VALŨA KWA AVILIVI

1 Nyie Vaulo na Timotheo, ngombo sya Klĩsto Yesũ, kwa atheu onthe ma Vilivi ala me ngwatanĩo vamwe na Klĩsto Yesũ, o vamwe na asyaĩĩsya na atetheesya ma kĩkundi:

2 Ĩthĩwai na ũseo mwingĩ na mũuo kuma kwa Ngai, ũla nĩwe Ĩthe waitũ, na kuma kwa Mwĩaĩi Yesũ Klĩsto.

3 Nĩndũngĩaa Ngai mũvea kĩla ĩvinda namũlilikana inyw’ĩ 4 mboyanĩ syakwa syonthe ila nĩvoyaa na kĩthing’ĩĩsyo kwondũ wenyu inyw’onthe. Na kĩla ĩvinda nĩkaa ũu nĩ na ũtanu, 5 nũndũ wa maũndũ ala mweekie kwondũ wa ũvoo mũseo kuma mũthenya wa mbee kũvika o na yu. 6 Nũndũ nĩ na mũĩkĩĩo ĩũlũ wa ũndũ ũũ, kana ũla wambĩĩisye wĩa mũseo nthĩnĩ wenyu akaũminĩĩa mũthenyanĩ wa Klĩsto Yesũ. 7 Nĩ ũndũ waĩlĩte kwakwa kũsũanĩa ũndũ ũũ ĩũlũ wenyu nĩkwĩthĩwa mwĩ ngoonĩ yakwa, inyw’ĩ ala mwandetheeisye yĩla naĩ yela na yĩla nateteaa ũvoo mũseo kwosana na mĩao. Na nũndũ wa ũu, inyw’ĩ o vamwe nakwa nĩtũtethekaa nũndũ wa ũseo mwingĩ wa Ngai.

8 Nũndũ Ngai nĩ ngũsĩ yakwa ĩũlũ wa ũndũ nĩ na mea maingĩ ma kwĩthĩwa nenyu inyw’onthe nĩ na wendo mwingĩ o ta ũla Klĩsto Yesũ wĩ naw’o. 9 Nĩvoyaa nĩ kana wendo wenyu wongeleke mũno o vamwe na ũmanyi wa w’o na ũĩ w’onthe; 10 na nĩ kana mũĩkĩĩthye nesa maũndũ ala ma vata nĩ meva nĩ kenda mwĩthĩwe mũte na ĩvĩtyo na mũteũlulutĩkya angĩ nginya mũthenya wa Klĩsto; 11 na nĩ kana musũwe nĩ ũsyao wa ũlũngalu ũla wumaa kwa Yesũ Klĩsto, nĩ kenda Ngai akumw’e na kũtaĩwa.

12 Yu ana-a-asa nĩenda mũmanye kana maũndũ ala mangwatĩte matumĩte ũvoo mũseo ũendeea na mbee, 13 na kyovo kyakwa kĩla novetwe nũndũ wa Klĩsto nĩkĩmanyĩkĩte ũtheinĩ nĩ asungi onthe ma mũsumbĩ na andũ ala angĩ onthe. 14 Yu ana-a-asa aingĩ nthĩnĩ wa Mwĩaĩi nĩmethĩĩtwe na ũkũmbaũ nũndũ wa kyovo kyakwa, na nĩmethĩĩtwe na ũkũmbaũ mwingĩ wa kũneena ndeto ya Ngai mate na wia.

15 Nĩ w’o kana amwe matavanasya ĩũlũ wa Klĩsto nĩkwĩthĩwa me na kĩwĩu na masindano, ĩndĩ angĩ metavany’a me na kĩeleelo kĩseo. 16 Aa naweta ĩtina matavanasya ĩũlũ wa Klĩsto nũndũ me na wendo, nĩkwĩthĩwa nĩmesĩ kana nyie nĩnĩnyuvĩtwe nĩ kana nĩtetee ũvoo mũseo; 17 ĩndĩ ala naweta mbee matavanasya nũndũ wa masindano, mate na kĩeleelo kĩseo, nũndũ meenda kũtuma nĩthĩwa na mathĩna kyovonĩ kyakwa. 18 Na ũu ũtumĩte kwĩthĩwa ata? Ũu ũtumĩte Klĩsto atavanw’a kwa nzĩa syonthe, o na ethĩwa ala meũtavany’a meĩka ũu me na kĩeleelo kĩseo kana kĩte kĩseo, na ũndũ ũsu nũndanĩthasya. O na nĩnĩendeee kũtana, 19 nĩkwĩthĩwa nĩnĩsĩ kana ũndũ ũsu ũkatuma nĩkwata ũtangĩĩo nũndũ wa mboya syenyu sya kĩthing’ĩĩsyo na kũtetheew’a nĩ veva wa Yesũ Klĩsto. 20 Nĩ na mũĩkĩĩo na wĩkwatyo kana ndikasonoka ũndũnĩ o na wĩva, ĩndĩ yu nĩngũneena nĩ na ũthasyo mwingĩ nĩ kana Klĩsto akumw’e nthĩnĩ wa mwĩĩ wakwa o ũndũ wĩthĩĩtwe aikumw’a, o na ethĩwa nĩ kwĩsĩla thayũ kana kĩkw’ũ.

