Ũtavanyʼa wa Kĩĩmanĩ

Ĩtina wa Yesũ kũnyuva atũmwa 12, nĩwatheeie kuma kĩĩmanĩ athi vandũ vaĩ ĩkomano ĩnene ya andũ. Andũ asu maumĩte Kalilii, Yutia, Tile, Sitoni, Silia, na mũingo ũla ũngĩ wa Yolotani. Nĩmaetie andũ maĩ na mowau me kĩvathũkanyʼo na angĩ mathĩnawʼa nĩ ndaimoni. Yesũ nĩwavoisye andũ asu onthe. Na ĩndĩ ekala ngalĩko ĩmwe ya kĩĩma amasyaĩtye na ambĩĩa kũneena namo. Nĩwaeleisye kĩla twaĩle kwĩka ethĩwa nĩtũkwenda kũtwʼĩka anyanya ma Ngai. Nĩtwaĩle kũmanya kana twaĩle kũtongoewʼa nĩ Yeova na tũyĩmanyĩsya kũmwenda. Ĩndĩ tũyĩsa kũmwenda Ngai ethĩwa tũyendete andũ ala angĩ. Nĩtwaĩle kwĩthĩwa na ĩnee na tũyĩka andũ onthe nesa o na amaitha maitũ.

Yesũ aendeeie kwasya atĩĩ: ‘Mũyaĩle o kwenda anyanya menyu me oka. Nĩmwaĩle kwenda o na amaitha menyu na mũiekea andũ kuma ngoonĩ. Ethĩwa nĩwavĩtĩsya mũndũ, nĩwaĩle kũthi vala ũĩ na ũimwĩtya ũekeo. Ĩkaa andũ ala angĩ o ũndũ ũkwenda makwĩke.’

O na ĩngĩ, Yesũ nĩwanengie andũ ũtao mũseo ĩũlũ wa syĩndũ sya kĩ-mwĩĩ. Aisye-ĩ: ‘Nĩ ũndũ wa vata mũno kwĩthĩwa mũnyanya wa Ngai kwĩ kwĩthĩwa na mbesa mbingĩ. Kĩngʼei no kĩkũyĩe mbesa ila wĩ nasyo, ĩndĩ vaiĩ mũndũ ũtonya kũya ngwatanĩo yaku na Yeova. Ekai kwĩmakĩa ĩũlũ wa kĩla mũkaya, kĩla mũkanywʼa, kana kĩla mũkekĩa. Sisyai nyũnyi sya yayaya. Ngai nũĩkĩĩthasya kana syĩ na lĩu wĩanĩtye. Kwĩmakĩa kũituma mwĩyongela mũthenya ũngĩ. Lilikanai kana Yeova nĩwĩsĩ mavata menyu.’

Ĩkomano yĩu yamwĩthukĩĩsye Yesũ yĩyaĩ yaaĩwʼa mũndũ ũngĩ ũkũneena take. Atongoi moo ma ndĩni mayaĩ maamamanyĩsya maũndũ asu. Nĩ kyaũ kyatumaa Yesũ ethĩwa mũmanyĩsya mũnene? Kĩtumi nũndũ maũndũ onthe ala wamanyĩasya maumĩte kwa Yeova.