Yovu Ndaaeka Kwĩthĩwa E Mũĩkĩĩku

YO VE mũndũ ũtonya kũendeea kwĩthĩwa e mũĩkĩĩku kwa Ngai akwatwa nĩ matatwa maito, o na ethĩwa vai kĩndũ ũkũkwata eethĩwa e mwĩwi? Ĩkũlyo yĩu nĩyaumĩlile na yasũngĩwa ũndũnĩ ũmwe wamũkwatie mũndũ weetawa Yovu.

Ĩla Aisilaeli maĩ Misili, Yovu, ũla nĩ mũndũ wa mũsyĩ wa Avalaamu, ekalaa Arabia. Ĩvindanĩ yĩu alaĩka ĩtunĩ nĩmoombanĩte mbee wa Ngai, nake Satani ũla waĩ mũlei aĩ o vo. Me ũmbanonĩ ũsu, Yeova nĩwaisye kana ndaĩ na nzika na mũthũkũmi wake mũĩkĩĩku, Yovu. Yeova nĩwaisye kana vai mũndũ ũngĩ waĩ na ũĩkĩĩku ta ũla waĩ na Yovu. Ĩndĩ, Satani aasya kana Yovu amũthũkũmaa Ngai nũndũ nĩwamũathimĩte na akamũsũvĩa. O na ĩngĩ, Satani aisye Yovu akavenwa syĩndũ syonthe ila wĩ nasyo no amũume Ngai.

Ngai nĩwamwĩtĩkĩlilye Satani amũvene Yovu malĩ yake, syana syake, na ĩndĩ amũetee ũwau. Nĩkwĩthĩwa Yovu ndeesĩ kana nĩ Satani ũkũmũthĩnyʼa, ndaĩ atonya kũelewa nĩkĩ Ngai wamũekete akwatwe nĩ mathĩna asu onthe. O na vailyĩ ũũ, Yovu ndaamũtia Ngai.

Anyanya atatũ ma ũvũngũ nĩmookie vala ve Yovu. Nthĩnĩ wa ĩvuku ya Yovu, nĩvaandĩkĩtwe maũndũ maingĩ maatĩanĩe ala maneeniwe nĩ aũme asu. Aũme asu nĩmatatie kũmũĩkĩĩthya Yovu kana nĩ Ngai wamũkũnaa mũnzyũ nũndũ wa naĩ ila weekĩte kĩmbithĩnĩ. O na nĩmaisye kana Ngai ndendeeawʼa nĩ athũkũmi make, o na ndamaĩkĩĩĩte. Yovu nĩwaleanile na mawoni moo mathũku. O na nĩwaneenie na ũkũmbaũ asya kana eendeea kwĩthĩwa e mũĩkĩĩku nginya kĩkwʼũ!

Ĩndĩ, Yovu nĩwavĩtisye nũndũ wa kũthĩnĩka mũno aimantha ũndũ ũkwĩtetea. Mũndũũme ũmwe wa mũika weetawa Eliu, ũla weethukĩĩisye ngewa isu syonthe, nĩwambĩĩe kũneena. Eliu nĩwamũkanisye Yovu nũndũ wa kũlea kũmanya kana kũtetewa kwa ũsumbĩki mũnene wa Yeova Ngai nĩkwʼo kwa vata mũno vyũ kwĩ kũtetewa kwa mũndũ o na wĩva. O na ĩngĩ Eliu nĩwamakanisye mũno anyanya asu ma ũvũngũ ma Yovu.

Ĩtina Yeova Ngai nĩwaneenie na Yovu na alũnga mosũanĩo make. Yeova nĩwatũmĩie syĩndũ mbingĩ ila syũmbĩtwe kwa nzĩa ya ũsengyʼo, na amũmanyĩsya Yovu kana mũndũ ndatonya kwĩanana na Ngai kwa nzĩa o na yĩva. Yovu nĩweenyivisye na eetĩkĩla kũlũngwa nĩ Ngai. Nĩkwĩthĩwa Yeova “e wendo mwingĩ na e tei,” nĩwamũvoisye Yovu, amũnenga kũndũ kwĩlĩ kwa malĩ ĩla waaĩtye, na amũathima na syana 10. (Yakovo 5:11) Yovu nĩwaendeeie kwĩthĩwa e mũĩkĩĩku kwa Yeova o na kũtwʼĩka nĩwakomanie na motato maito. Kwĩka ũu nĩkwaĩkĩĩthisye kana ũndũ ũla Satani waneenete ayasya kana mũndũ atatwa ndatonya kũendeea kwĩthĩwa e mũĩkĩĩku kwa Ngai, nĩ wa ũvũngũ.

​—Kwosana na ĩvuku ya Yovu.