Anyanya Ma Ngai Naaũ?

Yesũ Klĩsto nĩ Mwana wa Yeova na nĩwe mũnyanya wake wĩ mũamba wa vakuvĩ vyũ na mwende mũno kwĩ onthe. Atanamba kwĩkala thayũ e mũndũ ĩũlũ wa nthĩ, Yesũ ekalile e thayũ ĩtunĩ e kyũmbe kya veva kĩ vinya mwingĩ. (Yoana 17:5) Nĩwʼo ĩndĩ wookie kũũ nthĩ kũmanyĩsya andũ ũla wʼo ĩũlũ wa Ngai. (Yoana 18:37) Ĩngĩ nĩwanenganie thayũ wake wa kĩmũndũ nĩ kenda avonokye andũ ewi kuma nthĩnĩ wa naĩ na kĩkwʼũ. (Alomi 6:23) Yesũ yuyu nĩwe Mũsumbĩ wa Ũsumbĩ wa Ngai, silikalĩ ya ĩtunĩ ĩla ĩkaetee nthĩ ĩno Valatiso.—Ũvuanʼyo 19:16.

Alaĩka o nao nĩ anyanya ma Ngai. Alaĩka mayaaambĩĩa mathayũ moo me andũ ĩũlũ wa nthĩ. Moombĩwe ĩtunĩ Ngai atanamba kũtwʼĩkĩthya nthĩ. (Yovu 38:4-7) Kwĩ milioni mbingĩ sya alaĩka. (Ndanieli 7:10) Anyanya asu ma Ngai meenda andũ memanyĩsye ũla wʼo ĩũlũ wa Yeova.—Ũvuanʼyo 14:6, 7.

Na ĩngĩ Ngai e na anyanya ĩũlũ wa nthĩ; ametaa ngũsĩ syake. Ngũsĩ kotinĩ ĩwetaa ũndũ yĩsĩ ĩũlũ wa mũndũ kana kĩndũ. Ngũsĩ sya Yeova iweteaa andũ ala angĩ ũndũ syĩsĩ ĩũlũ wa Yeova na kĩeleelo kyake. (Isaia 43:10) Tondũ kũilyĩ kwa alaĩka, Ngũsĩ syĩenda iũtetheesye kwĩmanyĩsya ũla wʼo ĩũlũ wa Yeova. Syĩenda o naku wĩthĩwe mũnyanya wa Ngai.