Yesũ Klĩsto Nĩ Kana Kanini, Kana Nĩ Mũsumbĩ wĩ Vinya?

Mweinĩ wa ĩkumi na ilĩ, andũ aingĩ ĩũlũ wa nthĩ nĩmonaa mavisa ma Yesũ e kana. Onekaa akometwʼe mũvalatĩnĩ, kana ĩsandũkũnĩ ĩnene vala ngʼombe syeekĩĩawa lĩu. Ĩndĩ, twaĩle kũmũlilikana Yesũ o ta kana kanini?—a Ekai twone ũndũ ũmwe wa vata twaĩle kũlilikana ĩũlũ wa Yesũ. Tũtonya kwĩmanyĩsya ũndũ ũsu kumana na ũndũ kweethĩiwe ĩla aĩthi maĩthasya ũtukũ vakuvĩ na Mbethelemu.

Mũlaĩka amaumĩlĩile aĩthi asu matataĩĩe na amea: “Ũmũnthĩ . . . nĩmũsyaĩwe Mũtangĩĩi, nake nĩ Klĩsto ũla Mwĩaĩi.” O na nĩwaendeeie kũmatavya kana makeethĩa Yesũ ‘avwʼĩkĩtwe ngũa sya ũkenge, akometwʼe mũvalatĩnĩ.’ O kavindanĩ kaũ, alaĩka angĩ aingĩ nĩmaumĩlile na mambĩlĩlya ‘kũmũkumya Ngai.’

We wĩwʼa ata ũkewʼa alaĩka maimũtaĩa Ngai?— Aĩthi nĩmatanie! Aĩthi asu maisye: “Tũendei yu Mbethelemu, tũsisye ũndũ ũũ ũla weekĩka.” Ĩla maendie meethĩie “Meli na Yosevu, na kala kaũkenge [kakometwʼe] mũvalatĩnĩ.”

Ĩtina wa kavinda, andũ angĩ nĩmookie Mbethelemu kũmona Meli na Yosevu. Ĩla mookie, aĩthi nĩmamatavisye maũndũ ala meekĩkie, na masengʼa mũno. We wĩ na ũtanu nũndũ wa kũmanya maũndũ asu ma kwendeesya?—Ithyonthe ala tũmwendete Ngai nĩtũtanaa. Eka yu twone nĩkĩ andũ matanie mũno nũndũ wa kũsyawa kwa Yesũ. Nĩ kana tũmanye kĩtumi, no nginya tũsisye maũndũ ala meethĩiwe Meli atanamba kũtwawa.

Mũthenya ũmwe mũlaĩka wĩtawa Kavilieli nĩwamumĩlĩile Meli. Amwĩie kana akasyaa mwana ũla wĩĩthĩwa “e mũnene na aketawa Mwana wa Ũla Wĩ Ĩũlũ wa Onthe.” Mũlaĩka ũsu ongeleeile kwasya kana Yesũ “nũkasumbĩka . . . na ũsumbĩ wake ndũkethĩwa na mũminũkĩlyo.”

Meli nĩwendaa kũmanya ũu ũtonyeka ata na ndaĩ aakoma na mũndũũme. Kwondũ wa ũu, mũlaĩka Kavilieli amwĩa: ‘Vinya wa Ũla wĩ Ĩũlũ wa Onthe ũkamwĩkĩa vinya’ na “kĩla kĩtheu kĩsyawa kĩketawa Mwana wa Ngai.” Ngai eekie kyama kĩnene mũno kũthamya thayũ wa Mwana Wake, na kũwĩkĩa ĩvunĩ ya Meli nĩ kenda asyawe e kana!

Waaona mavisa monanĩtye ala andũ atatũ “oĩ” mokĩte kũmwona Yesũ me vamwe na aĩthi?—Mavisa asu nĩmonekaa kũndũ kwingĩ ĩvinda ya Kĩlisimasi. Ĩndĩ, maũndũ ala methĩawa monanĩtwʼe mavisanĩ asu ti ma wʼo. Andũ asu “oĩ” maĩ andũ ala mathanaa maitũmĩa ndata, na Ngai nũleete ũndũ ũsu. Kwaeka twone ũndũ kweethĩiwe ĩla mavikie. Mbivilia yaĩtye: ‘Ĩla malikile nyũmba nthĩnĩ nĩmoonie kana vamwe na Meli inyia wako.’ Ũu wĩonanyʼa kana ĩvinda yĩu Yesũ ndaĩ kaũkenge kakometwʼe mũvalatĩnĩ, ĩndĩ ekalaa nyũmba e na asyai make!

Andũ asu oĩ mamanyie ata vala Yesũ waĩ?— Matongoewʼe nĩ “ndata.” Ndata ĩsu ndyaamatwaa ĩmwe kwa ĩmwe Mbethelemu, ĩndĩ yamatwaie Yelusaleme kwa Mũsumbĩ Elote. Mbivilia yaĩtye kana Elote endaa kũmanya vala Yesũ waĩ nĩ kana amũae. Yu kwasũanĩa ũndũ ũũ: Nũũ ũla watumie kĩndũ kyu kyailye ndata kĩmatongoesya andũ asu oĩ mathi kwa Elote?— Ti Ngai ũla wa wʼo, Yeova, ĩndĩ nĩ mũmaitha wake Satani Ndevili!

Ũmũnthĩ Satani endaa andũ mamwone Yesũ ta kana kanini katetonya. Ĩndĩ mũlaĩka Kavilieli amwĩie Meli atĩĩ: “Nũkasumbĩka . . . na ũsumbĩ wake ndũkethĩwa na mũminũkĩlyo.” Yesũ yu nĩ Mũsumbĩ ĩtunĩ, na o mĩtũkĩ akamananga amaitha ma Ngai onthe. Ũndũ ũsu nĩwʼo twaĩle kũlilikana ĩũlũ wa Yesũ na kũmatavya ala angĩ.