VALŨA KWA AKALATIA

1 Nyie Vaulo, mũtũmwa, ũtanyuvĩtwe nĩ andũ kana akanyuvwa kwĩsĩla mũndũ, ĩndĩ ũnyuvĩtwe nĩ Yesũ Klĩsto na Ngai ũla nĩwe Asa na nĩwe wamũthayũũkisye, 2 na ana-a-asa onthe ala me vamwe nakwa, kwa ikundi sya Kalatia:

3 Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto. 4 Ũla weenenganie mwene nĩ kana atwovosye kuma nthĩ ĩno nthũku kwosana na kwenda kwa Ngai waitũ ũla nĩwe Asa, 5 nake nataĩwe tene na tene. Ameni.

6 Nĩngũseng’a mũno kwona mwelelũkĩtw’e mĩtũkĩ mũkauma kwa Ũla wamwĩtie kwĩsĩla ũseo mwingĩ wa Klĩsto, na mũkaatĩĩa ũvoo mũseo wa mũthemba ũngĩ. 7 Ti atĩ ve ũvoo ũngĩ mũseo; ĩndĩ ve amwe meũmũthĩny’a na mekwenda kwananga ũvoo mũseo ĩũlũ wa Klĩsto. 8 Ĩndĩ o na ethĩwa ithyĩ kana mũlaĩka kuma ĩtunĩ akamũtavya ũvoo ũngĩ mũseo eka ũvoo mũseo ũla twamũtavisye, ekai ethĩwe e mũumanĩe. 9 O tondũ twasya, nĩngũweta ĩngĩ, Mũndũ o na wĩva ũla ũkũmũtavya ũvoo ũngĩ mũseo eka ũla mweetĩkĩlile, ekai ethĩwe e mũumanĩe.

10 Yu kwa w’o, nyie nĩmantha kwĩtĩkĩlwa nĩ andũ kana nĩ Ngai? Kana nĩmantha kwendeesya andũ? Ngethĩwa o na yu nendeeasya andũ, ndyĩthĩwa nĩ ngombo ya Klĩsto. 11 Nũndũ nĩenda inyw’ĩ ana-a-asa mũmanye kana ũvoo mũseo ũla namũtavisye ndumĩte kwa mũndũ; 12 nũndũ ndyaaũkwata kuma kwa mũndũ, o na ndyaaũmanyĩw’a nĩ mũndũ, ĩndĩ naũkwatie kwĩsĩla ũvuany’o kuma kwa Yesũ Klĩsto.

13 Vate nzika nĩmwĩsĩ mwĩkalĩle wakwa yĩla naĩ wa Ndĩni ya Ayuti, kana nĩnathĩnisye mũno kĩkundi kya Ngai na kũkyananga; 14 Na nĩneekĩte maendeeo maingĩ nthĩnĩ wa Ndĩni ya Ayuti kũvĩtũka aingĩ ma mbaĩ yakwa ala maĩ ma ĩika yakwa, nũndũ naĩ na kĩthito kingĩ kwondũ wa syĩthĩo sya aa-ĩthe makwa. 15 Ĩndĩ yĩla Ngai, ũla watumie nĩsyawa nĩ inyia wakwa na ambĩta kwĩsĩla ũseo wake mwingĩ, woonie nũseo 16 avuany’e Mwana wake kwĩsĩla vala nĩĩ nĩ kana nĩtavye andũ ma mbaĩ ingĩ ũvoo mũseo ĩũlũ wake, ndyaaneenea ũndũ ũsu na mũndũ o na wĩva vau kwa vau; 17 o na ndyaambata ngathi Yelusaleme kwa ala maĩ atũmwa mbee wakwa, ĩndĩ naendie nthĩ ya Alavu, na ĩndĩ nasyoka Ndamasiku.

18 Na ĩndĩ myaka ĩtatũ ĩtina wa vau nĩnambatie Yelusaleme kũmwona Keva, * na nekala nake mĩthenya 15. 19 Ĩndĩ ndyaaona o na ũmwe katĩ wa atũmwa ala angĩ, ate o Yakovo mwana-a-inyia wa Mwĩaĩi. 20 Na yu ĩũlũ wa maũndũ ala ngũmũandĩkĩa, nĩngũmũĩkĩĩthya mbee wa Ngai kana ndiũkengana.

