“No Nĩendeee Kũkwata Mosyao Meũmũtaĩa Yeova”

ĨKASETI ya The Watch Tower ya 01/09/1915 yaisye ũũ: “Makaũ onthe ma tene ti kĩndũ wamasianĩsya na kaũ mũnene ũla ũendeee yu ngalĩko ya Europe.” Yawetie ũu yĩyĩelesya ĩũlũ wa ũla kaũ wa mbee wa nthĩ yonthe, ũla wesie kũkitwa nĩ nthĩ ta 30. Na nũndũ wa ũthũ ũla waĩ vo ĩvinda yĩu, ĩkaseti ya The Watch Tower yawetie atĩĩ: “Wĩa [wa Ũsumbĩ] nũsiĩĩwe kwa nzĩa ĩmwe kana ĩngĩ, na mũno mũno nthĩ ya Germany na France.”

Ĩvindanĩ yĩu kaũ ũsu wavyũvĩte nthĩ yonthe, Amanyĩwʼa ma Mbivilia mayaeleawa nesa ũndũ matonya kũatĩĩa ũla mwolooto ũtongoeasya Aklĩsto maũndũnĩ ma kaũ na siasa na kwoou amwe nĩmalikile kaũnĩ. Ĩndĩ vailyĩ oou, nĩmatwʼĩte vyũ kũtavanyʼa ũvoo mũseo. Kwa ngelekanyʼo, nũndũ Wilhelm Hildebrandt nĩwendaa kũthũkũma a vake wĩanĩ wa Ũsumbĩ, nĩwakũlilye atũmĩwe kovi sya tulakiti yeetawa The Bible Students Monthly ya kĩthyomo kya French. Ndaendete France ta kolovota (mũtavanyʼa wa ĩvinda yonthe), ĩndĩ aendete kũu e mũsikalĩ wa Germany. Nĩwatavasya andũ ma France ala mavĩtĩte nzĩanĩ ũvoo mũseo wa mũuo. Andũ asu matiawa masengʼete nũndũ Wilhelm eethĩawa ekĩĩte ngũa sya ita na aĩ mũsikalĩ wa Germany, ala maĩ nthũ syoo.

Valũa ila syesie kũtumbĩthwʼa ĩkasetinĩ ya The Watch Tower syonanĩtye kana Amanyĩwʼa angĩ ma Mbivilia ma Germany nĩmoonaa maĩle kũtavanyʼa ũvoo mũseo me o itanĩ. Kwa ngelekanyʼo, Mwana-a-asa Lemke aĩ wa ita sya kĩwʼũnĩ na aisye kana atano katĩ wa ala weethĩawa namo nĩmendeeiwʼe mũno. Aisye: “O na nĩ melinĩ ĩno no nĩendeee kũkwata mosyao meũmũtaĩa Yeova.”

Nake Georg Kayser aendie kaũnĩ e mũsikalĩ ĩndĩ ayĩnũka enũkie e mũthũkũmi wa Ngai. Ũu watonyekie ata? Akwatie ĩvuku yĩmwe ya Amanyĩwʼa ma Mbivilia, eetĩkĩla na ngoo yonthe ũwʼo wa Ũsumbĩ ũla waĩ ĩvukunĩ yĩu, na ĩndĩ atwʼa kũmba nthĩ mĩio yake ya kaũ. Ĩtina oosie wĩa ũte kũmũlikya kaũnĩ ĩmwe kwa ĩmwe. Kaũ wathela nĩwatwʼĩkie vainia wĩ kĩthito kwa myaka mingĩ.

