Ndeto sya Mbee

NGAI MWENE VINYA WʼONTHE nĩ we Mũnene wa wũmbi wʼonthe. Thayũ witũ wa ĩvinda yĩĩ na yĩla yũkĩte wĩ mokonĩ make. We ena vinya wa ũtwananga na nũtonya ũtũnenga mĩthĩnzĩo. Nũtonya kũnengane thayũ ona nũtonya ũwosa. Kũkeethĩwa ũseo wĩana ata ĩndĩ kwitũ twamwendeesya! Ĩndĩ twalea ũmwendeesya maũndũ maitũ maikethĩwa me maseo. Kwooũ ĩndĩ nĩ ũndũ wa vata mũno nzĩa yaitũ ya ũthaithi yĩtĩkĩlwe nĩwe!

Andũ mathaithaa na nzĩa mbingĩ. Tũkasya ndĩni nota nzĩa-ĩ, no twasye syonthe nĩ syĩtĩkĩlawa nĩ Ngai? Aiee, ti syonthe. Yesũ, mwathani wa Ngai, oonanisye kana nzĩa no ilĩ tũ. We aisye: “Nũndũ mbingĩlo nĩ nthanthau, na nzĩa nĩ mbaamu, ĩla ĩelete wanangĩkonĩ, nao nĩ aingĩ ala mavotelaa mbingĩlonĩ ĩsu. Nũndũ mbingĩlo nĩ ntheke na nzĩa nĩ nziĩĩe, ĩla ĩelete thayũnĩ, nao ni avũthũ ala mamyonaa.”—Mathayo 7:13, 14.

Kwoou ĩndĩ ndĩni syonthe no mĩvĩa ĩlĩ: ũmwe ũla welekelye andũ thayũnĩ na ũla ũngĩ welekelye wanangĩkonĩ. Kĩeleelo kya kavuku kaa nĩ kũũtetheesya we wone nzĩa ĩla yelekelye andũ thayũnĩ ũtathela.