Mwako Mũtũlu wa Mbaveli

Ĩtina wa mbua ya kĩwʼũ kingĩ, iveti ila syatwaĩtwe nĩ anake ma Noa syasyaie syana mbingĩ. Mĩsyĩ yoo nĩyanenevie na mambĩĩa kũtũa kũndũ kwĩ kĩvathũkanyʼo ĩũlũ wa nthĩ o tondũ Yeova wamatavĩtye.

Ĩndĩ andũ ma mĩsyĩ ĩmwe mayaamwĩwʼa Yeova. Kwoou masya atĩĩ: ‘Nĩtwakei ndũa twĩkalae vo. Na ĩndĩ tũyaka mwako ũmwe mũtũlu ũvike ĩtunĩ. Kĩu kĩkatuma tũmanyĩka kĩla vandũ.’

Yeova ndaatanĩthwʼa nĩ kĩla andũ asu maendeee kwĩka, na kwoou atwʼa kũũngamya mũvango woo. Nĩwĩsĩ ũndũ weekie? Eekie kyama mambĩĩa kũneena ithyomo syĩ kĩvathũkanyʼo. Na kwoou nũndũ mayaĩ mesa kwĩwʼana ĩngĩ, maũngamya wĩa wa mwako. Ĩtina ndũa ĩla maendeee kwaka yeetiwe Mbaveli, ĩla ũalyũlo wayo nĩ “Kĩthokoanyʼo.” Andũ ala maĩ ndũanĩ ĩsu nĩmambĩĩie kũthi kũndũ kwĩ kĩvathũkanyʼo na matũa nthĩ yonthe. Ĩndĩ o kũla mathi, maendeeaa kwĩka maũndũ mathũku. Ĩndĩ vo ve amwe mamwendete Yeova? Nĩtũũkwata ũsũngĩo kĩlungunĩ kĩla kĩatĩĩe.