Ĩsomo ya 8

Mwĩkalĩle wa Thayũ wa Mũsyĩ Ũla Wendeeasya Ngai

Nĩ kyaũ kĩanda kya mũndũũme ũtwaanĩte nthĩnĩ wa mũsyĩ wake? (1)

Mũndũũme ũtwaanĩte aĩlĩtwe nĩ kwĩka mũka wake

ata? (2)

Ĩthe-wa-mũndũ e ianda syĩva ila waĩle kwĩanĩsya? (3)

Kĩanda kya mũndũ mũka mũtwae nĩ kyaũ nthĩnĩ wa mũsyĩ? (4)

Ngai endaa asyai na syana meke ata? (5)

Woni wa Mbivilia nĩ mwaũ ĩũlũ wa ũtaanĩsyo na ũthasyo wa mũtwaano? (6, 7)

1. Mbivilia ĩwetaa kana mũndũũme ũtwaanĩte nĩwe mũtwe wa mũsyĩ wake. (1 Akolintho 11:3) No nginya mũndũũme ũtwaanĩte ethĩwe na mũndũ mũka ũmwe weka. Maĩlĩtwe kwĩthĩwa matwaanĩte ũla kwaĩle kwĩanana na mwĩao.—1 Timotheo 3:2; Tito 3:1.

2. Mũndũũme aĩlĩtwe nĩ kwenda mũka o tondũ wĩyendaa mwene. Aĩlĩtwe nĩ kũmwĩka meko mailyĩ ũndũ Yesũ wĩkaa aatĩĩi make. (Aeveso 5:25, 28, 29) Ndaĩlĩtwe nĩ kũkũna mũka nongi kana kũmwĩka ũthũku kwa nzĩa o na yĩva. Ĩndĩ, aĩlĩtwe nĩ kũmwonʼya kĩkĩo na ndaĩa.—Akolosai 3:19; 1 Vetelo 3:7.

3. Ĩthe-wa-mũndũ aĩlĩtwe nĩ kwĩthingʼĩĩsya kũsũvĩa mũsyĩ wake. No nginya amanthĩe mũka na syana syake lĩu, ngũa, na wĩkalo. Ĩngĩ no nginya ĩthe-wa-mũndũ alanĩlye mũsyĩ wake mavata ma kĩveva. (1 Timotheo 5:8) Atongoasya nthĩnĩ wa kũtethya mũsyĩ wake wĩmanyĩsye ĩũlũ wa Ngai na ieleelyo Syake.—Kũtũngĩlĩlwa kwa Mĩao 6:4-9; Aeveso 6:4.

4. Mũndũ mũka mũtwae aĩlĩtwe nĩ kwĩthĩwa e mũtetheesya mũseo wa mũũme. (Mwambĩlĩlyo 2:18) Aĩlĩtwe nĩ kũtetheesya mũũme kũmanyĩsya na kũsomethya syana syoo mwĩkalĩle mũseo. (Nthimo 1:8) Yeova endaa mũndũ mũka mũtwae asũvĩe mũsyĩ wake kwa wendo. (Nthimo 31:10, 15, 26, 27; Tito 2:4, 5) Mũndũ mũka mũtwae aĩlĩtwe nĩ kwĩthĩwa e na ndaĩa nene kwa mũũme.—Aeveso 5:22, 23, 33.

5. Ngai endaa syana syĩwʼe asyai masyo. (Aeveso 6:1-3) Ekwatasya asyai mamanyĩsye na kũlũnga syana syoo. Asyai me na vata wa kũtũmĩa ĩvinda vamwe na syana syoo na kwĩmanyĩsya Mbivilia vamwe nasyo, makĩsũvĩa mavata masyo ma kĩveva na ma ngoonĩ. (Kũtũngĩlĩlwa kwa Mĩao 11:18, 19; Nthimo 22:6, 15) Asyai mayaĩlĩtwe nongi kũmanyĩsya syana syoo kĩmanyĩsyo kĩseo kwa nzĩa ya ũkũthũka kana ya wai.—Akolosai 3:21.

6. Yĩla andũ matwaanĩte meethĩwa na mathĩna ma kũlea kwĩwʼana, maĩlĩtwe nĩ kũtũmĩa motao ma Mbivilia. Mbivilia ĩtwĩkĩaa vinya twonanʼye wendo na kwĩthĩwa twĩ aekei. (Akolosai 3:12-14) Ndeto ya Ngai ndĩũmĩĩasya kũvathana tayo nzĩa ya kũlingũla tũthĩna. Ĩndĩ mũndũ mũka mũtwae nĩvatonyeka akanyuva kũtia mũũme ethĩwa (1) mũũme nũkũlea na ngũlũ kũkwatĩĩa mũsyĩ wake, (2) mũũme e ũngʼendu wĩ wũkiti mwingĩ ũkethĩa ũima na thayũ wa mũka wĩ mũisyonĩ, kana (3) ũvĩnganĩsyo wake nĩ mũthonoku kĩthimo ũkethĩa vaitonyeka mũka athaithe Yeova.—1 Akolintho 7:12, 13.

7. Andũ matwaanĩte no nginya methĩwe me aĩkĩĩku ene kwa ene. Ũthaaa (ũlaalai) nthĩnĩ wa mũtwaano nĩ naĩ kwa Ngai na kwa mũndũ ũla ũngĩ mũtwaanonĩ. (Aevelania 13:4) Ngomanʼyo nza wa mũtwaano nokyo kĩtumi kĩmwe kyoka kya Kĩmaandĩko kya kũthasya mũtwaano na kwĩtĩkĩlya mũndũ atwaane kana atwawe ĩngĩ. (Mathayo 19:6-9; Alomi 7:2, 3) Yeova nũmenaa ũndũ wa andũ kũthaanʼya vate itumi sya Kĩmaandĩko na maitwaana na mũndũ ũngĩ.—Malaki 2:14-16.

[Visa Ithanguni ya 16, 17]

Ngai ekwatasya kana asyai makamanyĩsya syana syoo na kũilũnga

[Visa Ithanguni ya 17]

Ĩthe-wa-mũndũ wĩ wendo amanthĩaa mũsyĩ wake kĩmwĩĩ na kĩveva