Atĩĩa Ngelekanyʼo ya Yesũ Kwa . . .
KWĨTHĨWA NA ĨNEE
Nũndũ Yesũ aĩ mũndũ ũte na naĩ, ndaakwatwa nĩ mathĩna ala makwataa andũ. O na ũu wĩ o vo, nĩweewʼĩaa andũ tei. Nĩweethĩawa eyumĩtye vyũ kwĩka kyonthe kĩla ũtonya nĩ kana atetheesye andũ. Kwĩthĩwa na ĩnee nĩkwʼo kwatumaa enda kũtetheesya angĩ. No ũsisye ngelekanyʼo imwe nthĩnĩ wa Kĩlungu kya 32, 37, 57, na 99.
KWĨTHĨWA NA ŨNYANYA NA ANDŨ
Andũ me na ũkũũ wĩ kĩvathũkanyʼo meewʼaa matonya kũneena na Yesũ, nũndũ we ndekalaa ta mũndũ ũkwatene mũno na ndeeyonaa e wa vata kwĩ mo. Andũ meewʼaa me eanĩe yĩla me nake nũndũ nĩmoonaa aimathĩnĩkĩa. Ngewa imwe syĩkũĩkĩĩthya ũndũ ũsu syĩ Kĩlungunĩ kya 25, 27, na 95.
KŨVOYAA KĨLA ĨVINDA
Yesũ nĩwamũvoyaa Ĩthe wake kĩla ĩvinda kuma ngoonĩ, ethĩwe e weka kana e na athaithi ala angĩ ma wʼo. Avoyaa mavinda maingĩ, na ti o yĩla ũkũya. Nĩwavoyaa nĩ kana atũngĩe Ĩthe wake mũvea, amũtaĩe, na aimũkũlya amũtongoesye yĩla ũkwĩka ũtwi mũito. No ũsũanĩe ngelekanyʼo ila syĩ Kĩlungunĩ kya 24, 34, 91, 122, na 123.
KŨLEA KWĨYENDA
O na kau mavinda amwe Yesũ nũtonya kwĩthĩwa aĩ na vata wa kũthyũmũa, nĩwatũmĩaa mwanya ũsu kũtetheesya angĩ. Yesũ ndamanthaa o kwĩyĩuna. Na nengĩ ĩsu nĩ ngelekanyʼo nzeo twaĩle kũatĩĩa. No ũsisye ũndũ ũtonya kũatĩĩa ngelekanyʼo yake Kĩlungunĩ kya 19, 41, na 52.
KŨEKEAA ALA ANGĨ
Yesũ ndeekaa o kũmanyĩsya ĩũlũ wa vata wa kũekea. We nĩwaekeaa ala angĩ, na nĩwoonanisye ũu kwa kũekea amanyĩwʼa make na andũ angĩ. No ũsũanĩe ngelekanyʼo ila syĩ Kĩlungunĩ kya 26, 40, 64, 85, na 131.
KWĨTHĨWA NA KĨTHITO
Nĩkwaathanĩtwe kana Ayuti maĩ mamũlee Masia na kana amaitha make maĩ mamũae. Kwoou Yesũ aĩ atonya o kũtetheesya andũ ateũtinda aimathĩnĩkĩa mũno. Ĩndĩ vandũ va ũu, nĩwakwataa mbau ũthaithi wa wʼo na ngoo yonthe. Ĩsu nĩ ngelekanyʼo nzeo kwa aatĩĩi make ala makomanaa na ũvĩnganĩsya. Sisya Kĩlungu kya 16, 72, na 103.
KWĨTHĨWA NA WĨNYIVYO
Yesũ aĩ kĩvathũkanyʼo mũno na andũ maũndũnĩ maingĩ. Kwa ngelekanyʼo, aĩ na ũmanyi na ũĩ mwingĩ. Na nũndũ ndaĩ na naĩ, vate nzika aĩ na ũtonyi mwingĩ wa mwĩĩ na wa kĩlĩko kwĩ andũ ala angĩ. Ĩndĩ nũndũ wa wĩnyivyo nĩwathũkũmaa ala angĩ. No wĩmanyĩsye mũnango ĩũlũ wa ũndũ ũsu Kĩlungunĩ kya 10, 62, 66, 94, na 116.
KWĨTHĨWA NA WŨMĨĨSYO
Yesũ nĩwoonanisye mavinda maingĩ kana nũkũmĩĩsya atũmwa make na andũ angĩ ĩvinda yĩla maemawa nĩ kũatĩĩa ngelekanyʼo yake kana kũatĩĩa kĩla wamatavya. Nũndũ wa wũmĩĩsyo, Yesũ nĩwatũngĩlĩĩlaa maũndũ ala amanyĩwʼa make maĩlĩte kwĩka nĩ kana mamũthengeee Yeova. Sũanĩa ngelekanyʼo imwe ikwonanyʼa ũndũ Yesũ weethĩawa na wũmĩĩsyo ila syĩ Kĩlungunĩ kya 74, 98, 118, na 135.