21 Na ĩtina wa vau nĩnaendie isionĩ sya Silia na Silisia. 22 Ĩndĩ nyie mwene ndyeesĩkĩe nĩ ikundi sya Yutia ila syaĩ ngwatanĩo vamwe na Klĩsto. 23 Syeekaa o kwĩw’a atĩĩ: “Mũndũ ũla ũnatũthĩnasya yu nũkũtavany’a ũvoo mũseo ĩũlũ wa mũĩkĩĩo ũla navu mbee wendaa kũwananga.” 24 Na kwoou mambĩĩa kũmũkumya Ngai nũndũ wakwa.

2 Na ĩndĩ ĩtina wa myaka 14 nĩnambatie ĩngĩ Yelusaleme nĩ na Valanava na Tito. 2 Nambatie kũu nũndũ nĩnakwatie ũvuany’o, na namatwaĩe ũvoo mũseo ũla natavanasya kwa andũ ma mbaĩ ingĩ. Ĩndĩ neekie ũu mbee wa aũme ala manengetwe ndaĩa me oka, nĩ kana ũndũnĩ o na wĩva ndikethĩwe ngĩsemba mana kana ndikethĩwe nasembie mana. 3 Ĩndĩ o na Tito, ũla naĩ nake, ndaathing’ĩĩw’a aĩkwe, o na kau aĩ Mũkiliki. 4 Ĩndĩ ũndũ ũsu waumĩlile nũndũ wa ana-a-asa ma ũvũngũ ala malikĩtw’e kĩkundinĩ na kĩmbithĩ, ĩĩ, ala malikĩte mateũmanyĩka nĩ kana mathiane ũthasyo ũla tũtanĩaa nũndũ wa ngwatanĩo yitũ vamwe na Klĩsto Yesũ, na maitũtw’ĩkĩthya ngombo vyũ; 5 na tũyaamethukĩĩsya kana kũmenyivĩsya nongi, tũyaaĩka ũu o na kwa kavinda kanini, * nĩ kana ũw’o ĩũlũ wa ũvoo mũseo ũendeee kwĩthĩwa nthĩnĩ wenyu.

6 Ĩndĩ ĩũlũ wa ala moonekaa me ma vata, o na ethĩwa maĩ aaũ, ũsu ti ũndũ kwakwa, nũndũ andũ asu manengetwe ndaĩa vaiĩ ũndũ mweũ maandethya naw’o, nĩkwĩthĩwa Ngai ndasiasya ũndũ mũndũ ũilye nza. 7 Ĩndĩ yĩla moonie kana nĩnanengetwe ũvoo mũseo kwondũ wa ala mate aĩke, o tondũ Vetelo wanengetwe ũvoo mũseo kwondũ wa ala aĩke, 8 nũndũ o ũla wamũnengie Vetelo vinya nĩ kana ethĩwe mũtũmwa kwa ala aĩke, nowe wanengie vinya nĩthĩwe mũtũmwa kwa andũ ma mbaĩ ingĩ, 9 na yĩla mamanyie ũseo mwingĩ ũla nanengetwe, Yakovo na Keva * na Yoana, ala moonekaa ta ituĩ, nĩmatũnengie twĩ na Valanava kw’oko kwa aũme kwa mũamba, * nĩ kana tũthi kwa andũ ma mbaĩ ingĩ namo maithi kwa ala aĩke. 10 Na no ũndũ ũmwe matũkũlilye twĩke, naw’o nĩ kũsũanĩa ĩũlũ wa ala ngya, na ũndũ ũsu o naw’o nĩndatĩte mũno kũwĩka.

11 Ĩndĩ yĩla Keva * wookie Andiokia nĩnaleanile nake ũthyũ kwa ũthyũ, nũndũ vate nzika aĩ na mavĩtyo. * 12 Nĩkwĩthĩwa andũ amwe kuma kũla kwĩ Yakovo matavikĩte, nĩwaĩsanĩaa na andũ ma mbaĩ ingĩ, ĩndĩ yĩla mavikie aeka kwĩka ũu na eevatha, aikĩa ala maĩ aĩke. 13 Na Ayuti ala angĩ o namo makwatana nake nthĩnĩ wa wangangany’a ũsu, nginya o na Valanava eetĩkĩlana namo nthĩnĩ wa wangangany’a woo. 14 Ĩndĩ yĩla noonie kana mayekalaa kwosana na ũw’o wa ũvoo mũseo, nĩnamwĩie Keva * ũũ mbee woo onthe: “Ethĩwa we, o na kau wĩ Mũyuti, wĩkalaa o tondũ andũ ma mbaĩ ingĩ mekalaa na ti ũndũ Ayuti mekalaa, ũtonya ata kũmathing’ĩĩsya andũ ma mbaĩ ingĩ mekale kwosana na syĩthĩo sya Ayuti?”

