Aavu kũu Samalia, na Aavu athemba malondu na ngʼombe mbingĩ kwondũ wake na kwondũ wa andũ ala maĩ nake. Na amwĩkĩa vinya* ambatanyʼe nake akavithũkĩe Lamothi-ngileati. 3 Nĩvo ĩndĩ Mũsumbĩ Aavu wa Isilaeli wakũlilye Mũsumbĩ Yeosavati wa Yuta atĩĩ: “No ũendanyʼe nakwa kũu Lamothi-ngileati?” Nake amũsũngĩa: “Nyie ndi kĩvathũkanyʼo naku, na andũ makwa no ta andũ maku na nĩtũũkũkwata mbau kaũnĩ ũũ.”

4 Ĩndĩ Yeosavati eea mũsumbĩ wa Isilaeli atĩĩ: “Nĩngũkwĩsũva wambe kũkũlya, ũmanye ndeto ya Yeova.” 5 Na kwoou mũsumbĩ wa Isilaeli oombanyʼa athani, aũme 400, na amakũlya: “Tũthi tũkokite na Lamothi-ngileati, kana ndikathi?” Namo mamwĩa: “Ambata, na Ngai ũla wa w’o nũkũmĩnengane kw’okonĩ kwa mũsumbĩ.”

6 Na ĩndĩ Yeosavati asya: “Vo vaa vai mwathani wa Yeova? Eka o nake tũmũkũlye.” 7 Nĩvo ĩndĩ mũsumbĩ wa Isilaeli weeie Yeosavati atĩĩ: “Ve mũndũ ũngĩ ũmwe tũtonya kũmũkũlya ũtao wa Yeova. Ĩndĩ nĩnĩmũmenete, nũndũ ndesaa kwathana maũndũ maseo ĩũlũ wakwa, ĩndĩ mavinda onthe athanaa ala mathũku. Mũndũ ũsu nĩ Mikaia mwana wa Imila.” Ĩndĩ Yeosavati asya: “We mũsumbĩ, ndwaĩlĩte kũneena ndeto ta isu.”

8 Na kwoou mũsumbĩ wa Isilaeli eeta mũthũkũmi ũmwe wake na amwĩa: “Ete Mikaia mwana wa Imila vaa na mĩtũkĩ.” 9 Yu ĩndĩ, mũsumbĩ wa Isilaeli na Yeosavati mũsumbĩ wa Yuta mekalĩte kĩla ũmwe kĩvĩlanĩ kyake kya ũsumbĩ, mekĩĩte ngũa sya kĩ-ũsumbĩ; mailyĩ kĩvũĩonĩ kĩla kyaĩ mũvĩanĩ wa kũlika Samalia, na athani onthe maendeee kwathana me mbee woo. 10 Na ĩndĩ Nzetekia mwana wa Kenaana eeseũvĩsya mbya sya kyũma* na asya: “Ũũ nĩwʼo Yeova ũkwasya, ‘Ũkatonya* Asilia na mbya ii nginya ũmamine.’” 11 Athani ala angĩ onthe o namo mathanaa oou, mayasya: “Ambata ũthi Lamothi-ngileati na nũũsinda; Yeova nũkũmĩnengane kw’okonĩ kwa mũsumbĩ.”

12 Yĩla mũndũ ũla watũmĩtwe akete Mikaia wavikie vala ũĩ, amwĩie: “Sisya! Athani onthe metavya mũsumbĩ ndeto nzeo. Kwoou, nĩngũkwĩsũva, ndeto syaku nĩsyĩthĩwe o ta syoo, na ũiweta maũndũ maseo.” 13 Ĩndĩ Mikaia asya: “Vate nzika, o tondũ Yeova wĩ thayũ, kĩla Ngai wakwa ũkũweta nokyo ngũneena.” 14 Na ĩndĩ Mikaia alika vala ve mũsumbĩ, na mũsumbĩ amũkũlya: “Mikaia, tũthi tũkokite na ndũa ya Lamothi-ngileati, kana ndikathi?” Na vau kwa vau amũsũngĩa amwĩa: “Ambata na nũũsinda; nĩmeũnenganwe kwʼokonĩ kwaku.” 15 Nĩvo ĩndĩ mũsumbĩ wamũkũlilye: “Naĩle kũkwĩavĩthya keana nĩ kana ndũkandavye ũndũ ũngĩ eka o kĩla kya wʼo ĩsyĩtwanĩ ya Yeova?” 16 Na kwoou asya: “Nĩona Aisilaeli onthe manyaĩĩkĩte iĩmanĩ, ta malondu mate na mũĩthi. Yeova aĩtye atĩĩ: ‘Aa mai na vwana. Kĩla ũmwe nasyoke nyũmbanĩ yake na mũuo.’”

17 Nĩvo ĩndĩ mũsumbĩ wa Isilaeli weeie Yeosavati atĩĩ: “Tyo naũtavya, ‘Mũndũ ũũ ndesa kũmbathanĩa maũndũ maseo, embathanĩa o ala mathũku’?”

18 Na ĩndĩ Mikaia asya: “Kwoou ĩthukĩĩsye ndeto ĩĩ ya Yeova: Nĩnonie Yeova ekalĩle kĩvĩla kyake kya ũsumbĩ na nguthu yonthe ya matunĩ ĩũngye kwʼokonĩ kwake kwa aũme na kw’okonĩ kwake kwa aka. 19 Na ĩndĩ Yeova asya, ‘Nũũ ũkũmũkenga Mũsumbĩ Aavu wa Isilaeli, nĩ kana ambate Lamothi-ngileati na aikwʼĩĩa kũu?’ Na mũlaĩka ũmwe ewetaa ũndũ ũmwe na ũngĩ aiweta ũndũ ũngĩ. 20 Nĩvo ĩndĩ veva* ũmwe ũthengeeie na waũngama mbee wa Yeova na wasya, ‘Nyie nĩngũmũkenga.’ Na Yeova aũkũlya, ‘Wĩĩka ũu ata?’ 21 Nawʼo wamũsũngĩa, ‘Nĩthi nĩtwʼĩke veva wa ũkengani makanywʼanĩ ma athani make onthe.’ Na kwoou asya, ‘Nũũmũkenga, na eka ũu, mũvango waku nũkwaĩla. Enda na ũyĩka oou.’ 22 Yu ĩndĩ, Yeova nĩwĩkĩĩte veva wa ũkengani makanywʼanĩ ma athani aa maku, ĩndĩ Yeova nũtwʼĩte ũkũetee mũisyo.”

23 Nĩvo ĩndĩ Nzetekia mwana wa Kenaana wathengeeie na akũna Mikaia ĩtau na asya: “Veva wa Yeova umangie kwakwa ata nĩ kana ũtwʼĩke nĩwaneena naku?” 24 Nake Mikaia asya: “Sisya! Ũkamanya umangie ata mũthenya ũla ũkalika kasũmbanĩ ka nthĩnĩ vyũ wĩvithe.” 25 Na ĩndĩ mũsumbĩ wa Isilaeli asya: “Osa Mikaia na ũimũnengane vala ve Amoni mũnene wa ndũa na Yoasi mwana wa mũsumbĩ. 26 Na ũimea, ‘Ũũ nĩwʼo mũsumbĩ ũkwasya: “Ĩkyai mũndũ ũũ yela na mũimũnenga mũkate na kĩwʼũ mũmũthimĩe nginya yĩla ngasyoka na mũuo.”’” 27 Ĩndĩ Mikaia asya: “Wasyoka na mũuo, manya kana Yeova ndananeena nakwa.” Na ongela kwasya: “Inywʼĩ andũ, inywʼonthe, ĩkĩai kĩu kĩlĩkonĩ.”

28 Na kwoou mũsumbĩ wa Isilaeli na Yeosavati mũsumbĩ wa Yuta mambata Lamothi-ngileati. 29 Na mũsumbĩ wa Isilaeli amwĩa Yeosavati: “Nĩngwĩvĩndũa nĩ kana ndikamanyĩke na ndilika kaũnĩ, ĩndĩ we ĩkĩa ngũa syaku sya kĩ-ũsumbĩ.” Na kwoou mũsumbĩ wa Isilaeli eevĩndũa nĩ kana ndakamanyĩke, na malika kaũnĩ. 30 Yu ĩndĩ, mũsumbĩ wa Silia nĩweeaĩte aũngamĩi make ma makasya make ma kaũ akamea atĩĩ: “Mũikokite na mũndũ o na wĩva, ethĩwe nĩ mũnini kana nĩ mũnene, ate o mũsumbĩ wa Isilaeli.” 31 Na aũngamĩi asu ma makasya ma kaũ moona Yeosavati oou, maneenanyʼa mayasya: “Ũũ nĩwe mũsumbĩ wa Isilaeli.” Na kwoou meethyũũa mambĩĩa kũkita nake; na Yeosavati ambĩĩa kũkaya etaanwe, na Yeova amwĩtaana, na vau kwa vau Ngai atuma mamũtia na mathi kũndũ kũngĩ. 32 Yĩla aũngamĩi asu ma makasya ma kaũ mamanyie oou kana ũsu ti mũsumbĩ wa Isilaeli, nĩmaekie kũmũatĩĩa.

33 Ĩndĩ mũndũ ũmwe ekya ĩangi atavangĩte eatha ũũ,* na aathĩla mũsumbĩ wa Isilaeli kamwanyanĩ kamwe katĩ wa tũmwanya tũla twaĩ ĩkotinĩ yake ya kyũma. Nĩvo ĩndĩ weeie mũndũ ũla watwaaa ĩkasya yake atĩĩ: “Ĩthyũũe ũmbete vaa kaũnĩ,* nũndũ nĩnaũmĩwʼa mũno.” 34 Mũthenya ũsu wʼonthe kaũ waĩ mũvyũ mũno, na maũngamĩtye mũsumbĩ wa Isilaeli ĩkasyanĩ mamũtwʼĩĩkĩte, asyaĩtye Asilia nginya ĩ ya wĩoo; na akwʼa sua yĩithũa.

19 Nĩvo ĩndĩ Mũsumbĩ Yeosavati wa Yuta wasyokie mũsyĩ kwake* Yelusalemu e mũsũvĩĩku.* 2 Yeu mwana wa Aanani ũla waĩ mwoni nĩwaendie kũkomana nake na eea Mũsumbĩ Yeosavati atĩĩ: “Yo nĩwaĩlĩte kũtetheesya ala athũku, na nĩwaĩlĩte kwenda ala Yeova ũmenete? Nũndũ wa ũu, ũthatu wa Yeova wĩ ĩũlũ waku. 3 O na ũu wĩ o vo, ve maũndũ maseo monekete nthĩnĩ waku, nũndũ nũvetangĩte mĩtĩ ya ũthaithi* ĩ nthĩ na nĩwũmbanĩtye ngoo yaku ĩmũmanthe* Ngai ũla wa w’o.”

4 Yeosavati nĩwaendeeie kwĩkala Yelusalemu, na nĩwaendie andũnĩ ĩngĩ kuma Mbeeli-sieva nginya kĩsionĩ kĩ iĩma kya Evilaimu, nĩ kana akamatũnge kũla kwĩ Yeova Ngai wa aa-ũmae moo. 5 O na nĩwanyuvie asili nthĩ yonthe, ndũanĩ syonthe mbiĩĩe sya Yuta, ndũa kũthi ĩla ĩngĩ. 6 Na eea asili asu atĩĩ: “Ĩthĩwai mwĩ metho maũndũnĩ ala mũkwĩka, nũndũ mũisilanasya kwondũ wa mũndũ ĩndĩ nĩ kwondũ wa Yeova, na e vamwe nenyu yĩla mũũtwʼa sila. 7 Yu wia wa Yeova nĩwĩthĩwe ĩũlũ wenyu. Ĩsũvĩei kĩla mũkwĩka, nũndũ Yeova Ngai witũ ndetĩkĩlaa ũsili ũte wa katĩ, nde kyende, na ndosaa ĩvaki.”

8 O na ĩngĩ, kũu Yelusalemu, Yeosavati nĩwanyuvie Alivai amwe na athembi na aũngamĩi amwe ma nyũmba sya aa-ĩthe ma Isilaeli mathũkũmae me asili ma Yeova na maminae makoani ma ekali ma Yelusalemu. 9 Na ameaĩa atĩĩ: “Kĩĩ nĩkyo mwaĩle kwĩka mũimũkĩa Yeova, mwĩ aĩkĩĩku na mwĩ na ngoo ĩlũmanĩtye vyũ nake:* 10 Ĩvinda o na yĩva yĩla ana-a-ĩthe menyu ala mekalaa ndũanĩ syoo mamũetee ĩkoani yĩkonetye kwĩtĩkya nthakame kana ĩkũlyo ĩũlũ wa mwĩao, maũndũ ala nĩmwĩaĩe mwĩke, myolooto, kana motwʼĩo, mwaĩlĩte kũmakanyʼa nĩ kana maikethĩwe na ĩvĩtyo mbee wa Yeova; na mwaema kwĩka ũu, ũthatu wake ũkooka ĩũlũ wenyu na ana-a-ĩthe menyu. Kĩĩ nĩkyo mwaĩlĩte kwĩka, nĩ kana mũikethĩwe na ĩvĩtyo. 11 Mũnene wa athembi, Amalia, nũũ vaa ũla ũmũũngamĩe kĩla ũndũnĩ ũkonetye Yeova. Nzevatia mwana wa Isimaeli nĩwe mũtongoi wa nyũmba ya Yuta kĩla ũndũnĩ ũkonetye mũsumbĩ. Na Alivai makathũkũmaa me anene menyu. Ĩthĩwai na vinya na mũitethya wĩa ũsu na kĩthito, na Yeova nĩethĩwe na ala mekwĩka kĩla kĩseo.”*

20 Ĩtina wa ĩvinda, Amoavi na Aamimoni, me vamwe na Aamoni,* nĩmookie kũkita na Yeosavati. 2 Kwoou Yeosavati eewa atĩĩ: “Ĩkomano ĩnene nĩyooka kũũvithũkĩa kuma kĩsionĩ kya ũla ũkanga,* kuma Etomu, na me vaya Asasoni-tamali, no vo Eni-ngeti.” 3 Yeosavati eewʼa ũu, nĩwalikilwe nĩ wia, na atwʼa kũmũmantha* Yeova. Kwoou nĩwatangaasĩie andũ onthe ma Yuta matĩĩe kũya. 4 Na ĩndĩ andũ ma Yuta moombana vamwe mamanthe ũtao wa Yeova; maumie ndũanĩ syonthe sya Yuta makakũlye Yeova ũtao.

5 Na ĩndĩ Yeosavati aũngama ũmbanonĩ wa Yuta na Yelusalemu nyũmbanĩ ya Yeova mbee wa kĩla kĩwanza kyeũ, 6 na asya atĩĩ:

“Ame Yeova Ngai wa aa-ũmae maitũ, we ndwĩ Ngai ĩtunĩ; ndũsumbĩkĩte ĩũlũ wa mosumbĩ onthe ma i mbaĩ? Kwʼokonĩ kwaku ve vinya na ũtonyi, na vai ũmwe ũtonya kũvota kũleana naku. 7 Ame Ngai witũ, we ndwaalũngya ekali ma nthĩ ĩĩ maume mbee wa andũ maku Isilaeli na ĩndĩ wamĩnenga ũsyao wa* mũnyanyau Avalaamu yĩthĩwe yawʼo ĩvinda yonthe? 8 Na matũa vo, na makwakĩa vandũ vatheu vo kwondũ wa ĩsyĩtwa yaku, mayasya, 9 ‘Ethĩwa mũisyo ũkatũkwata, wĩthĩwe ũetetwe nĩ ũvyũ, ũsilĩlo mũito, ũwau wa kũkwatanw’a, kana yũa, ekai twĩũngama mbee wa nyũmba ĩĩ na mbee waku (nĩkwĩthĩwa ĩsyĩtwa yaku yĩ nyũmbanĩ ĩno) na tũikwĩkaĩla ũtũtetheesye tume thĩnanĩ witũ, na mwa wĩĩthukĩĩsya na ũitũtangĩĩa.’ 10 Yu aũme ma Amimoni, Moavi, na kĩsio kĩ iĩma kya Seili naa vaa, ala ũtaaĩtĩkĩlya Aisilaeli mamavithũkĩe yĩla maumie nthĩ ya Misili. Nĩmeethyũũie mamatia na mayaamamina. 11 Yu mokĩte kũtũĩvanĩsya kwa kũtũlũngya tume nthĩ yaku ĩla watũnengie yĩthĩwe ũtiĩwa. 12 Ame Ngai witũ, we ndwĩmaetee ũsilĩlo? Nũndũ ithyĩ tũi na vinya mbee wa ĩkomano yĩĩ ĩnene yĩla yũkĩte kũtũvithũkĩa; na tũyĩsĩ kĩla twaĩle kwĩka, ĩndĩ metho maitũ nue masyaĩtye.”

13 Ĩvindanĩ yĩu, andũ onthe ma Yuta maũngamĩte mbee wa Yeova, me na iveti syoo, na syana syoo,* o vamwe na ila nini vyũ.

14 Nĩvo ĩndĩ katĩkatĩ wa ũmbano ũsu, veva wa Yeova wookĩie Yaanzieli mwana wa Nzekalia mwana wa Mbenaia mwana wa Yeieli mwana wa Matania, ũla waĩ Mũlivai wa ana ma Asavu. 15 Aisye atĩĩ: “Ĩthukĩĩsyei nesa, inywʼĩ Yuta yonthe na inywʼĩ ekali ma Yelusalemu na Mũsumbĩ Yeosavati! Ũũ nĩwʼo Yeova ũkũmũtavya, ‘Mũikakĩe kana mũtelemwʼe nĩ ĩkomano yĩĩ ĩnene, nũndũ kaũ ti wenyu ĩndĩ nĩ wa Ngai. 16 Ũnĩ mwĩtheea mũkite namo. Makeethĩwa mambatĩte na nzĩa ya Nzisi, na mũkamethĩa mũthyanĩ wa mwanda* mũtavikĩte weũnĩ wa Yelueli. 17 Mũikethĩwa na vata wa kũkita kaũnĩ ũũ. Mwĩũngama vala mwaĩle kũũngama, mũteũsonga, na mũyona ũtangĩĩo wa Yeova kwondũ wenyu.* Inywʼĩ Yuta na Yelusalemu, mũikakĩe kana mũteleme. Ũnĩ mwĩthi kũkita namo, na Yeova akeethĩwa vamwe nenyu.’”

