VALŨA KWA AEVESO

1 Nyie Vaulo, mũtũmwa wa Klĩsto Yesũ nũndũ wa kwenda kwa Ngai, kwa atheu ala me Eveso na aĩkĩĩku nthĩnĩ wa ngwatanĩo vamwe na Klĩsto Yesũ:

2 Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto.

3 Nataĩwe Ngai, Ĩthe wa Mwĩaĩi waitũ Yesũ Klĩsto, nĩkwĩthĩwa nũtũathimĩte na kĩla ũathimo wa veva twĩ ngwatanĩo vamwe na Klĩsto ĩtunĩ, 4 nũndũ nĩwatũnyuvie twĩthĩwe twĩ ngwatanĩo vamwe nake * mbee wa mwambĩlĩlyo wa nthĩ, nĩ kana twĩthĩwe twĩ atheu na tũte na ĩlanga mbee wake nthĩnĩ wa wendo. 5 Nũndũ nĩwavangie kuma tene kana tũkatuwa ana make kwĩsĩla Yesũ Klĩsto, o ũndũ we mwene woonie wĩ ũseo kwosana na kwenda kwake, 6 nĩ kana ataĩwe nũndũ wa ũseo wake mwingĩ ũla watwĩkie ithyĩ kwĩsĩla Mwana wake mwendwa. 7 Na nũndũ wake nĩtũthaĩtw’e kwĩsĩla wovosyo ũla wumanaa na nthakame yake, ĩĩ, ũekeo wa naĩ sitũ, kwosana na ũthwii wa ũseo wake mwingĩ.

8 Nĩwatumie ũseo ũsu wake mwingĩ wongeleka kũla tũĩ kwa nzĩa ya ũĩ na ũmanyi w’onthe * 9 kwa kũtũmanyĩthya kĩmbithĩ kĩtheu kya kwenda kwake. Na kwosana na ũndũ we mwene woonie wĩ ũseo, nĩwatwie 10 kwĩthĩwe na ũũngamĩi ĩvinda yĩla yĩnyuvĩtwe yeanĩa, nĩ kana ombany’e syĩndũ syonthe nthĩnĩ wa Klĩsto, syĩndũ ila syĩ ĩtunĩ na syĩndũ ila syĩ ĩũlũ wa nthĩ. Ĩĩ, nthĩnĩ wake 11 ũla ithyĩ twĩthĩĩtwe twĩ ngwatanĩo vamwe nake na tũkatuwa atiĩwa, nũndũ nĩwatũvangĩie kuma tene kwosana na kĩeleelo kyake kya kwĩanĩasya maũndũ onthe o ũndũ we mwene ũtw’ĩte kwosana na kwenda kwake, 12 nĩ kana kwĩsĩla ithyĩ ala twaĩ ma mbee kũmwĩkwatya Klĩsto, Ngai ataĩwe na kũkumw’a. 13 Ĩndĩ o nenyu nĩmwamwĩkwatisye ĩtina wa kwĩw’a ũla w’o, naw’o nĩ ũvoo mũseo ĩũlũ wa ũtangĩĩo wenyu. Ĩtina wa kũĩkĩĩa, nĩwamwĩkĩie ũsiĩlo kwĩsĩla veva mũtheu ũla wathanĩtwe, 14 naw’o nĩ ũĩkĩĩthyo wa kana tũkakwata ũtiĩwa witũ, e na kĩeleelo kya kũthasya ala make mwene kwĩsĩla wovosyo, nĩ kana ataĩwe mũno.

