Yesũ Asyaĩwe Va, na Asyaiwe Ĩndĩĩ?

Kaisali Aukusito, ũla waĩ mũsumbĩ Ũsumbĩnĩ wa Lomi, nĩwaumisye mwĩao kana andũ onthe nĩmaĩle kũandĩkĩthwʼa. Kwoou Yosevu na Meli nĩmaaĩle kũthi ndũanĩ ĩla masyaĩwe, nayo nĩ Mbetheleemu, ĩla yaĩ ngalĩko ya ĩtheo ya Yelusaleme.

Andũ aingĩ nĩmookĩte Mbetheleemu kwondũ wa kũandĩkĩthwʼa. Kwoou, vayaĩ vandũ vangĩ vaseo Yosevu na Meli maĩ matonya kwĩkala eka o kĩtũũnĩ kana kyũũnĩ kya indo. Yesũ nĩwasyaĩwe kĩtũũnĩ kĩu na avwʼĩkwa ngũa na akomwʼa mũvalatĩnĩ, vala indo syanengeawa lĩu.

No nginya Ngai ethĩwe atongoesye maũndũ nĩ kana Kaisali Aukusito aumye mwĩao ũla waĩtye kana andũ nĩmaandĩkĩthwʼe. Nĩkĩ tũkwasya ũu? Nũndũ kwĩka ũu nĩkwatumie Yesũ asyaĩwa Mbetheleemu, ndũa ya ũmae wake, Mũsumbĩ Ndaviti. Maandĩko nĩmawetete tene mũno kana Mbetheleemu nĩyo ndũa ĩla Mũsumbĩ ũla wathanĩtwe ũkasyaĩwa.—Mika 5:2.

Maũndũ ala meekĩkie wĩoo ũsu maĩ ma mwanya mũno! Ve aĩthi maĩthasya ũtukũ, na maendeee kũĩthya nĩmoonie kyeni kyaumĩla, na kyeni kĩu kyaĩ ũtheu mũtisu wa Yeova. Mũlaĩka ũmwe wa Ngai nĩwaumĩlile na eea aĩthi atĩĩ: “Mũikakĩe, nũndũ sisyai! nĩmũtavya ũvoo mũseo ũla ũkaetee andũ onthe ũtanu mũnene. Nũndũ ũmũnthĩ ndũanĩ ya Ndaviti nĩkũsyaiwe mũtangĩĩi, nake nĩ Klĩsto ũla Mwĩaĩi. Na ũũ nĩwʼo wonanyʼo kwenyu: Nĩmũkwĩthĩa kana kavwʼĩkĩtwe ngũa na kakomete mũvalatĩnĩ.” Ĩvindanĩ o yĩu, alaĩka angĩ aingĩ maumĩla na masya: “Ngai nataĩwe kũu ĩũlũ mũno, na mũuo wĩthĩwe ĩũlũ wa nthĩ andũnĩ ala mamwendeeasya.”—Luka 2:10-14.

Alaĩka mamina kũthi, aĩthi maneenanisye ene kwa ene, makyasya: “No nginya tũthi Mbetheleemu tũkone ũndũ ũla weekĩka, ũla Yeova watũmanyĩthya.” (Luka 2:15) Nĩmaendie na mĩtũkĩ na meethĩa Yesũ akometwʼe mũvalatĩnĩ o tondũ mũlaĩka wameie. Yĩla aĩthi maeleisye ndeto ila mataviwʼe nĩ mũlaĩka, onthe ala meewie nĩmasengʼie mũno. Meli nĩwendeeiwʼe nĩ ndeto isu na asũanĩa mũno ĩũlũ wasyo.

Andũ aingĩ ũmũnthĩ maĩkĩĩaa kana Yesũ asyaiwe Matukũ 25, Mwei wa 12. Ĩndĩ, ndũanĩ ya Mbetheleemu, vala Yesũ wasyaĩwe, kwĩthĩawa mbua na mbevo Mwei wa 12, o na mavinda angĩ kwĩthĩawa na mbalavu mwei ũsu. Nĩ vinya mũno ĩvindanĩ yĩu aĩthi kwĩthĩwa nza ũtukũ mayĩĩthya indo syoo. O na ĩngĩ, ti laisi mũsumbĩ wa Lomi ethĩwe eeie andũ matendaa kũmwĩwʼa mathi savalĩ yesaa ũkũa mĩthenya mingĩ ĩvinda ya mbevo nĩ kana makaandĩkĩthwʼe. Kwoou, veonekana kana Yesũ asyaiwe Mwei wa 10.