Yesũ Nĩweanĩisye Wathani wa Isaia

Yĩla Yesũ wamanyie kana Avalisi na aatĩĩi ma Elote nĩmavangĩte kũmũaa, nĩwaendie e na amanyĩwʼa make Ũkanganĩ wa Kalilii. Andũ aingĩ nĩmookie vala ve Yesũ maumĩte kũndũ kwĩ kĩvathũkanyʼo ta Kalilii, isio syĩ ũtee wa ũkanga wa Tile na Sitoni, ngalĩko ya wumĩlonĩ wa syũa wa Ũsĩ wa Yolotani, Yelusaleme, na ngalĩko ya ĩtheo ya Itumea. Yesũ nĩwavoisye andũ aingĩ. Na nũndũ wa ũu, aingĩ ala maĩ na mowau mathũku mayaaeteela Yesũ amakiite, ĩndĩ vandũ va ũu nĩmavivinyanie mayenda mũno kũmũkiita Yesũ.—Maliko 3:9, 10.

Andũ asu maĩ aingĩ mũno nginya Yesũ eea amanyĩwʼa make mamũmanthĩe kasiwa nĩ kana ĩkomano yĩeke kũmũvivinya. O na aĩ atonya kũmanyĩsya andũ asu e o vau kasiwanĩ kana akathi kũndũ kũngĩ ũtee wa ũkanga akatetheesye andũ angĩ aingĩ.

Mathayo, ũla waĩ mũmanyĩwʼa wa Yesũ, nĩwawetie kana maũndũ asu Yesũ weekie nĩmeanĩisye ‘ndeto syaneeniwe kwĩsĩla mwathani Isaia.’ (Mathayo 12:17) Nĩ wathani wĩva Yesũ weanĩisye?

Wathani ũsu waĩtye: “Sisya! Mũthũkũmi wakwa mwendwa ũla nĩnyuvĩte na nendeeawʼa nĩwe! Ngeekĩa veva wakwa nthĩnĩ wake, na akamanyĩsya nesa andũ ma mbaĩ ingĩ ĩũlũ wa ũsili wa katĩ. Ndakateta na mũndũ, o na ndakokĩlya wasya wake, na vaiĩ mũndũ ũkewʼa wasya wake nzĩanĩ nene. Ndakatumbanga mũangi mũkonze, na vaiĩ kaũtambi keũtoa ũkavosya, nginya yĩla ũkaete ũsili wa katĩ vyũ. Kwa wʼo ki, mbaĩ ikeekwatya ĩsyĩtwa yake.”—Mathayo 12:18-21; Isaia 42:1-4.

Kwa wʼo, Yesũ nĩwe mũthũkũmi ũla Ngai wanyuvĩte na wendeeawʼa nĩwe. Yesũ nĩwoonanasya nesa ũsili wa katĩ, kĩvathũkanyʼo na ũndũ ndĩni ya ũvũngũ yeekaa. Nũndũ Avalisi nĩmavĩndũaa Mĩao ya Ngai kwa ũseleke yosane na mawoni moo, mayaĩ mesa kũtetheesya mũndũ mũwau mũthenya wa Savato! Ĩndĩ nĩ kana Yesũ onanyʼe kana nũatĩĩaa ũsili wa katĩ wa Ngai na kana e na veva wa Ngai, nĩwathũmũisye andũ kumana na syĩthĩo itaĩle ila syaatĩĩawa ĩvinda yĩu. Nũndũ wa ũu, atongoi ma ndĩni mendaa kũmũaa. Ũsu waĩ ũndũ wa kũmakya mũno!

Ndeto “ndakateta na mũndũ, o na ndakokĩlya wasya wake, na vaiĩ mũndũ ũkewʼa wasya wake nzĩanĩ nene” syoonanasya kyaũ? Ĩvinda yĩla Yesũ wavoasya andũ ndametĩkĩlasya ‘mawete we nĩwe ũũ.’ O na ndeetĩkĩlasya ndaimoni kwĩka ũu. (Maliko 3:12) Ndendaa andũ mamũmanye kwĩsĩla maũndũ ala andũ maendaa maiweta ĩũlũ wake nzĩanĩ, kana kwĩsĩla ngewa ite sya wʼo na syongeleelwe mautĩĩo ila andũ maneenaa.

O na ĩngĩ, ũvoo ũla Yesũ watavanasya nĩwakiakiasya ala mailyĩ ta mũangi mũkonze, ũkatũlwa na ũkavalũkwʼa. Andũ asu mailyĩ ta ũtambi ũtoaa syũki ũla kasinga kala katiele kakilyĩ kũthela. Kwoou Yesũ ndaĩ etĩkĩla kũmatumbanga ta mũangi mũkonze kana akeka ũndũ akatuma mekala ta kaũtambi keũtoaa na kavowʼa. Ĩndĩ vandũ va ũu, nũndũ aĩ na wendo na tei, nĩwatũmĩaa nzĩa nzeo kũtetheesya andũ ala maĩ auu. Kwa wʼo, Yesũ e weka nĩwe mbaĩ syaaĩle kũmwĩkwatya!