15 Nĩkyo kĩtumi o nakwa, nũndũ nĩnĩw’ĩte mũĩkĩĩo ũla mwĩ naw’o nthĩnĩ wa Mwĩaĩi Yesũ na ũndũ mũmendete atheu onthe, 16 ndaekaa kũtũnga mũvea nũndũ wenyu. Na nĩnĩmũwetaa inyw’ĩ kĩla ĩvinda mboyanĩ syakwa, 17 nĩ kana Ngai wa Mwĩaĩi waitũ Yesũ Klĩsto, Ĩthe wa ũtheu mũtisu w’onthe, atonye kũmũnenga veva mũtheu wa ũĩ na ũvuany’o wa ũmanyi wa w’o ĩũlũ wake. 18 Nũtumĩte metho ma ngoo syenyu mona nesa, nĩ kana mũmanye nĩ wĩkwatyo wĩva wamwĩtĩie, na ũthwii mwingĩ ũla wiĩe atheu ta ũtiĩwa, 19 na ũndũ vinya wake wingĩvĩte kwondũ witũ ithyĩ etĩkĩli. Na ũu wonekaa kwĩsĩla wĩa ũla ũtethasya aitũmĩa vinya wake mũnene, 20 ũla woonanisye kwelekela Klĩsto yĩla wamũthayũũkisye na amwĩkalya kw’okonĩ kwake kwa aũme ĩtunĩ, 21 ĩũlũ mũno kũvĩtũka kĩla silikalĩ na ũkũmũ na vinya na ũsumbĩki na ĩsyĩtwa o na yĩva, o na eka ĩvindanĩ yĩĩ, ĩndĩ o na yĩla yũkĩte. 22 O na nĩwaiie syĩndũ syonthe ungu wa nyaaĩ syake na amũtw’ĩkĩthya mũtwe wa syĩndũ syonthe kĩkundinĩ, 23 nakyo nĩ mwĩĩ wake, wusũunĩ wake ũla wusũasya syĩndũ syonthe kwa nzĩa syonthe.

2 O na ĩngĩ, Ngai nĩwatumie mwĩthĩwa thayũ, o na kau mwaĩ akw’ũ nũndũ wa mavĩtyo na naĩ syenyu, 2 ila nthĩnĩ wasyo mwaendaa kwosana na mĩendele ya nthĩ ĩno, kwosana na mũnene ũla ũsumbĩkĩte ũkũmũ wa nzeve, nayo nĩ veva ũla ũtethasya wĩa nthĩnĩ wa ana ma ũlei. 3 Ĩĩ, ĩvinda yĩmwe ithyonthe twekalaa katĩ woo kwosana na mawendi ma mwĩĩ witũ, tũyĩka maũndũ kwosana na kwenda kwa mwĩĩ na kwosana na mosũanĩo maitũ, na kuma kũsyawa ithyĩ twaĩ syana sya ũthilĩku o ta andũ ala angĩ. 4 Ĩndĩ nũndũ Ngai e tei mwingĩ, na nũndũ nũtwendete mũno, 5 nĩwatumie twĩthĩwa thayũ vamwe na Klĩsto, o na yĩla twaĩ akw’ũ nũndũ wa mavĩtyo maitũ—nenyu nĩmũtangĩĩĩtwe nũndũ wa ũseo wake mwingĩ. 6 O na ĩngĩ, nĩwatũthayũũkisye vamwe na Klĩsto Yesũ na atwĩkalya nthĩ ĩtunĩ twĩ ngwatanĩo vamwe nake, 7 nĩ kana ĩvinda yĩla yũkĩte onany’e ũthwii ũtathimĩka wa ũseo wake mwingĩ kwa kũtwony’a mumo wake ithyĩ ala twĩ ngwatanĩo vamwe na Klĩsto Yesũ.

8 Nũndũ kwĩsĩla ũseo mwingĩ wa Ngai nĩmũtangĩĩĩtwe nũndũ wa mũĩkĩĩo, na ti kwondũ wa meko menyu ene; ĩndĩ nĩ kwondũ wa mũthĩnzĩo wa Ngai. 9 Aiee, ti kumana na meko, nĩ kana mũndũ o na wĩva ndakethĩwe na kĩtumi kya kwĩkathĩĩa. 10 Ithyĩ twĩ wĩa wa moko ma Ngai na twoombiwe nthĩnĩ wa ngwatanĩo vamwe na Klĩsto Yesũ kwondũ wa meko maseo, ala Ngai wavangie kuma tene nĩ kana twĩkalae nthĩnĩ wamo.