21 Nyie a vakwa, kwĩkala thayũ nĩ kwondũ wa Klĩsto na kũkw’a nĩ ũunĩko kwakwa. 22 Yu ethĩwa nĩngũendeea kwĩkala thayũ nthĩnĩ wa mwĩĩ ũũ, ũsu nĩ ũsyao wa wĩa wakwa; ĩndĩ kĩla ndonya kũnyuva, nyie ndiũweta. 23 Katĩ wa maũndũ asu elĩ ndyĩsĩ nĩnyuva wĩva, nũndũ nĩ na mea ma kũthaw’a nĩ kana nĩthĩwe na Klĩsto, na ũu vate nzika nĩw’o ũndũ ũla mũseo vyũ. 24 Ĩndĩ kwakwa nĩ ũndũ wa vata mũno kwĩkala mwĩĩnĩ ũũ kwondũ wenyu. 25 Kwoou nĩ na mũĩkĩĩo kana nĩngũendeea kwĩthĩwa thayũ na kwĩkala vamwe nenyu inyw’onthe nĩ kana mwĩke maendeeo na mwĩthĩwe na ũtanu mũĩkĩĩonĩ, 26 na ũtanu wakwa wongeleke mũno nthĩnĩ wa Klĩsto Yesũ yĩla nĩĩthĩwa vamwe nenyu ĩngĩ.

27 Ĩthĩwai na mwĩkalĩle ũkwosana na ũvoo mũseo ĩũlũ wa Klĩsto, nĩ kana ethĩwa ngooka na kũmwona kana ndikoka, ngew’aa na kũmanya kana nĩmũũngamĩte na ũlũmu nthĩnĩ wa veva ũmwe, na ngoo ĩmwe, mũendeee kwĩkĩa kĩthito mwĩ vamwe kwondũ wa ũla mũĩkĩĩo nthĩnĩ wa ũvoo mũseo, 28 na mũteũtelemw’a nongi nĩ amaitha menyu. Ũu wĩĩkĩĩthya kana makaanangwa, ĩndĩ inyw’ĩ mũkatangĩĩwa; na ũndũ ũsu wumĩte kwa Ngai. 29 Nũndũ mũnengetwe kĩanda kĩu kwondũ wa Klĩsto, nĩ kana mwĩthĩwe na mũĩkĩĩo nthĩnĩ wake o vamwe na kũthĩnw’a nũndũ wake. 30 Nĩkwĩthĩwa mũendeee kũkitana na maũndũ o ta ala mwoonie ndyũkitana namo, na ala yu mũkwĩw’a kana no nĩendeee kũkitana namo.

2 Na nũndũ nĩmũthangaanasya nthĩnĩ wa Klĩsto, mũkakiakiany’a nũndũ mwĩ na wendo, na mwĩ na ngwatanĩo ya kĩ-veva, na nũndũ mwĩ na wendo mwingĩ na ĩnee, 2 endeeai kwĩka maũndũ asu nĩ kana nĩthĩwe na ũtanu na mũyonany’a kana mwĩ na kĩsũanĩo kĩmwe, mwĩ na wendo, mwĩ na ngwatanĩo vyũ, na mwĩ na kĩlilikano kĩmwe. 3 Mũikeke ũndũ o na wĩva nũndũ wa masindano kana ngathĩĩo, ĩndĩ ĩthĩwai na wĩnyivyo, mũyona ala angĩ me ma vata kwĩ inyw’ĩ, 4 mũteũmantha kwĩyĩuna o inyw’ĩ ene, ĩndĩ kũmauna ala angĩ o namo.

