VALŨA KWA ALOMI
1 Nyie Vaulo, ngombo ya Klĩsto Yesũ na ũla weetiwe ethĩwe mũtũmwa, na avathwa kwondũ wa ũvoo mũseo wa Ngai, 2 ũla wathanie kuma tene kwĩsĩla athani make nthĩnĩ wa Maandĩko matheu 3 ĩũlũ wa Mwana wake, ũla waumie ũsyaonĩ wa Ndaviti kwa nzĩa ya mwĩĩ, 4 na kwa vinya wa veva mũtheu athayũũkw’a, na ũu woonany’a kana we nĩ Mwana wa Ngai, na nĩwe Mwĩaĩi waitũ Yesũ Klĩsto. 5 Kwĩsĩla kwake nĩtwakwatie ũseo mwingĩ na ũtũme nĩ kana andũ ma mbaĩ syonthe methĩwe na mũĩkĩĩo na me ewi kwondũ wa ĩsyĩtwa yake, 6 na kuma mbaĩnĩ isu o nenyu nĩmweetiwe mwĩthĩwe ma Yesũ Klĩsto— 7 nĩmũandĩkĩa inyw’onthe ala mwĩ Lomi, ala mwendetwe nĩ Ngai, na mweetiwe mwĩthĩwe atheu:
Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto.
8 Ũndũ wa mbee, nĩmũtũngĩa Ngai wakwa mũvea kwĩsĩla Yesũ Klĩsto nũndũ wenyu inyw’onthe, nĩkwĩthĩwa mũĩkĩĩo wenyu nũwetawa kĩla vandũ nthĩ yonthe. 9 Nũndũ Ngai ũla nĩthũkũmaa ũthũkũmi mũtheu na veva wakwa w’onthe kwosana na ũvoo mũseo ĩũlũ wa Mwana wake, nĩ ngũsĩ yakwa ĩũlũ wa ũndũ kĩla ĩvinda nĩmũwetaa mboyanĩ syakwa, 10 ngĩsũvana nĩ kana ethĩwa nĩvatonyeka yu nĩthĩwe ndonya kũka kũla mũĩ, ethĩwa nĩ kwenda kwa Ngai. 11 Nũndũ nĩ na mea maingĩ ma kũmwona, nĩ kana nĩthĩwe ndonya kũmũnenga mũthĩnzĩo mũna wa kĩ-veva nĩ kana mũlũlũmĩĩlw’e; 12 kana o na ethĩwa ti ũu, twĩkĩane vinya kwĩsĩla mũĩkĩĩo wa ũmwe na ũla ũngĩ; wakwa na wenyu.
13 Ĩndĩ ana-a-asa, ndikwenda mwĩthĩwe mũtesĩ kana mavinda maingĩ nĩthĩĩtwe ngyenda kũka kũla mũĩ, ĩndĩ nĩthĩĩtwe nĩ mũsiĩĩe kũvika o na yu. O na ũu wĩ o vo, nĩnĩvangĩte kũka kũla mũĩ nĩ kana nĩthĩwe ndonya kũkwata ũsyao katĩ wenyu o tondũ nĩkĩte katĩ wa andũ ma mbaĩ ingĩ. 14 Nyie nĩmũtae nĩ Akiliki na aeni, * na ala oĩ na ala mate na ũmanyi; 15 kwoou nĩ na mea ma kũmũtavya ũvoo mũseo o nenyu ala mwĩ kũu Lomi. 16 Nĩkwĩthĩwa ndiwĩw’ĩaa nthoni ũvoo mũseo; nũndũ kwa w’o, ũsu nĩw’o vinya wa Ngai wa kũtangĩĩa kĩla ũmwe wĩ na mũĩkĩĩo, mbee nĩ Ayuti na ĩndĩ Akiliki. 17 Nĩkwĩthĩwa ũvoo mũseo nũendeee kũvuany’a ũlũngalu wa Ngai kwĩsĩla mũĩkĩĩo na kwondũ wa mũĩkĩĩo, o tondũ kũandĩkĩtwe: “Ũla mũlũngalu akekala thayũ nũndũ wa mũĩkĩĩo.”
18 Na ũthilĩku wa Ngai nũendeee kũvuanw’a kuma ĩtunĩ ĩũlũ wa onthe ala matamũkĩaa na mate alũngalu, ala masiĩĩaa ũla w’o kwa nzĩa ĩte ndũngalu, 19 nũndũ maũndũ ma Ngai ala matonya kũmanyĩka nĩmonekete ũtheinĩ katĩ woo, nĩkwĩthĩwa Ngai nũmonetye maũndũ asu ũtheinĩ. 20 Nĩkwĩthĩwa nguma syake ila itonekaa nĩsyonekete ũtheinĩ kuma yĩla nthĩ yoombiwe, nũndũ nimanyĩkaa kwĩsĩla syĩndũ ila syoombiwe, o na vinya wake wa tene na tene na ũ-Ngai wake, nĩ kana methĩwe matatonya kwĩtetea. 21 Nũndũ o na kau nĩmamũmanyie Ngai, mayaamũkumya ta we Ngai o na mayaamũtũngĩa mũvea, ĩndĩ mosũanĩo moo matw’ĩkĩte ma mana na ngoo syoo ite na ũmanyi ikethĩwa na kĩvindu. 22 O na kau maasya nĩ oĩ, matw’ĩkĩte atumanu 23 naw’o ũnene wa Ngai ũla ũtanangĩkaa maũnengete mũvw’anano wa mũndũ ũla wanangĩkaa, wa nyũnyi, wa nyamũ ila syĩ maaũ ana, na wa tũsamũ tũla tũtambũkaa. *
24 Kwoou kwosana na mawendi ma ngoo syoo, Ngai nĩwamaekie meke maũndũ mavuku, nĩ kana mĩĩ yoo yanangĩwe ndaĩa katĩ woo. 25 Nĩmakũanisye ũw’o wa Ngai na ũvũngũ na mathaitha syĩndũ ila syoombiwe na kũithũkũma ũthũkũmi mũtheu vandũ va Mũmbi, ũla ũtaĩawa tene na tene. Ameni. 26 Nĩkyo kĩtumi Ngai wamaekie methĩwe na mĩmeo mĩthũku ya kũmanyana kĩ-mwĩĩ mate kwĩsiĩĩa, nũndũ aka nĩmaekie mũtuo woo wa mũsyawa na mambĩĩa kwĩka maũndũ mate kwosana na ũndũ moombiwe; 27 o namo aũme maeka mũtuo wa kũmanyana kĩ-mwĩĩ na aka na makanĩana mwaki mĩmeonĩ yoo mĩthũku ene kwa ene, aũme na aũme, mayĩka maũndũ mathũku na kũkwata ũĩvanĩsyo mwĩanĩu, ũla ũmaĩlĩte kwondũ wa ĩvĩtyo yoo.
28 Na nũndũ nĩmaleile kũmwĩtĩkĩla Ngai, we nĩwamaekie maatĩĩe mosũanĩo moo matetĩkĩlĩka, na meke maũndũ mataĩlĩte. 29 Na nĩmausũĩtwe vyũ nĩ maũndũ mate malũngalu, ũthũku, ĩtomo, na wathe, o na nĩmausũĩtwe nĩ kĩwĩu, ũaani, ĩteta, ũkengani, na wendi wa kwĩka angĩ ũthũku, na nĩ asukani, 30 andũ masambasya angĩ, mamũmenete Ngai, me kĩvũthya, me mĩng’athĩlĩĩlyo, me mĩyono, mavangaa * maũndũ mathũku, na matew’aa asyai, 31 mate na ũmanyi, mateanĩasya kĩla maweta, mate na wendo ũla waĩle, na mate tei. 32 O na kau nĩmesĩ nesa vyũ mwĩao wa ũlũngalu wa Ngai—kana ala mekaa maũndũ asu maĩle kũkw’a—nĩmekaa maũndũ asu, o na nĩmetĩkĩlanaa na ala mamekaa.
2 Kwoou ndũtonya kwĩtetea, we mũndũ, o na ethĩwa nue ũũ, ethĩwa nũũsilĩla; nũndũ yĩla ũũsilĩla mũndũ ũngĩ, nũkwĩsilĩla we mwene, nĩkwĩthĩwa we ũũsilĩla nĩwĩkaa maũndũ o asu. 2 Na nĩtwĩsĩ kana Ngai asilaa kwosana na ũw’o, yĩla ũkũsilĩla andũ ala mekaa maũndũ asu.
3 We mũndũ, ethĩwa yĩla ũũmasilĩla ala mekaa maũndũ asu we no ũũmeka, wĩsũanĩa ta ũkavonoka ũsilĩlo wa Ngai? 4 Kana wĩvũthĩĩsya wingĩ wa ũseo wa Ngai na kwĩsiĩĩa na wũmĩĩsyo, nĩkwĩthĩwa ndwĩsĩ kana nũndũ wa ũseo wake endaa kũũtongoesya ũvikĩe kwĩlila? 5 Ĩndĩ nũndũ wa wũmũ waku na ngoo yaku ĩte kwenda kwĩlila, wĩĩyiĩa ũthilĩku kwondũ wa mũthenya wa ũthilĩku na wa kũvuanw’a kwa ũsilĩlo mũlũngalu wa Ngai. 6 Na akamũĩva kĩla mũndũ kwosana na mawĩa make: 7 thayũ wa tene na tene kwa ala mamanthaa kũnenevw’a na ndaĩa na maũndũ matanangĩkaa kwa kũmĩĩsya wĩanĩ ũla mũseo; 8 ĩndĩ kwa ala mendete ngananĩo na maleaa kwĩka kwosana na ũla w’o na mekaa maũndũ mate malũngalu, kũkeethĩwa ũthilĩku na ũthatu. 9 Kũkeethĩwa thĩna na woo kwa kĩla mũndũ wĩkaa maũndũ ala mathũku; kwa Ayuti mbee na ĩndĩ kwa Akiliki; 10 ĩndĩ ũnene na ndaĩa na mũuo kwa kĩla mũndũ wĩkaa maũndũ ala maseo, kwa Ayuti mbee na ĩndĩ kwa Akiliki. 11 Nũndũ Ngai nde kyende.
12 Nũndũ onthe ala meekie naĩ vate mĩao makathela vate mĩao; ĩndĩ onthe ala meekie naĩ me na mĩao makasilĩlwa kwĩsĩla mĩao. 13 Nĩkwĩthĩwa ala mew’aa mĩao na matũ ti mo methĩawa alũngalu kwa Ngai, ĩndĩ ala mekaa kwosana na mĩao nĩmo makatalwa kwĩthĩwa alũngalu. 14 Nũndũ yĩla andũ ma mbaĩ ingĩ, ala mate na mĩao meeka kwa mũtuo woo ene ũndũ mĩao ĩkwasya, andũ asu, o na kau mai na mĩao, mo nĩ mĩao kwoo ene. 15 Na mo ene nĩmonanasya kana kĩla kĩ mĩaonĩ nĩkĩandĩkĩtwe ngoonĩ syoo, na wasya woo wa ngoo nũmaumĩasya ũkũsĩ, na kwĩsĩla * mosũanĩo moo ene nĩmasikatawa kana makatetewa. 16 Ũu ũkeekĩka mũthenya ũla Ngai kwĩsĩla Klĩsto Yesũ ũkaumya ũsilĩlo kwondũ wa maũndũ ma kĩmbithĩ ma andũ, kwosana na ũvoo mũseo ũla ngũtavany’a.
17 Na ethĩwa wĩ Mũyuti kwa ĩsyĩtwa na wĩkwatasya mĩao na nũtanĩaa kwĩthĩwa na ngwatanĩo vamwe na Ngai, 18 na nĩwĩsĩ kwenda kwake na nĩwĩtĩkĩlaa maũndũ ala maseo vyũ nũndũ nũmanyĩĩtw’e * kumana na ĩla Mĩao, 19 na nũĩkĩĩĩte kana wĩ mũtongoi wa ilalinda, na kyeni kwa ala me kĩvindunĩ, 20 na mũtai wa ala mate na kĩlĩko, mũmanyĩsya wa syana nini, na nũkwatĩte momanyĩsyo ma vata na ũw’o ũla wĩ nthĩnĩ wa Mĩao— 21 we ũũmanyĩsya mũndũ ũngĩ, nĩkĩ ũte kwĩmanyĩsya we mwene? We ũũtavany’a, ũkyasya, “Ndũkoye,” we nĩwũyaa? 22 We ũkwasya, “Ndũkeke ũlaalai,” we nĩwĩkaa ũlaalai? We ũla ũmenete mĩvw’anano mũno, we nĩwũyaa makalũnĩ? 23 We ũla ũtanĩaa kwĩthĩwa na mĩao, we nũmũvũthasya Ngai kwa kũtũla ĩla Mĩao? 24 Nĩkwĩthĩwa “ĩsyĩtwa ya Ngai nĩyĩumawa nĩ andũ ma mbaĩ ingĩ nũndũ wenyu,” o tondũ kũandĩkĩtwe.