11 Kwoou, lilikanai kana ĩvinda yĩmwe inyw’ĩ andũ ma mbaĩ ingĩ kumana na kũsyawa mweetawa “andũ mate aĩke” nĩ ala meetawa “andũ aĩke,” namo maĩkĩtwe na moko ma andũ. 12 Ĩvinda yĩu mũyaĩ na Klĩsto na nĩmwavathanĩtw’e na mbaĩ ya Isilaeli, mwaĩ aeni kwa ala motianĩo ma watho; mũyaĩ na wĩkwatyo, o na mũyaĩ na Ngai ĩũlũ wa nthĩ. 13 Ĩndĩ yu nũndũ mwĩ ngwatanĩo vamwe na Klĩsto Yesũ, inyw’ĩ ala tene mwaĩ kũasa mũno, nĩmũthengeeete vakuvĩ kwĩsĩla nthakame ya Klĩsto. 14 Nũndũ we nĩwe mũuo witũ, na nowe watw’ĩkĩthisye ikundi isu syelĩ kĩndũ kĩmwe na aomboa ũkũta wa katĩ ũla waiaanĩtye. 15 Kwĩsĩla mwĩĩ wake nĩwavetie ũmaitha ũla waĩ vo na aveta ĩla Mĩao yaĩ na motw’ĩo, nĩ kana atume ikundi syelĩ ila syĩ ngwatanĩo vamwe nake mwene syĩthĩwa mũndũ ũmwe mweũ na ayĩete mũuo, 16 na ayĩw’anĩthya vyũ andũ ma ikundi isu syelĩ methĩwe mwĩĩ ũmwe kwa Ngai kwĩsĩla mũtĩ wa mathĩna, * nũndũ kwĩsĩla kwake mwene nĩwaminie ũmaitha ũsu. 17 Na nĩwookie na amũtavya ũvoo mũseo wa mũuo inyw’ĩ ala mwaĩ kũasa mũno, o na ala maĩ vakuvĩ, 18 nũndũ kwĩsĩla kwake, ithyĩ ma ikundi isu syelĩ, twĩ na ũthasyo wa kũmũthengeea Asa nthĩnĩ wa veva ũmwe.

19 Kwoou mũi aeni kana andũ ma nthĩ ingĩ, ĩndĩ mwĩ ma nthĩ ĩmwe vamwe na atheu na mwĩ andũ ma nyũmba ya Ngai, 20 na nĩmwakĩtwe ĩũlũ wa mũsingi wa atũmwa na athani, nake Klĩsto Yesũ nĩwe ĩvia ya mũsingi ya kĩkotonĩ. 21 Na nthĩnĩ wa ngwatanĩo vamwe nake, nyũmba yonthe nĩkwatanĩtw’e vamwe nesa, na nĩyĩendeee kwĩana ĩtw’ĩke ĩkalũ ĩtheu ya Yeova. 22 Na nthĩnĩ wa ngwatanĩo vamwe nake o nenyu nĩmũendeee kwakwa vamwe mũtw’ĩke vandũ va Ngai va kwĩkala kwa nzĩa ya veva wake.

3 Kwondũ wa kĩtumi kĩu, nyie Vaulo, mwovwa nũndũ wa Klĩsto Yesũ kwondũ wenyu andũ ma mbaĩ ingĩ— 2 ethĩwa kwa w’o, nĩmweewie ĩũlũ wa ũũngamĩi wa ũseo mwingĩ wa Ngai ũla nanengiwe kwondũ wenyu, 3 kana nyie nĩnamanyĩthiw’e kĩmbithĩ kĩtheu kwĩsĩla ũvuany’o, o tondũ nĩandĩkĩte kwa ũkuvĩ. 4 Kwoou mwasoma valũa ũũ, mwĩĩthĩwa mũtonya kũmanya ũndũ nyie nĩeleetwe kĩmbithĩ kĩtheu ĩũlũ wa Klĩsto. 5 Nzyawanĩ ila ingĩ kĩmbithĩ kĩĩ kĩtheu kĩyaamanyĩthw’a ana ma andũ o tondũ yu kĩvuanĩtw’e kwĩsĩla veva mũtheu kwa atũmwa na athani make atheu, 6 ũu nĩ kwasya, andũ ma mbaĩ ingĩ nthĩnĩ wa ngwatanĩo vamwe na Klĩsto Yesũ na kwĩsĩla ũvoo mũseo, methĩwe atiĩwa vamwe naitũ na mayĩthĩwa mamutha vamwe naitũ ma ũla mwĩĩ na osi vamwe naitũ ma ũla watho. 7 Nĩnatw’ĩkie mũthũkũmi kwondũ wa kĩmbithĩ kĩtheu kwosana na mũthĩnzĩo wa ũseo mwingĩ wa Ngai ũla nanengiwe kwĩsĩla vinya wake.