15 Ithyĩ ala twĩ Ayuti kwa kũsyawa, na tũi eki ma naĩ kuma kwa andũ ma mbaĩ ingĩ, 16 nĩtwĩsĩ kana mũndũ ndatalĩlawa ũlũngalu nũndũ wa kwĩka mawĩa ala mĩao ĩwetete, ĩndĩ nũndũ wa mũĩkĩĩo nthĩnĩ wa Yesũ Klĩsto. Kwoou, ithyĩ nĩtũmũĩkĩĩe Klĩsto Yesũ nĩ kana tũtalĩlwe ũlũngalu kwĩsĩla mũĩkĩĩo nthĩnĩ wa Klĩsto ĩndĩ ti ũndũ wa kwĩka mawĩa ala mĩao ĩwetete, nĩkwĩthĩwa vaiĩ mũndũ o na ũmwe ũkatalĩlwa ũlũngalu nũndũ wa kwĩka mawĩa ala mĩao ĩwetete. 17 Yu ethĩwa twĩoneka twĩ eki ma naĩ yĩla tũũmantha ũlũngalu kwĩsĩla Klĩsto, we Klĩsto nĩ mũthũkũmi wa naĩ? Aiee! 18 Ethĩwa nĩngwaka ĩngĩ maũndũ o ala naomboaa, nĩonany’a kana nĩ mũvĩtany’a. 19 Nũndũ kwĩsĩla mĩao nĩnakwie maũndũnĩ ma mĩao, nĩ kana nĩthĩwe thayũ kwondũ wa Ngai. 20 Nĩathĩĩĩtwe mũtĩnĩ vamwe na Klĩsto. Nyie ndi thayũ, ĩndĩ nĩ Klĩsto wĩ thayũ e ngwatanĩo vamwe nakwa. Nĩ w’o kana thayũ ũla nĩkalaa nthĩnĩ wa mwĩĩ, nĩkalaa nũndũ wa mũĩkĩĩo nthĩnĩ wa Mwana wa Ngai, ũla wambendie na eenengane we mwene kwondũ wakwa. 21 Nyie ndiũlea ũseo mwingĩ wa Ngai, nũndũ ethĩwa ũlũngalu ũkwatĩkanaa kwĩsĩla mĩao, vate nzika Klĩsto akwie mana.

3 Inyw’ĩ Akalatia atumanu! Nũũ ũla ũmũlikĩtye ũthũkunĩ ũũ, inyw’ĩ ala Yesũ Klĩsto woonaniw’e ũtheinĩ kwenyu, e mũathĩĩe mũtĩnĩ? 2 Nĩenda kũmũkũlya ũndũ ũũ ũmwe: Inyw’ĩ mwakwatie veva nũndũ wa kwĩka mawĩa ala mĩao ĩwetete, kana nũndũ wa kũĩkĩĩa maũndũ ala mweewie? 3 Inyw’ĩ ko mũtumanĩte ata? Ĩtina wa kwambĩĩa vevanĩ, mwĩminĩĩa mwĩĩnĩ? 4 Kũthĩna kw’onthe kũla mwathĩnie kwaĩ o kwa mana? Ethĩwa nĩ w’o kwaĩ kwa mana. 5 Kwoou, we ũla ũmũnengae veva na akeka syama katĩ wenyu ekaa ũu nũndũ nĩmwĩkaa mawĩa ala mĩao ĩwetete, kana ekaa ũu nũndũ nĩmwaĩkĩĩie maũndũ ala mweewie? 6 O nake Avalaamu “aĩ na mũĩkĩĩo nthĩnĩ wa Yeova, na atalĩlwa ũu kwĩthĩwa nĩ ũlũngalu.”

7 Vate nzika nĩmwĩsĩ kana andũ ala me na mũĩkĩĩo nĩmo ana ma Avalaamu. 8 Na yu nũndũ ĩandĩko nĩyoonanisye kuma tene kana Ngai aĩ amatalĩle andũ ma mbaĩ ingĩ ũlũngalu kwĩsĩla mũĩkĩĩo, nĩyamũmanyĩthisye Avalaamu ũvoo mũseo kuma tene, yĩkyasya: “Kwĩsĩla kwaku mbaĩ syonthe ikaathimwa.” 9 Kwoou andũ ala me na mũĩkĩĩo nĩmaathimawa vamwe na Avalaamu, ũla waĩ na mũĩkĩĩo.

