Nthĩ Ĩno Yelekele Va?

Mathĩna maito na maũndũ ma ũtelemya matwʼĩkĩte maũvoo ma kĩla mũthenya nthĩ yonthe! Meonananyʼa ata?

MŨUO WA MŨNDŨ MWENE: Mbomu kũtũĩkwʼa sokoni. Alimũ na syana kũathwa na mavuti me sukulu. Syana kũywa asyai matesĩ. Iveti na atumĩa kũvenwa kwĩo mũthenya.

NDĨNI: Makanisa kũtetheesya ita sya kaũ. Atongoi ma makanisa kũsitakwa nũndũ wa kũaa andũ aingĩ. Avea kũkoma na andũ ma mũika mũnini; makanisa kũvitha maũndũ mathũku. Andũ kũeka kũthi makanisanĩ; ithokoo ũtongoinĩ wa makanisa na mbesa kũĩwa.

NTHĨ: Itheka kũtemwa mĩtĩ vyũ nũndũ wa viasala. Mĩtitũ kũminwa vyũ nĩ ngya iimantha ngũ na makaa. Ithima kũthũkwʼa ũkethĩa kĩwʼũ kĩinywʼĩka. Makũyũ kũawa nĩ kĩko kuma kũla kũseũvĩawʼa syĩndũ na nzĩa ingĩ syaũtea makũyũ sya matukũ aa. Nzeve kũthũkwʼa vyũ.

ŨKWATI: Mũsaala wa mũndũ ũmwe kwa mwaka nthĩnĩ wa nthĩ sya ĩtheo sya Avĩlĩka nĩ mũniini mũno. Makambunĩ maingĩ nĩmavingĩtwe na andũ aingĩ kwasya mawĩa nũndũ wa aũngamĩi me ĩtomo. Aviasala aingĩ kwasya mbesa syoo nũndũ wa ũkengani.

ŨNYIVU WA LĨU: Andũ vakuvĩ milioni 800 mavinda maingĩ makomaa na nzaa.

KAŨ: Myaka 100 mĩvĩtu kaũ ũaĩte andũ mbee wa milioni 100. Kwĩ mĩio ya kaũ ĩtonya kũmina andũ nthĩ yonthe vyũ. Kaũ wa ene kwa ene. Ũngʼendu kũvika nthĩ yonthe.

MĨIMŨ NA MOWAU ANGĨ: Kwambĩĩa mwaka wa 1918, Ĩkua ya Siveini yooaie andũ milioni 21. ŨKIMWI (Mũthelo) yu ũtwʼĩkĩte “nĩwʼo ũwau ũla mũthũku nthĩ yonthe.” Mowau ta kanza na ũwau wa ngoo nĩmaetete kyeva kingĩ nthĩ yonthe.

Sisya maũndũ asu onthe. Wĩona ta monekete kũndũ o kũmwe? Kana nĩ maũndũ manene monekete nthĩ yonthe?

[Ĩsandũkũ/Visa ĩthangũnĩ ya 5]

Ngai kwa Wʼo Ki Nũthĩnĩkaa Ĩũlũ Witũ?

Nũndũ wa kũthĩnwʼa nĩ maũndũ ma kũtelemya na wasyo mwingĩ andũ aingĩ masengʼaa nĩkĩ Ngai ũtasiĩĩaa maũndũ asu.

Ngai nũtũthĩnĩkĩaa. Nũnenganae ũtongosya mwaĩlu na kũthũmũsya. (Mathayo 11:28-30; 2 Timotheo 3:16, 17) Nũseũvĩtye mũvango wa kũmina vyũ ũngʼendu, ũwau na kĩkwʼũ. Maũndũ ala wĩkĩte meonanyʼa kana we nũthĩnĩkĩaa andũ ma nthĩ, mbaĩ na ithyomo syonthe atekwendeesya.—Meko 10:34, 35.

Ithyĩ nĩtũmũũngaa Ngai? We nĩwĩsĩ Mũmbi wa ĩtu na nthĩ nũũ? Syĩtwa yake nĩ yĩva? Kĩeleelo kyake nĩ kyaũ? Nũsũngĩĩte makũlyo asu Mbivilianĩ. Nthĩnĩ wayo atũtavasya ũndũ ũkeka nĩ kana amine vyũ ũngʼendu o vamwe na ũwau na kĩkwʼũ. Nĩtwaĩlĩtwe nĩkwĩmanyĩsya ĩũlũ wake na kĩeleelo kyake. Ithyĩ nĩtũtonya kwĩkwatya kũtetheka nĩ maũndũ ala wĩkĩte tũtekũmũĩkĩĩa? (Yoana 3:16; Aevelania 11:6) Na nĩ ũndũ wa vata kwĩwʼa mĩao yake. (1 Yoana 5:3) We nũũngaa ũndũ ũtonya kwĩwʼa mĩao yake?

Nĩ kana tũelewe nĩkĩ Ngai ũekete maũndũ aa mekwʼo maendee, no mũvaka tũmanye ũndũ mũna wa vata mũno. Mbivilia nĩũeleetye. Nthĩnĩ wa kathangũ ka 15 kavukunĩ kaa ũndũ ũsu nĩmwonanyʼe.