25 Kwa w’o, nzaĩko ĩtonya kũũtethya ethĩwa nũatĩĩaa mĩao; ĩndĩ ethĩwa nũtũlaa mĩao, nzaĩko yaku ti nzaĩko. 26 Ĩndĩ ethĩwa mũndũ ũte mwaĩke nũatĩĩaa maũndũ malũngalu ala Mĩao ĩkwasya eke, akatalwa ta ũla mwaĩke, kana ti w’o? 27 Na mũndũ ũla ũte mwaĩke mwĩĩ, na nũatĩĩaa ĩla Mĩao, nũmũsilĩlaa inyw’ĩ ala mũtũlaa mĩao, o na kau mwĩ nayo yĩ mĩandĩke na mwĩ aĩke. 28 Nũndũ kwĩthĩwa Mũyuti ti ũndũ mũndũ ũkwonekana, na nzaĩko ti ĩla ĩtonya kwoneka, ĩla ya mwĩĩ. 29 Ĩndĩ Mũyuti nĩ ũla ũilye ũu nthĩnĩ, na nzaĩko yake nĩ ĩla ya ngoonĩ kwĩsĩla veva mũtheu na ti kwĩsĩla mĩao mĩandĩke. Na ndaĩa ya mũndũ ũsu yumaa kwa Ngai ĩndĩ ti kwa andũ.
3 Na yu ĩndĩ ve ũseo mwaũ wa kwĩthĩwa Mũyuti, kana nzaĩko ĩtonya kũtethya mũndũ ata? 2 Ve moseo maingĩ. Ũndũ wa mbee, nĩmanengiwe ndeto ntheu ila syaneeniwe nĩ Ngai. 3 Nao nata ĩndĩ ethĩwa amwe mai na mũĩkĩĩo? Kw’o kũlea kwĩthĩwa na mũĩkĩĩo kwoo kũkatuma Ngai ethĩwa ate mũĩkĩĩku? 4 Aiee! Ĩndĩ eka Ngai oneke e wa w’o, o na ethĩwa kĩla mũndũ nĩ mũkengani, o tondũ kũandĩkĩtwe: “Nĩ kana ũĩkĩĩthw’e kwĩthĩwa wĩ mũlũngalu ndetonĩ syaku na ũyĩthĩwa ũtonya kũsinda yĩla ũũsilĩlwa.” 5 Ethĩwa kwĩthĩwa tũte alũngalu kũtumaa ũlũngalu wa Ngai woneka nesa, twĩasya ata ĩndĩ? We Ngai ethĩawa ate mũlũngalu yĩla woonany’a ũthatu wake? (Nĩneena o ta mũndũ.) 6 Vaitonyeka! Na ta kethĩwa nũu, Ngai atonya kũsilĩla nthĩ ata?
7 Ĩndĩ ethĩwa ũvũngũ wakwa ũtumĩte ũw’o wa Ngai woneka nesa, nĩkĩ ngũsilĩlwa ta nĩ mwĩki wa naĩ? 8 Na nĩkĩ tũte kwasya o ũndũ andũ amwe makenganaa makasya kana ithyĩ twaasya, “Ekai twĩke maũndũ mathũku nĩ kana ala maseo moke”? Kũsilĩlwa kwa andũ asu nĩkwosanĩte na ũsili wa katĩ.
9 Kwoou ĩndĩ, ithyĩ twĩ aseo kwĩ ala angĩ? Aiee! Nũndũ o tondũ twaweta Ayuti vamwe na Akiliki me ungu wa naĩ onthe; 10 o tondũ kũandĩkĩtwe: “Vaiĩ mũndũ o na ũmwe mũlũngalu; 11 vaiĩ ũmwe wĩ na ũmanyi o na vanini; vaiĩ ũmwe ũmũmanthaa Ngai. 12 Andũ onthe nĩmeelelũkile, onthe nĩmatw’ĩkĩte vathei; vaiĩ o na ũmwe wĩthĩawa na tei, vayĩingwa o na ũmwe.” 13 “Mĩmeo yoo nĩ mbũa mbingũe; nĩmakenganĩte na nĩmĩ syoo.” “Sumu wa nzoka wĩ ilomonĩ syoo.” 14 “Kanyw’a woo wusũĩte ndeto sya kũumanĩa na nthũku.” 15 “Maaũ moo me mĩtũkĩ kwĩtĩkya nthakame.” 16 “Wanangĩko na thĩna syĩ nzĩanĩ syoo, 17 na mayĩsĩ nzĩa ya mũuo.” 18 “Maimũkĩĩte Ngai methonĩ moo.”
19 Yu nĩtwĩsĩ kana maũndũ onthe ala mawetetwe nĩ Mĩao matavĩtw’e ala me ungu wa Mĩao, nĩ kana kĩla kanyw’a ũvindĩthw’e na nthĩ yonthe yĩthĩwe yaĩlĩte kũsilĩlwa nĩ Ngai. 20 Kwoou, vaiĩ mũndũ * o na ũmwe ũkatalĩlwa ũlũngalu nũndũ wa kwĩka mawĩa ala mĩao ĩwetete, nĩkwĩthĩwa mĩao nĩyo ĩtumaa andũ methĩwa na ũmanyi wa w’o ĩũlũ wa naĩ.
21 Ĩndĩ yu ũlũngalu wa Ngai nũvuanĩtw’e vate mĩao, o tondũ Mĩao na Mavuku ma Athani maumĩtye ũkũsĩ, 22 ĩĩ, ũlũngalu wa Ngai kwĩsĩla mũĩkĩĩo nthĩnĩ wa Yesũ Klĩsto, na ũu nĩ kwa onthe ala me na mũĩkĩĩo. Nũndũ vaiĩ kĩvathũkany’o. 23 Nĩkwĩthĩwa onthe nĩmeekie naĩ na meethĩwa matatonya kũvikĩa ũtheu mũtisu wa Ngai, 24 na nĩ ta mũthĩnzĩo kwoo kũtalĩlwa ũlũngalu nũndũ wa ũseo wake mwingĩ kwĩsĩla kũla kũthaw’a nĩ nthembo ya wovosyo ĩla yaumiw’e nĩ Klĩsto Yesũ. 25 Ngai nĩwamumisye ethĩwe nthembo ya wĩw’anĩthyo kwondũ wa ala me na mũĩkĩĩo nthĩnĩ wa nthakame yake. Ũu weethĩiwe nĩ kana onany’e ũlũngalu wake mwene, nĩkwĩthĩwa Ngai, kwondũ wa wũmĩĩsyo wake, nĩwaekeaa naĩ ila syeekawa ĩvinda ĩvĩtu. 26 Eekie ũu onany’e ũlũngalu wake mwene ĩvindanĩ yĩĩ tũĩ, nĩ kana ethĩwe e mũlũngalu o na yĩla ũkũmũtalĩla ũlũngalu mũndũ ũla wĩ na mũĩkĩĩo nthĩnĩ wa Yesũ.
27 Kwoou kwĩkathĩĩa kũĩ va? Kũi na ũthei. Nĩ kwĩsĩla mwĩao wĩva? Nĩ ũla wa meko? Aiee, ĩndĩ nĩ kwĩsĩla mwĩao wa mũĩkĩĩo. 28 Nũndũ nĩtwĩsĩ kana mũndũ atalĩlawa ũlũngalu nũndũ wa mũĩkĩĩo na ti kwa kwĩka mawĩa ala mĩao ĩwetete. 29 Kana we nĩ Ngai wa Ayuti me oka? We tyo Ngai o na wa andũ ma mbaĩ ingĩ? Ĩĩ, o na wa andũ ma mbaĩ ingĩ. 30 Nĩkwĩthĩwa Ngai nĩ ũmwe, akamatalĩla ũlũngalu andũ aĩke nũndũ wa mũĩkĩĩo woo, o namo ala mate aĩke akamatalĩla ũlũngalu kwĩsĩla mũĩkĩĩo woo. 31 Kwoou ĩndĩ, nĩtũvetete mĩao nũndũ wa mũĩkĩĩo? Aiee! Vandũ va ũu, nĩtũlũlũmĩĩlasya mĩao.
4 Ethĩwa vailye ũu, tũtonya kwasya Avalaamu, ũla nĩwe ũmae waitũ kwa nzĩa ya mwĩĩ, akwatie kyaũ? 2 Kwa ngelekany’o, ta kethĩwa Avalaamu atalĩilwe ũlũngalu nũndũ wa meko, ethĩwa aĩ na kĩtumi kya kwĩkathĩĩa, ĩndĩ ti mbee wa metho ma Ngai. 3 Yo ĩandĩko yaĩtye ata? “Avalaamu aĩ na mũĩkĩĩo nthĩnĩ wa Yeova, na atalĩlwa ũu kwĩthĩwa nĩ ũlũngalu.” 4 Na mũndũ ũla ũtethasya wĩa ĩtuvi yake yĩitalawa ta ũseo mwingĩ, ĩndĩ ta kĩndũ waĩle kũĩvwa. * 5 Kĩvathũkany’o na ũu, mũndũ ũla ũtatethasya wĩa, ĩndĩ ũmũĩkĩĩaa Ũla ũtalĩlaa mũndũ ũtamũkĩaa Ngai kwĩthĩwa e mũlũngalu, mũĩkĩĩo wake ũtalawa kwĩthĩwa nĩ ũlũngalu. 6 O tondũ Ndaviti o nake ũneenete ĩũlũ wa ũtanu wa mũndũ ũla Ngai ũmũtalĩlaa ũlũngalu vate meko, akasya: 7 “Nĩ atanu ala maekeetwe meko moo mathũku na ala naĩ syoo ivw’ĩkĩtwe; * 8 nĩ mũtanu mũndũ ũla Yeova ũtakamũtalĩla naĩ yake nongi.”
9 W’o ũtanu ũsu wĩthĩawa o kwa ala aĩke me oka, kana no wĩthĩawa kwa ala mate aĩke o namo? Nũndũ twaasya: “Mũĩkĩĩo wa Avalaamu watalilwe kwĩthĩwa nĩ ũlũngalu kwake.” 10 Atalĩilwe kwĩthĩwa mũlũngalu ĩndĩĩ? Nĩ e mwaĩke, kana nĩ ate mwaĩke? Nĩ ate mwaĩke. 11 Na nĩwooniw’e ngelekany’o—nayo nĩ nzaĩko—ta ũsiĩlo * wa ũlũngalu kwĩsĩla mũĩkĩĩo ũla waĩ naw’o atambĩte kwaĩkwa, nĩ kana ethĩwe ĩthe wa onthe ala me na mũĩkĩĩo mate aĩke, nĩ kana matalĩlwe ũlũngalu; 12 na ethĩwe ĩthe wa ũsyao mwaĩke, na ti ĩthe wa o ala malũmanasya na nzaĩko, ĩndĩ o na wa ala maatĩĩaa nesa mũĩkĩĩo ũla Avalaamu ĩthe waitũ waĩ naw’o ate mwaĩke.
13 Nĩkwĩthĩwa ti kwĩsĩla mĩao Avalaamu kana ũsyao wake manengiwe watho wa kana akatiĩwa nthĩ, ĩndĩ nĩ kwĩsĩla ũlũngalu ũla wumanaa na mũĩkĩĩo. 14 Nũndũ ethĩwa ala malũmanasya na mĩao nĩmo atiĩwa, mũĩkĩĩo ũtw’ĩkĩte wa mana na ũla watho nĩ mũvete. 15 Kwa w’o ĩla Mĩao ĩetae ũthilĩku, ĩndĩ vala vate mĩao vaiĩ ĩvĩtyo o na yĩmwe.
16 Nĩkyo kĩtumi watho ũsu wookie kwĩsĩla mũĩkĩĩo, nĩ kana wĩthĩwe kwosana na ũseo mwingĩ, na nĩ kana ũla watho ũtonye kwĩthĩwa wa w’o kwa ũsyao wake w’onthe, na ti kwa o ala malũmanasya na ĩla Mĩao ĩndĩ o na kwa ala malũmanasya na mũĩkĩĩo wa Avalaamu, ũla nĩwe ĩthe waitũ ithyonthe. 17 (Ũu nĩ kwosana na ũndũ kũandĩkĩtwe: “Nĩngũnyuvĩte wĩthĩwe ĩthe wa mbaĩ mbingĩ.”) Ũu weekĩkie methonĩ ma Ngai, ũla Avalaamu wamũĩkĩĩĩte, na nĩwe ũthayũũkasya akw’ũ, na ũwetaa maũndũ ala matanamba kwĩkĩka ta mekĩkĩte. * 18 O na kau nĩwavĩtũkĩte kwĩthĩwa na wĩkwatyo, ĩndĩ nũndũ wa wĩkwatyo, aĩ na mũĩkĩĩo kana akeethĩwa ĩthe wa mbaĩ mbingĩ kwosana na ũndũ kwawetetwe: “Ũu nĩw’o ũsyao waku ũkethĩwa wĩana.” 19 O na kau ndaaleela mũĩkĩĩonĩ, oonaa mwĩĩ wake ta mũkw’ũ (nũndũ aĩ na myaka ta 100), o vamwe na kwĩthĩwa Sala ndaĩ atonya kũsyaa. * 20 Ĩndĩ nũndũ wa watho wa Ngai, Avalaamu ndaaĩthĩwa ate na mũĩkĩĩo na kwoou ndaathingithĩka; ĩndĩ nĩweethĩiwe na vinya mũĩkĩĩonĩ, aimũkumya Ngai 21 na ate na nzika o na vanini kana kĩla Ngai wamwathĩte aĩ atonya kũkĩanĩsya. 22 Kwondũ wa ũu “atalĩlwa ũu kwĩthĩwa nĩ ũlũngalu.”
23 Ĩndĩ ndeto “atalĩlwa” ndyaandĩkwa kwondũ wake e weka, 24 ĩndĩ o na kwondũ witũ ala tũkatalĩlwa ũlũngalu, nĩkwĩthĩwa nĩtũmũĩkĩĩĩte We ũla wamũthayũũkisye Yesũ, Mwĩaĩi waitũ. 25 Nĩwanenganiwe kwondũ wa mavĩtyo maitũ na athayũũkw’a nĩ kana tũtalĩlwe ũlũngalu.
