Kũtavanyʼa Ĩũlũ Wa ŨSumbĩ—Kũnyaĩĩkya Ũvoo Mũseo Nthĩ Yonthe

KWASŨANĨA twĩ kwakya na ndũũthi wĩanĩ mũthenya ũsu, na ũendeee kwĩyũmbanyʼa nĩ kenda ũthi ũtavanyʼa. Ĩndĩ ũyĩwʼa ta ũtethi nũndũ wĩ na mĩnoo, na wĩona nũseo ũthũmũe. O na ũu wĩ o vo, ũivoya ĩũlũ wa ũndũ ũsu na ũitwʼa kũthi. Mũthenya ũsu ũyĩwa ũkatavanyʼe na mwĩĩtu-a-asa mũkũũ, na woona ĩnee na wũmĩĩsyo wake, ũyĩwʼa wakiitwa ngoo. Na o ũendeee kũtavanyʼa ũvoo mũseo nyũmba na nyũmba, ũililikana kana ana-a-asa na eĩtu-a-asa maku ĩũlũ wa nthĩ maendeee kwĩka o taku, maitũmĩa mavuku o ta ala ũũtũmĩa, na onthe mamanyĩĩtwʼe o taku. Kwoou, ũyĩsa kũtwʼĩka nĩwenũka, ũyĩthĩa wĩĩwʼa weekĩwa vinya mũno. Na ũu ũituma ũtana mũno nũndũ nũendie kũtavanyʼa!

Ũmũnthĩ, kũtavanyʼa ũvoo mũseo nĩwʼo wĩa ũla wa vata vyũ ũendeee kwĩanĩwʼa nĩ Ũsumbĩ wa Ngai. Yesũ athanie kana mĩthenyanĩ ya mũminũkĩlyo ũvoo mũseo ũkanyaĩĩkwʼa kũndũ kwingĩ mũno ĩũlũ wa nthĩ. (Mt. 24:14) Wathani ũsu wĩanĩĩte ata? Nthĩnĩ wa ilungu ila ineeneetwe ĩsomonĩ yĩĩ, twĩenda kũmanya naaũ ala matavanasya ũvoo ũsu mũseo, nzĩa ila matũmĩaa, na syĩndũ sya vata mũno ila methĩĩtwe maitũmĩa ũtavanyʼanĩ woo. Wĩa ũsu wa ũtavanyʼa nũtetheesye andũ nthĩ yonthe mamanye kana Ũsumbĩ wa Ngai nĩ silikalĩ ya wʼo ĩsumbĩkĩte ũmũnthĩ.