18 Vau kwa vau Yeosavati nĩwakumanie na ũthyũ wake nginya nthĩ, na Yuta yonthe na ekali ma Yelusalemu mavalũka mbee wa Yeova nĩ kana mamũthaithe Yeova. 19 Na ĩndĩ Alivai ala maĩ nzyawa sya Akoathi na Akola mookĩla nĩ kana mamũtaĩe Yeova Ngai wa Isilaeli na wasya mũnene mũno.

20 Ũnĩ wake maamũkie kwakya tene na mathi weũnĩ wa Tekoa. Maendete, Yeosavati aũngamie na asya atĩĩ: “Mbĩthukĩĩsyei, inywʼĩ andũ ma Yuta na inywʼĩ ekali ma Yelusalemu! Mũĩkĩĩei Yeova Ngai wenyu nĩ kana mũũngame mwĩ alũmu.* Ĩkĩĩai athani make, na maũndũ menyu nĩmeũthi nesa.”

21 Ĩtina wa kũsũanĩa maũndũ e vamwe na andũ, nĩwanyuvie aũme mamwinĩe Yeova na maimũtaĩa mekĩe ngũa ntheu maendete mbee wa aũme ala maĩ na mĩio ya kaũ, mayasya: “Mũtũngĩei Yeova mũvea, nũndũ wendo wake ũtathelaa wĩkalaa tene na tene.”

22 Yĩla mambĩĩie kwina mbathi sya kũmũtaĩa me atanu, Yeova nĩwavithũkĩie aũme ma Amimoni matataĩĩe, o vamwe na ma Moavi, na ma kĩsio kĩ iĩma kya Seili ala mavithũkĩe Yuta, namo mooaana. 23 Na Aamimoni na Amoavi mavĩndũka na mambĩĩa kũvithũkĩa ekali ma kĩsio kĩ iĩma kya Seili nĩ kana mamanange na maimamina; na yĩla maminanie na ekali ma Seili, nĩmaananganie mo ene.

24 Ĩndĩ yĩla andũ ma Yuta mavikie mwakonĩ mũtũlu wa mũsyaĩĩsya kũu weũnĩ na masisya vala ĩkomano yĩu yaĩ, nĩmoonie simba syoo ivalũkangĩte nthĩ; vai ũmwe waavonoka. 25 Kwoou Yeosavati na andũ make mooka kũkua mũtavo ũla waĩ na andũ asu, na meethĩa katĩ woo syĩndũ mbingĩ mũno, ngũa, na syĩndũ sya kwendeesya, ila mamaumisye nginya weethĩa maitonya kũkua ingĩ. Makuie mũtavo ũsu mĩthenya ĩtatũ, nũndũ waĩ mwingĩ mũno. 26 Mũthenyanĩ wa kana nĩmoombanĩie Mwandanĩ* wa Mbelaka, nĩkwĩthĩwa vau nĩ vo mamũtaĩe* Yeova. Nĩkyo kĩtumi meetie vandũ vau Mwanda wa Mbelaka,* nginya ũmũnthĩ.

27 Nĩvo ĩndĩ aũme onthe ma Yuta na Yelusalemu, matongoewʼe nĩ Yeosavati, masyokie Yelusalemu me atanu, nĩkwĩthĩwa Yeova nĩwatumĩte matana nũndũ wa kũsinda amaitha moo. 28 Kwoou malikile Yelusalemu na mĩio ya kũinga yĩ na ndii, mĩio ya wathi yĩ na ndii 12,* na masoo na mathi nyũmbanĩ ya Yeova. 29 Na wia wa Ngai wakwata mosumbĩ onthe ma i nthĩ yĩla meewie kana Yeova nĩwokita na amaitha ma Isilaeli. 30 Nũndũ wa ũu, ũsumbĩ wa Yeosavati ndwaĩ na ithokoo, na Ngai wake aendeea kũmũnenga ũthũmũo kĩla ngalĩko.

31 Na Yeosavati aendeea kũsumbĩka Yuta. Aĩ na myaka 35 yĩla watwʼĩkie mũsumbĩ, na asumbĩkie myaka 25 e kũu Yelusalemu. Inyia wake eetawa Asuva na aĩ mwĩĩtu wa Silii. 32 Nĩwaendeeie kũatĩĩa nzĩa sya Asa ĩthe wake. Ndaaelelũka akaitia, na nĩweekie kĩla kyaĩlĩte methonĩ ma Yeova. 33 Ĩndĩ kũndũ kũtũlu kũyaavetwa, na andũ mayaĩ manombanyʼa ngoo syoo kwondũ wa Ngai wa aa-ũmae moo.

34 Na ngewa ĩla ĩngĩ ya Yeosavati, kuma mwambĩĩo nginya mũthya, ĩandĩkĩtwe ndetonĩ sya Yeu mwana wa Aanani, ila syongelilwe Ĩvukunĩ ya Asumbĩ ma Isilaeli. 35 Ĩtina wa ũu, Mũsumbĩ Yeosavati wa Yuta nĩwaseũvisye ngwatanĩo na Mũsumbĩ Aasia wa Isilaeli, ũla weekaa maũndũ mathũku. 36 Kwoou makwatĩanĩa maseũvye meli sya kũthi Talisisi, na maseũvĩsye meli isu Esioni-ngeveli. 37 Ĩndĩ Elieseli mwana wa Ndotavau kuma Malesa nĩwawetie wathani ũũ mũthũku ĩũlũ wa Yeosavati, ayasya: “Nĩkwĩthĩwa nũnaseũvisye ngwatanĩo na Aasia, Yeova nũkwananga wĩa waku.” Kwoou meli isu syaanangĩka, na iyaĩ itonya kũthi Talisisi.

21 Na ĩndĩ Yeosavati akwʼa na athikwa vamwe na aa-ũmae make Ndũanĩ ya Ndaviti; na mwanae Yeolamu atwʼĩka mũsumbĩ vandũ vake. 2 Ana-a-ĩthe, ana ma Yeosavati, maĩ Asalia, Yeielu, Nzekalia, Asalia, Mikaeli, na Sevatia; asu onthe maĩ ana ma Mũsumbĩ Yeosavati wa Isilaeli. 3 Na ĩthe woo nĩwamanengete mĩthĩnzĩo mingĩ ya vetha na thaavu, na syĩndũ sya vata, o vamwe na ndũa mbiĩĩe kũu Yuta; ĩndĩ anenga Yeolamu ũsumbĩ, nĩkwĩthĩwa nĩwe waĩ mwana ũla mũkũũ.

4 Yĩla Yeolamu waĩ anambĩĩa kũsumbĩka ũsumbĩ ũla waĩ wa ĩthe, nĩwooaie ana-a-ĩthe onthe na ũvyũ, o vamwe na anene amwe me mbee ũsumbĩnĩ wa Isilaeli, nĩ kana alũlũmĩĩlye kĩanda kyake. 5 Yeolamu aĩ na myaka 32 yĩla watwʼĩkie mũsumbĩ, na asumbĩkie myaka nyanya e Yelusalemu. 6 Nĩwakinyĩile nzĩanĩ ya asumbĩ ma Isilaeli, o tondũ ala ma nyũmba ya Aavu meekĩte, nĩkwĩthĩwa atwaĩte mwĩĩtu wa Aavu; na nĩwaendeeie kwĩka kĩla kĩthũku methonĩ ma Yeova. 7 Ĩndĩ Yeova ndendaa kwananga nyũmba ya Ndaviti nũndũ wa ũtianĩo ũla watianĩĩte na Ndaviti, nĩkwĩthĩwa nĩwathanĩte kũmũnenga taa, we na ana make mavinda onthe.

8 Mĩthenyanĩ yake, andũ ma Etomu nĩmangʼendeie Yuta, na meeyĩũngamĩsya mũsumbĩ woo. 9 Na kwoou Yeolamu na aũngamĩi make makĩlanĩlya na makasya make onthe, na ookĩla ũtukũ na avithũkĩa Aetomu ala mamũthyũlũlũkĩte vamwe na aũngamĩi ma makasya na amasinda. 10 Ĩndĩ Etomu nĩyĩthĩĩtwe ĩingʼendea Yuta nginya ũmũnthĩ. O nayo Livina nĩyaleile aimĩsumbĩka ĩvindanĩ yĩu, nĩkwĩthĩwa nĩwatiĩte Yeova Ngai wa aa-ũmae make. 11 O na ĩngĩ, nĩwaseũvisye kũndũ kũtũlu iĩmanĩ sya Yuta nĩ kana atume ekali ma Yelusalemu meka ũmalwaya wa kĩ-veva, na atuma Yuta yelelũka.

12 Mũthya, nĩwakwatie ũtũmani ũũ mũandĩke kuma kwa mwathani Eliya, ũyasya: “Ũũ nĩwʼo Yeova Ngai wa ũmae waku Ndaviti, ũkwasya, ‘Ndũkinyĩlaa nzĩanĩ sya ĩthe waku Yeosavati o na nzĩanĩ sya Mũsumbĩ Asa wa Yuta. 13 Ĩndĩ ũkinyĩlaa nzĩanĩ sya asumbĩ ma Isilaeli na ũituma Yuta na ekali ma Yelusalemu meka ũmalwaya wa kĩ-veva o ta ũmalwaya wa nyũmba ya Aavu, o na nĩũaĩte ana-a-ĩthe maku mwene, andũ ma mũsyĩ wa ĩthe waku, ala maĩ aseo kwĩ uwe. 14 Kwoou, Yeova nũkũetee andũ maku ũkũno mũnene, akũne ana maku, iveti syaku, na malĩ yaku yonthe. 15 Na ũkakwatwa nĩ mowau maingĩ, o vamwe na ũwau wa maa maku, nginya mũthenya kũthi ũla ũngĩ, maa maku maume nza nũndũ wa ũwau ũsu.’”

16 Nĩvo ĩndĩ Yeova weekĩie vinya Avilisiti* na Aalavu ala maĩ vakuvĩ na Aethiovia mavithũkĩe Yeolamu. 17 Kwoou nĩmavithũkĩie Yuta, malika kwʼo na vinya, na makua malĩ yonthe ĩla meethĩie nyũmbanĩ ya mũsumbĩ, o vamwe na ana make na iveti syake; mamũtiĩe o mwanae ũla mũnini Yeoaasu* e weka. 18 Na ĩtina wa maũndũ asu onthe, Yeova nĩwamũkũnie na ũwau wa maa ũtesa kũvoa. 19 Ĩtina wa ĩvinda ĩna, vathelete myaka ĩlĩ mĩima, ũwau ũsu nĩwatumie maa make mauma nza, na akwʼa athĩnĩtwʼe nĩ ũwau ũsu mũno; na andũ make mayaamũvuvĩa mwaki o tondũ mavuvĩie aa-ũmae make mwaki. 20 Aĩ na myaka 32 yĩla watwʼĩkie mũsumbĩ, na asumbĩkie myaka nyanya e kũu Yelusalemu. Vai mũndũ waaĩwʼa ũndũ yĩla wakwie. Kwoou nĩmamũthikie Ndũanĩ ya Ndaviti, ĩndĩ ti kũla asumbĩ mathikawa.

22 Nĩvo ĩndĩ ekali ma Yelusalemu matwʼĩkĩthisye Aasia, mwana wake ũla mũnini, mũsumbĩ vandũ vake, nĩkwĩthĩwa nguthu ya avenani ĩla yookanĩtye na Aalavu kambinĩ yaĩ ĩnooaa ana make ala akũũ onthe. Kwoou Aasia mwana wa Yeolamu ambĩĩa kũsumbĩka e mũsumbĩ wa Yuta. 2 Aasia atwʼĩkie mũsumbĩ e na myaka 22, na asumbĩkie mwaka ũmwe e Yelusalemu. Inyia wake eetawa Athalia na aĩ mwĩsũkũũe* wa Omili.

3 O nake akinyĩlaa nzĩanĩ ila nyũmba ya Aavu yakinyĩlaa, nĩkwĩthĩwa inyia wake nĩwe wamũtaaa eke maũndũ mathũku. 4 Na nĩwaendeeie kwĩka kĩla kĩthũku methonĩ ma Yeova, o ta nyũmba ya Aavu, nĩkwĩthĩwa nĩmo matwʼĩkie atai make ĩthe akwʼa, na kĩu kyesa kũtuma akwʼa. 5 Nĩwaatĩĩie ũtao woo na athi Lamothi-ngileati e vamwe na Yeolamu mwana wa Mũsumbĩ Aavu wa Isilaeli nĩ kana makokite na Mũsumbĩ Aasaeli wa Silia, na me kũu Yeolamu aũmĩwʼa nĩ ndũĩka sya kũatha na maangi. 6 Nĩwasyokie Yesileeli nĩ kana avoe kũla waũmĩĩtwʼe e Lama yĩla wokitaa na Mũsumbĩ Aasaeli wa Silia.

Na Aasia* mwana wa Yeolamu mũsumbĩ wa Yuta atheea Yesileeli akamwone Yeolamu mwana wa Aavu, nĩkwĩthĩwa aĩ mũũmĩsye.* 7 Ĩndĩ Ngai nĩwe watongoesye maũndũ nĩ kana Aasia oke kwa Yeolamu oawe; na yĩla wookie, nĩwaendanisye na Yeolamu makathaũwe Yeu mwĩsũkũũe* wa Nimisi, ũla Yeova wetĩkĩsye mauta anange* nyũmba ya Aavu. 8 Yĩla Yeu wambĩĩie kũetee nyũmba ya Aavu ũsilĩlo, nĩweethĩie anene me mbee ũsumbĩnĩ wa Yuta na ana ma mwana-a-inyia wa Aasia, ala maĩ athũkũmi ma Aasia, na amoaa. 9 Na ĩndĩ nĩmamũmanthie Aasia; na mamũkwata e kũla weevithĩte Samalia, na mamũetee Yeu. Na ĩtina wa ũu, mamũaa na mamũthika, nĩkwĩthĩwa maisye: “We nĩ mwĩsũkũũe wa Yeosavati, ũla wamũmanthie Yeova na ngoo yake yonthe.” Na vayaĩ mũndũ o na ũmwe wa nyũmba ya Aasia waĩ na ũkũmũ wa kĩ-ũsumbĩ wa kũsumbĩka ũsumbĩnĩ ũsu.

10 Yĩla Athalia, inyia wa Aasia, woonie kana mwanae nĩwakwʼa, nĩwookĩlile na amina onthe ala maaĩlĩte kũtwʼĩka asumbĩ ma* nyũmba ya Yuta. 11 Ĩndĩ Yeosaveathi, ũla waĩ mwĩĩtu wa mũsumbĩ, nĩwooyie Yeoasi mwana wa Aasia amũvetanga katĩ wa ana ma mũsumbĩ ala maaĩlĩte kũawa, na amwia vamwe na mũsũvĩi wake lumunĩ ya nthĩnĩ ya kũkoma. Yeosaveathi mwĩĩtu wa Mũsumbĩ Yeolamu (aĩ kĩveti kya mũthembi Yeoiata na mwĩĩtu-a-inyia wa Aasia) nĩwavotie kũmũvitha ndakoneke nĩ Athalia, na kwoou ndaamũaa. 12 Yeoasi ekalile namo myaka thanthatũ, avithĩtwe nyũmbanĩ ya Ngai ũla wa wʼo, ĩvindanĩ yĩla Athalia wasumbĩkĩte Yuta.

23 Mwakanĩ wa mũonza, Yeoiata nĩweethĩiwe na ũkũmbaũ na aseũvya wĩwʼano* vamwe na anene ma maana. Anene asu maĩ Asalia mwana wa Yeloamu, Isimaeli mwana wa Yeoanani, Asalia mwana wa Oveti, Maaseia mwana wa Ataia, na Elisavati mwana wa Nzikili. 2 Na ĩndĩ mathi Yuta yonthe na moombanyʼa Alivai kuma ndũanĩ syonthe sya Yuta na aũngamĩi ma nyũmba sya aa-ĩthe ma Isilaeli. Yĩla mavikie Yelusalemu, 3 ũmbano wʼonthe nĩwatianĩie ũtianĩo na mũsumbĩ nyũmbanĩ ya Ngai ũla wa w’o, na ĩtina wa ũu, Yeoiata amea atĩĩ:

“Sisyai! Mwana wa mũsumbĩ nũkũsumbĩka, o tondũ Yeova wathanĩte ĩũlũ wa ana ma Ndaviti. 4 Ũũ nĩwʼo mũkwĩka: Kĩlungu kya katatũ kya athembi na kĩlungu kya katatũ kya Alivai ala makethĩwa maithũkũma mũthenya wa Savato makasũvĩa mĩomo; 5 kĩlungu kĩngĩ kya katatũ kĩkeethĩwa nyũmbanĩ ya mũsumbĩ, na kĩlungu kĩla kĩngĩ kya katatũ kĩkeethĩwa Mũvĩanĩ wa Mũsingi, na andũ onthe makeethĩwa iwanzanĩ sya nyũmba ya Yeova. 6 Mũiketĩkĩlye mũndũ o na ũmwe alike nyũmbanĩ ya Yeova eka o athembi na Alivai ala meũthũkũma. Asu no malike nĩkwĩthĩwa mo nĩ kĩkundi kĩtheu, na andũ onthe makeanĩsya kĩanda kĩla Yeova ũmanengete. 7 No nginya Alivai mathyũlũlũke mũsumbĩ kĩla ngalĩko, kĩla ũmwe akwete mĩio yake ya kaũ. Na mũndũ o na wĩva ũkũtata kũlika nyũmbanĩ ĩsu aĩlĩte kũawa. Ĩkalai vakuvĩ na mũsumbĩ vonthe vala ũkũthi.”*

8 Alivai na andũ onthe ma Yuta nĩmeekie o ũndũ mũthembi Yeoiata wameaĩe. Na kwoou kĩla ũmwe woo oosa aũme make ala maaĩlĩte kũthũkũma mũthenyanĩ wa Savato, o vamwe na ala maaĩlĩte kũthũmũa mũthenyanĩ wa Savato, nĩkwĩthĩwa mũthembi Yeoiata ndaĩ ananenga ikundi isu mwanya syume wĩanĩ. 9 Na ĩndĩ mũthembi Yeoiata anenga anene asu ma maana matumo na ngao nini* na ngao sya kĩlinge sya Mũsumbĩ Ndaviti, ila syaĩ nyũmbanĩ ya Ngai ũla wa w’o. 10 Na ĩndĩ aũngamya andũ onthe, kĩla ũmwe akwete mũio wake wa kaũ, kuma ngalĩko ya kw’oko kwa aũme kwa nyũmba ĩsu nginya ngalĩko ya kw’oko kwa aka kwa ĩ nyũmba, amwe ũtee wa kĩthembeo na angĩ ũtee wa ĩ nyũmba, mathyũlũlũkĩte mũsumbĩ. 11 Na ĩndĩ maumaalya mwana wa mũsumbĩ na mamwĩkĩa ngovia ya ũsumbĩ* na mamwilĩĩla ũla Ũkũsĩ* na mamũtwʼĩkĩthya mũsumbĩ, na Yeoiata na ana make mamwĩtĩkĩsya mauta. Na ĩndĩ masya atĩĩ: “Mũsumbĩ nĩekale ĩvinda yĩasa!”