8 Nyie, mũndũ ũla mũnini katĩ wa andũ onthe ala atheu, nĩnanengiwe ũseo mwingĩ nĩ kana nĩtavye andũ ma mbaĩ ingĩ ũvoo mũseo ĩũlũ wa ũthwii ũtathimĩka wa Klĩsto 9 nĩ kana nĩtetheesye kĩla mũndũ amanye ũũngamĩi wa kĩmbithĩ kĩtheu kĩla Ngai, ũla woombie syĩndũ syonthe, wĩthĩĩtwe avithĩte kwa ĩvinda yĩasa. 10 Eekie ũu nĩ kana ĩvindanĩ yĩĩ, silikalĩ na mokũmũ ala me ĩtunĩ mamanyĩthw’e ũndũ ũĩ wa Ngai wonanaw’a kwa nzĩa mbingĩ syĩ kĩvathũkany’o kwĩsĩla kĩkundi. 11 Na ũu nĩ kwosana na kĩeleelo kyake kya tene na tene kĩla wambĩĩisye kwĩsĩla Klĩsto Yesũ, Mwĩaĩi waitũ, 12 ũla kwĩsĩla kwake twĩ na ũthasyo ũũ wa kũneena, na ũthasyo wa kũmũthengeea Ngai twĩ na ũkũmbaũ nũndũ wa mũĩkĩĩo witũ nthĩnĩ wake. 13 Kwoou nĩmwĩsũva mũikakw’e ngoo nũndũ wa mathĩna makwa kwondũ wenyu nĩkwĩthĩwa ũu ũtumaa mũkwata ndaĩa.

14 Na nũndũ wa kĩtumi kĩu nĩtulya ndu kwa Ĩthe waitũ, 15 ũla ũnengete mĩsyĩ yonthe, ĩtunĩ na kũũ nthĩ, ĩsyĩtwa. 16 Nĩvoya nĩ kana kwĩsĩla ũtheu wake mũtisu na mwingĩ atume mwĩthĩwa na vinya nthĩnĩ wenyu, kwĩsĩla ũtonyi wa veva wake, 17 na nĩ kana kwĩsĩla mũĩkĩĩo wenyu mwĩthĩwe na Klĩsto ngoonĩ syenyu o vamwe na wendo. Ĩthĩwai mwĩ alũmu na mũtathingithĩka mũsinginĩ ũsu, 18 nĩ kana inyw’ĩ o vamwe na atheu onthe mwĩthĩwe mũtonya kũelewa nesa ũthanthau, na ũasa, na ũtũlu, na ũliku, 19 na kũmanya wendo wa Klĩsto, ũla nĩ wa vata mũno kũvĩtũka ũmanyi, nĩ kana musũw’e na wusũu w’onthe ũla Ngai ũnenganae.

20 Na kwa ũla, kwosana na vinya wake ũla ũtethasya wĩa nthĩnĩ witũ, ũtonya kwĩka maũndũ maingĩ mũno kũvĩtũka ala tũvoyete na kũsũanĩa, 21 kwake nĩkwĩthĩwe nguma kwĩsĩla kĩkundi na kwĩsĩla Klĩsto Yesũ nzyawanĩ syonthe tene na tene. Ameni.

4 Kwoou nyie, mwovwa nthĩnĩ wa Mwĩaĩi, nĩngũmwĩsũva mũendae ũndũ vaĩle kwosana na wĩto ũla mweetiwe naw’o, 2 mwĩ na wĩnyivyo w’onthe na ũuu, na mwĩ na wũmĩĩsyo, mũyũmĩanĩsya ene kwa ene wendonĩ, 3 na mũitata mũno kũendeea kwĩthĩwa na ũũmwe wa veva nthĩnĩ wa ngwatanĩo ya mũuo. 4 Ve mwĩĩ ũmwe, na veva ũmwe, o tondũ mweetiwe nthĩnĩ wa wĩkwatyo ũmwe; 5 Mwĩaĩi ũmwe, mũĩkĩĩo ũmwe, ũvatiso ũmwe; 6 Ngai ũmwe ũla nĩwe Ĩthe wa onthe, na nĩwe wĩ ĩũlũ wa syonthe na kwĩsĩla syonthe na nthĩnĩ wa syonthe.