10 Onthe ala mekwatasya mawĩa ala mĩao ĩwetete nĩ aumanĩe, nũndũ nĩkũandĩkĩtwe: “Nĩ mũumanĩe mũndũ o na wĩva ũla ũtaendeeaa kwĩka maũndũ onthe ala maandĩkĩtwe ĩvukunĩ ya kũkũnzwa ya Mĩao.” 11 O na ĩngĩ, nĩtwonete nesa kana vaiĩ mũndũ o na ũmwe ũtalĩlawa ũlũngalu methonĩ ma Ngai nũndũ wa mĩao, nĩkwĩthĩwa “ũla mũlũngalu akekala thayũ nũndũ wa mũĩkĩĩo.” 12 Na mũsingi wa ĩla mĩao ti mũĩkĩĩo. Ĩndĩ, “mũndũ o na wĩva ũla wĩkaa maũndũ aa akekala thayũ nũndũ wamo.” 13 Klĩsto nĩwatũthooie, na atũthasya kuma kĩumonĩ kya ĩla Mĩao kwa kũtw’ĩka kĩumo kwondũ witũ, nũndũ nĩkũandĩkĩtwe: “Nĩ mũumanĩe kĩla mũndũ ũathĩĩawa mũtĩnĩ.” 14 Ũu weethĩiwe nĩ kana ũathimo wa Avalaamu ũvikĩe andũ ma mbaĩ ingĩ kwĩsĩla Klĩsto, nĩ kana twĩthĩwe tũtonya kũkwata veva mũtheu ũla Ngai watwathie nũndũ wa mũĩkĩĩo witũ.

15 Ana-a-asa, nĩneena ngĩtũmĩa ngelekany’o ya ũndũ andũ mekaa: Ũtianĩo wamina kũlũlũmĩĩlw’a, o na ethĩwa no kwĩsĩla mũndũ, vaiĩ mũndũ ũtonya kũũmina kana akawongeleela maũndũ angĩ. 16 Na mawatho mataviw’e Avalaamu na ũsyao wake. Ĩandĩko yĩyaĩtye, “na kwa nzyawa syaku,” ta yĩkwonany’a andũ aingĩ. Ĩndĩ yaĩtye, “na kwa ũsyao waku,” yĩyonany’a mũndũ ũmwe, nake nĩ Klĩsto. 17 O na ĩngĩ nĩasya atĩĩ: Mĩao ĩla yesie kwĩthĩwa vo ĩtina wa myaka 430 ndĩvetaa ũtianĩo ũla waĩ weekiwe nĩ Ngai, nĩ kana ĩmine watho. 18 Nũndũ ethĩwa yu mũsingi wa ũtiĩwa nĩ mĩao, ũu nĩ kwonany’a kana mũsingi wa ũtiĩwa ti watho ĩngĩ; ĩndĩ nũndũ wa ũseo wake, Ngai nũmũnengete Avalaamu ũtiĩwa kwĩsĩla watho.

19 Na yu ĩndĩ Mĩao nĩ ya kĩ? Mĩao yanenganiwe nĩ kana yonany’e mavĩtyo nginya ũsyao ũla wanengetwe watho ũsu ũvike; na yanenganiwe kwĩsĩla alaĩka namo mamĩnengane kwĩsĩla kw’oko kwa mwĩw’anĩthya. 20 Na vayĩthĩawa mwĩw’anĩthya ethĩwa ũtianĩo ũkonetye mũndũ o ũmwe, ĩndĩ Ngai no ũmwe ũla waumisye watho. 21 Yo Mĩao nĩleanĩte na mawatho ma Ngai? Aiee! Nũndũ ta kethĩwa nĩkwanenganiwe mĩao ĩtonya kũete thayũ, vate nzika ũlũngalu wĩthĩwa wakwatĩkanie kwĩsĩla mĩao. 22 Ĩndĩ Ĩandĩko nĩyanenganie maũndũ onthe kyovonĩ kya naĩ, nĩ kana watho ũla wumanaa na mũĩkĩĩo nthĩnĩ wa Yesũ Klĩsto ũnengwe ala me na mũĩkĩĩo.

