VALŨA WA KELĨ KWA TIMOTHEO

1 Nyie Vaulo, mũtũmwa wa Klĩsto Yesũ kwondũ wa kwenda kwa Ngai na kwosana na watho wa thayũ kwĩsĩla Klĩsto Yesũ, 2 kwa Timotheo, mwana wakwa mwendwa:

Ĩthĩwa na ũseo mwingĩ na tei na mũuo kuma kwa Ngai, ũla nĩwe Asa, na kuma kwa Klĩsto Yesũ Mwĩaĩi waitũ.

3 Nĩmũtũngĩa Ngai mũvea, ũla nĩmũthũkũmaa ũthũkũmi mũtheu o tondũ aa-ũmae makwa meekaa, na nĩ na wasya mũtheu wa ngoo, na kĩla ĩvinda nĩngũlilikanaa mboyanĩ syakwa sya kĩthing’ĩĩsyo ila nĩvoyaa ũtukũ na mũthenya. 4 Na nũndũ nĩnĩlilikanaa methoi maku, nĩ na mea maingĩ ma kũkwona, nĩ kana nĩthĩwe na ũtanu mwingĩ. 5 Nĩkwĩthĩwa nĩnĩlilikanaa mũĩkĩĩo waku ũte na wangangany’a, mũĩkĩĩo ũla mbee waĩ na ũsũu Loisi na inyia waku Eunike, na ndi na nzika kana o naku wĩ naw’o.

6 Na nũndũ wa kĩtumi kĩu nĩngũũlilikany’a ũũvuvĩĩe ta mwaki mũthĩnzĩo wa Ngai ũla wĩ nthĩnĩ waku, ũla wakwatie yĩla nakwilĩĩile moko. 7 Nĩkwĩthĩwa Ngai ndaatũnenga veva wa wia ĩndĩ atũnengie veva wa vinya, wa wendo, na wa kĩlĩko kĩanĩu. 8 Kwoou ndũkew’e nthoni nũndũ wa kumya ũkũsĩ ĩũlũ wa Mwĩaĩi waitũ kana nũndũ wakwa, nyie mwovwa kwondũ wake, ĩndĩ ĩthĩwa wĩyũmbanĩtye kũkwatwa nĩ maũndũ mathũku kwondũ wa ũvoo mũseo kwa kwĩkwatya vinya wa Ngai. 9 Nĩwatũtangĩĩie na atwĩta twĩthĩwe atheu nũndũ wa kĩeleelo kyake na ũseo mwingĩ, na ti kwondũ wa meko maitũ. Atũnengie ũseo ũsu mwingĩ kwĩsĩla Klĩsto Yesũ kuma tene vyũ, 10 ĩndĩ yu nĩwonekete nesa kwĩsĩla kumĩla kwa Mũtangĩĩi waitũ, Klĩsto Yesũ, ũla wavetie kĩkw’ũ na kwĩsĩla ũvoo mũseo aelesya ĩũlũ wa thayũ na mwĩĩ ũtatonya kwanangĩka, 11 na kwondũ wa ũvoo ũsu mũseo nĩnanyuviwe nĩthĩwe mũtavany’a na mũtũmwa na mũmanyĩsya.

12 Nĩkyo kĩtumi ngũkwatwa nĩ mathĩna, ĩndĩ ndikwĩw’a nthoni. Nĩkwĩthĩwa nĩnĩsĩ Ũla nĩmũĩkĩĩĩte na ndi na nzika kana we nũtonya kũsũvĩa kĩla niĩte ũsũvĩonĩ wake nginya mũthenya ũsu. 13 Endeea kũlũmya ndeto nzeo, * ila weewie kuma kwakwa wĩ na mũĩkĩĩo na wendo ũla wĩ nthĩnĩ wa Klĩsto Yesũ. 14 Sũvĩa maũndũ ma vata ala wakwatie kwĩsĩla veva mũtheu, ũla wĩ nthĩnĩ witũ.

15 Nĩwĩsĩ kana andũ onthe kĩsionĩ kya Asia nĩmandiie. O na Vikelo na Elimakane nĩmandiie. 16 Mwĩaĩi namĩw’ĩe tei nyũmba ya Onesivolo, nũndũ nĩwanthangaaisye mavinda maingĩ, na ndaaĩw’ĩa nthoni nyololo syakwa sya yela. 17 Vandũ va ũu, yĩla waĩ Lomi nĩwamanthie na kĩthito na ambona. 18 Mwĩaĩi Yeova emwĩw’ĩa tei mũthenya ũsu. O naku we nĩwĩsĩ nesa maũndũ onthe ala weekie kwondũ wakwa yĩla naĩ Eveso.