5 Kwoou, yu nĩkwĩthĩwa nĩtũtalĩlwe kwĩthĩwa twĩ alũngalu nũndũ wa mũĩkĩĩo, ekai tũtanĩe mũuo * vamwe na Ngai kwĩsĩla Mwĩaĩi waitũ Yesũ Klĩsto, 2 ũla kwĩsĩla mũĩkĩĩo nthĩnĩ wake twĩ na ũthei wa kũkwata ũseo mwingĩ ũla yu tũũtanĩa kwĩthĩwa nthĩnĩ wa w’o, na ekai tũtane * nũndũ twĩ na wĩkwatyo wa kũnenevw’a nĩ Ngai. 3 Na ti ũu w’oka, ĩndĩ ekai tũtane * yĩla twĩ mathĩnanĩ nũndũ nĩtwĩsĩ kana mathĩna nĩmatumaa twĩthĩwa na wũmĩĩsyo; 4 naw’o wũmĩĩsyo nũtumaa twĩtĩkĩlĩka, nakw’o kwĩtĩkĩlĩka nĩkũtumaa twĩthĩwa na wĩkwatyo, 5 na wĩkwatyo ndũsonokasya; nũndũ wendo wa Ngai nĩwusũĩte ngoonĩ sitũ kwĩsĩla veva mũtheu ũla twanengiwe.
6 Nũndũ o na yĩla twaĩ onzu, Klĩsto nĩwakwie kwondũ wa andũ ala matamũkĩaa Ngai, ĩvinda o yĩla yanyuvĩtwe. 7 Nũndũ ve vinya mũndũ o na wĩva kũkw’a kwondũ wa mũndũ mũlũngalu; o na kau nĩvatonyeka mũndũ akeyumya akw’e kwondũ wa mũndũ mũseo. 8 Ĩndĩ Ngai nũtwonetye wendo wake nũndũ yĩla twaĩ eki ma naĩ, Klĩsto nĩwakwie kwondũ witũ. 9 Kwoou, nũndũ nĩtũtalĩlwe kwĩthĩwa twĩ alũngalu kwĩsĩla nthakame yake, tũi na nzika kana kwĩsĩla kwake tũkatangĩĩwa kuma ũthilĩkunĩ. 10 Nũndũ ethĩwa yĩla twaĩ amaitha nĩtweew’ĩthaniw’e na Ngai kwĩsĩla kĩkw’ũ kya Mwana wake, tũi na nzika kana tũkatangĩĩwa kwĩsĩla thayũ wake, nĩkwĩthĩwa yu nĩtwĩw’anĩthĩtw’e na Ngai. 11 Na ti ũu w’oka, ĩndĩ nĩtũtanaa nthĩnĩ wa Ngai kwĩsĩla Mwĩaĩi waitũ Yesũ Klĩsto, ũla kwĩsĩla kwake yu tũkwatĩte wĩw’anĩthyo.
12 Nĩkyo kĩtumi kwĩsĩla mũndũ ũmwe naĩ yalikile ĩũlũ wa nthĩ na kĩkw’ũ kwĩsĩla naĩ, na kwondũ wa ũu, kĩkw’ũ kyavikĩa andũ onthe nĩkwĩthĩwa onthe nĩmeekie naĩ—. 13 Nũndũ naĩ yaĩ kũũ nthĩ ĩla Mĩao ĩtanamba kwĩthĩwa vo, ĩndĩ vaiĩ mũndũ ũtonya kũtalĩlwa naĩ vate mĩao. 14 Ĩndĩ kĩkw’ũ nĩkyasumbĩkie ta mũsumbĩ kuma ĩvinda ya Atamu nginya ĩvinda ya Mose, o na ĩũlũ wa ala mataaĩka naĩ ĩvw’anene na ĩvĩtyo ya Atamu, ũla waĩ na mũvw’ano wa ũla waĩ oke.
15 Ĩndĩ ũla mũthĩnzĩo ndũvw’anene na ĩvĩtyo. Nũndũ ethĩwa kwĩsĩla ĩvĩtyo ya mũndũ ũmwe aingĩ nĩmakwie, vaiĩ nzika kana ũseo mwingĩ wa Ngai na mũthĩnzĩo wake ũla wanenganiwe kwĩsĩla ũseo mwingĩ wa mũndũ ũmwe, Yesũ Klĩsto, ũkaetee andũ aingĩ moathimo maingĩ! * 16 O na ĩngĩ, maũndũ ala maetetwe nĩ ũla mũthĩnzĩo me kĩvathũkany’o na maũndũ ala maumanie na naĩ ya ũla mũndũ ũmwe. Nũndũ ũsilĩlo ĩtina wa ĩvĩtyo yĩmwe waĩ andũ onthe kũtalĩlwa mavĩtyo, ĩndĩ mũthĩnzĩo ĩtina wa mavĩtyo maingĩ waĩ kũtalĩlwa ũlũngalu. 17 Nũndũ ethĩwa kwĩsĩla ĩvĩtyo ya mũndũ ũmwe kĩkw’ũ kyasumbĩkie ta mũsumbĩ kwĩsĩla mũndũ ũsu, tũi na nzika kana ala makakwata wingĩ wa ũseo mwingĩ na wa ũla mũthĩnzĩo wa ũlũngalu, makasumbĩka me asumbĩ na me thayũ kwĩsĩla mũndũ ũmwe, Yesũ Klĩsto!
18 Kwoou, o tondũ kwĩsĩla ĩvĩtyo yĩmwe andũ ma mĩthemba yonthe matalĩlwe kwĩthĩwa na mavĩtyo, o ta ũu kwĩsĩla ũndũ ũmwe wa ũlũngalu ũla weekiwe, andũ ma mĩthemba yonthe nĩmatalawa kwĩthĩwa alũngalu nĩ kana makwate thayũ. 19 Nũndũ o tondũ kwĩsĩla kũlea kwĩw’a kwa mũndũ ũmwe aingĩ matalĩlwe kwĩthĩwa eki ma naĩ, o ta ũu kwĩsĩla wĩwi wa mũndũ ũmwe aingĩ makatalĩlwa kwĩthĩwa alũngalu. 20 Na ĩtina ĩla Mĩao nĩyookie nĩ kana mavĩtyo matonye kwongeleka. Ĩndĩ yĩla naĩ yongelekile, naw’o ũseo mwingĩ wongeleka mũno. 21 Nĩ kana kwĩthĩwe ata? Nĩ kana wĩthĩe o tondũ naĩ yasumbĩkie ta mũsumbĩ o vamwe na kĩkw’ũ, o ta ũu ũseo mwingĩ wĩthĩwe ũtonya kũsumbĩka ta mũsumbĩ kwĩsĩla ũlũngalu ũla ũtumaa tũkwata thayũ wa tene na tene kwĩsĩla Yesũ Klĩsto, Mwĩaĩi waitũ.
6 Yu twĩasya ata? Nĩtwaĩle kũendeea kwĩkala naĩnĩ nĩ kana ũseo mwingĩ wongeleke? 2 Aiee! Nũndũ nĩtwakwie maũndũnĩ ma naĩ, tũtonya kũendeea kwĩkala naĩnĩ ata? 3 Kana mũyĩsĩ ithyonthe ala twavatisiwe nthĩnĩ wa Klĩsto Yesũ twavatisiwe nthĩnĩ wa kĩkw’ũ kyake? 4 Kwoou, twathikiwe nake kwĩsĩla ũvatiso witũ nthĩnĩ wa kĩkw’ũ kyake, nĩ kana o ũndũ Klĩsto wathayũũkiw’e kwĩsĩla ũnene wa Asa wake, o naitũ twĩkale thayũ mweũ. 5 Ethĩwa twĩ ngwatanĩo vamwe nake mũvw’anonĩ wa kĩkw’ũ kyake, tũkeethĩwa twĩ ngwatanĩo vamwe nake mũvw’anonĩ wa ũthayũũkyo wake. 6 Nũndũ nĩtwĩsĩ kana mwĩkalĩle witũ wa tene nĩwaathĩĩiwe mũtĩnĩ vamwe nake nĩ kana mwĩĩ witũ wĩ na naĩ wĩthĩwe ũte na vinya, na nĩ kana tũikaendeee kwĩthĩwa twĩ ngombo sya naĩ. 7 Nũndũ mũndũ ũla wakw’a ethĩawa athaĩtw’e kuma naĩnĩ yake. *
8 O na ĩngĩ, ethĩwa nĩtwakwie vamwe na Klĩsto, nũtũĩkĩĩĩte kana tũkekala thayũ vamwe nake. 9 Nũndũ nĩtwĩsĩ kana Klĩsto ndakw’a ĩngĩ, nĩkwĩthĩwa yu nĩmũthayũũkye, na kĩkw’ũ kĩimũsumbĩkĩte. 10 Nũndũ kĩkw’ũ kĩla wakwie, akwie ĩvinda o yĩmwe nĩ kana avete naĩ, atakakw’a ĩngĩ, ĩndĩ thayũ ũla we wĩkalaa, ekalaa kwondũ wa Ngai. 11 O ta ũu, ĩtalei ta mwĩ akw’ũ maũndũnĩ ma naĩ ĩndĩ ta mwĩ thayũ kwondũ wa Ngai kwĩsĩla Klĩsto Yesũ.
12 Kwoou, mũikaeke naĩ ĩendeee kũsumbĩka ta mũsumbĩ nthĩnĩ wa mĩĩ yenyu ĩla ĩtonya kũkw’a kwa kwĩthĩwa mwĩ ewi kwa mawendi ma mwĩĩ. 13 O na mũikaendeee kũnengane mĩĩ * yenyu yĩthĩwe mĩio ya kaũ kwondũ wa ũla ũte ũlũngalu, ĩndĩ mwĩnengane kwa Ngai ta ala me thayũ kuma kĩkw’ũnĩ, na mũinengane mĩĩ * yenyu kwa Ngai ta mĩio ya kaũ kwondũ wa ũlũngalu. 14 Nũndũ naĩ ndyaĩle kũmũsumbĩka, nĩkwĩthĩwa inyw’ĩ mũi ungu wa mĩao ĩndĩ mwĩ ungu wa ũseo mwingĩ.
15 Kwoou yu twĩasya ata? Yo nĩtwaĩle kwĩka naĩ nũndũ twĩ ungu wa ũseo mwingĩ ĩndĩ tũi ungu wa mĩao? Aiee! 16 Nũndũ mũtesĩ kana mweeyumya kwa mũndũ o na wĩva mwĩthĩwe mwĩ ngombo mbĩwi, mwĩthĩawa ngombo sya ũsu mwĩw’aa? No mwĩthĩwe ngombo sya naĩ ĩla ĩetae kĩkw’ũ kana sya wĩwi ũla ũetae ũlũngalu. 17 Ĩndĩ nĩngũmũtũngĩa Ngai mũvea nũndũ o na kau mwaĩ ngombo sya naĩ, nĩmweewie kuma ngoonĩ momanyĩsyo ala mwanengiwe. 18 Ĩĩ, na nũndũ nĩmwathaiw’e kuma naĩnĩ, nĩmwatw’ĩkie ngombo sya ũlũngalu. 19 Nĩneena o ta mũndũ nũndũ wa wonzu wa mwĩĩ wenyu; nũndũ o tondũ mwanenganie mamutha menyu methĩwe ngombo sya ũvuku na ũtũli wa mĩao ũla watumaa mũtũla mĩao, o ta ũu nenganai mamutha menyu methĩwe ngombo sya ũlũngalu ũla ũetae ũtheu. 20 Nũndũ yĩla mwaĩ ngombo sya naĩ, mwaĩ athasye maũndũnĩ ma ũlũngalu.
21 Nĩ matunda meva ala mwasyaaa ĩvindanĩ yĩu? Nĩ maũndũ ala yu mũmew’ĩaa nthoni. Nũndũ mũminũkĩlyo wa maũndũ asu nĩ kĩkw’ũ. 22 Ĩndĩ nũndũ yu mwĩ athasye kuma naĩnĩ na mũkatw’ĩka ngombo sya Ngai, mũsyaaa matunda kwa nzĩa ya ũtheu, na mũminũkĩlyo nĩ thayũ wa tene na tene. 23 Nũndũ ĩtuvi ya naĩ nĩ kĩkw’ũ, ĩndĩ mũthĩnzĩo ũla Ngai ũnenganae nĩ thayũ wa tene na tene kwĩsĩla Klĩsto Yesũ, Mwĩaĩi waitũ.
7 Nĩvatonyeka, ana-a-asa, mũkethĩwa mũtesĩ, (nũndũ nĩneena na ala mesĩ mĩao) kana Mĩao ĩsumbĩkaa mũndũ ĩvindanĩ yĩla wĩ thayũ? 2 Kwa ngelekany’o, mũndũ mũka ũla mũtwae nĩwovetwe nĩ mĩao kwa mũũme wake yĩla mũũme wĩ thayũ; ĩndĩ ethĩwa mũũme nĩwakw’a, ethĩawa e mũthasye kuma mwĩaonĩ wa mũũme wake. 3 Kwoou ĩndĩ, yĩla mũũme wake wĩ thayũ, mũndũ mũka ũsu no etwe kĩlaalai ethĩwa akatwawa nĩ mũndũũme ũngĩ. Ĩndĩ ethĩwa mũũme nĩwakw’a, nĩ mũthasye kuma mwĩaonĩ wake, na ndethĩwa e kĩlaalai akatwawa nĩ mũndũũme ũngĩ.