23 Ĩndĩ mũĩkĩĩo ũtanamba kũvika nĩtwasũvĩĩtwe ungu wa mĩao, tũnenganĩtwe kyovonĩ, tweteele mũĩkĩĩo ũla waĩ vakuvĩ kũvuanw’a. 24 Kwoou Mĩao nĩyatw’ĩkie mũsũvĩi * witũ wa kũtũtongoesya nginya kwa Klĩsto nĩ kana tũtalwe kwĩthĩwa alũngalu kwĩsĩla mũĩkĩĩo. 25 Ĩndĩ yu nũndũ mũĩkĩĩo nĩ mũviku, tũi ungu wa mũsũvĩi * ĩngĩ.

26 Nĩ w’o kana inyw’onthe mwĩ ana ma Ngai nũndũ wa mũĩkĩĩo wenyu nthĩnĩ wa Klĩsto Yesũ. 27 Nũndũ inyw’onthe ala mwavatisiwe nthĩnĩ wa Klĩsto nĩmwĩvw’ĩkĩte Klĩsto. 28 Vaiĩ Mũyuti kana Mũkiliki, vaiĩ ngombo kana mũndũ mũthasye, vaiĩ mũndũũme kana mũndũ mũka, nũndũ inyw’onthe mwĩ kĩndũ kĩmwe nthĩnĩ wa ngwatanĩo vamwe na Klĩsto Yesũ. 29 O na ĩngĩ, ethĩwa mwĩ ma Klĩsto, vate nzika mwĩ ũsyao wa Avalaamu, atiĩwa kwosana na watho.

4 Yu nĩasya kana ethĩwa ũla ũkatiĩwa syĩndũ no mwana mũnini, ndethĩawa e kĩvathũkany’o na ngombo, o na kau nĩwe vwana wa syĩndũ syonthe, 2 ĩndĩ ethĩawa e ungu wa asũvĩi na aũngamĩi ma nyũmba nginya mũthenya ũla ĩthe ũvangĩte. 3 O ta ũu, o naitũ yĩla twaĩ syana nĩtwatw’ĩkĩthĩtw’e ngombo nĩ maũndũ ma mũsingi ma nthĩ ĩno. * 4 Ĩndĩ yĩla ĩvinda yeanĩie, Ngai nĩwatũmie Mwana wake, ũla wasyaiwe nĩ mũndũ mũka na eethĩwa ungu wa mĩao, 5 nĩ kenda amathasye kwa kũmathooa ala me ungu wa mĩao, nĩ kana tũtuwe ana.

6 Na yu nũndũ mwĩ ana, Ngai nũtũmĩte veva wa Mwana wake ngoonĩ sitũ, na veva ũsu ũtumaa twĩtana na wasya mũnene: “Abba, * Asa!” 7 Kwoou ndwĩ ngombo ĩndĩ wĩ mwana; na ethĩwa wĩ mwana, Ngai nũkũtw’ĩte mũtiĩwa.

8 O na vailye oou, yĩla mũtamwĩsĩ Ngai, mwaĩ ngombo sya ngai ite sya w’o. 9 Ĩndĩ nũndũ yu nĩmũmwĩsĩ Ngai, kana no mwasye, yu nũndũ Ngai nũmwĩsĩ, nĩkĩ mũũsyokea maũndũ ma mũsingi monzu na matatethya na kwenda kũtw’ĩka ngombo sya maũndũ asu ĩngĩ? 10 Nĩmũtataa mũno kũkwata mĩthenya na myei na mavinda na myaka. 11 Nĩ na wia kwondũ wenyu, nũndũ nĩvatonyeka ngethĩwa nanangĩte vinya wakwa mana kwondũ wenyu.

