Maelesyo ma Kĩlungu kya 8

Yeova nĩwamũathimie Solomoni na ũĩ mwingĩ na amũnenga kĩanda kya mwanya kya kwaka ĩkalũ, ĩndĩ o kavola kwa kavola nĩwamũtiie Yeova. Ethĩwa wĩ mũsyai, tetheesya mwana waku amanye ũndũ athaithi ma ũvũngũ matumie Solomoni amũtia Ngai. Ũsumbĩ wake nĩwaanĩkie, na asumbĩ athũku matongoesya mbaĩ ĩsu nginya andũ asu meethĩwa me alei na mambĩĩa kũthaitha ngai sya mĩvwʼanano. Ĩvindanĩ yĩu, athani aingĩ aĩkĩĩku ma Yeova nĩmathĩniwʼe na mooawa. Mũsumbĩ mũndũ mũka, ũla weetawa Yeseveli, nĩwalikilye ũsumbĩ wa mbaĩ ĩkũmi wa Isilaeli ũthaithinĩ wa mĩvwʼanano. Yaĩ ĩvinda ĩthũku mũno kwa andũ ma Isilaeli. Ĩndĩ o na vailye ũu, kwaĩ na athũkũmi aingĩ ma Yeova aĩkĩĩku. Kwa ngelekanyʼo, Mũsumbĩ Yeosavati na mwathani Eliya.