7 Na yu ũseo mwingĩ nĩwanengiwe kĩla ũmwe waitũ kwosana na ũndũ Klĩsto watũthimĩie mũthĩnzĩo ũsu. 8 Nũndũ nĩkũandĩkĩtwe: “Yĩla wambatie ĩũlũ nĩwoosie andũ methĩwe mũtavo; nĩwanenganie aũme methĩwe mĩthĩnzĩo.” 9 Na yu ndeto “wambatie” yĩonany’a kyaũ? Yĩonany’a kana nĩwambie kũtheea isionĩ sya ĩtheo, nasyo nĩ nthĩ. 10 Na o ũsu watheeie nowe wambatie ĩũlũ mũno kũvĩtũka matu onthe, nĩ kana eanĩsye maũndũ onthe.

11 Na nĩwanenganie amwe methĩwe atũmwa, angĩ methĩwe athani, angĩ methĩwe atavany’a ma ũvoo mũseo, na angĩ methĩwe aĩthi na amanyĩsya, 12 nĩ kana malũnge atheu, mathũkũme angĩ, na mayaka mwĩĩ wa Klĩsto, 13 nginya ithyonthe tũvikĩĩe ũũmwe nthĩnĩ wa mũĩkĩĩo na ũmanyi wa w’o wa Mwana wa Ngai, na tũyĩthĩwa ta mũndũ mũima, na ũu nĩ kwasya twĩthĩwe na ũima o ta ũla wa Klĩsto. 14 Kwoou tũikethĩwe ĩngĩ ta syana, tũyĩkw’a kũũ na kũũ ta tũkwĩkw’a nĩ itulumo na kũkuwa kũũ na kũũ nĩ kĩseve o na kĩva kya ũmanyĩsyo kwĩsĩla ũseleke wa andũ, na kwĩsĩla nzĩa sya maũĩ na ũkengani. 15 Ĩndĩ tũneenae ũla w’o, na tũyĩana nthĩnĩ wa wendo maũndũnĩ onthe nĩ kana twĩthĩwe tũilye ta Klĩsto, ũla nĩwe mũtwe witũ. 16 Na kuma kwake, yĩla kĩla ĩleenyũ yeeka kĩla kyaĩlĩte, mwĩĩ w’onthe nũkwatanaw’a vamwe nesa na ũyĩthĩwa na wĩw’ano. Yĩla kĩla ĩleenyũ yatethya wĩa nesa, ũu ũtumaa mwĩĩ wĩana na kwĩyaka w’o mwene nthĩnĩ wa wendo.

17 Kwoou, ũũ nĩw’o ngwasya na kũkũsĩĩa nthĩnĩ wa Mwĩaĩi, kana yu mũyaĩlĩte kũendeea kwĩkala o ũndũ andũ ma mbaĩ ingĩ mekalaa, nũndũ mekalaa kwosana na mosũanĩo moo matatethya. * 18 Ilĩko syoo syĩ kĩvindunĩ na nĩmavathanĩtw’e na thayũ ũla wumaa kwa Ngai, nũndũ wa kũlea kũmanya kũla kwĩ nthĩnĩ woo na kwĩthĩwa me omũ ngoo. 19 Na nũndũ wa kwĩthĩwa mate na nthoni o na vanini, nĩmeenenganie ene maũndũnĩ mathũku * nĩ kana mekae na ĩtomo maũndũ mavuku ma kĩla mũthemba.

20 Ĩndĩ yĩla mweemanyĩisye, nĩmwamanyie kana Klĩsto ndailye ũu, 21 ethĩwa kwa w’o nĩmwamwĩwie na mwamanyĩw’a kwĩsĩla we, kwosana na ũw’o ũla Yesũ wamanyĩisye. 22 Nĩmwamanyĩiw’e mumye mwĩkalĩle wa tene ũla wosanĩte na meko menyu ma tene na ũla wanangawa nĩ mawendi maw’o ma ũkengani. 23 Na mwaĩle kũendeea kũtw’ĩkĩthw’a eũ nthĩnĩ wa vinya ũla ũtongoeasya ilĩko syenyu, 24 na nĩmwaĩle kwĩvw’ĩka mwĩkalĩle mweũ ũla woombiwe kwosana na kwenda kwa Ngai nthĩnĩ wa ũlũngalu wa w’o na ũĩkĩĩku.