12 Ana-a-asa, nĩngũmwĩsũva, ĩthĩwai mũilye takwa, nũndũ o nakwa nailye tenyu. Mũyaambĩtĩsya. 13 Ĩndĩ nĩmwĩsĩ kana ũwau wakwa nĩw’o watumie nĩkwata mwanya wa kũmũtavya ũvoo mũseo ĩvinda ya mbee. 14 Ĩndĩ o na kau ũwau wakwa waĩ ĩtatwa kwenyu, mũyaambũthya kana kũmena; * ĩndĩ mwanthokisye ta mũlaĩka wa Ngai, ta Klĩsto Yesũ. 15 Ũtanu ũla mwaĩ naw’o ũĩ va? Nũndũ nĩngũkũsĩĩa ĩũlũ wenyu kana ta kethĩwa vaĩ vatonyeka mwĩthĩwa mwaumisye metho menyu mũkanenga. 16 Kwoou, nyie nĩndw’ĩkĩte mũmaitha wenyu nũndũ wa kũmũtavya ũla w’o? 17 Me na kĩthito kya kũmũkusya mwĩthĩwe moo, ĩndĩ mate na kĩeleelo kĩseo; meenda kũmũveta vala nĩĩ, nĩ kana mwĩthĩwe na mea ma kũmaatĩĩa. 18 Ĩndĩ nũseo mũndũ kũmũmantha inyw’ĩ mavinda onthe na kĩthito e na kĩeleelo kĩseo, na ti o yĩla nĩ vamwe nenyu, 19 inyw’ĩ syana syakwa nini, inyw’ĩ ala nĩ na woo ĩngĩ wa kũmũsyaa nginya Klĩsto ombĩke nthĩnĩ wenyu. 20 No nende kwĩthĩwa vamwe nenyu oyu na kũneena kwa nzĩa yĩ kĩvathũkany’o, nĩkwĩthĩwa nyie nĩ mũsaanĩsye nũndũ wenyu.

21 Kwandavyei inyw’ĩ ala mũkwenda kwĩthĩwa mwĩ ungu wa mĩao, Inyw’ĩ no mwĩw’aa ũndũ Mĩao yaĩtye? 22 Kwa ngelekany’o, nĩkũandĩkĩtwe kana Avalaamu aĩ na ana elĩ, ũmwe asyaĩtwe nĩ ũla mũthũkũmi mwĩĩtu na ũla ũngĩ asyaĩtwe nĩ mũndũ mũka mũthasye; 23 ĩndĩ ũla wasyaĩtwe nĩ ũla mũthũkũmi mwĩĩtu, asyaĩtwe kwosana na mwĩĩ, nake ũla wasyaĩtwe nĩ mũndũ mũka mũthasye, asyaĩtwe kwosana na watho. 24 Maũndũ asu no moswe ta ngelekany’o; nũndũ aka asu meonany’a motianĩo elĩ, ũmwe wa Kĩĩma kya Sinai, ũla ũsyaaa syana sya ũkombo, naw’o nĩ Akali. 25 Yu Akali nĩ Kĩĩma kya Sinai, kĩĩma kĩla kĩ nthĩ ya Alavu, nakyo nĩ Yelusaleme ya ũmũnthĩ, nũndũ e ũkombonĩ vamwe na syana syake. 26 Ĩndĩ Yelusaleme ya ĩũlũ nĩ nthasye, na nĩyo inyia witũ.

27 Nũndũ nĩkũandĩkĩtwe: “Tana we mũndũ mũka ngũngũ ũla ũtasyaaa; ũkĩlya wasya ũsĩlĩle, we mũndũ mũka ũla ũtaaĩw’a woo wa kũsyaa; nũndũ syana sya mũndũ mũka ũtiĩtwe nĩ mbingĩ kwĩ sya mũndũ mũka ũla wĩ na mũũme.” 28 Yu ana-a-asa, mwĩ syana sya watho o ta Isaka. 29 Ĩndĩ o tondũ kwailye ĩvinda yĩu, ũla wasyaĩtwe kwosana na mwĩĩ nĩwambĩĩie kũthĩny’a ũla wasyaĩtwe kwosana na veva, na now’o kũilye ũmũnthĩ. 30 O na ũu wĩ o vo, yo ĩandĩko yaĩtye ata? “Lũngya mũthũkũmi mwĩĩtu na mwana wake, nũndũ mwana wa mũthũkũmi mwĩĩtu ndatonya kwĩthĩwa mũtiĩwa vamwe na mwana wa mũndũ mũka mũthasye.” 31 Kwoou ana-a-asa, ithyĩ twĩ syana sya mũndũ mũka mũthasye, ĩndĩ ti sya mũthũkũmi mwĩĩtu.

5 Na Klĩsto nĩwatũthaisye nĩ kana twĩthĩwe na ũthasyo ũsu. Kwoou, ũngamai mwĩ alũmu, na mũikaeke mwovwe ĩngĩ ĩsokinĩ ya ũkombo.