4 Kwoou ana-a-asa, o nenyu nĩmwatwiwe akw’ũ kwa ĩla Mĩao kwĩsĩla mwĩĩ wa Klĩsto, nĩ kana mũtw’ĩke ma mũndũ ũngĩ, ũla wathayũũkiw’e nĩ kana tũtonye kũmũsyaĩa Ngai ũsyao. 5 Nũndũ yĩla twekalaa kwosana na mwĩĩ, mawendi maitũ mathũku ala maamũkiw’e nĩ ĩla Mĩao nĩmatethasya wĩa mĩĩnĩ yitũ * nĩ kana masyae ũsyao kwondũ wa kĩkw’ũ. 6 Ĩndĩ yu nĩtũthaĩtw’e kuma ĩla Mĩaonĩ, nũndũ nĩtwakwie maũndũnĩ ma kĩu kyatwovete, nĩ kana tũtonye kwĩthĩwa twĩ ngombo kwa nzĩa nzaũ kwĩsĩla veva, na ti kwa nzĩa ĩla ngũũ ya mĩao mĩandĩke.
7 Yu twĩasya ata ĩndĩ? Yo Mĩao nĩ naĩ? Aiee! Kwa w’o, ndyaĩ ndonya kũmanya naĩ nĩ kyaũ ta kethĩwa vayaĩ Mĩao. Kwa ngelekany’o, ndyĩthĩwa naamanya ĩtomo nĩ kyaũ ta kethĩwa Mĩao ndyaĩtye: “Ndũkethĩwe na ĩtomo.” 8 Ĩndĩ yĩla naĩ yakwatie mwanya nũndũ wa mwĩao ũsu, nĩyatumie nĩmanya nĩ na kĩla mũthemba wa ĩtomo, nũndũ vate mĩao naĩ yaĩ ngw’ũ. 9 Kwa w’o, ve ĩvinda naĩ thayũ mĩao ĩte vo. Ĩndĩ yĩla mĩao yavikie, naĩ yeethĩwa thayũ ĩngĩ, ĩndĩ nyie nakw’a. 10 Na ĩla mĩao yaĩ ĩete thayũ, ĩsu neethĩie kana yaetie kĩkw’ũ. 11 Na nũndũ naĩ nĩyakwatie mwanya mĩaonĩ ĩsu, nĩyanzesengie na yambũaa kwĩsĩla ĩ mĩao. 12 Mĩao yo mbene nĩ mĩtheu, na maũndũ ala ĩwetete nĩ matheu, nĩ malũngalu, na nĩ maseo.
13 Kwoou, kyo kĩla kĩseo nĩkyatumie nĩkw’a? Aiee! Ĩndĩ naĩ nĩyeekie ũu, nĩ kana vatonye kwonanw’a kana naĩ nĩyo yatumie nĩkw’a kwĩsĩla kĩla kĩseo, nĩ kana kwĩsĩla mĩao naĩ ĩtonye kwĩthĩwa yĩ nthũku mũno. 14 Nũndũ nĩtwĩsĩ kana Mĩao nĩ ya kĩ-veva, ĩndĩ nyie nĩ wa kĩ-mwĩĩ na nthooetw’e naĩnĩ. 15 Nĩkwĩthĩwa ndieleawa nĩ kĩla ngwĩka. Nũndũ ndyĩkaa kĩla ngwenda, ĩndĩ nĩkaa kĩla nĩmenete. 16 Ĩndĩ ethĩwa nĩkaa kĩla ndekwenda, nĩngwĩtĩkĩla kana Mĩao nĩ mĩseo. 17 Ĩndĩ yu tinyie nĩkaa ũu, ĩndĩ nĩ naĩ ĩla yĩkalaa nthĩnĩ wakwa. 18 Nũndũ nĩnĩsĩ kana nthĩnĩ wakwa, na ũu nĩ kwasya, nthĩnĩ wa mwĩĩ wakwa, vaitwĩe ũseo o na ũmwe; nũndũ nĩ na wendi wa kwĩka ũla ũseo ĩndĩ ndi na ũtonyi wa kũwĩka. 19 Nĩkwĩthĩwa ũseo ũla nendaa kwĩka ndiwĩkaa, ĩndĩ ũthũku ũla ndendaa kwĩka nĩw’o nĩkaa. 20 Kwoou ethĩwa nĩkaa kĩla ndekwenda, tinyie nĩkaa ũu, ĩndĩ nĩ naĩ ĩla yĩkalaa nthĩnĩ wakwa.
21 Kwoou nyie nĩnonete mwĩao ũũ nthĩnĩ wakwa: Yĩla ngwenda kwĩka ũla ũseo, ũla ũthũku wĩthĩawa vamwe nakwa. 22 Nĩndanĩaa mũno mĩao ya Ngai kwosana na ũndũ nĩilye nthĩnĩ wakwa, 23 ĩndĩ nĩona mwĩao ũngĩ mwĩĩnĩ wakwa * ũla ũkitaa na mwĩao ũla wĩ kĩlĩkonĩ kyakwa na kũtuma nĩthĩwa nĩ ngombo ya naĩ ĩla yĩ nthĩnĩ wa mwĩĩ wakwa. * 24 Nyie nĩ mũndũ mũthĩni! Nũũ ũkambonokya kuma mwĩĩnĩ ũũ ũũtuma nĩkwatwa nĩ kĩkw’ũ kĩĩ? 25 Nĩmũtũngĩa Ngai mũvea kwĩsĩla Yesũ Klĩsto, Mwĩaĩi waitũ! Kwoou ĩndĩ, kĩlĩkonĩ kyakwa nyie nĩ ngombo ya mĩao ya Ngai, ĩndĩ mwĩĩnĩ nĩ ngombo ya mwĩao wa naĩ.
8 Kwoou ala me ngwatanĩo vamwe na Klĩsto Yesũ maitalĩlawa mavĩtyo. 2 Nũndũ mwĩao wa veva ũla ũnenganae thayũ kwĩsĩla Klĩsto Yesũ nũmũthaĩtye kuma mwĩaonĩ wa naĩ na kĩkw’ũ. 3 Ũndũ ũla Mĩao ĩtaĩ ĩtonya kwĩka nĩkwĩthĩwa yaĩ myonzu nũndũ wa mwĩĩ, Ngai nĩwawĩkie kwa kũtũma Mwana wake e na mũvw’ano wa mwĩĩ wĩ na naĩ nĩ kana amine naĩ, na kwoou amĩsilĩla nthĩnĩ wa mwĩĩ, 4 nĩ kana motw’ĩo malũngalu ma ĩla Mĩao matonye kwĩanĩw’a nthĩnĩ witũ ala tũendaa kwosana na veva na ti kwosana na mwĩĩ. 5 Nũndũ ala mekalaa kwosana na mwĩĩ masũanĩaa maũndũ ma mwĩĩ, ĩndĩ ala mekalaa kwosana na veva masũanĩaa maũndũ ma veva. 6 Nĩkwĩthĩwa kũendeea kũsũanĩa maũndũ ma mwĩĩ kũetae kĩkw’ũ, ĩndĩ kũendeea kũsũanĩa maũndũ ma veva kũetae thayũ na mũuo; 7 nũndũ kũendeea kũsũanĩa maũndũ ma mwĩĩ kũetae ũmaitha na Ngai, nĩkwĩthĩwa mwĩĩ ndwĩnyivĩasya mĩao ya Ngai, o na ndũtonya kwĩka ũu. 8 Kwoou ala mekalaa kwosana na mwĩĩ maitonya kũmwendeesya Ngai.
9 Ĩndĩ mwĩkalaa kwosana na veva na ti kwosana na mwĩĩ ethĩwa kwa w’o veva wa Ngai wĩkalaa nthĩnĩ wenyu. Ĩndĩ ethĩwa mũndũ o na wĩva nde na veva wa Klĩsto, mũndũ ũsu ti wake. 10 Ĩndĩ ethĩwa Klĩsto e ngwatanĩo vamwe nenyu, mwĩĩ nĩ mũkw’ũ nũndũ wa naĩ, ĩndĩ veva wĩ thayũ nũndũ wa ũlũngalu. 11 Kwoou ethĩwa veva wa ũla wamũthayũũkisye Yesũ wĩkalaa nthĩnĩ wenyu, ũsu wamũthayũũkisye Klĩsto Yesũ akatuma mĩĩ yenyu ĩla ĩtonya kũkw’a yĩthĩwa thayũ kwĩsĩla veva ũsu wake ũla wĩkalaa nthĩnĩ wenyu.
12 Kwoou ana-a-asa, ve ũndũ mũna ũla no nginya twĩke, naw’o ti kwĩkala kwosana na mwĩĩ; 13 nũndũ mwekala kwosana na mwĩĩ, vate nzika mũkakw’a; ĩndĩ mwoaa mawĩa ma mwĩĩ kwĩsĩla veva mũkekala thayũ. 14 Nĩkwĩthĩwa onthe ala matongoeaw’a nĩ veva wa Ngai kwa w’o nĩ ana ma Ngai. 15 Nĩkwĩthĩwa mũyaakwata veva wa ũkombo ũla ũtonya kũete wia ĩngĩ, ĩndĩ mwakwatie veva wa kũtuwa ana, na kwĩsĩla veva ũsu nĩtwĩtanaa na wasya mũnene: “Abba, * Asa!” 16 Veva w’o mwene nĩwumasya ũkũsĩ vamwe na veva witũ kana twĩ syana sya Ngai. 17 Ethĩwa ĩndĩ twĩ syana, twĩ atiĩwa—ĩĩ, atiĩwa ma Ngai, ĩndĩ atiĩwa vamwe na Klĩsto—ethĩwa tũkathĩna vamwe nake nĩ kana twĩthĩwe tũtonya kũkumw’a vamwe nake.
18 Nũndũ nĩona kana mathĩna ma ĩvinda yĩĩ ti kĩndũ namaelekany’a na ũtheu mũtisu ũla wĩvuanw’a kwĩsĩla kwitũ. 19 Nĩkwĩthĩwa syũmbe nĩsyeteele na mea maingĩ kũvuanw’a kwa ana ma Ngai. 20 Nũndũ syũmbe nĩsyatw’ĩkĩthiw’e vathei, ti kwa ngenda yasyo, ĩndĩ kwĩsĩla ũla weekie ũu, nĩkwĩthĩwa ve wĩkwatyo 21 kana syũmbe syonthe ikathaw’a syume ũkombonĩ wa wanangĩko na iikwata ũthasyo wa ũtheu mũtisu wa kwĩthĩwa syana sya Ngai. 22 Nũndũ nĩtwĩsĩ kana syũmbe syonthe nilumaa vamwe na kwĩthĩwa na woo vamwe kũvika o na yu. 23 Na ti ũu w’oka, ĩndĩ o naitũ ala twĩ na ũsyao wa mbee, naw’o nĩ veva, ĩĩ, o naitũ nĩtũlumaa nthĩnĩ witũ o tũendeee kweteela na mea kũtuwa ana, kwa kũthaw’a kuma mĩĩnĩ yitũ kwĩsĩla wovosyo. 24 Nĩkwĩthĩwa nĩtwatangĩĩiwe wĩkwatyonĩ ũsu; ĩndĩ wĩkwatyo ũla wonekaa ti wĩkwatyo, nũndũ yĩla mũndũ woona kĩndũ, we nũendeeaa kũkyeteela e na wĩkwatyo? 25 Ĩndĩ ethĩwa twĩkwatasya kĩla tũtene, tũendeeaa kũkyeteela na mea na wũmĩĩsyo.
26 O ta ũu, veva naw’o nũtũtetheeasya wonzunĩ witũ; nũndũ thĩna nĩ kana tũyĩsĩ maũndũ ala twaĩle kũvoya yĩla twĩ na vata wa kũvoya, ĩndĩ veva w’o mbene nĩwĩsũvanaa kwondũ witũ yĩla tũũluma tũteũweta * kĩndũ. 27 Ĩndĩ ũla ũsiasya ngoo nĩwĩsĩ ũndũ ũ veva ũkwasya, nũndũ veva ũsu wĩsũvanaa kwosana na kwenda kwa Ngai kwondũ wa ala atheu.
28 Nĩtwĩsĩ kana Ngai nũtumaa mawĩa make onthe methĩwa na ngwatanĩo nĩ kana kwĩthĩwe moseo kwa ala mamwendete, ala meetiwe kwosana na kĩeleelo kyake; 29 nũndũ ala weetĩkĩlile mbee nĩwavangie kuma tene kana makeethĩwa mavw’anene na Mwana wake, nĩ kana ethĩwe mũsyawa wa mbee katĩ wa ana-a-asa aingĩ. 30 O na ĩngĩ, asu wamavangĩie ũu kuma tene nomo weetie; namo ala weetie nomo wamatalile kwĩthĩwa alũngalu. Na mũthya, ala wamatalile kwĩthĩwa alũngalu nomo wamakumisye.
31 Yu ĩndĩ twĩasya ata ĩũlũ wa maũndũ asu? Ethĩwa Ngai e ngalĩ ĩla yitũ, nũũ ũtonya kũtwĩka ũndũ? 32 Na nũndũ o na Ngai ndaasiĩĩa Mwana wake ĩndĩ nĩwamũnenganie kwondũ witũ ithyonthe, we na Mwana wake matonya ata kũlea kũtũnenga kwa ũtanu syĩndũ ila ingĩ syonthe? 33 Nũũ ũla wĩsikata ala manyuvĩtwe nĩ Ngai? Ngai nĩwe ũmatalĩlaa kwĩthĩwa alũngalu. 34 Nũũ wĩmatw’ĩĩa mavĩtyo? Klĩsto Yesũ nĩwe wakwie, ĩĩ, o na eka ũu, nĩwe wathayũũkiw’e, na e kw’okonĩ kwa aũme kwa Ngai, na nĩwĩsũvanaa kwondũ witũ.