2 Kwoou, we mwana wakwa, endeea kwĩthĩwa na vinya ũseonĩ mwingĩ ũla wĩ nthĩnĩ wa Klĩsto Yesũ; 2 na maũndũ ala weewie kuma vala nĩĩ na makũsĩĩwa nĩ ngũsĩ mbingĩ, maũndũ asu manenge andũ aĩkĩĩku, ala o namo makethĩwa me na ũtonyi wa kũmanyĩsya angĩ nesa. 3 Na nũndũ wĩ mũsikalĩ mũseo wa Klĩsto Yesũ, ĩthĩwa wĩyũmbanĩtye kũkwatwa nĩ maũndũ mathũku. 4 Vaiĩ mũsikalĩ wĩlikasya viasalanĩ sya ĩvinda yĩĩ, nũndũ kwĩka ũu no kũtume alea kũmwendeesya ũla wamũandĩkie ethĩwe mũsikalĩ. 5 O na mathaũnĩ, ũla ũkũthaũka ndanengawe mũthĩnzĩo * atathaũkĩte kwosana na mĩao ya mathaũ. 6 Mũĩmi wĩ kĩthito nĩwe waĩlĩte kwĩthĩwa e wa mbee kũya matunda. 7 Sũanĩaa kĩla ĩvinda maũndũ ala ngũneena; Mwĩaĩi akaũnenga ũmanyi maũndũnĩ onthe.

8 Lilikana kana Yesũ Klĩsto nĩwathayũũkiw’e na aĩ ũsyao wa Ndaviti, kwosana na ũvoo mũseo ũla nĩtavanasya, 9 ũla kwondũ waw’o ngũthĩna na kwovwa yela ta nĩ mũndũ mũthũku. Ĩndĩ ndeto ya Ngai ti mbove. 10 Na nũndũ wa kĩtumi kĩu nĩendeee kũmĩĩsya maũndũ onthe kwondũ wa ala anyuve, nĩ kana o namo makwate ũtangĩĩo kuma kwa Klĩsto Yesũ, o vamwe na ũtheu mũtisu wa tene na tene. 11 Ndeto ii nĩ sya kũĩkĩĩka: Vate nzika ethĩwa nĩtwakwie vamwe nake, tũkekala thayũ vamwe nake; 12 ethĩwa nĩtũkũendeea kũmĩĩsya, tũkasumbĩka vamwe nake twĩ asumbĩ; ethĩwa nĩtũũmũkaĩa, o nake akatũkaĩa; 13 na ethĩwa tũi aĩkĩĩku, we nĩ mũĩkĩĩku, nũndũ ndatonya kwĩkaĩa mwene.

14 Endeea kũmalilikany’a maũndũ asu, ũimamanyĩsya * mbee wa Ngai maeke kũkananĩa ĩũlũ wa ndeto, nĩkwĩthĩwa ũndũ ũsu ndũtethya o na vanini nũndũ nĩwanangaa ala methukĩĩasya. 15 Tata ũndũ ũtonya wĩtĩkĩlwe nĩ Ngai, ta mũthũkũmi ũte na ũndũ o na ũmwe wa kwĩw’ĩa nthoni, ũitũmĩa ndeto ya ũla w’o nesa. 16 Ĩndĩ lea ndeto sya mana ila ivukasya kĩla kĩtheu, nũndũ ikatuma kũlea kũmũkĩa Ngai kwongeleka, 17 na ndeto syoo ikanyaĩĩka ta kĩtau kĩla kĩĩsaa na mĩtũkĩ. Aimenaio na Vileto nĩ amwe katĩ wa asu. 18 Andũ asu nĩmatiĩte ũla w’o, makyasya kana ũthayũũkyo nĩweethĩiwe, na maendeee kwananga mũĩkĩĩo wa amwe. 19 O na ũu wĩ o vo, mũsingi mũlũmu wa Ngai nĩ ũũngamĩte wĩ na ũsiĩlo ũũ: “Yeova nĩwĩsĩ ala make,” na, “Mũndũ o na wĩva ũla wĩkaĩlaa ĩsyĩtwa ya Yeova nĩ alee maũndũ mate malũngalu.”

20 Na nyũmbanĩ nene vethĩawa mĩio ya thaavu na ya vetha o na ya mbwaũ na ya yũmba, na ĩmwe ĩtũmĩawa maũndũnĩ ma ndaĩa na ĩla ĩngĩ maũndũnĩ mate ma ndaĩa. 21 Kwoou ethĩwa mũndũ o na wĩva nũkwĩvathana na mĩio ĩsu ya mũthya, akeethĩwa e mũio ũtonya kũtũmĩwa maũndũnĩ ma ndaĩa, mũio mũtheu, ũtonya kũtethya mwene, ũseũvĩtw’e kwondũ wa kĩla wĩa mũseo. 22 Kwondũ wa ũu, kĩa mawendi ma ĩvinda ya ũika na ũiatĩĩa ũlũngalu, mũĩkĩĩo, wendo, mũuo, wĩ vamwe na ala mamwĩkaĩlaa Mwĩaĩi me na ngoo ntheu.

