Kũthayũũkwʼa kwa Yesũ Kũkatuma Andũ Makwata Thayũ Ũtathela

ŨTHAYŨŨKYO wa Yesũ ti ũndũ weekĩkie tene ũkethĩa ndũtonya kũtũtethya ũmũnthĩ. Mũtũmwa Vaulo nĩwawetie vata wa ũthayũũkyo wa Yesũ ĩla waandĩkie ũũ: “Klĩsto nĩwathayũkiwʼe kuma kwa akwʼũ, ũsyao wa mbee wa ala makomete. Nũndũ nĩkwĩthĩwa kĩkwʼũ nĩkyookie kwondũ wa mũndũ, kũthayũũka kwa akwʼũ nakwʼo nĩkwookie kwondũ wa mũndũ. Nũndũ o ũndũ onthe makusaa nthĩnĩ wa Atamu, o ta ũu nthĩnĩ wa Klĩsto onthe makeethĩwa thayũ.”—1 Akolintho 15:20-22.

Yesũ athayũũkiwʼe Nisani 16 mwaka wa 33 Ĩ.Y., mũthenya ũla Ayuti mathembeaa Yeova Ngai ũsyao wa mbee wa ngetha yoo ĩkalũnĩ Yelusaleme. Ĩla Vaulo weetie Yesũ ũsyao wa mbee, oonanasya kana ve andũ angĩ makathayũũkwʼa.

Ndeto ila iatĩĩe sya Vaulo nĩsyonanĩtye ũndũ kũkethĩwa nũndũ wa ũthayũũkyo wa Yesũ. Aisye: “Nũndũ nĩkwĩthĩwa kĩkwʼũ nĩkyookie kwondũ wa mũndũ, kũthayũũka kwa akwʼũ nakwʼo nĩkwookie kwondũ wa mũndũ.” Ithyonthe nĩtũkusaa nũndũ tũi eanĩu na nĩtwakwatie naĩ kuma kwa Atamu. Ĩndĩ, ĩla Yesũ weeyumisye ethĩwe nthembo ya wovosyo, nĩwavingũie nzĩa nĩ kana andũ methayũũkwʼa na maithawʼa kuma ũkombonĩ wa naĩ na kĩkwʼũ. Ayĩelesya ũndũ ũsu nesa, Vaulo aandĩkie ũũ nthĩnĩ wa ĩandĩko ya Alomi 6:23: “Ĩtuvi ya naĩ nĩ kĩkwʼũ; ĩndĩ mũthĩnzĩo wa Ngai nĩ thayũ ũtathela nthĩnĩ wa Klĩsto Yesũ Mwĩaĩi waitũ.”

Yesũ nĩwaeleisye kĩla tũkakwata nũndũ wa kĩkwʼũ kyake na ũthayũũkyo wake. Yesũ aineena ĩũlũ wake mwene, aisye atĩĩ: “Mũvaka Mwana wa mũndũ okĩlwʼe ta ũu: nĩ kana o ũla ũmwĩtĩkĩlaa ethĩwe na thayũ ũtathela. Nũndũ Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”—Yoana 3:14-16.

Kwasũanĩa ũyĩkala tene na tene vate woo, thĩna, kana kĩmeto! (Ũvuanʼyo 21:3, 4) Ũsu nĩ wĩkwatyo mũseo ta kĩ! Mũsomi ũmwe ayĩelesya ũndũ ũsu aisye atĩĩ: “O na kau mbũa itũlilikanasya ũndũ thayũ ũkuĩvĩte, ũthayũũkyo ũĩkĩĩthasya kana kĩkwʼũ kĩ na ĩvinda ĩkuvĩ.” Vate nzika, ũthayũũkyo wa Yesũ ũkatuma andũ makwata thayũ ũtathela.