35 Nĩ kyaũ kĩtonya kũtũvathana na wendo wa Klĩsto? Nĩ thĩna, kana woo, kana monyamao, kana nzaa, kana ndw’ĩkĩwa, kana mũisyo, kana ũvyũ? 36 O tondũ kũandĩkĩtwe: “Kwondũ waku tũaawa mũthenya w’onthe; tũtalawa ta malondu ma kũthĩnzwa.” 37 Ĩndĩ, maũndũnĩ asu onthe nĩtũsindaa vyũ kwĩsĩla ũla watwendie. 38 Nũndũ nĩnĩsĩ nesa kana o na kĩkw’ũ, kana thayũ, kana alaĩka, kana silikalĩ, kana maũndũ ala me kw’o yu, kana ala makoka, kana mokũmũ, 39 kana ũtũlu, kana ũliku, kana syĩndũ ila syoombiwe, vaiĩ kĩndũ kĩtonya kũtũvathana na wendo wa Ngai ũla wĩ nthĩnĩ wa Klĩsto Yesũ, Mwĩaĩi waitũ.
9 Nĩneena w’o nthĩnĩ wa Klĩsto; ndiũneena ũvũngũ, o tondũ wasya wakwa wa ngoo ũũkũsĩĩa vamwe nakwa nthĩnĩ wa veva mũtheu, 2 kana nĩ na kyeva kingĩ na woo ũteũthela ngoonĩ yakwa. 3 O na nenda nyie mwene nĩthĩwe nĩvathanĩtw’e na Klĩsto ta mũndũ mũumanĩe kwondũ wa ana-a-asa makwa, ala nĩ andũ ma mbaĩ yakwa kwa nzĩa ya mwĩĩ, 4 namo nĩ Aisilaeli. Asu nĩmo Ngai wamatw’ĩte ana na akamanenevya, na akatianĩa motianĩo namo, na akamanenga Mĩao, na ũthũkũmi mũtheu, na mawatho. 5 Namo nĩ nzyawa ya aa-ũmae maitũ ala Klĩsto waumie ũsyaonĩ woo kwa nzĩa ya mwĩĩ. Ngai ũla wĩ ĩũlũ wa onthe nataĩwe tene na tene. Ameni.
6 Ĩndĩ ũu ti kwasya kana ndeto ya Ngai ndyaaĩanĩa. Nũndũ ti onthe ala maumanĩte na Isilaeli ne “Isilaeli.” 7 O na kau mo nĩ ũsyao wa Avalaamu, ti onthe matalawa kwĩthĩwa syana syake; ĩndĩ nĩkũandĩkĩtwe, “Ũla ũketwa ũsyao waku ũkeethĩwa kwĩsĩla Isaka.” 8 Ũu nĩ kwasya kana syana ila syumanĩte na Avalaamu ti syo syana sya Ngai, ĩndĩ syana sya watho nĩsyo italawa kwĩthĩwa ũla ũsyao. 9 Nũndũ ndeto ya watho yaĩtye ũũ: “Ĩvindanĩ ta yĩĩ ngooka, na Sala akeethĩwa na mwana.” 10 Na ti ũu wĩ w’oka, ĩndĩ o na ĩvinda yĩla Leveka waitavie mavatha ma mũndũũme ũmwe, nake nĩ Isaka ũmae waitũ; 11 nũndũ matanamba kũsyawa na matanamba kwĩka ũndũ o na ũmwe mũseo kana mũthũku, nĩ kana kĩeleelo kya Ngai ĩũlũ wa kũnyuva andũ kĩthĩwe ti kwondũ wa meko ĩndĩ kwondũ wake Ũla ũmetaa, 12 Leveka eeiwe atĩĩ: “Ũla mũkũũ akeethĩwa ngombo ya ũla mũnini.” 13 O tondũ kũandĩkĩtwe: “Nĩnamwendie Yakovo, ĩndĩ Esau nĩnamũmenie.”
14 Twĩasya ata ĩndĩ? We Ngai nĩwĩkaa meko mate ma ũlũngalu? Aiee! 15 Nũndũ amwĩie Mose atĩĩ: “Ngamwĩw’ĩa tei o ũla ngamwĩw’ĩa tei, na ngamwĩw’ĩa ĩnee o ũla ngamwĩw’ĩa ĩnee.” 16 Kwoou ĩndĩ, ũnyuvi wa Ngai ti kwondũ wa wendi wa mũndũ kana kĩthito kyake, ĩndĩ nĩ kwondũ wa Ngai ũla wĩ tei. 17 Nũndũ ĩandĩko yĩmwĩĩte Valao atĩĩ: “Kwondũ wa kĩtumi kĩĩ nĩnakũekie ũendeee kwĩthĩwa vo: nĩ kana kwĩsĩla kwaku nonany’e vinya wakwa, na nĩ kana ĩsyĩtwa yakwa yĩtavanw’e nthĩ yonthe.” 18 Kwondũ wa ũu, nũmwĩw’ĩaa tei o ũla ũkwenda kũmwĩw’ĩa tei, ĩndĩ mũndũ o na wĩva ũla Ngai ũkwenda kũmũeka omye ngoo nũmũekaa omye ngoo.
19 Kwoou mũkangũlya atĩĩ: “Nĩkĩ o na yu Ngai wonaa mavĩtyo? We nũũ ũtonya kũleana na kwenda kwake?” 20 Ĩndĩ we nue ũũ, we mũndũ, wĩthĩwe ũimũsũngĩa Ngai? Kyo kĩndũ kĩla kyũmbĩtwe nĩkĩtonya kũmwĩa ũla ũkyũmbĩte: “Wambũmbie nĩilye ũũ nĩkĩ?” 21 Aĩ kyaũ? We mũmbi wa syĩndũ sya yũmba nde na ũkũmũ ĩũlũ wa yũmba wa kũseũvya mũio wa kũtũmĩwa maũndũnĩ ma ndaĩa na ũngĩ ũte wa kũtũmĩwa maũndũnĩ ma ndaĩa, aitũmĩa yũmba o yĩu? 22 Nata ĩndĩ ethĩwa Ngai aĩ na wendi wa kwonany’a ũthilĩku wake na kũtuma vinya wake ũmanyĩka, na nĩwoomĩĩisye ĩvinda yĩasa mĩio ya ũthilĩku ĩla yaaĩle kwanangwa? 23 Nao nata ethĩwa ũu weekĩkie nĩ kana ũthwii wa ũnene wake ĩũlũ wa mĩio ya tei ũmanyĩke, ĩla waseũvisye kuma tene kwondũ wa ũtheu mũtisu, 24 nayo nĩ ithyĩ ala weetie kuma katĩ wa Ayuti na katĩ wa andũ ma mbaĩ ingĩ? 25 Na no tondũ waĩtye ĩvukunĩ ya Osea: “Ala mate andũ makwa ngameta ‘andũ makwa,’ na mũndũ mũka ũla ũtaaendwa ngamwĩta ‘mwendwa’; 26 na kũla meeiwe, ‘Inyw’ĩ mũi andũ makwa,’ kũu makeetwa ‘ana ma Ngai ũla wĩ thayũ.’”
27 O na ĩngĩ, Isaia aneenete na wasya mũnene ĩũlũ wa Isilaeli, akyasya: “O na kau ũtalo wa ana ma Isilaeli nũtonya kwĩthĩwa ta kĩthangathĩ kya ũkanga, no ala metiala makatangĩĩwa. 28 Nũndũ Yeova akatw’a sila ĩũlũ wa nthĩ, na akaũmina na akeeka ũu na mĩtũkĩ.” 29 O na ĩngĩ, o tondũ Isaia wathanie: “Ta kethĩwa Yeova wa nguthu ndaatialya ũsyao kwondũ witũ, twĩthĩwa twatw’ĩkie ta Sotomo, na twĩthĩwa twavw’ananie na Ngomola.”
30 Kwoou twĩasya ata ĩndĩ? O na kau andũ ma mbaĩ ingĩ mayaatĩĩaa ũlũngalu, nĩmakwatie ũlũngalu, ũlũngalu ũla wumanaa na mũĩkĩĩo; 31 ĩndĩ o na kau Aisilaeli nĩmatataa kũatĩĩa mĩao ya ũlũngalu, mayaamĩkwata vyũ. 32 Nũndũ wa kĩtumi kĩva? Nĩkwĩthĩwa mamĩatĩĩaa kwa nzĩa ya meko, ĩndĩ ti kwa nzĩa ya mũĩkĩĩo. Nĩmalulutĩkilw’e nĩ “ĩvia ya kũlulutĩkya”; 33 o tondũ kũandĩkĩtwe: “Sisya! Nĩngwia Saioni ĩvia ya kũlulutĩkya, na ĩvia ĩnene ya kũtulya, ĩndĩ ũla ũkayĩĩkĩĩa ndakasonoka.”
10 Ana-a-asa, kwenda kwa ngoo yakwa na kwĩsũvana kwakwa kwa Ngai nĩ kwondũ wa kũtangĩĩwa kwoo. 2 Nũndũ nĩngũkũsĩĩa ĩũlũ woo kana me na kĩthito kwondũ wa Ngai, ĩndĩ ti kwosana na ũmanyi wa w’o. 3 Na nũndũ wa kũlea kũmanya ũlũngalu wa Ngai, na vandũ va ũu mamantha kwĩyiĩa ũlũngalu woo ene, mo mayaaĩnyivĩsya ũlũngalu wa Ngai. 4 Nĩkwĩthĩwa Klĩsto nĩwe mũthya wa ĩla Mĩao, nĩ kana kĩla mũndũ wĩthĩawa na mũĩkĩĩo atonye kwĩthĩwa e mũlũngalu.
5 Nũndũ Mose aandĩkĩte ũũ ĩũlũ wa ũlũngalu ũla umanaa na Mĩao: “Mũndũ ũla wĩkaa maũndũ aa akekala thayũ nũndũ wamo.” 6 Ĩndĩ ũlũngalu ũla umanaa na mũĩkĩĩo waĩtye ũũ: “Ndũkasye ngoonĩ yaku, ‘Nũũ ũla ũkambata ĩtunĩ?’ na ũu nĩ kwasya, akamũtheesye Klĩsto, 7 kana, ‘Nũũ ũla ũkatheea ĩimanĩ yĩte kĩtulu?’ * na ũu nĩ kwasya, akamwambatye Klĩsto kuma kĩkw’ũnĩ.” 8 Ĩndĩ ĩandĩko yaĩtye ata? “Ndeto yĩ vakuvĩ naku, kanyw’anĩ waku mwene na ngoonĩ yaku mwene”; nayo nĩ “ndeto” ya mũĩkĩĩo ĩla tũũtavany’a. 9 Nũndũ ethĩwa nũũtavany’a ũtheinĩ na kanyw’a waku kana Yesũ nĩ Mwĩaĩi, na wĩ na mũĩkĩĩo ngoonĩ yaku kana Ngai nĩwamũthayũũkisye, ũkatangĩĩwa. 10 Nũndũ mũndũ nũĩkĩĩaa na ngoo kwondũ wa ũlũngalu, ĩndĩ kwĩsĩla kanyw’a nũtavanasya ũtheinĩ kwondũ wa ũtangĩĩo.
11 Nũndũ ĩandĩko yaĩtye: “Vaiĩ ũmwe ũla ũmũĩkĩĩaa ũkasonoka.” 12 Nĩkwĩthĩwa vaiĩ kĩvathũkany’o katĩ wa Mũyuti na Mũkiliki. Ve Mwĩaĩi o ũmwe ĩũlũ wa onthe, nake nĩ mũthwii * kwa onthe ala mamwĩkaĩlaa. 13 Nũndũ “kĩla mũndũ wĩkaĩlaa ĩsyĩtwa ya Yeova akatangĩĩwa.” 14 Ĩndĩ, makamwĩkaĩla ata ethĩwa maimũĩkĩĩĩte? Na makamũĩkĩĩa ata ũla matamwĩw’ĩte? Na makamwĩw’a ata vate mũndũ ũkũtavany’a? 15 Na makatavany’a ata mate atũme? O tondũ kũandĩkĩtwe: “Nĩ maseo ta kĩ maaũ ma ala matavanasya ũvoo mũseo wa maũndũ maseo!”
16 O na ũu wĩ o vo, ti onthe maaĩthĩwa me ewi kwa ũla ũvoo mũseo. Nũndũ Isaia akũlĩtye atĩĩ: “Yeova, nũũ ũĩkĩĩĩte ũndũ ũla weew’ĩkie kuma kwitũ?” * 17 Kwoou mũĩkĩĩo ũatĩĩaa ũndũ ũla wĩw’ĩkĩte. Naw’o ũndũ ũla wĩw’ĩkĩte nĩ kwĩsĩla ndeto ĩũlũ wa Klĩsto. 18 Ĩndĩ nĩkũlya, Mo nĩmaleile kwĩw’a? Vate nzika, “wasya woo nĩwavikie nthĩ yonthe, na ũvoo woo wavikĩa nthĩ yonthe.” 19 Ĩndĩ nĩkũlya, Mo Aisilaeli nĩmaleile kũmanya? Ũndũ wa mbee Mose aĩtye: “Ngatuma mwĩthĩwa na kĩwĩu kwĩsĩla ĩla ĩte mbaĩ; ngatuma mũthata mũno kwĩsĩla mbaĩ ndumanu.” 20 Ĩndĩ Isaia nũneenete na ũkũmbaũ mwingĩ akasya: “Nĩnoonekie nĩ ala matamanthaa; nĩnamanyĩkie nĩ ala matakũlasya ĩũlũ wakwa.” 21 Ĩndĩ aĩtye ũũ ĩũlũ wa Isilaeli: “Mũthenya w’onthe nĩnĩtambũũkĩtye moko makwa kwelekela andũ matew’aa na omũ.”
