Mũndũ Nĩwaaĩle Kwĩka Mawĩa Maseo Mũthenya wa Savato?

Yesũ nĩweanĩisye maũndũ maingĩ ũtavanyʼanĩ wake ĩvinda yĩla waĩ Kalilii. Ĩndĩ yĩla waisye, “No nginya nĩtavanyʼe ũvoo mũseo wa Ũsumbĩ wa Ngai ndũanĩ ila ingĩ o nasyo,” Yesũ aneeneea ĩũlũ wa kũndũ kũngĩ kwingĩ waaĩle kũthi kũtavanyʼa eka o Kalilii. Kwoou, nĩwaendie “kũtavanyʼa masinakokenĩ ma Yutia.” (Luka 4:43, 44) Aendie kũtavanyʼa kũu ĩvinda yĩla yaĩle nũndũ waĩ Mwei wa 3 kana wa 4, na mboka ya Vasaka ĩla yeethĩawa Yelusaleme nĩyathengeee.

Mavuku ma Ũvoo Mũseo maeleetye o maũndũ manini ĩũlũ wa ũtavanyʼa wa Yesũ e Yutia, twasianĩsya na maũndũ ala mavuku asu maeleetye ĩũlũ wa ũtavanyʼa wake e Kalilii. O na kau andũ aingĩ ma Yutia mayendeeawʼa mũno nĩ ũvoo mũseo, Yesũ ndaaeka kũtavanyʼa na kĩthito na kwĩka mawĩa maseo.

Ĩtina wa ĩvinda ĩnini, Yesũ nĩwaendie taoninĩ nene ya Yutia, nayo nĩ Yelusaleme, kwondũ wa Vasaka ya mwaka wa 31. Kĩsionĩ kĩmwe kyeethĩawa na andũ aingĩ vakuvĩ na Mbingĩlo ya Malondu, vaĩ ndia nene yathyũlũlũkĩtwe nĩ ituĩ nene yeetawa Vethesita. Andũ aingĩ awau, ilalinda, na andũ au mamutha nĩmaendaa ndianĩ ĩsu. Maendaa vau kwĩka ata? Mookaa vau nũndũ maĩkĩĩaa kana malika ndianĩ ĩsu yĩla kĩwʼũ kyakwaithangwʼa nĩmeũvoa.

E kũu Yelusaleme, mũthenya ũmwe wa Savato, Yesũ nĩwoonie mũndũ waĩ vakuvĩ na ndia ĩsu ya Vethesita ũla weethĩĩtwe e mũwau vandũ va myaka 38. Yesũ amũkũlilye atĩĩ: “Nũkwenda kũvoa?” Nake mũndũ ũsu amũsũngĩa amwĩa, “Mwĩaĩi, ndi na mũndũ ũtonya kũndikya ndianĩ yĩla kĩwʼũ kyakwaithangwʼa, ĩndĩ ngilasya nĩendete mũndũ ũngĩ ailika mbee wakwa.”—Yoana 5:6, 7.

Ĩtina wa ũu, Yesũ nĩwaneenie ndeto syasengʼisye mũndũ ũsu na andũ ala angĩ mamwĩthukĩĩsye. Eeie mũndũ ũsu atĩĩ: “Ũkĩla! Osa mũkeka waku na ũithi.” (Yoana 5:8) Na mũndũ ũsu waĩ mũwau nĩwavoie na ookĩla oosa mũkeka wake na athi!

Vandũ va kũtana nũndũ wa ũndũ ũsu wa kũsengyʼa weekĩkie, yĩla Ayuti moonie mũndũ ũsu mambĩĩie kwasya, “Nĩ mũthenya wa Savato, na ti ũndũ wosanĩte na Mĩao kũkua mũkeka ũsu.” Mũndũ ũsu amasũngĩie amea: “Mũndũ ũla wambosya nĩwe wambĩa, ‘Osa mũkeka waku na ũithi.’” (Yoana 5:10, 11) Ayuti asu mayaatana ĩtina wa kũmanya kana ve mũndũ wavoiwʼe mũthenya wa Savato.

Nĩkyo kĩtumi Ayuti asu makũlilye mũndũ ũla wavoiwʼe atĩĩ: “Nũũ ũsu wakwĩa, ‘Osa mũkeka waku na ũithi’?” Nĩkĩ mamũkũlilye ĩkũlyo yĩu? Nũndũ Yesũ “aĩ analika ĩkomanonĩ,” na mũndũ ũsu waĩ anavowʼa ndeesĩ ĩsyĩtwa ya ũla wamũvosya. (Yoana 5:12, 13) Ĩndĩ, mũndũ ũsu nĩwakomanie na Yesũ ĩkalũnĩ na amanya kana nĩwe wamũvoisye yĩla waĩ ũtee wa ndia.

Mũndũ ũsu wavoiwʼe nĩwesie kwona Ayuti ala mamũkũlasya ĩũlũ wa ũla ũmũvoisye. Amatavisye kana avoiwʼe nĩ Yesũ. Yĩla Ayuti asu mamanyie ũndũ ũsu nĩmaendie vala ve Yesũ. Ĩndĩ mo maendete vala ve Yesũ nĩ kana makamanye vala waumisye ũtonyi wa kwĩka maũndũ asu manene? Aiee. Mendaa kũmũmanthĩa Yesũ mavĩtyo nũndũ wa mawĩa maseo ala weekie mũthenya wa Savato. Na nũndũ wa ũu mambĩĩa kũmũthĩnyʼa!