KYONGO KYA ĨTHANGŨ YA MBEE | ŨSUMBĨ WA NGAI—ŨKAŨTETHYA ATA?

Ũsumbĩ Wa Ngai Ũkaũtethya ata?

No kwĩthĩwa ĩla wasoma ilungu ila syĩ ĩtina wa kĩĩ wamanya kana Ngũsĩ sya Yeova nĩsyendete mũno Ũsumbĩ wa Ngai. Na no kwĩthĩwa ĩtina wa kũisoma wenda mũno kwona maũndũ amwe maseo Ũsumbĩ wa Ngai ũkeka ĩvinda yũkĩte. Ĩndĩ o na vailyĩ ũu, nĩvatonyeka ũkethĩwa wasaanĩw’a nĩ mawatho asu na ũyambĩĩa kwona ta ũũota nũndũ tũyaaona maũndũ maseũvĩte ũu.

Ti ũthũku kwĩthĩwa na woni ũsu. Nĩkĩ? Nũndũ ti ũseo kwĩtĩkĩlaa o kĩla ndeto watavw’a. (Nthimo 14:15) No tũkũelekany’e na andũ amwe ma tene matwĩe ndũanĩ yeetawa Velia.a Ĩvinda yĩmwe nĩmataviw’e ũvoo mũseo wa Ũsumbĩ, na mawĩtĩkĩla. Ĩndĩ mayaawĩtĩkĩla nĩkwĩthĩwa atĩ meekie o kũwenda. Vandũ va ũu, mambie kũmantha Maandĩkonĩ “kana maũndũ asu nĩw’o mailyĩ.” (Meko ma Atũmwa 17:11) Ũu nĩ kwasya kana andũ ma Velia masomie Maandĩko masisye ethĩwa nĩmosanĩte na ũvoo ũla mataviw’e. Nũndũ wa ũu, nĩmesie kũĩkĩĩa vyũ kana ũvoo ũsu mũseo mataviw’e ndwaumĩte vangĩ eka o Ndetonĩ ya Ngai.

Ngũsĩ sya Yeova mekwĩkĩa vinya wĩke o ta andũ ma Velia. Nũndũ nĩmemanyĩasya na andũ Mbivilia mana, ĩtĩkĩla wĩmanyĩsye namo nĩ kana ũsisye ethĩwa maũndũ ala maĩkĩĩaa ĩũlũ wa Ũsumbĩ wa Ngai nĩmosanĩte na Mbivilia.

Weetĩkĩla kwĩmanyĩsya, ve o maũndũ angĩ ũkamanya. Ũkakwata mosũngĩo ma makũlyo ma vata mũno ala andũ mekũlasya.

Ĩndĩ ũndũ ũla wa vata vyũ nĩ kana kwĩmanyĩsya Mbivilia kũkatuma ‘ũmũthengeea Ngai.’ (Yakovo 4:8) Na ĩndĩ waendeea kũmũthengeea Ngai, ũkaeleawa nesanga ũndũ Ũsumbĩ wa Ngai ũtonya kũũtethya ũmũnthĩ na ũndũ ũkaũtethya ĩvinda yũkĩte. Yesũ avoyie Ĩthe akyasya: ‘Thayũ ũtathela nĩw’o ũũ, nĩ kana makũmanye we Ngai ũla wa w’o weka, na ũla wamũtũmie, nake nĩ Yesũ Klĩsto.’—Yoana 17:3.

Ngũsĩ sya Yeova no syĩmanyĩsye Mbivilia naku iitũmĩa ĩvuku yĩĩ.

Nĩ kana ũkwate mũndũ wa ũkũmanyĩsya Mbivilia mana, neena na ũmwe wa Ngũsĩ sya Yeova kana usũsye vomu ĩla yĩ Kĩsesenĩ kya www.jw.org/kam. (Wavingũa Kĩsese oou, sisya vala vaandĩkĩtwe KŨLYA ŨMANYĨW’E MBIVILIA)

a Ndũa ya Velia yaĩ vandũ veetawa Masetonia.

Nĩkendete Mũno Ũsumbĩ wa Ngai

O mĩtũkĩ kamwĩlĩtu ka myaka ĩkũmi ketawa Folake kaneeiwe nĩ mwalimũ wako kaandĩke ũvoo wĩ na kyongo, “Kĩla Nendete Vyũ Ĩũlũ wa Nthĩ.” Kamwĩlĩtu kau kanaandĩkie ũvoo ũeleetye nĩkĩ ko kendete kũtavya angĩ ĩũlũ wa Ũsumbĩ wa Ngai.

Kanaandĩkie: “Ũsumbĩ wa Ngai nĩ silikalĩ.” Na ĩndĩ kanasya, “Ĩndĩ ndũtonya kũwona, o na weekĩa mĩwanĩ!”

Kanaendeeie kũelesya ĩũlũ wa maũndũ ala kendaa kwĩsa kwona mũno Ũsumbĩ ũsu ũyĩka. Nĩkanaandĩkie ĩũlũ wa mathĩna amwe ala Ũsumbĩ ũkavetanga, kasya, “Nĩw’aa woo ĩla noona andũ mailyĩ kũũ malelũnĩ mate na vandũ va kũtũa” kana “syana sya nthĩ syĩ kĩvathũkany’o iikw’a nĩ nzaa.” Na ĩndĩ kasyoka kwasya, “Ĩndĩ ĩla nasoma ĩandĩko ya Isaia 65:21, nĩndanaa.” Mũsoa ũsu ũwetete ĩũlũ wa ala makekala ungu wa Ũsumbĩ wa Ngai. Waĩtye: “Makaaka nyũmba, na kũtũa nthĩnĩ wasyo; na makavanda mĩũnda ya mĩsavivũ, na makaya ũsyao wayo.”

Kanaisye kana keteele mũno keona ĩvinda yĩla Ngai ũkavetanga mowau onthe aitũmĩa Ũsumbĩ wake. Nthĩnĩ wa ũvoo ũsu wako nĩkanawetie ĩandĩko ya Ũvuan’yo 21:4, yĩla yaĩtye kana Ngai “akavyaĩa methoi onthe methonĩ moo; na kĩkw’ũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo.” Kaiminĩĩa ũvoo ũsu wako kanasyokie kũweta ĩngĩ kana kũneena ĩũlũ wa Yeova na Ũsumbĩ wake nĩw’o ũndũ ũla kendete vyũ ĩũlũ wa nthĩ. Vate nzika, kamwĩlĩtu kau nĩkendete mũno Ũsumbĩ wa Ngai!