Walanyʼo na Wĩa Woo wa Nthĩ Yonthe

KWĨ nzĩa kauta itũmĩawa kumya mwolooto wĩanĩ ũũ wa kumya ũkũsĩ nthĩnĩ wa nthĩ ithonokete 230 kũla ũtethawʼa. Nzama ĩla nene ya Ũũngamĩi yĩkũya wĩkalonĩ mũnene Brooklyn, New York nĩyo yumasya mwoloto wʼonthe. Nzama ĩsu Yaũũngamĩi kĩla mwaka nĩtũmaa atumĩa kĩlionĩ kyoo maende ilungunĩ nene sya nthĩ makakomane na aũngamĩĩi ma wĩa movisinĩ ma mbonge. Nthĩnĩ wa movisi asu ma mbonge, kwĩ Kamitii sya Ũvonge syĩna ta amemba ta atatũ kũvika mũonza kũsisya wĩa nthĩnĩ wa nthĩ ila syĩ ungu wa ũũngamĩi woo. Mbonge imwe nĩsyĩthĩawa na masinĩ sya ũkyava mavũkũ, na ingĩ ithyũũka mĩtũkĩ ikĩtumba mavuku. Nthĩ kana isio ila siũngamĩwe nĩ ũvonge ũmwe nĩ siaanĩtwe ivalo, na ivalo isu ikasyoka kũaanywʼa mĩthyũlũlũko. Kĩla mũthyũlũlũko wĩna ta ikundi 20. Mũsyaĩĩsya wa kĩvalo nũthyũlũlũkĩlaa kĩla mũthyũlũlũko kwa kyumanĩsyo. Kĩla mũthyũlũlũko wĩthĩawa na maũmbano elĩ kĩla mwaka. Kwĩ mũsyaĩĩsya ũngĩ wa mũthyũlũlũko, nake nũthokeaa kĩla kĩkundi nthĩnĩ wa mũthyũlũlũko wake keli kwa mwaka, aitetheesya Ngũsĩ kũvanga na kũtavanyʼa kĩsionĩ kya kĩkundi kĩu.

Kĩkundi kya ũtuinĩ vamwe na Nyũmba yoo ya Ũsumbĩ nĩsyo kĩtina kya kũtavanyʼa ũvoo mũseo kĩsionĩ kyenyu. Ĩsio ila syĩ ungu wa kĩla kĩkundi nĩsiaanĩtwʼe tũsio tũnini. Nĩ tũaĩwe Ngũsĩ ĩmwe ĩmwe ala methingʼĩĩasya kũthokea na kũea ngewa na andũ mĩsyĩnĩ kũu isĩonĩ. Kĩla kĩkundi, kĩthĩawa na Ngũsĩ kauta na ta kũvikĩĩa 200, na nĩ kĩthĩawa na atumĩa anyuve kũsyaĩĩsya maũndũ mana ma kĩkundi. Ũnyaĩĩkya wa ũvoo mũseo wa kĩla Ngũsĩ nĩ wʼo ũndũ ũla wa vata mũno nthĩnĩ wa walanyʼo wa Ngũsĩ sya Yeova. Kĩla ũmwe wa Ngũsĩ sya Yeova, o na eethĩwa eyumĩtye kũthũkũma wĩkalo mũnene wa nthĩ yonthe, kana mbongenĩ, kana ikundinĩ, nũtwaĩĩsya wĩa ũũ wa ũtavya ala angĩ yĩũlũ wa ũvoo mũseo wa Ũsumbĩ wa Ngai.

Livoti sya ũtavanyʼa ũsu nitwaawa wĩkalonĩ mũnene wa nthĩ yonthe, na ĩvuku ya mwaka mũima yĩtawa Yearbook, nĩ yĩseũvawʼa na kũkyavwa. Na ĩngĩ, ve kalungu katumbawa nthĩnĩ wa ĩkaaseti ya mwei wa mbee wa kĩla mwaka ya Mnara wa Mlinzi. Mavuku aa me elĩ manenganae livoti ya kĩĩnthĩnĩ kwosana na ũkũsĩ ũla ũminĩte kumwa mwaka wonthe ĩũlũ wa Yeova na Ũsumbĩ wake ũla wĩ ungu wa Klisto Yesũ. Myaka minini ĩla mĩthelu Ngũsĩ na andũ makwendeewʼa ta 14,000,000 nĩ methĩĩtwe maivika ũmbanonĩ wa kũlilikana kĩkwʼũ kya Yesũ kĩla mwaka. Ngũsĩ sya Yeova nitũmĩaa mbee wa masaa 1,000,000,000 kĩla mwaka kũnyaĩĩkya ũvoo mũseo, na andũ 300,000 angĩ nĩmavatisawa. Mavuku maana milioni nyingĩ nĩ manenganawe.