Mũnene wa Asikalĩ Nĩwoonanisye Mũĩkĩĩo Mũnene

Ĩtina wa Yesũ kũmina Ũtavanyʼa wa Kĩĩmanĩ, nĩwaendie ndũanĩ ya Kavelinaumi, na e kũu nĩwathokeiwe nĩ atumĩa Ayuti. Atumĩa asu matũmĩtwe nĩ mũndũ waumĩte nthĩ ĩngĩ waĩ mũnene wa asikalĩ ma Lomi.

Mũthũkũmi wa mũnene ũsu wa asikalĩ aĩ mũwau mũno, na akilyĩ kũkwʼa. Na o na kau mũnene ũsu wa asikalĩ aĩ mũndũ wa mbaĩ ingĩ, nĩwatũmanie kũla kwĩ Yesũ ayenda kũtetheewʼa. Ayuti asu matũmiwe nĩmatavisye Yesũ kana mũthũkũmi wa mũndũ ũsu “nũkomete nyũmba e na ũwau wa kwonza mamutha, na nũkũthĩna mũno.” Nĩvatonyeka mũthũkũmi ũsu akethĩwa aĩ na kyalya kingĩ mũno. (Mathayo 8:6) Atumĩa asu Ayuti nĩmaĩkĩĩthisye Yesũ kana mũnene ũsu wa asikalĩ nĩwaĩle kũtetheewʼa. Mamwĩie atĩĩ: “[Mũnene ũũ] nĩwendete nthĩ yitũ, o na we mwene nĩwatwakĩie ĩsinakoke.”—Luka 7:4, 5.

Ĩtina wa ĩvinda ĩnini, Yesũ nĩwaendanisye na atumĩa asu mũsyĩ kwa mũnene wa asikalĩ. Makilyĩ kũvika, mũnene wa asikalĩ nĩwatũmie anyanyae makamwĩe Yesũ atĩĩ: “Mwĩaĩi, ndũkethĩnyʼe, nũndũ ndyaĩlwe nĩ kũũthokya wũke nyũmba kwakwa. Kĩu nĩkyo kĩtumi nonie ndaĩlĩte kũka vala ũĩ.” (Luka 7:6, 7) O na kau mũndũ ũsu aĩ na ũkũmũ mũnene, nĩwoonanisye wĩnyivyo mwingĩ! Na ũndũ ũsu wĩonanyʼa kana mũndũ ũsu aĩ kĩvathũkanyʼo mũno na Alomi, ala mathĩnasya athũkũmi.—Mathayo 8:9.

Vate nzika, mũnene ũsu wa asikalĩ nĩweesĩ kana Ayuti mayavulanaa na andũ mate Ayuti. (Meko ma Atũmwa 10:28) Veonekana kana ũndũ ũsu nĩwʼo watumie atũma anyanyae makamwĩe Yesũ atĩĩ: “Ĩka o kũweta ndeto na mũthũkũmi wakwa nũkũvoa.”—Luka 7:7.

Yesũ nĩwasengʼiwʼe mũno nĩ ndeto isu sya mũnene wa asikalĩ, na ũu watuma asya: “Nĩngũmũtavya, o na Isilaeli ndyaaona mũĩkĩĩo ũnenevete ũu.” (Luka 7:9) Yĩla anyanyae asu ma mũnene wa asikalĩ masyokie nyũmba kwa mũnene woo, meethĩie ũla mũthũkũmi avoie.

Yesũ amina kũvosya mũthũkũmi ũsu, atũmĩie mwanya ũla waumĩlile kũmanyĩsya kana andũ mate Ayuti ala meethĩwa na mũĩkĩĩo makakwata moathimo maingĩ. Aisye atĩĩ: “Aingĩ makooka kuma wumĩlonĩ wa syũa na ũthũĩlonĩ wa syũa na makekala mesanĩ vamwe na Avalaamu, Isaka, na Yakovo Ũsumbĩnĩ wa ĩtu.” Nao nata Ayuti ala mataĩ na mũĩkĩĩo? Yesũ aisye kana “makekwʼa nza kĩvindunĩ. Na vau nĩ vo makaĩĩa na kũvevetanyʼa maeo moo.”—Mathayo 8:11, 12.

Kwoou, Ayuti ala manengetwe kĩanda kya mbee kya kwĩsa kũsumbĩka vamwe na Klĩsto maĩ malewe nĩ Ngai nũndũ wa kũlea kĩanda kĩu. Ĩndĩ Andũ-ma-mbaĩ-ingĩ nĩmesaa kũthokwʼa mekale mesanĩ ya Klĩsto, kana kwa ndeto ingĩ meĩsa kwĩthĩwa asumbĩ “Ũsumbĩnĩ wa ĩtu.”