Ndũkatate Kũtĩa

Wĩoo wa mũthya Yesũ atambĩte kũawa, nĩweeaĩe amanyĩw’a make aĩkĩĩku malilikanae kĩkw’ũ kyake. Ambĩĩisye mboka ĩla yĩtawa Kyaũya kya Wĩoo kya Mwĩaĩi aitũmĩa mũkate ũte ĩlawa na mbinyu ndune, na ĩndĩ amea: “Ĩkaai ũu ũndũ wa kũndilikana.”—Luka 22:19.

Ngũsĩ sya Yeova nthĩ yonthe nĩsyũmbanaa kĩla mwaka nĩ kana ililikane ĩla Yesũ wakwie. Mwaka wa 2014, kĩkw’ũ kya Yesũ kĩkalilikanwa Wakwambĩlĩlya, Matukũ 14, Mwei wa 4, syũa yathũa.

Wĩmũthokye mũno ũke ũmbanonĩ ũũ. Ve ũvoo ũkaumw’a ũla ũkaelesya maũndũ maingĩ ĩũlũ wa vata wa kĩkw’ũ kya Yesũ. Kũlika nĩ mana na andũ maiketw’a mbesa. Mũndũ ũla ũnaũnengie ĩkaseti yĩĩ no akũelesye saa na vala ũmbano ũsu wa kũlilikana kĩkw’ũ kya Yesũ ũkekĩwa kĩsionĩ kyenyu, kana no ũsisye Kĩsese kitũ kya jw.org/kam. Wĩkũlw’a ũandĩke matukũ ma mũthenya ũsu vandũ nĩ kana ũũlilikane. Twĩĩkwatya ndũkatĩa.