11 Yu ĩndĩ nĩkũlya, We Ngai nĩwaleile andũ make? Aiee! Nũndũ nyie o nakwa nĩ Mũisilaeli wa ũsyao wa Avalaamu, kuma mbaĩnĩ ya Mbenyamini. 2 Ngai ndaalea andũ make ala weesĩ kuma tene. No mwĩsĩ ũndũ ĩandĩko yaĩtye ĩũlũ wa Eliya, yĩla wamwĩsũvaa Ngai aisikata Isilaeli? 3 Aisye atĩĩ: “Yeova, nĩmoaĩte athani maku na nĩmaomboete ithembeo syaku, na ninyie nĩ o nyioka ndialĩte, na yu meenda kũmbũaa.” 4 Ĩndĩ Ngai amũsũngĩie amwĩa ata? “Nĩnĩtialĩtye kwondũ wakwa andũ 7,000 ala mataatulĩlya Mbaali ndu.” 5 O ta ũu, o nayo ĩvindanĩ yĩĩ ve ala matialĩte kwosana na ũndũ manyuvĩtwe kwĩsĩla ũseo mwingĩ. 6 Kwoou ethĩwa manyuvĩtwe kwĩsĩla ũseo mwingĩ, mainyuvĩtwe nũndũ wa meko; nũndũ ta kethĩwa nĩ ũu, ũseo mwingĩ ndwĩthĩwa wĩ ũseo mwingĩ.
7 Twĩasya ata ĩndĩ? Kĩndũ kĩla Isilaeli wamanthaa na kĩthito ndaakĩkwata, ĩndĩ ala manyuviwe nĩmakĩkwatie. Ala angĩ mayaaĩthukĩĩsya, 8 o tondũ kũandĩkĩtwe: “Ngai amanengete veva wa too mũito, na metho matonaa, na matũ matew’aa, kũvika o na ũmũnthĩ.” 9 O nake Ndaviti aĩtye: “Eka mesa yoo ĩtw’ĩke kĩtei na mũkwa na kĩndũ kya kũlulutĩkya na ũĩvanĩsyo kwondũ woo. 10 Metho moo nĩmethĩwe na mbindu nĩ kana wĩthĩe maitonya kwona, na kĩla ĩvinda makumbe mĩongo yoo.”
11 Kwoou nĩkũlya, Mo nĩmalulutĩkile na mavalũka vyũ? Aiee! Ĩndĩ nũndũ wa ĩtambya yoo yĩtaĩle, ve ũtangĩĩo kwa andũ ma mbaĩ ingĩ nĩ kana ũu ũtume Ayuti methĩwa na kĩwĩu. 12 Kwoou ethĩwa ĩtambya yoo yĩtaĩle nĩ ũthwii kwa nthĩ na kũoleka kwoo nĩ ũthwii kwa andũ ma mbaĩ ingĩ, ũtalo woo w’onthe ũkaete ũthwii mwingĩ!
13 Yu nĩneena nenyu inyw’ĩ andũ ma mbaĩ ingĩ. Na nũndũ nĩ mũtũmwa kwa andũ ma mbaĩ ingĩ, nĩngũkumya * ũthũkũmi wakwa 14 nĩ kenda none kana ve nzĩa ndonya kũtuma andũ makwa mwene methĩwa na kĩwĩu na kũvonokya amwe katĩ woo. 15 Nũndũ ethĩwa kũvetwa kwoo nĩ wĩw’anĩthyo kwa nthĩ, kwĩtĩkĩlwa kwoo kũkeethĩwa kyaũ eka thayũ kuma kĩkw’ũnĩ? 16 O na ĩngĩ, ethĩwa kĩlungu kya ngũmbwa ya mũtu kĩla kĩtalawa ta ũsyao wa mbee nĩ kĩtheu, mũtu w’onthe o naw’o nĩ mũtheu; na ethĩwa mĩi nĩ mĩtheu, mbonge o nasyo nĩ ntheu.
17 Ĩndĩ ethĩwa mbonge imwe nĩsyatililwe, na inyw’ĩ, o na kau mwĩ mũthata wa kĩthekanĩ, nĩmwasinganiw’e katĩ wa ila ingĩ na mweethĩwa mwĩ mũamba nasyo ũthwiinĩ wa mĩi ya mũthata, 18 mũikethĩwe na mĩtũlyo ĩũlũ wa mbonge isu. Ĩndĩ ethĩwa mwĩ na mĩtũlyo ĩũlũ wasyo, lilikanai kana inyw’ĩ mũikuĩte mĩi, ĩndĩ mĩi nĩyo ĩmũkuĩte. 19 Ĩndĩ we ũkasya: “Mbonge nĩsyatililwe nĩ kana nĩtonye kũsinganw’a.” 20 Na ũu nĩ w’o! Nũndũ kũlea kwĩthĩwa na mũĩkĩĩo nĩkwatumie matilwa, ĩndĩ inyw’ĩ mũũngamĩte nũndũ wa mũĩkĩĩo. Na mũikethĩwe na mĩng’athĩlĩĩlyo, ĩndĩ ĩthĩwai na wia. 21 Nũndũ ethĩwa Ngai ndaaekana na mbonge ila syaĩ vo, o nenyu ndakamũeka. 22 Kwoou sũanĩai ĩũlũ wa ũseo na ũthatu wa Ngai. Ve ũthatu kwondũ wa ala mavalũkile, ĩndĩ ve ũseo wa Ngai kwondũ wenyu, ethĩwa nĩmũkwĩkala ũseonĩ wake; ethĩwa ti ũu o nenyu mũkatilwa. 23 O namo, ethĩwa makambĩĩa kwĩthĩwa na mũĩkĩĩo, makasinganw’a, nĩkwĩthĩwa Ngai e na ũtonyi wa kũmasingany’a. 24 Nũndũ ethĩwa mwatililwe mũthatanĩ wa kĩthekanĩ na mwasinganw’a mũthatanĩ wa mũũndanĩ kĩvathũkany’o na ũndũ kwĩkawa, Ngai nũtonya kũsingany’a mbonge sya mũthata o mũtĩnĩ ũla syaumie!
25 Nũndũ ndikwenda mũlee kũmanya kĩmbithĩ kĩĩ kĩtheu, ana-a-asa, nĩ kana mũikethĩwe oĩ methonĩ menyu ene: Ngoo sya Aisilaeli amwe nĩsyĩthĩĩtwe syĩ mbũmũ nginya ũtalo w’onthe wa andũ ma mbaĩ ingĩ wĩanĩw’e, 26 na kwa nzĩa ĩsu, Aisilaeli onthe makatangĩĩwa. O tondũ kũandĩkĩtwe: “Mwovosya * akauma Saioni na akaveta meko mate ma kũmũkĩa Ngai kuma kwa Yakovo. 27 Na ũsu nĩw’o ũkethĩwa ũtianĩo wakwa namo, yĩla ngaveta naĩ syoo.” 28 Nĩ w’o kana, kwosana na ũvoo mũseo, mo nĩ amaitha nĩ kana mũtetheke; ĩndĩ kwosana na ũnyuvi wa Ngai, mo nĩ endwa nũndũ wa aa-ũmae moo. 29 Nĩkwĩthĩwa Ngai ndakelila nũndũ wa mĩthĩnzĩo yake na kũnyuva kwake. 30 Nũndũ o tondũ mbeenĩ mũtaĩ ewi kwa Ngai ĩndĩ yu nĩmwĩw’ĩwe tei nũndũ wa Ayuti kwĩthĩwa mate ewi, 31 o ta ũu, o namo methĩĩtwe mate ewi, na kwoou mũkew’ĩwa tei, nĩ kana yu o namo ene matonye kwĩw’ĩwa tei. 32 Nũndũ Ngai nũmatw’ĩkĩthĩtye andũ onthe kwĩthĩwa mate ewi nĩ kana atonye kũmew’ĩa onthe tei.
33 Ũthwii wa Ngai na ũĩ wake na ũmanyi nĩ mũliku ta kĩ! Motw’ĩo make maitonya kũmanyĩka, o na nzĩa syake iitonya kũmanthĩka! 34 Nũndũ “nũũ wĩsĩ kĩlĩko kya Yeova, kana nũũ ũtw’ĩkĩte mũtai wake?” 35 Kana, “nũũ wambie kũmũnenga, nĩ kana wĩthĩe no nginya aĩvwe?” 36 Nũndũ syĩndũ syonthe syaumie kwake na nĩ kwondũ wake na nĩ syake. Nguma nĩ syake tene na tene. Ameni.
12 Kwoou, ana-a-asa nĩmwĩsũva nũndũ wa ĩnee ya Ngai, mũnengane mĩĩ yenyu yĩthĩwe nthembo yĩ thayũ, ntheu na yĩtĩkĩlĩka kwa Ngai, naw’o nĩ ũthũkũmi mũtheu vamwe na ũtonyi wenyu wa kũsũanĩa. 2 Na ekai kwĩthĩwa mũilye ta nthĩ ĩno, ĩndĩ mũalyũke kwa kwĩthĩwa na kĩlĩko kyeũ, nĩ kana mwĩyĩĩkĩĩthye inyw’ĩ ene kwenda kwa Ngai kũla kũseo na kwĩtĩkĩlĩka na kwĩanĩu.
3 Nũndũ kwĩsĩla ũseo mwingĩ ũla nĩnengetwe, nĩmwĩa kĩla ũmwe katĩ wenyu ndakesũanĩe mũno kũvĩtũka ũndũ waĩle kwĩsũanĩa, ĩndĩ asũanĩe nĩ kana ethĩwe na kĩlĩko, kĩla ũmwe o ũndũ Ngai ũmũnengete * kĩthimo kĩana kya mũĩkĩĩo. 4 Nũndũ o tondũ twĩthĩawa na mwĩĩ ũmwe wĩ na mamutha maingĩ, ĩndĩ mamutha asu onthe maitethasya wĩa ũmwe, 5 o ta ũu, o na kau twĩ aingĩ, twĩ mwĩĩ ũmwe twĩ ngwatanĩo vamwe na Klĩsto, ĩndĩ kĩla ũmwe waitũ nĩ ĩmutha ya ũla ũngĩ. 6 Kwoou nũndũ twĩ na mĩthĩnzĩo yĩ kĩvathũkany’o kwosana na ũseo mwingĩ ũla tũnengetwe, ethĩwa nĩ wathani, ekai twathane kwosana na ũndũ mũĩkĩĩo witũ wĩana; 7 kana ethĩwa nĩ ũthũkũmi, ekai tũendeee kwĩthĩwa ũthũkũminĩ ũsu; kana ethĩwa nĩ ũla ũmanyĩasya, ekai aendeee kũmanyĩsya; 8 kana ũla ũthangaasya, * nathangaasye; * na ũla ũnenganae * ekai anengane na ũlau, na ũla ũũngamĩaa * ekai eke ũu na kĩthito; * nake ũla wĩw’ĩaa tei nĩeke ũu na ũtanu.
9 Ekai wendo wenyu wĩthĩwe ũte na wangangany’a. Menai vyũ ũla ũthũku; lũmany’ai na ũla ũseo. 10 Wendonĩ wa ana-a-asa ĩthĩwai na wendo mũuu kĩla ũmwe na ũla ũngĩ. Na nthĩnĩ wa kũnengane ndaĩa, ĩthĩwai mũtongoetye. * 11 Ĩthĩwai mwĩ athangaau, * ti atulu. Akanai vevanĩ. Mũthũkũmei Yeova. 12 Tanai wĩkwatyonĩ. Ũmĩĩsyai yĩla mwĩ thĩnanĩ. Voyai na kĩthing’ĩĩsyo. 13 Aanai na ala atheu kwosana na mavata moo. Endeeai kũthokasya aeni na ũlau. 14 Endeeai kũmaathima ala mamũthĩnasya; athimai na mũikaumanĩe. 15 Tanai na ala meũtana; ĩai na ala mekũĩa. 16 Monei andũ ala angĩ o ũndũ mwĩyonaa ene; mũikasũanĩe maũndũ ma mĩtũlyo, * ĩndĩ mũtongoew’e nĩ maũndũ ma wĩnyivyo. Mũikethĩwe oĩ methonĩ menyu ene.
17 Mũikeyĩĩvanĩsye ũthũku kwa ũthũku kwa mũndũ o na wĩva. Tatai kwĩka kĩla kyonekaa kĩ kĩseo nĩ andũ onthe. 18 Na ethĩwa nĩvatonyeka, ngalĩ ĩ yenyu, ĩthĩwai na mũuo na andũ onthe. 19 Mũikeyĩĩvanĩsye, endwa, nengai ũthilĩku * mwanya; nũndũ nĩkũandĩkĩtwe, “‘Ũĩvanĩsyo nĩ wakwa; ngaĩvanĩsya,’ easya ũu Yeova.” 20 Ĩndĩ “ethĩwa mũmaitha waku e na nzaa, mũnenge lĩu aye; ethĩwa e na waũni, mũnenge kĩndũ anyw’e; nũndũ kwa kwĩka ũu ũkoombĩĩa makaa me mwaki mũtwenĩ wake.” * 21 Mũiketĩkĩle mũkĩlw’e vinya nĩ ũthũku, ĩndĩ endeeai kũkĩlya ũthũku vinya kwa kwĩka ũseo.