25 Kwoou, nũndũ yu nĩmũvetete ũkengani, kĩla ũmwe nĩ aneene ũla w’o na mũtũi wake, nũndũ ithyonthe twĩ mamutha ma mwĩĩ ũmwe. 26 Thatai, ĩndĩ mũikeke naĩ; mũikaeke syũa yĩthũe o mũthatĩte; 27 mũikamũnenge Ndevili mwanya. 28 Ũla ũyaa ndakoye ĩngĩ; ĩndĩ natethye wĩa na kĩthito, aitethya wĩa mũseo na moko make, nĩ kana ethĩwe e na kĩndũ ũtonya kũmũnenga ũla wĩ na vata. 29 Ndeto mbou iikaume kanyw’anĩ wenyu, ĩndĩ neenaai ndeto o ila nzeo sya kwaka, kwosana na vata ũla wĩ vo, nĩ kana imatethye ala mekwĩw’a. 30 O na ĩngĩ, mũikew’ĩthasye veva mũtheu wa Ngai kyeva, ũla kwĩsĩla kwaw’o mweekĩiwe ũsiĩlo kwondũ wa mũthenya wa kũthaw’a kwĩsĩla wovosyo.

31 Vetai kwenyu kĩla mũthemba wa woo mwai, ũthatu, ũthilĩku, ĩteta, kũumana, na ũthũku w’onthe. 32 Ĩndĩ ĩw’anĩai tei na ĩnee, na mũiekeanĩa o tondũ Ngai wamũekeie na ngenda kwĩsĩla Klĩsto.

5 Kwoou, atĩĩai ngelekany’o ya Ngai ta syana syendetwe, 2 na endeeai kwĩthĩwa na wendo, o tondũ Klĩsto o nake watwendie na eenengane we mwene kwondũ witũ ethĩwe nthembo yĩ mũuke mũseo kwa Ngai.

3 Ũlaalai * na ũvuku wa kĩla mũthemba na ĩtomo o na iikawetwe katĩ wenyu, o tondũ vaĩle kwĩthĩwa vailye kwa ala atheu; 4 o na mwĩkalĩle wĩ nthoni kana kũneena ndeto sya ũtumanu kana ngũĩ nthũku, ala nĩ maũndũ mataĩle, vandũ va ũu, tũngaai mũvea. 5 Nũndũ inyw’ĩ ene nĩmwĩsĩ, o na nĩmũmanyĩte nesa kana vaiĩ kĩlaalai * kana mũndũ mũvuku kana mũndũ wĩ ĩtomo, ũu nĩ kwasya mũthaithi wa mĩvw’anano, wĩ na ũtiĩwa Ũsumbĩnĩ wa Klĩsto na wa Ngai.

6 Mũndũ o na wĩva ndakamũkenge na ndeto sya mana, nĩkwĩthĩwa nũndũ wa maũndũ asu ũthilĩku wa Ngai nĩwũkĩte ĩũlũ wa ana ma ũlei. 7 Kwoou, mũikethĩwe na ngwatanĩo vamwe namo; 8 nĩkwĩthĩwa ĩvinda yĩmwe mwaĩ kĩvindu, ĩndĩ yu mwĩ kyeni nthĩnĩ wa ngwatanĩo vamwe na Mwĩaĩi. Endaai ta syana sya kyeni, 9 nũndũ ũsyao wa kyeni wĩthĩawa na kĩla mũthemba wa ũseo na ũlũngalu na ũw’o. 10 Endeeai kwĩyĩĩkĩĩthya maũndũ ala metĩkĩlĩkaa kwa Mwĩaĩi; 11 na mũyĩeka kwĩka maũndũ ma kĩvindu matatethya; vandũ va ũu, mavuany’ei ũndũ mailye. 12 Nũndũ maũndũ ala mekaa kĩmbithĩnĩ me nthoni vyũ o na kũmaweta. 13 Na maũndũ ala meũvuanw’a nĩmonanĩtw’e ũtheinĩ nĩ kyeni, nũndũ kĩla ũndũ ũkwonanw’a ũtheinĩ ũtw’ĩkaa kyeni. 14 Nũndũ nĩkũandĩkĩtwe: “Amũka, we ũkomete, na thayũũka, na Klĩsto akaũmulĩka.”

