Amwe Nĩmeanĩĩte, Ĩndĩ Maingĩ Mayaaĩanĩa

We no wende kũmanya ĩũlũ wa ĩvinda yaku yĩla yũkĩte? Andũ aingĩ nĩmendete kũmanya ũvoo wa ĩvinda yũkĩte. Aingĩ nĩmathanaa ĩũlũ wa maũndũ ala me mbee, ĩndĩ amwe nĩmeanĩaa na angĩ mailea kwĩanĩa. Kwasũanĩa ngelekany’o ii iatĩĩe:

• ANDŨ MA SAENZI matũmĩaa masinĩ iseũvĩtw’e na ũtũĩka mũnene na maitũmĩa mbesa mbingĩ mũno mathane maũndũ me kĩvathũkany’o, ta kĩla kĩkakwata nthĩ nũndũ wa kũthokoanw’a, na ethĩwa mbua nĩkua kana ndĩua.

• ASOMI ALA MAKUNĨKĨLAA MAŨNDŨ nĩmathanaa ĩũlũ wa ũndũ maũndũ ma viasala na siasa makethĩwa mailyĩ. Warren Buffett, ũla nĩ ũmwe katĩ wa andũ ala athwii vyũ ĩũlũ wa nthĩ, nũnengetwe ndaĩa ta mũndũ mũĩ mũno nũndũ wa kũendeea nesa viasalanĩ syake. Mũsomi ũngĩ wa kũkunĩkĩla maũndũ wĩtawa Nate Silver nĩwĩkaa ũkunĩkĩli nĩ kana athane kĩla kĩkethĩwa siasanĩ sya nthĩ ya Amelika, na ũla ũkanengwa mũthĩnzĩo nĩ kambuni ya sinema ĩla yĩtawa Hollywood.

• MAŨNDŨ MA ĨVINDA YA TENE ũmũnthĩ nĩmatũmĩawa nĩ andũ amwe ta wathani. O na kau maũndũ ala maandĩkĩtwe myakanĩ ya 1500 nĩ Michel de Notredame (Nostradamus) maieleekaa nesa, ũmũnthĩ andũ amwe mamonaa ta wathani ũendee kwĩanĩa. O na ĩngĩ, andũ amwe nĩmatũmĩie kalenda ka Maya kwathana kana kwĩ Matukũ 21, Mwei wa 12, 2012, kũkeekĩka maũndũ mathũku mũno.

• ATONGOI MA NDĨNI mavinda angĩ nĩmathanaa kana nĩkũkumĩla ũndũ mũthũku ĩũlũ wa nthĩ nĩ kenda makany’e andũ na maikwata aatĩĩi. Mwathani wa maũndũ mathũku ma mũthenya wa mũminũkĩlyo ũla wĩtawa Harold Camping, vamwe na aatĩĩi make nĩmatangasie mũno kana nthĩ yaĩ yanangwe mwaka wa 2011. Ĩndĩ ũsengy’o nĩ kana ndyaanangwa.

• ANDŨ AWE namo maasya kana me na ũtonyi wa mwanya wa kwathana ĩũlũ wa ĩvinda yĩla yũkĩte. Amwe moo ta Edgar Cayce na Jeane Dixon nĩmathanie maũndũ amwe na meanĩa myakanĩ ya 1900. O na ĩngĩ kĩla ũmwe woo nĩwathanie maũndũ maingĩ na maema kwĩanĩa. Kwa ngelekany’o, Dixon athanie kana mwakanĩ wa 1958 kũkaumĩla Kaũ wa Katatũ wa Nthĩ Yonthe, nake Cayce athanie kana myakanĩ ya 1970 mũsyĩ wa New York ũkavota ũkanganĩ.

Ve nzĩa nzeo ya kũmanya maũndũ ma ĩvinda yũkĩte? Yĩu nĩ ĩkũlyo ĩseo. Nĩkĩ? Nũndũ kũmanya maũndũ ala makekĩka ĩvinda yũkĩte nĩkũtonya kũũtetheesya kwĩka motwi.