23 O na ĩngĩ, lea makũlyo ma ũtumanu na matatethya, nũndũ nĩwĩsĩ maetae kaũ. 24 Nĩkwĩthĩwa ngombo ya Mwĩaĩi ndĩ na vata wa kũkita, ĩndĩ yaĩlĩte kwĩthĩwa yĩ na ũuu kwelekela andũ onthe, yĩ na ũtonyi wa kũmanyĩsya na kwĩsiĩĩa yĩla yavĩtĩw’a, 25 ĩimanyĩsya na ũuu ala mate na woni waĩlĩte. Nũndũ nĩvatonyeka Ngai akamanenga mwanya wa kwĩlila nĩ kana makwate ũmanyi wa w’o ĩũlũ wa ũla w’o, 26 na nĩ kana mambĩĩe kwĩsilya nesa na kũvonoka kuma kĩteinĩ kya Ndevili, nĩkwĩthĩwa nũmakwatĩtye me thayũ meke kwenda kwake.

3 Ĩndĩ manya ũũ kana mĩthenyanĩ ya mũminũkĩlyo kũkeethĩwa mavinda ma mũisyo na momũ. 2 Nũndũ andũ makeethĩwa makĩyenda ene, makyenda mbesa, me na mĩyono, me na mĩng’athĩlĩĩlyo, aumani, matew’aa asyai, mate mũvea, mate aĩkĩĩku, 3 mate na wendo, mate na wĩw’ano, asukani, matesiĩĩaa, ai, matendete ũseo, 4 avũnyanĩi, me na ngũlũ, me na mĩtũlyo, * endi ma motanu ma nthĩ vandũ va kũmwenda Ngai, 5 monekaa ta me na kĩkĩo kya Ngai ĩndĩ meko moo nĩmeũleana nakyo; ĩvathane na andũ asu. 6 Amwe moo nĩmalikaa na ũseleke mĩsyĩnĩ na kũkenga aka ala onzu ala makuĩte mĩio ya naĩ, matongoew’e nĩ mawendi me kĩvathũkany’o, 7 na memanyĩasya mavinda onthe ĩndĩ mayĩsaa kũkwata ũmanyi wa w’o ĩũlũ wa ũla w’o.

8 Na o tondũ Yane na Yambale mamũvĩngie Mose, now’o maendeeaa kũvĩnga ũla w’o. Andũ asu me na ilĩko nthũku, na mayĩsa kwĩtĩkĩlĩka mũĩkĩĩonĩ. 9 Ĩndĩ maikaendeea mbee wa vau, nũndũ ũtumanu woo ũkamanyĩka nĩ andũ, o tondũ aũme asu elĩ mamanyĩkie. 10 Ĩndĩ we nĩwĩthĩĩtwe ũyĩatĩĩa nesa momanyĩsyo makwa, mwĩkalĩle wakwa, kĩeleelo kyakwa, mũĩkĩĩo wakwa, wũmĩĩsyo wakwa, wendo wakwa, ũlũmu wakwa, 11 na mathĩna na monyamao ta ala mangwatie nĩ Andiokia, Ikonio, na Lisitela. Ĩndĩ nĩnoomĩĩisye na Mwĩaĩi ambonokya kuma mathĩnanĩ asu onthe. 12 Nĩ w’o kana onthe ala mendaa kwĩkala me na kĩkĩo kya Ngai na me ngwatanĩo vamwe na Klĩsto Yesũ makathĩnw’a. 13 Ĩndĩ andũ athũku na akengani makaendeea kũthũkĩĩa, maikengana na kũkengwa.

14 Ĩndĩ we endeea kũatĩĩa maũndũ ala wamanyĩiw’e na waĩkĩĩthw’a kana nĩ ma w’o, nũndũ nĩwĩsĩ ala weemanyĩisye kuma kwoo, 15 na kuma wĩ kana kanini nĩwamanyie maandĩko matheu ala matonya kũtuma wĩthĩwa wĩ mũĩ kwondũ wa ũtangĩĩo nĩkwĩthĩwa nũmũĩkĩĩĩte Klĩsto Yesũ. 16 Maandĩko onthe nĩmaveveeiwe nĩ Ngai na nĩmaĩlĩte kwondũ wa kũmanyĩsya, kũkany’a, kũlũnga maũndũ, na kũtũngĩĩa kwa nzĩa ya ũlũngalu, 17 nĩ kana mũndũ wa Ngai ethĩwe e na ũtonyi wĩanĩtye, na eyũmbanĩtye vyũ kũtethya kĩla wĩa mũseo.