5 Ĩthĩwai na kĩlilikano o ta kĩla Klĩsto Yesũ waĩ nakyo, 6 ũla, o na kau aĩ na mũvw’ano wa Ngai ndaasũanĩa kwosa ũkũmũ wa Ngai, na ũu nĩ kwasya kana ndaasũanĩa kwĩthĩwa eanene na Ngai. 7 Vandũ va ũu, nĩwatiie kyonthe kĩla waĩ nakyo na oosa mũvw’ano wa ngombo na atw’ĩka mũndũ. 8 O na eka ũu, yĩla wookie e na mũvw’ano wa mũndũ, nĩweenyivisye na eethĩwa e mwĩwi kũvikĩa kĩkw’ũ, ĩĩ kĩkw’ũ mũtĩnĩ wa mathĩna. * 9 Na nũndũ wa kĩtumi kĩu, Ngai nĩwamũnenevisye mũno na nũndũ wa ũseo Wake, amũnenga ĩsyĩtwa yĩ ĩũlũ wa masyĩtwa ala angĩ onthe, 10 nĩ kana ĩsyĩtwanĩ ya Yesũ kĩla yĩu yĩtulye ndu—ya ala me ĩtunĩ na ala me ĩũlũ wa nthĩ na ala me ungu wa nthĩ— 11 na kĩla ũĩmĩ ũwete ũtheinĩ kana Yesũ Klĩsto nĩwe Mwĩaĩi nĩ kana Ngai ataĩwe, ũla nĩwe Ĩthe waitũ.

12 Kwoou, endwa makwa, mavinda onthe nĩmwĩthĩawa mwĩ ewi yĩla nĩ vamwe nenyu, na ĩvinda yĩĩ nde vamwe nenyu mwĩthĩĩtwe o na mwĩ ewi mũno. O ta ũu, endeeai kwĩkĩa kĩthito kwondũ wa ũtangĩĩo wenyu na mũyĩka ũu mwĩ na wia na kũtetema. 13 Nũndũ Ngai nĩwe ũmũnengae vinya na akamũnenga wendi na ũtonyi wa kwĩka maũndũ onthe ala we wendaa. 14 Endeeai kwĩka maũndũ onthe mũtekũnyungunyĩsya na mũte na ngananĩo, 15 nĩ kana mwĩthĩwe mũtaweteka ũthũku na mũte na ĩvĩtyo, syana sya Ngai ite na ũndũ ũthũku, mũikena ta kyeni ĩũlũ wa nthĩ katĩ wa nzyawa nthyoeku na ĩte ndũngalu, 16 mũlũmĩtye vyũ ĩla ndeto ya thayũ. Na nũndũ wa ũu, ndyĩthĩwa na kĩtumi kya kũtana mũthenyanĩ wa Klĩsto, nũndũ nĩnĩsĩ kana ndyaasemba mana kana ngatethya wĩa wa mana. 17 Ĩndĩ o na ethĩwa nĩtulũlwa ta mbinyu ĩũlũ wa nthembo na ũthũkũmi mũtheu * ũla mũthũkũmĩte nũndũ wa mũĩkĩĩo wenyu, nĩngwĩw’a mũyo na kũtana vamwe nenyu. 18 O ta ũu, o nenyu mwaĩle kwĩw’a mũyo na kũtana vamwe nakwa.

19 Yu nĩenda kũmũtũma Timotheo kũla mũĩ mĩtũkĩ ethĩwa nĩ kwenda kwa Mwĩaĩi, nĩ kana nĩthangaae nakwata ũvoo ĩũlũ wenyu. 20 Nũndũ ndi na mũndũ ũngĩ ũilye take ũla ũtonya kũthĩnĩkĩa mavata menyu nesa. 21 Nĩkwĩthĩwa ala angĩ onthe mathĩnĩkĩaa maũndũ moo ene, ĩndĩ ti ma Yesũ Klĩsto. 22 Nũndũ inyw’ĩ nĩmwĩsĩ nesa kana nĩweenenganie mwene, na o ta kana kanini keũthũkũma na ĩthe wako, nĩwathũkũmie vamwe nakwa nĩ kana ũvoo mũseo ũendeee na mbee. 23 Kwoou, ũsu nĩwe ngwenda kũtũma namina kũmanya maũndũ ala meũngwata. 24 Na nĩ na mũĩkĩĩo nthĩnĩ wa Mwĩaĩi kana nyie mwene nĩngũka o mĩtũkĩ.