15 Kwoou endeeai kũsisya nesa mwĩkalĩle wenyu ndũkethĩwe ũilye ta wa andũ mate oĩ ĩndĩ wĩthĩwe ũilye wa andũ oĩ, 16 mũitũmĩa ĩvinda yenyu nesa, nũndũ mĩthenya ĩno nĩ mĩthũku. 17 Kwondũ wa ũu ekai kwĩthĩwa atumanu, ĩndĩ manyai kwenda kwa Yeova nĩ kwĩva. 18 O na ĩngĩ, mũikanyw’e mbinyu mũmilwe, nũndũ nĩtonya kũtuma mwĩthĩwa na mĩkwa, ĩndĩ endeeai kusũwa nĩ veva. 19 Neenai ene kwa ene * na savuli, na mbathi sya kũmũkumya Ngai, na mbathi sya kĩ-veva, mũyina na kũmũtaĩa Yeova ngoonĩ syenyu, 20 kĩla ĩvinda mũkĩmũtũngĩa mũvea Ngai waitũ na Ĩthe waitũ kwondũ wa maũndũ onthe ĩsyĩtwanĩ ya Mwĩaĩi waitũ Yesũ Klĩsto.

21 Ĩnyivĩanĩsyei ene kwa ene nũndũ wa kũmũkĩa Klĩsto. 22 Iveti nĩsyĩnyivĩsye aũme masyo o tondũ syĩnyivĩasya Mwĩaĩi, 23 nũndũ mũndũũme nĩwe mũtwe wa kĩveti kyake o tondũ Klĩsto newe mũtwe wa kĩkundi, nake nĩwe mũtangĩĩi wa mwĩĩ ũũ. 24 Na o tondũ kĩkundi kĩmwĩnyivĩasya Klĩsto, o ta ũu iveti o nasyo syaĩle kũmenyivĩsya aũme masyo maũndũnĩ onthe. 25 Aũme, endeeai kũsyenda iveti syenyu, o tondũ Klĩsto wendie kĩkundi na eenengane mwene kwondũ wakyo, 26 nĩ kana akĩthesye kwa kũkĩthambya na kĩw’ũ kwĩsĩla ndeto ya Ngai, 27 nĩ kana atume kĩkundi kĩthĩwa kĩ kyanake vyũ methonĩ make kĩte na ĩlanga kana ũkũnzanu kana maũndũ angĩ ta asu, ĩndĩ kĩ kĩtheu na kĩte na ũndũ ũtaĩle.

28 O ta ũu aũme maĩle kũsyenda iveti syoo o ta mĩĩ yoo ene. Mũndũũme ũla wendaa kĩveti kyake eyendaa mwene, 29 nũndũ vaiĩ mũndũũme waamena mwĩĩ wake mwene, ĩndĩ nũũĩthasya na nũwendete, o tondũ Klĩsto wendete kĩkundi, 30 nũndũ twĩ mamutha ma mwĩĩ wake. 31 “Nũndũ wa kĩtumi kĩu mũndũũme akatia ĩthe na inyia na akalũmany’a na kĩveti kyake, na me elĩ makeethĩwa mwĩĩ ũmwe.” 32 Kĩmbithĩ kĩĩ kĩtheu nĩ kĩnene. Yu nĩneena ĩũlũ wa Klĩsto na kĩkundi. 33 O na ũu wĩ o vo, kĩla ũmwe wenyu no nginya ende kĩveti kyake o ũndũ wĩyendete mwene; nakyo kĩveti kyaĩle kũmũnenga mũũme wakyo ndaĩa nene.

6 Inyw’ĩ syana, mew’ei asyai menyu nthĩnĩ wa ngwatanĩo vamwe na Mwĩaĩi, nũndũ ũu nĩw’o waĩlĩte. 2 “Nenga ndaĩa ĩthe waku na inyia waku,” na ũsu nĩw’o mwĩao wa mbee wĩ na watho: 3 “Nĩ kana maũndũ methĩwe me maseo kwaku na wĩkale ĩvinda yĩasa ĩũlũ wa nthĩ.” 4 Na inyw’ĩ aa-ĩthe, mũikathatye syana syenyu, ĩndĩ endeeai kũiea kwa kũilũnga na kũitaa * kwosana na ũndũ Yeova waĩtye.