12 Yĩla Athalia weewie matuu ma andũ masembete na mataĩĩte mũsumbĩ, ndatĩkanĩ ĩsu nĩwaendie vala ve andũ asu nyũmbanĩ ya Yeova. 13 Na ĩndĩ oona mũsumbĩ aũngye ũtee wa kĩtuĩ kyake kĩla kyaĩ mũomonĩ. Na anene me mbee ũsumbĩnĩ na avuvi ma masoo maĩ na mũsumbĩ, na andũ onthe ma ĩ nthĩ maendeee kũtana na makwetye kũvuva masoo, na aini maĩ na mĩio ya wathi matongoesye* andũ ala mainaa mbathi sya kũtaĩa. Yĩla Athalia woonie ũu, nĩwatembũie ngũa syake na asya ũũ na wasya mũnene: “Avũnyanĩi! Avũnyanĩi!” 14 Ĩndĩ mũthembi Yeoiata aumaalya anene ma maana, ala manyuvĩtwe maũngamĩe ita, na amea atĩĩ: “Mumyei asunginĩ, na mũndũ o na wĩva amũatĩĩa, mũaei na ũvyũ!” Nũndũ mũthembi ũsu aĩtye: “Mũikamũaĩe nyũmbanĩ ya Yeova.” 15 Na kwoou mamũkwata na vinya, na yĩla wavikie ũlikĩlonĩ wa Mũvĩa wa Mbalasi wa nyũmba ya mũsumbĩ, nĩmamũaĩe vau mate kwananga ĩvinda.

16 Na ĩndĩ Yeoiata atianĩa ũtianĩo na andũ onthe na mũsumbĩ, kana meendeea kwĩthĩwa andũ ma Yeova. 17 Ĩtina wa ũu, andũ onthe nĩmalikile nyũmbanĩ* ya Mbaali na mamĩomboanga, na matumbatumba ithembeo syake na mĩvwʼanano yake, na mooaĩa Matani mũthembi wa Mbaali vau mbee wa ithembeo. 18 Na ĩndĩ Yeoiata nĩwanengie athembi na Alivai wĩa wa kũsũvĩa nyũmba ya Yeova. Asu nĩmo Ndaviti wavangie ikundi nĩ kana masũvĩae nyũmba ya Yeova na mayumĩasya Yeova nthembo sya kũvĩvwʼa kwosana na kĩla kĩandĩkĩtwe Mĩaonĩ ya Mose, me atanu na maimwinĩa, o ũndũ Ndaviti weeaĩte.* 19 O na ĩngĩ, nĩwaiie asũvĩi ma mĩvĩa mĩvĩanĩ ya nyũmba ya Yeova, nĩ kana mũndũ mũvuku ũndũnĩ o na wĩva ndakavalike. 20 Na ĩndĩ oosa anene ma maana, andũ me ndaĩa, atongoi ma andũ, na andũ onthe ma ĩ nthĩ na maumaasya mũsumbĩ mamũtheesya kuma nyũmbanĩ ya Yeova. Na ĩtina wa ũu, nĩmesĩile mũvĩanĩ wa ĩũlũ wa nyũmba ya mũsumbĩ na mekalya mũsumbĩ kĩvĩlanĩ kya ũsumbĩ wake. 21 Kwoou andũ onthe ma nthĩ ĩsu matana na ndũa yausya, nĩkwĩthĩwa nĩmooaie Athalia na ũvyũ.

24 Yeoasi aĩ na myaka mũonza yĩla watwʼĩkie mũsumbĩ, na asumbĩkie e Yelusalemu myaka 40. Inyia wake eetawa Nzivia, na aumĩte Mbeeli-sieva. 2 Yeoasi aendeeie kwĩka kĩla kyaĩlĩte methonĩ ma Yeova mĩthenyanĩ yonthe ya mũthembi Yeoiata. 3 Yeoiata nĩwamũnyuvĩie iveti ilĩ, na eethĩwa na ana na eĩtu.

4 Ĩtina, waĩ wendi wa ngoo ya Yeoasi kũtũngĩĩa nyũmba ya Yeova. 5 Kwoou nĩwoombanisye athembi na Alivai na amea atĩĩ: “Endai ndũanĩ sya Yuta mũkombanyʼe mbesa kuma kwa Aisilaeli onthe sya kũtũngĩĩaa nyũmba ya Ngai wenyu mwaka kũthi ũla ũngĩ; na mwaĩlĩte kwĩka ũu na mĩtũkĩ.” Ĩndĩ Alivai mayaaĩka ũu na mĩtũkĩ. 6 Kwoou mũsumbĩ eeta mũnene Yeoiata na amũkũlya atĩĩ: “Nĩkĩ ũteaĩe Alivai maete kuma Yuta na Yelusalemu koti mũtheu ũla Mose mũthũkũmi wa Yeova weeaie, koti mũtheu wa ũmbano wa Isilaeli, kwondũ wa ĩeema ya Ũkũsĩ? 7 Nĩkwĩthĩwa ana ma Athalia, ũla mũndũ mũka mũthũku, nĩmatũlile nyũmba ya Ngai ũla wa w’o, na matũmĩa syĩndũ syonthe ntheu sya nyũmba ya Yeova ũthaithinĩ wa Mbaali.” 8 Na ĩndĩ, mũsumbĩ nĩwaumisye mwĩao, ĩsandũkũ yaseũvwʼa na yaiwa nza wa mũvĩa wa nyũmba ya Yeova. 9 Ĩtina wa ũu, nĩkwatangaasiwe kĩsionĩ kyonthe kya Yuta na Yelusalemu andũ maetee Yeova koti mũtheu ũla Mose mũthũkũmi wa Ngai ũla wa w’o weeaĩe Aisilaeli me weũnĩ maumasye. 10 Anene onthe me mbee ũsumbĩnĩ na andũ onthe nĩmatanie, na maendeea kũete mĩvothi na kũmĩkĩa ĩsandũkũnĩ yĩu nginya yausũa.*

11 Na kĩla ĩvinda Alivai maete ĩsandũkũ yĩu yĩnengwe mũsumbĩ na mayona yĩ na mbesa mbingĩ, mũandĩki wa mũsumbĩ na ũla watetheeasya mũnene wa athembi nĩmookaa na maisyumya ĩsandũkũnĩ yĩu, na ĩndĩ maiyĩtũnga vala yekalaa. Ũu nĩwʼo meekaa mũthenya kũthi ũla ũngĩ, na nĩmoombanisye mbesa mbingĩ mũno. 12 Na ĩndĩ mũsumbĩ na Yeoiata nĩmainengae ala maũngamĩe wĩa wa ũthũkũmi wa nyũmba ya Yeova, namo maiandĩka andũ ma kwasa mavia na mavundi ma kũtũngĩĩa nyũmba ya Yeova, o vamwe na mavundi ma syũma* na ũthuku nĩ kana matũngĩĩe nyũmba ya Yeova. 13 Na ala maũngamĩe wĩa ũsu nĩmawambĩĩisye, na wĩa ũsu wa kũtũngĩĩa wasonga na mbee maũũngamĩe, na matũngĩĩa nyũmba ya Ngai ũla wa w’o yekala ũndũ yaĩle kwĩkala na mamĩlũlũmĩĩlya. 14 Na mamina oou, maetee mũsumbĩ na Yeoiata mbesa ila syatialile, namo maitũmĩa kũseũvya mĩio ya nyũmba ya Yeova, mĩio ya ũthũkũmi na ya kũtũmĩwa kumya nthembo na ikombe na mĩio ya thaavu na ya vetha. Na kĩla ĩvinda nĩmaumĩasya nthembo sya kũvĩvwʼa nyũmbanĩ ya Yeova mĩthenyanĩ yonthe ya Yeoiata.

15 Yĩla Yeoiata waĩ mũkũũ na eanĩwe nĩ myaka mingĩ, nĩwakwie; akwie e na myaka 130. 16 Kwoou mamũthika Ndũanĩ ya Ndaviti vamwe na asumbĩ, nĩkwĩthĩwa nĩweekĩte Isilaeli ũseo maũndũnĩ makonetye Ngai ũla wa w’o na nyũmba yake.

17 Ĩtina wa kĩkwʼũ kya Yeoiata, anene me mbee ũsumbĩnĩ wa Yuta nĩmookie makumanĩa mũsumbĩ, nake mũsumbĩ amethukĩĩsya. 18 Nĩmatiie nyũmba ya Yeova Ngai wa aa-ũmae moo na mambĩĩa kũthũkũma mĩtĩ ya ũthaithi* na ngai sya mĩvwʼanano, na nũndũ wa ũu, ũthatu wa Ngai wookĩa* Yuta na Yelusalemu nũndũ wa ĩvĩtyo yoo. 19 Nĩwaendeeie kũmatũmĩa athani nĩ kana mamatũnge kũla kwĩ Yeova, na maendeea kũmakanyʼa,* ĩndĩ malea kwĩthukĩĩsya.

20 Veva wa Ngai nĩwookĩie* Nzekalia mwana wa mũthembi Yeoiata, na aũngama vandũ vatũlu mbee wa andũ na amea atĩĩ: “Ũũ nĩwʼo Ngai ũla wa w’o ũkwasya, ‘Nĩkĩ mũtũlaa mĩao ya Yeova? Maũndũ menyu mayĩthi nesa! Nũndũ nĩmũtiĩte Yeova, o nake nũkũmũtia.’” 21 Ĩndĩ nĩmavangĩthisye mũvango wa kũmũmina, na maatĩĩe mwĩao wa mũsumbĩ, mamũkimangĩa na mavia kĩwanzanĩ kya nyũmba ya Yeova. 22 Kwoou Mũsumbĩ Yeoasi ndaalilikana wendo ũtathelaa ũla wooniwʼe nĩ Yeoiata ĩthe wake,* na ooaa mwana wake, ũla waisye ũũ aikwʼa: “Yeova nĩone ũndũ ũsu na aikũĩvanĩsya.”

23 Mwambĩĩonĩ wa mwaka* ita sya Silia nĩsyookie kũkita na Yeoasi, na syavithũkĩa Yuta na Yelusalemu. Na ĩndĩ syooaa anene onthe ma andũ, na syatwaĩa mũsumbĩ wa Ndamasikũ mũtavo woo wʼonthe. 24 Nĩkwĩthĩwa o na kau ũtalo wa aũme ala maĩ itanĩ sya Silia waĩ o mũvũthũ, Yeova nĩwatumie masinda ita syaĩ na andũ aingĩ mũno, nũndũ nĩmamũtiĩte Yeova Ngai wa aa-ũmae moo; na kwoou maetee* Yeoasi ũsilĩlo. 25 Na yĩla maumie vala ũĩ (nĩkwĩthĩwa mamũtiie e mũũmĩsye mũno*), athũkũmi make mwene nĩmavangĩthisye mũvango wa kũmũmina nũndũ nĩwetie nthakame ya ana ma* mũthembi Yeoiata. Nĩmamũaĩe kĩtandanĩ kyake mwene. Kwoou akwʼa na mamũthika Ndũanĩ ya Ndaviti, ĩndĩ mayaamũthika kũla asumbĩ mathikawa.

26 Aa nĩmo mavangĩthisye mũvango ũsu wa kũmũmina: Nzavati mwana wa Simeathi ũla waĩ mũndũ mũka Mũamimoni na Yeosavatu mwana wa Similithi ũla waĩ mũndũ mũka Mũmoavi. 27 Na ĩũlũ wa ana make na maũndũ maingĩ ala matangaasiwe ĩũlũ wake na kũtũngĩĩwa* kwa nyũmba ya Ngai ũla wa w’o, maũndũ asu onthe malekotiĩtwe maũndũnĩ ala maandĩkĩtwe* Ĩvukunĩ ya Asumbĩ. Na mwana wake Amasia atwʼĩka mũsumbĩ vandũ vake.

25 Amasia aĩ na myaka 25 yĩla watwʼĩkie mũsumbĩ, na asumbĩkie e Yelusalemu myaka 29. Inyia wake eetawa Yeoatani na aĩ wa Yelusalemu. 2 Nĩwaendeeie kwĩka kĩla kyaĩlĩte methonĩ ma Yeova, ĩndĩ ndaaĩka ũu na ngoo yonthe. 3 Yĩla waĩkĩĩthisye nĩwalũlũmĩĩlya vyũ ũsumbĩ wake, nĩwooaie athũkũmi make ala mooaie ĩthe wake mũsumbĩ. 4 Ĩndĩ ndaaũaa ana moo, nĩkwĩthĩwa eekie kwosana na kĩla kĩandĩkĩtwe Mĩaonĩ, ĩvukunĩ ya Mose, vala Yeova wĩaĩte: “Aa-ĩthe mayaĩlĩte kũkwʼa nũndũ wa ana moo, na ana mayaĩlĩte kũkwʼa nũndũ wa aa-ĩthe moo; ĩndĩ kĩla mũndũ aĩlĩte kũkwʼa nũndũ wa naĩ yake mwene.”

5 Na Amasia oombanyʼa andũ onthe ma Yuta na atuma maũngama kwosana na nyũmba sya aa-ĩthe, kwosana na anene ma makili na kwosana na anene ma maana kwondũ wa Yuta yonthe na Mbenyamini. Nĩwaandĩkĩthisye ala maĩ na myaka 20 na kwambata, na eethĩa kana maĩ ngũmbaũ sya kaũ 300,000 imanyĩĩtwʼe kaũ* nĩ kana ilike itanĩ sya kaũ, na syaĩ itonya kũtũmĩa matumo na ngao nene. 6 O na ĩngĩ, nĩwaĩvie ngũmbaũ sya kaũ 100,000 sya Isilaeli talendi 100* sya vetha. 7 Ĩndĩ mũndũ wa Ngai ũla wa w’o ooka vala ũĩ, na amwĩa atĩĩ: “We mũsumbĩ, ndũketĩkĩlye ita sya Isilaeli iendanyʼe naku, nũndũ Yeova nde vamwe na Isilaeli, o na nde vamwe na Mũevilaimu o na ũmwe. 8 Ĩndĩ thi wĩ weka, wose ĩtambya, na ũyĩthĩwa na ũkũmbaũ kaũnĩ. Waema kwĩka ũu, Ngai ũla wa w’o no aũlulutĩkye mbee wa mũmaitha, nĩkwĩthĩwa Ngai e ũtonyi wa kũtetheesya na wa kũlulutĩkya.” 9 Nĩvo ĩndĩ Amasia wakũlilye mũndũ ũsu wa Ngai ũla wa w’o atĩĩ: “Na yu nĩĩkana ata na talendi 100 ila nĩnengete asikalĩ ma Isilaeli?” Nake mũndũ ũsu wa Ngai ũla wa w’o amũsũngĩa: “Yeova e na ũtonyi wa kũũnenga o na mbingĩ mũno kwĩ isu.” 10 Kwoou Amasia eea asikalĩ ala mookĩte vala ũĩ maumĩte Evilaimu mathi masyoke kwoo. Ĩndĩ nĩmathatĩie Yuta mũno, na kwoou masyoka kwoo me athilĩku mũno.

11 Na ĩndĩ Amasia oosa vinya na atongoesya asikalĩ make mwene mathi Mwandanĩ wa Mũnyũ, na ooaa aũme 10,000 ma Seili. 12 Na aũme ma Yuta makwata aũme 10,000 me thayũ. Kwoou mamatwaa mũthyanĩ wa ĩvia yĩ ngũka, na mamekya nthĩ kuma mũthyanĩ wa ĩvia yĩu yĩ ngũka, na onthe matilĩkanga tũlungu. 13 Ĩndĩ asikalĩ ala Amasia weeie masyoke maeke kũendanyʼa nake kaũnĩ makwetye kũvithũkĩa ndũa sya Yuta, kuma Samalia nginya Mbethi-oloni; nĩmooaie andũ 3,000 ndũanĩ isu na moosa mũtavo mwingĩ mũno.