25 Ĩndĩ yu nĩona ve vata wa kũmũtũmĩa Evavilotito, mwana-a-asa wakwa, na mũtethya wa wĩa na mũsikalĩ vamwe nakwa, na mũtũmwa wenyu na mũthũkũmi wakwa ũla ũndetheeasya mavatanĩ makwa, 26 nũndũ e na mea ma kũmwona inyw’onthe na nũkw’ĩte ngoo nũndũ nĩmũneewie kana anaĩ mũwau. 27 Kwa w’o anaĩ mũwau vakuvĩ kũkw’a, ĩndĩ Ngai amwĩw’ĩa tei, na tiwe e weka, ĩndĩ o nakwa, nĩ kana ndikethĩwe na kyeva nĩnaĩ na kĩngĩ. 28 Kwoou nĩmũtũma oke na mĩtũkĩ vyũ, nĩ kana mwamwona mũtane ĩngĩ, nakwa ndyĩthĩwa nde na kyeva kingĩ. 29 Kwoou mũthokyei o tondũ ala mamũthũkũmaa Mwĩaĩi mathokanasya, na mũyĩendeea kũmanenga ndaĩa aũme ta asu, 30 nũndũ aĩ vakuvĩ kũkw’a nũndũ wa wĩa wa Klĩsto, * na nĩwalikilye thayũ wake mũisyonĩ nĩ kana andetheesye vala mũkwĩsaa kũndetheesya ta kethĩwa mwĩ nakwa vaa.

3 Na mũthya ana-a-asa, endeeai kũtana nthĩnĩ wa Mwĩaĩi. Nyie ndiũnoa kũmũandĩkĩa ĩngĩ maũndũ ala namũandĩkĩie, ĩndĩ nĩĩka ũu nĩ kana mwĩthĩwe mwĩ asũvĩĩku.

2 Ĩsũvĩanei na ngitĩ; ĩsũvĩanei na ala mekaa maũndũ mathũku; na mũyĩsũvĩana na ala matilaa mwĩĩ. 3 Nĩkwĩthĩwa nithyĩ twaĩkĩtwe nzaĩko ĩla ya w’o, ithyĩ ala tũthũkũmaa ũthũkũmi mũtheu kwĩsĩla veva wa Ngai na twĩkathĩĩa nthĩnĩ wa Klĩsto Yesũ, o na mũĩkĩĩo witũ ndwĩthĩawa maũndũnĩ ma mwĩĩ, 4 o na kau nyie nĩ na itumi nzeo sya kwĩkathĩĩa nthĩnĩ wa mwĩĩ kwĩ mũndũ ũngĩ o na wĩva.

Ethĩwa mũndũ o na wĩva esũanĩa ta wĩ na itumi sya kwĩkathĩĩa nthĩnĩ wa mwĩĩ, nyie nĩ na mbingĩ: 5 naĩkiwe mũthenya wa nyanya, nĩ wa nthĩ ya Isilaeli kuma mbaĩnĩ ya Mbenyamini, Mũevelania ũsyaĩtwe nĩ Aevelania; na maũndũnĩ ma mĩao nyie naĩ Mũvalisi; 6 naĩ na kĩthito kingĩ kya kũthĩny’a kĩkundi; na maũndũnĩ ma ũlũngalu ũla wumanaa na kũkwata mĩao, nĩnaĩkĩĩthisye kana ndi na ĩvĩtyo. 7 Ĩndĩ maũndũ ala noonaa me ma vata kwakwa, yu nĩmatalaa ta wasyo * nũndũ wa Klĩsto. 8 O na eka ũu, nĩtalaa maũndũ onthe ta wasyo namaelekany’a na ũmanyi ũla wa vata kwĩ maũndũ onthe, naw’o nĩ ĩũlũ wa Mwĩaĩi wakwa Klĩsto Yesũ. Na kwondũ wake, nĩnĩtĩkĩlĩte kwasya syĩndũ syonthe, na nĩsyonaa ta mavuti * nĩ kana nĩmũkwate Klĩsto 9 na ndyĩthĩwa nĩ ngwatanĩo vamwe nake, na ti kwondũ wa ũlũngalu wakwa mwene ũla wumanaa na kũatĩĩa Mĩao, ĩndĩ nũndũ wa ũlũngalu ũla wumanaa na mũĩkĩĩo nthĩnĩ wa Klĩsto, naw’o nĩ ũlũngalu wa Ngai ũla mũsingi waw’o nĩ mũĩkĩĩo. 10 Kĩeleelo kyakwa nĩ kũmũmanya we na kũmanya vinya wa ũla wamũthayũũkisye, na kũthĩna vamwe nake, na kũeka nĩkw’e o ũndũ wakwie, 11 nĩ kana ethĩwa nĩvatonyeka none kana ngakwata ũthayũũkyo ũla wa mbee.

