Ngai Nũũ?

1. Nĩkĩ twaĩle kũmũthaitha Ngai?

Ngai wa wʼo nĩwe Mũmbi wa syĩndũ syonthe. Ndaĩ na mwambĩlĩlyo na ndakethĩwa na mũminũkĩlyo nongi. (Savuli 90:2) Nĩwe Mwambĩlĩlya wa ũvoo mũseo ũla wĩ Mbivilianĩ. (1 Timotheo 1:11) Nũndũ Ngai nĩwe watũnengie thayũ, no we weka twaĩle kũmũthaitha.​—Soma Ũvuanʼyo 4:11.

2. Ngai ailyĩ ata?

Nũndũ Ngai nĩ Veva vaiĩ mũndũ waamwona o na ĩndĩĩ, ũu nĩ kwonanyʼa we ti ũndũ ũmwe na andũ, ala me mwĩĩ wa nyama na nthakame. (Yoana 1:18; 4:24) Ĩndĩ o na ũu wĩ o vo, nĩtũtonya kũmanya ũndũ Ngai ũilyĩ kwĩsĩla syĩndũ ila woombie. Kwa ngelekanyʼo, matunda na malaa ma mĩthemba mingĩ matũtavasya Ngai e wendo na nĩ mũĩ. Ũnene wa nthĩ ũtwonasya ũtonyi wake.​—Soma Alomi 1:20.

Nĩtũtonya kwĩmanyĩsya mũno ĩũlũ wa ũndũ Ngai ũilyĩ kwa kũsoma Mbivilia. Kwa ngelekanyʼo, Mbivilia nĩtũtavasya kĩla Ngai wendete na kĩla ũmenete, ũndũ wĩkanaa na andũ, na ũndũ wĩkaa ĩla andũ meeka ũseo kana meeka ũthũku.​—Soma Savuli 103:7-10.

3. Ngai e syĩtwa?

Yesũ aisye: “Inywʼĩ ĩndĩ voyaai atĩĩ: Asa waitũ ũla wĩ ĩtunĩ, syĩtwa yaku yĩtaĩwe.” (Nithyĩ tweeketye ndeto; Mathayo 6:9) Ngai e syĩtwa o yĩmwe, o na kau e masyĩtwa maingĩ ma ũnene. Syĩtwa yĩu yĩtamũkawa kwa nzĩa syĩ kĩvathũkanyʼo nthĩnĩ wa kĩla kĩthyomo. Kwa Kĩkamba yĩtamũkawa “Yeova.”​—Soma Savuli 83:18.

Syĩtwa yĩu nĩyumĩtwʼe Mbivilianĩ mbingĩ na vandũ vayo vakekĩwa masyĩtwa ma ũnene ta Mwĩaĩi kana Ngai. Ĩndĩ ĩla Mbivilia yaandĩkiwe, syĩtwa yĩu yakwatĩkanaa nthĩnĩ wayo mbee wa mavinda 7,000. Yesũ nĩwamanyĩthisye syĩtwa ya Ngai ĩla wamanyĩasya andũ ĩũlũ wa Ngai.​—Soma Yoana 17:26.

Ĩloele vitio yĩ na kyongo, We Ngai E Ĩsyĩtwa?

4. Yeova nũtũthĩnĩkĩaa?

Nĩkwĩthĩwa andũ aingĩ nĩmathĩnaa, ũu nĩkwonanyʼa kana Yeova nĩ Ngai ũtatũthĩnĩkĩaa? Andũ amwe maasya atũeteae mathĩna nĩ kana atũtate, ĩndĩ ũu ti wʼo.​—Soma Yakovo 1:13.

Ngai nĩwonaa andũ me ma vata kwake na nĩkyo kĩtumi ũmanengete ũthasyo wa kũnyuva. Nĩtwaĩle kũtũnga mũvea nũndũ wa ũthasyo witũ wa kũnyuva kũmũthũkũma Ngai. (Yosua 24:15) Ĩndĩ andũ aingĩ manyuvaa kwĩka angĩ mothũku, na kwondũ wa ũu kũyĩthĩwa na mathĩna maingĩ. Mothũku asu matumaa Yeova ewʼa woo.​—Soma Mwambĩlĩlyo 6:5, 6.

Yeova nĩ Ngai ũtũthĩnĩkĩaa. Endaa tũtanĩe thayũ. O mĩtũkĩ akamina mathĩna na ayananga ala mamaetae. Ĩvindanĩ yĩĩ, e na kĩtumi kĩseo kya kwĩtĩkĩlya mathĩna kwa kavinda. Nthĩnĩ wa Ĩsomo ya 8, tũkeemanyĩsya nĩkĩ wĩtĩkĩlĩtye mathĩna methĩwe.​—Soma 2 Vetelo 2:9; 3:7, 13.

5. Tũtonya kũendeea kũmũthengeea Ngai ata?

Yeova nũtũthoketye tũmũthengeee kwĩsĩla mboyanĩ. Nĩwendeeawʼa nĩ kĩla ũmwe witũ. (Savuli 65:2; 145:18) E wendi wa kũekea. O na ethĩwa mavinda angĩ nĩtũemawa nĩkũmwendeesya, nũmanyaa ĩla tweekĩa kĩthito kya kwĩka ũu. Kwoou o na kau tũi eanĩu, kwa wʼo nĩtũtonya kũtanĩa ũnyanya wa vakuvĩ vamwe na Ngai.​—Soma Savuli 103:12-14; Yakovo 4:8.

Nũndũ Yeova nũtũnengete thayũ, twaĩle kũmwenda mũno kwĩ mũndũ o na wĩva. (Maliko 12:30) O ũndũ ũendeee kwonanyʼa wendo waku kwa Ngai kwa kwĩmanyĩsya maũndũ maingĩ ĩũlũ wake na kwĩka ũndũ ũkwenda twĩke, nowʼo ũkaendeeaa kũmũthengeea ĩvinda yonthe.​—Soma 1 Timotheo 2:4; 1 Yoana 5:3.