14 Ĩndĩ ĩtina wa Amasia kũsyoka aumĩte kũaa Aetomu, nĩwaetie ngai sya aũme ma Seili na aitwʼĩkĩthya ngai syake, na ambĩĩa kũikumanĩa na kũithembea nthembo sya kũvĩvwʼa. 15 Na nũndũ wa ũu, Yeova athatĩa Amasia mũno, na atũma mwathani ũla wamwĩie atĩĩ: “Nĩkĩ ũatĩĩe ngai sya ngo sya andũ ila itaneevonokya andũ masyo ene kuma kwʼokonĩ kwaku?” 16 Aendeee kũneena, mũsumbĩ amwĩie atĩĩ: “Tũnaakũnyuva wĩthĩwe mũtai wa mũsumbĩ? Vindya! Wĩenda ũaĩwe kĩ?” Na ĩndĩ mwathani ũsu aeka kũmũtaa, ĩndĩ ongela kũmwĩa atĩĩ: “Nĩnĩsĩ kana Ngai nũtwʼĩte kũkwananga, nũndũ nĩwĩkĩte ũndũ ũũ na ndũnethukĩĩsya ũtao wakwa.”

17 Ĩtina wa kũkũlya atai make ũtao, Mũsumbĩ Amasia wa Yuta nĩwatũmanie ũtũmani kũla kwĩ Yeoasi mwana wa Yeoaasu mwana wa Yeu mũsumbĩ wa Isilaeli, ayasya: “Ũka tũkite!”* 18 Nake Mũsumbĩ Yeoasi wa Isilaeli atũmana kũla kwĩ Mũsumbĩ Amasia wa Yuta, aimwĩa: “Ĩia yĩ na mĩwʼa ya Levanoni nĩyatũmanie kũla kwĩ mũtalakwe* wa Levanoni ũtavwʼe atĩĩ: ‘Nengane mwĩĩtu waku atwawe nĩ mwanawa.’ Ĩndĩ nyamũ ya kĩthekanĩ ya Levanoni yesĩla vau na yakinyangĩa nthĩ ĩia yĩu yĩ na mĩwʼa. 19 Waĩtye, ‘Sisya! Nĩnakũnie* Aetomu.’ Na nũndũ wa ũu, ngoo yaku nĩkwatĩtwe nĩ mĩyimbyo, ũyenda kũkumwʼa. Ĩndĩ yu ĩkala nyũmbanĩ yaku mwene.* Nĩkĩ ũkwĩyĩtĩsya mũisyo nĩ kana ũvalũke wĩ vamwe na Yuta?”

20 Ĩndĩ Amasia ndaaĩthukĩĩsya, nĩkwĩthĩwa ũndũ ũsu waumĩte kwa Ngai ũla wa w’o nĩ kana amanengane kwʼokonĩ kwa mũmaitha, nũndũ nĩmaatĩĩte ngai sya Etomu. 21 Na kwoou Mũsumbĩ Yeoasi wa Isilaeli ambata, na e na Mũsumbĩ Amasia wa Yuta mokitĩa Mbethi-semesi, ĩla yĩthĩawa yĩ ya Yuta. 22 Na Yuta yasindwa nĩ Isilaeli, na kwoou kĩla ũmwe akĩĩa mũsyĩ kwake.* 23 Mũsumbĩ Yeoasi wa Isilaeli nĩwakwatie Mũsumbĩ Amasia wa Yuta, mwana wa Yeoasi mwana wa Yeoaasu,* me kũu Mbethi-semesi. Na ĩndĩ amũete Yelusalemu na aomboa ũkũta wa Yelusalemu kuma Mũvĩanĩ wa Evilaimu nginya Mũvĩanĩ wa Konanĩ, ũasa wa mĩkono 400.* 24 Nĩwoosie thaavu wʼonthe na vetha wʼonthe na syĩndũ syonthe ila syaĩ nyũmbanĩ ya Ngai ũla wa w’o ila syaĩ na* Oveti-etomu na ila syaĩ kũla kwaiawa ũthwii wa nyũmba ya mũsumbĩ, o na nĩwakwatie andũ amwe. Na ĩndĩ asyoka Samalia.

25 Amasia mwana wa Yeoasi mũsumbĩ wa Yuta ekalile thayũ myaka 15 ĩtina wa Yeoasi mwana wa Yeoaasu mũsumbĩ wa Isilaeli kũkwʼa. 26 Na ngewa ĩla ĩngĩ ya Amasia, kuma mwambĩĩo nginya mũthya, sisya! yo ti mbandĩke Ĩvukunĩ ya Asumbĩ ma Yuta na ma Isilaeli? 27 Kuma ĩvinda yĩla Amasia waekie kũatĩĩa Yeova, nĩmavangĩthisye mũvango wa kũmũaĩa Yelusalemu, na kwoou akĩĩa Lakisi; ĩndĩ matũma aũme mamũatĩĩe Lakisi na mamũaĩa kũu. 28 Na masyoka nake mamũkuĩte na mbalasi na mamũthika vamwe na aa-ũmae make ndũanĩ ya Yuta.

26 Na ĩndĩ andũ onthe ma Yuta moosa Usia, ũla waĩ na myaka 16, na mamũtwʼĩkĩthya mũsumbĩ vandũ va ĩthe wake Amasia. 2 Nĩwaakie ndũa ya Elothi ĩngĩ na amĩtũngĩa andũ ma Yuta ĩtina wa mũsumbĩ* kũkwʼa na kũthikwa vamwe na aa-ũmae make. 3 Usia aĩ na myaka 16 yĩla watwʼĩkie mũsumbĩ, na asumbĩkie myaka 52 e Yelusalemu. Inyia wake eetawa Yekolia na aĩ wa Yelusalemu. 4 Nĩwaendeeie kwĩka kĩla kyaĩlĩte methonĩ ma Yeova, o ta ĩthe wake Amasia. 5 Na nĩwaendeeie kũmũmantha Ngai mĩthenyanĩ ya Nzekalia, ũla wamũmanyĩisye kũkĩa Ngai ũla wa w’o. Ĩvindanĩ yĩla wamũmanthaa Yeova, Ngai ũla wa w’o nĩwatumie aendeea nesa.

6 Nĩwaendie okita na Avilisiti na asinda Ngathi, na Yavine, na Asitoti kwa kũvũthũa maima ngũtanĩ syasyo. Na ĩndĩ nĩwaakie ndũa kĩsionĩ kya Asitoti na katĩ wa Avilisiti. 7 Ngai ũla wa w’o nĩwaendeeie kũmũtetheesya kũsinda Avilisiti, Aalavu ala mekalaa Ngulimbaali, na Ameuni. 8 Aamimoni nĩmambĩĩie kũĩva Usia koti. Mũthya, nguma yake nĩyanyaĩĩkie nginya Misili, nũndũ nĩweethĩiwe na vinya mwingĩ mũno. 9 O na ĩngĩ, Usia nĩwaakie myako mĩtũlu Yelusalemu vakuvĩ na Mũvĩa wa Konanĩ, Mũvĩa wa Mwandanĩ, na Ngome ya Kũtwʼĩĩka Ũkũta, na amĩlũlũmĩĩlya. 10 Kwongela ũu, nĩwaakie myako mĩtũlu weũnĩ na enza ithima* mbingĩ (nĩkwĩthĩwa aĩ na indo mbingĩ mũno); o na ĩngĩ, nĩweekie oou kĩsionĩ kya Sevela na ũiĩnĩ.* Aĩ na aĩmi na aĩmi angĩ ma mĩsavivũ iĩmanĩ na kũu Kalimeli, nũndũ nĩwendete kũĩma.

11 O na ĩngĩ, Usia nĩwesie kwĩthĩwa na ita sya kaũ syeyũmbanĩtye kwondũ wa kaũ. Nĩsyaendaa kaũnĩ ivangĩtwe ikundi. Syatalilwe na syaandĩkĩthwʼa nĩ mũandĩki Yeieli na mũnene Maaseia, me ungu wa Aanania, mũnene ũmwe wa mũsumbĩ. 12 Ũtalo wʼonthe wa anene ma nyũmba sya aa-ĩthe ala maũngamĩe ngũmbaũ isu sya kaũ waĩ 2,600. 13 Namo ala maĩ ungu woo maĩ aũme 307,500 meyũmbanĩtye kwondũ wa kaũ, ita syaĩ na vinya mwingĩ, itetheesye mũsumbĩ okite na mũmaitha. 14 Usia nĩwanengie ita isu syonthe ngao, matumo, ngovia sya kyũma, makoti ma kyũma, mbũta, na mavia ma kwĩkwʼa na kĩkũtha. 15 O na ĩngĩ, mavundi maĩ na ũtũĩka nĩmamũseũvĩisye mĩio ya kaũ kũu Yelusalemu; na yaiwa myakonĩ mĩtũlu na konanĩ sya ngũta na yaĩ ĩtonya kwĩkya maangi na mavia manene. Kwoou nguma yake yanyaĩĩka kũndũ kwingĩ mũno, nĩkwĩthĩwa nĩwatetheeiwʼe mũno na amesya vinya.

16 Ĩndĩ yĩla weethĩiwe na vinya oou, ngoo yake nĩyakwatiwe nĩ mĩng’athĩlĩĩlyo ĩla yesie kũmũmina, na eethĩwa ate mũĩkĩĩku kwa Yeova Ngai wake kwa kũlika ĩkalũnĩ ya Yeova avĩvĩsye ũvumba kĩthembeonĩ kya ũvumba. 17 Nĩvo ĩndĩ mũthembi Asalia wamũatĩĩie ate kwananga ĩvinda e na athembi angĩ 80 ma Yeova maĩ na ũkũmbaũ. 18 Nĩmatatie kũsiĩĩa Mũsumbĩ Usia maimwĩa atĩĩ: “Usia, ndwaĩlĩte kwĩka ũu, ndwaĩlĩte kũvĩvĩsya Yeova ũvumba! No athembi me oka maĩlĩte kũvĩvya ũvumba, nũndũ nĩmo nzyawa sya Alũni, na nĩmo matheetwʼe. Umaala vandũnĩ vatheu, nĩkwĩthĩwa ũndũ ũũ weeka woonanyʼa ndwĩ mũĩkĩĩku na ndwĩkwata ũkumyo o na ũmwe kuma kwa Yeova Ngai nũndũ wa ũndũ ũsu.”

19 Ĩndĩ Usia, ũla wakwete kĩtoeesya avĩvye ũvumba, athilĩka; na aendeee kũthilĩkĩla athembi asu, mangũ maumĩla kĩtulyanĩ kyake e mbee wa athembi asu nyũmbanĩ ya Yeova vakuvĩ na kĩthembeo kya ũvumba. 20 Yĩla Asalia mũnene wa athembi na athembi onthe mavĩndũkie mamũsisya, moonie kana kĩtulya kyake kyaĩ kĩkũne na mangũ! Kwoou mamumya vau na mĩtũkĩ, nake eekalaata aumaala nũndũ Yeova aĩ anamũkũna.

21 Mũsumbĩ Usia ekalile na mangũ nginya yĩla wakwie, na aendeeie kwĩkala nyũmbanĩ ĩngĩ e na mangũ, nĩkwĩthĩwa ndeetĩkĩlĩtwʼe kũthi nyũmbanĩ ya Yeova. Mwanae Yothamu nĩwe waũngamĩe nyũmba ya mũsumbĩ, aisilanyʼa andũ ma nthĩ ĩsu.

22 Na ngewa ĩla ĩngĩ ya Usia kuma mwambĩĩo nginya mũthya, yaandĩkiwe nĩ mwathani Ĩsaia mwana wa Amosu. 23 Na ĩndĩ Usia akwʼa na mamũthika vamwe na aa-ũmae make, ĩndĩ mamũthikie kĩthekanĩ kya kũthikana kĩla kyaĩ kya asumbĩ, nĩkwĩthĩwa maisye: “E na mangũ.” Na mwana wake Yothamu atwʼĩka mũsumbĩ vandũ vake.

27 Yothamu aĩ na myaka 25 yĩla watwʼĩkie mũsumbĩ, na asumbĩkie myaka 16 e Yelusalemu. Inyia wake eetawa Yelusia na aĩ mwĩĩtu wa Nzatoki. 2 Aendeeie kwĩka kĩla kyaĩlĩte methonĩ ma Yeova, o ta Usia ĩthe wake, ate o ndaalika ĩkalũnĩ ya Yeova ate mwĩtĩkĩlye. Ĩndĩ andũ no maendeee kwĩka kĩla kĩthũku. 3 Nĩwaakie mũvĩa wa ngalĩko ya ĩũlũ wa nyũmba ya Yeova, na nĩwatethisye wĩa mwingĩ wa mwako ũkũtanĩ wa Oveli. 4 O na ĩngĩ, nĩwaakie ndũa kĩsionĩ kĩ iĩma kya Yuta, na aaka kũndũ kwiĩĩe na myako mĩtũlu ithekanĩ. 5 Nĩwokitie na mũsumbĩ wa Aamimoni na mũthya esa kũmasinda, na kĩu kyatuma mwaka ũsu Aamimoni mamũnenga talendi 100* sya vetha, koli 10,000* sya nganũ, na koli 10,000 sya mbaale. O na ĩngĩ, Aamimoni nĩmamũĩvie syĩndũ isu mwakanĩ wa kelĩ na wa katatũ. 6 Kwoou Yothamu nĩwaendeeie kwĩthĩwa na vinya, nĩkwĩthĩwa nĩwalũlũmĩĩilye* nzĩa syake mbee wa Yeova Ngai wake.

7 Na ngewa ĩla ĩngĩ ya Yothamu, makaũ make onthe na nzĩa syake, ĩandĩkĩtwe Ĩvukunĩ ya Asumbĩ ma Isilaeli na ma Yuta. 8 Aĩ na myaka 25 yĩla watwʼĩkie mũsumbĩ, na asumbĩkie myaka 16 e Yelusalemu. 9 Na ĩndĩ Yothamu akwʼa na mamũthika vamwe na aa-ũmae make Ndũanĩ ya Ndaviti. Na mwana wake Aasu atwʼĩka mũsumbĩ vandũ vake.

28 Aasu aĩ na myaka 20 yĩla watwʼĩkie mũsumbĩ, na asumbĩkie myaka 16 e Yelusalemu. Ndaaĩka kĩla kyaĩlĩte methonĩ ma Yeova o tondũ Ndaviti ũmae wake weekĩte. 2 Vandũ va ũu, akinyĩile nzĩanĩ sya asumbĩ ma Isilaeli, o na nĩwaseũvisye mĩvwʼanano ya kyũma* ya Mbaali. 3 O na ĩngĩ, nĩwatumie nthembo itoea Mwandanĩ wa Mwana wa Inomu* na avĩvya ana make na mwaki aatĩĩe imanyĩo sya kũthatya sya mbaĩ ila Yeova walũngĩtye ikauma mbee wa Aisilaeli. 4 Na eka ũu, nĩwaendeeie kũthemba nthembo na kũtuma nthembo itoa kũndũnĩ kũtũlu, tũlĩmanĩ, na ungu wa kĩla mũtĩ wĩ matũ maingĩ.

5 Kwoou Yeova Ngai wake nĩwamũnenganie kw’okonĩ kwa mũsumbĩ wa Silia, namo mamũsinda na matava andũ aingĩ mũno mamatwaa Ndamasikũ. O na ĩngĩ, nĩwanenganiwe kw’okonĩ kwa mũsumbĩ wa Isilaeli, ũla wooaie andũ make aingĩ mũno. 6 Nĩkwĩthĩwa Veka mwana wa Lemalia nĩwooaie andũ 120,000 kũu Yuta o mũthenyanĩ ũmwe, onthe aũme ngũmbaũ, nũndũ nĩmatiĩte Yeova Ngai wa aa-ũmae moo. 7 Na Nzikili, ũla waĩ Mũevilaimu waĩ ngũmbaũ ya kaũ, nĩwooaie Maaseia mwana wa mũsumbĩ na Asilikamu, ũla waũngamĩe nyũmba ya mũsumbĩ,* na Elikana ũla waatĩĩe mũsumbĩ. 8 O na ĩngĩ, Aisilaeli nĩmatavie ana-a-ĩthe moo 200,000. Matavie aka, ana, na eĩtu; na moosa mũtavo mwingĩ mũno, na maũtwaa Samalia.

9 Ĩndĩ mwathani wa Yeova weetawa Oteti aĩ vau. Nĩwaendie mbee wa ita ila syaendete Samalia na asya atĩĩ: “Sisyai! Yeova Ngai wa aa-ũmae menyu nĩwathatĩie Yuta na kwoou amanengane kwʼokonĩ kwenyu, nenyu mwamoaa mwĩ athatu mũno nginya ũndũ ũsu wavika ĩtunĩ. 10 Na yu mwĩenda kũtwʼĩkĩthya andũ ma Yuta na Yelusalemu athũkũmi menyu aũme na athũkũmi menyu aka. Ĩndĩ inywʼĩ no mwasye kana o nenyu mũi na ĩvĩtyo mbee wa Yeova Ngai wenyu? 11 Yu mbĩthukĩĩsyei na mũitũnga ana-a-ĩthe menyu ala mũtavie, nĩkwĩthĩwa ũthatu wa Yeova nũmwakanĩe.”

12 Nĩvo ĩndĩ anene amwe ma Aevilaimu, Asalia mwana wa Yeoanani, Mbelekia mwana wa Mesilemothi, Yeisikia mwana wa Salumu, na Amasa mwana wa Atulai, maendie kũkomana na ala maumĩte kaũnĩ maleane na kĩla mekĩte, 13 na mamea atĩĩ: “Mũikaete andũ ala mũtavie vaa, nũndũ kĩu nĩkĩũtuma twĩthĩwa na ĩvĩtyo mbee wa Yeova. Kĩla mũkwenda kwĩka nĩkĩkwongeleela naĩ sitũ na ĩvĩtyo yitũ, nĩkwĩthĩwa yu tũĩ, ĩvĩtyo yitũ nĩ ĩnene na ve na ũthatu mwingĩ wakanĩe Isilaeli.” 14 Kwoou asikalĩ asu maĩ na mĩio ya kaũ manenga anene asu na ũmbano wʼonthe andũ ala matavĩte vamwe na mũtavo. 15 Na ĩndĩ aũme ala manyuvĩtwe na masyĩtwa mookĩla na moosa andũ ala matavĩtwe, na manenga onthe ala maĩ athei katĩ woo ngũa kuma mũtavonĩ ũla moosete. Kwoou mamekĩa ngũa na mamanenga iatũ, lĩu na syĩndũ sya kũnywʼa, na mauta ma kwĩvaka. O na ĩngĩ, nĩmalĩsilye ala mataĩ na vinya mangʼoinĩ na mamatwaĩa ana-a-ĩthe moo kũu Yeliko, ndũanĩ ya mĩtende. Na ĩtina wa ũu, masyoka Samalia.