12 Ti atĩ nĩngwatĩte mũthĩnzĩo ũsu, kana nĩndw’ĩkĩte mwĩanĩu, ĩndĩ nĩnĩendeee kwĩkĩa kĩthito none kana nĩnĩkwata mũthĩnzĩo ũsu nũndũ Klĩsto Yesũ nĩwanyuvie nyie kwondũ waw’o. 13 Ana-a-asa, nyie ndikwĩtala ta nĩũkwatĩte, ĩndĩ ũndũ ũũ nĩw’o ngwĩka: Kũlwa nĩ maũndũ ala natiie ĩtina, na ndyĩkĩa kĩthito nĩvikĩe ala me mbee. 14 Nĩendeee kwĩkĩa kĩthito kingĩ nĩ na kĩeleelo kya kũkwata mũthĩnzĩo wa Ngai wa kũthi ĩũlũ, ũla Ngai ũnenganĩte kwa ala wametie kwĩsĩla Klĩsto Yesũ. 15 Kwoou ekai ala aimu kĩ-veva katĩ witũ methĩwe na kĩsũanĩo kĩĩ, na ethĩwa mwĩ na kĩsũanĩo kĩngĩ kĩ kĩvathũkany’o na kĩu ũndũnĩ o na wĩva, Ngai akamũvuanĩsya kĩsũanĩo kĩla kyaĩlĩte. 16 O na vailye ũu, maendeeo ala twĩkĩte kũvika yu, nĩtũendeei kwĩkala mũendelenĩ o ũsu.

17 Ana-a-asa, atĩĩai ngelekany’o yakwa inyw’onthe, na mũimasisya ala mekalaa kwosana na ngelekany’o ĩla twamũtiĩe. 18 Nũndũ ve aingĩ ala namawetaa mavinda maingĩ, ĩndĩ yu nĩmawetaa nĩĩĩte nũndũ mekalaa ta amaitha ma mũtĩ wa mathĩna * wa Klĩsto. 19 Mũminũkĩlyo woo nĩ wanangĩko, na ngai yoo nĩ ĩvu yoo, na mekathĩĩaa na maũndũ ala maĩle kwĩw’a nthoni nũndũ wamo, na ilĩko syoo isũanĩaa maũndũ ma nthĩ. 20 Ĩndĩ ithyĩ kwitũ nĩ ĩtunĩ, na nĩtweteele mũtangĩĩi na mea oke kuma kũu, nake nĩ Mwĩaĩi Yesũ Klĩsto, 21 ũla ũkaalyũla mwĩĩ ũũ witũ mwonzu wĩthĩwe na ũtheu mũtisu ta wake, na akeeka ũu kwĩsĩla vinya wake mwingĩ ũla ũmũtonyethasya kwia syĩndũ syonthe ungu wake.

4 Kwondũ wa ũu ana-a-asa makwa, nyie nĩnĩmwendete na nĩ na mea ma kũmwona, na ninyw’ĩ ũtanu wakwa na ngovia yakwa, ũngamai mwĩ alũmu nthĩnĩ wa Mwĩaĩi, endwa makwa.

2 Nĩmesũva Euotia na Sinitike methĩwe na kĩsũanĩo kĩmwe nthĩnĩ wa Mwĩaĩi. 3 Ĩĩ, nĩkwĩsũva we mũtethya wa wĩa vamwe nakwa, ũendeee kũtetheesya aka asu ala mekĩĩte kĩthito vamwe nakwa kwondũ wa ũvoo mũseo, o vamwe na Kilemendi na ala angĩ onthe matethasya wĩa vamwe nakwa, ala masyĩtwa moo me ĩvukunĩ ya thayũ.