4 Nĩngũkwĩaĩa kwa ũito mbee wa Ngai na Klĩsto Yesũ, ũla ũkasilĩla ala me thayũ na ala akw’ũ, kwĩsĩla kumĩla kwake na kwĩsĩla Ũsumbĩ wake: 2 Tavany’a ĩla ndeto; ĩka ũu na mĩtũkĩ mavindanĩ ala maĩle na ala momũ; ony’a andũ mavĩtyo, kany’a, taa. Ĩka ũu wĩ na wũmĩĩsyo w’onthe na wĩ na ũtũĩka wa kũmanyĩsya. 3 Nĩkwĩthĩwa ve ĩvinda matakomĩĩsya momanyĩsyo ala maseo, * ĩndĩ kwosana na mawendi moo, makeeyũmbanĩsya amanyĩsya nĩ kana matũ moo matanĩthw’e. * 4 Makaeka kwĩthukĩĩsya ũla w’o na mayĩthukĩĩsya ngewa sya ũvũngũ. 5 Ĩndĩ we, sũvĩa kĩlĩko kyaku maũndũnĩ onthe, ũmĩĩsya mawũmũ, tethya wĩa wa mũtavany’a, ĩanĩsya ũthũkũmi waku.

6 Nũndũ nyie nĩngũtulũlwa ta nthembo ya mbinyu, na ĩvinda ya kũthaw’a kwakwa yĩ vakuvĩ. 7 Nĩnũkitĩte kaũ ũla mũseo, nĩnĩsembete mathaũnĩ ma kũsemba ngamina, nĩnĩlũmĩtye ũla mũĩkĩĩo. 8 Kuma yu na kũendeea, nĩniĩwe ngovia ya ũlũngalu, ĩla Mwĩaĩi, ũla nĩwe mũsili mũlũngalu, ũkanenga ta ĩtuvi mũthenya ũsu, na tinyie nĩ nyioka, ĩndĩ o na onthe ala meteelaa na mea kumĩla kwake.

9 Tata ũndũ ũtonya wũke kũla nĩĩ mĩtũkĩ. 10 Nĩkwĩthĩwa Ndema nĩwandiie nũndũ nĩwendie maũndũ ma ĩvinda yĩĩ, * na nĩwaendie Thesalonika, nake Keliseke athi Kalatia, na Tito athi Ndalamatia. 11 Luka nowe nĩ nake vaa. Ũka na Maliko, nũndũ akandetheesya mũno ũthũkũminĩ. 12 Ĩndĩ nĩnĩmũtũmie Tikiko athi Eveso. 13 Ũyũka ndetee ĩla kanzũ natiie Teloa yĩ na Kalivo, na ala mavuku ma kũkũnzwa, na mũno mũno ala ma kĩthuma.

14 Alekisanda ũla mũtui wa syĩndũ sya ũthuku * ambĩkie maũndũ mathũku mũno. Yeova akamũĩva kwosana na meko make. 15 O naku waĩle kwĩsũvĩana nake, nũndũ nĩwavĩngie ndeto sitũ mũno.

16 Ĩvinda yakwa ya mbee ya kwĩtetea vaiĩ mũndũ waaũngama vamwe nakwa, ĩndĩ onthe nĩmandiie. Ngai ndakamatalĩle ĩvĩtyo yĩu. 17 Ĩndĩ Mwĩaĩi nĩwaũngamie vakuvĩ nakwa na ambĩkĩa vinya nĩ kana kwĩsĩla nyie, wĩa wa kũtavany’a ũtethw’e vyũ na mbaĩ syonthe iwĩw’e; na nĩnavonokiw’e kuma kanyw’anĩ wa mũnyambũ. 18 Mwĩaĩi akambonokya kuma kĩla wĩanĩ mũthũku na akandangĩĩa kwondũ wa Ũsumbĩ wake wa ĩtu. Nguma nĩ syake tene na tene. Ameni.

19 Ngethesye Vilisika na Akwila, na nyũmba ya Onesivolo.

20 Elasito atiiwe Kolintho, ĩndĩ Telovimo nĩmũtiie Mileto e mũwau. 21 Tata ũndũ ũtonya ũvike ĩvinda ya mbevo yĩtanamba kũvika.

Nĩwakethw’a nĩ Euvulo vamwe na Vuteni, Leno, Kilautia, na ana-a-asa onthe.

22 Mwĩaĩi nĩethĩwe na veva ũla wonanasya. Ũseo wake mwingĩ nĩwĩthĩwe vamwe naku.