16 Ĩvindanĩ yĩu Mũsumbĩ Aasu nĩwakũlilye asumbĩ ma Asuli mamũtetheesye. 17 Aetomu nĩmasyokie ĩngĩ malika Yuta mamĩvithũkĩa na matava andũ. 18 O na Avilisiti nĩmavithũkĩie ndũa sya Sevela na Nekevu ya Yuta na makwata Mbethi-semesi, Aiyaloni, Ngetelothi, Soko na tũtũla twayo,* Timina na tũtũla twayo, na Ngimiso na tũtũla twayo; na ĩndĩ matũa kũu. 19 Yeova nĩwatumie andũ ma Yuta menyivya nũndũ wa Mũsumbĩ Aasu wa Isilaeli, nĩkwĩthĩwa nĩwaekie andũ ma Yuta meke kĩla mekwenda, na ũu watuma meka maũndũ maingĩ mekwonanyʼa kana mayaĩ aĩkĩĩku kwa Yeova.

20 Mũthya, Mũsumbĩ Tilikathi-vilineseli wa Asuli nĩwamũvithũkĩie na atuma akwatwa nĩ mathĩna vandũ va kũmwĩkĩa vinya. 21 Nĩkwĩthĩwa Aasu nĩwoosete syĩndũ syonthe ila syaĩ nyũmbanĩ ya Yeova na nyũmbanĩ ya mũsumbĩ na nyũmbanĩ sya anene me mbee ũsumbĩnĩ na akainenga mũsumbĩ wa Asuli ta mũthĩnzĩo; ĩndĩ kĩu kĩyaamũtethya. 22 Na ĩvindanĩ yĩu waĩ na thĩna, Mũsumbĩ Aasu nĩweekie o na maũndũ angĩ maingangĩ mekwonanyʼa kana ndaĩ mũĩkĩĩku kwa Yeova. 23 Ambĩĩie kũthembea ngai sya Ndamasikũ ila syaĩ inamũsinda, na asya: “Nĩkwĩthĩwa ngai sya asumbĩ ma Silia niũmatetheesya, nĩngũithembea nĩ kana indetheesye.” Ĩndĩ nĩsyatumie we na Aisilaeli onthe malulutĩka. 24 O na ĩngĩ, Aasu nĩwoombanisye mĩio ya nyũmba ya Ngai ũla wa w’o; na ĩndĩ atilanga mĩio ya nyũmba ya Ngai ũla wa w’o tũlungu, avinga mĩomo ya nyũmba ya Yeova, na eeseũvĩsya ithembeo kĩla konanĩ ndũanĩ ya Yelusalemu. 25 Na nĩwaseũvisye kũndũ kũtũlu ndũanĩ syonthe sya Yuta nĩ kana atumae nthembo itoa kwondũ wa ngai ingĩ, na amũthatya Yeova Ngai wa aa-ũmae make.

26 Na ngewa ĩla ĩngĩ yake, maũndũ onthe ala weekie kuma mwambĩĩo nginya mũthya, ĩandĩkĩtwe Ĩvukunĩ ya Asumbĩ ma Yuta na ma Isilaeli. 27 Na ĩndĩ Aasu akwʼa na athikwa vamwe na aa-ũmae make, ndũanĩ ya Yelusalemu, nĩkwĩthĩwa mayaamũete kũla asumbĩ ma Isilaeli mathikawa. Na mwana wake Esekia atwʼĩka mũsumbĩ vandũ vake.

29 Esekia atwʼĩkie mũsumbĩ e na myaka 25, na asumbĩkie myaka 29 e Yelusalemu. Inyia wake eetawa Aviya na aĩ mwĩĩtu wa Nzekalia. 2 Nĩwaendeeie kwĩka kĩla kyaĩlĩte methonĩ ma Yeova, o ta Ndaviti ũmae wake. 3 Mwakanĩ wa mbee wa kũsumbĩka kwake, mweinĩ wa mbee, nĩwavingũie mĩomo ya nyũmba ya Yeova na amĩtũngĩĩa. 4 Na ĩndĩ aete athembi na Alivai na amombanĩsya kĩwanzanĩ kĩla kyaĩ ngalĩkonĩ ya wumĩlonĩ wa sua. 5 Ameie atĩĩ: “Mbĩthukĩĩsyei, inywʼĩ Alivai. Yu ĩthesyei na mũithesya nyũmba ya Yeova Ngai wa aa-ũmae menyu, na mũivetanga syĩndũ ite ntheu vandũnĩ vatheu. 6 Nĩkwĩthĩwa aa-ĩthe maitũ nĩmethĩĩtwe mate aĩkĩĩku na nĩmekĩte kĩla kĩthũku methonĩ ma Yeova Ngai witũ. Nĩmamũtiie na mathyũũa mothyũ moo mamaumya ĩeemanĩ ya ũthaithi ya Yeova na mamũthyũũĩa mĩongo yoo. 7 O na ĩngĩ, nĩmavingie mĩomo ya valanda na mavosya taa. Nĩmaekie kũvĩvya ũvumba na kumĩsya Ngai wa Isilaeli nthembo sya kũvĩvwʼa vandũnĩ vatheu. 8 Nũndũ wa ũu, ũthatu wa Yeova nĩwakanĩie Yuta na Yelusalemu, na amatwʼĩkĩthya kĩndũ kya kũtelemya na kya kũsengyʼa na kya kuwĩwʼa mũũi,* o tondũ mwene na metho menyu. 9 Nũndũ wa ũu, aa-ũmae maitũ nĩmooaiwe na ũvyũ, na ana maitũ, eĩtu maitũ, na iveti sitũ syatavwa. 10 Yu nĩ wendi wa ngoo yakwa kũtianĩa ũtianĩo na Yeova Ngai wa Isilaeli, nĩ kana ũthatu wake wakanĩte ume vala tũĩ. 11 Yu ana makwa, yĩĩ ti ĩvinda ya kũlekeleelya kĩanda kyenyu,* nĩkwĩthĩwa Yeova nũmũnyuvĩte mũũngamae mbee wake, mũmũthũkũmae, na mũitumaa nthembo syake itoa.”

12 Nũndũ wa ũu, Alivai aa nĩmalikile wĩanĩ: Maathi mwana wa Amasai na Yoeli mwana wa Asalia, kuma kwa Akoathi; kuma kwa Amelali, Kisi mwana wa Aviti na Asalia mwana wa Yealeleli; kuma kwa Angelisoni, Yoa mwana wa Nzima na Eteni mwana wa Yoa; 13 kuma ananĩ ma Elisavani, Simili na Yeueli; kuma ananĩ ma Asavu, Nzekalia na Matania; 14 kuma ananĩ ma Emani, Yeielu na Simei; kuma ananĩ ma Yetuthuni, Semaia na Usieli. 15 Na ĩndĩ moombanyʼa ana-a-ĩthe, na meethesya na mooka kũthesya nyũmba ya Yeova, o tondũ mũsumbĩ weeaĩte kwosana na ndeto sya Yeova. 16 Nĩvo ĩndĩ athembi maendie nyũmbanĩ ya Yeova makamĩthesye na maumaalya ũvuku wʼonthe ũla meethĩie ĩkalũnĩ ya Yeova na maũtwaa kĩwanzanĩ kya nyũmba ya Yeova. Ĩtina wa ũu, Alivai nĩmoosie syĩndũ isu na masyumaalya maitwaa Mwandanĩ wa Kitiloni. 17 Mambĩĩie wĩa ũsu wa kũthesya mũthenyanĩ wa mbee mweinĩ wa mbee, na mũthenyanĩ wa nyanya mweinĩ ũsu, nĩmavikie valandanĩ wa Yeova. Matheisye nyũmba ya Yeova mĩthenya nyanya, na mũthenyanĩ wa 16 mweinĩ wa mbee mamina.

18 Ĩtina wa ũu, nĩmaendie vala ve Mũsumbĩ Esekia na mamwĩa atĩĩ: “Nĩtwathesya nyũmba yonthe ya Yeova, kĩthembeo kya nthembo sya kũvĩvw’a na mĩio yakyo yonthe, na mesa ya ĩla mĩkate ĩvangawa tũkundi ĩilĩanĩlwʼe* na mĩio yayo yonthe. 19 Na mĩio yonthe ĩla Mũsumbĩ Aasu wavetangie yĩla wasumbĩkĩte, yĩla weekie maũndũ mekwonanyʼa ndaĩ mũĩkĩĩku, nĩtwamĩseũvya na twamĩthesya, na yĩ mbee wa kĩthembeo kya Yeova.”

20 Na Mũsumbĩ Esekia aamũka tene na oombanyʼa anene ma ndũa, na mambata nyũmbanĩ ya Yeova. 21 Nĩmaetie nzaũ mũonza, ndũũme mũonza, tũtũlũme mũonza, na nthenge mũonza sya nthembo ya naĩ kwondũ wa ũsumbĩ, kwondũ wa vandũ vatheu, na kwondũ wa Yuta. Kwoou atavya athembi, ala maĩ nzyawa sya Alũni, masyumĩsye kĩthembeonĩ kya Yeova. 22 Na ĩndĩ mathĩnza ngʼombe isu, na athembi moosa nthakame mamĩminzangya kĩthembeonĩ; na masyoka mathĩnza ndũũme na maminzangya nthakame kĩthembeonĩ, na ĩndĩ mathĩnza tũtũlũme na maminzangya nthakame kĩthembeonĩ. 23 Ĩtina wa ũu, nĩmaetie nthenge sya nthembo ya naĩ mbee wa mũsumbĩ na mbee wa ũmbano na mailĩĩla moko moo ĩũlũ wasyo. 24 Athembi nĩmaithĩnzie na matũmĩa nthakame yasyo kumĩsya nthembo ya naĩ kĩthembeonĩ, nĩ kana mewʼanĩthye Aisilaeli onthe, nĩkwĩthĩwa mũsumbĩ aisye nthembo ya kũvĩvw’a na nthembo ya naĩ syaĩle kumwʼa kwondũ wa Aisilaeli onthe.

25 Ĩvindanĩ o yĩu, nĩwatumie Alivai maũngama nyũmbanĩ ya Yeova me na masaya, mĩio ya kũinga yĩ na ndii, na mĩio ya wathi yĩ na ndii 12,* kwosana na mwĩao wa Ndaviti na wa Ngati ũla waĩ mwoni wa mũsumbĩ na wa mwathani Nathani, nĩkwĩthĩwa mwĩao ũsu wanenganĩtwe nĩ Yeova kwĩsĩla athani make. 26 Kwoou Alivai maũngamĩte vau me na mĩio ya wathi ya Ndaviti, namo athembi me na masoo.

27 Na ĩndĩ Esekia nĩweeaie nthembo ya kũvĩvw’a yumĩwʼe kĩthembeonĩ. Yĩla nthembo ya kũvĩvwʼa yambĩĩie kumwʼa, wathi wa Yeova nĩwambĩĩie kwinwa na o namo masoo nĩmambĩĩe kũvuvwa, maatĩanĩe na mĩio ya wathi ya Mũsumbĩ Ndaviti wa Isilaeli. 28 Wathi ũsu ũendeee kwinwa na masoo asu maendeee kũvuvwa, ũmbano wʼonthe nĩwakumanie, na kĩu kyaendeea nginya nthembo ya kũvĩvw’a yathela kumwʼa. 29 Na yĩla maminie kumya nthembo ĩsu oou, mũsumbĩ na onthe ala maĩ nake nĩmakumanie nginya nthĩ na mavalũka. 30 Nĩvo ĩndĩ yu Mũsumbĩ Esekia na anene me mbee ũsumbĩnĩ meeie Alivai mamũtaĩe Yeova na ndeto sya Ndaviti na sya Asavu ũla waĩ mwoni. Kwoou maina mbathi sya kũtaĩa me atanu mũno, na makumana na mavalũka nthĩ.

31 Na ĩndĩ Esekia asya atĩĩ: “Nũndũ nĩmwavathwa* kwondũ wa Yeova, etei nthembo na nthembo sya kũtũnga mũvea nyũmbanĩ ya Yeova.” Kwoou ũmbano wambĩĩa kũete nthembo na nthembo sya kũtũnga mũvea, na kĩla mũndũ waĩ na ngoo ya kwenda aete nthembo sya kũvĩvw’a. 32 Ũtalo wa nthembo sya kũvĩvw’a ila ũmbano waetie waĩ ngʼombe 70, ndũũme 100, tũtũlũme 200; isu syonthe syaĩ nthembo sya kũvĩvw’a kwondũ wa Yeova. 33 Nasyo nthembo ntheu syaĩ ngʼombe 600 na malondu 3,000. 34 Ĩndĩ vayaĩ na athembi matoetye kumya nyamũ syonthe sya nthembo sya kũvĩvw’a ikonde,* kwoou ana-a-ĩthe Alivai nĩmamatetheeisye nginya wĩa ũsu wathela na nginya athembi meethesya, nĩkwĩthĩwa Alivai meetheasya na kĩthito kingĩ* kwĩ athembi. 35 O na ĩngĩ, vaĩ na nthembo mbingĩ sya kũvĩvw’a, o vamwe na ilungu sya mathunya sya nthembo sya ngwatanĩo na nthembo sya kũnyuwa ila syaumanĩiwʼe na nthembo sya kũvĩvw’a. Kwoou ũthũkũmi wa nyũmba ya Yeova nĩwatũngĩĩiwe.* 36 Kwoou Esekia na andũ onthe nĩmatanĩie kĩla Ngai ũla wa w’o weekie kwondũ wa andũ make, nĩkwĩthĩwa maũndũ asu onthe meekĩkie na mĩtũkĩ mũno.

30 Esekia nĩwatũmanie ũtũmani kũla kwĩ Isilaeli yonthe na Yuta, na o na nĩwaandĩkĩie andũ ma Evilaimu na Manase valũa nĩ kana moke nyũmbanĩ ya Yeova kũu Yelusalemu matanĩe Vasaka ya Yeova Ngai wa Isilaeli. 2 O na ũu wĩ o vo, mũsumbĩ, anene me mbee ũsumbĩnĩ wake, na ũmbano wʼonthe ũla waĩ kũu Yelusalemu nĩwatwie kũtanĩa Vasaka mweinĩ wa kelĩ, 3 nĩkwĩthĩwa mayaĩ matonya kũmĩtanĩa ĩvinda yĩla yeekawa, nũndũ athembi ala meetheetye mayatoetye namo andũ mayaĩ manamba kũmbanĩa Yelusalemu. 4 Mũvango ũsu nĩwoonekie waĩlĩte methonĩ ma mũsumbĩ na ma ũmbano wʼonthe. 5 Kwoou nĩmatwie andũ matangaasĩwe kĩsionĩ kyonthe kya Isilaeli, kuma Mbeeli-sieva nginya Ndani, moke matanĩe Vasaka ya Yeova Ngai wa Isilaeli kũu Yelusalemu, nĩkwĩthĩwa mayeekĩte ũu me kĩkundi kwosana na kĩla kĩandĩkĩtwe.

6 Nĩvo ĩndĩ atũmwa* maendie Isilaeli yonthe na Yuta makuĩte valũa ila manengiwe nĩ mũsumbĩ na anene me mbee ũsumbĩnĩ wake, o tondũ mũsumbĩ weeaĩte, ayasya: “Andũ ma Isilaeli, syokeai Yeova Ngai wa Avalaamu, Isaka, na Isilaeli, nĩ kana asyokee ala matialĩte ala mavonokete kuma kwʼokonĩ kwa asumbĩ ma Asuli. 7 Mũikethĩwe ta aa-ũmae menyu na ana-a-ĩthe menyu ala meekie maũndũ mekwonanyʼa kana mayaĩ aĩkĩĩku kwa Yeova Ngai wa aa-ũmae moo, na kĩu kyatuma amatwʼĩkĩthya kĩndũ kya kũtelemya, o tondũ mwene. 8 Yu mũikomye ngoo syenyu ta aa-ũmae menyu. Mwĩnyivĩsyei Yeova na mũyũka vandũnĩ vake vatheu vala ũtheetye tene na tene na mũithũkũma Yeova Ngai wenyu, nĩ kana ũthatu wake wakanĩte wume vala mũĩ. 9 Nĩkwĩthĩwa yĩla mũkasyokea Yeova, ana-a-ĩthe menyu na ana menyu makeewʼĩwa tei nĩ ala mamatavĩte na makametĩkĩlya masyoke nthĩ ĩno, nũndũ Yeova Ngai wenyu e ĩnee* na tei, na ethĩwa mũkamũsyokea, ndakathyũũa ũthyũ wake wume vala mũĩ.”

10 Kwoou atũmwa* asu nĩmaendie ndũa nginya ndũa kĩsionĩ kyonthe kya Evilaimu na Manase, o na nginya Nzevuluni, ĩndĩ andũ nĩmamathekeeaa na kũmavũthya. 11 O na ũu wĩ o vo, andũ amwe kuma Aseli, Manase, na Nzevuluni nĩmeenyivisye na mooka Yelusalemu. 12 O na ĩngĩ, kw’oko kwa Ngai ũla wa w’o kwaĩ vamwe na andũ ma Yuta nĩ kana atume methĩwa na ngwatanĩo* meke kĩla mũsumbĩ na anene me mbee ũsumbĩnĩ meeaĩte kwosana na ndeto ya Yeova.