4 Tanaai nthĩnĩ wa Mwĩaĩi mavinda onthe. Na ĩngĩ nĩngwasya, Tanaai! 5 Ekai wĩnyivyo wenyu ũmanyĩke nĩ andũ onthe. Mwĩaĩi e vakuvĩ. 6 Mũikemakĩe kwa ũndũ o na wĩva, ĩndĩ kĩla ũndũnĩ mavata menyu nĩmatavanw’e kwa Ngai kwĩsĩla mboya, o vamwe na kwĩsũvana na kũtũnga mũvea; 7 na mũuo wa Ngai ũla ũvĩtũkĩte ũmanyi w’onthe ũkasũvĩaa ngoo syenyu na ilĩko syenyu nthĩnĩ wa Klĩsto Yesũ.

8 Na mũthya ana-a-asa, maũndũ o na meva ala ma w’o, maũndũ o na meva ala ma vata, maũndũ o na meva ala malũngalu, maũndũ o na meva ala matheu, maũndũ o na meva ala ma kwendeesya, maũndũ o na meva ala mawetawa nesa, maũndũ o na meva ala maseo, maũndũ o na meva ala me nguma nzeo, endeeai kũsũanĩa maũndũ asu. 9 Maũndũ ala mweemanyĩisye na mweetĩkĩla na mwamew’a kuma kwakwa, ĩkaai maũndũ asu, na Ngai wa mũuo akeethĩwa vamwe nenyu.

10 Yu nĩngũtana mũno nthĩnĩ wa Mwĩaĩi nũndũ nĩmwambĩĩe ĩngĩ kũnthĩnĩkĩa. O na kau nĩmwanthĩnĩkĩaa, mũyaakwata mwanya wa kwonany’a ũndũ ũsu. 11 Ndiũneena ũu atĩ nũndũ nĩ na vata, nũndũ nĩnĩmanyĩĩtye kwĩkala nĩ mwĩanĩe o na ethĩwa maũndũ makwa mailye ata. 12 Nĩnĩsĩ ũndũ kũnyivĩwa kwĩthĩawa kũilye na ũndũ kwĩthĩwa na syĩndũ mbingĩ kwĩthĩawa kũilye. Nĩneemanyĩisye ũndũ ndonya kwĩthĩwa nĩ mwĩanĩe maũndũnĩ onthe, nĩthĩwe nĩnĩvũny’e kana nĩ na nzaa, nĩthĩwe nĩ na syĩndũ mbingĩ kana nĩ mũnyivĩe. 13 Nĩndonya maũndũ onthe nũndũ wa vinya wa ũla ũndonyethasya.

14 O na ũu wĩ o vo, nĩmweekie nesa kũndetheesya yĩla naĩ thĩnanĩ. 15 Vate nzika, inyw’ĩ Avilivi nĩmwĩsĩ kana mwambĩlĩlyonĩ wa kũtavany’a ũvoo mũseo, na ĩvinda yĩla naumie Masetonia, vaiĩ kĩkundi kyaandetheesya kana kĩketĩkĩla ũtethyo wakwa, ate o inyw’ĩ; 16 nũndũ yĩla naĩ Thesalonika nĩmwandũmĩie kĩndũ kya kũndetheesya, na ti o yĩmwe ĩndĩ kelĩ. 17 Na ti aĩ nĩmantha mũthĩnzĩo, ĩndĩ nĩenda meko menyu maseo maendeee kwongeleka methonĩ ma Ngai. 18 Nĩ na syĩndũ syonthe ila nĩ na vata nasyo, o na nĩ na mbingĩ. Yu nyie ndi mũnyivĩe nĩkwĩthĩwa nĩnĩnakwatie kĩla mũnatũmĩte Evavilotito, nayo nĩ nthembo yĩtĩkĩlĩkaa, yĩ mũuke mũseo, na ĩmwendeeasya Ngai. 19 O nake Ngai, kwĩsĩla Klĩsto Yesũ, akeanĩsya nesa mavata menyu onthe kwosana na ũthwii wake mwingĩ. 20 Yu Ngai, ũla nĩwe Ĩthe waitũ, nataĩwe tene na tene. Ameni.

21 Ngethesyei atheu onthe ala me ngwatanĩo vamwe na Klĩsto Yesũ. Ana-a-asa ala me vamwe nakwa nĩmamũkethya. 22 Atheu onthe, na mũno mũno ala ma nyũmba ya Kaisali, nĩmamũkethya.

23 Ũseo mwingĩ wa Mwĩaĩi Yesũ Klĩsto nĩwĩthĩwe na veva ũla inyw’ĩ mwonanasya.