Ndeto sya Mbee

“Nyie neanĩie ndũanĩ ĩmwe nini ya vulovinzi ya ĩũlũ,” emanyĩthanyʼa ũu Ndauta wa kuma Siela Lĩonĩ. “Ĩvinda yĩmwe, yĩla naĩ kĩmwana, nĩkwaĩ ĩteta ya kĩtheka katĩ wa andũ ma mũsyĩ witũ na andũ ma mũsyĩ ũngĩ. Andũ ma mĩsyĩ ĩsu yelĩ maandũaa kĩtheka o kĩu kĩmwe. Nĩkenda ĩkoani yĩu yĩtuwe, mũndũ mũe nĩweetiwe. Anengie mũndũ mũũme ũngĩ kĩoo, na asyoka amũvwʼĩka suka mweũ. Ĩtina wa kavinda kanini mũndũ mũũme ũsu wavwʼĩkiwe suka nĩwambĩlĩĩlye kũthĩlĩa na kũnyala. Yĩla walyailye kĩoonĩ, aneenie na wasya mũnene atĩĩ: ‘Nĩona mũtumĩa aithengeea! Ekĩe ngũa nzaũ. Nĩ mũasa na nĩ mũkũũ, e na mbuĩ, na ekinya ekumbĩte vanini.’

“Aneenaa ũvoo wa Ũmawa! Nĩwʼo ĩndĩ weekanisye ta wakwatwa nĩ ndũũka na aamba atĩĩ: ‘Ethĩwa inywʼĩ mũikũĩkĩĩa ũndũ ngũmwĩa, ũkai mwĩyonee inywʼĩ ene!’ Eka, vaiĩ ũmwe witũ waĩ na ũkũmbaũ wa kwĩka ũu! Ũla mũndũ mũe nĩwamũvoovisye kwa kũmwĩtĩkĩangĩsya mũkimo wa matũ na kĩwʼũ, aũkwete nzelenĩ.

“Aineena kwĩsĩla kwa ũla mũndũ wa kĩoo, ‘Ũmawa’ aisye kĩtheka nĩ kya andũ ma mũsyĩ witũ. Eeie ũsũa aĩme kĩtheka kĩu ate na nzika. Andũ ma mũsyĩ ũla ũngĩ nĩmeetĩkĩlanile na ũtwio ũsu. Ĩteta yaminwa.”

Mawono ma mũthemba ũsu nĩmethĩawa kwa wingĩ Avilika ya Ũthũĩlonĩ wa Syũa. Kũũ, o tondũ kũilyĩ nthĩnĩ wa ilungu ingĩ sya nthĩ, mamilioni maingĩ mũno ma andũ maĩkĩĩaa kana akwʼũ mavĩtũkaa maendete ũtũonĩ wa maveva, kũla methĩawa matonya kũlyaĩĩlya na kũtongoesya mathayũ ma andũ ĩũlũ wa nthĩ. Atĩĩ, mũĩkĩĩo ũsu nĩ wa wʼo? Kwa wʼo akwʼũ me thayũ? Ethĩwa maiĩ thayũ, nĩ aaũ asu mewetaa kwĩthĩwa nĩmo maveva ma akwʼũ? Kũmanya mosũngĩo ala maĩle kwa mokũlyo asu nĩ ũndũ wa vata mũno. Nĩ ũndũ ũkonetye thayũ na kĩkwʼũ.