2 Sisyai! Nyie Vaulo nĩmũtavya kana ethĩwa nĩmũkwaĩkwa, Klĩsto eĩthĩwa ate na ũtethyo kwenyu. 3 O na ĩngĩ, nĩtavya kĩla mũndũ waĩkawa kana no nginya aatĩĩe Mĩao yonthe. 4 Inyw’ĩ ala mũkwenda kũtalĩlwa ũlũngalu kwĩsĩla mĩao, mwĩ avathane na Klĩsto; o na nĩmumĩte ũseonĩ wake mwingĩ. 5 Ĩndĩ kwĩsĩla veva, ithyĩ a vaitũ nĩtweteele na mea ũlũngalu ũla tũkakwata nũndũ wa mũĩkĩĩo. 6 Nũndũ kwa ala mekalaa me ngwatanĩo vamwe na Klĩsto Yesũ, kwaĩkwa kana kũlea kwaĩkwa ti ũndũ wa vata, kĩla kya vata nĩ mũĩkĩĩo ũla ũtethasya wĩa kwa nzĩa ya wendo.

7 Mwasembete nesa. Nũũ wamũsiĩĩie mwaeka kũatĩĩa ũla w’o? 8 Kũthing’ĩĩw’a kwa mũthemba ũsu kũyumĩte kwa Ũla ũmwĩtaa. 9 Ĩlawa ĩnini nĩyĩkaatasya ngũmbwa yonthe ya mũtu. 10 Nĩ na mũĩkĩĩo kana inyw’ĩ ala mwĩ ngwatanĩo vamwe na Mwĩaĩi mũikethĩwa na woni wĩ kĩvathũkany’o; ĩndĩ ũla ũkũtuma mũkwatwa nĩ thĩna akakwata ũsilĩlo ũla ũmwaĩlĩte, o na ethĩwa nũũ. 11 Ĩndĩ nyie a vakwa, ana-a-asa, ethĩwa nĩtavany’a ĩũlũ wa kwaĩkwa, nĩkĩ o na yu ngũthĩnw’a? Nũndũ ethĩwa ũu nĩ w’o ngwĩka, mũtĩ wa mathĩna * ndwaĩle ĩngĩ kwĩthĩwa kĩndũ kya kũlulutĩkya. 12 No nende aũme ala meũtata kũmũthingithya metile mamutha moo ene ma ũsyai. *

13 Mweetiwe mwĩthĩwe na ũthasyo, ana-a-asa; ate o mũikatũmĩe ũthasyo ũsu ta kĩtumi kya kwĩka mawendi ma mwĩĩ, ĩndĩ kwondũ wa wendo thũkũmanai inyw’ĩ kwa inyw’ĩ. 14 Nũndũ Mĩao yonthe nĩyĩanĩĩtw’e * nthĩnĩ wa mwĩao ũmwe, naw’o nĩ: “No nginya ũmwende mũtũi waku o ũndũ wĩyendete.” 15 Ĩndĩ ethĩwa nĩmũkũendeea kũũmana na kũĩsana, sisyai mũikese kũminana.

16 Ĩndĩ nĩasya, Endaai mũtongoew’e nĩ veva na mũikeka wendi wa mwĩĩ nongi. 17 Nĩkwĩthĩwa mwĩĩ nũndũ wa mawendi maw’o, nũleanaa na veva, naw’o veva nũleanaa na mwĩĩ; isu syelĩ nileanaa, na ũu ũituma mũteka maũndũ ala mũkwenda kwĩka. 18 O na ĩngĩ, ethĩwa mũtongoew’e nĩ veva, mũi ungu wa mĩao.

19 Yu mawĩa ma mwĩĩ nĩmonekete ũtheinĩ, namo nĩ ũlaalai, * ũvuku, kwĩka maũndũ mavuku na ngũlũ, * 20 kũthaitha mĩvw’anano, kũneenany’a na maveva, ũmaitha, ĩteta, kĩwĩu, mothilĩku, ngananĩo, mũaanĩko, mũtilĩkangano, 21 kwĩw’ĩa angĩ woo, ũnywi, * mboka itaĩle, na maũndũ angĩ ta asu. Nĩmũkany’a kwĩ tene ĩũlũ wa maũndũ asu, o tondũ namũkanisye, kana ala mekaa maũndũ asu maikatiĩwa Ũsumbĩ wa Ngai.

22 Ĩndĩ, ũsyao wa veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, mũĩkĩĩo, 23 ũuu, na kwĩsiĩĩa. Vaiĩ mwĩao ũleanĩte na maũndũ asu. 24 O na ĩngĩ, ala ma Klĩsto Yesũ nĩmaathĩĩie mwĩĩ woo mũtĩnĩ vamwe na mĩmeo na mawendi maw’o.

