Nĩkĩ Andũ Mekũlasya Ĩkũlyo Yĩu?

“Wĩ ũmwe katĩ wa andũ milioni mbingĩ ala monaa vate vata wa kũtongoewʼa nĩ Ngai thayũnĩ woo?” Ĩkũlyo yĩu yĩnaĩ ĩtangasonĩ ya mĩtũkĩ ya kĩkundi kya andũ mataĩkĩĩaa kana kwĩ Ngai. Andũ asu monaa Ngai ate wa vata thayũnĩ woo.

O namo ala maĩkĩĩaa kana kwĩ Ngai mekaa motwi ũkethĩa o na ti ta mamũĩkĩĩaa ũ Ngai. Mũtongoi ũmwe wa ĩkanisa ya Katholeki wĩtawa Salvatore Fisichella aisye atĩĩ: “Watũsisya nesa, nĩvatonyeka ũkethĩa ndũmanya kana twĩ Aklĩsto, nũndũ mĩkalĩle yitũ ĩvwʼanene na ya andũ ala mate Aklĩsto.”

Andũ angĩ namo methĩawa makwatene mũno ũkethĩa mayĩsa kwĩsilya ĩũlũ wa Ngai. Monaa e vaasa vyũ ũndũ ũtatonya kwĩkwatwʼa mũno. Andũ ta asu mesaa kũmũlilikana Ngai o ĩla me thĩnanĩ. Mamwonaa ta mũthũkũmi wa kwĩtawa ĩla vaumĩla vata.

O na ve angĩ matonaa ve vata wa kũatĩĩa maũndũ ala memanyĩasya ndĩninĩ syoo nũndũ monaa maũndũ asu matesa kũmatethya. Kwa ngelekanyʼo, nthĩnĩ wa nthĩ ya Germany andũ 76 katĩ wa 100 ma ĩkanisa ya Katholeki maĩkĩĩaa kana ti naĩ kwa mũndũũme na mũndũ mũka kwĩkalanyʼa vamwe matatwaanĩte. Mekaa ũu o na vala ũndũ ũsu nũleanĩte na momanyĩsyo ma ĩkanisa yoo, na momanyĩsyo ma Mbivilia. (1 Akolintho 6:18; Aevelania 13:4) Ti andũ ma Katholeki oka mataatĩĩaa maũndũ ala maĩkĩĩaa. Atongoi ma ndĩni ingĩ syĩ kĩvathũkanyʼo maasya kana mĩkalĩle ya aatĩĩi ma ndĩni syoo no ũndũ ũmwe na ya andũ ala mate etĩkĩli.

Maũndũ asu onthe no matume twĩkũlya ĩkũlyo yĩĩ: We Ngai nĩ wa vata thayũnĩ witũ? Ti ũndũ mũeni kwĩkũlya ũu nũndũ ĩvuku ya Mwambĩlĩlyo nĩyonanĩtye ũndũ ũsu. Nĩ kana tũkwate ũsũngĩo wa ĩkũlyo yĩu, ekai tũsisye maũndũ mana maumĩlilwʼe na monanĩtwʼe ĩvukunĩ ya Mwambĩlĩlyo.