Livoti ya Atavanyʼa ma Ũsumbĩ

Nĩwamanyie Kĩeleelo kya Kwĩthĩwa Thayũ

YESŨ aisye nũmesĩ malondu make. (Yoa 10:14) Ethĩwa mũndũ e na ngoo nzeo na nĩwendete mũuo na ũlũngalu, akendeeawʼa nĩ aatĩĩi ma Yesũ. Mũndũ ta ũsu akamantha kĩeleelo kya kwĩthĩwa thayũ, o tondũ mũndũ mũka ũmwe wa Belgium weekie. Ĩno nĩ ngewa yake:

“Yĩla Ngũsĩ sya Yeova syakũnangie mũomonĩ kwakwa, nĩnakwʼĩte ngoo mũno na navangĩte kwĩyũaa. Nĩneetĩkĩlanile namo yĩla mandavisye kĩla kĩkamina mathĩna nthĩ ĩno nthũku ĩndĩ ndyaaendewʼa yĩla mambĩie kana Ngai nĩwe ũkeanĩsya maũndũ asu. Nĩvavĩtĩte myaka nyanya kuma naeka kũthi kanisanĩ nũndũ nĩnamenete wanganganyʼa ũla weethĩawa vo. Ĩndĩ neethukĩĩsya Ngũsĩ sya Yeova, nĩnamanyie kana me na ũwʼo na ĩtina nesa kũmanya kana ti ũndũ wĩ laisi kwĩkala ũteũmũĩkĩĩa Ngai.

“Ũndũ wa kũmakya nĩ kana, ĩtina wa Ngũsĩ kũnthokea mavinda kauta, nĩtwaekie kwonana ĩngĩ. Neewie nakwʼa ngoo mũno. Nanyusaa vakiti ilĩ sya sikala kĩla mũthenya na nambĩĩa kũtũmĩa ndawa sya kũmila. Nĩkwĩthĩwa nĩnendaa kũneenanyʼa na ũmau wakwa wakwie, nĩnambĩĩie kũneenanyʼa na maveva. Neethĩawa na wia mwingĩ mũno yĩla nĩ nyioka ũtukũ nũndũ nĩnavithũkĩawa nĩ ndaimoni! Ũndũ ũsu nĩwaendeeie myei kauta. Kwavika wĩoo nĩnatelemaa nalilikana kana nĩ nyioka.

“Na ĩndĩ mũthenya ũmwe nĩnaendie vandũ kũtembea na nesĩla nzĩanĩ ndesĩlangaa. Navika vandũ nĩnoonie mwako mũnene waendeee kwakwa. Nĩnasengʼie mũno noona ve nguthu nene ya andũ. Yĩla nathengeeie, neethĩie nĩ Ngũsĩ sya Yeova maendeee kwaka Nyũmba ya Ũsumbĩ. Nĩnalilikanile ĩvinda yĩla manthokeaa mũsyĩ kwakwa, na noona wĩthĩwa wĩ ũndũ mũseo mũno keka andũ onthe ĩũlũ wa nthĩ mekalaa tamo.

“Nĩnendeeiwʼe mũno nĩ kũthokewa ĩngĩ nĩ Ngũsĩ, na kwoou naneena na amwe ala mathũkũmaa vau. Nĩnamũvoyie Ngai, na ĩtina wa mĩthenya ĩkũmi mũndũũme ũla wanthokeete mbeenĩ ooka kwakwa. Nĩwangũlilye kana no tũendeee kwĩmanyĩsya Mbivilia, na neetĩkĩla nĩ mũtanu. Atekwananga ĩvinda, nĩwanthokisye maũmbanonĩ Nyũmbanĩ ya Ũsumbĩ. Nĩneetĩkĩlile. Ndyaĩ naathi vandũ vailye ũu! Kwa ĩvinda yĩasa neethĩĩtwe ndimantha andũ mendanĩte na me na ũtanu. Na mũthya nĩnamakwatie vau!

“Ĩtina nĩnambĩĩie kũthi maũmbanonĩ onthe. Ĩtina wa vakuvĩ syumwa itatũ, nĩnaekie kũnywʼa sikala. Nĩnekisye ĩtheka mavuku ala maeleetye ngewa ya kũsoma ndata na angĩ maĩ na mbathi sya kĩ-satani, na kwoou weethĩa ndaimoni iyĩũnthĩnyʼa mũno. Nĩnambĩĩie kwĩkala kwosana na myolooto ya Yeova ĩla yĩ Mbivilianĩ, na ĩtina wa myei ĩtatũ nambĩĩa kũtavanyʼa ũvoo mũseo. Ĩtina wa myei thanthatũ nĩnavatisiwe. Na mĩthenya ĩlĩ ĩtina wa navatiswa, nĩnambĩĩe ũvainia mũtetheesya.

“Nĩnĩmũtũngĩaa Yeova mũvea kwondũ wa maũndũ onthe maseo ala ũmbĩkĩte. Yu no nasye nĩnamanyie kĩeleelo kya kwĩthĩwa thayũ. Vate nzika, ĩsyĩtwa ya Yeova nĩ mwako mũtũlu wa mũnyoolo, vala nakwatie wĩvitho na ũsũvĩo. (Nthimo 18:10) Nĩĩwʼa o tondũ mũandĩki wa savuli weewʼaa ĩla waandĩkie ũũ nthĩnĩ wa Savuli 84:10: ‘Mũthenya ũmwe nĩ nthĩnĩ wa nza syaku nĩ kavaa kwĩ mĩthenya ngili. Nĩ kavaa kwakwa kwĩthĩwa mũsũvĩi wa mũomonĩ nyũmbanĩ ya Ngai wakwa, kwĩ kwĩkalaa maeemanĩ ma ũthũku.’”

Mũndũ mũka ũsu mũuu nĩwamanyie kĩeleelo kya kwĩthĩwa thayũ. Kwoou mũndũ o na wĩva ũla ũmũmanthaa Yeova e na ngoo nzeo no amanye kĩeleelo kya kwĩthĩwa thayũ.