25 Ethĩwa twĩkalaa kwosana na veva, o ta ũu ekai tũendae nesa tũtongoew’e nĩ veva. 26 Tũikethĩwe tũyĩkathĩĩa, kũtuma vethĩwa na masindano katĩ waitũ, na kwĩw’anĩa kĩwĩu.

6 Ana-a-asa, ethĩwa mũndũ nĩwoosa ĩtambya yĩtaĩle atesĩ, inyw’ĩ ala mwĩ na nguma sya kĩ-veva tatai kũmũlũnga mũndũ ta ũsu mwĩ na veva wa ũuu. Ĩndĩ ĩsũvĩei nĩ kana o nenyu mũikese kũlika ĩtatwanĩ. 2 Endeeai kũkuanĩa mĩio mĩito, na kwa nzĩa ĩsu mwĩĩthĩwa mũyĩanĩsya mwĩao wa Klĩsto. 3 Nũndũ ethĩwa mũndũ o na wĩva esũanĩa we nĩ wa vata nake nĩ vathei, nũkwĩkenga. 4 Ĩndĩ eka kĩla ũmwe aosye meko make mwene, na eeka ũu akeethĩwa na kĩtumi kya kũtana nũndũ wake mwene, ĩndĩ ti kwa kwĩyĩelekany’a na mũndũ ũngĩ. 5 Nũndũ kĩla mũndũ akakua mũio wake mwene. *

6 O na ĩngĩ, eka mũndũ o na wĩva ũla ũkũmanyĩw’a * amũaĩe mũmanyĩsya wake syĩndũ syonthe nzeo.

7 Mũikakengeke: Ngai ti wa kũvũĩwa ngũĩ. Nũndũ o kĩla mũndũ ũvandaa, nokyo ũkaketha; 8 nũndũ ũla ũvandaa kwosana na mwĩĩ wake akaketha wanangĩko kumana na mwĩĩ wake, ĩndĩ ũla ũvandaa kwosana na veva akaketha thayũ wa tene na tene kumana na veva. 9 Kwoou tũikaeke kwĩka ũseo, nũndũ ĩvinda yavika tũkaketha twalea kũnoa. * 10 Kwondũ wa ũu, ĩvinda yonthe yĩla twĩ na mwanya wa kwĩka ũu, ekai tũmeke andũ onthe ũseo, na mũno mũno ana-a-asa maitũ nthĩnĩ wa mũĩkĩĩo.

11 Sisyai ũndũ nĩmũandĩkĩĩte na kw’oko kwakwa nthoo inenevete.

12 Onthe ala mekwenda kwendeesya andũ nĩmo meũtata kũmũthing’ĩĩsya mwaĩkwe, na mekaa ũu nĩ kana maikathĩnw’e nũndũ wa mũtĩ wa mathĩna * wa Klĩsto. 13 Nĩkwĩthĩwa o na ala maĩkawa mayĩatĩĩaa Mĩao, ĩndĩ meenda inyw’ĩ mwaĩkwe nĩ kana methĩwe na kĩtumi kya kwĩkathĩĩa ĩũlũ wa mwĩĩ wenyu. 14 Ĩndĩ nyie ndikaaĩse kwĩkathĩĩa nongi ũndũnĩ ũngĩ eka ĩũlũ wa mũtĩ wa mathĩna * wa Mwĩaĩi waitũ Yesũ Klĩsto, ũla kwĩsĩla kwake nthĩ nĩ mbũae methonĩ makwa, na kwĩsĩla kwake ngoawa methonĩ ma nthĩ. 15 Nũndũ kwaĩkwa kana kũlea kwaĩkwa tikw’o ũndũ ũla wa vata, kĩla kya vata nĩ mũndũ kwĩthĩwa kyũmbe kyeũ. 16 Na onthe ala mekalaa kwosana na mwĩao ũũ wa mwĩkalĩle, mũuo na tei nĩsyĩthĩwe ĩũlũ woo, ĩĩ, ĩũlũ wa Isilaeli ma Ngai.

17 Kuma yu na kũendeea mũndũ o na wĩva ndakanthĩny’e, nũndũ mwĩĩnĩ wakwa nĩ na maũvano mekwonany’a nĩ ngombo ya Yesũ.

18 Ũseo mwingĩ wa Mwĩaĩi waitũ Yesũ Klĩsto nĩwĩthĩwe na veva ũla inyw’ĩ ana-a-asa mwonanasya. Ameni.