Nĩmakwatie Kĩndũ Kĩseango

AKLĨSTO milioni mbingĩ monaa ũte waĩlu kũtanĩa Kĩlisimasi. Ũtwi woo ũtumaa mewʼa ata? Nĩmewʼaa ta ve kĩndũ maĩtye? Nasyo syana syoo nĩsyĩwʼaa ta ve kĩndũ ikosete? Sisya wone ũndũ Ngũsĩ sya Yeova syĩwʼaa ĩũlũ wa ũndũ ũsu.

Kũmũlilikana Yesũ Klĩsto: “Ndanamba kũtwʼĩka Ngũsĩ ya Yeova, ndyaendangaa kanisanĩ. Na nesa kũthi, naendaa ĩvinda ya sikũkũ ya Kĩlisimasi, kana Isita. O na ĩvindanĩ yĩu, ndyasũanĩaa ĩũlũ wa Yesũ Klĩsto. Oyu nditanĩaa Kĩlisimasi o na vanini, ĩndĩ nĩnĩendaa maũmbanonĩ ma Kĩklĩsto kelĩ kwa kyumwa. O na ĩngĩ nĩnĩmanyĩasya andũ angĩ ũndũ Mbivilia ĩwetete ĩũlũ wa Yesũ Klĩsto!”​—EVE, kuma AUSTRALIA.

Ũtanu wa kwĩthĩwa twĩ alau: “Nĩwʼaa mũyo mũno yĩla andũ manenga mũthĩnzĩo ndataĩĩe. Nĩnendete mĩthĩnzĩo! O na ĩngĩ nĩnendete kũseũvĩsya andũ kaati, na kũmasolela mavisa nũndũ nitumaa methĩwa me atanu, o nakwa nĩndanĩaa mũno.”​—REUBEN, kuma NORTHERN IRELAND.

Kũtetheesya ala matetonya: “Nĩtũtanĩaa kũuwĩa andũ ala awau malĩu. Mavinda amwe tũmatwaĩaa malaa, keki, kana o kamũthĩnzĩo kanini katonya kũmatanĩthya. Nĩtũtanaa mũno nũndũ no tũmathokee ĩvinda o na yĩva mwakanĩ.”​—EMILY, kuma AUSTRALIA.

Kwĩthĩwa vamwe na andũ ma mũsyĩ: “Yĩla twakomana vamwe, syana sitũ nimanyanaa nesa na aa-ũsũe, aa-ũmae, na andũ angĩ ma mũsyĩ nũndũ mavindanĩ asu tũyĩthĩawa na maũndũ maingĩ. Nũndũ ti nginya twĩke ũu o yĩla kwĩ sikũkũ, ũndũ ũsu ndũtũthĩnasya mũno, na andũ maitũ ma mũsyĩ nĩmesĩ kana tũendaa kũmona nũndũ nĩtũmendete.”​—WENDY, kuma CAYMAN ISLANDS.

Mũuo: “Ĩvindanĩ ya sikũkũ ya Kĩlisimasi kwĩthĩawa na maũndũ maingĩ mũno na nĩkyo kĩtumi andũ aingĩ matasũanĩaa ĩũlũ wa mũuo. Nĩnĩmanyĩĩtye kĩla Mbivilia yathanĩte ĩũlũ wa andũ na nĩkyo kĩtumi nĩwʼaa nĩmwĩanĩe. Nĩnĩsĩ nesa vyũ kana syana syakwa ikatanĩa thayũ ĩvinda yũkĩte.”​—SANDRA, kuma SPAIN.