13 Andũ aingĩ mũno nĩmoombanĩie Yelusalemu mweinĩ wa kelĩ nĩ kana matanĩe Mboka ya Mũkate ũte Ĩlawa; waĩ ũmbano mũnene mũno. 14 Nĩmavetangie ithembeo sya ngai sya ũvũngũ na ithembeo syonthe sya ũvumba ila syaĩ Yelusalemu, na masyĩkya Mwandanĩ wa Kitiloni. 15 Na ĩndĩ mathĩnza nthembo ya Vasaka mũthenyanĩ wa 14 wa mwei wa kelĩ. Athembi na Alivai nĩmeewie nthoni, na ũu watuma methesya na maete nthembo sya kũvĩvwʼa nyũmbanĩ ya Yeova. 16 Nĩmaũngamie kũla makothaa kũũngama kwosana na Mwĩao wa Mose mũndũ wa Ngai ũla wa w’o; na ĩndĩ athembi maminzangya nthakame ĩla yoosetwe kw’okonĩ kwa Alivai. 17 Ũmbanonĩ ũsu vaĩ andũ aingĩ ala mateetheetye, na Alivai nĩmo mathĩnzaa nthembo sya Vasaka kwondũ wa andũ onthe ala mataĩ atheu, nĩ kana mathewʼe kwondũ wa Yeova. 18 Nĩkwĩthĩwa andũ aingĩ vyũ, mũno mũno kuma Evilaimu, Manase, Isakali, na Nzevuluni, mayetheetye, ĩndĩ no maĩe Vasaka, kĩvathũkanyʼo na ũndũ kwaandĩkĩtwe. Ĩndĩ Esekia nĩwamavoyeie, ayasya: “Eka Yeova, ũla nĩ mũseo, etĩkĩlye 19 kĩla mũndũ ũmbanĩtye ngoo yake amanthe Yeova Ngai ũla wa w’o, Ngai wa aa-ũmae make, o na kau ndatheetwʼe kwosana na mĩvango ya ũtheu ĩla ĩtwʼĩtwe.” 20 Na Yeova eethukĩĩsya Esekia na aekea* andũ.

21 Kwoou Aisilaeli ala maĩ Yelusalemu nĩmatanĩie Mboka ya Mũkate ũte Ĩlawa mĩthenya mũonza me atanu mũno, namo Alivai na athembi nĩmataĩaa Yeova mũthenya kũthi ũla ũngĩ, maikũnĩa Yeova mĩio yoo ya wathi na wasya mũnene. 22 O na ĩngĩ, Esekia nĩwaneenie na Alivai onthe ala mamũthũkũmaa Yeova na ũĩ na amekĩa vinya.* Na mĩthenyanĩ ĩsu mũonza ya mboka nĩmaĩe, maumya nthembo sya ngwatanĩo na mamũtũngĩa Yeova Ngai wa aa-ũmae moo mũvea.

23 Na ĩndĩ ũmbano wʼonthe watw’a kũtanĩa mboka ĩsu mĩthenya ĩngĩ mũonza, kwoou meeka ũu mĩthenya ĩngĩ mũonza me atanu. 24 Na Mũsumbĩ Esekia wa Yuta nĩwaumĩisye ũmbano mũvothi wa nzaũ 1,000 na malondu 7,000, na anene me mbee ũsumbĩnĩ maumĩsya ũmbano mũvothi wa nzaũ 1,000 na malondu 10,000; na athembi aingĩ nĩmaendeee kwĩthesya. 25 Na ũmbano wʼonthe wa Yuta, athembi, Alivai, ũmbano wʼonthe ũla waumĩte Isilaeli, na ekali ma ũeninĩ ala maumĩte nthĩ ya Isilaeli na ala mekalaa Yuta nĩmaendeeie kũtana. 26 Na kwaĩ na ũtanu mwingĩ mũno Yelusalemu, nĩkwĩthĩwa kuma mĩthenyanĩ ya Solomoni mwana wa Ndaviti mũsumbĩ wa Isilaeli, kũyaĩ kwaaĩthĩwa ũndũ ũngĩ ta ũsu Yelusalemu. 27 Mũthya, athembi Alivai nĩmaũngamie na maathima andũ; na Ngai eewʼa wasya woo, na mboya yoo yavika wĩkalonĩ wake mũtheu, ĩtunĩ.

31 Yĩla maminie kwĩka maũndũ asu onthe oou, Aisilaeli onthe ala maĩ vau nĩmaendie ndũanĩ sya Yuta, na matumbanga ituĩ sya ũthaithi, matilanga mĩtĩ ya ũthaithi,* na maomboa kũndũ kũla kũtũlu na ithembeo kĩsionĩ kyonthe kya Yuta na Mbenyamini, o vamwe na Evilaimu na Manase, nginya masyananga vyũ, ĩtina wa ũu, Aisilaeli onthe nĩmasyokie ndũanĩ syoo, kĩla ũmwe ũtiĩwanĩ wake.

2 Na ĩndĩ Esekia anyuva athembi ikundinĩ syoo na Alivai ikundinĩ syoo, kĩla mũthembi na Mũlivai kwondũ wa ũthũkũmi wake, kwondũ wa nthembo sya kũvĩvw’a na nthembo sya ngwatanĩo, nĩ kana mamũthũkũmae Ngai na maimũtũngĩaa mũvea na kũmũtaĩa mĩvĩanĩ ya iwanza* sya Yeova. 3 Syĩndũ imwe sya mũsumbĩ nĩsyaumiwʼe kwondũ wa nthembo sya kũvĩvw’a, o vamwe na nthembo ila syaumawʼa kwakya na ĩ ya wĩoo, o na nthembo sya kũvĩvw’a kwondũ wa Savato, kũtisa kwa myei, na mboka, kwosana na kĩla kĩandĩkĩtwe Mĩaonĩ ya Yeova.

4 Kwongela ũu, nĩweeaĩe andũ ala mekalaa Yelusalemu maumye kĩlungu kĩla athembi na Alivai maaĩlĩte kũnengwa, nĩ kana maatĩĩe vyũ mwĩao* wa Yeova. 5 Yĩla mwĩao ũsu waumiwʼe oou, Aisilaeli nĩmaetie kwa wingĩ ũsyao wa mbee wa lĩu wa mbaa ngetha, mbinyu nzaũ, mauta, na ũkĩ wa nzũkĩ, na ũsyao wʼonthe wa mũũndanĩ; nĩmaetie kwa wingĩ kĩlungu kya ĩkũmi kya syĩndũ syonthe. 6 O na ĩngĩ, andũ ma Isilaeli na ma Yuta ala mekalaa ndũanĩ sya Yuta nĩmaetie kĩlungu kya ĩkũmi kya ngʼombe na malondu na kĩlungu kya ĩkũmi kya syĩndũ ntheu ila syatheetwʼe kwondũ wa Yeova Ngai woo. Nĩmasietie na maivanga ivumbu mbingĩ. 7 Mweinĩ wa katatũ nĩmambĩĩie kũvanga mĩvothi yoo ivumbu; na mweinĩ wa mũonza mamina. 8 Yĩla Esekia na anene me mbee ũsumbĩnĩ mookie na moona ivumbu isu, nĩmataĩie Yeova na maathima andũ make Aisilaeli.

9 Esekia nĩwakũlilye athembi na Alivai ĩũlũ wa ivumbu isu, 10 na Asalia, mũnene wa athembi wa nyũmba ya Nzatoki, amwĩa atĩĩ: “Kuma yĩla andũ mambĩĩie kũete mĩvothi nyũmbanĩ ya Yeova, methĩĩtwe maiya makavũna na ve o syĩndũ mbingĩ itialĩte, nĩkwĩthĩwa Yeova nũathimĩte andũ, na vakatiala syĩndũ ii singĩvĩte ũu.”

11 Nĩvo ĩndĩ Esekia wameie maseũvye tũlumu twa kwia syĩndũ* nyũmbanĩ ya Yeova, na kwoou matũseũvya. 12 Nĩmaendeeie kũete mĩvothi, ilungu sya ĩkũmi, na syĩndũ ila ntheu me aĩkĩĩku; Konania, ũla waĩ Mũlivai, nĩwe waiiwe aũngamĩe syĩndũ isu syonthe, na mwana-a-inyia Simei nĩwe wamũatĩĩe. 13 Yeielu, Asasia, Naathi, Asaeli, Yelimothi, Yosavatu, Elieli, Isimakia, Maathi, na Mbenaia maĩ anene matetheeasya Konania na mwana-a-inyia Simei, kwosana na mwĩao wa Mũsumbĩ Esekia, na Asalia aĩ mũũngamĩi wa nyũmba ya Ngai ũla wa w’o. 14 Na Kole mwana wa Imina, Mũlivai ũla waĩ mũsũvĩi wa mũvĩa ũla wĩ ngalĩko ya wumĩlonĩ wa sua, nĩwe waũngamĩe mĩvothi ya ngenda ya Ngai ũla wa w’o, na nĩwaaĩaa athembi mũvothi ũla waumĩwʼa Yeova na syĩndũ ila ntheu vyũ. 15 Na Eteni, Miniamini, Yesua, Semaia, Amalia, na Sekania maĩ ungu wake, ndũanĩ sya athembi, wĩanĩ woo wa kũĩkĩĩwa, nĩ kana maaĩe ana-a-ĩthe ilungu ianene ikundinĩ syoo, ala anene na ala anini o ũndũ ũmwe. 16 Ũu waĩ vamwe na kĩla kyaaĩawa aũme ala maĩ na myaka ĩtatũ na kwambata ala matalanĩtwʼe lekotinĩ sya mĩsyĩ yoo, na ala kĩla mũthenya mookaa kũthũkũma nyũmbanĩ ya Yeova na kũtethya wĩa ũla ikundi syoo syanengetwe.

17 Athembi maandĩkĩthĩtwʼe lekotinĩ sya mĩsyĩ yoo kwosana na nyũmba ya aa-ĩthe, o ũndũ ũmwe na Alivai ala maĩ na myaka 20 na kwambata, kwosana na wĩa ũla ikundi syoo syanengetwe. 18 Lekoti isu syoo sya mĩsyĩ syaĩ na syana syoo syonthe, iveti syoo, ana moo, na eĩtu moo, ũmbano woo wʼonthe, nĩkwĩthĩwa nĩmekalile metheetye kwondũ wa kĩla kĩtheu nũndũ wa wĩa woo wa kũĩkĩĩwa, 19 o vamwe na nzyawa sya Alũni, athembi ala mekalaa isesinĩ sya kũĩthya ila syathyũlũlũkĩte ndũa syoo. Ndũanĩ syonthe, ve aũme manyuvĩtwe na masyĩtwa manengae kĩla mũndũũme katĩ wa athembi lĩu na kĩla mũndũ wĩ lekotinĩ sya mĩsyĩ ya Alivai.

20 Esekia nĩweekie ũu Yuta yonthe, na aendeea kwĩka kĩla kĩseo na kyaĩlĩte methonĩ ma Yeova Ngai wake, na aĩ mũĩkĩĩku kwake. 21 Na wĩa wʼonthe ũla weekie nĩ kana amanthe Ngai wake, wĩthĩwe wakonanĩtye na ũthũkũmi wa nyũmba ya Ngai ũla wa w’o, kana Mĩao na maũndũ ala Ngai wamwĩaĩe eke, eekie kĩla ũndũ na ngoo yonthe, na nĩwaaĩlile.

32 Ĩtina wa maũndũ asu na meko asu ma ũĩkĩĩku, Mũsumbĩ Senakelivu wa Asuli nĩwookie kũvithũkĩa Yuta. Nĩwathyũlũlũkile ndũa ila syaĩ mbiĩĩe, ayenda kũlika na kũikwata.

2 Yĩla Esekia woonie Senakelivu ooka e na kĩeleelo kya kũvithũkĩa Yelusalemu, 3 nĩwaneenie na anene me mbee ũsumbĩnĩ wake na ngũmbaũ syake sya kaũ, na ĩndĩ atwʼa kũlinda mbuluti* sya kĩwʼũ ila syaĩ nza wa ndũa, namo mamũkwata mbau. 4 Andũ aingĩ nĩmoombaniwʼe, na malinda mbuluti* syonthe na kalũsĩ kala kesĩlĩte vakuvĩ na Yelusalemu, mayasya: “Ve vata mwaũ asumbĩ ma Asuli moke kũũ na mayĩthĩa kĩw’ũ kingĩvĩte ũu?”

5 O na ĩngĩ, nĩwaendeeie kũthũkũma na ngoo yake yonthe na atũngĩĩa ũkũta wʼonthe ũla waĩ mwomboku na aaka myako mĩtũlu ĩũlũ wawʼo, na aaka ũkũta ũngĩ ngalĩko ya nza. O na nĩwatũngĩĩie Kĩvumbu* kya Ndũa ya Ndaviti, na aseũvya mĩio mingĩ ya kaũ na ngao. 6 Ĩtina wa ũu, nĩwanyuvĩie andũ anene ma ita na amombanĩsya kĩwanzanĩ kya ndũa kĩla kyaĩ mũvĩanĩ wa ndũa na amekĩa vinya,* ayasya: 7 “Ĩthĩwai na ũkũmbaũ na vinya. Mũikakĩe kana mũteleme nũndũ wa mũsumbĩ wa Asuli na nguthu yonthe ĩla yĩ nake, nĩkwĩthĩwa ala me naitũ nĩ aingĩ kwĩ ala me nake. 8 Ekwatĩtye kwʼoko kwa nyama,* ĩndĩ ithyĩ twĩkwatĩtye Yeova Ngai witũ nĩ kana atũtetheesye na ayũkita makaũ maitũ.” Na andũ meekĩwa vinya nĩ ndeto sya Mũsumbĩ Esekia wa Yuta.

9 Ĩtina wa ũu, yĩla Mũsumbĩ Senakelivu wa Asuli waĩ Lakisi e na vinya wake wʼonthe wa ũsumbĩ,* nĩwatũmie athũkũmi make Yelusalemu, kũla kwĩ Mũsumbĩ Esekia wa Yuta na Ayuti onthe ala mekalaa Yelusalemu, ayasya:

10 “Ũũ nĩwʼo Mũsumbĩ Senakelivu wa Asuli ũkwasya, ‘Inywʼĩ mwĩkwatĩtye kyaũ nĩ kana mũendeee kwĩkala Yelusalemu ĩendeee kũthyũlũlũkwa? 11 We Esekia ndakwetye kũmwasya na ndetuma mũkwʼa nĩ yũa na waũni, yĩla ũkwasya: “Yeova Ngai witũ nũkũtũvonokya kuma kwʼokonĩ kwa mũsumbĩ wa Asuli”? 12 Ũũ tyo we Esekia ũla wavetangie kũndũ kũtũlu kwa Ngai wenyu* na ithembeo syake, na ĩndĩ eea Yuta na Yelusalemu: “Mwaĩlĩte kũkumanaa mbee wa kĩthembeo kĩmwe na mwaĩlĩte kũtumaa nthembo syenyu itoea kĩthembeonĩ kĩu”? 13 Inywʼĩ mũyĩsĩ ũndũ nyie na aa-ũmae makwa tweekanie na ngo syonthe sya andũ sya i nthĩ? Syo ngai sya mbaĩ sya i nthĩ syaĩ itonya kũvonokya nthĩ yoo kuma kwʼokonĩ kwakwa? 14 Nĩ ngai yĩva katĩ wa ngai syonthe sya mbaĩ isu ila aa-ũmae makwa maanangie vyũ yaĩ ĩtonya kũvonokya andũ mayo kuma kwʼokonĩ kwakwa, nĩ kana Ngai wenyu ethĩwe atonya kũmũvonokya kũma kwʼokonĩ kwakwa? 15 Yu mũikaeke Esekia amũkenge kana amwasye kĩthemba kĩu! Mũikamũĩkĩĩe, nĩkwĩthĩwa vai ngai ya mbaĩ kana ũsumbĩ o na ũmwe yaatonya kũvonokya andũ mayo kuma kw’okonĩ kwakwa na kuma kw’okonĩ kwa aa-ũmae makwa. Yu ĩndĩ, inywʼĩ mwĩona Ngai wenyu ta ũtonya kũmũvonokya kuma kw’okonĩ kwakwa?’”

16 Na athũkũmi make nĩmaneenie maũndũ angĩ mathũkangu ĩũlũ wa Yeova Ngai ũla wa w’o na ĩũlũ wa mũthũkũmi wake Esekia. 17 O na ĩngĩ, nĩwaandĩkie valũa sya kũmũumanga Yeova Ngai wa Isilaeli na sya kũmũneenea maũndũ mathũku, ayasya: “Ngai wa Esekia ndevonokya andũ make kuma kwʼokonĩ kwakwa, o ũndũ ngai sya mbaĩ sya i nthĩ itaĩ itonya kũvonokya andũ masyo kuma kwʼokonĩ kwakwa.” 18 Nĩmaendeeie kũneenyʼa andũ ma Yelusalemu ala maĩ ũkũtanĩ na wasya mũnene matũmĩĩte kĩthyomo kya Ayuti, nĩ kana matume malikwa nĩ wia na maimatelemya, na ĩndĩ maikwata ĩ ndũa. 19 Nĩmaneeneie Ngai wa Yelusalemu maũndũ mathũku o ũndũ maneeneaa ngai sya ngo sya andũ ĩũlũ wa nthĩ, ila nĩ wĩa wa moko ma andũ. 20 Ĩndĩ Mũsumbĩ Esekia na mwathani Ĩsaia mwana wa Amosu nĩmaendeeie kũvoya ĩũlũ wa ũndũ ũsu na kwĩkaĩla matu nĩ kana matetheewʼe.

21 Nĩvo ĩndĩ Yeova watũmie mũlaĩka na atuta vyũ kĩla ngũmbaũ ya kaũ, mũtongoi, na mũnene kambinĩ ya mũsumbĩ wa Asuli, na ũu watuma asyoka nthĩ yake ewʼĩte nthoni. Ĩtina, nĩwalikile nyũmbanĩ* ya ngai yake, na e vau ana amwe make mamũaa na ũvyũ. 22 Kwoou Yeova atangĩĩa Esekia na ekali ma Yelusalemu kuma kw’okonĩ kwa Mũsumbĩ Senakelivu wa Asuli na kuma kw’okonĩ kwa andũ ala angĩ onthe na amanenga ũthũmũo kĩla ngalĩko. 23 Na andũ aingĩ maetee Yeova mĩthĩnzĩo kũu Yelusalemu na maetee Mũsumbĩ Esekia wa Yuta syĩndũ nzeo, na ĩtina wa ũu, mbaĩ syonthe syamũnenga ndaĩa mũno.