13 Ekai kĩla mũndũ enyivĩsye ala me na ũkũmũ, nũndũ vaiĩ ũkũmũ eka ũla wumĩte kwa Ngai; ala me na ũkũmũ manengetwe ũkũmũ ũsu nĩ Ngai. 2 Kwoou, mũndũ o na wĩva ũla ũleanaa na ũkũmũ aleanaa na mũvango wa Ngai; na ala maleanaa naw’o makeeyĩetee ũsilĩlo ĩũlũ woo ene. 3 Nũndũ ala masumbĩkĩte nĩ kĩndũ kya kũkĩwa nĩ ala mekaa meko mathũku, ĩndĩ ti ala mekaa meko maseo. We nũkwenda kwĩkala ũte na wia kwelekela ala me na ũkũmũ? Endeea kwĩka ũseo, na ũu ũkatuma maũkatha; 4 nũndũ mo nĩ athũkũmi ma Ngai kwondũ wa ũseo waku. Ĩndĩ ethĩwa nũkwĩka ũla ũthũku, ĩthĩwa na wia, nũndũ maikuaa ũvyũ vate kĩtumi. Mo nĩ athũkũmi ma Ngai, aĩvanĩsya ala monanasya ũthilĩku kwa ũla wĩkaa ũthũku.
5 Kwoou ve kĩtumi kya inyw’ĩ kwĩthĩwa na wĩnyivyo, ti kwondũ wa ũthilĩku ũsu w’oka, ĩndĩ o na kwondũ wa wasya wenyu wa ngoo. 6 Nĩkyo kĩtumi mũĩvaa koti; nũndũ mo nĩ athũkũmi ma Ngai kwondũ wa andũ onthe, na mathũkũmaa kwondũ wa kĩeleelo kĩu. 7 Manengei onthe kĩla kĩmaĩle: ũla waĩle kũnengwa koti, mũnengei koti; ũla waĩle kũnengwa ũelo, mũnengei ũelo; ũla waĩle kũkĩwa, mũkĩei; na ũla waĩle kũnengwa ndaĩa, mũnengei ndaĩa.
8 Mũikethĩwe mwĩ atae kĩndũ nĩ mũndũ o na ũmwe ate o kwendana; nũndũ mũndũ o na wĩva ũla wendaa mũndũ ũla ũngĩ nĩwĩanĩĩtye mĩao. 9 Nũndũ mĩaonĩ vaandĩkĩtwe, “Ndũkalaalae, ndũkoae, ndũkoye, ndũkethĩwe na ĩtomo,” na mĩao ĩngĩ o na yĩva ĩla yĩ vo ĩwetetwe ũneeninĩ ũũ: “No nginya ũmwende mũtũi waku o ũndũ wĩyendete.” 10 Wendo ndwĩkaa mũtũi ũthũku; kwoou wendo nĩw’o wĩanĩasya mĩao.
11 Na ĩkai ũu nũndũ nĩmwĩsĩ ĩvinda yĩla tũĩ, kana yu nĩ saa wa inyw’ĩ kũamũka kuma toonĩ, nũndũ yu ũtangĩĩo witũ wĩ vakuvĩ kũvĩtũka yĩla twatw’ĩkie etĩkĩli. 12 Ũtukũ nĩ mũendu mũno, na mũthenya nũthengeee. Kwoou ekai tũvete vyũ mawĩa ma kĩvindu na ekai twĩkĩe mĩio ya kaũ ya kyeni. 13 Ekai twĩyĩkalye nesa ta twĩ mũthenya, na ti mbokanĩ itaĩle na ũnywi, * ti kwa kwĩka ũlaalai na kwĩka maũndũ mavuku na ngũlũ, * na ti kwa kwĩthĩwa na ĩteta kana kĩwĩu. 14 Ĩndĩ ĩvw’ĩkei Mwĩaĩi Yesũ Klĩsto, na mũikethĩwe mũivanga mbee kwondũ wa mawendi ma mwĩĩ.
14 Mũthokyei mũndũ ũla wĩ na mawonzu mũĩkĩĩonĩ wake, ĩndĩ mũikasilĩle mũndũ nũndũ wa kwĩthĩwa na mawoni me kĩvathũkany’o. * 2 Mũndũ ũmwe nũtonya kwĩthĩwa na mũĩkĩĩo ũũmwĩtĩkĩlya kũya syĩndũ syonthe, ĩndĩ ũla mwonzu aĩsaa o mboka sya mũũndanĩ. 3 Mũndũ ũla ũkũya ndakavũthye ũla ũteũya, na ũla ũteũya ndakasilĩle ũla ũkũya, nũndũ Ngai nũthoketye mũndũ ũsu. 4 We nue ũũ ũmũsilĩle mũthũkũmi wa ũngĩ? Kwa vwana wake nũũngamaa kana akavalũka. Ĩĩ, akaũngama, nũndũ Yeova nũtonya kũmũũngamya.
5 Mũndũ ũmwe nĩwonaa mũthenya ũmwe wĩ wa vata kwĩ mũthenya ũla ũngĩ; nake ũngĩ onaa mĩthenya yonthe yĩ o ũndũ ũmwe; ekai kĩla ũmwe ethĩwe aĩkĩĩĩte vyũ kĩlĩkonĩ kyake mwene. 6 Ũla ũkwataa mũthenya aũkwataa kwondũ wa Yeova. Nake ũla ũĩsaa, aĩsaa kwondũ wa Yeova, nũndũ nũmũtũngĩaa Ngai mũvea; nake ũla ũtaĩsaa ekaa ũu kwondũ wa Yeova, na no ũmũtũngĩaa Ngai mũvea. 7 Vate nzika, vaiĩ ũmwe witũ wĩkalaa thayũ kwondũ wake mwene, na vaiĩ ũmwe ũkusaa kwondũ wake mwene. 8 Nũndũ ethĩwa twĩ thayũ, twĩ thayũ kwondũ wa Yeova, na ethĩwa nĩtũũkw’a, twĩkw’a kwondũ wa Yeova. Kwoou o na ethĩwa nĩtũkwĩkala thayũ kana nĩtũũkw’a, twĩ ma Yeova. 9 Kwondũ wa kĩtumi kĩu Klĩsto nĩwakwie na eethĩwa thayũ ĩngĩ, nĩ kana atonye kwĩthĩwa Mwĩaĩi ĩũlũ wa ala akw’ũ na ala me thayũ.
10 Ĩndĩ nĩkĩ ũũsilĩla mwana-a-asa waku? Kana nĩkĩ ũũvũthya mwana-a-asa waku? Nũndũ ithyonthe tũkaũngama mbee wa kĩvĩla kya sila kya Ngai. 11 Nũndũ nĩkũandĩkĩtwe: “‘O tondũ nyie nĩ thayũ,’ easya ũu Yeova, ‘kĩla yĩu yĩkatulya ndu mbee wakwa, na kĩla ũĩmĩ ũkaumbũla ũtheinĩ kana nyie nĩ Ngai.’” 12 Kwoou ĩndĩ, kĩla ũmwe waitũ akaumya ũtalo kwondũ wake mwene mbee wa Ngai.
13 Kwoou, tũikasilĩlane ithyĩ kwa ithyĩ ĩngĩ, vandũ va ũu, tũtw’e kana tũikaiĩa mwana-a-asa kĩndũ kya kũmũlulutĩkya kana kya kũmũvalũkya. 14 Nĩnĩsĩ na nĩnĩĩkĩĩe vyũ nthĩnĩ wa Mwĩaĩi Yesũ kana vaiĩ kĩndũ kĩtonya kwĩvukya; ĩndĩ yĩla mũndũ watw’a kana kĩndũ nĩ kĩvuku, kwake kĩthĩawa kĩ kĩvuku. 15 Nũndũ ethĩwa mwana-a-asa waku nũkwĩw’a woo nũndũ wa lĩu, ndũendeee kwĩka kwosana na wendo. Lĩu wenyu ndũkatume mũmwananga mũndũ ũla Klĩsto wakwie kwondũ wake. 16 Kwoou, mũikaeke ũseo ũla mwĩkaa ũwetwe naĩ. 17 Nũndũ Ũsumbĩ wa Ngai ti kũya na kũnyw’a, ĩndĩ nĩ ũlũngalu, mũuo, ũtanu vamwe na veva mũtheu. 18 Nũndũ mũndũ o na wĩva ũla wĩthĩawa e ngombo ya Klĩsto kwa nzĩa ĩsu, nũmwendeeasya Ngai na nĩwĩtĩkĩlawa nĩ andũ.
19 Kwoou, ekai tũatĩĩe maũndũ ala maetae mũuo na maũndũ ala matonya kwaka ũmwe na ũla ũngĩ. 20 Ekai kũomboa wĩa wa Ngai nũndũ wa lĩu tũ. Nĩ w’o kana syĩndũ syonthe nĩ ntheu, ĩndĩ nũthũku * kwa mũndũ kũya ethĩwa ũu nũũtuma ũngĩ alulutĩka. 21 Nĩ ũseo kũlea kũya nyama kana kũnyw’a mbinyu kana kwĩka ũndũ o na wĩva ethĩwa nũũtuma mwana-a-asa waku alulutĩka. 22 Mũĩkĩĩo ũla wĩ naw’o nĩwĩthĩwe kwondũ waku mwene methonĩ ma Ngai. Nĩ mũtanu mũndũ ũla ũtesilĩlaa kwĩsĩla maũndũ ala wĩtĩkĩlaa. 23 Ĩndĩ ethĩwa e na nzika, e na ĩvĩtyo ethĩwa nũkũya, nũndũ ndeũya kwosana na mũĩkĩĩo. Vate nzika ũndũ w’onthe ũla ũtosanĩte na mũĩkĩĩo nĩ naĩ.
15 Ĩndĩ ithyĩ ala twĩ na vinya nĩtwaĩle kũkua mawonzu ma ala mate na vinya, na ti kwĩyendeesya ithyĩ ene. 2 Ekai kĩla ũmwe witũ amwendeesye mũtũi wake kwa kũmwĩka ũseo, nĩ kana amwĩkĩe vinya. 3 Nũndũ o nake Klĩsto ndaaĩyendeesya we mwene, ĩndĩ o tondũ kũandĩkĩtwe: “Maũndũ mathũku ala makũneeneie we, maneeneie nyie.” 4 Nũndũ maũndũ onthe ala maandĩkiwe tene maandĩkiwe kwondũ wa kũtũmanyĩsya, nĩ kana kwĩsĩla wũmĩĩsyo witũ na ũkiakisyo ũla wĩ Maandĩkonĩ tũtonye kwĩthĩwa na wĩkwatyo. 5 Yu ekai Ngai ũla ũnenganae wũmĩĩsyo na ũkiakisyo amũtonyethye inyw’onthe kwĩthĩwa na kĩsũanĩo ta kĩla Klĩsto Yesũ waĩ nakyo, 6 nĩ kana inyw’onthe mwĩ ngwatanĩo na wasya * ũmwe mũmũtaĩe ũla nĩwe Ngai na Ĩthe wa Mwĩaĩi waitũ Yesũ Klĩsto.
7 Kwoou thokany’ai inyw’ĩ kwa inyw’ĩ o tondũ Klĩsto o nake wamũthokisye, na ĩkai ũu mwĩ na kĩeleelo kya kũmũtaĩa Ngai. 8 Nũndũ nĩmũtavya kana Klĩsto atw’ĩkie mũthũkũmi wa ala aĩke, nĩ kana amony’e kana mavinda onthe Ngai aneenaa w’o, na aimaĩkĩĩthya kana mawatho ma Ngai ala wamathĩte aa-ũmae moo nĩ ma w’o, 9 na nĩ kana andũ ma mbaĩ ingĩ mamũkumye Ngai kwondũ wa tei wake. O tondũ kũandĩkĩtwe: “Nĩkyo kĩtumi ngatavya andũ ma mbaĩ ingĩ ũtheinĩ ĩũlũ waku, na ngaina mbathi sya kũtaĩa ĩsyĩtwa yaku.” 10 Na ĩngĩ aĩtye: “Tanai vamwe na andũ make, inyw’ĩ andũ ma mbaĩ ingĩ.” 11 O na ĩngĩ aĩtye: “Mũtaĩei Yeova, inyw’ĩ mbaĩ syonthe, na ekai andũ onthe mamũtaĩe.” 12 O na ĩngĩ Isaia aĩtye: “Kũkeethĩwa mwĩi wa Yese, na akookĩla nĩ kana asumbĩke mbaĩ, na mbaĩ ikamwĩkwatya.” 13 Ekai Ngai ũla ũnenganae wĩkwatyo amusũsye ũtanu w’onthe na mũuo nũndũ wa kũmũĩkĩĩa we, nĩ kana mwĩthĩwe na wĩkwatyo mũlũmu vyũ * kwĩsĩla vinya wa veva mũtheu.