O na kau Amanyĩwʼa ma Mbivilia mayaeleawa nesa mwolooto wa kũlea kwĩlikya kaũnĩ na siasanĩ, woni woo na mwĩkalĩle woo waĩ kĩvathũkanyʼo vyũ na wa andũ ala angĩ malikile kaũnĩ. Kwa ngelekanyʼo, andũ ma siasa na atongoi ma ndĩni makwatie mbau nthĩ syoo kaũnĩ ũsu, ĩndĩ mo Amanyĩwʼa ma Mbivilia malũmanĩtye na ũla “Mũnene wa Mũuo.” (Isa. 9:6) O na kau amwe moo mayaatĩĩa nesa vyũ ũla mwolooto ũvatanĩte kũlika kaũnĩ na siasanĩ, nĩmalũmĩtye ũwʼo wa vata ũla wawetiwe nĩ Mũmanyĩwʼa wa Mbivilia weetawa Konrad Mörtter. Aisye: “Nĩneesĩ nesa vyũ kuma Ndetonĩ ya Ngai kana Mũklĩsto ndaĩle kũaana.”—Kuma 20:13.a

Mĩao ya nthĩ ya Germany ndyawetete wĩa ũngĩ ũla mũndũ waĩ atonya kũtethya ethĩwa nĩwalea kũlika itanĩ nũndũ wa wasya wake wa ngoo. Na kwoou Amanyĩwʼa ma Mbivilia mbee wa 20 ma nthĩ ĩsu mayaaĩtĩkĩla kwĩlikya itanĩ o na vanini. Nũndũ wa ũu, amwe moo moonekaa ta andũ awau mĩtwe. Ũmwe wa asu aĩ Gustav Kujath, ũla watwaiwe vala vasũvĩĩawa andũ ma ndũũka na anengwa ndawa sya kũmũmila. O nake Hans Hölterhoff nĩwaleile kũlika itanĩ na ũu watuma atwawa yela, vala waleile wĩa wʼonthe ũkonetye kaũ. Asungi ma yela mamwovanisye nginya aanda moko. Na ĩla asungi moonie ndanavĩndũka, mamwosie na meelitya nĩmeũmũaa. Ĩndĩ Hans aendeeie kwĩthĩwa e mũlũmu nginya kaũ ũsu wathela.

Ana-a-asa angĩ ala meetĩkĩlile kũlika itanĩ nĩmaleile kũkua mĩio ya kaũ na makũlya manewe wĩa ũngĩ ũte wa kũkita ĩmwe kwa ĩmwe.b Johannes Rauthe nũmwe wa asu na anengiwe wĩa kĩsesenĩ kya ngalĩ ya mwaki. Nake Konrad Mörtter anengiwe wĩa wa kũtetheanĩsya na matakĩtalĩ, nake Reinhold Weber atwʼĩka mũtetheesya wa ndakĩtalĩ. Na ĩndĩ August Krafzig nĩweewie mũyo mũno nũndũ wĩa ũla waaĩwe ndwaatuma athi kũkita. Amanyĩwʼa asu ma Mbivilia vamwe na angĩ o tamo nĩmatwʼĩte kũmũthũkũma Yeova kwosana na kĩla meesĩ ĩũlũ wa wendo na ũĩkĩĩku.

Nũndũ wa mwĩkalĩle woo ĩvindanĩ yĩu ya kaũ, Amanyĩwʼa ma Mbivilia nĩmambĩĩe kũsiwʼa mũno nĩ silikalĩ. Myakanĩ ĩla yaatĩĩe Amanyĩwʼa ma Mbivilia ma Germany maĩ na makoani maingĩ mũno kotinĩ nũndũ wa wĩa woo wa kũtavanyʼa. Ovisi wa ũvonge wa Germany, ũla waĩ Magdeburg, nĩwaseũvisye kamitii ya maũndũ ma mĩao nĩ kana ĩmatetheesye.

Ngũsĩ sya Yeova nĩsyaendeeie kwongelanga ũmanyi woo ĩũlũ wa mwolooto ũla ũkonetye kwĩlikya kaũnĩ. Kwoou ĩla kaũ wa kelĩ wa nthĩ yonthe wambĩĩe, nĩmaatĩĩe mwolooto ũsu nesa kwa kũlea kwĩlikya itanĩ o na vanini. Nũndũ wa ũu matalilwe ta nthũ sya Silikalĩ ya Germany na mathĩnwʼa mũno. Ĩvindanĩ yĩngĩ tũkaneenea ũvoo ũsu nthĩnĩ wa kĩlungu kĩĩ kya “Kwĩlilikanyʼa Maũndũ ma Tene.”—Kwĩlilikanyʼa maũndũ ma tene ma Central Europe.