24 Na mĩthenyanĩ ĩsu Esekia awaa na ũwau wake wamũvinyĩĩa nginya weethĩa aangĩe kũkw’a, na amũvoya Yeova, nake amũsũngĩa na amũnenga wonanyʼo.* 25 Ĩndĩ Esekia ndaatũnga mũvea nũndũ wa ũseo ũla weekiwe, nĩkwĩthĩwa ngoo yake nĩyeethĩiwe na mĩng’athĩlĩĩlyo, na ũu watuma ũthatu wũka ĩũlũ wake na ĩũlũ wa Yuta na Yelusalemu. 26 O na ũu wĩ o vo, Esekia nĩweenyivisye na aeka kwĩthĩwa na mĩng’athĩlĩĩlyo, we na ekali ma Yelusalemu, na ũthatu wa Yeova ndwaamokĩa mĩthenyanĩ ya Esekia.

27 Na Esekia nĩweethĩiwe mũthwii mũno na eethĩwa na nguma mũno; na eeyakĩa makũmbĩ ma kwia vetha, thaavu, mavia ma vata, mauta ma seli, ngao, na syĩndũ syonthe sya kwendeesya. 28 O na nĩwaakie kũndũ kwa kwia lĩu wa mbaa ngetha na mbinyu nzaũ na mauta, o vamwe na itũũ sya mĩthemba yonthe yĩ kĩvathũkanyʼo ya indo na itũũ sya malondu na mbũi. 29 O na ĩngĩ, nĩweeyakĩie ndũa na eethĩwa na indo mbingĩ, malondu na mbũi, na ndĩthya, nĩkwĩthĩwa Ngai nĩwamũnengie malĩ mbingĩ mũno. 30 Esekia nĩwe walindile mũtaũ wa ĩũlũ wa kĩw’ũ kya Ngioni na akyelekelya kĩtheee ĩmwe kwa ĩmwe ngalĩko ya ũthũĩlonĩ wa sua wa Ndũa ya Ndaviti, na Esekia nĩwaaĩlile wĩanĩ wake wʼonthe. 31 O na ũu wĩ o vo, yĩla aneeni ma anene me mbee ũsumbĩnĩ wa Mbavilonĩ matũmiwe makamũkũlye ĩũlũ wa wonanyʼo ũla weekĩkĩte* nthĩ ĩsu, Ngai ũla wa w’o nĩwamũtiie e weka nĩ kana amũtate, amanye kyonthe kĩla kyaĩ ngoonĩ yake.

32 Na ngewa ĩla ĩngĩ ya Esekia na meko make ma wendo ũtathelaa, maandĩkĩtwe woninĩ wa mwathani Ĩsaia, mwana wa Amosu, Ĩvukunĩ ya Asumbĩ ma Yuta na ma Isilaeli. 33 Na ĩndĩ Esekia akwʼa na athikwa vamwe na aa-ũmae make kyambatonĩ kya kũthi kũla ana ma Ndaviti mathikawa; na yĩla wakwie, andũ onthe ma Yuta na ekali ma Yelusalemu nĩmamũnengie ndaĩa. Na mwana wake Manase atwʼĩka mũsumbĩ vandũ vake.

33 Manase aĩ na myaka 12 yĩla watwʼĩkie mũsumbĩ, na asumbĩkie myaka 55 e Yelusalemu.

2 Manase eekie kĩla kĩthũku methonĩ ma Yeova, aatĩĩie imanyĩo sya kũthatya sya mbaĩ ila Yeova walũngĩtye ikauma mbee wa andũ ma Isilaeli. 3 Nĩwatũngĩĩie kũndũ kũtũlu kũla Esekia ĩthe wake waomboete, aaka ithembeo kwondũ wa Mbaali na aseũvya mĩtĩ ya ũthaithi,* na akumanĩa nguthu yonthe ya matunĩ na amĩthũkũma. 4 O na nĩwaakie ithembeo nyũmbanĩ ya Yeova, ĩla Yeova waneenete ĩũlũ wayo akasya: “Ĩsyĩtwa yakwa yĩkekalaa Yelusalemu tene na tene.” 5 Na nĩwaakie ithembeo kwondũ wa nguthu yonthe ya matunĩ iwanzanĩ ilĩ sya nyũmba ya Yeova. 6 O na nĩwavĩtĩilye ana make mwene mwakinĩ Mwandanĩ wa Mwana wa Inomu; nĩweekaa syama sya ũwe, akaũsya, akeka maũndũ ma ũoi, na nĩwanyuvie andũ ma kũneenanyʼa na maveva na andũ me na mavinya ma kũvuanyʼa ĩvinda yũkĩte. Nĩweekie mũno kĩla kĩthũku methonĩ ma Yeova, nĩ kana amũthatye.

7 Nĩwaiie mũvwʼanano mwasũvye ũla waseũvĩtye nyũmbanĩ ya Ngai ũla wa w’o ĩla Ngai waneeneete na Ndaviti na mwana wake Solomoni, akasya: “Ĩvinda yonthe ngekalasya ĩsyĩtwa yakwa nyũmbanĩ ĩno na Yelusalemu, vala nĩnyuvĩte katĩ wa mbaĩ syonthe sya Isilaeli. 8 Na ndikavetanga ĩngĩ nyaaĩ sya Aisilaeli kuma nthĩ ĩla nanengie aa-ũmae moo, ĩndĩ nĩ kana ũu wĩthĩwe no nginya maatĩĩe nesa maũndũ onthe ala nameaĩe, Mĩao yonthe, myolooto na motwʼĩo ala nanenganie kwĩsĩla Mose.” 9 Manase nĩwaendeeie kwelelũkya andũ ma Yuta na ma Yelusalemu, na atuma meka ũthũku mwingangĩ kwĩ ũla weekawa nĩ mbaĩ ila Yeova waanangie syauma mbee wa Aisilaeli.

10 Yeova nĩwaendeeie kũneena na Manase na andũ make, ĩndĩ mayaamwĩthukĩĩsya. 11 Kwoou Yeova nĩwamaeteie anene ma ita sya mũsumbĩ wa Asuli, na makwata Manase na ngolya,* mamwova na mbĩngũ ilĩ sya ũthuku, na mamũtwaa Mbavilonĩ. 12 E thĩnanĩ ũsu, nĩwamwĩsũvie Yeova Ngai wake amwonyʼe ũseo* na aendeea kwĩnyivya mũno mbee wa Ngai wa aa-ũmae make. 13 Nĩwaendeeie kũmũvoya Ngai, nake akiitwa nĩ mawĩsũvano make na eewʼa mboya yake ya kwenda onwʼe ũseo, na amũtũnga ũsumbĩnĩ wake Yelusalemu. Nũndũ wa ũu, Manase nĩwamanyie kana Yeova nĩwe Ngai ũla wa w’o.

14 Ĩtina wa ũu, nĩwaakie ũkũta wa nza kwondũ wa Ndũa ya Ndaviti ngalĩko ya ũthũĩlonĩ wa sua ya Ngioni, ĩla yĩ mwandanĩ,* nginya Mũvĩanĩ wa Makũyũ, na aendeea kũwaka kũthyũlũlũka nginya Oveli, na aũtũlya mũno. Na kwongela ũu, nĩwanyuvie anene ma ita ndũanĩ syonthe mbiĩĩe kũu Yuta. 15 Na ĩndĩ nĩwavetangie ngai ngeni na ĩla ngai ya mũvwʼanano nyũmbanĩ ya Yeova na ithembeo syonthe ila waakĩte kĩĩmanĩ kya nyũmba ya Yeova na Yelusalemu, na aumya mwĩao syĩkwʼe nza wa ndũa. 16 O na ĩngĩ, nĩwatũngĩĩie kĩthembeo kya Yeova na ambĩĩa kumĩsya nthembo sya ngwatanĩo na nthembo sya kũtũnga mũvea ĩũlũ wakyo, na eea andũ ma Yuta mamũthũkũme Yeova Ngai wa Isilaeli. 17 O na ũu wĩ o vo, andũ no maendeeie kũthembea kũndũnĩ kũtũlu, o na kau mathembeaa Yeova Ngai woo e o weka.

18 Na ngewa ĩla ĩngĩ ya Manase, mboya ila wavoyie Ngai wake, na ndeto sya oni ala maneenie nake ĩsyĩtwanĩ ya Yeova Ngai wa Isilaeli, iandĩkĩtwe ngewanĩ ya asumbĩ ma Isilaeli. 19 O na ĩngĩ, mboya yake na ũndũ wasũngĩiwe yĩla weesũvanie, naĩ syake syonthe na maũndũ ala weekie oonanyʼa kana ti mũĩkĩĩku, isio ila waakie kũndũ kũtũlu na aũngamya mĩtĩ ya ũthaithi* na mĩvwʼanano myasũvye atanamba kwĩnyivya, iandĩkĩtwe ndetonĩ sya oni make. 20 Na ĩndĩ Manase akwʼa na athikwa vamwe na aa-ũmae make nyũmbanĩ yake; na mwana wake Amoni atwʼĩka mũsumbĩ vandũ vake.

21 Amoni aĩ na myaka 22 yĩla watwʼĩkie mũsumbĩ, na asumbĩkie myaka ĩlĩ e Yelusalemu. 22 Na nĩwaendeeie kwĩka kĩla kĩthũku methonĩ ma Yeova, o ta Manase ĩthe wake; na Amoni nĩwathembeaa mĩvwʼanano yonthe myasũvye ĩla Manase ĩthe wake waseũvĩtye, na nĩwaendeeie kũmĩthũkũma. 23 Ĩndĩ ndaaĩnyivya mbee wa Yeova o tondũ Manase ĩthe wake weenyivisye; vandũ va ũu, Amoni eekie kwongeleela mavĩtyo make ĩ ya mũno. 24 Ĩtina, athũkũmi make nĩmavangĩthisye mũvango wa kũmũmina na mamũaĩa nyũmbanĩ yake mwene. 25 Ĩndĩ andũ ma nthĩ ĩsu nĩmooaie onthe ala mavangĩthisye mũvango wa kũmũmina Mũsumbĩ Amoni, na matwʼĩkĩthya Yosia mwana wake mũsumbĩ vandũ vake.

34 Yosia aĩ na myaka nyanya yĩla watwʼĩkie mũsumbĩ, na asumbĩkie myaka 31 e Yelusalemu. 2 Nĩweekie kĩla kyaĩlĩte methonĩ ma Yeova na nĩwakinyĩile nzĩanĩ sya Ndaviti ũmae wake, na ndaaelelũka akathi kwʼokonĩ kwa aũme kana kwʼokonĩ kwa aka.

3 Mwakanĩ wa 8 wa kũsumbĩka kwake, e o kamwana, nĩwambĩĩie kũmantha Ngai wa Ndaviti ũmae wake; na mwakanĩ wa 12, nĩwambĩĩie kũthesya Yuta na Yelusalemu kwa kũvetanga kũndũ kũtũlu na mĩtĩ ya ũthaithi,* mĩvwʼanano myasũvye, na mĩvwʼanano ya kyũma.* 4 O na ĩngĩ, nĩmaomboangie ithembeo sya Mbaali ũ Yosia ene, na matilanga syĩndũ sya kwilĩĩla ũvumba ila syaĩ ĩũlũ wasyo. O na nĩwasyokie atilanga mĩtĩ ya ũthaithi* ilungu, mĩvwʼanano myasũvye, na mĩvwʼanano ya kyũma* na amĩtumbatumba yatwʼĩka mũtutu na aũnyaĩĩkya ĩũlũ wa mbũa sya ala mamĩthembeaa. 5 Na nĩwavĩvĩisye mavĩndĩ ma athembi ithembeonĩ syoo. Kwa kwĩka ũu, nĩwatheisye Yuta na Yelusalemu.

6 Na ndũanĩ sya Manase, Evilaimu, Simeoni, na nginya Navitali, kũndũnĩ kũombokangu kũla kwaithyũlũlũkĩte, 7 nĩwaomboangie ithembeo na atumbatumba mĩtĩ ya ũthaithi* na mĩvwʼanano myasũvye, yatwʼĩka mũtutu; na atilanga syĩndũ syonthe sya kwilĩĩla ũvumba ila syaĩ nthĩ yonthe ya Isilaeli, na ĩndĩ ĩtina wa ũu, asyoka Yelusalemu.

8 Mwakanĩ wa 18 wa kũsumbĩka kwake, yĩla waĩ anathesya ĩ nthĩ na ĩkalũ,* nĩwatũmie Savani mwana wa Asaliau, Maaseia mũnene wa ndũa, na Yoa mwana wa Yoaasu ũla waiaa lekoti makatũngĩĩe nyũmba ya Yeova Ngai wake. 9 Nĩmookie kũla kwĩ Mũthembi Mũnene Ilikia na mamũnenga mbesa ila syaetetwe nyũmbanĩ ya Ngai, ila Alivai ala meethĩawa asũvĩi ma mĩomo moombanĩtye kuma Manase, Evilaimu, na mbaĩnĩ ila ingĩ syonthe sya Isilaeli, o vamwe na ila maumĩtye Yuta, Mbenyamini, na kuma kwa andũ ala mekalaa Yelusalemu. 10 Na ĩndĩ nĩmainengie ala manyuvĩtwe maũngamĩe wĩa nyũmbanĩ ya Yeova. Namo athũkũmi ala maĩ nyũmbanĩ ya Yeova nĩmaitũmĩie kũseũvya na kũtũngĩĩa nyũmba ĩsu. 11 Nĩmainengie mavundi na aki nĩ kana mathooe mavia mase na mbwaũ sya kũtwʼĩĩka nyũmba na kwaka mĩamba ya nyũmba ila asumbĩ ma Yuta maekete ikanangĩka.

12 Na aũme asu nĩmatethisye wĩa ũsu me aĩkĩĩku. Alivai ala manyuviwe mamaũngamĩe me asyaĩĩsya moo maĩ Yaathi na Ovatia kuma kwa Amelali, na Nzekalia na Mesulamu kuma kwa Akoathi. Na Alivai, onthe ala maĩ aini me na ũtũĩka, 13 nĩmo maũngamĩe andũ ma moko* na nĩmo maĩ asyaĩĩsya ma onthe ala matethasya wĩa wa kĩla mũthemba; na Alivai amwe maĩ aandĩki, anene, na asũvĩi ma mĩvĩa.

14 Maendeee kumya mbesa ila syaetetwe nyũmbanĩ ya Yeova vala syeekĩawa, mũthembi Ilikia nĩwoonie ĩvuku ya Mĩao ya Yeova yĩla yanenganĩtwe kwĩsĩla* Mose. 15 Kwoou Ilikia eea mũandĩki Savani atĩĩ: “Nĩnoona ĩvuku ya ĩla Mĩao nyũmbanĩ ya Yeova.” Na ĩndĩ Ilikia anenga Savani ĩvuku yĩu. 16 Ĩtina wa ũu, Savani nĩwatwaĩe mũsumbĩ ĩvuku yĩu na amwĩa atĩĩ: “Athũkũmi maku maendeee kwĩka kyonthe kĩla ũnameie meke. 17 Nĩmatulũla mbesa ila syeethĩwa nyũmbanĩ ya Yeova, na mainenga aũme ala manyuvĩtwe na ala meũtethya wĩa.” 18 O na ĩngĩ, mũandĩki Savani eeie mũsumbĩ atĩĩ: “Ve ĩvuku mũthembi Ilikia wanenga.” Na ĩndĩ Savani ambĩĩa kũsomea mũsumbĩ ĩvuku yĩu.

19 Yĩla mũsumbĩ weewie ndeto sya Mĩao oou, nĩwatembũie ngũa syake. 20 Na ĩndĩ mũsumbĩ eeaĩa Ilikia, Aikamu mwana wa Savani, Avitoni mwana wa Mika, mũandĩki Savani, na Asaia mũthũkũmi wa mũsumbĩ amea: 21 “Endai mũkakũlye Yeova ũtao kwondũ wakwa na kwondũ wa ala matialĩte Isilaeli na Yuta ĩũlũ wa ndeto sya ĩvuku yĩla yooneka; nĩkwĩthĩwa ũthilĩku wa Yeova ũla ũũtulũlwa ĩũlũ witũ nĩ mwingĩ, nũndũ aa-ũmae maitũ mayaaĩanĩsya ndeto ya Yeova kwa kũatĩĩa kyonthe kĩla kĩandĩkĩtwe ĩvukunĩ yĩĩ.”

22 Kwoou Ilikia, vamwe na ala matũmĩtwe nĩ mũsumbĩ, mathi vala ve Ulita, ũla waĩ mwathani mũndũ mũka. Ulita aĩ mũka wa Salumu mwana wa Tikiva mwana wa Aliasi, ũla waĩ mũsũvĩi wa ngũa, na ekalaa Ũtũinĩ wa Kelĩ wa Yelusalemu; na maneenea nake vau. 23 Nake amea: “Ũũ nĩwʼo Yeova Ngai wa Isilaeli ũkwasya, ‘Tavyai mũndũũme ũla wamũtũma kũla nĩĩ atĩĩ: 24 “Ũũ nĩwʼo Yeova ũkwasya, ‘Nĩngũetee vandũ vaa na ekali ma vo mũisyo, iumo syonthe ila iandĩkĩtwe ĩvukunĩ yĩla masoma mbee wa mũsumbĩ wa Yuta. 25 Nũndũ nĩmandiĩte na matumaa nthembo itoa kwondũ wa ngai ingĩ nĩ kana manthatye na mawĩa onthe ma moko moo, ũthilĩku wakwa nũũtulũlwa ĩũlũ wa vandũ vaa na ndwĩvowʼa.’” 26 Ĩndĩ ũũ nĩwʼo mwaĩlĩte kũtavya mũsumbĩ wa Yuta, ũla ũmũtũmĩte mũke kũkũlya ũtao wa Yeova, “Ũũ nĩwʼo Yeova Ngai wa Isilaeli ũkwasya: ‘Ĩũlũ wa ndeto ila weewʼa, 27 nũndũ ngoo yaku nĩyeethĩwa yĩ mbĩwi* na weenyivya mbee wa Ngai yĩla weewʼa ndeto syake ikonetye vandũ vaa na ekali ma vo na weenyivya mbee wakwa na watembũa ngũa syaku na waĩa mbee wakwa, o nakwa nĩnakwĩwʼa, easya ũu Yeova. 28 Nĩkyo kĩtumi ngakũmbanyʼa vamwe na aa-ũmae maku,* na ũkathikwa mbũanĩ yaku na mũuo, na metho maku maikona mũisyo wʼonthe ũla ngaetee vandũ vaa na ekali ma vo.’”’”

