Samueli Aendeeie Kwĩka Maũndũ Ala Maseo

Kuma e mũnini, Samueli athũkũmaa nyũmbanĩ ya Ngai na no vo wekalaa. Vau nĩvo andũ mookaa kũmũthaitha Yeova. Nĩwĩsĩ ũndũ Samueli wookangie nyũmbanĩ ya Ngai? Eka twambe kwĩmanyĩsya ĩũlũ wa Aana, inyia wa Samueli.

Kwa ĩvinda ĩasa, Aana ndaĩ atonya kũsyaa o na vala nĩwendaa mũno ethĩwe na kana. Kwoou, nĩwamũvoyie Yeova na amwĩsũva amũtetheesye. Aisye kana asyaa kamwana, akakatwaa kakekalae nyũmbanĩ ya Ngai na kaithũkũmaa vo. Yeova nĩwasũngĩie mboya ya Aana na kwoou asyaa kamwana. Kamwana kau aketie Samueli. O tondũ Aana wamwathĩte Ngai, nĩwatwaie kamwana kau kakathũkũme nyũmbanĩ ya Ngai. Akatwaie ke na ũkũũ wa myaka ĩtatũ kana ĩna.

Ĩvinda yĩu Eli nĩwe waĩ mũthembi mũnene nyũmbanĩ ya Ngai. Ekalaa vau na anake make elĩ ala mathũkũmaa o vau. Lilikana kana ĩsu yaĩ nyũmba ya ũthaithi, na andũ ala mekalaa vo maaĩlĩte kwĩka maũndũ maseo. Ĩndĩ, anake asu ma Eli meekaa maũndũ mathũku mũno. Samueli nĩwoonaa maũndũ ala meekaa. Ĩndĩ we Samueli nĩweekaa maũndũ mathũku ta anake asu ma Eli?— Aiee, aendeeie kwĩka maũndũ maseo o tondũ asyai make mamũmanyĩĩtye ekae.

Wĩona Eli ta waaĩle kwĩka ata oona anake asu make mayĩka maũndũ mathũku?— Aaĩle kũmakanyʼa na aimavata vyũ kũthũkũma nyũmbanĩ ya Ngai. Ĩndĩ ndaaĩka ũu. Kwoou Eli na anake make matuma Yeova ewʼa woo na avanga kũmananga.

Ĩvinda yĩmwe ũtukũ Samueli akomete nĩweewie mũndũ aimwĩta: ‘Samueli!’ Nĩwasembie vala ve Eli, ĩndĩ Eli amwĩa: “Ndinetana.” Samueli nĩweetiwe ĩngĩ mavinda elĩ. Ĩtina wa kwĩtwa ĩvinda ya katatũ, Eli amwĩie asye: ‘Ame Yeova neena nakwa, nĩngwĩthukĩĩsye.’ Samueli nĩweekie ũu na ĩndĩ Yeova amwĩa: ‘Tavya Eli kana nĩngũmwananga vamwe na mũsyĩ wake nũndũ wa maũndũ mathũku ala mekĩte.’ Wĩona ta waĩ ũndũ wĩ laisi kwa Samueli kũmũtavya Eli ũndũ ũsu?— Aiee ndwaĩ ũndũ wĩ laisi. Ĩndĩ, o na vala Samueli nĩwakĩaa kwĩka ũu, nĩwawetie ũndũ Yeova wamũtavĩtye. Maũndũ ala Yeova wawetete nĩmeekĩkie nũndũ anake elĩ ma Eli nĩmooaiwe, o nake Eli akwʼa.

Nĩtũtonya kwĩmanyĩsya ũndũ mũseo kumana na Samueli. Samueli nĩweekaa maũndũ maseo o na vala nĩwoonaa andũ angĩ mayĩka maũndũ mathũku. Ũtonya kwĩka ata? We no wĩthĩwe ũilyĩ ta Samueli na ũiendeea kwĩka maũndũ maseo? Weeka ũu, ũkamũtanĩthya Yeova na asyai maku.