5 Inyw’ĩ ngombo, mew’ei mavwana menyu ala me kũũ nthĩ, mwĩ na wia na kũtetema na mwĩ na ũtheu wa ngoo, o tondũ mũmwĩw’aa Klĩsto, 6 na ti o yĩla mũsyaĩĩw’e, ta mũkwendeesya andũ, ĩndĩ ĩthĩwai mwĩ ewi o ta ngombo sya Klĩsto, mũyĩka kwenda kwa Ngai na thayũ * wenyu w’onthe. 7 Thũkũmai mavwana menyu mwĩ na woni mũseo, ta mũũthũkũma Yeova na ti andũ, 8 nũndũ nĩmwĩsĩ kana ũndũ o na wĩva mũseo ũla kĩla ũmwe wĩkaa, akaũkwata ĩngĩ kuma kwa Yeova, ethĩwe nĩ ngombo kana nĩ mũndũ mũthasye. 9 O nenyu mavwana, endeeai kwĩka ngombo syenyu oou, mũte kũitĩsya, nũndũ nĩmwĩsĩ kana Vwana woo na wenyu e ĩtunĩ, na we nde kyende.

10 Na mũthya, endeeai kũkwata vinya kuma kwa Mwĩaĩi nũndũ vinya wake nĩ mwingĩ mũno. 11 Ĩkĩai mĩio yonthe ya kaũ kuma kwa Ngai nĩ kana mwĩthĩwe mũtonya kũũngama mwĩ alũmu na kũsiĩĩa maũĩ ma Ndevili; 12 nũndũ twĩ na kũkĩlany’a vinya, na ti kwa nthakame na mwĩĩ, ĩndĩ tũkĩlanasya vinya na silikalĩ, ala me na ũkũmũ, asumbĩ ma nthĩ ĩno yĩ kĩvindunĩ, na nguthu sya maveva mavuku ĩtunĩ. 13 Kwondũ wa ũu osai mĩio yonthe ya kaũ kuma kwa Ngai nĩ kana mũtonye kwĩsiĩĩa mũthenyanĩ ũla mũthũku, na ĩtina wa kwĩanĩsya maũndũ onthe, mũyĩũngama mwĩ alũmu.

14 Kwoou, ũngamai mwĩ alũmu mwĩyovete inyunyunĩ syenyu mũsivi wa ũla w’o, mwĩkĩĩte ngao ya kĩthũi ya ũlũngalu, 15 na mwĩkĩĩte iatũ maaũnĩ menyu nĩ kana mwĩthĩwe mwĩyũmbanĩtye kũtavany’a ũvoo mũseo wa mũuo. 16 Na vamwe na maũndũ asu onthe, osai ngao nene ya mũĩkĩĩo na mũkeethĩwa mũtonya kũvosya maangi onthe makene mwaki ma ũla mũthũku. 17 O na ĩngĩ, ĩkĩai ngovia ya kyũma ya ũtangĩĩo, na mũyosa ũvyũ wa veva, naw’o nĩ ndeto ya Ngai, 18 na kĩla ĩvinda mũyĩendeea kũvoya mboya sya mĩthemba yonthe nthĩnĩ wa veva, o vamwe na kũvoya na kĩthing’ĩĩsyo. Na nũndũ wa kĩtumi kĩu, ĩkalai mũsyaĩĩsye, mũkĩvoya na kĩthing’ĩĩsyo mavinda onthe kwondũ wa atheu onthe. 19 O nakwa mboyeai, nĩ kana yĩla naathamya nĩnengwe ũtonyi wa kũneena, nĩ kenda nĩthĩwe ndonya kũtavany’a na ũkũmbaũ ĩũlũ wa kĩmbithĩ kĩtheu kya ũvoo mũseo, 20 ũla kwondũ waw’o nyie nĩ mũtũmwa mwove nyololo, na mboyeai nĩ kana nĩthĩwe ndonya kũneena ĩũlũ waw’o na ũkũmbaũ, o tondũ naĩle kwĩthĩwa ngĩneena.

21 Na yu nĩ kana mwĩthĩwe mũtonya kũmanya kĩla nĩendeee kwĩka na ũndũ nĩendeee, Tikiko, mwana-a-asa mwendwa na mũthũkũmi mũĩkĩĩku wa Mwĩaĩi, nũkũmũmanyĩthya maũndũ onthe. 22 Nĩngũmũtũma kwenyu nũndũ wa kĩtumi kĩĩ, nĩ kana mũmanye ũndũ tũendeee na nĩ kenda akiakisye ngoo syenyu.

23 Mũuo nĩwĩthĩwe na ana-a-asa na wendo o vamwe na mũĩkĩĩo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto. 24 Ũseo mwingĩ nĩwĩthĩwe na onthe ala mamwendete Mwĩaĩi waitũ Yesũ Klĩsto na wendo ũtatonya kwanangĩka.