Na ĩndĩ masyoka matavya mũsumbĩ ndeto isu. 29 Kwoou mũsumbĩ atũmana atumĩa onthe ma Yuta na Yelusalemu. 30 Ĩtina wa ũu, mũsumbĩ nĩwambatie nyũmbanĩ ya Yeova e na aũme onthe ma Yuta, ekali ma Yelusalemu, athembi, na Alivai; ambatie na andũ onthe, anene o vamwe na anini. Na ĩndĩ amasomea ndeto syonthe ila syĩ yĩla ĩvukunĩ ya ũtianĩo yĩla yoonekete nyũmbanĩ ya Yeova methukĩĩsye. 31 Mũsumbĩ nĩwaũngamie vandũnĩ vake na aseũvya* ũtianĩo mbee wa Yeova kana akaatĩĩaa Yeova na kũkwataa mĩao yake, molilikanyʼo make, na myolooto yake na ngoo yake yonthe na thayũ* wake wʼonthe kwa kwĩanĩasya ndeto sya ũtianĩo, ila syaandĩkĩtwe ĩvukunĩ yĩu. 32 O na ĩngĩ, nĩwatumie onthe ala maĩ Yelusalemu na Mbenyamini mawĩtĩkĩla. Na ekali ma Yelusalemu meeka kwosana na ũtianĩo wa Ngai, Ngai wa aa-ũmae moo. 33 Na ĩndĩ Yosia nĩwavetangie syĩndũ syonthe sya kũthatya* isionĩ syonthe sya Aisilaeli, na atuma kĩla mũndũ Isilaeli amũthũkũma Yeova Ngai woo. Thayũnĩ wake wʼonthe* mayaaelelũka makaeka kũmũatĩĩa Yeova Ngai wa aa-ũmae moo.

35 Yosia nĩwavangĩthisye vethĩwe mboka ya Vasaka kwondũ wa Yeova kũu Yelusalemu, na nĩmathĩnzie nthembo ya Vasaka mũthenyanĩ wa 14 mweinĩ wa mbee. 2 Nĩwatũngie athembi iandanĩ syoo na amekĩa vinya meanĩsye ũthũkũmi woo nyũmbanĩ ya Yeova. 3 Na ĩndĩ eea Alivai, ala maĩ amanyĩsya ma Isilaeli yonthe, na ala maĩ atheu kwa Yeova: “Iai Ĩsandũkũ ĩtheu nyũmbanĩ ĩla Solomoni mwana wa Ndaviti mũsumbĩ wa Isilaeli waakie; mũyaĩlĩte kũyĩkua ĩngĩ na ituo syenyu. Yu thũkũmai Yeova Ngai wenyu na andũ make Isilaeli. 4 Na mũyĩyũmbanyʼa kwosana na nyũmba sya aa-ĩthe menyu kwosana na ikundi syenyu, mũatĩĩe kĩla kyaandĩkiwe nĩ Mũsumbĩ Ndaviti wa Isilaeli na mwanae Solomoni. 5 Ũngamai vandũnĩ vatheu mwĩvangĩte kwosana na nyũmba sya aa-ĩthe sya ana-a-ĩthe menyu, andũ ala angĩ,* na ngalĩko ĩla ĩngĩ ve na kĩkundi kya nyũmba ya aa-ĩthe ma Alivai. 6 Thĩnzai nthembo ya Vasaka na mũyĩthesya na mũyĩka mĩvango kwondũ wa ana-a-ĩthe menyu nĩ kana mwĩanĩsye ndeto ĩla Yeova waneenie kwĩsĩla Mose.”

7 Yosia nĩwanengie andũ mbũi na malondu, tũtũlũme na tũthenge, syĩthĩwe nthembo sya Vasaka kwondũ wa onthe ala maĩ vo, na ũtalo wasyo waĩ 30,000, o vamwe na ngʼombe 3,000. Isu syaumiwʼe malĩnĩ ya mũsumbĩ. 8 O namo anene me mbee ũsumbĩnĩ wake nĩmaumisye mũvothi wĩthĩwe nthembo ya ngenda kwondũ wa andũ, athembi, na Alivai. Ilikia, Nzekalia, na Yeielu, ala maĩ atongoi ma nyũmba ya Ngai ũla wa w’o, nĩmanengie athembi nthembo sya Vasaka 2,600 na ngʼombe 300. 9 Konania na ana-a-ĩthe Semaia na Nethaneli, o vamwe na Asavia, Yeieli, na Yosavatu, ala maĩ anene ma Alivai, nĩmanengie Alivai nthembo sya Vasaka 5,000 na ngʼombe 500.

10 Mĩvango ĩla yeekawa nĩyathelile, na athembi maũngama kũndũnĩ kwoo na Alivai maũngama kwosana na ikundi syoo, o ũndũ mũsumbĩ weeaĩte. 11 Nĩmathĩnzie nthembo sya Vasaka, na athembi maminzangya nthakame ĩla moosie kuma kwoo, ĩvindanĩ o yĩu Alivai maendeee kumya nyamũ isu ikonde.* 12 Ĩtina wa ũu, nĩmoombanisye nthembo sya kũvĩvw’a masiaĩe andũ ala angĩ, ala mavangĩtwe kwosana na nyũmba sya aa-ĩthe, nĩ kana syumĩwʼe Yeova o ũndũ vaandĩkĩtwe ĩvukunĩ ya Mose; na ũu nowʼo meekanie na ila ngʼombe. 13 Nĩmauie* nthembo ya Vasaka na mwaki o ũndũ kweekawa; na mauĩa nthembo ntheu mbisũnĩ, masilianĩ, na tũlaĩnĩ twa kũua, na ĩtina wa ũu, nĩmasieteie andũ ala angĩ onthe na mĩtũkĩ. 14 Na ĩndĩ nĩmeeseũvĩisye nthembo ya Vasaka na maseũvĩsya athembi, nĩkwĩthĩwa athembi, ala maĩ nzyawa sya Alũni, maendeeie kumya nthembo sya kũvĩvwʼa na ilungu sya mathunya nginya kwatuka, kwoou Alivai nĩmeeseũvĩisye nthembo ya Vasaka na maseũvĩsya athembi, ala maĩ nzyawa sya Alũni.

15 Na aini, ana ma Asavu, maũngamĩte kũla maaĩlĩte kũũngama kwosana na mwĩao wa Ndaviti, Asavu, Emani, na Yetuthuni ũla waĩ mwoni wa mũsumbĩ; na asũvĩi ma mĩvĩa maũngamĩte mĩvĩanĩ yĩ kĩvathũkanyʼo. Mayaĩ na vata wa kuma ũthũkũminĩ woo, nĩkwĩthĩwa ana-a-ĩthe moo Alivai nĩmeekĩte mĩvango kwondũ woo. 16 Mũthenya ũsu nĩmaminie kwĩka mĩvango yonthe ĩla Yeova wendaa meke nĩ kana matanĩe Vasaka na mayumĩsya nthembo sya kũvĩvw’a kĩthembeonĩ kya Yeova, kwosana na mwĩao wa Mũsumbĩ Yosia.

17 Aisilaeli ala maĩ vo nĩmatanĩie Vasaka ĩvindanĩ yĩu vamwe na Mboka ya Mũkate ũte Ĩlawa mĩthenya mũonza. 18 Isilaeli kũyaĩ kwaaĩthĩwa Vasaka ĩngĩ ta ĩsu kuma mĩthenyanĩ ya mwathani Samũeli; o na vai mũsumbĩ o na ũmwe asumbĩnĩ ala angĩ ma Isilaeli waĩ aavangĩthya Vasaka ta ĩla yavangĩthiwʼe nĩ Yosia, athembi, Alivai, andũ onthe ma Yuta na Isilaeli ala maĩ vo, na ekali ma Yelusalemu. 19 Vasaka ĩsu yatanĩiwe mwakanĩ wa 18 wa kũsumbĩka kwa Yosia.

20 Ĩtina wa maũndũ asu onthe, yĩla Yosia waĩ anaseũvya ĩkalũ,* Mũsumbĩ Neko wa Misili nĩwambatie akokitĩe Kalikemisi vakuvĩ na Ũsĩ wa Euvalati. Na ĩndĩ Yosia athi akokite nake. 21 Kwoou Mũsumbĩ Neko atũma atũmwa kũla ũĩ, aimwĩa: “Ũndũ ũũ ũkũkonetye ata, we mũsumbĩ wa Yuta? Nyie ũmũnthĩ ndyũkĩte kũkita naku, ĩndĩ nũkĩte kũkita na nyũmba ĩngĩ, na Ngai ambĩĩte nĩkalaate. Nĩ kana maũndũ maku mathi nesa, eka kũleana na Ngai, ũla wĩ vamwe nakwa, nũndũ waema kwĩka ũu nũkũkwananga.” 22 O na ũu wĩ o vo, Yosia ndaaekana nake, ĩndĩ eevĩndũie ndakamanyĩke nĩ kana okite nake na ndaaĩthukĩĩsya ndeto sya Neko, ila syaumĩte kanyw’anĩ wa Ngai. Na kwoou athi kaũnĩ Ũiĩnĩ wa Mekito.

23 Na ndũĩka sya kũatha na maangi syaatha Mũsumbĩ Yosia, na kwoou mũsumbĩ eea athũkũmi make atĩĩ: “Mbumyei vaa, nũndũ nĩnaũmĩwʼa mũno.” 24 Nũndũ wa ũu, athũkũmi make nĩmamumisye ĩkasyanĩ na mamũkua na ĩkasya yake ya kelĩ ya kaũ mamũtwaa Yelusalemu. Kwoou akw’a na athikwa mbũanĩ ya aa-ũmae make, na andũ onthe ma Yuta na Yelusalemu mamũmetea Yosia. 25 Na Yelemia ainĩa Yosia wathi wa kĩmeto, na aini onthe aũme na aka methĩĩtwe mayina ĩũlũ wa Yosia mbathinĩ syoo sya kĩmeto nginya ũmũnthĩ; na ũtwi nĩwaumiwʼe mbathi isu sinawe Isilaeli, na iandĩkĩtwe mbathinĩ sya kĩmeto.

26 Na ngewa ĩla ĩngĩ ya Yosia na meko make ma wendo ũtathelaa, ala weekie aatĩĩe kĩla kĩandĩkĩtwe Mĩaonĩ ya Yeova, 27 na maũndũ ala weekie kuma mwambĩĩo nginya mũthya, maandĩkĩtwe Ĩvukunĩ ya Asumbĩ ma Isilaeli na ma Yuta.

36 Na ĩndĩ andũ ma nthĩ ĩsu moosa Yeoaasu mwana wa Yosia mamũtwʼĩkĩthya mũsumbĩ kũu Yelusalemu vandũ va ĩthe wake. 2 Yeoaasu aĩ na myaka 23 yĩla watwʼĩkie mũsumbĩ, na asumbĩkie myei ĩtatũ e Yelusalemu. 3 Ĩndĩ, mũsumbĩ wa Misili nĩwamũvetangie kĩvĩlanĩ kũu Yelusalemu na aumya nthĩ ĩsu vainĩ wa talendi 100* sya vetha na talendi ĩmwe ya thaavu. 4 Eka ũu, mũsumbĩ wa Misili nĩwatwʼĩkĩthisye Eliakimu mwana-a-ĩthe wa Yeoaasu mũsumbĩ wa Yuta na Yelusalemu na avĩndũa ĩsyĩtwa yake amwĩta Yeoiakimu; ĩndĩ Neko nĩwoosie mwana-a-ĩthe Yeoaasu amũtwaa Misili.

5 Yeoiakimu aĩ na myaka 25 yĩla watwʼĩkie mũsumbĩ, na asumbĩkie myaka 11 e Yelusalemu. Nĩwaendeeie kwĩka kĩla kĩthũku methonĩ ma Yeova Ngai wake. 6 Mũsumbĩ Nevukatinesa wa Mbavilonĩ nĩwambatie amũvithũkĩe nĩ kana amwove na mbĩngũ ilĩ sya ũthuku amũtwae Mbavilonĩ. 7 Na Nevukatinesa nĩwoosie mĩio ĩmwe ya nyũmba ya Yeova amĩtwaa Mbavilonĩ na amia nyũmbanĩ yake ya mũsumbĩ kũu Mbavilonĩ. 8 Na ngewa ĩla ĩngĩ ya Yeoiakimu, maũndũ ma kũthatya ala weekie na maũndũ onthe mathũku ĩũlũ wake, ĩandĩkĩtwe Ĩvukunĩ ya Asumbĩ ma Isilaeli na ma Yuta; na mwana wake Yeoiakini atwʼĩka mũsumbĩ vandũ vake.

9 Yeoiakini aĩ na myaka 18 yĩla watwʼĩkie mũsumbĩ, na asumbĩkie myei ĩtatũ na mĩthenya ĩkũmi e Yelusalemu; na nĩwaendeeie kwĩka kĩla kĩthũku methonĩ ma Yeova. 10 Mwambĩĩonĩ wa mwaka,* Mũsumbĩ Nevukatinesa nĩwatũmanie aetwe Mbavilonĩ vamwe na syĩndũ sya vata sya nyũmba ya Yeova. Ĩtina wa ũu, nĩwatwʼĩkĩthisye mwendwʼa-ĩthe Nzetekia mũsumbĩ wa Yuta na Yelusalemu.

11 Nzetekia aĩ na myaka 21 yĩla watwʼĩkie mũsumbĩ, na asumbĩkie myaka 11 e Yelusalemu. 12 Nĩwaendeeie kwĩka kĩla kĩthũku methonĩ ma Yeova Ngai wake. Ndaaĩnyivya mbee wa mwathani Yelemia, ũla waneenie kwosana na mwĩao wa Yeova. 13 O na nĩwangʼendeie Mũsumbĩ Nevukatinesa, ũla watumĩte evĩta na Ngai, na aendeea kũmya kyongo* na kwĩthĩwa na ngoo mbũmũ na alea kwĩthyũũĩa Yeova Ngai wa Isilaeli. 14 Anene onthe ma athembi o vamwe na andũ mayaĩ aĩkĩĩku o na vanini, nĩkwĩthĩwa nĩmeekaa maũndũ onthe ma kũthatya ma i mbaĩ, na nĩmavukisye nyũmba ya Yeova ĩla watheetye kũu Yelusalemu.

15 Yeova Ngai wa aa-ũmae moo nĩwaendeeie kũmakanyʼa atũmĩĩte atũmwa make, aimakanyʼa ĩngĩ na ĩngĩ, nũndũ nĩweewʼĩaa andũ make ĩnee o vamwe na wĩkalo wake. 16 Ĩndĩ nĩmaendeeie kũvũthya atũmwa ma Ngai ũla wa w’o, na maleana na ndeto syake na mathekeea athani, nginya ũthatu wa Yeova wookĩa andũ make, weethĩa maitonya kũvowʼa.

17 Kwoou nĩwatumie mũsumbĩ wa Akalitei amavithũkĩa, na ooaĩa anake moo na ũvyũ nyũmbanĩ ya vandũ voo vatheu; ndaaĩwʼĩa ĩnee mwanake kana mwĩĩtu ũtesĩ mũndũũme, mũndũ mũkũũ kana mũndũ mũwau. Ngai anenganie syĩndũ syonthe kwʼokonĩ kwake. 18 Atwaie syĩndũ syonthe Mbavilonĩ, mĩio yonthe ya nyũmba ya Ngai ũla wa w’o, mĩnene na mĩnini, o vamwe na ũthwii wa nyũmba ya Yeova na ũthwii wa mũsumbĩ na anene me mbee ũsumbĩnĩ wake. 19 Nĩwavĩvisye nyũmba ya Ngai ũla wa w’o vyũ, aomboa ũkũta wa Yelusalemu, avĩvya na mwaki myako yayo yonthe mĩtũlu na miĩĩe, na aananganyʼa syĩndũ syonthe sya vata. 20 Nĩwatavie ala mataaũawa na ũvyũ amatwaa Mbavilonĩ, namo matwʼĩka athũkũmi make na ma ana make nginya yĩla ũsumbĩ wa Velisia wambĩĩie kũsumbĩka, 21 nĩ kana ndeto ila Yeova waneenie kwĩsĩla Yelemia ianĩe, nginya nthĩ yaĩvĩa savato syayo. Mĩthenya yonthe ĩla yekalile ĩte ndũe nĩyakwataa savato, yĩanĩsye myaka 70.

22 Mwakanĩ wa mbee wa Mũsumbĩ Kolesi wa Velisia, nĩ kana ndeto ĩla Yeova waneenete kwĩsĩla Yelemia ĩanĩe, Yeova nĩwaamũkisye veva wa Mũsumbĩ Kolesi wa Velisia nĩ kana atangaase ũsumbĩnĩ wake wʼonthe ũndũ ũũ, ũla wasyokie aũandĩka, ayasya: 23 “Ũu nĩwʼo Mũsumbĩ Kolesi wa Velisia ũkwasya, ‘Yeova Ngai wa ĩtunĩ nũnengete mosumbĩ onthe ma nthĩ, na nũmbĩaĩe nĩmwakĩe nyũmba Yelusalemu, ĩla yĩ Yuta. Mũndũ o na wĩva ũla wĩ katĩ wenyu inywʼonthe andũ make, Yeova Ngai wake nĩethĩwe vamwe nake, na ambate athi kũu.’”