14 Yu ana-a-asa makwa, ndi na nzika kana o nenyu ene nĩmusũĩte ũseo, na mũkausũa ũmanyi w’onthe, na kana nĩmũtonya kũtaana * ene kwa ene. 15 Ĩndĩ namũandĩkĩa ũtheinĩ ĩũlũ wa maũndũ amwe, nĩ kana nĩmũlilikany’e ũndũ ũngĩ, nũndũ wa ũseo mwingĩ ũla nanengiwe nĩ Ngai 16 nĩ kana nyie nĩthĩwe mũthũkũmi wa Klĩsto Yesũ kwondũ wa andũ ma mbaĩ ingĩ. Nyie nĩtethya wĩa ũũ mũtheu wa kũtavany’a ũvoo mũseo wa Ngai, nĩ kana andũ asu ma mbaĩ ingĩ methĩwe matonya kwĩthĩwa nthembo yĩtĩkĩlĩka, ĩtheetw’e kwĩsĩla veva mũtheu.
17 Kwoou nĩ na kĩtumi kya kwĩkathĩĩa nthĩnĩ wa Klĩsto Yesũ ĩũlũ wa maũndũ ala makonetye Ngai. 18 Nũndũ nyie ndikaneena ĩũlũ wa ũndũ ũngĩ ate o maũndũ ala Klĩsto wĩkĩte kwĩsĩla vala nĩĩ nĩ kana mbaĩ syonthe syĩthĩwe syĩ mbĩwi, kwĩsĩla ndeto syakwa na meko makwa, 19 o vamwe na syama na maũndũ ma ũsengy’o, na kwĩsĩla vinya wa veva mũtheu wa Ngai, na nũndũ wa ũu kuma Yelusaleme kũthyũlũlũka nginya Iluliko nĩndavanĩtye vyũ ũvoo mũseo ĩũlũ wa Klĩsto. 20 Kwa nzĩa ĩsu, nĩnatwie kana ndikatavany’a ũvoo mũseo vala ĩsyĩtwa ya Klĩsto yaĩ yĩnatavanw’a, nĩ kana ndikake ĩũlũ wa mũsingi wa mũndũ ũngĩ; 21 ĩndĩ o tondũ kũandĩkĩtwe: “Ala mataakwata ũvoo ĩũlũ wake makoona, na ala mataaĩw’a makaelewa.”
22 Na kĩu nĩkyo kĩtumi mavinda maingĩ nasiĩĩiwe ndikoke kwenyu. 23 Ĩndĩ vaiĩ kĩsio o na kĩmwe ndakinyĩte isionĩ ii, na kwa myaka mingĩ * nĩnĩthĩĩtwe na mea maingĩ ma kũka kũla mũĩ. 24 Kwoou yĩla nĩĩthĩwa nĩendete Sivania, nĩĩkwatya kana ngamwona na mũimbumaasya ĩtina wa kwĩkalany’a nenyu kwa ĩvinda. 25 Ĩndĩ yu nĩ vakuvĩ kũthi Yelusaleme nĩ kana ngamathũkũme atheu. 26 Nũndũ ala me Masetonia na Akaia nĩmendeeiw’e nĩ kumya syĩndũ syoo syĩthĩwe mĩvothi kwondũ wa ala ngya katĩ wa atheu ala me Yelusaleme. 27 Kwa w’o, nĩmendeeiw’e nĩ kwĩka ũu, na vate nzika maĩ atae nĩmo; nũndũ ethĩwa andũ ma mbaĩ ingĩ nĩmeethĩiwe me ngwatanĩo vamwe na atheu asu syĩndũnĩ syoo sya kĩ-veva, andũ asu ma mbaĩ ingĩ o namo nĩmaĩle kũmathũkũma na syĩndũ syoo sya kĩ-mwĩĩ. 28 Kwoou namina kwĩka ũu na navikya mĩvothi * ĩsu kũla maĩ, ngesĩla kwenyu nĩendete Sivania. 29 O na ĩngĩ, nĩnĩsĩ kana yĩla nĩũka kwenyu, ngamũetee moathimo maingĩ kuma kwa Klĩsto.
30 Yu nĩngũmwĩsũva ana-a-asa kwĩsĩla kwa Mwĩaĩi waitũ Yesũ Klĩsto na kwĩsĩla wendo wa veva, mwĩkĩe kĩthito kingĩ vamwe nakwa nthĩnĩ wa kũmũvoya Ngai kwondũ wakwa, 31 nĩ kana nĩtangĩĩwe kumana na andũ ma Yutia ala mate etĩkĩli, na nĩ kana ũthũkũmi wakwa kwondũ wa atheu ala me Yelusaleme wĩthĩwe ũtonya kwĩtĩkĩlwa nĩmo, 32 nĩ kana kwondũ wa kwenda kwa Ngai nũke kũla mũĩ nĩ na ũtanu na ndikwata ũthũmũo vamwe nenyu. 33 Na Ngai ũla ũnenganae mũuo nĩethĩwe vamwe nenyu inyw’onthe. Ameni.
16 Nĩenda mũmanye * Voevi mwĩĩtu-a-asa waitũ, ũla nĩ mũthũkũmi kĩkundinĩ kĩla kĩ Kengelea, 2 nĩ kana mwĩthĩwe mũtonya kũmũthokya nthĩnĩ wa Mwĩaĩi kwa nzĩa ĩla ĩmaĩlĩte atheu na mũimũnenga ũtethyo o na wĩva ũla ũtonya kwĩthĩwa e na vata naw’o, nũndũ we mwene nũĩkĩĩthĩtye kana nĩ mũtetei wa aingĩ, nyie nĩ ũmwe.
3 Ngethesyei Vilisika na Akwila, atethya ma wĩa vamwe nakwa nthĩnĩ wa Klĩsto Yesũ, 4 ala malikilye ngingo syoo ene mũisyonĩ nũndũ wakwa, na ala nyie o vamwe na ikundi syonthe sya andũ ma mbaĩ ingĩ tũmatũngĩaa mũvea. 5 Na mũingethesya kĩkundi kĩla kĩ nyũmba kwoo. Ngethesyei Evaeneto, mwendwa wakwa, ũla nĩ ũsyao wa mbee wa Asia kwondũ wa Klĩsto. 6 Ngethesyei Meli, ũla ũtethetye wĩa na kĩthito kwondũ wenyu. 7 Ngethesyei Andeloniko na Yunia, andũ ma mũsyĩ witũ ala maĩ ovwa vamwe nakwa, namo nĩ aũme mesĩkĩe nesa nĩ atũmwa na methĩĩtwe me ngwatanĩo vamwe na Klĩsto kwa ĩvinda yĩasa kwĩ nyie.
8 Ngethesyei Ambiliato, mwendwa wakwa nthĩnĩ wa Mwĩaĩi. 9 Ngethesyei Ulivano, mũtethya wa wĩa vamwe nakwa nthĩnĩ wa Klĩsto, na Sitakisi mwendwa wakwa. 10 Ngethesyei Avele, ũla wĩtĩkĩlĩtwe nĩ Klĩsto. Ngethesyei ala ma nyũmba ya Alisitovulo. 11 Ngethesyei Elotioni, mũndũ wa mũsyĩ witũ. Ngethesyei ala ma nyũmba ya Nalikiso, ala me nthĩnĩ wa Mwĩaĩi. 12 Ngethesyei Tilivena na Tilivosa, aka ala matethasya wĩa na kĩthito nthĩnĩ wa Mwĩaĩi. Ngethesyei Velisi, mwendwa waitũ, nũndũ nũtethetye wĩa na kĩthito nthĩnĩ wa Mwĩaĩi. 13 Ngethesyei Luvusi, ũla ũnyuvĩtwe nthĩnĩ wa Mwĩaĩi, na inyia wake na wakwa. 14 Ngethesyei Asingilito, Velekona, Emesi, Vatelova, Elima, na ana-a-asa ala me vamwe namo. 15 Ngethesyei Viloloko na Yulia, Neleo na mwĩĩtu-a-inyia, na Olimba, na atheu onthe ala me vamwe namo. 16 Kethany’ai na ngethi ya wendo. * Ikundi syonthe sya Klĩsto nĩsyamũkethya.
17 Yu nĩmwĩsũva ana-a-asa mũmasisye nesa andũ ala maetae mũaanĩko na maũndũ ma kũlulutĩkya, na mekaa kĩvathũkany’o na ũmanyĩsyo ũla mwamanyĩiw’e, na mũyĩvathana namo. 18 Nũndũ andũ ma mũthemba ũsu nĩ ngombo, na ti sya Klĩsto, Mwĩaĩi waitũ, ĩndĩ nĩ sya mavu moo ene, na kwa ndeto mbololo na sya kũkathĩĩa nĩmasesengaa ngoo sya ala mate na ũthũku. 19 Wĩwi wenyu nũmanyĩkĩte nĩ andũ onthe, na kwoou nĩngũtana nũndũ wenyu. Ĩndĩ nĩenda mwĩthĩwe mwĩ oĩ maũndũnĩ ala maseo, ĩndĩ mwĩvathane na maũndũ ala mathũku. 20 Nake Ngai, ũla ũnenganae mũuo akamũtumbangĩa Satani ungu wa nyaaĩ syenyu o mĩtũkĩ. Ũseo mwingĩ wa Yesũ Mwĩaĩi waitũ nĩwĩthĩwe nenyu.
21 Timotheo, mũtethya wa wĩa vamwe nakwa, nĩwamũkethya, o na Lukio, Yasoni, na Sosiveteli, andũ ma mũsyĩ witũ.
22 Nyie, Telitio, mũandĩki wa valũa ũũ, nĩnamũkethya nthĩnĩ wa Mwĩaĩi.
23 Kaio, ũla ũnthoketye na akathokya kĩkundi kyonthe, nĩwamũkethya. Elasito, ũla mũsũvĩi * wa mbesa sya ndũa, nĩwamũkethya, o nake Kwalito, mwana-a-inyia, nĩwamũkethya. 24* ——
25 Na yu kwa Ũla ũtonya kũmũlũlũmĩĩlya kwosana na ũvoo mũseo ũla ndavanasya na ũtavany’a ĩũlũ wa Yesũ Klĩsto, na kwosana na ũvuany’o wa kĩmbithĩ kĩtheu kĩla kĩthĩĩtwe kĩteũwetwa kwa ĩvinda yĩasa mũno 26 ĩndĩ ũla yu wonanĩtw’e * na ũkamanyĩka mbaĩnĩ syonthe kwĩsĩla wathani ũla wĩ Maandĩkonĩ kwosana na mwĩao wa Ngai wa tene na tene kwondũ wa wĩwi kwĩsĩla mũĩkĩĩo; 27 kwa Ngai, ũla nowe e weka mũĩ, nĩkwĩthĩwe ũtheu mũtisu kwĩsĩla Yesũ Klĩsto tene na tene. Ameni.
Kana “ala mate Akiliki.”
Kwa ngelekany’o, nzoka na mang’ala.
Kana “mambĩlĩĩlasya.”
Ndeto kwa ndeto, “katĩkatĩ wa.”
Kana “nũmanyĩĩtw’e na kanyw’a.”
Ndeto kwa ndeto, “mwĩĩ.”
Kana “ta thiĩ.”
Kana “iekeetwe.”
Kana “ũĩkĩĩthyo.”
Kana nĩvatonyeka, “ũtumaa syĩndũ ila ite kw’o syĩthĩwa kw’o.”
Kana “aĩ ngũngũ.”
Kana nĩvatonyeka, “twĩ na mũuo.”
Kana nĩvatonyeka, “twĩ na ũtanu.”
Kana nĩvatonyeka, “twĩ na ũtanu.”
Kana “mausũĩte maketĩkanga.”
Kana “aekeetwe naĩ yake.”
Ndeto kwa ndeto, “mamutha.”
Ndeto kwa ndeto, “mamutha.”
Ndeto kwa ndeto, “mamuthanĩ maitũ.”
Ndeto kwa ndeto, “mamuthanĩ makwa.”
Ndeto kwa ndeto, “mamutha makwa.”
Ndeto ya Kĩevelania kana Kĩalamu ĩla ũalyũlo wayo nĩ, “Tata” kana “Nau.”
Kana “tũteũneena.”
Kana “aviso.” Sisya Maelesyo ma Ndeto.
Kana “mũlau.”
Kana “ũvoonĩ witũ?”
Kana “nĩngũkatha.”
Kana “Mũtangĩĩi.”
Kana “ũmũtw’ĩlĩte; ũmũaĩe.”
Kana “ũthuthasya.”
Kana “nathuthye.”
Kana “umasya.”
Kana “ũtongoeasya.”
Kana “na kĩthing’ĩĩsyo.”
Kana “ma mbee.”
Kana “na kĩthito.”
Kana “mũikamanthe maũndũ matũlu.”
Ũu nĩ kwasya, ũthilĩku wa Ngai.
Ũu nĩ kwasya, nĩ kana ũmwololosye, na wũmũ wake ũtweke.
Kana “ũthengi.”
Wingĩ wa ndeto ya Kĩkiliki a·selʹgei·a. Sisya Maelesyo ma Ndeto.
Kana nĩvatonyeka, “maũndũ ala ũkwĩkũlya we mwene.”
Kana “nĩ mavĩtyo.”
Ndeto kwa ndeto, “kanyw’a.”
Kana “wusũĩte ũketĩkanga.”
Kana “kũmanyĩany’a.”
Kana nĩvatonyeka, “yĩana ũna.”
Ndeto kwa ndeto, “ũsyao.”
Kana “mũmwĩtĩkĩle.”
Ndeto kwa ndeto, “kũmumunyana kũtheu.”
Kana “mũũngamĩi.”
Mũsoa ũũ wĩ Mbivilianĩ imwe, ĩndĩ ũyonekaa nthĩnĩ wa mavuku amwe ma tene ma Mbivilia.
Kana “ũvuanĩtw’e.”