Valũa Kuma kwa Nzama Ĩla Ĩtongoesye

Kwa Ana-a-asa na Eĩtu-a-asa Maitũ Endwa:

Kwa ĩvinda ya mbee, nthĩnĩ wa ĩkaseti ya andũ onthe ya Mũsyaĩĩsya ya Mwei wa 1, 2008, nĩtwasomie ngewa ya mbee vyũ kĩlungunĩ kĩ na kyongo, “Ĩthĩwa na Mũĩkĩĩo ta Woo.” Kuma vau, ĩtina wa kĩla myei ĩtatũ, kĩlungu kĩu nĩkĩthĩĩtwe kĩitumbĩthwʼa ĩkasetinĩ yĩu kĩ na ngewa nzaũ, na nĩtũtũngaa mũvea mũno nũndũ wa ilungu isu.

Mo andũ maĩtye ata ĩtina wa kũsoma ngewa ila syĩthĩawa kĩlungunĩ kĩu? Mũsomi ũmwe aandĩkie ũũ ĩtina wa kũsoma ngewa ya Matha: “Nathekie mũno nasoma ngewa ĩsu nũndũ nĩilye take vyũ. Yĩla nathokya andũ nĩthĩawa ngwatene mũno ndyĩka kyonthe kĩla ndonya none maitanĩa, nginya o na ngolwa kana o nakwa nĩnaĩle kwĩkala nthĩ nĩthĩwe vamwe namo.” Mwĩĩtu ũmwe wa mũika eemanyĩisye ũndũ ũmwe wa vata mũno ngewanĩ ya Esita. Aielesya aĩtye: “Nĩ ũndũ ũtonyeka tũkethĩa tũithĩnĩkĩa mũno kwĩyanakavya na kũsembanyʼa na mĩsono ya ngũa ĩla yumie. Ĩndĩ o na kau nĩtwaĩle kwĩkĩa ngũa nesa, ũu ti kwasya tũtũmĩae ĩvinda yitũ yingĩ tũivindĩĩsya o kwĩyanakavya.” Aendeeie kwasya: “Yeova endeeawʼa nĩ ũndũ tũilye ngoonĩ.” Nake mwĩĩtu-a-asa ũngĩ endeeiwʼe mũno nĩ ngewa ya mũtũmwa Vetelo. Aĩtye: “Ndisoma ngewa ĩsu neewʼaa ta nĩendeee kwĩloela maũndũ ala mawetetwe mayĩkĩka. O na neewʼaa nyie mwene nĩ ta nĩ ĩ ngewanĩ. Neewʼaa ndikiitwa ngoo vyũ nĩ kĩla kĩendeee.”

Ndeto sya asomi aa na angĩ aingĩ, ala matũandĩkĩie maitũnga mũvea nũndũ wa kĩlungu kĩĩ syĩonanyʼa kana nĩmekwĩtĩkĩlana na ndeto ii mũtũmwa Vaulo waandĩkie myaka mingĩ mĩvĩtu: “Maũndũ onthe ala maandĩkiwe tene maandĩkiwe kwondũ wa kũtũmanyĩsya.” (Alo 15:4) Yeova nĩwaĩkĩĩthisye kana ngewa ii nĩsyeekĩwa Mbivilianĩ nĩ kana itũmanyĩsye maũndũ ma vata. O na twĩthĩwe twamanyie ũwʼo ĩndĩĩ, ithyonthe no twĩmanyĩsye maũndũ ma vata mũno ngewanĩ isu.

Twĩmwĩkĩa vinya mũmanthe ĩvinda mwĩmanyĩsye ĩvuku yĩĩ. O na no mũyĩtũmĩe Ũthaithinĩ wa Mũsyĩ. Syana syenyu ikatanĩa mũno! Na yĩla kĩkundi kĩkethĩwa kĩisoma ĩvuku yĩĩ kĩlungunĩ kya Ĩmanyĩsyo ya Mbivilia ya Kĩkundi, mwa ndũkaatĩĩe maũmbano mũthenya o na ũmwe! Mantha mwanya ũyĩsome, na ndũkasome wĩkalaatĩte. Kũnaa visa kĩlĩkonĩ na ũivindĩĩasya kwa ũliku kĩla kĩendeee. Tataa kũelewa ũndũ andũ ala ũũsoma ĩũlũ woo meewʼaa, na ũikũnaa visa kĩlĩkonĩ ĩũlũ wa maũndũ ala moonaa. Vindĩĩasya ũndũ meekaa makwatwa nĩ maũndũ mana, na ũndũ ũtonya kwĩthĩwa weekie keka nue wakwatiwe nĩ maũndũ ta asu.

Twĩ na ũtanu mũno kumĩthya ĩvuku yĩĩ! Twĩĩkwatya kana nĩyĩũmũtethya mũno vamwe na mĩsyĩ yenyu. Nĩtũmwendete mũno na twĩmwendea ũseo,

Nzama Ĩla Ĩtongoesye ya Ngũsĩ sya Yeova